疫情要自強，睇劇都睇啲學到嘢嘅，今次分享有喺Netflix 上架嘅POSE，睇下七八十年代美國嘅邊緣跨性別同志們點樣團結求存，順便回顧下4大重點。

章節

開始時間	標題
00:01:39	House 文化嘅重要性
00:04:00	同是天涯的Chosen Family
00:05:00	比較不同年代影視作品中的跨性別
00:06:20	多重身分交織下嘅邊緣性/別小眾
00:09:40	有色人種的差別待遇
00:10:25	HIV恐慌與男同志污名化
00:12:13	兩個愛滋運動元素
00:16:00	另一套講House 文化嘅紀錄片
00:17:00	我哋用咩角度去了解性小眾？
00:19:05	劇後心得

關鍵字：

• U=U：Undetectable = Untransmittable，測不到病毒=不具傳染力。指穩定接受抗病毒療法的愛滋感染者，其血液中的病毒量若持續六個月以上控制在測不到的狀態時，其透過性行為將病毒傳染給他人的機率為零。
• 另一部Netflix 有得睇關於跨性別嘅電影：《揭開面紗：荷里活的跨性別人生》
• ACT UP 愛滋解放力量聯盟
• 愛滋生死帳（Quilt Culture）、台灣翻譯做「愛滋拼布/百衲被」，曾有八張生死帳於1992年底於金鐘太古廣場展出（1992年10月《10%通訊》）。
• 愛滋運動歷史與 POSE
• 骨灰運動（Ashes Actions）

【又關性別事】睇劇學嘢，今次睇POSE

歡迎返嚟《點止港同志》，我係主持人馬天娜。咁今集呢，就得我一個嘅啫，就住近排疫情喺香港非常嚴重啦，就想分享一啲節目畀大家。無論你係work from home，收咗工之後冇嘢做，又冇得出街，或者係你因為身體嘅狀況，你唔能夠出街都好呢，都可以有一啲多啲嘅節目去睇下，順便去接觸下一啲國外性小眾嘅運動歷史噉樣。

今次想分享嘅節目呢，就其實大家睇呢個題目都睇得到，就係講2018年開拍嘅FX嘅電視劇。佢英文名呢就叫《Pose》啦。喺香港，如果你係睇Netflix嘅話呢，就可以搵《紐約萬花筒》，喺台灣嘅話呢，就可以搵《艷放80》。喺裡面呢，有四個點我係想同大家分享吓。

首先就講下點解會有《Pose》，同埋點解會有呢一個「萬花筒」嘅概念啦，就呢一套劇呢，裡面係主要講關於跨性別，同埋一個叫做「Ball場文化」嘅一個歷史性嘅記錄啦。佢又未去到真人真事改編嘅，但係佢裡面囊括到一啲文化，其實的確係喺美國發生，而且喺80年代嘅時候盛行嘅。

當中有一個字眼呢，係首先可以帶起嘅，就係叫「House」嘅文化啦。House呢，H-O-U-S-E，即係屋企嘅意思啦，其實佢至少呢係源於70年代嘅時候，有啲有色人種嘅族群嘅。你一聽到有色人種嘅族群呢，其實你都可以想像得到佢哋同弱勢嘅社群，係有啲關聯啦。噉處於弱勢嘅性小眾嚟講呢，係有一啲關乎生死嘅重要性嘅。噉呢度所講嘅House對於佢哋嚟講嘅關係呢，就係呢個屋企啊，或者呢個家庭嘅概念呢，就唔係佢哋原生，即係出生嘅父母嗰個家庭，而係因為跨性別者，因為唔同嘅原因，俾原生嘅家庭拋棄啦，佢哋可能俾人趕咗出門口，佢哋喺條街度，都要生存㗎嘛，多返掙扎生存之下呢，就有一啲人會開始知道點樣去繼續活下去啦。當中有一啲跨性別嘅人士呢，佢哋就會以「母親」嘅身份啦，英文佢哋叫做Mother啦，會收養一啲同樣地差唔多背景，又係俾原生家庭拋棄、驅趕而流落街頭嘅性/別邊緣嘅淪落人啦。既然有阿媽嘅角色，當然就有仔女嘅角色喇。主要嚟講，呢一啲嘅House呢，主要都係母親與女兒之間嘅關係。噉有冇仔呢？比例會比較少啦。而呢啲嘅家庭成員呢，佢哋就唇齒相依，即係同淪落人嘅概念係一樣嘅，同是天涯噉樣，「囡囡」（女兒）通常呢入世未深啊，或者係真係好細個嘅時候呢，通常就係俾呢個照顧者嘅「阿媽」多啲提點啊、照顧啊，日常嘅飲食啊、打理啊，住宿嘅地方都會畀埋噉樣。同好多人嘅家庭一樣呢，即係同一屋簷下，就一定要有一啲摩擦嘅，所以亦都會有出現鬧交啦，會有分歧啦，囡囡會之後，可能識咗男朋友仔嘅時候，亦都可能就會，阿媽又會有啲意見啊之類噉樣。所以其實呢個概念呢，喺英文嘅語境嚟講，有啲人就話叫Chosen Family啦，即係我嘅屋企人，唔係我親生嘅，同我冇血緣關係嘅，但係我成長之後，我去選擇嘅屋企人，係喇，去一齊相處，一齊生活噉樣啦。

