Ep.39【又關性別事】老年同志 (Feat. 曾家健)

唔知道大家喺香港有無覺得多咗好多白頭髮嘅人？
喺你嘅同志圈子當中，有無諗過老咗之後會點？

放心今集唔係sell你買人壽，而係同你分享人有生老病死
老咗會遇到咩問題？成日話如果有同志老人院好似好fun，又係咪真係有呢回事?

Ref:

【又關性別事】老年同志 (Feat. 曾家健)

M：馬天娜

曾：曾家健

M：歡迎返嚟《點止港同志》，我係主持馬天娜。今集又係一集同網友見面嘅一集。因為呢一位嘅嘉賓其實我都係同佢傾咗偈唔夠一個月，噉就邀請佢嚟做呢個訪談到而家都唔夠一個月。噉睇咗呢條題目啦，我哋正式就會開展一啲題目係同生老病死有關嘅，同埋同身心嘅照顧有關嘅。我唔能夠講係特輯啦，但係我會將佢特登放喺一連串嘅節目裏面嘅。噉今集呢，我哋係講老年嘅主題啦。每一個人其實都會老嘅，從外面嘅廣告話呢個抗衰老到之後真係，真係不得不認老啦，開始出現病痛，然後繼而入醫院，跟住可能會講到照顧者。其實種種嘅一啲題目呢我相信大家都只能夠肯定就係呢件事係一定會發生喺每一個人身上，不分性傾向，不分性別認同嘅。噉所以我今日就真係邀請咗一位handle過一啲關於長期照顧呀，老年呀嘅一啲題目嘅朋友啦。噉介紹下我哋嘅嘉賓先，你可以自我介紹啦。

曾：Hello，大家好，我叫Richard。噉某啲人講得好好嘅就係，即係識咗你唔知，好似冇一個月添，真係傾計第一次啦。噉就先老土地講句係，老呀嘛，噉要老土啲就係多謝你嘅邀請。我都冇諗過可以有機會喺呢個空間同大家分享自己嘅工作。噉就我介紹自己，我用一分鐘時間，噉我嘅full time job就係一個社工，噉我而家服務嘅對象係一啲單身嘅男士，單身嘅男士意思呢就係18歲以上，噉冇上限㗎喇，80歲都會服務到，噉主要服務一類嘅單身嘅男士。噉通常因為各種嘅原因佢哋係有居住嘅困難或者問題，噉各樣可能係精神病康復者，可能係因為家庭嘅問題。家庭問題有好多好複雜，即係包括俾伴侶家暴，相處唔到落去，俾人趕出街各樣啦吓。更新人士，或者係濫藥嘅朋友。所以好多嘅。另外我亦都有我自己嘅Freelance Job，我都有做一啲一對一嘅Coaching，或者輔導，亦都有定期有啲工作坊以家庭治療嘅加入手法去做一啲一對一嘅服務。嗰方面個範疇就會大啲，唔淨只男士，女士，各個階層，年齡層嘅朋友都會有機會接觸到。噉我之前喺老人嘅服務界別入面就啱啱好呢就做咗十年啦。噉呀都幾多嘢嘅，都幾多體驗、經歷，人生好多甜酸苦辣都喺啲Client、喺啲公公婆婆身上體驗得到或者接觸得到。噉所以今日希望可以同大家分享多少少一啲有血有肉同埋亦都係我哋每個人都要面對嘅問題，或者一啲我哋逃避唔到嘅嘢。

M：係呀，真係冇辦法逃避。即係你而家可以話我而家整個樣，令到我自己望落去後生啲，但係你個機能係好難逆轉。我有見過一啲比較極端嘅，即係有啲首富好有錢，噉佢就每一日就嚴格遵從佢嘅所謂嘅抗衰老嘅Routine噉樣，即係佢抗衰老嘅一個全日嘅時間表，跟住就可以令到自己身體嘅年齡變得好後生噉樣。縱使佢可能五六十歲噉樣，但係即係去返我哋犯凡人嘅層，我哋每一個人都會變老。噉好啦！我自報家門先，本人現在就三十歲嘅。噉係所謂嘅如果以人有一百歲嚟講，我已經去咗三分之一，真係粗略啲計。噉好啦，我係唔知道嘉賓幾多歲，嘉賓要唔要講就隨便。噉但係我又想問一樣嘢，就係既然你有講到話呢一個，即係你都有接觸咗好多嘅老年嘅人士，佢哋嘅需求亦都處理過佢哋嘅個案，一個人變老其實係會面對啲乜嘢嘅問題呢？

曾：好，非常好。其實呢，如果你真係去讀老年學呢，即係係會有三年時間比你去慢慢回答你頭先個問題。噉當年我今晚係冇三年時間，噉我好概括噉樣由四方面講。一個人變老噉就四個方面，第一就係一個physical，身體個方面。變老簡單啲講就係多病痛，或者病咗好難好，又或者知唔知點解係好完之後唔夠冇耐又再病過。噉去睇醫生嘅次數越來越多，屋企其中一樣一定會多咗嘅就係藥，紙張多咗，嗰啲通常都係醫生紙或者覆診紙。噉身體會有改變，噉一定係唔同程度嘅發生，或者以前好fit去到噉上下會冇噉fit。噉呢個一定會有改變。噉呢個都係牽涉到第二樣我將要講嘅就係，一個所謂即係psychological，心理上面。當見到自己，咦！死囉！我冇以前噉fit或者冇以前噉好，我冇以前噉捱得，自自然然會有一個懷疑走出嚟。如果係關於係，人好自然會有一個ego就係，死囉，我係咪唔得呀，我係咪渣咗呀。所以老人家通常有一句說話，經常講嘅就係咩呢，就係覺得我好冇用，我開頭係唔知點handle。慢慢慢慢我自己個年紀開始大嘅時候，我慢慢開始體會到佢哋少少呢句說話。覺得自己好冇用，好冇用，好冇用，經常講。噉所以心理上面一定會有一個衝擊，亦都自然，即係自己開始。特別係如果去工作上面，佢能夠substain得到，有啲好犀利嘅做到七八十歲都得會好啲。要不然正常情況底下，佢會經歷一個可能係一個心理上面嘅關口，佢哋會有啲唔舒服唔開心，懷疑自己。第三樣嘢，就係一個社會層面，一個social啲。我哋成日都話，長命係冇用，得我長命係好大鑊，因為我啲friend唔長命就唔得。如果我哋年老開始，我哋發覺我哋身邊嘅朋友親人一個一個慢慢慢慢離去，或者有陣時唔係死而係去街都出唔到，唔通我同佢嘅節目就係我每日想上去探佢咩？我自己嘅親身經歷就係，近呢兩三年我啲同齡嘅朋友都有啲都開始離去，我開始慢慢有呢種感覺，即係死喇，我啲friend行先一步，我好唔好keep好我自己，定係不如都由佢。反正人終需都係嗰條路，第三方面，呢個冇friend係一件好大鑊嘅事。第四樣嘢就係financially，呢樣嘢當然你可以plan。以前嗰一代人比較少有呢個所謂退休保障，亦都冇噉多嘅所謂金融產品去幫助佢哋。噉所以通常以而家即係社署每年度嘅支出其中一個最大嘅項目，就係去姑且叫subsidize呢班本身冇準備到退休嘅長者，係接近係50%嘅，即係佢哋嘅狀況可想而知其實係冇乜錢，佢成日都話冇乜錢淨噉。但係佢哋，即係我遇到啲長者成日都話冇錢，噉到佢走咗之後床下底又湊到廿幾萬咗你都唔知點算。係啦，噉所以整體上面其實好多長者都面對緊一個財務上面嘅一個失落，社交心理同埋身體上面嘅失落。噉所以係囉，一個人年紀大咗就難免會做呢幾樣嘢囉。即係面對呢幾樣嘢囉。

