呢集上架嘅時候剛好過咗今年叱咤頒獎，呢度有幾多人聽緊廣東歌？
好多同志喺自己探索階段，都靠好多廣東歌獲得共鳴
不論係表達自己、拍拖、失戀，廣東歌都陪伴咗我哋成長
今次搵到「周耀輝歌詞班（一世唔畢業）同學會」嘅Offy，
同我哋分享一下浸會大學嘅歌詞創作班嘅成立
同埋2024年1月成品分享會嘅動態！
Ref
歌詞班IG： @nevergrad.alumni
Ep.48【又關性別事】雌雄與歌詞（Feat. Offy@ 周耀輝歌詞班（一世唔畢業）同學會）
M：馬天娜
O：Offy
M：歡迎返嚟《點止港同志》，我係主持人馬天娜。呢一集呢，會係一集完成咗我心裏面一個小小嘅願望嘅一集。嚟緊要訪問嘅組織呢，其實同我本身讀書嘅地方有關係啦。噉作為呢個大學嘅舊生呢，終於有機會可以係噉意接觸吓同埋認識吓呢個組織，噉都係一個對我嚟講有少少重要同埋有價值嘅一件事嚟嘅。作為而家呢個 Podcast 嘅節目主持，可以用呢個角度去重新認識返校園裏面呢一個 Project。呢個 Project 點解會由一個班，即係一個大學嘅班，變咗做一個組織，然後會喺我哋一齊呢個性別倡議之路、性別裏面嘅工作裏面一齊同行，大家一齊彼此見到呢？都係一個…今次呢個錄音都係互相認識嘅一個過程嚟嘅。
呢個組織就叫做「周耀輝歌詞班（一世唔畢業）同學會」，佢係一個註冊社團啦，既然叫得周耀輝歌詞班就好明顯係由呢個著名填詞人周耀輝博士做顧問嘅一個背景。噉我引用佢 YouTube channel 所講啦，就係話，「耀輝說—即係周耀輝博士話：『真正悲觀是不再、寫』。畢業了，勞碌過了些時日，隨年歲，我們還有沒有繼續寫下去？如果欠的是寫的理由、動力，不如我們再聚，再次感受當年喜歡創作的心情。」今次好開心可以搵得到裏面嘅目前嘅主席 Offy 嚟做我哋嘅嘉賓。
O：Hello，大家好，我係 Offy 啦，噉我係周耀輝歌詞班（一世唔畢業）同學會嘅主席，係嘞。噉呢就都會負責喺歌詞班同學會入面嘅唔同嘅計劃啦，噉我哋陣間都一一可以介紹一下。
M：好呀，噉我自報家門先，我係14年畢業嘅。如果按照呢個一世唔畢業嘅背景呢，就應該係我畢業之後先會有嘅一個 Idea 嚟嘅，係嘞。據上網搵到，一世唔畢業係來自15、16年嘅耀輝歌詞班嘅小系列。佢哋有一個叫做「一世唔畢業作品演唱會」噉樣。據我理解呢，嗰陣時其實周耀輝嘅歌詞班係一班非常之熱門、非常之容易會 Reg 晒，即係滿額嘅一個課程嚟嘅，裏面的確係教人寫歌詞嘅。除此以外，亦都要知道就係耀輝老師，佢亦都會教文學院裏面嘅一個性別研究嘅課程啦，即係可見佢本身係有做開呢個性別嘅研究，有關心性別議題，以及用佢嘅專長去教大家點樣去作詞、填詞。我剩係知道咁多嘅啫，噉嚟緊嘅問題就係，我相信係希望可以同聽眾們一齊去詢問下我哋呢一位歌詞班嘅主席，去了解下呢個組織。首先就想問下，歌詞班裏面嘅人係咪一定要係浸大學生，係咪要係浸大在讀嘅學生呢？
O：係，冇錯嘅，因為呢個歌詞班，我哋叫粵語歌詞嘅創作班，佢係浸大入面，佢哋人文及創作系嘅其中一個課程。所以呢，讀得呢個課程嘅學生，即係本身都係浸大學生，噉佢哋就會畀自己部門嘅學生讀啦，亦都會有一啲名額去畀其他唔同科目嘅學生讀。噉係嘞，有少少時間呢，我都可以講少少，點解會加入咗呢個同學會，噉就係因為呢，其實即係據馬天娜噉講啦，就係呢個係一個非常之熱門嘅課程，基本上呢，各位同學一聽到，可以寫歌詞喎，仲要係周耀輝教嘅歌詞班，噉大家都會有興趣去報名，噉樣。因為我本身係讀傳理系出身嘅，噉我係18年畢業嘅，係嘞，所以呢，見到呢個課程嘅時候呢，就博一博個機會啦，因為大家都去報，噉我自己又對廣東歌呢樣嘢本身好有興趣，噉所以呢，就幸運地可以成為呢個班入面三十個同學嘅其中一位嘞。噉佢呢個係一年只係會開一次嘅一個課程嚟嘅啫。
M：嗯，噉呢個課程就係要喺浸大先有得讀啦。
O：嗯，係。
M：噉呢個一世唔畢業同學會呢？係咪要…即係要係咩身份嘅人先可以加入到嘅呢？