而喺《Pose》裡面呢，就係講述呢個跨女Blanca，佢就成立咗自己嘅House Evangelista啦。呢一個角色呢，基本上就係呢一套劇嘅女主角嚟㗎喇。佢喺社會碰碰撞撞之後呢，係一個非常堅持不屈不撓嘅角色啦，佢支持自己呢個House嘅成長，身邊亦都有一啲夥伴啊，有啲朋友後來患病啊，就仍然非常之堅強噉去支持身邊每一個人。佢呢一套劇，以及佢呢個角色，相比起以前嘅媒體作品，最大嘅唔同呢就係，過往有好多都係會描述跨性別，係好容易被社會拋棄啊，被社會邊緣之後，就好受創傷啊，跟住有可能話描繪到佢哋心理變態啊，喪心病狂。有一啲喺Netflix睇過另外一套電影嘅人呢，都可能會知道，過往荷里活呢，會用跨性別作為諧角嘅一個人物設定嘅，去到而家呢一套劇呢，跨性別嘅角色，就會一個好真實，即係好似你身邊嘅人嘅寫照噉樣嘅一個存在，而Blanca呢個角色就好明顯就唔係啲咩飽受創傷、心理變態、下場悲慘嘅主角角色嘅設定啦，佢就係一個非常之鶴立雞群，雖然佢冇入到咩上流社會，但係佢仍然有一個好令人感動嘅堅持啊，堅持自己嘅認同，同埋身邊嘅人。

頭先都講到跨性別人士，同埋有色人種啦，亦都會講到邊緣，呢啲人喺七八十年代係點樣生存嘅呢？呢啲House嘅成員大部分呢，通常都係鍾意做女性打扮嘅黑人，或者係波多黎各人啦，噉會籠統啲嗌佢哋係拉丁裔嘅。噉佢哋當然期盼有一日可以真係活出，佢哋想做嘅性別表達啦，喺嗰個年代，可能佢哋就會話，哦，我想變成噉樣。作為少數中嘅少數，即係唔單止喺美國有色人種係處於劣勢啦，佢哋係性小眾，仲要係跨性別，再加上係喺同性戀圈子，喺個階級之中，佢哋可能係連同志都睇唔起嘅最低端呢。呢班跨性別人士可想而知，喺當時嘅社會呢，係好難搵到工，或者係未必夠錢可以支持到自己去讀書啊。所以佢哋當時呢，通常都係會做呢啲體力勞動嘅工作啦。好樣啲嘅，靚啲嘅可能就會去賣下自己嘅樣，做下Model、賣身，去做性工作賺錢嘅人呢都唔少。比較現代嘅一啲電影裡面呢，都會描繪到跨性別人士。即使喺現代嘅社會啊，都會有好多人去做性工作嘅。想睇下一啲相關嘅電影呢，都可以去留意一部全黑人製作嘅電影，叫《Tangerine》（《跨性有話兒》）。呢部片就唔係好主流啦。但係係一部幾值得去睇嘅一部電影嚟嘅。佢哋嘅文化當中呢，仲有一個元素，一個keyword呢，就叫做ballroom舞場。呢一個文化亦都係解釋咗，點解呢一套劇會叫做《Pose》，就係因為《Pose》係，即係姿勢啊嘛，舞姿嘅意思，噉喺呢一個舞場裡，就好似跳舞比賽噉，噉有唔同嘅dress code嘅項目啦，噉佢哋呢，即係每一個House嘅成員啦，就要join呢一個比賽呢，去爭奪唔同嘅獎項。其實評分嘅人呢，都係啲自己人嚟嘅，都係可能係一啲比較資深嘅同志，大家公認可能好有taste啊，好有品味嘅一啲人。噉有獎就當然就會同時有獎金啦。所以對於邊緣嘅House成員嚟講呢，有陣時都係一個收入嘅來源。佢哋就係靠呢啲Ball嘅比賽去有生存嘅動力啦，可以支持到佢哋嘅生活之外，亦都係鼓舞咗佢哋用呢一種嘅方式，努力去打扮自己。用唔同嘅好土炮嘅方法又好，好豪華嘅方法都好，去裝扮自己，喺某一晚上嘅聚會當中，展露自己最光芒、最美好嘅一面噉樣。喺呢套劇裡面呢，有一啲人呢，就真係著得好土炮嘅，即係可能係拼拼湊湊噉樣就一件衫，亦都有一啲係走上流社會style嘅，即係可以攞一件華衣美服著上身，寧願偷嘢，佢都將自己嘅打扮做花枝招展噉樣都會有。目的就係，佢哋覺得喺呢個社會裡面，佢已經俾呢個社會拋棄喇，而入得嚟呢個場呢，佢哋係拋開咗舞場外面殘酷無情嘅現實啦，佢哋被邊緣嘅狀態，去活出自己最想做嘅性/別表達，同埋夢想中嘅身份。例如佢哋可能生理上面被判定係男性嘅，但係佢哋喺個裝扮上面，佢哋化妝上面，可以呈現得到佢哋做嘅女性模樣。呢一啲亦都係喺當時支撐咗唔少跨性別人士嘅一個文化，同埋共識啦。

