2023年7月「同．一線」連同學者+組織舉辦發佈會，
分享熱線成效評估，及香港性/別小眾之需求和求助模式研究。
今次邀請翻「同．一線」嘅兩個代表
同我哋recap一吓評估報告嘅內容
順便畀我哋知道「同．一線」嘅社工們會遇到點樣嘅挑戰，
面對更多元嘅性/別概念同埋文化，佢哋又點樣努力服務來電者？
【讀書畀你聽】性/別小眾熱線成績表 (Feat. Meko、Wing@東華三院同一線)
M：馬天娜
Meko：Meko
Wing：Wing
M：歡迎返嚟《點止港同志》，我係主持馬天娜。今集係一個recap，除咗係方便畀我自己之外，亦都係畀一啲冇嚟到記者會嘅朋友。係一個點樣嘅記者會呢? 就係之前七月嘅時候呢，有一個東華三院嘅同一線，佢就喺尖沙咀有一個記者招待會。咁個記者招待會就係要去報告返佢同香港大學社會工作及社會行政學系研究團隊嘅一份研究報告。咁嗰個報告就係要去評估返東華三院為香港性同性別小眾人士而設嘅同一線，之前有訪問過嘅⋯⋯我哋嘅同性小眾嘅同行者嘅呢個熱線，佢嘅服務成效，以及係想認識下原來香港嘅性別小眾佢哋嘅需求，同埋佢哋尋求協助嘅模式係點樣嘅呢？咁好快去俾大家recap一下同一線係乜嘢。同一線係一個24小時支援性同性別小眾熱線，電話係2217 5959。咁而家我哋邀請咗兩位嘉賓嚟同我哋分享今次嘅報告。我點名啦，請Meko介紹下自己先。
Meko：大家好，我係東華三院同一線嘅處理主任Meko。
M：另一位。
Meko：大家好，我係同一線嘅副主任Wing。
M：感謝Wing同Meko撥冗去同我一齊做呢個錄音。其實老實講聽到呢一度嘅朋友們，我同你哋一樣我係冇去到記者招待會，所以呢大部分嘅資訊都係非常感謝我哋嘅podcast團隊有人去幫我消化咗呢個記者會攞到嘅資訊之後，寫一啲問題以方便我哋呢啲冇嚟到記者招待會嘅朋友，海外或者香港嘅朋友去了解下而家最新嘅同一線嘅近況。咁喺講即係性小眾嘅需求同埋佢哋協尋求協助嘅模式之前，想問一問關於熱線嘅特色嘅。咁熱線顧名思義就係打電話㗎啦，即係你要有固網電話，或者你要你嘅手提電話打去一個電話number，而打去一條熱線噉樣。可唔可以請你哋去分享吓或者講解吓，你哋平時嘅運作係點樣，即係頭先我哋講到話24小時，你哋嘅運作係點樣24小時操作㗎？同埋點解會喺2023年或者係，或者係之前嘅時候去做呢個評估成效嘅研究嘅呢？
Wing：我係阿Wing，噉樣都介紹返我哋嗰個同一線嘅一啲特色。咁其實我哋呢條線就係24小時年中無休嘅一條熱線嚟嘅。咁都係算係香港首條專為性別小眾而設嘅熱線，24小時嘅熱線。咁當時就係，我哋個運作係點樣呢？我哋運作其實我哋⋯⋯因為資源有限，咁其實我哋得一條線嘅啫，咁所以打到入嚟嘅時候呢，我哋就我哋嘅同事會同來電者傾嘅。咁而打唔到入嚟嘅呢就需要留言噉樣嘅，咁亦都有啲人呢佢哋就會選擇喺我哋嘅IG或者係Facebook嗰度留言，話我哋需要幫手呀噉樣。咁我哋收到呢啲留言呀，佢有留電話嘅話呢，咁我哋都會打返畀佢嘅。噉樣咁就，我哋聽咗電話之後呢，如果佢面對一啲嘅困難，唔係比較複雜嘅話呢，咁可能我哋就係一通電話就同佢傾完就算啦。咁我哋就會有一個叫做熱線跟進嘅服務嘅，咁我會同佢哋介紹返啦：「其實我哋有個熱線跟進服務，亦都知道你而家面對嘅困難呢係未必係一通電話可以處理得到嘅。咁如果我哋係一個專屬嘅同事係可以跟進你嘅情況嘅話，喺電話上面即係有限嘅跟進啦。咁你會唔會想用我哋呢個熱線嘅跟進服務呢？」咁如果來電者佢係想咁做嘅話呢，咁我哋就會記得佢個電話，再派返畀我哋嘅同事，跟住然後就有同事聯絡返佢，再同佢傾囉。咁如果傾得成呀，亦都覺得佢有一啲嘅輔導需要，係真係要面談嘅輔導需要嘅話呢，咁我哋會叫佢，我哋都會約佢，會唔會想試下我哋嗰個輔導嘅服務呀。咁我哋就約佢上去我哋油麻地嗰個中心，同心會嗰度見面噉樣囉。至於點解當時我哋會做呢一個研究呢？咁其實我哋當初諗住做呢個研究其實係19年嘅時候，即係我哋已經成立咗一年嘅時候。其實我哋已經諗係我哋會唔會做一個研究，係當係頭三年嘅一個總結呀。了解返性別小眾嘅需要呀，亦都了解返佢地對我哋熱線嗰個反應係點樣呀。然後我哋再做一啲嘅改善或者係一啲檢討呀，咁呀同埋就係都知道其實坊間呢，都一直都有唔少嘅機構啦，即係我哋自己性別小眾一啲嘅支援嘅組織呀，都會做一啲嘅研究嘅。咁而同類嘅研究呢，我記得好似十年前都有做過呀，超過十年呀。咁既然都超過十年。咁我哋覺得再做類似嘅研究，睇一睇性別小眾對求助方面呀，佢地嗰個模式會唔會有一啲轉變呢？即係匆匆過咗超過十幾年之後會唔會？如果有轉變嘅話，咁對我哋嗰個服務呀，或者對其他啲提供服務嘅一啲持份者，其實都係一個啟發嚟嘅。咁所以就有呢個咁嘅諗法囉。