M：好快地用咗呢四大嘅分類去講咗一個人步入老年嘅時候面對咩問題。我希望聽眾聽到呢度我唔知，可能十分鐘之後唔好嚇親啲人。可能我哋而家嘅聽眾們，可能就係話我返緊工而家廿幾三十歲，仲要即刻同我講話冇錢冇朋友好恐怖噉樣。我認真真係要不得不講。我相信其實大家可能去到三十幾歲嘅時候，除咗你發現你嘅社交媒體多咗啲人結婚結咗婚跟住又影婚紗相，婚紗相之後就開始見到有小朋友，然後就好多小朋友啦。跟住你就會開始發現可能又會見到有啲人話開始親人離去喇，可能朋友離去喇，即係殯儀館或者係啲喪葬嘅嘢其實就開始離唔開自己。我自己都係噉樣，即係我依一兩年都遇咗我親戚過身，噉我都要去主辦一啲後事嘅嘢噉樣。噉所以我就講起呢條變老嘅題目啦。老實講，如果講話朋友多與少同你嘅社經地位同個人嘅待人處事有好多好大嘅關係。但係頭先你講到話社會福利，即係除非你而家依一刻財富自由你安枕無憂啦，但係其實好多時候啲人都係諗緊老嘅時候政府會唔會養我呀，邊過嚟養我呀。以前呢，喺同性婚姻之前呢，其實我估有好多同志唔係好想像得到自己老嘅時候會點過嘅，甚至我嘅partner。其實喺十幾歲嘅時候，佢係冇辦法想像自己三十幾歲嘅時候作為一個女同志嘅佢係點過嘅。係啦，老年女同志，或者老年同志呢啲題目開始越嚟越多人喺呢個學術圈裡面做研究啦，亦都希望等陣Richard可以講多關於呢個同志與老年啦。我首先去返將大家嘅注意力放返去一個比較personal嘅位置先。我頭先講咗我自己三十歲呀，我想問一下Richard呢，頭先你話你開始經歷咗身邊有啲人離去嘅時候，你有冇諗過其實你嘅老年係點㗎？

曾:申報先，我今年四十八，噉老年其實我以往係冇特別再去諗嘅。噉可能我過去有做開運動啦，明白個身體係一定唔會好似十八年前噉勁抽嘅。噉嗰一刻其實我都知道自己係會有變老嘅一日嘅，我諗亦都可能因為工作嘅關係，我成日都alert自己，咦，呢啲服務其實第時我用唔用得著呢？嘩，送飯嗰啲飯噉㗎喎，點食呀。噉所以嗰啲好多喺服務入面，服務提供入面，係政策上面，其實自己都會去諗，到底我要一個乜嘢嘅政策，或者我要一個乜嘢嘅服務嘅框架。噉最後尾其實我得出一個結論嘅，係最後尾都係靠自己，即係我覺得健康嘅嘢都係要靠自己，要及早去真係要為意多啲，準備多啲，定時定候做運動，注意飲食呀，財務上面就真係做好啲準備啦。即係有好多嘢係必須要由我呢個年紀已經要plan㗎啦，或者已經執行緊㗎啦。噉變咗我成日都話收尾嗰幾年，其實都唔係收尾嗰幾年，而係講緊係心尾嗰幾十年。即係我哋現代人，我哋呢一代人呢，其實我哋平均嘅壽命呀，即係我哋香港人真係好慘呀，我哋香港人平均壽命都幾長。

M：目前係咪都係全球第一呀?

曾：我冇再follow啲數據，follow得好貼，但係其實係唔少嘅係八十幾。

M：係呀。

曾：女士係平均係長命過男士，at least五年嘅。噉呢個數據到而家都係valid嘅。噉呢個另一個議題呢，就係即係異性戀嘅世界呢，女性好大機會會成為寡婦，at least五年啦，即係根據呢個stat。而我哋既然唔係收尾嗰兩年嘅話呢，更加及早要去準備或者去介入，無論閣下係直男定係性小眾，咩狀況，都必須要去準備。即係我哋不能夠去依靠大環境，或者政府部門，唔係唔得嘅，即係果樣嘢會好基礎，即係想好啲都未必得。噉所以你問我，我有啲咩諗法，其實真係靠自己。我自己，即係如果你問我，想像呀，都係嗰句，好似我爸媽以前成日講，最好就行得走得，就唔好噉辛苦。即係呢三句說話，其實我覺得對任何一個人嚟講，其實都係啱使。

M：行得走得，我記得我以前有一個前任，佢阿爸係講緊話，食得呢就得㗎喇。噉我覺得，頭先你講到食飯，即係可能對於一個老人家，到時候佢行動不便，其實一餐飯就可能係一個好重要嘅一個關卡。每一日究竟食到幾多、食唔食得落，你食完之後會唔會唔舒服，其實好多啦。所以將行得走得，食得呢一啲元素去，作為一個指標去諗自己，老嘅時候，幾時開始覺得自己老呢? 也許可能就係，用醫生會指標去諗下。我諗因為有好多人都會講話，當你老嘅時候你開始有三高，開始有三高嘅時候，你就有啲嘢唔食得喇嘞！跟住發現你自己開始，有啲嘢唔食得嘅時候，就發現，我開始步入一個要注意，年紀注意身體嘅一個時候。OK，頭先你講到話，呢個政府俾到你嘅福利，係好基本。其實我相信，有留意過新聞嘅人嚟講，真係可以想像到一個，即係有個心理準備，就係話你要得到政府嘅社福，就真係純粹係令到你唔會完全冇錢，完全冇得食飯噉囉。噉但係你嘅質素，就一定唔會好噉樣。

M：頭先另外亦都講咗一個關鍵字，就係話靠自己。我覺得好深嘅感受就係，呢一個字其實都幾應用喺不論係咩年紀嘅同志上面。當佢哋唔係好清楚，究竟外界如何包容你，如何接住你嘅時候，好多時候就先諗到，噉我搞掂咗自己先。我搞掂咗自己，跟住再諗下一步，即係可能下一步，要唔要出櫃，要唔要同人哋講我自己嘅身份，要唔要再做下一步，結婚呀，領養呀，生小朋友呀，之類之類。噉到底我哋，作為一個地方裏面嘅一個國民，一個擁有國籍嘅人，嗰個nationality嘅人，我究竟要點樣期待嗰個地方嘅政府幫到你終老呢? 我覺得都係一個好好嘅議題。

M：有啲人又覺得台灣有健保，香港冇健保，香港老嘅時候真係大鑊啦。即係錢少啲你就真係聽瞓街，你就真係等醫療嘅檢查，都唔知等到我死嘅時候仲等得到未呀。好多種種嘅嘢喺老嘅年嘅時候，或者你純粹係做一個後輩，見到你嘅前輩開始唔舒服嘅時候，你都會諗起，係喎，我自己老嘅時候，我點樣幫我父母親去做呢個長期照顧。究竟有冇人可以接得住呢件事? 所以我就覺得呢一個題目，唔係純粹就係話我同志嘅老年變咗點樣，而係其實每一個人都要care。而尤其同志係，我諗係越嚟越多有資格，有原因要去諗自己老嘅時候會係點。