頭先亦都講到人種啊，噉一定要講下佢哋嘅差別待遇喇。第三點，就係除咗跨性別啦。七、八十年代嘅有色人種呢，其實喺制度上面，有不公平嘅對待，而喺部劇入面呢，Blanca呢一個主角呢，不時都會經歷去醫院，同同伴見最後一面啦，噉佢不屈不撓嘅性格，又有助於佢喺醫院做照顧員嘅工作。喺醫院做嘢嘅日子嘅時候呢，佢先知道原來有一隻新藥係醫愛滋嘅，就開始試用，亦都搵人去參與呢一個實驗啊。但係發現呢，原來白人病人同黑人病人嘅名額係有分別，所以佢之後亦都好努力，同佢嘅同伴一齊去爭取，希望可以囊括更加多嘅黑人去接受呢一個嘅藥物治療。噉頭先我都講到話，佢去見同伴最後一面，好多人睇嗰陣時候會生病，噉就係正正響應返當年嗰個時代HIV同埋愛滋病嘅情況喇。

噉第四點呢，就係講到HIV呢一個到現今都係深具污名同埋恐懼嘅一個疾病啦。有色人種、跨性別、同性戀、性工作咁多個身份交織之下呢，仲有一個更加大嘅污名，就係HIV嘅流行，同埋當時的確係好難治療嘅呢一個恐懼。當時HIV positive嘅人呢，而確診有愛滋病嘅人，的確比較多嘅比例係男同志啦，所以加深咗大眾對於男同志嘅恐懼同埋譴責。可想而知，雖則HIV就唔係空氣傳播啦，但係喺當時即係唔係好清楚究竟HIV係咩一回事嘅人，一定會有恐懼。以而家我哋嚟講，我哋面對而家嘅疫情，我哋都有好多嘅恐懼，所以我相信，即係聽到呢度你都會想像到嗰一種，會產生恐慌嘅情緒啦。

去到1990年代呢，其實有超過10萬嘅人係死於愛滋病嘅。喺美國嚟講呢，以當時係黑人同埋拉丁裔嘅人為主啦，而喺《Pose》呢套劇入面呢，你都可以睇得到，其實喺美國呢，嗰個年代都會有一啲就住HIV同埋愛滋病發生嘅一啲性別小眾嘅運動嘅。當時就有兩件事嘅，直譯就叫做棉被嘅文化啦，即係冚被嗰個棉被﹐同埋有一啲用骨灰嚟做嘅抗議嘅。因為頭先都講過啦，當年對於HIV同埋愛滋病，係冇一個好嘅有效嘅治療方法，新嘅藥都係慢慢試用當中，所以確診HIV+嘅人呢，基本上就係被預告死期，你唔知道幾時死，噉你死亦都係可能有唔同嘅方法死。有一啲人可能係肺炎，亦都有一啲人可能係嗰啲猛爆性肝炎之類。棉被（The Quilt）文化係咩一回事呢？就係嚟紀念嗰啲患上咗愛滋病而過咗身，或者係活下來嘅人喇，佢哋每一個人嘅名，或者可能會design一張屬於自己嘅棉被啦，將佢縫埋一齊，縫咗一張，好似大棉胎噉樣嘅。點解會係棉被呢？我未必係搵得好仔細嘅資料啦，噉但係喺部劇裡面呢，有一位HIV Positive嘅角色呢，當佢知道自己有HIV嘅時候，佢都同Blanca講咗話，我都要整一張好豪華嘅被冚畀自己。噉我相信當時冚被呢一件事，其實有少少似係嗰一啲畀先人冚嗰啲氈嗰個概念。將呢啲被縫埋一齊，其實係可以有一個好強烈嘅視覺效果，睇得出當時有幾多人因為呢個症而去世噉樣啦。