M：好，阿Wing你提到呢，就係對上一次即係類近嘅一個研究報告，都已經十年前啦。咁十年呢的確即係我相信對於我，或者對於你哋嚟講，都係一個我哋經歷咗非常多嘅改變呀，即係不論係香港呀，或者係我哋自己健康呀、COVID呀，以及係我哋使用嘅社交媒體，都變咗非常之多。咁即係而家我哋相信，無論係即係咩年紀都好，至少都會遇到好多嘅通訊軟件啦，或者係社交平台呀。有Instagram呀，WhatsApp呀，抖音呀，Facebook呀。Facebook而家又好似唔興喇，依家年輕人又唔興喇。而跟住呢又有Snapchat呀，曾經有出現過嘅Clubhouse呀，Twitter呀而家叫X啦。即係非常之多嘅唔同嘅通訊軟件，咁十年以嚟即係變化非常之多啦。咁但係有一樣嘢就開始即係有一個趨勢，就係我哋嘅溝通模式呢就比較零碎。即係好似我哋而家唔會好似好完整咁，寫一封E-mail話「你哋好呀，我係邊個呀，我想同你約一個，即係約個活動呀，你幾時得閒呀？」即係噉樣。就變咗做每一次就係Hi，跟住一個訊息，「我係邊個」一個訊息，「我想問你哋會唔會得閒去幫手做一個訪問呀」，一個訊息噉樣。或者可能直接Send個Sticker呀，或者直接寫個Response俾個Like、俾個V字噉樣。即係成個嗰個溝通嘅模式變咗好零碎呀。咁，去返同一線本身嗰個性質，就係一個打電話嘅一個過程嚟㗎嘛。目前嚟講，同一線覺得即係你哋依個服務嘅嘅角度嚟講，服務者嘅角度嚟講，比較傳統嘅打電話呢個模式佢好處係啲乜嘢呢？
Meko：好，咁我係Meko呀，我試下答呢個問題啦。打電話呢有個狀況呢就係，其實係，起碼你係，剛才你講話好零碎啦，即係一個兩個噉樣嘅Message。打電話你，如果你唔斷線嘅話呢，其實你可以繼續去同佢傾啦。同埋都有個互動喺度，你又聽到，呀，嗰個人其實聽緊你講。即係如果你話係嗰啲譬如WhatsApp呀，Signal呀，嗰啲係，其實你又聽唔到佢個聲啦。聽唔到佢個Tone啦，即係聽唔到佢個聲調啦。語氣呀，其實差少少，嗰個溫度，嗰個溫度係差啲嘅。同埋電話你即時你有回應，即係你WhatsApp呀，Signal嗰啲，可能你係要攤一陣，你都可以回應到嘅。係啦，但係嗰個即時性呀，同埋你會，係啦，感覺到有嗰個互動同埋嗰個人情味囉。尤其有時講到一啲比較沉重嘅話題嘅時候啦，電話嘅交流係會比較有溫度。同埋都可以表達到嗰個積極聆聽呢，同埋你點樣即時去同你返個服務對象嗰個感受，咁可以做到好有效嘅陪伴啦。咁仲有呢，電話呢，其實有個保密性嘅。你WhatsApp呀，Signal你都要顯示嗰個電話號碼啦。但係其實打電話入嚟呢，佢未必需要顯示個電話號碼嘅。咁咪有個保密啦，同埋對比起網上嘅通訊軟件，咁可以令到我哋嘅服務對象同我哋都放心去傾嘅。
M：所以而家接聽嘅模式就係，係咪我想像中嘅好似嗰啲呢，你喺電視裏面嘅籌款晚會呢。你係就咁拎起個電話就會聽到一把聲，但係你就唔會知道邊一個電話號碼打電話嚟噉樣？
Meko：係呀係呀。
M：ok，好好好，所以個模式就係噉樣拎起個電話，就會收到呢條線嘅calling。
Meko：係呀係呀，我又唔識佢，佢又唔識我，如果係喇。我講我身份嘅時候。
M：ok，打電話嚟嘅人，即係按照報告嚟講呢，熱線嘅使用者其實呢，即係比較有趣嘅發現，就係超過一半都係比較年輕嘅性別小眾嚟嘅。即係當可能我哋覺得，哦，原來呢，即係當我哋年輕嘅人，應該都唔鍾意打電話㗎啦。好驚打電話，好驚接電話嘅時候呢，其實係，即係有一群嘅比較年輕嘅性別小眾，都係會用呢個同一線嘅熱線服務嘅噉樣。可唔可以從即係從你哋服務者嘅角度去講下，點解會有噉樣嘅現象呢？佢哋通常其實係，點解都會想打電話嚟搵你哋噉樣呢？
Wing：我係阿Wing呀。咁其實呢，同一線嘅大服務社群嗰個年齡層其實好廣嘅。咁，較年輕嗰班嘅朋友仔呢，咁佢可能面對多啲出櫃嘅問題啦。咁好多人都覺得呢個世代嘅年輕人其實唔鍾意傾電話嘅。咁但係研究呢就係個結果就剛剛相反，就係同一線呢其實佢有個即時性喺度啦，即係你即刻打就即刻有人聽呀。同埋個保密性呢，其實我諗係正正滿足到佢哋嗰個服務嘅需要。呢個就係佢哋，我估係佢哋嗰個打電話嚟嘅原因。
M：咁調返轉頭諗啦，作為而家年輕嘅人啦，我自己就唔敢叫自己好年輕啦。咁但係至少我每一日呢都打開個電話呢，一定有幾個app係同時操作緊嘅，即係有WhatsApp啦，Instagram啦，Messenger啦，即係Facebook嘅Messenger啦，以及係一般嘅電話啦，以及Telegram。即係會有好多嘅訊息喺我睜大眼嘅嗰一刻已經好多積咗喺度。有冇曾經收過可能有一啲人去問，「點解你哋唔開呢一啲嘅平台嘅？」即係點解你唔開條WhatsApp專線，或者係你唔開個Telegram group噉樣。即係佢哋會唔會收到噉樣嘅request呢？
Wing：我係Wing呀，有呀，有呢個咁嘅要求。首先我哋人手係真係唔夠嘅。咁因為你要24小時都睇住個WhatsApp，睇住個電話做人呢。我哋仲要聽熱線嘅話呢其實係，我諗真係要多一倍人手，都未必可以運作得到呀。唯有真係限米煮限飯呢啲位，咁就真係有限程度。有時佢哋會識得喺啲窿路度留意嘅，咁我哋都會回覆到佢。不過都係覆佢之餘都係鼓勵佢呀「你打上嚟啦」，因為始終打上嚟直接同佢傾呀。嗰個效果真係好唔同呀，好似Meko頭先講，大家人與人之間接觸聽到大家嘅語氣呀，咁都可以感受到佢嘅情緒呀。咁佢又可以感受到我哋嘅一啲嘅關心呀，會直接好多囉。咁所以如果係真係喺一個有限資源嘅情況底下呢，就真係可能電話先呀噉樣。
M：講電話係最直接最直接了當嘅，即係我相信唔少人可能見到呀，你有一啲服務供應商，佢可能就會話有個WhatsApp嘅服務專線，咁你就撳落去，然後佢就會直接轉咗你去一個手機個WhatsApp個app度，然後有個對話框跟住你就打一粒個關鍵字呢。咁佢就會出一個機械人嘅回覆畀你，即係成件事係望起上嚟好似好快回覆你，但係其實佢回覆你嘅內容係咪真係完全貼切你嘅需要呢，以及係你係咪真係可以得到一個好人性化嘅回覆係有啲難。即係再加上頭先你都講到就係同一線得一條線啦，即係佢唔似嗰啲call center噉樣，即係係唔係就即刻可以轉咗一個CS幫你覆一個message。所以我相信都係可以理解得到就係以而家嘅資源情況之下，電話會比較即時可以解決得到，即係性別小眾來電者嘅需要噉樣。