M：噉我想問一問先，喺我進入下一個大嘅topic之後想問：噉你服務嘅對象，頭先你講話單身嘅男性。噉當中或者你過往以前嘅工作，或者你個人case嚟講，你接觸到嘅同志，或者係你知道同志會面對嘅嘢會係，即係要有幾多呢? 你有幾多嘅experience。

曾: 我過往因為有啲歷史嘅因素，噉我同一個本地嘅同志團體，就相當friend相當熟嘅。我開名係香港彩虹，Tommy仔係好friend好兄弟嚟嘅。噉因為種種嘅原因，我有機會接觸佢哋認識佢哋，唔敢講話協助大家同佢一齊行。噉我嗰陣時對同志服務係唔認識嘅，可能我屋企都有同志，因為我其中兩個哥哥係同志，但係我冇特別因為佢哋嘅原因，我走去做一啲所謂同志服務嘅工作，只不過因緣際會，我真係同呢個friend Tommy仔係好好傾。大家有了解吓有啲咩可以做到。噉我接觸香港彩虹而言，其實佢哋班後生仔係好基層，即係好似我哋以前細個屋村隔籬屋一個普通後生仔一樣，佢哋都要面對成長，讀書讀得唔好啊，要考試喎，想出去玩喎唔夠錢使喎，噉點呢？阿媽又驚佢學壞，又哦佢，阿爸又唔得閒理佢。都係啲基層後生仔會面對嘅問題。只不過佢哋有一個特別啲嘅features, 就係佢哋嘅性取向同我哋好似唔同，噉所以我套用返一個人成長嘅階梯而言呢，我哋面對嘅困惑基本上其實都係一樣。只不過十零廿歲嘅男同志呢，男同志我見得比較多啲。其實佢哋都會問我將來點樣呢，叫做家庭環境可能好少少嘅，叫做培育各方面可能好啲嘅，可能攞到個學位啦，出嚟做嘢啦，都會拍拖啦。咁之後又點樣呢？其實都係keep住特哋，即係普通所謂嘅直男都會問嘅問題，之後點呢，係唔係真係結婚生仔呢？係唔係真係買樓呢？係唔係真係儲多啲錢然後做乜做乜呢？係咪定期去旅行先至叫做life呢？其實好多嘅困惑呢，即係喺個大城市生活入邊都會面對嘅問題。咁而我認識嘅年青啲嘅基層啲嘅朋友其實佢哋嗰條路似乎更加不可見，好似有一堆霧喺前面咁樣。有一段時間我會知道有一啲case係有濫藥啦，不安全性行為啦，甚至可能有HIV嘅風險啦。咁如果你行咗嗰邊嗰條路呢，其實就更加崎嶇添。噉所以嗰條路係咪佢哋獨有呢？未必。即係一個所謂直男直女其實都會有機會遇到，當佢哋年紀變到比較大咗呢，其實佢哋面對嘅問題同我哋可能面對嘅問題基本上都差唔多。好啦，佢哋可能結婚，可能唔會結婚，可能有自己嘅理想，或者搵唔到自己嘅理想，咁到佢哋差唔多去到我，好似我呢個年紀，如果佢哋所謂有少少事業基礎會好少少囉。要不是都會面對任何一個人死囉，老啦喎，如果有一個固定伴侶會好啲囉。如果都係冇嘅話呢，都係面對嗰個嘅問題，只不過好似係多頂帽，嗰頂帽就係我係一個性小眾。性小眾究竟係呢個社會何去何從呢？嗰種困惑都係keep住喺呢班我認識嘅性小眾朋友入邊。

M：你講佢Tommy仔呢，其實我哋好早好早之前有訪問過佢嘅。噉佢嗰陣時主要都係講香港彩虹，彩虹行動嘅事蹟啦，難得我而家頭先同大家一齊先聽到原來Richard係同Tommy仔熟嘅，哈哈！我覺得慢慢噉樣branch出去就發現左我哋，你頭先用咗個好好嘅字，即係原諒我好濫情，但係你話你同班同志係同行啦，咁我覺得你熟一個人，你想了解佢周遭嘅活動嘅分子，佢嗰個group嘅時候你就會成為咗佢嘅同行者，呢樣嘢你唔需要特別…有啲人好鍾意去強調自己我個friend係同志、我屋企人係同志，所以我就係（同志）friendly嚟㗎啦。但其實唔係囉，只要你係有個心，你係想了解嗰個族群嘅話，你會自自然然想知多少少。我覺得呢個係一個好經常會發生嘅過程囉。我喺度， Richard嘅例子印證左就係同個friend熟，嗰個friend係一個性小眾，如果你作為一個同行者，一個ally嘅話，你就會慢慢去了解佢嘅生活囉，你唔需要特別用一個你認識乜嘢乜嘢所以就去證明你係友善，有一個咁嘅論證嘅方法啦。即係你講咗好多同志變老，或者係你或者係你比較熟悉嘅男同志變老，佢哋係不分，只不過係多咗頂帽。多咗頂性小眾嘅帽。我想問一問你當時同Tommy仔比較熟嘅時候，即係認識到嗰一班基層嘅同志們，佢哋有冇同你講關於佢哋關於佢哋圈子入邊變老嘅定義啊？

曾：我哋就冇咁傾到去呢一步。

M：ok.

曾：當然我所能夠知道嘅就係，似乎對於佢哋嚟講，似乎啊吓，好似係幾係兩個世界嚟嘅。年青同治聽落應該係精彩啲啩。年老同志似乎係，即係我純粹感覺或者直覺，可能我錯㗎，走返入櫃囉，直接收埋自己囉。我嘗試噉樣去理解，但佢有冇好清晰嘅定義，嗱你過咗50歲呢就唔鍾意㗎啦，但又唔係。據我所知仲有一啲年青嘅同志佢哋鍾意一啲年紀大嘅，噉又冇絕對一條界線，嗰條界線亦都唔係咁清晰。所以又少機會，我哋好實務，傾平時有咩做啊？呢排你點啊？其實我哋真係好生活化，其實我哋真係好生活化，好似大家friend噉。我地冇乜學術討論，有陣時都。

M：好正常嘅，你地唔會無端端食吓飯，又會講起學術討論，又講起啲年老，社會變化。點解我會噉問呢？就係因為，喺一啲比較後生嘅社交平台上面，好多人就會動不動就話自己老嘅。噉佢地所謂嘅老嘅年齡，以男同志圈子嚟講，可能係廿零三十幾，三十幾就已經開始係老㗎啦。跟住就會開始有一個分野，後生嘅就可能係十零歲未成年，跟住就開始大學生，跟住三十幾歲就變咗一節。跟住就變咗老年，噉就係另一個世界噉樣。我相信呢一樣嘢，老或者係後生嘅嗰個年齡嘅定義，往往都係會同你外表有關。我相信一個五十幾歲所謂保持得非常之好嘅一個同志，佢嘅所謂嘅受歡迎嘅程度一定係會比較高嘅。所以真係唔知，我純粹係覺得呢個男同志圈子入面，對於呢個外表同年紀嘅定義係好殘酷嘅。作為一個女同志，我就覺得我而家已經生咗個肚腩啦，跟住同我伴侶兩個肚腩一齊啦，有個肚腩同好會，仍然相處得非常之愉快，亦都冇畀人特別話我地真係而家三十歲、好老呀點點點。