不論係對於性/別小眾嚟講，或者係對於患上呢個病嘅人嚟講，其實都係一個好重要嘅里程碑，去畀大家意識到呢件事，係的確有發生，而我哋身在2022年嘅我哋，其實有好多藥啦而家，噉但係我哋都不能夠忘記以前，其實有好多人去不斷試驗同埋去爭取，先可以發展到而家有唔同嘅治療方法。同埋對於HIV，有另外一個U=U即係，即係偵測唔到，就等於唔會傳染呢一個嘅訊息。

好啦，扯遠咗喇。噉我繼續講啊，關於骨灰抗議嘅活動啦，噉都係喺收錄喺《Pose》呢個劇裡面嘅，大家都會睇得到啊。當時呢，有一個以草根為主嘅組織叫ACT UP，噉呢一個係一個簡寫嚟嘅，噉佢即係，A-C-T U-P就係代表每一個字噉樣啦。噉喺1992年同埋1996年呢，就係以死亡等於沉默，就邀請咗一啲愛滋病患病者嘅親朋好友，將佢哋逝世嘅朋友嘅骨灰撒喺白宮嘅草坪上面。點解要噉做呢，其實可想而知。你撒骨灰呢一件事係即係對於噉好多唔同背景人嚟講，都係一啲唔係好老黎（不吉利）嘅事啊﹐仲要撒人哋嘅骨灰喺陌生人嘅草坪上面，係咪？呢一件事喺一個運動上面嘅策略，就係你會好明顯睇得出。視覺上、行為上，都睇得出佢嘅嗰個影響力啊，嗰個畀人嘅一種震撼嘅感覺。而對於我嚟講，我睇到呢一度，其實頭先我一開始講話去理解到美國嘅性/別小眾嘅運動，呢一個就係其中一個可以參考嘅地方啊，即係有一啲嘢係要實踐做咗出嚟，有一種視覺上面，有一種感覺上面嘅震撼。對於我哋爭取嘅一啲權益係會有一啲幫助。

噉喺《Pose》出街之前呢，其實都有另外一套嘅紀錄片，係專門係訪問類似文化嘅寫照嘅。嗰一套紀錄片呢，其實係幾有爭議性嘅，就係1990年代拍出嚟，由Jennie Livingston去拍嘅，中文譯做《巴黎在燃燒》啦，英文就叫做《Paris is Burning》。具爭議性嘅原因呢，就係因為拍紀錄片嘅收益同埋名聲呢，可能好多時候係歸返拍攝者本身喇，而被拍攝嘅跨性就係呢一個House嘅成員啦，當時就係拍咗《House of Extravaganza》，佢哋最後就好似淪為被窺探完嘅對象噉，大家望完喇知道喇，哦，跟住又散嗮場，而令到佢哋呢一班人呢，最後其實都係，雖然係俾人睇完喇，但係亦都冇幫助到佢哋，即係當時社會邊緣嘅困境啦，佢哋仍然繼續水深火熱。後尾呢，有人去譴責呢一件事，就係當我哋去了解一啲邊緣嘅小眾嘅時候，我哋係用啲乜嘢嘅角度，我哋想達到佢哋被看見之後，有啲乜嘢嘅訊息，以及到嗰個名聲，或者係嗰個好多人關注咗之後，呢一個力量係去咗邊？