O：首先講明係同學會，噉其實佢基本上嘅結構呢，係一個舊生組織嚟嘅，就係由一班上完呢個課程嘅同學組成啦。噉其實而家呢，已經超過十年嘅歷史噉樣嘅。然之後呢，由唔同界別，即係可能每年大約三十至三十幾個嘅同學，上完呢個課程之後，一班舊生聚埋一齊，希望有一啲事情發生啦。與此同時呢，我哋都開放畀喺香港，我哋叫做填詞界啦，對廣東話歌詞有興趣嘅朋友加入啦，或者係即係同我哋一直合作緊嘅友好啦，等等。噉所以呢，慢慢呢我哋由一個舊生組織，已經將佢發展成為一個與其話係…除咗係舊生組織之外，亦都係希望推動粵語歌詞創作，同埋帶住呢一樣流行文化去走入社區啦，同埋社會唔同群體嘅一個組織噉樣。
M：因為我哋而家唔知道呢個資訊碎片化嘅時代呢，當我以為周耀輝可能係一個比較多人認識嘅人嘅時候，其實可能聽眾都係有啲問號嘅。噉我喺度補充下啦，周耀輝係香港其中一個主要嘅填詞人啦，噉佢係……主要係喺香港嘅浸會大學人文學科裏面，教呢一個填詞班啦、性別研究啦，頭先都有講到啦。噉佢亦都係作品主要都係寫一啲現實啦、社會啦、宗教、文化，同埋有好多性別嘅、情慾嘅一啲元素嘅。噉裏面會經常會有一啲雙關引用嘅手法呀，著名嘅歌可能就會令到大家會知道係佢嘅背景噉樣，例如陳柏宇嘅《有天》，噉亦都有麥浚龍嘅好多嘅歌都係佢寫嘅，例如《寫得太多》、跟住有呢個《雌雄同體》，噉亦都有關心妍嘅《龐貝·21世紀》呀、鍾舒漫嘅《給自己的信》呀、跟住麥浚龍嘅《彳亍》呀，仲有啲咩…而家我都好擔心，我而家講呢啲歌究竟有冇人聽過，希望而家聽緊節目嘅人，你係知道我講緊啲咩啦。跟住仲有泳兒嘅《荊棘海》啦，係嘞，比較新一啲嘅，仲有陳奕迅嘅《人啊人》呀，噉呢啲都係周耀輝老師填詞嘅作品噉樣。頭先你講到話即係希望，呢個同學會希望可以繼續浸大填詞班嘅呢一個填詞嘅精神，亦都希望將歌詞融入喺社會裏面啦。噉我從歌詞呢個角度去問一問嘞，噉作為一個讀傳理學系嘅學生嚟講，當時點解你會對寫歌詞有興趣呢？即係好多人都會覺得聽歌，你鍾意唱歌，我鍾意唱K噉 OK，歌詞對你嚟講係一個咩嘅一回事呢？
O：因為歌詞呢，佢係連住歌一齊去產生嘅。而且我諗廣東歌呢樣嘢呢，喺我哋香港人嘅生活啦、流行文化入面啦，都非常普遍嘅一個媒介啦。噉亦都因為佢本身流行曲呢樣嘢嘅流通性好強，變相呢，喺我自己因為傳理嘅背景呢，我就好多時都會對住一啲大眾嘅媒體呀，或者對流行文化比較有興趣。噉所以呢，當時就見到呢個雖然唔係傳理學院嘅課程，噉但係見到喺隔離文學院有呢個課程呢，噉我都有啲興趣喎，仲要係咁難得可以即係親身噉樣得到呢個周耀輝老師嘅教導噉樣。噉都希望睇下原來喺一個流行曲嘅作品背後，我哋平時聽嘅歌後面嘅創作故事究竟係點呢？噉因為帶住種種嘅好奇心呢，噉就決定報名嘞。噉我哋報名仲要抽籤嘅，喺學校個系統入面攪珠抽籤啦，噉所以呢入到呢個班嘅同學呢，我都覺得係一個幸運兒呀。
M：據聞嗰個班係…即係如果以買演唱會飛會被秒殺嘅話呢，呢一班係真係秒殺班嚟嘅。我嗰時係有聽聞，嘩！好出名！跟住可能嗰陣時我又未去到…因為我比較懶，我又未去到想 Keep 住係噉寫歌詞噉樣，所以我就冇去報，但我聽聞佢係非常之快會 Full 噉樣一個班嚟嘅。噉去到而家即係上完呢一堂，跟住畢完業就以一個主席身份去做呢個分享啦。可唔可以分享下呢一個同學會嘅營運？例如佢裏面有幾多人合作緊呀？有啲咩崗位呀？平時有啲咩要處理㗎？
