多謝嘉賓主持Risto 同我一齊話當年，點樣靜靜上網聽同志節目。
記者甲果然係同行，把聲好入聲，同我哋娓娓道來起點Gay Radio嘅起，同跌。
中學雞嘅我哋就係咁樣，一集集去聽出社會嘅同志係咩模樣，嬉笑怒罵愛恨情仇。
每一集都係製作團隊花心思花時間嘅心血，即使無固定嘅資源補助，可能就係因為一個聽眾嘅回應就成為繼續耕耘嘅動力

【專訪自己人】跨代聽同志：起點 Gay Radio（Feat. 記者甲）

M：馬天娜

R：Risto

甲：記者甲

M：歡迎返嚟《點止港同志》，我係主持馬天娜。今集我又係越洋做呢個訪問，而今次訪問係有一個好長嘅 Story。頭先大家聽完呢個介紹之後呢，我終於夥拍我今季嘅客席主持，去訪問 Gay Radio 嘅主理人之一，記者甲。作為一個而家做緊呢個線上嘅語音節目嘅我，其實我自問覺得，訪問記者甲除咗係一種聽眾去訪問以前嘅節目嘅主理人嘅身份之外，亦都有少少好似同行嘅傾計嘅清談嘅內容噉樣。因為我哋兩者嘅分別呢，即係容許我而家去歸納下，有啲似係畀我哋用呢個聲音同埋錄像去分享多元嘅生活百態啦。呢句說話係引用返搵 Gay Radio 嘅時候裏面嘅一個描述嚟嘅。既然講到同行嘞，我哋兩個相信有啲共通點嘅，就係我哋嗰陣時係用業餘嘅身份去經營啦。請你去介紹下自己，分享下你同 Gay Radio 嘅關係，以及頭先我嘅問題係，你點樣用業餘嘅身份去兼顧呢件事呢？

甲：噉我係記者甲啦，你可以叫我 Henry 啦，或者甲甲啦，Whatever 啦。其實呢個係嗰陣時喺一個 Gay Forum，你知一啲討論區，曾經都有幾個比較大啲嘅同志討論區，噉就用咗記者甲呢個網名，噉就喺入面滋長咗呢一個 Gay Radio 出嚟啦，噉其實都係最初我哋幾位合作夥伴其實都係喺嗰個 Forum 出嚟嘅。而我嗰陣時其實開台係04年啦，噉之前呢我就係喺電視台做編劇呀，亦都有做一啲助導嘅工作啦。係嘞，所以其實本身對呢一類噉樣嘅藝術創作呀，都會好有興趣嘅。噉所以呢，即當大家發覺，不如試下玩吓一啲廣播劇啦，一啲廣播嘅節目嘅時候呢，噉就好開頭嘅時候都會覺得，大家真係試下分享吓生活噉樣，噉所以就，我本身係可以做啲 Programming 呀，諗下啲節目，搵吓啲主持，另外有啲拍檔執導，又可以做啲 Technical 嘅嘢，所以開始就慢慢開咗一個噉樣嘅台嘞。

M：嗰陣時你係已經辭咗你編劇嘅工作去做 Gay Radio，定係同時間發生嘅？

甲：嗱，冇可能辭咗份工作去做呢樣嘢嘅，因為呢個係燒錢嘅工作嚟，哈哈，燒錢嘅興趣，如果你冇工作嘅話你會死嘅，除非個天會跌啲錢落嚟畀你嘅啫。噉其實都係錢嘅問題，所以先至後來要離開 Gay Radio，噉亦都去到後面 Gay Radio，即係完結嘅時候，都係因為我諗錢嘅問題囉。呢個遲啲先至有機會慢慢講啦。

嗰陣時其實我係99至03年，我喺 TVB 嘅嗰陣時，然後呢就離開咗我轉咗工，因為發覺都幾辛苦嘅 TVB 份工。同埋我覺得始終唔可以長做，要學嘅嘢都學咗，要感受嘅嘢都感受咗嘞，噉就試下做下一啲其他嘅工作啦。嗰陣時我係做緊咩，嘩，好無厘啦更，做緊啲遊戲機 Promotion 噉嘅嘢啦，噉所以其實都係返工嘅時間，就係返工啦，放工嘅時間呢就開始搞一搞電台嘅嘢嘞。噉當然嗰陣時個規模就冇後來咁勁嘅，噉開頭都係得嗰幾日節目，噉啲主持都係比較真係幾業餘嘅其實，所以同埋，我諗你諗下，嗰陣時其實錄音嗰啲嘢，全部都比較簡單啦，係，噉就冇後來又有晒啲 Panel 呀，又有電腦，又可以 Streaming，又冇咁多嘢㗎嘞。