Wing：同埋真人同機械人都係差好遠嘅，真係差好遠。機械人嗰啲你講好多句都未必講中你想要嘅嘢⋯⋯
M：冇錯。
Wing：好忟憎。
M：係呀，即係我自己打啲關鍵字我都要諗緊，我都要捉佢條路，我都係諗緊究竟佢要見到啲咩字先會畀個答案我。
Wing：呢個係我哋暫時勝過AI嘅地方。
M：應該係。起碼個語氣係會真嘅，無論係有啲AI主持或者AI嘅聲音模擬器噉好，但係都唔會做到而家果種，真係會俾到一個好實在好用⋯⋯即係而家我哋用緊嘅語言嘅方式，佢同你輔導你呀轉介你呀。
Wing：沒錯⋯⋯
M：咁講起呢個性別小眾啦，除咗我哋發現其實都唔少嘅年輕性小眾嚟打電話嚟，即係打比同一線之外呢，會發現呢頭先Wing都有講就係，有陣時你哋都會收到啲call，call完之後就會問你會唔會想再繼續重複來電呀噉樣。咁數據裏面呢就係話裏面有70%，超過70%嘅來電者係會重複有呢個來電嘅互動嘅。講解下重複打電話嚟嘅情況係點樣嘅呢？即係通常佢個flow係點樣嘅呢？
Meko：我係Meko呀，超過70%都係重複來電呢。其實都反映住性別小眾呢，佢哋個需要呢唔可以單靠一次，單次性嘅電話服務就完全滿足到嘅。因為呢有啲我哋嘅來電者呢，其實都要啲比較長嘅時間呢，去建立同熱線社工嘅關係，或者對我哋呢條熱線呢嘅信任呢，其實佢都要慢慢去建立嘅。所以呢佢都可能第一次打嚟，可能傾一啲嘢，第二次打嚟傾唔同嘅嘢，去睇下其實我哋嘅同事或者條熱線其實個定位係點樣呀，可唔可以傾到一啲深入嘅嘢或者係比較難以啟齒呀去同其他人去講嘅一啲嘅話題。咁而每一次呢，佢哋可能都儲緊一啲嘅勇氣呢，去打比我哋。咁當佢哋覺得都合適喇喎，可以傾一啲真係好重點或者關於佢哋自己本身。性別小眾所擔心嘅問題嘅時候呢，其實可能佢就可能喺第三呀第四個來電嘅時候呢就會講出嚟。咁呢個係即係我哋都會見到係個進程係噉樣囉。佢哋要先理解咗究竟條熱線值唔值得佢哋信任，值唔值得佢哋去放心去傾呀，有冇人批評呀，即係放心同佢哋傾啦。咁可能呢個都係一個漫長嘅過程。
M：我相信傾訴係即係⋯⋯不論係你純粹同你個friend傾訴，或者係你同你嘅社工朋友傾訴，以及打電話嚟同一線嘅話，都需要一段時間同一個陌生、聽你講嘢嘅人建立咗一個信任，你先可以將你內心裏面可能困擾咗非常之耐嘅情況講出嚟啦。頭先Meko有講到通常可能來回兩三次噉樣啦，你會唔會可以方便分享到，例如即係來電者可能係講到啲乜嘢嘅情況之下，你會發現，咦！原來講電話係可以令到佢嗰個信任度，即係增加繼而可以協助到對方去解決佢嘅困擾噉樣。
Wing：咁我分享嗰個案啦，我記得呢就係我有一日接聽咗個電話，咁佢就當時就同我講返佢一啲嘅伴侶之間嘅一啲嘅情況啦噉樣。咁佢講得都講得比較慢㗎佢，同埋佢唔會講即係佢好多試探你感覺到佢，即係佢可能會覺得你唔OK呢。咁佢會問你「你本身係咪性小眾呀？」噉樣、「咁如果我講呢啲話題，你會覺得係點樣呀？」噉樣。咁同埋佢又會話你覺得，佢好得意喎，雖然佢知道我哋呢條係一條幫助性別小眾嘅熱線。咁佢會問「你覺得兩個男仔一齊嚟點睇？」。咁佢問好多呢啲嘢嘅。咁呢個係第一個電話。咁我同佢講咗大概四十幾分鐘，就講我都願意同佢分享下我啲睇法。咁佢到四十分鐘左右呢，佢先講困擾佢嘅係啲咩問題嘅噉樣。雖然佢一開頭佢都有講話我係同自己伴侶有啲情況，但係佢就問我好多呢啲嘢，問完之後佢先講其實我同佢係咁嘅噉樣。就之所以話點解啲人成日話打唔入嚟呢，就係因為我哋要傾咁耐，有時真係要傾到佢四十幾分鐘佢真係先可以講得到其實我咁嘅情況，我覺得好困擾我噉樣。咁但係我又唔能夠真係同佢傾到兩個鐘頭，咁可能同佢傾到個零鐘頭呀。咁因為大家個體力都會累，專注力都未必會咁集中啦。咁可能就真係話「不如你都留低電話，我哋繼續同你傾呀？」咁就我覺得來來回回都係真係三四個電話，咁到後來佢真係可以進入到一個輔導階段。咁我哋就真係約佢出嚟見，佢係噉樣。所以要用好長時間。
M：Wing，你講到話佢一開始就係話佢同佢伴侶有啲狀況，即係佢打電話嚟係講話佢同佢伴侶有啲狀況。跟住就開始試探下接聽電話嘅你嘅立場係點，跟住你講到話40幾分鐘之後，佢講嘅個問題係咪其實同佢本身一開頭嗰個我同我伴侶有啲狀況係其實唔關事，定係係關事？
Wing：都關事，但係可能佢會深入啲講我同佢之間係點樣，我哋個衝突位係邊。因為佢可能覺得，佢好想知道我對同志文化嘅形式係幾多，佢會唔會接受佢哋呢啲行為。所以佢會問好多，去到後面就話其實我哋係噉嘅。因為我唔能夠透露太多，我可以點算呢。我同佢Share落去。聽到後來佢都會覺得舒服，因為佢覺得我都唔係唔識嘅，我都了解嘅。我有一啲唔識嘅位我都會直接問，佢會覺得呢個位係舒服。