O：講下我哋本身個架構先啦。噉因為佢都係源起於一個即係叫做好似舊生組織噉樣，噉我哋就會除咗我主席之外啦，噉就會有一班嘅核心成員嘅，噉就係換言之，就好似啲籌委嘅朋友噉樣，就去負責呢個會日常嘅營運啦，同埋唔同嘅 Project 噉樣。噉然之後呢當我哋可能有唔同嘅活動呀，或者唔同嘅計劃衍生出嚟呢，噉我哋就會即係可能用我哋嘅網絡去周圍搵返唔同嘅舊生、唔同界別、唔同年紀，可能做緊唔同工作、唔同背景嘅舊生返嚟，我哋一齊去做呢件事嘞噉樣。噉與此同時呢，都可能我哋會有啲一直合作緊嘅友好呀或者唔同組織呀，噉都會 Keep 住就係同我哋即係有一啲噉樣嘅聯繫。噉呢個就係一個基本嘅架構噉樣啦。噉以往呢其實我哋呢個會呢，除咗做緊一啲性別流行音樂以外嘅 Project 之外呢，噉我哋有做過…喺疫情期間我哋都有一啲創作計畫啦，希望去講返疫情期間為我哋辛勞工作嘅香港人嘅故事，例如可能係一啲醫護人員嘅故事、的士司機、保安等等呢一啲嘅社會故事，或者可能係入到社區入面有一啲圍繞住社區嘅一啲歌詞嘅創作噉樣都有。除咗我哋啱啱講嘅呢啲社區嘅 Project 之外呢，噉最主要呢我哋因為都係一個舊生會，噉都要支持返我哋一直以嚟，即係到而家都仍然係發生緊，每年都會有一個課程呢，就係耀輝嘅呢一個歌詞班，噉就支持返當屆畢業嘅同學仔啦，嗰屆嘅同學仔去返做佢哋嘅作品嘅演唱會呀等等。
M：呢個演唱會我時不時都會喺我自己嘅社交媒體睇到，畢竟可能身邊仲有一啲浸大嘅舊生噉樣，就會見到佢哋喺度 Share 要買飛呀噉樣。頭先你講到嗰個歌詞班有呼應返呢個時事議題，噉我亦都搵到2018年至2019年嘅畢業作品演唱會呢，係用到呢個浸大宿舍保安霞姐嘅呢個題目作為一個填詞嘅創作嘅。頭先傾偈之中有提到呢個例如喺近排 COVID 嘅時候，歌詞班都有啲相關嘅創作啦。可唔可以再分享多少填詞方面有涉獵到嘅題目，以及係咩題材呀、咩對象噉樣呢？
O：當時嚟緊…即係上緊歌詞班嘅同學仔啦，噉佢哋呢為住自己嘅畢業作品呢，都一定每個同學都會創作一啲歌曲噉樣啦。噉當時因為疫情都發生緊，噉所以有啲同學仔嘅創作呢，都係圍繞住疫情啦，同埋即係身邊一啲為我哋默默耕耘嘅一啲香港人嘅故事啦。噉所以啱啱就係除咗馬天娜提到嘅，我哋有寫一啲學校校園宿舍保安嘅故事，噉另外我哋有曾經做過一首係的士司機啦。因為記得嗰陣時疫情期間呢有一啲，我哋叫做「防疫的士」係咪呀，即係有啲特別嘅的士呢係需要去接載一啲可能有患咗 COVID 嘅朋友去來往醫院呀等等呀。噉另外呢，就有醫護人員啦噉樣。噉所以呢其實同學嘅創作呢都會圍繞住呢啲生活題材，唔單止係攞身邊嘅人做題材咁簡單啦，而係我覺得藉住創作或者藉住去觀察、去吸收一個創作嘅題目嘅同時，其實都表達緊一個人對於佢身邊嘅社群呀、或者唔同人嘅關懷噉樣。可能我哋平時每日喺我哋身邊行過嘅人，其實我哋可能好少花時間去留意佢哋嘅，噉但係透過創作我哋放返慢我哋嘅腳步去觀察，去了解緊唔同人，自己身邊唔同人嘅故事。噉呢個其實都有一個意義喺度囉。噉呢個就係我哋其中一個…呢個同學仔當時做緊嘅 Project 啦，噉所以呢後期呢就發展出有幾首歌都拍咗做MV，噉個 Project 就叫做《趁香港還有你們》，噉就係呢個疫情期間發生嘅一個 Project，噉都係幾年前嘞。噉所以而家呢就疫情過咗啦，噉我哋都有好多機會去返啲實體嘅演出呀，可以真係親身去接觸唔同嘅人，噉更加可以即係有多啲唔同嘅空間去了解啦，同埋去發揮我哋創作，或者歌曲創作嘅可能性嘅。
M：你講到《趁香港還有你們》呢，我亦都諗緊其實歌詞班裏面嘅歌詞以及係一啲，即我都有睇過過往一啲譬如話作品發佈會嘅作品啦，都係會同返填詞嘅同學仔本身自身嘅經歷啦，或者佢關注嘅議題有關。噉我頭先都有講到呢個的士呀、保安呀，即係一啲可能喺我哋生活裏面，係一啲寂寂無聞嘅崗位噉樣啦。噉我覺得好多時候節目啦，無論係睇嘅、聽嘅、演嘅，其實會引起共鳴呢，往往都係一啲比較多人鍾意 Share、鍾意分享嘅原因嚟嘅。噉以而家即係慢慢崛起，都有越嚟越多香港嘅寫廣東話歌嘅填詞人啦，而佢哋好多時候都會開始去諗，啊我哋生活裏面嘅一啲一點一滴呀，我哋嘅思緒、我哋嘅情緒，我哋有啲乜嘢係其實，經常碰到但係唔常會帶出嚟傾嘅一啲議題啦。噉頭先你講到係，社會裏面唔同嘅崗位之餘，噉例如性別呀、情慾呀、性小眾嘅一啲議題，都係社會裏面其實經常會遇到，但係唔常帶出嚟嘅一啲嘅題目噉樣。噉我都想問一問，就係因為耀輝本身喺浸大有教性別研究以及填詞班啦，本身有冇填過啲關於性別歌詞呀，就你本人嚟講?
