每逢佳節倍思親，每逢六月倍思同志？
六月到底點解會有咁多商品出彩色？
越來越多品牌開始推出彩虹商品慶祝LGBT，Pink Money 商機無限，同志錢係咪咁好賺？
有咩好嘅彩虹marketing例子？聽吓《點止港同志》啦！

章節

開始時間	標題
00:14	彩虹Marketing：係賣畀同志定係攞同志嚟賣
01:58	多咗咁多彩色商品同推廣，有無令你買多咗呢？
02:59	介紹Rainbow Washing 以及彩虹經濟例子
07:08	出彩虹商品嘅意義
07:58	彩虹友善嘅牌子其實都可以有返啲指標嘅

【又關性別事】彩虹行銷與消費Pride的距離

歡迎大家返到今集《點止港同志》

我係主持馬天娜。

今集嘅主題係 【彩虹marketing，係賣畀同志定係攞同志黎賣？】

香港依家好興有唔同主題嘅市集，港九新界，幾乎每個禮拜都有。最近呢幾個月喺IG見到有以同志為主題嘅市集，8月有一個同港台LGBT平權有關嘅，而9月又有一個叫做「自己人市集」，聚集左支持多元性別嘅商戶，話希望透過市集，分享、認識同接受多元性別。

類似嘅活動，其實喺今年6月同志驕傲月Pride Month，為男同志社群服務嘅Gay Harmony 大同都有喺尖沙咀搞咗一個小型Bazaar。好幾個有出Pride month產品嘅品牌，有TEVA、Levis、岡本等等，都係佢地活動嘅贊助商。

今年Pride Month比以往多咗品牌大噴彩色。唔知大家仲有無印象，喺IG洗板嘅LELO 彩色人仔Everyone is awesome box set，香港專門店都有得買，仲好快已經賣晒𠻹。

而另一個緊貼檔期出Promotion嘅，而且好多人like同share嘅，就係香港杜雷斯出嘅post。佢哋搵左三對人，包括Youtuber GF vs GF、小新田中、同埋跨仔Zehprus同佢Daddy，取材佢哋嘅真實拍拖嘅生活，而且搵埋都成日露第三隻腳，好支持同志嘅爵爵與貓叔畫返個故事。老實講我哋團隊都覺得呢個活動係做得幾好，佢地有預時間、花心機準備，而且故事主角有Les、Gay同Trans代表，睇得出事前做足功課。

多左咁多彩色商品同推廣，有無令你買多咗呢？

除左商品上面嘅彩虹，連依家香港好多人講起嘅Staycation 酒店行業都參埋一份。今年見到最多人打卡嘅彩虹應該係喺北角Hyatt 酒店搞嘅 Pride Month活動。佢哋將天台泳池牆身整成六色彩虹，聽講反應熱烈到酒店將個彩虹牆extend到七月添！

咁多牌子都出彩色嘢，你有無諗過，到底啲廣告響應同志，定係攞同志LGBTQ黎賣呢？以今年為例 ，有香港品牌promote自家彩虹系列產品，選擇將收益捐去美國嘅同志組織，亦有舖頭揀咗本地嘅同志組織作捐款對象。個個都話love is love，愛都一樣，愛最大嘅時候，點解又會有牌子要捐錢畀同志組織呢？你又有無關注到自己去支持，買咗嘢之後，啲收益捐去邊，嘅受惠組織又係做咩架呢？

喺呢度同大家介紹兩個字，第一個字就係Rainbow washing。原先嘅解讀就係透過將機構或者政府將彩虹議題作為洗太平地嘅媒介，令到大家覺得嗰個組織喺進步嘅，喺現代同包容嘅地方。rainbow washing 依家會延伸到商家，就想像將彩虹嘅顏色噴上嘅品牌度，凸顯自己牌子喺友善嘅，喺緊貼社會潮流嘅。喺特定時候先放同志上檯，消費LGBT議題，從而想得到更多嘅支持，同埋更多嘅消費啦。咁因應同志而衍生出黎嘅商機，一般會叫做彩虹經濟，而Pink Money呢個字，就係形容同志社群嘅消費能力啦。

美國有統計話LGBT人士喺一年嘅Pink Money高達917億美金，所以千祈唔好睇少自己啲錢。因為你嘅消費就係一種表態，透過消費，成立一個經濟圈嘅概念，呢個我相信唔少香港人都會聽得明。老實講，商家在商言商，做生意係睇錢做人。依家有一個可以拓展的市場，未來應該都唔少牌子會加入Pride Month 推廣行列。但係，到底邊個係期間限定謀住你啲粉紅錢錢，食LGBT人血饅頭，6月賺完你錢就拍拍屁股下年再賺過，邊個其實係真心支持同志，用商業角度支持同志呢？真係要睇清楚。