Anyway，你講到呢個同志嘅身份，亦都有講到佢哋相對嚟講都有可能接觸到佢哋同志身份同時間有濫藥，或者可能係再次入櫃。也許未必係你或者Tommy仔嗰個圈子，從你嘅生活經驗裏面。可唔可以講到呢，其實你認識嘅同志，佢哋對於出櫃，或者老嘅時候，要表達自己嘅性傾向呢件事，佢哋係點樣睇嘅呢？

曾：我自己嘅經驗入面其實好多，如果佢哋後生唔出，佢哋到度死都唔會出，即係話如果佢要出，佢一早就出咗，即係我嘅經驗入面，我有幸地喺我自己嘅主流工作入面，我真係遇過一個同志嘅伯伯，佢係，無論我幾Gay Friendly，幾Show比佢睇，我有幾接納呢樣嘢，佢都係唔願意講，我明白嘅，佢係一個主流嘅服務入面。但係我點會唔聞到你祲馟呢？好多佢可能大半生都係同志圈子入面，又或者其實佢已經係喺個櫃入面已經係封塵咗幾十年。噉不如就帶埋呢樣嘢入棺材啦。噉所以我接觸過佢哋唔會特別突然間六七十歲噉樣走出嚟，我話喂，我個性取向係噉樣喎。

噉同埋有好得意嘅一樣嘢就係話，如果嗰個人突然間六十歲走出嚟話畀你聽佢同志，即係我哋會懷疑，因為最近嘅呢幾年就係有一個噉樣嘅公眾人物就做咗呢樣嘢。噉就可以開埋名啦，就係洪趙峰。噉大家會有啲奇怪嘅感覺，即係我同啲同志嘅朋友傾過佢，你而家先嚟出，係咪㗎你？即係佢哋個反應其實係讓到我都覺得係囉。噉你仔都噉大個，噉到底係你係唔知呀，你係忘記做呀？你係唔識點come out定係點樣呢？所以其實呢樣嘢係可以係好interesting。我相信好多我認識嘅同志朋友，其實佢哋一踏入青春期，或者未踏入青春期，其實已經知道自己係咩狀況。噉所以果陣子唔出，十幾廿歲唔出。噉其實要麼就好似我認識嘅一啲喺英國嘅朋友，就係佢哋係結婚囉，生仔囉。去到某一個年紀，可能三四十歲，頂唔住啦，四十歲之前唔come out呢，以英國人嘅標準，你通常都唔會點come out㗎啦。噉所以喺香港嘅情況可能一樣掛，我唔夠膽講，因為我冇一個stat喺手。

M：頭先你講到出櫃啦，然後老年你認識嘅比較年長啲嘅人，其實佢哋一路深櫃嘅話，就一路深櫃到底啦，直到入棺材啦。頭先我就有個問題想問啦，噉佢哋假設一個同志，佢就深櫃唔會特別講自己喜歡嘅咩人。噉佢一路諗住將呢件事帶入棺材啦，佢覺得可能佢畀人知道我自己會處於一個劣勢。處於一個弱勢嘅話，噉作為一個非常典型嘅人生嘅里程碑呢，就要經歴個結婚啦，有一個伴啦，跟住就搵人照顧你啦，或者係有仔送終有孩子送終噉呢件事。噉如果頭先你講到話，嗰啲直接會希望帶呢個自己嘅身份入棺材嘅人，噉佢哋確實係點樣生活嘅呢？

曾：好睇佢哋係咪遵從呢個社會規範啦。噉我身邊嘅呢其實都幾大部分人呢，即係講比較年長嗰批，佢哋都幾遵從呢個社會規範呢，就真係走咗去結婚生仔嘅。噉而佢哋去到，其實都唔係去到好耐呀，噉都會講一句話就係，真係頂唔住。咁呢樣嘢，雖然我又唔可以確實咁講，有好亦都有唔好。唔好就其實，即係另一半其實同你結婚嗰個其實都好痛苦。另一樣嘢就係仔女點呢？你come out同唔come out，其實大家點會覺得老竇係冇問題呢？一個基佬娶咗個女人結婚生咗兩個仔，噉又點呢？

我以下講嗰啲其實都係一個真事：係有一個好close嘅一個Uncle，琴晚先同佢通咗幾句電話，話我今晚接受呢個訪問喺英國有冇呢個組織，佢話冇，冇啲咁嘅嘢㗎啦。咁即係講起佢個經歷呢就係，有仔女OK嘅，會好啲嘅，但中間suffer嘅過程實在係太過痛苦啦。因為要經歷一次明知道要失敗嘅婚姻，每個人都將會受到傷害。成件事Suffer嘅，噉之後有個仔有個女，或者有個孫，噉OK啦！咁所以佢哋，以英國或者以香港也好，好多朋友其實去到一個位都如履薄冰，有一位朋友我認識嘅就係佢分享返，其實佢係一段婚姻佢有出去偷食啦。偷食嘅對象都係同性啦，其實佢都好驚㗎其實。因為佢一定會有啲性嘅需要，而佢嘅對象唔會係佢個太太，因為佢本身都係 Gay，噉變咗成件事其實就好，成個人生都充滿住好震驚呀，好膽心呀，到底之後點過呢？噉都係個個問題，呀，我之後又點呢？其實 Keep 住有好多問題好 apply to 所有嘅人，亦都好 Apply to 同志，特別係已經結咗婚嘅朋友。噉所以佢哋面對嘅困難我覺得係比較大一啲。即係佢哋唔係有心出去搞搞震，唔同一啲直男出去搞搞震個種噉樣嘅狀況。而係佢哋真係有一個特殊嘅需要，而冇辦法，只不過我哋係臣服於呢個時代嘅巨輪之下，就真係噉樣行喇個條路。

M：我相信你講緊個個Case絕對唔可能係個別例子啦。所謂社會現象，即係所謂學術討論上面都會講話「假結婚」啦…表面叫假結婚啦，但係其實係…

曾：Bogus Marriage, 類似係噉樣啦。

M：係呀，或者係…哎呀！我唔記得咗，真係唔好意思各位聽眾，依一刻醒唔起呢一個…中國大陸有一個字眼嘅…呀…係咪叫「瞞婚」（後編：正確為「同妻」/「同夫」）？類似因為有一孩政策啦，所以生一個小朋友啦，所以通常出現係男同志搵依個異性戀女性去結婚嘅，噉跟住後來過咗若干時間就同自己太太攤牌其實自己係喜歡男性嘅，噉就變咗做依個到時已經米已成炊喇，成個家庭已經建立咗喇，但係姐係已經冇咗個個關係，變咗明存實亡嘅一種「偽結婚」嘅狀況態啦。我之後如果搵到個 Term 我放番係 Description 度，我依刻真係諗唔起。噉我覺得呢一個情況喺聽返真係之前 Denise 嘅一個研究講呢個，香港台灣同新加坡嘅，老年女同志其實都幾類似。即係目前嚟講我哋而家呢個六七八十歲嘅同志們啦，佢哋其實都係完全地離唔開嗰個人生階段要佢做嘅事嘅。即係佢一定要履行嗰個劇本，如果佢唔履行嗰個劇本呢，就會進入另外一種狀態 Which我等陣再講啦。好多人呢佢哋就會係結咗婚啦，跟住有小朋友啦，跟住就一路噉樣就周而復始噉樣去 Loop。Loop到佢哋覺得差唔多啦，噉咪認命囉，認命跟住就終老啦噉樣。噉中間如果係遇到真係內心嘅掙扎或者係所謂嘅你講嘅忍唔住，頂唔順嘅話，噉就會出現咗，即係一般人會認為係…噉你咪真係不忠囉噉樣。而家我哋聽到呢個同志嘅以前大家想像淨係得異性戀婚姻嘅情況之下，呢一種嘅不忠又唔係單純地純粹就係話我想搵新鮮感噉簡單。而係佢係想做返佢內心底底底裏面想要嘅一啲慾望噉樣。