O：如果我淨係專注喺性別入面呢，就應該冇。但係可能係情感呀、情慾呢一類呢都會有嘅，係嘞，我諗可能係一個 Complex 呀，一個混合體，即係可能一個作品唔單止講一個嘅主題，可能好多樣嘢加埋一齊，都係我諗都比較立體嘅經歷。
M：本人係冇填過詞啦，但係我有少少嘅涉獵過呢個英文寫詩嘅過程。噉我相信有多人都知道詩詞歌賦，詩詞歌賦呢四個字，其實填詞、寫詞與詩呢個創作嘅嗰個寫法呢，係會同你寫例如散文呀、寫小說呀，寫…我哋而家可能寫啲動態、Blog post 嗰啲係完全唔同嘅。你要寫嘅嗰個歌詞係要首先要表達你嘅意思啦，呢個第一；第二就係你要啱音啦，廣東話有九音啦，你錯咗個音就會好奇怪啦啲字，哈哈！你喺呢個寫嘅過程之中，你有啲乜嘢體會，或者有啲乜嘢難忘嘅過程？
O：我都係入咗歌詞班先正式叫做學寫歌詞嘅。噉所以呢，喺學習嘅過程之中呢，當時啦，除咗去掌握一個音樂上面嘅，可能係節奏啦、一啲唔同嘅技巧啦、廣東話嘅發音啦、啱唔啱音啦、押韻啦，或者可能修辭啦，呢啲比較我哋叫做技術性嘅問題之外，同埋可能嗰個歌本身，個音樂帶畀你嘅情緒同埋佢哋嘅風格之外，噉我諗更加多嘅地方呢，除咗我哋學咗呢啲基本叫做技巧型嘅知識之外，其實反而呢，耀輝更加係會教我哋去點樣去想像，或者從一件日常生活嘅小事入面，去連結到可能唔同嘅創作度噉樣。佢就經常講一句說話，學寫歌詞都即係學做人、學創作都係學做人。初頭都唔明呢樣嘢係點解，咁深嘅，咁好似啲語錄噉樣嘅。
M：係，好玄呀！
O：好玄呀！噉但係後來呢，即係你慢慢去感受喺你創作期間，因為好多時創作最後去到一個終極嘅目的，點解你要做一件事去分享、去畀人睇，你唔係自己做完擺喺屋企就算，即係你會畀人睇到。噉我諗其中一個就係因為一個作品最重要，可能係有共鳴，其他人睇到都覺得身同感受，都覺得我喺你嘅字入面，搵到一啲我自己嘅回憶或者諗法。噉所以就變相睇到喺好多時，我哋做創作期間，除咗技巧之外，我哋學好多聯想啦，學好多唔同嘅創意練習，唔同嘅方式去問問題，去同人溝通。噉所以變相我哋呢，都可以分享少少，我哋課堂喺大學度，大家一般理解上緊一個大學課堂，就好似一個 Lecture hall 噉樣啦，噉大家全部同學就坐，好似睇戲噉樣面對住個老師去講嘅啫。噉但係歌詞班係有少少唔同嘅，就係呢我哋係一班三十至三十幾個朋友啦，噉我哋就會攞晒啲凳嚟圍一個圈嘅，係嘞，就好似即係一個大圈就喺個課室入面，噉耀輝就會喺中間。噉呢我哋其實所有同學都會大家望到大家啦，噉同埋呢係，我諗個氣氛係會比較…我諗老師同同學之間嗰個階級同埋嗰個溝通呢，都會即刻變返比較似朋友噉樣。同埋有一個守則呢就係我哋都…因為要建立一個信任，喺個班房入面要建立一個信任，令到大家都願意真係敞開心扉講自己嘅諗法，同埋一啲故事嘅時候呢……我唔知道而家，我諗都應該仲係嘅，就係呢我哋喺呢間房入面嘅，傾嘅嘢呢，出咗房之後呢就唔會再提㗎啦嘞。噉所以其實呢一個，耀輝營造呢個環境變相呢，同學個同學之間有個信任啦，我哋對老師有個信任啦，老師都對我哋有信任啦。噉變咗呢其實我哋已經係一個好 Safe，好覺得安全、安心嘅狀態去開始所有嘢，噉變相呢，其實我自己覺得會所有嘢都變得好真誠，好坦白。即係唔需要仲有啲咩隱瞞或者…當然想講嘅講，唔想講嘅講，噉但係，都起碼係一個唔需要有啲咩面具需要好辛苦噉戴住。噉呢樣嘢亦都我諗係，喺個創作入面一個好…開咗一個好重要嘅門，去令到我哋喺當時學習歌詞創作呀，或者唔同類型嘅創作入面都有呢個啟發。
M：我諗我相信耀輝有將呢一個課堂，即係呢一個課室呢一個空間呀，即係進入呢個課室嘅空間，變咗做一個…我近排先學識嘅字叫做 Safe container，即係好多人話呢個叫 Safe space，但係 Safe space 有人好容易會覺得個 Space 好遠呀，好空、好空泛噉樣。而一個 Container，即係一個容器呢，有啲似就係「喺度講、喺度散啦」用廣東話噉講，所以就會有更加有呢種議題只限於呢一個空間、呢一個場所，你離開咗個場所呢，啲嘢就留返喺個場所裏面，就唔會帶走噉樣。