M：Wing嘅頭先一個小小嘅分享，Case Study嘅分享，俾而家嘅聽眾們知道一樣嘢，就係我諗係有唔少人。我首先會將佢代入一個睇醫生嘅概念。睇醫生成日啲人就會詬病睇醫生嘥氣、睇醫生我等咗成個鐘，等咗成個鐘之後入到佢就同佢見得三分鐘，跟住就一鼓氣就覺得我同佢講唔到啲乜嘢，跟住畀人踢咗到出嚟。但係你而家聽到呢個同一線來電者講真係花一個耐性、花一個心機同時間去慢慢解開一個結。即嗰個結，唔定只係一個信任嘅結，佢係一個你識幾多，你識幾多呢個圈內人嘅一啲知識呀文化嘅一個結。你解開曬呢啲結之後，你就見到後面嗰個核心嘅⋯⋯即比較重要嘅嗰個底，嗰個最關鍵嘅問題，或者可能佢比較在意嘅一個問題噉樣。咁即係時間係需要花喺呢個傾談裏面去即係做一個輔導嘅功能。咁我諗相信往往啲人打電話嚟呢，我相信都唔會係嚟去都非常緊急嘅。可能一開始就係同我同我伴侶發生咩事呀，我嘅人際關係發生咗啲咩事呀。咁呢個人際關係呢個issue呢，即係呢個題目呢，就根據呢個報告呢，都係唔少來電者好⋯⋯好concern好關注嘅一個話題。以你哋接聽呢個同一線嘅經驗，性別小眾佢哋嘅人際關係呢，係通常受到點樣嘅壓力呀？同埋佢哋會點樣形容呢啲壓力係點樣影響自己啲生活？
Meko：我係Meko啦。咁人際關係呢，都有好多地方都會出現嘅喺我哋嘅生活裏面。其實好似好似就咁人際關係好似好簡單呀，其實有好多範圍都係包括，譬如喺職場啦，學校呀，友情呀，或者係一啲未開始嘅一啲嘅傾慕或者曖昧嘅關係呀，或者純粹嘅性關係呀，噉樣都會嘅。咁其實講緊係日常生活嘅每一個環節都會遇到人際關係呢個課題囉，可以稱之為。性別小眾嗰個身份呢，其實為佢哋都帶嚟一啲嘅壓力啦，唔同嘅壓力啦。可能即係有來電者係佢未出櫃嘅，佢可能就要守住呢個秘密啦，為自己。咁好多時候呢，面對其他人嘅時候呢，都會有啲保留啦。噉樣都會令佢哋呢，難去建立一啲，健康同坦誠嘅人際關係嘅。都有講話，唔同世代嘅性別小眾，可能有啲處境面對嘅處境都有啲唔同。可能比較年青啲可能喺自我，探索方面需要多一啲嘅協助。同父母相處，朋友相處需要多啲嘅指引。開始長大，拍拖談戀愛，他們可能要多啲親密關係，伴侶相處嗰啲嘅課題囉。年紀大啲嘅性別小眾朋友，有啲可能，仲未出櫃嘅時候，佢哋又收到啲資訊，都可以試下做返真正嘅自己。但係佢要由深櫃裏面走返出嚟嘅時候，其實可能都有好多壓力啦、好多掙扎會出現。咁我哋嘅介入、社工嘅介入其實可以幫佢哋處理一啲壓力之餘，仲可以試下都喺佢嘅角度，佢嘅處境，睇下可以點樣滿足返佢哋自己真正嘅需要。
M：我想追問呢，頭先你話一啲相對嚟講冇咁後生嘅來電者，就可能面對一個深櫃嘅問題，佢到底要點樣做返自己？你哋最大年紀嘅來電者係幾多歲？
Meko：六十幾！
M：六十幾？你最細（來電者年紀）講唔講得㗎？
Meko：十幾！
M：嘩，應該非常之闊嘅一個，跨越幾代。六十幾可能係，阿叔噉樣，甚至做人哋阿公噉樣嘅一個年紀，然後一個做人哋阿孫嘅年紀，你都會接聽㗎喎⋯⋯嘩！
Meko：冇試過十歲以下。
M：好，ok。好，之前做過一兩集講關於老年嘅同志或者係年長嘅同志。咁呢，都想同你分享吓就係，嗯，即係不論係一啲學術嘅研究啦，或者係有輔導或者係輔助一啲老年人士嘅一啲朋友們，佢都會發現老年嘅同志們，佢哋都⋯⋯有一啲人佢哋都會經歷咗好大嘅內心嘅困擾，即係佢已經可能所謂已經「上咗岸」。所謂上咗岸嘅意思可能佢哋已經，按照佢哋當時候嘅嗰個社會氛圍，或者係框架之下，佢哋步入呢個異性戀婚姻，但係其實佢哋係好唔想有呢個異性戀婚姻。所以佢哋就壓抑咗非常之耐，然後佢哋就進入一個即係重新，或者係再次想出櫃嘅一個過程噉樣。咁即係，或者做返自己。咁所以我諗緊無論係年輕嘅朋友，可能係遇到我拍拖想搵，想出pool，想即係確認自己嘅性傾向嘅⋯⋯呢一邊嘅時候。老年嘅朋友佢哋其實都係想重新意識返，究竟真正嘅自己想做緊點嘢。咁即係，所以由人際關係著手，去到自我嘅發掘，出櫃與否或者自己要走出嚟幾多。我相信真係不分呢個年紀。我想每一個人步入到唔同嘅年紀，都會有一啲少少嘅crisis，都會有一啲自我質疑：「我而家應該做啲乜嘢？」「我身邊人做緊啲乜嘢？」「點解我仲係噉樣？」嘅嘅時候。
我相信即係不論攣直，不論係你係咩性傾向都係需要，一個時候喘息去再重新去搵返自己。呢一刻你係想點樣活出自己嘅嗰個人生。講起自己啦，講起唔同嘅年齡階段，好多時候佢哋都會進入一啲情緒嘅困擾，有一個情緒嘅關卡，佢就會繼而去協助。同一時會係其中一個協助嘅方法，因為近排香港係可能有啲新聞，或者係有啲討論開始講關於精神健康，心理健康，講例如抑鬱症，躁鬱噉樣。精神健康呢個題目就越黎越多人開始關注，或者可能係喺我哋嘅圈子裏面都開始有人覺得，某一個族群嘅人，佢係比較容易有情緒嘅困擾，因為可能佢經常都遇咗一種焦慮，自己性別嘅焦慮。所以佢哋會比較容易去有呢個精神嘅困擾。我想問下喺呢個題目，精神健康呢個範疇裏面，熱線係可以幫到幾多，或者係點樣協助呢一班嘅人去尋求佢嘅協助。
Wing：係，我係Wing。其實熱線社工遇到有一啲情緒困擾，或者係一啲精神健康受影響嘅服務使用者嘅時候，我哋首先最緊要就提供情緒支援。另外呢，因為佢哋有時好多時都會將一啲負面情緒，佢覺得要撳住，要掩飾呀噉樣，但係我哋會教育返佢，其實你都可以好安全噉樣去向別人呈現唔同部分嘅情感嘅，同埋都了解返情緒嗰個作用。另外呢，社工亦都會鼓勵佢哋，有難以消化嘅情緒嘅時候可以搵一啲信任嘅人傾訴啦，同埋教育佢哋明白負面情緒係可以接納而唔可恥嘅。當中喺熱線嘅接觸入面，其實我哋都搵到都同一啲唔少受到小眾壓力影響咗佢精神健康嘅服務使用者嘅。咁我哋熱線發現到有呢啲情況嘅時候，首先我哋最緊要係同佢建立返個關係，鼓勵返佢哋接受主要人士嘅協助啦，包括係醫生呀，或者係輔導員噉樣嘅。或者係透過熱線嘅跟進，我哋增加返佢個病識感同埋求助嘅動機。有時純粹一次性嘅熱線服務，係未必能夠協助到佢哋改善，或者係面對佢哋嘅困擾嘅，長期嘅跟進先可以幫到佢哋嘅。而至於呢其實我哋都有時會接到一啲，已經診斷咗佢係一個，或者係患有一啲精神或者係情緒病患嘅服務使用者。咁其實呢呢班嘅朋友呢，其實佢哋都好需要支援嘅，好需要一啲情緒嘅支援啦，好需要社交呀關心呀或者係鼓勵。打電話嚟其實都有熱線都可以，有呢個作用去支持到佢哋囉。