曾：因為個底盤係唔同㗎嘛，即係夾硬明明係iPhone，你用Android果啲嘢噉…其實係好用唔到㗎嘛其實係。

M：你用呢一個電話嘅System嚟應用呢一個底盤，呢個傾向我覺得不失為一個好嘅比喻。如果而家仲有人講話呢個喜歡同志仲係一個Choice，即係如果你可以選擇唔同呢個同性戀，你就會活得更開心啦。即係有一啲組織嘅人係講緊呢啲噉嘅論調㗎嘛，呢一個頭先講嘅呢個阿叔，英國阿叔嘅例子就認證住就係，無論係你表面上，行為上有幾想履行異性戀嘅模式呢，你最後底蘊裡面都係…嗰個硬件…即係個個設定，心裡面嗰個慾望都係不能夠輕易地改變得到。依個就係一個實例，大家聽住！

頭先我講「等陣再講」嗰個部份呢，就係如果一個同志佢唔結婚，但佢當時嗰個社會、當時嗰個政策唔允許佢去有同性嘅婚姻、同性嘅嚮合、同性住埋一齊相處嘅話，有啲人就會唔結婚啦！噉唔結婚會點呢？我有聽過一啲狀態就係佢會成為家庭裡面自自然然嘅長期照顧者，回應番、呼應留我哋今日嘅主題講「老年」啦，一個同志都會有佢嘅家長㗎嘛，係嘞。佢嘅Family members，佢嘅前輩family members啦，如果嗰個人唔結婚呢，你我哋嘅理解裡面就係同呢一堆嘅長輩一齊住啦，或長期處於一種比較近嘅、比較緊密嘅一個關連啦。因為相對地，結咗婚嘅就所謂係同出面頭家啦，佢外面成家啦，佢外面有一頭家啦，佢自自然然會建立一個新嘅家庭。所以嗰一個冇結婚嘅人呢，佢就會長期同佢嘅原生家庭緊密聯繫在一齊。因而被呢個家庭，假設佢係有能力需要成為家庭嘅長期照顧者。你有冇遇到一啲噉嘅狀態呢？即係有噉嘅案例。

曾：有嘅！今日我先噉啱遇番。係一對老年嘅夫婦。而我當時係接觸佢個仔先嘅。都係啦，我第一次見佢個仔嘅時候已經聞到佢祲馟啦。噉當然我都好有善地，你咩都可以同我講㗎。曾先我都做好多唔同嘅工作㗎。我明白每個人都有唔同嘅狀況，我相信呀咩生，你明呀呵？我都好友善噉樣睇下佢會唔會願意講多少少佢嘅難處。噉當然佢真係冇講，亦周時間要照顧兩個長期病患嘅長者，其中一個仲要係Cancer，做完手術，另一個又啱啱中完風，佢間屋淨得佢三個人。呢個後生仔其實佢好你好典型係…頭先所講，好似成為咗一個必然嘅照顧者。而與此同時佢似乎唔係好能夠活出自己，我相信感覺就係，佢好多嘢都唔敢做，亦都可能我唔知道咩原因，佢又一定要Stick to 佢父母一齊住。係咩特別原因我唔知，我淨係知道佢自己作為一個同志嘅後生仔，佢要一個人孭起呢個責任係孭唔落。我亦都遇過其他一啲比較成長嘅同志，佢個情況就比較上好少少，因為Some how 之後我知道佢有其實家庭成員幫佢孭咗呢個burden 喇，我唔知佢係唔係同佢屋企人Come out咗。我遇啲相對年紀比較大啲嘅同志，講緊50-60歲，講緊佢父母係70-80歲呢，佢個問題會比較大啲嘅。毋為佢自己都會變老吖嘛。依家所謂「雙老」嘅家庭愈嚟愈多，「雙老」意思唔係一對Couple，而係一個開始年老嘅仔女去照顧更年老嘅長者。而呢個情況係部份嘅同志嘅case入面呢係多㗎。因此其他有家庭，我哋話齋，佢哋可能移咗民啦，可能佢有自己嘅burden啦，佢有自己嘅問題，咦，啱喇，呢個人冇結婚喇，仲唔係你？有好多好自然就你孭㗎喇，你冇結婚嘛係咪？咁就更加如果佢同佢屋企人come out咗好少少，而屋企人接受嘅話會好少少，要麼大家好自然就覺得個個就係佢。同時間佢有冇選擇呢？要麼我come out，噉come out幫唔到件事，都係我㗎…所以類似咁嘅case我知道係有囉。

M：從呢個對話入面聽到好多個案，呢啲真實個案就印證住呢啲所謂社會現象。呢啲…我唔知呀，去到呢一刻我希望大家真係唔好嚇走。但呢啲情況確確實實係發生緊。姐係我諗唔單止係同志吖，你唔講同志，純粹講一個唔結婚，或者後尾離咗婚嘅一啲人，當佢好似結婚就係有一種好似從原生家庭，有一個明顯概念上嘅分割啦。所以你就有多啲原因，就話我可能要照顧小朋友，可能我住好遠嘅，我搬走咗喇，所以我就冇咁大原因要返去。咁變咗我依家可能將呢個責任好似轉移到嗰個單身，或者一個人嘅家庭成員上面啦。

我好記得我有一段時間讀緊大學嘅時候呢，因為我係獨生女啦，噉我嗰一刻呢就係我呢個獨生女嘅孫女呢就同緊我阿婆一齊住。噉我阿婆當時都七十幾歲啦，噉好好彩地呢佢係冇啲乜嘢好大嘅病，人老嘛，佢食嘢就就容易胃痛啊，跟住佢人又矮少啊，跟住骨質疏鬆啊，所以佢呢就好多時候身體都痠痛病痛，噉咪就成日都食啲痛藥。即係佢嗰段時間比較有心嘅體會呢就係當你係一個所謂嘅年輕力壯啲嘅人啦，你同一個老年人嘅時候呢，你嘅時間啦，你嘅精力啦，你嘅體能啦，你嘅體力啦，係會自然然地跟住呢一個老年嘅人係好消耗嘅。我嗰陣時我返緊學啦，而我由新界要返九龍區噉樣啦，噉我放咗學返嚟我就係要照顧佢囉，跟住我就冇時間啦。我就唔會想像到話去做呢個大學生要社交，要去玩噉樣。噉所以呢一種嘅情況係同志當然有同志嘅context之後，有佢嘅處境啦。但係不論同志嚟講只要人一老，佢身邊嘅人就會跌入呢一種嘅長期或者假設嘅照顧者嘅狀態，而呢個香港開始的確而家係唔多有一個配套嘅措施去做一個台灣好似叫做「喘息」啦，即係唞下氣，嗰個唞下氣嘅嗰個狀態。呢個政策可能也許等陣再邀請Richard再講多少少。噉我哋聽到呢一樣，即係一個總結就係以前嘅同志，佢哋可能係認咗自己要符合呢一個社會嘅劇本，所以佢就會結婚生仔。噉如果佢唔結婚嘅話噉就變咗做單身啦。我相信香港都唔多，類似係嗰啲姑婆屋嗰種，即係幾個同志，或者幾個同性住埋一齊噉樣嘅。噉我又有一個好現實嘅問題啦，即係假設如果我冇辦法結婚，我一個香港人，我冇辦法同我嘅伴侶結婚噉計啦，我又唔想犧牲我自己同一個異性結婚啦。噉我就一路唔結婚到尾啦，噉我即將會面對一樣嘢就係我冇一個後代送終㗎喎。噉一個同志面對呢個情況之下，佢哋或者你會聽過嘅案例，佢哋會點樣面對呢種所謂嘅送終嘅危機呢？