我都覺得而家 Safe container 或者 Safe space 呢個概念係越嚟越重要啦，即係首先，呢一個 Safe Space 係可以鼓勵大家真係建立到一個互信，即係不論可能係之前訪問過嘅，例如講談性別嘅空間噉樣啦，噉以至到而家可能去到歌詞，即係傾如何寫歌詞嘅一個課程，都會用到 Safe space 嘅概念，其實係一種建立互信嘅一個方法。香港人呢，喺我喺香港生活嘅時間呢，即係好少會講到自己嘅感情。好多時候都係好似好現實呀，好功利噉樣去計較我而家開心唔開心，開心嚟做乜，唔開心嚟做乜。但係當大家其實去返一個安全空間嘅時候，你嘅情緒你可能一啲唔敢講畀主流社會知道嘅一啲想法，你會講到出嚟。噉你講到出嚟嘅時候你好…好壓抑或者係好……好想畀人知，但係係因為呢個社會唔允許你去講咁多嘅一啲嘅價值觀，或者呢啲想法就會慢慢地流露出嚟。噉呢啲往往都係可以透過表演呀、歌詞呢啲方式，唔需要非常之直接去表達，但係可以用歌詞呢種簡約而富有創作富有暗喻嘅方式，去將自己嘅訊息表達出嚟嘅。噉我相信耀輝作為一個善於將呢個情慾、性別概念融入於歌詞之中嘅一位著名詩人，佢亦都可以將呢一個技巧分享畀你哋。既然講到呢一個即係性別、性小眾嘅價值，以及係一啲平時係主流社會未必會經常允許或者經常提及過嘅議題，我想帶落去呢個《雌雄同歌》呢一個活動裏面嘞。我哋一開始有提過耀輝係有填過一首歌叫做《雌雄同體》啦，係講呢個男與女呢個概念嘅，呢個性別嘅概念。噉時下開始有人會講起呢個非二元性別，以及係即係探討性別、性別氣質、性別表達、性傾向呢啲字眼啦。呢一個《雌雄同歌》嘅發展，以至到而家呢，據我所知呢而家已經發展到3.0嘅版本嘞。噉就想邀請 Offy 去幫我哋解釋下，成件事係點樣冒起啦，以及係最新嘅動態。《雌雄同歌》呢，係，即係緣起係幾時㗎？
O：噉我哋《雌雄同歌》嘅第一屆呢，其實係2020年開始嘅，係嘞。噉當時呢我哋就申請咗一個資助啦，向政府，噉就係政制及內地事務局嘅一個平等機會性傾向資助計劃。噉我相信有可能對性別呢一個界別或者話題有啲了解嘅朋友或者群體呢，就可能有好多唔同嘅性傾向啦，性別呀嘅計劃呢，都會喺呢度有一啲嘅資助噉樣嘅。噉所以呢我哋就藉住即係用，希望用流行曲呢一個元素啦，就將一啲性別嘅訊息去帶畀觀眾啦。噉同埋呢因為，我哋平時可能講性別嘅時候呢，都可能會諗起女性嘅權益呀，或者可能係 LGBTQ+ 嘅權益呀等等噉樣，呢一類唔同嘅群體。噉跟住我哋就諗嘞，雖然我哋唔係呢一類嘅群體，噉但係呢我諗係流行文化，或者流行曲呢，其實有一個好強大嘅力量，就係佢哋嘅傳播性，噉而我哋透過呢個傳播性呢，係希望達到我哋某一啲嘅理念或者價值，係可以藉住呢一樣嘢去傳達，噉就唔係淨係一首歌聽完就算，而係原來一首歌背後，係可以有一個人嘅故事，或者一首歌嘅背後呢，原來係有一個價值去承載住嘅。噉所以呢我哋就當時2020年呢，就開始咗第一屆嘅計劃啦，噉去到呢，我哋中間呢就有啲，因為疫情呀，各樣嘢呢，噉我哋就陸陸續續噉都係 On and off 有做緊。噉去到而家呢，2023年呢就係我哋第三屆，就係《雌雄同歌3.0》嘅計劃嘞，噉樣。
M：既然講得3.0就即係會有2.0啦，我又想問呀呢個，大家用電話都會知道有呢個，第十四同第十五代噉樣啦，噉2.0同3.0係有啲乜嘢唔同呢？除咗年份唔同之外。
O：我哋嘅2.0呢，《䧳雄同歌2.0》呢，當時我哋就搵咗…招募，公開招募咗五個嘅音樂單位啦，同埋五個嘅影像單位呢，去各自為五位嘅跨性別朋友呢，去做咗五首歌同埋五個 MV 嘅，噉就可能一首歌配一個 MV 配一位跨性別嘅朋友噉樣啦。噉呢，但係因為當時疫情嘅緣故呢，我哋係冇機會做一個實體 Show 嘅，噉只係可以呢，透過串流平台呀，或者係網上面嘅播放呀，去令社會上嘅朋友知道呢五個作品，記錄緊呢五個朋友嘅故事。噉但係呢，去到3.0嘅時候呢，隨住疫情嘅緩和啦已經，大家都希望回復緊日常嘅生活啦，噉亦都呢，實體嘅演出呢，亦都開始慢慢發生返嘞。噉所以呢，好開心我哋今年呢，其實我哋今年嘅計劃呢，就係包括咗四個作品嘅，噉四個影像啦，即係四個 MV，四首歌，噉同埋配四位跨性別嘅朋友。噉呢，我哋最後呢，做完咗成個創作計劃之後，噉我哋就會喺一月呢，下年嘅一月，即係2024年嘅一月期間呢，我哋就會有一個實體嘅作品分享會，噉就希望 Gather 返我哋做緊嘅作品啦，同埋呢，我哋亦都，其實呢個計劃亦都有一啲導師去指導嘅，噉就當係大家聚首一堂，係真係可以面對面認識到大家，見到大家，同大家分享我哋嘅作品噉樣。