M：可唔可以再分享少少就係，面對已經可能接受緊治療，或者係已經診斷而家有經歷緊呢個精神狀況，或者係身心狀況嘅嘅來電者呢。即係可能佢喺短時間裏面有一啲狀況出現噉樣，可能佢打電話嚟係好激動，或者係佢好困擾，即係腦裏面係一片混亂噉樣。打電話嚟真係好危急嘅時候，作為即刻收到呢個電話嘅你哋呢，其實你哋會除咗係令到佢哋緩和咗個情緒之外，下一步會其實可以再提供咗啲乜嘢嘅協助呢？
Wing：首先要睇返，其實佢係已經係診斷咗係有病患啦。咁我哋要了解返呢其實佢哋嗰個，佢當時佢嗰個情況穩唔穩定。因為就算診斷咗呢，有時佢都會因為呢，佢生活上面遇到一啲嘅困難啦，或者係遇到一啲壓力啦，而令到佢病情有變化嘅。咁有機會呢樣嘢都係因為，可能係因為社會上面嘅歧視，或者人哋對佢嘅不接納，令到佢嗰個精神狀態更加差嘅話呢，咁我哋可能會鼓勵佢，就係你可能都要同醫生講返，你近啲面對到一啲嘅壓力。呢啲嘅壓力呢都真係可能有需要加藥啦。咁另外就係如果佢係唔想依賴個藥物，但係佢係有覆診，不過佢食藥食得唔準時嘅話，咁可能就係我哋會搵一啲專責，係一啲精神科嘅一啲嘅社工，或者係護士去跟進返佢嘅情況噉樣。所以就你哋背後係會有一啲外援嘅協助，可以更加專業噉樣去去做一個介入，同協助噉樣。
Wing：無錯無錯，因為我哋自己一個單位其實搞唔掂，就真係需要其他嘅服務單位。不過其他嘅服務單位，佢可能對服務性別小眾方面，佢哋嗰個知識比較缺乏一啲嘅時候，咁我哋就畀training佢哋噉樣，即畀訓練佢哋，令到佢哋可以都知道多啲。咁佢哋服務性別小眾嘅時候就可以服務得更加暢順。
M：我相信呢個係要相輔相承，唔係要睇少同一線嘅夥伴，但係同一線佢哋本身有嘅嗰個範圍係有限，咁所以需要外援。就正如我自己條team都需要啲外援去幫忙，即係可以製作到我哋呢啲節目噉樣。咁但係與此同時佢哋有即係外援嘅同事，佢哋有佢嘅專業，而可以介入幫到同一線嘅同事，都需要互相update下。原來我哋嘅來電者佢哋係好小心翼翼去留意，接聽呢個電話嘅人佢哋係識唔識，某啲嘅字眼嘅，或者係會唔會係好有嗰個sense。所謂嘅好有嘅sense，即係知道呢個性別小眾其實係，啲字眼係要中性一啲，或者係佢哋要比多啲嘅空間，俾佢哋去表達自己嘅狀態。因為即係的確有啲係無心之失我會覺得係。可能係同同一線冇關嘅，即係曾經有睇我人聽過或者係睇過啲書，收到一啲輔導嘅電話。其實輔導嗰個人動機係善意嘅，但係當佢講講下嘅時候，佢接聽一個男人聲，即係來電嘅人係男人聲，低沉嘅聲音講講吓佢就話「女朋友近排對你點呀？」，「點解你唔同你女朋友講？」可能嗰個來電者係一個男同性戀者，佢心裏面就一沉，佢就會覺得，唉，咁我同你講都哂氣啦。所以其實係接聽呢個電話嘅同時，需要有一定嘅專業水平同埋知識之外，亦都係有呢個靈敏度，一個敏感度。我相信同一線喺外援嘅協助之下，係需要方方面面嘅協助去，協助呢個來電者去第一時間疏離咗佢最重要嘅問題先，跟住繼續進入輔導呀，或者係其他嘅後來嘅follow up嘅工作。
Wing：呢份敏感度其實唔係只係同一線先要有。我記得我聽其他熱線呢，因為我工作都要聽其他熱線嘅。咁我聽其他熱線嘅時候，有個人打電話嚟講，我拍拖唔開心。咁我話你同你嘅伴侶係點樣嘅情況，嗰個人回應我，點解你會用「伴侶」呢個字眼。咁跟住我唔能夠確定你嘅伴侶係咩性別，咁所以我會用伴侶呢個字眼。佢appreciate我，佢就話其實我係一個男同志嚟嘅。咁唔係打同一線喎嗰陣時。咁所以我覺得呢份敏感度係要有，咁我都叫佢之後叫佢打同一線同我哋再傾。咁佢就再打同一線傾。
M：係呀。Wing呢個少少嘅案例就反映咗，唔一定係話我要，擺明車馬LGBT相關嘅，我先需要有噉樣嘅敏感度。如果你係一個協助輔導，或者係做一啲療癒，或者係協助身心靈，或者總之係協助人哋抒發情緒解開心結嘅朋友們，即係呢一個靈敏度係必須嘅。如果唔係其實可能講一句說或者講一啲嘅字眼，當你以為係一個好正常不過嘅時候，會有機會減退咗尋求協助嘅嗰個人佢嗰個意欲啦。咁ok，撇開咗我哋一個比較即係講緊呢個nature，講緊呢個來電者或者係輔導嘅敏感度之外呢，我都想帶返返嚟呢個2023年。頭先我講到講關於個精神健康嘅問題，咁點解會講起精神健康就係因為，寫呢條問題嘅前後幾個月呢，就發生咗呢個荷里活廣場就斬人啦，咁傷人嘅案例啦。咁當中即係因為涉及個傷者或者係而家個個過咗身嘅人，佢哋嘅打扮，以及係佢哋當時喺即係喺CCTV嘅嗰個模式呢，有好多網民嘅討論。有人話佢哋其實係朋友，或者佢哋係女同志嘅情侶，即係我呢度我就唔特別去clarify噉樣佢哋係點樣嘅關係，但係噉樣嘅討論呢衍生咗就係，咦！會唔會係即係有啲有精神狀況嘅人，見到同志或者見到同性嘅互動嘅時候，會有一啲激動嘅行為。唔知道呢個係湊巧，咁啱得咁橋，定係佢係有目的去攻擊呢個唔清楚。但係會唔會因為呢個狀況同一線收到一啲多咗嘅，求助嘅電話呢會唔會係表示擔憂，或者係表示恐懼噉樣？