曾：噉冇辦法，呢樣嘢係必然會發生，即係呢個亦都係最現實嘅嘢。即係兩個男人係嚴格嚟講係你生唔到自己嘅後代，但係當然有好多方法啦⋯⋯

M：先唔講領養呀或者代母呀之類啦，正所謂講如果佢係兩個同性嘅噉樣。

曾：係喇，噉喺呢個狀況底下，其實可能一開波已經係我預咗係我哋就算佢兩個關係好好都係我哋兩個終老㗎啦，睇下邊個行先嘅啫。所以我諗如果真面有同志朋友，佢真係好想所謂生前規劃嘅話，佢可以主動接觸一啲機構。有機構提供呢種服務，係預先規劃好，讓到佢哋走嘅時候都叫做有人Take care佢囉。又或者其實一個唔好話同志呀，一個人佢本身佢可能真係都冇結婚呀，冇小朋友呀。噉佢可能都及早交代畀啲子侄又好，邊個都好，交大落先囉。其實好煩嘅，如果突然間有個親戚唔係成日見到突然間瓜咗，要同佢幫佢搞，噉你點搞，幫佢執，唔知點執，即係件事係幾煩惱，對於如果身邊嘅人嚟講…

M：我要打岔Richard，我係呢度不斷強調，呢個聽眾，你睇唔到我，但係我係不斷噉向呢個點頭，因為我近啲係經歴緊呢啲事情，聽唔聽得出。

曾：OK, OK, 係囉，係香港嘅為例其實係可以有機構係可以同佢一早plan定曬，無論閣下係想點樣做呢，主動同機構嘅同事去傾，其實係真係盡可能去幫佢做到。即使個位係跨性別人士，佢想用咩方法，即係將佢個咩身份去完成佢個簡單嘅告別儀式，其實都可以傾。一係我同佢哋接觸嗰邊，其實佢哋真係好有心去幫助每一位去接觸佢哋嘅朋友，所以係我appreciate呢班朋友嘅工作。預先其實我規劃定我想係用咩方式，想點樣做，其實一早規劃定噉其實就都已經OK㗎啦。所以有陣時我工作上遇到啲友呢，即係特別啲阿伯樣衰衰噉樣，話冇見過老婆幾十年，啲仔又唔理，話噉不如你講定你想點搞啦，你唔好又去沙嶺啦，好唔好呀。即係明知佢都冇人同佢執，不如一早問定佢叫佢搞啦。所以其實有好多嘢係可以及早準備，同當初我哋傾到關於退休年老嘅問題，其實都可以係一早去準備定囉。

M：你講呢個機構呢，佢係咪公開地希望多啲人去用佢嘅服務，定係其實佢哋自發性呀？

曾：佢哋係NGO嚟嘅。佢哋未至於話好希望大家去搵佢住嘅，佢其實都多個服務量，越嚟搵佢求助嘅人都越嚟越多嘅。開頭係姑且叫做嚟佢就幫手啦，噉後面佢哋都遇到資金上面嘅狀況。而家就慢慢慢慢呢，一定係要60歲以上佢先至可以優先處理，或者有末期病患佢哋會優先處理。亦都有一啲私人機構或者細小嘅機構其實都可以嘅，即係佢哋都可以係提供呢啲服務嘅。OK嘅，喺呢方面我覺得香港有即係除咗有機構去做，亦都有一啲有心嘅人去幫手囉。

M：OK，你呢啲機構或者人事嘅資料係可唔可以補充俾我哋嘅聽眾？

曾：可以，其中一個係聖雅各福群會嘅「後顧無憂計劃」，另外有一個機構叫做「無忘愛」，無忘愛個發起人叫做范玲醫生。范玲醫生佢都除咗係幫人去做呢一樣嘢之外，亦都做好多生死教育嘅工作。噉就呢兩個會我接觸過佢哋都幾friendly嘅，噉當然有特殊嘅需要其實可以試下同佢哋傾囉，噉係囉。

M：好呀，好呀，噉我都會上網搵一搵一啲相關嘅資訊放喺description裡面，大家都可以了解下。頭先我不斷噉點頭到要打斷Richard嘅原因呢，就係即係千祈唔好想像話我而家聽到呢個節目嘅你可能係廿零三十歲，佢話我再噉後生，就會講佢以前嗰個咩子宮頸癌廣播：「廿零三十歲，唔會係我嘅。係呀唔關我事嘅，呢啲嘢唔關我事嘅」，噉樣我可以好坦白同大家講我廿零三十歲面對過親戚嘅離去呢，就係由我作為一個屋企人，然後我要去呢個告別式或者呢個殯儀館啦，到我之後要contact嗰一個做殯儀嘅人，去定我花牌係點樣寫呀，人又點樣畀錢呀，跟住儀式係點呀，跟住揀日子呀之類嘅嘢，其實中間嘅轉折係less than十年嘅。

我覺得死亡呢件事或者係親人離去呀，或者你朋友離去呀，係一個現實一定會發生嘅事，而千祈唔好覺得你後生所以你冇需要諗呀，你可以自⋯⋯，你可以而家唔實踐。但係你一定要知，因為你永遠唔知你身邊幾時有呢個噉嘅需要。當你真係需要呢一個噉嘅服務嘅時候呢，好多時候因為你當時自以為唔需要嘅時候，就變咗倒瀉籮蟹。你就會「啊，唔知我要搵邊個呀，我應該變一個會比較可靠啲呢？」噉所以，即係自我之前去幫我親戚搞完呢個喪禮之後，我自己呀都已經留咗，影定咗一啲NGO可能會協助做白事嘅人嘅Contact。即係點都要留一留噉嘅Contact，因為你唔會知道你幾時要handle。啊，你一個人噉樣就病走咗啦，走咗之後你下一步要搵啲咩呢？就係，當然佢嘅後事就係告別式呀，火化呀，呢啲所謂嘅殯儀相關嘅嘢啦。