噉但係都係擺上去，就等大家可以聽下噉樣啦。但係…噉真係放工時間 Weekend 嗰啲，其實都擠咗啲出嚟㗎嘞，噉當然冇後來咁誇張嘅，係啦。噉所以慢慢用呢個，自己有份正式嘅錢，然後就 Throw 落去嗰度，開頭都係好 Minimal，冇諗住咁大個…掘咁大個坑比自己跳落去嘅。

M：頭先講到就係一個燒錢嘅興趣啦，我真係實在只能夠虛擬地係噉扤頭啦，因為我唔係話我自己燒緊錢，但我啲錢呢係來自一啲 Funding，佢先可以容許呢一個 Podcast 有得以去繼續嘅，即係例如，而家聽眾們聽到嘅呢一支 Mic 呢，都係 Funding 裏面畀錢我去買嘅。

甲：係呀，有 Funding 係好緊要嘅真係。

M：係呀，有 Funding 係非常之重要呀，所以真係聽到呢度嘅聽眾們唔好以為話，我哋肯定係自己有啲好犀利嘅工作呀，我工餘嘅時間得閒冇嘢做先過嚟做啲噉樣嘅節目，完全唔係噉嘅 Story。

頭先聽到記者甲你又話你哋比較陽春一啲啦，即係比較土炮一啲噉嘅 Setting，可唔可以描述下當時你哋係點樣嘅架生去做到呢啲節目嘅呢？

甲：最初最初其實係一支 Boom mic 啦，即係 Directional mic 啦，噉然後就駁落去個電腦嘅啫。最初係噉樣嘅啫，噉最多係加塊絲襪網嗰啲呢，同埋隔下音。冇㗎嘞，真係好陽春噉，然後有啲係畀卡式帶我哋呀，有啲節目係，係呀，真係噉嘅陽春法囉。噉或者電腦 Mic，電腦 Mic 就算㗎嘞，冇我哋而家呢啲 Mic 咁靚㗎嘛，USB Mic 喎，邊有啲噉樣嘅嘢嘅，真係。

M：係呀，而家啲人可能容乜易喺條街度可以買到啲網紅 Mic 噉樣，即係每個人都可以好輕易買到一支 Mic。

甲：係呀，即係冇科…啲科技冇咁發達嘅時候，就啲嘢就貴啲囉，噉想再專業啲，就會貴好多囉。即係而家，係呀，而家你呢啲我諗都算陽春㗎嘞其實，對於其他嗰啲咩網紅或者真係好勁嗰啲 Podcast 嚟講。但係我諗而家…即係我諗以前用緊嘅就係可以大家入門級嘅嘢囉，因為最想都係啲網友佢哋自己可以做到節目，用到佢哋最容易做到嘅嘢，噉就算㗎嘞。如果你要求佢又特別去買支 Mic 呀剩呀，噉佢就唔會幫你做㗎呢啲嘢。

M：我非常之同意呀，真係而家我自問，我而家之前嗰兩季，我都係喺間房度，自己攞一支網紅 Mic，然後噉樣錄音。或者同其他越洋嘅嘉賓去有呢個 Mic。有陣時可能係用呢個 iPhone Mic 噉樣拎住噉樣。其實都可以嘅。

甲：iPhone 都 Ok 㗎嘞，唔差。

M：都 Ok 㗎，哈哈！即係而家啲人都可以攞呢個 iPhone 去拍片啦，iPhone 嘅威力呀不可小看呀。噉頭先你又有講到，話即係其實啲人係公餘嘅時間去約個時間出嚟錄音啦，你哋嗰陣時有冇話即係用咩方法去協調呢個 Schedule，或者定係話你哋逢星期六嘅三個鐘噉樣。

