PrideLab 首個 Podcast 節目《點止港同志》登場！
我哋會用香港同志嘅角度出發，用廣東話喺半個鐘頭之內帶你多啲認識性/別，認識 LGBTQ 族群。諗多一個角度，你會發現睇到、聽到嘅嘢，背後其實都有好多性/別嘅元素。
第1集主題【同志情報局】會同大家講返幾單7月喺世界各地發生嘅同志新聞。
章節
| 開始時間 | 標題 |
|---|---|
| 00:00 | 《點止講同志》登場！1分鐘介紹下個節目先 |
| 01:02:00 | 第1集主題【同志情報局】講幾單7月同志新聞 |
| 01:09:00 | 本地新聞 – 何君堯殺出成為新一代恐同Icon |
| 05:23:00 | 兩岸新聞 – 中國眾多大學LGBT社團微信公眾號遭清理 |
| 09:39:00 | 國際新聞 – 西班牙男同志被人當街拳打腳踢，傷重死亡 |
| 13:15:00 | 國際新聞 – 歐盟委員會對匈牙利及波蘭實施侵權訴訟程序 |
【同志情報局】何君堯殺出成為新一代恐同Icon | 大陸同志社團社交網被冚 | 西班牙有同志被人當街打死
歡迎你收聽《點止港同志》
我地呢個節目用香港同志嘅角度出發，用廣東話喺半個鐘頭之內帶你多啲認識性別，認識LGBTQ族群。無論你係直人定同志，都歡迎你同我地傾下時下議題，一齊發掘更多性/別中嘅甜酸苦辣。
我係主持馬天娜，你會從呢個節目聽到性別研究篇章嘅閱讀分享。我地都會 Recap 近至香港、兩岸四地、以及海外國際嘅性/別新聞同話題。有機會嘅話，我哋都會邀請唔同LGBT+ 嘅朋友仔黎做訪問。
搞咁多嘢，都係先畀你知性/別唔一定上堂先讀到返黎。諗多一個角度，你會發現其實你睇到、聽到嘅嘢，近至一句說話，遠至一個現象，背後其實都有好多性別嘅元素。
咁今集第一集主題會同大家講吓，幾單發生喺唔同地方嘅【同志新聞】：
新聞Recap：
何君堯繼六月攻擊完同樂運動會 Gay Games 係有失體面、賺污糟錢之後，七月再發功攻擊 ViuTV 劇集《大叔的愛》，將套劇比喻做「糖衣大麻」 。
佢又話因為中國要推動三孩政策，但係劇集係推動無小朋友嘅家庭嘅訊息，違反中國國安法喎。
回應：
其實過往佢已經好常強烈地煽動仇恨言論，強烈到連特首都澄清 Gay Games 舉辦目的係提倡包容及多元，而平機會主席講到明個 Event 值得支持，不應被污名化、標籤化。但係何生就一而在再而三，強調佢自己認為嘅價值，例如「異性相吸係基本定律」，「家庭要以生育為前提」。
策略上來講係好事嘅，能見度多咗，討論到又多咗 .. 睇到勁多留言同 Share。有人出 Post 笑佢 On9，笑佢瘋言瘋語，但係如果繼續同佢糾纏定義同埋觀點嘅話，小心討論會變成泥漿摔角，被牽著鼻子走。
以前仲係好多人會講死基佬、豆腐婆嘅年代，香港同其他世界各地關注性別同同志嘅朋友開會好仔細去研究啲嘢，然後整咗一大篇文章，或者策劃成個活動，同人地展開辯論。但依家大家都好忙，一部手機有好幾個社交平台，幾時留意到啲資訊，更新速度都太快，有好多人連睇單新聞都開始習慣睇標題，而唔係禁入去條 Link 度爬文。變左啲回應變到好似碎片咁。
即係點呀，即係除非你跟足曬成件事，否則你好容易因為 Update 得唔夠快而錯失資訊，結果係點呢？就會有人需要懶人包，好似幫你組織返件事來龍去脈。只不過，係咪每一個懶人包都咁均真，帶你去睇事件嘅發展呢？
其實一個回應，一個 Post，都可能會 Spin 到你去留意唔同嘅方向，就好似呀何先生嘅發言咁，特登講到咁難聽，一邊吸引到佢嘅支持者，同時又引你鬧返佢。而係鬧返佢同無視佢之間，其他人就會趁機出嚟講佢想講嘅嘢，例如記者問《大叔的愛》同何君堯嘅時候，林鄭就扯到去 Hard sell 港台國劇，呢啲其實係公關常用嘅回應方法。透過一個回應，順勢提出自己嘅立場，同啲讀者或者觀眾講更多你想佢哋知嘅嘢。 遇到同自己意見有矛盾嘅言論，除左帶動情緒笑對方之外，不如想像下埋你會點回應，你會唔會帶出啲咩嘢去反駁呀？
- 兩岸
- 中國清華、北大等眾多大學 LGBT 社團微信公眾號遭集體清理
新聞 Recap：
中國清華、北大等眾多大學 LGBT 社團微信公眾號遭集體清理。被清理嘅公眾號就淨返得個 Icon，連嘅 Account 名都顯示為「未命名公眾號」；個頁面就現示「接相關投訴，違反《互聯網用戶公眾帳號信息服務管理規定》已被屏蔽所有內容，帳號已被全部停止使用」。
回應：
連經營左20幾年嘅蘋果日報會可以喺一星期內被人冚，清曬 YouTube、Facebook、Instagram。老實講，反正依家同性戀都可以被人 Spin 到有違反中國家庭價值啦，喺香港支援性小眾嘅組織被冚絕對係可以想像嘅事。