除此以外，頭先Richard講到就係，執屋，佢嘅財產，佢嘅資產，嘩，真係甘喎。嘩，呢個真係不得不要同大家剖白下我嗰陣時做過啲乜嘢。我嘅親戚過咗身之後，佢做咗一件事，嗱，即係佢臨終前好長一段時間單身啦。佢亦都預計咗自己係因為有呢個癌症，所以佢已知道自己唔會長命㗎啦。所以佢哋喺中間成個過程之中，已經計劃好曬佢嘅資產係畀邊個啦。佢寫咗自己嘅遺囑啦，佢亦都將自己嘅資產真係好清晰地做呢個分配。但係佢做漏咗一件事，佢就係冇話畀人哋聽佢份遺囑去咗邊。所以作為後輩嘅我做咗啲咩呢？就係翻箱倒籠噉喺佢屋企一路清佢嘅嘢嘅同時就去搵嗰份正本嘅遺囑去咗邊。因為你一日搵唔到嗰份遺囑，你一日都唔知道嗰個遺產嘅承辦人係邊一個。然後你下一步就會非常之複雜，你就要進入咗究竟係會有個指定嘅遺囑承辦人，定係你會按照香港嘅法例嗰個遺產嘅順序分配，按親戚嘅遠近去做呢個分配，係非常之複雜。我呢度唔會特別去再詳細講話我究竟做咗幾多幾多嘢。你可想而知純粹講一個身邊嘅人過身，作為後輩要做幾多嘅事情。而呢啲嘢只能夠係後輩做，即係依家身邊嘅人去做，因為佢本人已經冇可能做㗎啦嘛。聽似有啲荒謬，但係呢個係一個事實啦，所以呢件事係大家需要知啦。你知到成個嘅程序係點，噉我自己好坦白都同大家講，我自從經歷咗呢件事之後呢，我自己雖然覺得未係時候要立一個遺囑啦，我覺得而家搞實太誇張太dramatic，但係我自己都有寫咗一個細細嘅note畀我嘅伴侶睇話，如果我到時發生咩事，你打開我部電腦，你輸入一個一定記得住嘅密碼，你就會知道我啲access東西係點樣去搵。因為一個人走咗呢，佢有好多嘢都係用密碼先可以解決得到，好複雜。anyway呢個心路歷程就係如此複雜而且好沉重，但係一定會經歷。

好，噉我返返去頭先我所講嘅照顧。照顧者，照顧者除咗係一個家庭嘅scale以外，就係講緊政府嘅架構。噉最重要一樣嘢就係由細至大，如果我哋講講話政府俾到一個長者，佢嘅津貼佢嘅補助係好基本嘅話，噉我又想了解下Richard你可能handle過嘅個案嚟講，同志，老年嘅同志佢面對社會或者政府俾佢嘅一啲福利政策裏面，會唔會有唔同嘅待遇。因為我好粗粗地知道，你可能係講關於老人政策同老人院有關嘅一啲政策都有一啲心得，可唔可以分享吓，你覺得香港或者係對同志，或者唔係對同志都好，佢嘅老人院政策係有啲咩想法嘅呢？你唔會有嘢可以講下？

曾：非常好，因為我今日就啱啱去完一間安老院到做嗰啲service嘅audit。我會定時定候去幫佢哋audit一啲service，所以過去三日我就做緊呢項嘢。以本港為例，其實你係政策上面基本上係冇分別，佢都唔想有呢個分別。係官方嘅立場嚟講，你有咗個分別，我又要做多啲嘢。所以佢係一個整體嘅角度去睇所有嘅安老政策。所謂ageing in place，其實講緊係十幾年前已經開始講，ageing in place即係話盡可能係居家安老或者係社區安老，減少佢哋進入院舍嘅機會。而院舍係過去呢十年裏面其實個改善咗好多已經，有資源，亦都有唔同嘅規管，有唔同嘅國際性標準，好似有而家做緊嘅工作。所以喺呢個角度未必因為佢嘅性取向而出現好大嘅問題。反而關鍵嘅就係如果性小眾佢願唔願意入一啲主流嘅服務入面，呢個就好關鍵。如果佢比較open一啲嘅，我唔緊要啦，我咪照接受你啲服務囉。噉當然如果係喺社區都還好啲，因為我住喺屋企，我都仲可以有我自己嘅空間，有我自己嘅嘢，噉我間屋係點，或者我平時我起居生活係點，我同咩一齊，其實可以唔使太過擔心嘅。

而同時間一去到院舍，院舍就算做得幾好都好，我幾有所謂嘅私人空間都好，其實都係一個公共嘅環境嚟㗎。一去到嗰度嘅話，其實好多我自己一啲好個人嘅嘢未必噉容易可以擺得上檯面嘅。我諗我大概差唔多八年前，嗰陣時就同香港彩虹一齊，亦都同晚同牽，香港一個服務年長同志嘅組織做過一啲所謂嘅lobbying嘅，嗰陣時就真係可以，其實都已經好好㗎啦，去到社署嘅一個部門入面，真係可以同佢開到會表達我哋呢個關注，會唔會有一啲政策係可以friendy啲to一啲性小眾嘅。噉而當其時都只不過係開咗個頭，噉到幾年前其實我都曾經係同嗰邊嘅同事都開過會，係傾一啲會唔會有一啲政策真係更加friendy一啲，或者更加保護到一啲同志進入一啲主流服務，特別係安老院入面嘅環境入面一啲即係更加好嘅政策。噉而before that其實當年應該係我諗差唔多八九年前，當其時嘅香港彩虹，我約略有同tommy仔有傾過呢樣嘢，佢就係send咗啲約章出去，約章嘅意思就係一啲對能夠認同可以友善對待同志服務使用者嘅約章。佢要求即係都請邀請一啲係院舍去。好似叫endorse，噉返嚟個feedback唔係太差嘅其實，好似喺七八十間院舍入面其實可能都有三四成到，不乏一啲主流嘅機構。嗰個所謂約章都唔係啲乜嘢，唔係要佢整支彩虹旗出嚟，唔係要佢整支粉紅旗出嚟。只不過佢哋真係願意簽一個名，我哋支持呢一個約章。當其時就做咗呢一樣嘢，而時至今日暫時都冇任何update關於呢一樣嘢。因為件事都姑且叫擺低咗，所以到底嚟緊會點樣行落去呢？噉到底安老服務入面同志呢一界，其實都係一個好模糊亦都冇乜機會。大家可以喺個主流嘅環境入面討論到嘅嘢，噉而喺我頭先提過另一個組織就係晚同牽入面其實都有試過主動接觸一啲提供前線長者服務嘅中心嘅，即係去聯絡佢哋嘅中心，我哋就話會提供一啲嘅training，去讓佢哋更加多啲去認識點樣handle一啲性小眾嘅長者嘅服務使用者。噉返嚟嘅feedback亦都唔係太多嘅，因為實際上面，佢哋話其實佢哋喺主流服務入面見到呢一伯伯或者婆婆嘅機會都唔多，係喇。係好多個invitation入面得一間長者地基中心有回應話，經遇過一個同志嘅伯伯，但嗰個同志伯伯又無乜特別嘢嘅。噉所以其實佢哋能夠出現喺主流服務機構入面係好低嘅，佢哋嘅出現率本身已經唔多，出現咗仲要Out咗比你知就更加少，係呀。所以個狀況就係噉樣。

M：有陣時聽到一啲年輕嘅同志們好容易就會動不動就係講話「老嘅時候就去住同志老人院啦」，噉有陣時睇新聞都會講起話我哋有一棟專屬嘅同志老人院啦。但係Richard嘅分享，真係香港嘅情況之下其實縱使係有服務提供者佢哋簽咗約章，但係喺佢哋嘅服務嘅確實嘅服務群裏面係唔容易睇得到同志，即係清晰睇得到同志嘅身影同埋佢哋嘅需求啦。噉我又好奇啦，我先唔講究竟嗰班年輕嘅同志佢哋所講嘅「同志老人院」有幾重要或者有幾特別啦。我純粹就係諗緊如果係一堆老年嘅女同志或者男同志喺同一個院所裏面呢，我覺得呢，我自己嘅個人言論我就會覺得係一定會係好多爭拗同埋好多是非。噉我又諗緊，假設如果呢件事真係發生啦，噉如果佢係香港嘅，佢哋會有幾特別呢？同志嘅老年佢哋有乜嘢特別嘅需求呢？剛才Richard你又講到話真係其實冇乜大分別，噉仲有冇需要諗呢個方向呢？定係其實老嘅同志係有其他一啲嘅issue係需要accommodate？