記得有個活動單位今年6月頭撩PrideLab合作搞Pride Month活動，傾落計對方就

問起點解六月係Pride Month。認真，Pride Month唔知歷史都唔係錯，搞手唔係同溫層都算，但係Marketing做多少少功課都唔願做，認真想講「錢唔係咁賺咖」。

另外，媒體報導咗Hyatt酒店嘅彩虹主題之後，有朋友話畀我哋知佢打電話去前線訂房部查詢，結果員工話唔知道有呢項活動。當酒店邀請KOL過去試住做宣傳，喺啲打卡相入面，彩虹旗仔又倒轉咗。有同志睇唔過眼打電話去提點，酒店一方做出即時回應，重新提醒前線同事，並且檢查所有旗仔無再擺錯。

呢件事睇得到，如果消費者覺得嘅品牌又誠意，但係有可以改善嘅空間，提出改善方法係可以令到件事更好嘅，而且可以更實踐到多元之下共融嘅精神。而唔係好似逢年過節，二月情人節，十二月聖誕節，六月就同志月，將同志議題拱手相讓公司變咗例行公事。

呢個時候真係要讚下逸東酒店Eaton，佢地六月出左個post，正正就講呢個同志驕傲月嘅來由。佢地提醒點解六月要慶祝，而且提醒返1969年喺美國發生嘅石牆事件。喺個post入面佢地直接講：唔少商業公司於六月都會舉辦不同類型的活動引起LGBTQIA+社群的關注，但多數他們的參與並不持續。於我們而言，真正的支持始於認清LGBTQIA+社群的需要，對他們的尊重、包容、鼓勵及支持，這亦非一朝一夕的事，而是長年累月的行動。在舉辦公共活動的同時，我們的內部政策及訓練亦確保共融平等的工作環境及機會。逸東酒店一開頭轉型嘅時候就安裝中性廁所，但係來自唔同地方、唔同文化客人問起上嚟，前線員工又唔係好知道點解釋；於是管理層就邀請同志組織同佢哋全體唔同部門嘅員工講解關於多元性別共融嘅資訊，理解香港同志社群到底係點。

出彩虹商品，唔係淨係表達同志專屬，而係透過每一年顯露彩虹的機會，同個社會，同唔係同溫層嘅人講講其實你地身在啲地方周遭都會同你有差異啲人。可能主流人士知道啲社會權利同埋福利，喺其他小數人眼中係做唔到。有性戀與非有性戀（例如無性戀、半性戀、灰色地帶等）、單性戀與非單性戀（即係例如雙性戀、泛性戀、流性戀等）、順性別與非順性別（例如跨性別、無性別及性別酷兒等），咁多名詞，都係想畀主流啲人知道世界上係有同你唔一樣啲人，而同志係需要爭取同主流人士不同嘅需要。

加入黃店會有標準，咁彩虹友善嘅牌子其實都可以有翻啲指標嘅。例如個品牌有無帶出更多性別多元人士嘅形象同聲音呢？有無確實實踐同志友善嘅員工政策？會唔會介紹下捐錢過去嘅機構呢？之後會唔會繼續關注同志議題之類，呢啲問題都係想帶出，彩虹議題當然唔係得6月先值得講！而同志都唔係鍾無艷，六月先出黎被啲牌子放上檯嘅對象。

期待之後嘅六月可以見到更加多牌子帶動同志議題，喺有更加多彩虹嘅品牌之下，有更多嘅人願意了解小眾嘅多元同埋處境。

《點止港同志》喺一個以香港同志角度出發嘅Podcast，希望可以將大家生活裡面嘅性/別同同志議題同廣東話聲音同文字方式保留同流傳。每一集嘅Podcast我哋都有製造文字檔，畀唔方便聽聲音嘅朋友都可以知道我哋嘅資訊。

多謝你收聽，而且聽到最後。如果你想收到下一集嘅內容，歡迎你訂閱我哋嘅節目。想畀feedback嘅話，可以你喺Apple Podcast留言同埋星星回饋，或者喺我哋@Pridelabhk嘅instagram dm 我哋。如果你喜歡我哋嘅節目，歡迎你分享畀你身邊認識嘅同志，或者非同志嘅朋友。

今集講就到呢度先，期待下次同你《點止港同志》。