Meko：咁我係Meko講吓啦，咁其實我哋即係唔單單只係呢件事嘅，可能係一啲重大嘅社會事件之後呢，其實都多咗少少嘅來電者去打電話畀我哋去傾嘅。咁其實可能喺呢個事件之後呢，都有一啲可能因為嗰件事令到佢好不安啦，即係未必係性別小眾嘅，可能係即係普遍呀呢件事可能你報得出新聞或者係都影響得廣大市民呢，其實可能都會令到有不安嘅感覺呀，或者係一啲擔心啦憂慮呀，或者一啲驚恐嘅情緒。可能會有機會會多咗啦。咁咪打嚟同我哋傾啦。咁但係有一啲呢其實係本身有精神或者情緒困擾嘅即係來電者呢，可能喺呢個事件呢都會畀呢啲新聞呀，或者呢啲報道呀，或者係呢啲嘅輿論呢令到佢哋更加覺得好個不安會加倍呀，或者驚恐程度加倍咁，呢個時間更加脆弱。其實咁可能要更加多嘅情緒支援，咁佢哋識得打嚟呢都係一件好事嚟嘅，咁我哋就畀多啲時間陪佢啦，畀佢多啲去講佢自己內心嘅情緒呀感受呀。咁有啲時候呢，我哋都會如果需要嘅話我哋都會畀一啲嘅意見佢哋係咁。
M：我相信呢一個⋯⋯即係而家係講緊同一線呀，咁可能同一線以外，好多人睇完嗰個新聞嘅時候因為當時都唔少人，即係唔少網媒或者唔少嘅嗰啲網上嘅平台都有分享到個CCTV嘅畫面呀。我諗相信係當時都好多人即使係完全唔係在場，或者係淨係見到個畫面，佢都會覺得好驚恐呀。一個實在係又血腥又暴力嘅情況之下，究竟可以點樣排除自己嗰個擔憂同埋恐懼呀？我相信藉著而家開始，啲人更加正面面對呢個精神健康嘅時候，輔導嘅熱線或者輔導嘅平台係有即係更加多嘅機會會接觸到唔同程度吖，即係可能佢唔係佢唔一定係長期受到呢個精神困擾。可能短期嘅，但係就係唔同程度需要協助，需要輔導，需要排開自己嘅嗰個情緒嘅一個渠道噉樣。除咗打電話嚟即係分享自己嘅心結呀，講解自己嘅困擾之外，呢個聽上去好正路。即係同我打電話去CS，我要尋求我嘅目的，我要得到我嘅協助。噉樣嘅一個性質之外，報告裏面都有提及過，有一啲人就唔係主要嘅服務對象嚟，係啦。咁可唔可以分享一下，除咗我哋頭先上面講咗咁耐，講關於尋求協助、輔導、精神健康，有一啲可以主要嘅輔導對象係點樣嘅呢？
Wing：咁可能同一線，我哋就主打都係話係服務性別小眾。咁有啲人其實會誤會咗我哋條熱線嗰個功能。即係佢會以為你會唔會係講有關性，或者係啲色情嘅嘢。咁所以佢哋會打電話嚟，有時會高談闊論一啲同性有關嘅話題。咁其實當中有時都涉及有啲性騷擾嘅情況。另外呢，就係亦都有啲人會打電話嚟，係講咩呢？就係分享，佢哋會分享嘅。都會分享啲咩？分享啲歧視，就話「你同志呀，跨性別嗰啲呀，唔抵幫嘅，你哋唔應該幫佢，你哋幫佢就係你哋唔啱。有啲更加需要幫呀，有啲窮人你又唔幫，就幫埋呢啲人」會噉樣去話我哋。不過呢我就⋯⋯講真呢，其實隨住而家越嚟越多人，其實對性別小眾係多咗明白同埋接納呢。呢啲聲音其實係站唔住腳嘅，咁都少咗嘅。不過都有。
M：ok，你講起第一種人呢，我真係要回想返嗰陣時，因為自己之前呢，喺香港都有做過一啲同性相關嘅行業。我以前買sex toy嘅，咁即係講得sex toy，我諗相信嗰個性質就會以個性別小眾服務嘅熱線，係更接近頭先你所講嘅嗰一啲人㗎啦。咁我哋曾經係有接聽過呢，唔知嗰啲人係咪真係覺得純粹係睇到性字呢，就好似見到好似AI見到關鍵字噉樣，就覺得一定係同呢個性愛呀，嗰個性行為有關嘅。咁佢就打電話嚟，同我講話「我同我個伴侶呢就性行為呢有啲咩障礙呢，有冇啲乜嘢嘅架餐可以幫到我」。即係跟住就會發現，當我好認真同佢講緊嘢嘅時候呢，就會出現一啲你唔應該喺對話裏面聽到嘅聲音呀，「嘻嘻嚇嚇」呀，跟住有一啲急速嘅聲音呀噉樣。咁即係我相信係雖然係少量啦，但係呢一種有意無意嘅噉樣嘅令我哋感覺有被騷擾嘅情況呢，我相信Wing或者係同一線都感受得到。我以前嘅工作經驗都經歷得到，即係要再次重申一樣嘢，就係服務呢個性別小眾同性相關嘅，即係唔行嘅純粹係hold住個性呢個字作為一個唯一嘅關鍵字。我哋係服務緊性別小眾啦，我以前係賣sex，嗰啲係賣性玩具啦，但係唔係全部嘢炒埋一碟就係講呢個性行為噉樣。呢一樣嘢我覺得我自己會覺得呢個其實係一個需要正視嘅問題。即使佢係一個好細嘅case噉樣。咁其實本身我都有好奇諗緊就係：你講緊第工類打電話嚟，直接話你哋都唔抵幫呀，嗰啲LGBT呀，搞gay呀，女同志男同志呀，跟住可能會講好多好好歧視性好攻擊性嘅言論噉樣。我都本係，即係想訪問你哋，之前我都諗緊就係：無理由咁好嘅⋯⋯冇可能同一線從來冇收過噉樣嘅電話。我見到外面嘅人已經開始整體band，就話呢個係咩糖衣毒藥呀，影響國家安全呀，即係佢哋又講得好嚴重㗎嘛佢哋。佢哋嘅立場係咁咁。當佢哋咁諗嘅時候，總係會有一群反對嘅聲音，係覺得社福嘅資源或者係社會資源係唔需要放喺呢一群小眾上面噉樣。當然佢哋嘅立場我哋冇辦法完全係100%說服，但係我相信同一線嘅團隊們佢哋係會有佢哋嘅方法，將呢個互動，將呢個佢哋嘅意見收好咗之後就，轉為佢哋更加繼續要服務呢個嘅對象。因為呢樣嘢就掉返轉頭喺我哋嘅角度嚟講就係⋯⋯正正就係因為有呢群咁攻擊性，咁唔善良嘅描述，所以需要更加強大嘅支持或者係後盾去支持性別小眾。喺呢個社會裏面嘅生活囉。係囉，如果冇人攻擊呢一班性別小眾嘅時候，性別小眾就冇咁多嘅途徑會受到呢個壓迫同埋壓力。冇咁容易有呢個壓迫壓力，就唔會咁常，即係覺得有一個精神同身心困擾啦，係咪先？因為呢個係一個好正常嘅邏輯嚟。講起呢個困難同埋遇到啲唔係你主要嘅服務對象，咁頭先我都話，同一線冇可能係咁順攤嘅。冇可能次次打電話嚟都係「我同你講完之後好開心呀！」跟住可以解決咗個case啦噉樣。同一線作為喺香港運作呢條即係24小時嘅熱線呢，其實你哋除咗⋯即撇除呢個唔係正式服務對象嘅來電者之外，你哋有冇遇到其他幾乜嘢嘅困難呢？