曾：我諗係一代一代嘅人，我明白後生嗰班朋友其實係佢哋噉諗法其實ok嘅。噉因為而家呢一批年老咗，姑且連出現都未必會好出現嘅長者其實佢哋因為時代嘅背景。當而家呢一批年青人佢哋進入老年之後，可能佢哋真係可以推動到呢樣嘢出現，我覺得係每個年代我哋都有唔同嘅改變，讓到我哋呢個世界不斷進步。噉所以我又認為到其時呢樣嘢我覺得係會發生。

M：所以你會覺得而家嘅年青人到佢哋老嘅時候係有呢個可能，有呢個同志嘅老人院，噉我又想問你嘅有冇做過任何資料搜集如果同志有老人院佢哋即係其他地區佢哋係有啲乜嘢特殊嘅措施？

曾：其實冇乜特殊措施，我覺得都係噉樣食藥，助行架都係一樣。都係嗰啲噉嘅，腳踏單車都係嗰啲嘢，唔會有太大嘅分別。嗰啲餐單唔會有特別唔同啲要整靚啲，又冇。主要真係人嗰方面，人嗰個服務嘅人員，佢嘅training係咪好aware到，要respect或者係睇到佢哋嘅需要。其實佢需要未必係好複雜，而只不過係接納，接納我就係噉樣，我同志係噉樣講嘢嘅，或者佢係會噉樣去表達。噉其實嗰樣嘢，可能個個老人家或者個個人，其實佢都有唔同表達自己嘅方法。只不過我噉啱呢班係，性小眾啲裝修又唔使特別take care，佢專登整幾朵花，我又覺得唔洗。因為我知道英國係有私人嘅同志安老院嘅，荷蘭係有嘅。但係佢哋亦都冇特別去做啲乜嘢，而只不過係啲人我知道呢間安老院係噉樣嘅，佢哋會專係服務，或者未必全部都係，而可能係其中個corner，或者係其中個樓層，其中一個zone，其實係專係佢哋。噉樣只不過佢哋係真係鍾意自己住埋一齊。就好似例如我哋去到外國，可能同聲同氣嘅鍾意走埋一齊。只不過係噉樣姐。噉其實嗰樣嘢又未必真係要解得噉清楚，呢度呢就係你直嘅就唔好過嚟，又唔會囉我又覺得。

M：係，好好好。噉我哋今次好高興邀請到Richard去同我哋，講下好多個案例。我覺得好開心，終於聽到一啲好真實嘅例子。因為我不得不講點解我會想bring up呢條題目，點解我想帶喺呢條題目。最主要嘅原因，係因為我覺得好多而家年輕嘅組織。或者可能一啲嘅講性別嘅平台，或者係組織，或者有心想講性別嘅人，可能因為佢嘅年紀嘅原因，佢哋好少會主動去講關於老年。

而因為老年，正如我一開頭所講，每一個人一定會經歷，噉所以我亦都希望藉住呢有機會，畀多啲關注同志，或者係自己嘅同志嘅朋友都知道其實，當你可能多咗呢個性小眾嘅帽子嘅時候，其實你又可能會多一啲嘅思考。輕輕啲可能講笑講呢個同志老人院到，你作為一個同志，你結唔結婚，原來你結唔結婚會影響咗你之後照顧你嘅長輩嘅喎噉樣，同埋你人生如何規劃，你可能會唔會提前去開始諗下，你有機會係生老病死，你死嘅時候之前要做咩準備。噉順便都預告啦，其實Richard呢一集之後，我哋都會可能講關於死亡啦，講關於哀傷啦。好多人就因為死同哀傷呢一個連結，而好常對死亡產生恐懼，但係因為死亡亦都係人生必經階段，所以我會覺得我嘅節目希望係可以講到呢一啲真實嘅一面。

曾：係呀，又或者係比較立體一啲啦。因為Gender Studies係一個Dimension，噉我哋去睇一個issue，即係就純粹有限嘅知識入面，因為我first degree就係Anthropology。Anthropology就好多呢啲唔同導向去講，社會或者人我哋點睇呢個世界，噉所以好有意思。頭先你啱啱講嗰個point。

M：係呀，Anthropology就係人類學，其實我以前都有想涉獵到嘅，噉最後輾轉之後呢我就去咗度呢個性別研究。噉性別研究的確又真係我理解喇，喺亞洲嚟講，即係啱啱先開始有多一啲嘅研究學者去講關於老年嘅同志。喺呢段時間開始大家諗起同志會老呢件事，雖然聽上嚟有啲荒謬，但係都係一個好嘅觀察，有喺比較學術上或者係一般生活層面上面，都講關注老年同志都係一件好事。噉亦都即係希望更加多嘅同志，而家喺一個更加廣闊嘅，同埋比較自在嘅空間裏面，可以更加探索得到作為一個同志，作為一個性小眾，你係點樣可以將你嘅生活生命活得更加立體，同埋即係準備更加多嘅部分，噉樣啦。好，噉我每一集我都會講一個收結嘅部分嘅，噉我而家就講埋先。噉跟住就同正式完結呢一個節目喇。好，噉每一集我都會講一個收結嘅部分嘅，噉我而家就嚟喇。點知講同志係一個以香港同志角度出發嘅podcast，希望可以將大家生活裏面嘅性別，同志嘅議題用廣東話嘅聲音，同文字嘅方式保留同流傳嘅。呢一集可能拍得太早，但我期待我出得呢一集嘅時候，大家已經可以用到呢個專屬網站，噉就繼續去支持我哋嘅專屬網站。我發現呢，其實好多嘅一啲我喜歡聽嘅podcast，佢都會講呢，就係自己其實係一個冇非牟利嘅一個podcast，噉我都開始去講下呢件事。點知港同志係一個非牟利，冇一個非常龐大嘅資源支持嘅一個節目，我哋好感謝HerFund去幫助我哋去達成呢一個目標，但係與此同時，都希望更加多嘅人意識得到其實香港嘅同志嘅廣播資源都係唔多嘅，噉由以前嘅Gay Radio到近排呢一個節目，或者可能之後其他嘅一啲podcast其實都係得來不易。噉多謝你收聲呢個節目，而且聽到嚟最後，噉如果你想聽到下一集嘅內容，除咗訂閱我哋之外，歡迎你去分享俾其他人嘅。如果你對呢一個主題有共鳴，想分享你嘅故事，或者你嘅經歷俾我哋知，歡迎你去DM我哋Instagram，@Pridelabhk嘅。亦都歡迎你喺你嘅收聽podcast平台上面去留言，同埋俾星星嘅回饋。你嘅支持同埋鼓勵將會係我哋默默耕耘嘅動力。今集就講到呢度，非常感謝Richard，我哋第一次面對面就做呢個節目。喺我哋收結之前，有冇啲乜嘢想講呀，想宣傳呀，想俾其他人知㗎？

曾：冇乜特別，都係老土啲講句，多謝邀請，我覺得係第一次喺呢個，以呢個做主題，我係真係噉樣做個訪問，我覺得都係開心。

M：好，多謝你。好，保重呀，我相信呢一度，成個節目前前後後，有少少嘅咳嗽嘅聲音，我哋希望Richard快啲好翻，因為我前幾天都係噉樣咳，咳真係好難好，希望大家都身體健康。好，今集去到呢度，感謝Richard今次嘅時間，期待下一次同你點止講同志，我哋同聽眾講拜拜啦。

曾：拜拜。