M：想回顧下，同聽眾分享一下，2.0呢，佢哋係做過啲乜嘢嘅主題。Offy 有提過，佢哋係涉獵到一個跨性別人士嘅呢個主題啦，噉2.0嘅版本呢，佢哋就同呢個跨性別資源中心合作，做咗五個MV。噉其實裏面呢都有一啲係已經上過呢一個 Podcast，包括海仔啦，即係聾人嘅跨仔海仔啦，噉亦都有 Ashley 啦，有 Bella，有 Zephyrus。Zephyrus 呢，係跨青時刻嘅 Zephyrus 啦，可能你喺其他嘅一啲嘅電台節目呀，一啲活動裏面都成日見到佢㗎嘞，跟住仲有 Elson。《雌雄同歌》呢一個名呢，其實係咪代表住呢一個 Project，一定係會同跨性別有關嘅呢？
O：我諗應該噉樣講啦，點解我哋會做跨性別呢一個群體呢？因為我哋其中一個諗法就係覺得，可能我哋平時上堂或者可能我哋日常生活中接觸同性戀異性戀等等，兩個群體嘅朋友呢可能會比較多啲，同埋可能相對嗰個群體個基數大啲啦，亦都可能資源呀或者等等，唔同嘅 Support group 呀等等呢都可能會，叫做 Visible 啲呀，我哋會覺得個能見性係比較高。噉但係呢，去到諗嘅時候呢，我哋發現，其實除咗呢啲嘅朋友嘅群體之外，其實原來，跨性別嘅朋友都係其實有好多啦第一。第二呢，就係其實都係喺我哋日常生活之中有機會會遇到嘅朋友啦。而且呢，其實我哋嘅了解啦，一般可能大眾對於跨性別朋友嘅了解呢，可能就以為佢哋可能做咗變性手術或者其他嘅，唔同嘅身體上面嘅改變，但係對於佢哋，可能就有個認知就會去到呢度為止嘞。噉就會變相呢，大眾去對於呢一類朋友嘅了解其實都相對少。噉所以我哋既然就覺得，既然我哋要做嘞，噉不如我哋就做一啲，希望可以有更有效去增加能見性嘅，即個 Visibility 嘅群體啦，噉所以我哋就諗到不如就做跨性別呢個群體。噉所以呢，就變相由我哋第一屆開始，同第二屆呢，我哋就同咗跨性別資源中心佢哋合作啦，噉就做咗呢兩屆啦。噉呢，我哋第三屆而家去到呢一屆呢，就同咗跨青時刻，係啦，噉同跨青時刻佢哋去合作啦，噉呢，就都配對到四位嘅跨性別朋友，去延續我哋呢個創作計劃噉。你陸陸續續其實都諗下喎，即係變相呢，我哋第一屆嘅時候做咗三首歌，跟住到五首歌，跟住呢，到到而家呢係有四首歌。噉其實呢，原來我哋喺香港已經為多咗十二個嘅跨性別朋友做咗十二個故事，同埋將呢十二個故事講緊比更多人嘅人聽。噉呢樣嘢呢，都令到我哋去諗，其實世界上有冇邊一個地方有一個噉樣嘅計劃去…願意去諗到為每一個人寫一首歌，而且我哋有十二首跨性別朋友嘅歌可以俾大家知道呢？噉我諗，喺香港呢個地方，我哋仲有空間去做呢件事嘅時候就變相，呢件事顯得好珍貴，係，因為每一首歌同埋每一個MV作品所承載嘅，係真係一個有血有肉嘅真人嘅故事。噉所以就變相，係啦，我哋都好希望可以繼續做落去啦。噉去到1.0、2.0嘅期間，我哋都未有機會做到實體嘅演出，噉希望嚟緊3.0去到個作品發佈嘅時候呢，去到我哋最後都會有個分享會去同大家去分享返。
M：嗯，我見到呢個3.0嘅版本，大家可以去 Follow 下佢哋嘅 Instagram，首先落一個伏筆，大家可以過嚟去望一望。今次佢哋3.0呢，係有邀請咗跨青時刻主席 Liam，亦都有上過我哋 Podcast 嘅其中一位嘉賓。顧問呢，除咗耀輝之外呢，仲有王樂儀嘅，噉亦都係一位浸大畢業生，亦都係一位填詞人噉樣。導師嘅陣容呀吓，喺度又首先喺度都宣傳一下，因為裏面有啲人我相信大家都有聽聞過嘅，例如有雷暐樂、陳智霖、黃妍、張進翹、洪榮杰，同埋麥㬢茵嘅。噉麥㬢茵，我相對嚟講會熟少少，因為佢係拍《烈日當空》嘅，如果我冇記錯嘅話。
O：同埋《花椒之味》，係嘞。
M：係呀，《花椒之味》，係嘞，噉所以都係有關心下呢個香港電影嘅，都唔會陌生㗎嘞。OK，頭先你都有講到呢個，終於有機會做到呢個實體活動，噉我不如去講下實體活動啦。今次3.0你哋有啲乜嘢實體嘅活動嘅時間表呢？