Meko：其實頭先阿Wing都有講呢⋯⋯頭先有個例子話要傾到第四十零分鐘呢先，即係躺開心扉去講。咁其實我哋有時接觸到有啲嘅來電者呢，佢個個情況都比較困難呀，比較複雜，都需要長啲嘅時間呢去傾呀，去處理去陪伴噉樣啦。加上我哋同一線嘅來電嘅數目呢不斷增加，咁其實有時即係偶爾都會聽到呢有啲即係打入嚟嘅朋友講呢，好難打得通我哋嘅熱線啦。咁頭先阿Wing都有講呢其實打唔通咪留言囉噉樣。但係呢，有即係都有大部分嘅服務對象呢，其實佢都擔心呢個私隱呀，外洩呀，各樣嘢啦，都唔會選擇留言嘅。咁所以呢個可能係我哋嘅其中一個嘅困難囉。咁應對住呢個留言呢，其實我哋都諗到一啲方法去處理嘅。咁我哋都錄取一段呢好親切嘅錄音啦，希望呢暫時未能接通嘅一啲服務對象呢，可以安心留言畀我哋啦。俾我哋可以呢盡快去回覆佢啦，陪伴佢哋啦，跟進佢哋嘅。
M：即係好似一個voice message噉樣就聽到噉樣，ok，就唔會好似冷冰冰噉樣。你已接駁到⋯跟住就係你哋嗰個電話number噉樣。我覺得嗰個感覺會好⋯⋯我都覺得好冷冰冰嘅。即係好似你打唔通去預訂餐廳嘅嗰種，被拒諸門外嘅嗰個感覺。我相信呢個同一線想做多少少去幫助，令到嗰個來電者嘅感覺會好受少少嘅呢個小小嘅改變，即係縱使而家資源上面係冇咁多人手，或者冇另外一條線，就係得一條線，都可以盡量令到來電者嘅人，喺面對自己嘅困難嘅時候，都會有好受少少嘅一個體驗，舒服啲嘅體驗噉樣。OK，講到呢度喇，即係目前去到呢一度，大家至少都會知道我哋今次呢一個報告，佢嘅成果就係比我哋想像中其實係有啲唔同。當我哋以為可能係啲中年嘅人，平時打開電話嘅人先會打電話嚟嘅，原來唔係喎，原來係有啲年輕嘅人都會打電話嚟，而且一打可能會打傾好耐嘅喎噉樣。當我哋可能以為啲人開始社恐，佢哋唔鍾意傾電話嘅時候，其實係電話係發揮到佢嘅功能，去協助到真係好想講自己內心聲音嘅人，可以好即時地俾到一個互動，同埋即係回饋，可以知道對方聽緊你講嘢。我覺得最重要而家喺使用咁多嘅社交平台上面，好缺乏一樣嘢就係嗰個真正即刻嘅回饋。唔係嗰啲chatbot，或者機器人可以即刻覆到你，可以做到一樣嘢，因為你嗰個聆聽嗰個感覺係需要存在。即使可能係長期online，或者即讀即回都好，你見到個藍剔都好。或者睇到個seen字呢個都好，你都係唔會夠，你聽有時就「唔！唔！唔！聽緊！」畀反應你嘅嗰個互動嚟得真實同埋嚟得親切。我相信一路以嚟呢個同一線接咗，我唔知道countless好多個電話之後，佢發揮咗佢協助唔同年齡，由十幾歲到六十幾歲嘅性別小眾，佢哋都係唔同階段嘅同志，佢哋嘅同行者。咁過咗呢一個報告啦，ok。我哋目前去到呢個階段，2023年有一個小總結。咁未來同一線佢會唔會有啲咩計劃，或者係活動去發展，去拓展去協助更加多嘅性別小眾呢？
Wing：同一線未來係會更加著重發展面談嘅輔導服務嘅，因為畢竟呢喺電話上面嘅支援呢係有限嘅，同面對面嘅輔導係好唔同。個內容嗰個深度呀，輔導員可以觀察嘅部分同埋介入嘅層次呢，都係有差別嘅。咁呀，希望同一線之後可以繼續同更多有需要嘅社群朋友同行啦。另外呢，其實我哋喺上年年尾呢。就已經開展咗一個叫做「編織彩虹」嘅計劃嘅。咁希望宣揚返職場友善文化嘅。咁我哋推出各樣嘅工作嘅目的，都係希望可以點點滴滴咁改變到社會嘅氣氛，同社群嘅朋友呢一齊建立返一個更加友善嘅職場環境噉樣嘅。另外，就係面對住好多新入行嘅社工啦，咁佢經驗呀或者係知識上面呢都係需要加強嘅。咁其實我哋自己呢都要不斷嘅為自己同事提供培訓，就務求用更加好嘅質素去服務返個社群。
M：我有兩個追問呀。第一個追問呢就係你講呢個「編織彩虹」呢，目前你哋嘅計劃係諗住點樣促進呢一個職場對性別或者性別小眾友善呢一件事嘅？
Wing：我係阿Wing呀。噉樣「編織彩虹」嗰個計劃呢，咁其實就會分開幾部分嘅。其中一個部分呢就係，我哋會去一啲，首先我哋會去搵我哋自己東華嘅單位啦，服務單位啦。咁去，等我哋同事認識多啲性別小眾嘅文化啦。咁另外呢其實另外一部分就係我哋會去返出面一啲嘅商業嘅，一啲嘅機構呀，去講返巡迴會咁去講一啲talk。咁希望佢哋就係可以build up返一個，即係可以建立一個職場嘅彩虹友善嘅文化噉樣囉。咁我哋都鼓勵佢哋可以有一啲嘅政策係，專係俾職場性別小眾友善嘅職場政策噉樣。都鼓勵佢哋做呢樣嘢。咁希望逐個層面咁做。最初可能係講下talk先，即係講下一啲嘅講座呀。咁之後就會深入啲啦。會唔會考慮下做一啲嘅政策呀？咁我哋又可以做一個諮詢嘅一個對象呀。
M：好咁呀，作為一個都有，即係PrideLab有陣時會接派啲噉樣嘅training啦。咁我又再追問下，即係呢個編織彩虹，即係一開始會從東華三院唔同嘅機構著手先啦。咁跟住就擴展到去其他嘅職場噉樣啦。你哋即係目前嚟講你哋係會可能預計啦，你會去outreach到或者外展到啲乜嘢行業嘅職場呀？
Wing：咁我哋暫時就係接觸到嘅都係一啲，例如銀行啦，保險公司啦。呢個係我哋近，即係我哋係之前接觸得比較多嘅一啲商業嘅機構。咁其實我覺得任何個公司有興趣嘅，咁我哋都係可以去講啦。同埋都唔係佢哋舉手話叫我哋去講，我哋自己話搵㗎。我哋會諗住我哋嘅目標係諗住都係做幾十場可以做到。