甲：通常如果錄節目呢，因為最初即係04年嘅時候呢，即係講返好初期嘅時候，其實佢哋自己，即係主持有主持自己嘅嘉賓啦，或者話題啦，噉佢哋自己約嘅啫，錄完就寄畀我，係嘞。噉有啲就自己一個人，真係 Talk show 噉樣嘅啫，噉所以嗰啲佢都係錄完畀我就算㗎嘞。唯一比較多嘅係，嗰陣時有套廣播劇啦，叫《貓朋狗友》啦，其實就係我之前喺另外一個 Channel 做嘅一個，即係同名節目嘅訪問嘅衍生品嚟嘅。噉因為你知我寫開啲劇場呀，噉不如玩下呢啲啦，幾開心。噉就學似你講嘞，真係約個時間，噉通常禮拜六係最齊人㗎嘞，噉就約晒嚟，噉就錄音啦。係啦，噉嗰陣時套戲都簡單嘅啫，都係幾個人…就冇呀，叫做聚吓開心吓，噉都係比較輕鬆啲嘅。

係啦，噉去到第四五集開始就人多啲，就開始用返少少喺 TVB 學返嚟嘅呢個 Run down 大法，就開始壓縮下大家啲時間啦，你錄完就好走嘞，間屋比較細啲，係嘞。噉或者係將嗰啲人嘅要錄音嘅時間壓縮咗，就你三點到五點錄晒你啲嘢先，係啦，然後我再剪返埋一齊噉樣嘅做法啦，所以大家都係輕鬆啲嘅。

M：係，呢個 Division of labour 之後人多嘅時候，就需要應用落去。我都有期待吓之後可以有多啲人強馬壯，喺周圍附近可以多返啲人噉樣一齊錄音。我都覺得都希望可以噉樣慢慢發展落去。

頭先你一開始講話呢個 Gay Radio 成日都圍繞住錢嘅一個問題，不如我哋講下錢啦。冇錢呢我哋呢個節目都唔會出現㗎嘞，我哋除咗一支 Mic，我哋仲要自己嘅時間，呢啲係一啲有形同冇形嘅 Cost 啦。除此之外，我哋亦都需要可能一啲平台嘅費用，例如我哋錄製呢個會議，我哋都需要買咗個 Plan，我先可以錄製得到嘅。跟住呢，我哋亦都需要儲存嘅空間啦，噉儲存空間唔係天跌落嚟㗎嘛，我哋雲端都要錢嘅。噉種種嘅所有嘢，例如話之前我哋 Gay Radio 都有網站㗎嘛，噉嗰啲都要儲存費㗎嘛，所有嘢都係錢嚟㗎。即係對於 Gay Radio 嚟講，對於你嚟講，錢嘅影響力有幾大呢？因為走到，最後你哋都係因為錢嘅問題而結束。

甲：我諗開頭呢就其實主要係，即係我啦，噉同埋即係一個拍檔啦，Ex boyfriend 啦，唯有噉講，大家投入嘅錢比較多啲嘅，噉後來呢就同呢個小童群益會有啲合作啦，噉仲有呢個香港愛滋病基金會啦，噉就有…都有少少收入嘅。始終你哋話你哋有 Funding，噉有長期嘅 Funding 會比我哋呢可能一個 By project 噉樣嘅錢呢，會嚟得穩陣啲啦，你嗰啲…我哋嗰啲就真係話有就有，話無就冇㗎啦嘛。噉所以即係學似你講網站營運時間，我諗時間係好緊要嘅，譬如我而家做緊 Freelance translator 啦，譬如我頭先都係，即係訪問之前我都係做 Job 㗎，噉嗰啲時間都係錢嚟㗎嘛。噉但係譬如我而家係溫哥華搞緊溫哥華街坊會嘅時候，嗰啲時間其實都係無形嘅錢嚟，雖然我冇使過錢出去，噉但係我啲人工，我去嘅鐘都係錢嚟㗎嘛。我諗其實主要係當個 Partner，有一段時間係個 Partner 佢失業啦，冇嘢做啦，噉變咗得我一個人去，即係靠一份糧去頂兩個人嘅生活，再頂埋啲租，再頂埋其他嘢呢，就頂唔住㗎嘞其實好快就。噉呢個 Cycle 都重複咗成兩次，係嘞。噉重複到第二次嘅時候呢，就真係冇辦法啦嘞，因為第二次太耐啦。係呀，噉唔想去到太 Detail 嘞，但總之去到後面係，噉08年係一個轉捩點嚟嘅，因為我哋搬咗去一個真係有個 Office 嘅地方啦，喺嗰陣時喺邊度呀…河畔（編按：沙田的一個屋苑），係啦，噉就佢喺二樓平台呢，就有個千八呎嘅空間，就原本係用嚟租畀啲補習社呀，噉類似噉樣嘅嘢，就好意外發現到有噉樣嘅地方。然後跟住我問恆基，因為恆基係業主呀嘛，問佢幾多蚊一呎租，係啦，幾多錢一呎租，五蚊，噉就計過條數，千八呎五蚊租都幾抵啦其實，即係九千蚊呀 Around，係啦，噉其實唔貴嘅。噉諗住兩份糧，跟住有啲廣告收入，間唔中有少少…加多少少啲噉樣嘅，即係 Funding 仔噉樣啦都 Ok 啦。