O：噉呢，其實我哋喺早前嘅7月、8月，即係2023年7月、8月嘅期間呢，噉其實我哋就公開招募咗唔同嘅音樂嘅創作人啦，同埋影像嘅創作人呢，去參加我哋呢個計劃嘅。噉呢，經過即係非常之熱烈嘅報名同埋遴選之後呢，噉我哋呢就產生咗四個嘅音樂單位，同埋四個嘅MV嘅單位，就會為…即係做四首作品啦，噉樣亦都經歷咗呢個之前喺9月嘅時候呢，就經歷咗呢個配對嘅環節嘞。噉呢，所以呢，喺而家呢個過程呢就應該就會係，我哋嘅創作嘅朋友啦，同埋我哋跨性別嘅朋友呢，而家就認識，互相了解、認識溝通緊，同埋做緊呢個作品嘅過程之中，喺啱啱提到嘅，咁多位導師嘅指導之下。而家呢去到大概呢，我諗呢個節目出街嘅時間呢就我希望呢，大家應該已經聽到佢哋嘅作品啦，同埋MV啦，睇到MV。去到大約喺11、12月左右發佈咗之後呢，噉我哋喺1月期間呢就會有一個叫做 Finale，就係一個作品最後嘅分享會。噉亦都象徵住呢個計劃嘅一個成績表，或者叫做一個畢業嘅作品展呀噉樣。噉所以呢係到時呢…唔知地方講唔講得呢？
M；你可以唔公佈住呀。
O：係嘞，唔公佈住。
M：到時我哋出之後再幫你 Post，到時呢個，你聽到呢一集嘅時候呢就應該係出歌嘅時候，跟住1月呢就會有 Finale，噉呀密切留意下啦，喺嚟緊嗰兩三四個月，好快㗎咋，呢個密鑼緊鼓嘅活動。最後呢，我想問下未來呢個同學會啦，畢業生們或者係參加呢個同學會嘅會友們，承繼住填詞嘅精神，你其實除咗做《雌雄同歌》之外，你哋仲有啲乜嘢打算，係點樣繼續寫落去呢？
O；噉因為我哋歌詞班同學會都秉承住幾個宗旨啦，第一就係因為始終都係舊生會啦，噉我哋都希望呢，其實藉住歌詞班或者我哋呢個舊生會可以推動到更多年輕人啦，可以…或者我哋嘅同學啦，會可以參與多啲喺創作上面嘅發展嘅，係嘞。噉即係，無論係成為到一個職業嘅填詞人都好，或者係任何方面嘅文化或者藝術發展都好呢，噉我哋都非常之支持嘅。噉另外一樣嘢呢，就係我哋都希望呢透過呢個會去連結返社會上面唔同嘅群體，噉譬如，可能啱啱我哋提到嘅嗰啲性別嘅群體啦，或者社會上面唔同嘅資源呀或者群體呀，或者可能係一啲音樂人嘅網絡呀。噉呢藉住呢樣嘢就可以透過文化或者係藝術嘅媒介呢去將，我覺得我哋去相信嘅價值或者思想去更加去分享畀唔同嘅人。
噉所以呢，我哋陸陸續續呢其實我哋都好積極搵緊一啲資源，或者一啲合作單位呢可以同我哋一齊去繼續行落去呀，因為始終呢，我哋都係一個叫做註冊社團啦，噉同埋呢，我哋都冇一個叫做全職嘅職員，所以我哋呢，全部嘅朋友呢都係義務去運作。噉而且個營運上面，我諗係一個大家都喺自己工餘、課餘嘅時間抽出嚟嘅時間都其實都需要好多嘅支持呀、支援呀，或者一啲唔同嘅 Partnership 啦，一啲合作啦，可以令到我哋繼續更加多嘅計劃可以發生到。噉所以就都期待啦，我哋都 Keep 住會繼續創作嘅，噉係嘞，噉但係就當發生緊乜嘢嘅事情或者計劃呢，噉我哋都一直係好 Open 去探索，噉 As long as 主要係，我哋本住一個宗旨就係希望透過粵語歌詞或者流行曲呢樣嘢去為我哋社會做得一啲事情，噉樣囉，噉呢個就係我哋其中一個拎住嘅宗旨。
M；我哋 PrideLab 嘅社交群組裏面以後一啲實體，佢哋喺香港舉辦嘅聯誼活動裏面，其實同 Offy 頭先最後講嘅嗰句話好有雷同㗎，就係其實有好多年輕嘅人佢哋本住有一個熱熾嘅心，熱熾嘅心係想做啲嘢，即係三個字：做啲嘢，噉樣。有啲人可能會參加社團啦，會參加組織啦，亦都有啲人係會儘管係做 CD-ROM （只觀察不參與）去關注唔同嘅團體，但係可能一啲嘅活動或者係表演呀呢啲佢哋都會密切關注嘅。噉我相信喺香港或者係離開咗香港講廣東話嘅朋友們呢，其實都以自己能力之內都不斷噉去關心緊香港以及廣東話呢啲嘅創作同埋發展啦。
PrideLab 同同學會其實背後嘅性質都係好似，我哋都係全義務人手做呀，係啦，雖然好多人都唔知點解覺得 PrideLab 好似一間公司，跟住好似我係受薪噉樣，我係唔受薪㗎，我有正職嘅，噉係啦。噉有好多人係呀，我喺度再次重申，PrideLab 係一個全義務背景嘅一個組織嚟嘅。噉搞呢個 Podcast 亦都係啦，Podcast 其實都係有背後有 Funding 支持之下，先可以繼續營運啦，即係雖然又唔係話我哋啲營運好耗費、好花錢噉，可能一支咪呀一部電腦呀，呢啲都係一啲係小開支噉樣。