除左經營網上的 Social media，組織同參加者之間，以及組織之間都需要開始諗線下可以點聯絡。之前做研究嘅時候搵到一本90年出版嘅書，先發現原來喺1996年，有三位住在香港的華人，因為想發展有別於西方社會的同志運動，在當時連寬頻都應該無嘅年代，就計畫舉辦一個學術交流的平台。
1996年12月，佢地喺香港舉辦左第一屆歷時三日，有接近100人嘅華人同志交流大會， 會議中就住多個同志議題，瘋狂密集式討論同分享。
而主辦單位後來發現因為想增加凝聚力，所以將1998年舉辦的第二屆轉為宿營，使參與者開會之餘，亦可在營地交朋結友，有更深入的交談。睇返呢個叫《華人同志新讀本》嘅書，裡面紀錄左嘅會議男性同女性的成員比例，以及係咪需要定立一個 Les 同一個 Gay嘅主席黎平衡性別比例，係可以睇得出佢地真係好認真去紀錄，而時至2010年代，我地都可以睇得返佢地做過啲乜。
相比之下，依家我地出一個 Story，限時24小時，睇到就睇到，睇唔到就睇唔到。另外關注性別嘅 Account 越開越多，又 LGBT 交友，又有專講性別同性教育嘅 Account。當唔同 Account DM其他 Account 互相串連支持，或者忙著整圖嘅時候，其實大家真正深入探討一個議題的動機同時間會唔會減少左呢？
而且萬一我地無左 Facebook 旗下嘅 Instgram 或者 WhatsApp，無左包埋 YouTube 嘅Google 嘅時候，我地可以保持宣傳呢？又點樣 Keep 住唔同年齡層嘅人聯絡呢？即使時代改變，科技發展飛咁快，我地都需要有 Backup 嘅準備。原因好明顯，就係因為你唔可能預早幾個月知道要 Down 返啲片，Screen cap 返啲對話。雲端係無邊無際，無窮無盡，但係將資料實體化，放落不同地方，用返啲 Old school 方法，都未嘗唔係一條後路。
- 接落嚟會分享兩單歐州嘅同志新聞
- 西班牙拉科魯尼亞男同志被兩個途人當街拳打腳踢，最後送院傷重死亡
新聞Recap：
當事人係24歲嘅護士助理 Samuel Luiz。當晚佢走出個 Club 開 Cam 打 Video call，結果有兩個途人以為當事人要偷影佢地，即使佢有解釋到自己係 Video call緊，仍然被途人語帶羞辱同性戀嘅字眼拳打腳踢，隨後雖然佢仲有啲能力行到路，但最後都係不醒人事，送院不治。
順便分享下西班牙LGBT+背景資料：
- 2005年7月2日，西班牙議會通過左同性婚姻合法化
- 2006年合法化埋同性伴侶共同領養及繼子女領養的權利
- 2021年6月29日批准了一項草案，允許14歲以上民眾可在沒有醫療診斷或激素治療（hormone therapy）的情況下，合法改變性別。
就咁睇政策，西班牙係對同志友善嘅～
回應：
- 不過，2020年歐盟促進基本人權署嘅研究就發現喺西班牙仍然有41%嘅受訪者喺一年內因為自己嘅 LGBT 身分遭受騷擾，而整個歐盟拉勻黎睇都有38%。
近排就聽到一個 Case，發生喺2020年嘅香港。受害者係外國人，同朋友食完飯送人上車，就喺街頭被兩個人又係先辱罵再郁手。打人嘅時候都係一邊鬧受害者係 Gay一邊打佢。
事後事主都好大陰影，但係又唔敢報警，因為2020年大家都帶住口罩，加上事發事件係夜晚，其實好難認到人樣。最後受害者選擇左黯然離開香港。
所以證明，法律倡議，修例只係同志平權嘅其中一個方向，但係唔係因為有法例保障，就唔會有Hate crime。
- 歐盟委員會對匈牙利及波蘭實施侵權訴訟程序
事源匈牙利喺今年6月23日通過法例，禁止對未成年教科書同電視節目提及任何同「出生性別的自我身分多元、跨性別同埋同性戀嘅內容。而喺今年年頭，匈牙利消費者保護署就要求出版商需要喺有描述同志內容嘅兒童書籍度附上備註，標明內容涉及同傳統性別角色有唔同嘅行為。
而其實喺舊年2020年，由匈牙利總理奧班帶領嘅班底實施禁止跨性別者變更法定性別，禁止同性伴侶領養孩子。
而波蘭政府發生咩事呢？其實由2019年開始，波蘭有百幾嘅行政區設定所謂「無 LGBT 意識形態區」，波蘭嘅執政同第一大黨，呢個 法律與公正黨，就認為非二元性別都係外來嘅意識形態。呢種程度已經超越煽動仇恨言論，住喺呢個「無 LGBT 區」呢性小眾，老實講真係無人權咁濟，唔知自己幾時會被人打、被人驅趕。
而7月歐盟就決定畀兩個月時間強調各個成員國都係「多元、無歧視、包容、公正、團結及男女平等的社會」嘅歐盟委員會喺聲明表示匈牙利的政策已經違反歐洲聯盟運作條約，而波蘭都違反歐洲聯盟條約。依家兩個成員國有兩個月時間回應，否則為會員將會將佢地提交去歐洲聯盟法院。
今集就同你總結左7月嘅同志新聞，亦都多謝你聽到最後。我地嘅節目會24節氣嘅時間黎上載，期待下一次同你點止港同志。