M：希望喺銀行同保險公司嘅平台，或者係佢哋即係一啲嘅分享裏面可以見到同一線，喺裏面分享嘅足跡噉樣啦。除咗呢個編織彩虹計劃之外⋯⋯比較大鑊啦⋯⋯我唔記得咗最後你哋有一個部分，除咗編織彩虹之外呢，頭先你都有講對於新嘅社工，你希望有進修或者係令到佢哋提升呢一個輔導性別小眾嘅知識以及嗰個靈敏度。因為我自己之前喺香港都遇到一啲好年輕嘅輔導，可能佢係之前係有背景做過，又係做輔導啦，做社工啦，讀社工啦。或者可能而家聽等呢個節目嘅人佢哋會諗：咦！我點樣可以幫手做呢個輔導嘅角色呢？我有啲乜嘢係可以賦予我有呢個方向或者係令到我嘗試步入呢個途徑嘅呢？你會唔會有啲乜嘢貼士或者有啲乜嘢嘅頭緒可以畀到佢哋呢？
Wing：首先就真係要，最緊要係有個謙卑嘅心。真係唔好覺得自己乜都識，或者覺得有啲嘢我唔使識啦。有啲嘢其實係要識啦，要識先做到囉。所以最基本要知道文化啦，要知道性別小眾嘅文化先啦。要知道有啲乜嘢講得，有啲乜嘢唔講得，有啲乜嘢你無心之失其實會傷害到別人。有咗呢啲就已經好好多。咁你話我哋自己熱線就更加多要培訓啦，因為佢可能問嘅題目係更加專。可能問你：我有呢啲事情我可以去點做？咁如果我哋唔識答噉樣坐咗喺度噉樣就唔掂啦⋯⋯
M：答佢我唔知喎！
Wing：係呀，唔可以唔知呀。講真未必真係樣樣都知嘅，可能唔知有啲就真係要search。要佢畀多啲時間我哋。佢都明白我哋嗰啲限制，佢都會話好啦，等你啦，等你覆我啦，留下個電話我哋又搵資料。謙卑好緊要。
M：我相信謙卑係的確係重要嘅。即係作為一個Podcast嘅主理人，我都冇可能可以，即係寫包單就話「我都係乜嘢都識嘅」。唔同圈子嘅術語同文化我都識嘅，即係呢個絕對冇可能。我自己作為一個即係順性別女性，我係唔會有呢個信心係話我識曬啲gay嘅文化，我識曬member文化。呢個係聽上嚟都唔會係有說服力嘅。但係，一個謙卑嘅心係可以令到人多啲耐性，同埋多啲知道你係想學。至少你係嗰個溝通嘅渠道，係一路一路繼續落去。每個人都有佢哋自己即係目前識同唔識嘅部分。如果真係講漏口或者係講慣手勢，令到對方係發現自己講錯咗啲咩，其實都可能真係無意識地講咗一啲字眼，令到對方唔開心。幾多對方難受，我覺得呢個一定唔會係性別小眾獨有嘅特徵。
可能對於唔同種族唔同背景嘅人，佢都會有一啲禁忌，或者有一啲唔會想聽到嘅描述或者說話。喺嗰個時候唔係淨係同一線，即係可能聽緊節目嘅你。如果你係想做到協助性小眾，或者係幫你身邊性小眾嘅朋友們嘅時候，其實一個懂得意識到自己，呢一刻我講錯咗，或者我呢一刻想改正，你就同佢講道歉，講聲唔好意思，然後唔好再重複咗發生經歷咗令到人哋唔開心嘅噉樣嘅行為，噉樣嘅言語。我覺得呢個就先係可以令到大家嘅嗰個互動，支持同信任繼續延展落去嘅一個契機。其實冇可能每個人都一定講最好聽嘅說話，有啲可能真係連我自己都需要諗清楚，原來我咁嘅說話係令到啲人可能唔會想繼續同我分享太多，定係會令到我哋覺得其實佢唔係真係好熟。咁算我唔講咁多。每一刻其實我哋都係一個學習嘅過程。亦都非常感謝我哋呢度，撥出左佢哋少少OT時間嘅Meko同埋Wing，去分享今次2023年呢一個報告嘅recap嘅內容。喺最後喇，節目最後想問下你哋，有冇啲乜嘢係想宣傳或者畀聽眾知道嘅呢？
Wing：有啲咩打上嚟呀，有啲咩打上嚟呀。同埋有時我哋如果真係難打入你留言呀，我哋真係會回覆你。同埋我哋保密㗎嘛，唔使擔心嘅。同埋我哋你咁打嚟呢，打完嚟之後啦，你留咗言啦，我哋打去啦，我哋係會識講。我哋唔會話我哋同一線，我哋話我哋都東華三院嘅。咁可能我哋驚可能會你會唔會驚屋企其他人接你電話噉樣。咁最少都我哋都會攞我哋，我哋會有呢一個敏感度啦，會保護你囉。咁所以真係有時個電話比較繁忙嘅時候，就留言啦，我哋會回覆你嘅。亦都希望唔想錯過咗一啲有需要幫助嘅朋友。
M：好啊。多謝Wing，多謝Meko去做呢個分享。同埋聽到啦，打電話上嚟啦，打唔到呢，都留個言啦，聽下佢哋個voice message，然後留個言啦，佢哋會回覆嘅噉樣。喺每一集嘅最後呢，我哋都會有一個少少收結嘅段落啦。咁係啦。咁如果你哋有對於同一線嘅工作，或者係佢哋嘅研究有想更加了解嘅話，你都可以留言畀我哋instagram，或者係你直接DM同一線應該都可以嘅。咁我哋嘅收結呢就係，《點知港同志》係一個以香港同志角度出發嘅podcast，希望可以將大家生活裏面嘅同志同埋性別嘅議題，用廣東話嘅聲音同文字嘅方式保留同流傳嘅。咁目前呢我哋嘅podcast專頁PrideLab.hk/podcast就已經上線啦。咁可以上去聽下每一集嘅內容啦，或者可以上我哋instagram @pridelabhk。咁bio裏面呢都會有我哋嗰個專屬link，或者係其他嘅活動動態噉樣嘅。咁多謝你收聽呢個節目啦，而且聽到嚟最後。咁如果你想聽更加多呢個嘅節目啦，除咗訂閱我哋之外呢，歡迎你可以喺你收聽嘅平台上面畀星星嘅回饋同埋留言嘅。我又要重新講一次呢就我發現我嘅聽眾係好唔鍾意留言同埋好鍾意匿名嘅，我唔知點解。係啦，咁係呢，你嘅留言，如果你留言畀我呢可以學呢個同一線講，你要留言畀我呢，你留言畀我呢就有機會上到我哋嘅節目嘅。就係噉樣啦。咁今集呢講到呢度，再一次感謝同一線嘅代表接受我哋嘅訪問啦。期待下次同你點止港同志。咁兩位同聽眾講拜拜啦。
Wing：拜拜
Meko：拜拜。