因為如果我哋去發掘更加多小眾嘅聲音，但係最後歸功嘅係去返製作呢一件事嘅人本身呢，其實係對於嗰班小眾係冇一個益處。佢哋就好容易被窺探，被獵奇，大家睇完，總會有一日，大家會覺得呢件事講得多。呢一件事對於不單止係性/別小眾嚟講，對於好多製作內容啊，製作媒體嘅人嚟講，其實需要警醒嚟嘅。雖然今次嘅《Pose》，唔係以紀錄片嘅形式去拍攝啦，而呢部劇集嘅台前幕後呢，我都想講一講就係，其實佢有好多性小眾嘅成分。頭先我有提到《Tangerine》呢套戲，係全黑人啦。基本上呢套劇嘅主要演員呢，幾乎由跨性別人士去擔當㗎喇，台前幕後，超過140人，都係LGBTQ+嘅一群啦。噉其中有一位編導叫Janet Mock，係美國劇史上首位跨性別黑人女性，身兼編劇同埋執導嘅。而喺裡面做角色嘅演員，後尾都有一啲都聲名大噪，其實有陣時，你喺Met Gala都有見過佢哋亮相㗎。噉頭先一路提到嘅Blanca呢，就係由一位跨性別演員MJ Rodriguez去演嘅啦，及後呢，佢都攞咗金球獎最佳戲劇類嘅電視女主角嘅；而另一位嘅演員Indya Moore呢，更加係第一個跨性別人士登上《ELLE》嘅雜誌封面；而飾演Ball場主持嘅黑人同志演員Billy Porter呢，因為呢一套劇而攞到艾美獎嘅視帝嘅，佢更加喺2021年公開自己HIV positive嘅身份。佢喺個劇裡面亦都係演咗呢一個嘅HIV positive嘅角色㗎。噉所以喺劇內同劇外呢，其實佢都係演活咗成個角色，亦都演活咗佢本身。

噉睇到《Pose》呢一套劇集成功啦，其實呢套劇有三季嘅，我頭先漏咗講，可以睇得出媒體上面呈現嘅性小眾，尤其係跨性別嘅社群呢，喺英文嘅西方世界裡面嘅改變，喺第二同第三季裡面，其實加入咗唔少當時嘅同志組織嘅運動啦。喺追劇之餘呢，其實可以補習吓平權嘅歷史啦。睇返呢一啲劇裡面呈現嘅畫面，其實都見到好多嘅衝突，其中一個俾我攞走嘅地方，就係佢哋搞嘅一啲活動，的確係用好強烈視覺同埋情緒嘅一個方式去呈現啦，正正就係因為佢哋當時係處於一個好差嘅劣勢，佢哋係冇其他嘅一個大嘅機構，或者用一個制度去支持自己嘅倡議，所以佢哋要用一啲望起嚟好土炮，甚至其實係有啲帶動到情緒嘅一啲畫面去呈現佢哋嘅訴求啊，而面對社會上面嘅不公，噉唔同嘅組織利用創意啦、堅持啦，即係一個好壓迫中嘅困境之下，佢哋喺重重嘅壓力之下，係咇出呢一啲嘅動機，呢一啲嘅堅持，先可以爭取到更加多嘅人嘅意識，去伸張佢哋嘅正義啦。不得不講呢，其實第二第三季呢，係有一種教育電視嘅感覺，即係好似好順攤去睇住，究竟嗰班人係點樣爭取啊，之後爭取成點樣啊，啲藥最後幫唔幫到人啊，嗰種嘅感覺係好positive嘅，係令人鼓舞嘅。

呢個就唔劇透最後係點樣啦，即係最主要嗰4個point我都同大家分享咗喇。我亦都期待，大家趁住呢一段嘅時間，疫情影響遙遙無期啊，我呢一個節目出街之際，希望係會有好轉啦。係啊，亦都希望收聽緊啲節目嘅你，生活同埋身體都安好同埋平安啦。今次Netflix影評講《Pose》呢一套劇嘅分享就去到呢度喇。如果你有啲乜嘢劇係想分享，或者你覺得有一啲細嘅劇，小型嘅劇集，或者係媒體都係好值得大家去睇嘅，歡迎大家message畀我哋話畀我哋聽，我哋之後都可以同其他嘅朋友分享。

《點止港同志》係一個以香港同志角度出發嘅Podcast，希望可以將大家生活裡面嘅性別同埋同志嘅議題，用廣東話聲音同埋文字嘅方式，保留同埋流傳。而每一集嘅Podcast，我哋係可以製造文字檔嘅，畀唔方便聽聲嘅朋友，都可以睇到我哋嘅資訊。多謝你收聽呢一個節目而且聽到嚟最後。想聽到下一集嘅內容呢，就訂閱我哋喇。如果你對呢一個主題有共鳴，想分享你睇過劇嘅故事畀我哋知道嘅話呢，歡迎你DM我哋Pridelabhk嘅Instagram，亦都歡迎你喺Apple嘅Podcast下面留言，同埋畀星星嘅回饋。你嘅支持同埋鼓勵呢，將會係我哋默默耕耘嘅動力。噉今集就講到呢度先，期待下次同你《點止港同志》。