聽到節目聽到嚟呢度嘅你哋呢，其實都可以知道咁啱有兩個組織，其實都係一齊去攞呢個政府政制及事務局裏面嘅一個，可以算係支援性小眾、關注性小眾嘅一個 Funding 裏面嘅夥伴啦，我哋都係受惠於呢個資助名單嘅。噉其實好多喺香港做呢個倡議性別小眾議題嘅組織呢，佢都唔係咁有錢啦首先，噉佢哋都係需要有呢個資源去協助嘅。噉我哋有即係而家聽到兩個，可能自己都有正職嘅我哋呢，其實背後要去營運一啲…呢個活動，即係我去協力營運呢一個 Podcast，而 Offy 去營運…去呢個做一個主席嘅角色，其實都係我哋自己撥出自己嘅時間去做呢個幫手啦，即係所謂嘅「做啲嘢」，我哋就係噉樣做啲嘢。係我哋而家能夠攞到嘅資源之下，都感受到我哋呢兩個組織啦，即係有一個小碰面嘅時間可以去交流下，咦，原來我哋喺香港，喺現有嘅資源底下，都可以有噉樣嘅少少嘅火花，小小嘅經營噉樣。
經營係需要成本嘅，經營都來得不易，每個人都係得廿四個小時，我哋冇特別多幾個鐘頭嘅。每個人做啲嘢嘅範圍都有唔同啦，噉我哋目前嚟講就聽到 Podcast 同埋今集可以搵到呢個，重新講多次，非常之長，但我都要講得好清楚：周耀輝歌詞班（一世唔畢業）同學會，呢一個組織，係目前嚟講嘅動態就係噉樣嘞。最後，我都會覺得一個小小嘅總結同埋我嘅感想就係，PrideLab 都係一個想強調成全，或者係保留到廣東話呢個元素嘅一個組織啦，所以我哋有好多嘅作品或者出品，都係寫廣東話中文嘅。噉我哋呢一個節目，除咗特別 Specify 呢，其實內容都係用廣東話去進行嘅。希望大家聽完呢個節目嘅同時，都可以反思下，其實廣東話嘅傳承仍然需要大家嘅努力，因為語文係好容易被洗走㗎。當我哋經常性可能從我哋嘅社交媒體接觸到一啲…好似好熟悉但係又有啲陌生嘅字嘅時候，你就可以留意得到呢一個混雜以及習慣嘅使用，其實係一種文化嘅一個衝突與…我唔知係咪叫殖民啦，但係一個文化上面嘅衝擊、演變。希望以歌詞以及聲音紀錄嘅方式嘅我哋兩個團體，都可以繼續可以喺未來嘅日子繼續營運落去啦。感謝今天能夠邀請到 Offy，目前嘅歌詞班同學會主席，去同我哋分享下呢一個歌詞班，仲比我哋呢啲冇得上堂嘅同學們可以了解下呢個歌詞班嘅發展同動態。
O：多謝馬天娜今日，願意…即係我哋今日可以傾到呢個偈啦。噉都希望呢，大家之後都可以繼續關注我哋呢個《雌雄同歌3.0》嘅計劃嘅路向啦，同埋呢之後呢，可能喺宣傳度呢，大家都見到我哋嘅 Facebook、IG，噉都可以 Follow 返，即係繼續跟進我哋嘅動向。因為呢，我好相信呢，流行文化或者廣東歌呢入面都承載住好多價值，係我哋無論係性別群體，或者等等唔同嘅文化嘅朋友呢，都希望去關注嘅嘢。噉所以我哋都一齊行緊嘅，冇錯，多謝大家。
M：係呀係呀，我哋之前都係喺度……喺度，我想 Make 一個 Point 呀。好多時候呢，我喺一啲講英文嘅會議裏面呢，好多時候都會，除咗寫自己個名介紹自己之外，都要寫一個 Pronoun，我自己嘅認同係女性啦，噉我會寫 She/her 啦，喺英文嘅 Pronoun 嚟講，係嘞呢個代名詞。噉但我都會再喺 Her 後面寫個「佢」字，噉「佢」作為一個廣東話嘅使用者裏面，本身廣東話之中一個性別中立嘅代名詞。噉我覺得呢個就係廣東話，我作為一個廣東話嘅使用者，一個引以為傲嘅一個元素啦。我希望更加多人知道廣東話，亦都希望更加多人知道唔同語言佢哋嗰個語言系統背後如何呈現性別，如何呈現情慾呢一啲嘅元素。每一集嘅結束呢，我都會有一個收結嘅，噉呢度個收結就係，點止港同志係一個以香港同志角度出發嘅 Podcast，希望可以將大家生活裏面嘅性別同埋同志議題，用廣東話嘅聲音同埋文字嘅方式，保留同埋流傳嘅。噉就上我哋嘅 Podcast 專頁pridelab.hk/podcast，或者上我哋嘅 Instagram @pridelabhk 嘅簡介下面有一條連結呢，就會見到我哋呢一個節目㗎嘞。噉多謝收聽呢個節目而且聽到嚟最後，如果想聽更加多呢一類嘅節目，除咗訂閱我哋之後呢，都歡迎你喺自己收聽緊嘅平台上面留言同埋畀星星嘅回饋嘅。如果你留唔到言呢，噉你就 DM 我哋啦，噉我會定期去 Check 留言嘅，噉你嘅留言有機會會上到我哋嘅節目嘅。噉今集就講到呢度先，再一次感謝 Offy 上嚟做我哋嘅嘉賓。期待下次同你《點止港同志》，我哋同聽眾講拜拜。
O：拜拜！