但係點知不從人願啦，只得返一份糧，然後多謝黃成智啦，搞到我哋冇咗《基場超新星》啦，噉嗰啲錢呀噉。所以都係好多嘅唔同嘅問題，令到後面夾到真係冇辦法支持落去囉，即係你點樣去貢獻，你點樣有心都冇辦法。同埋始終我會幾羨……即係你話講開呢啲我會幾羨慕，譬如梁兆輝（編按：曾擔任香港電台唱片騎師DJ，主持同志主題電台節目《自己人》17年）佢哋佢係鐵飯碗開住 Mic 噉同你…同你一齊做嘅時候，你冇辦法夠佢做嘅其實。係呀，噉所以冇計啦，呢個都係唯有告一段落囉，始終我諗付出去到某個位都係要停，噉所以…唉！哈哈。

M：哈哈，唉！用一聲「唉」去總結咗真係成個 Gay Radio 喺我哋香港嘅同志語音嘅節目嘅歷史裏面嘅一個，好明顯嘅一段百花齊放中間嘅一個支節。係呀，我哋而家好似覺得所有嘢呀，睇直播呀，睇 Live 呀，總之我撳個掣噉我就睇 Live 啦，唔睇我咪走去第二個台囉。但係其實喺當時候，可能實體嘅空間係好重要，噉你租…噉你租就係硬食㗎啦噉。所以即係從而家呢一刻啦吓，例如我而家要租呢個地方，呢個地方唔係我嘅，呢個地方其實係一個我啱啱畀咗錢，新鮮滾熱辣畀咗錢要租嘅一個會議室嚟嘅。噉點解要會議室呢？因為本身住嘅嗰個地方佢 WiFi 又麻麻地啦，噉可能又咁啱附近有鑽牆啦，我為咗要避開晒所有呢啲噉嘅噪音，我自己都要即係畀錢，畀住錢要做呢啲。即係想講嘅係每一個我哋想做呢啲節目，想表…即係想 Express 畀聽眾們聽到嘅東西，其實背後有好多嘅 Costs。

其實好老實講我哋今次呢一啲節目都係 Project based 嘅，即係我哋係一年計一年計，噉我哋去投，即係寫 Proposal，噉中咗噉我哋咪有錢囉，但係如果唔中嘅話噉可能我哋就冇錢㗎嘞，噉跟住變咗做可能我要自資呀噉樣。所以即係講到脈絡去，其實我覺得無論係 Gay Radio又好，《點止港同志》都好，可以睇得到一樣嘢，就係香港嘅同志要製造一啲節目，常規嘅節目係需要一筆固定嘅資金，而目前嚟講係冇一個好清晰嘅嘅門路去俾我哋得到噉樣嘅支持同埋補助囉。

亦都可能有人講話「問政府攞囉，而家政府唔係有啲咩 Proposal 呀可以寫落去」，但係寫落去嘅時候，你都要睇下你同時都有競爭者㗎嘛，你嘅競爭者做緊啲咩嘅時候其實都…即係頭先你講到黃成智呀，噉黃成智呢啲反同嘅勢力其實都不能少看啦吓，我都唔好講到好明白㗎嘞，佢哋亦都做緊一啲差唔多嘅事情呀，語音節目其實佢哋都有得做嘅。

甲：會唔會諗做 Patreon 呀你哋，啲Subscription呀。

M：但我哋想賣咩先？我唔賣得肉㗎喎。

甲：唔係，噉 Patreon 咪聽你啲節目囉，係咪？Support support 囉，可能聽多三十分鐘後係啲免費都聽唔到噉樣呢，畀…進貢下呢，每個月。

M：可以嘅可以嘅。我哋可以參考下某啲網台佢哋可能係上三十分鐘就係直播嘅，跟住呢下三十分鐘呢就係畀會員嘅。

甲：係嘞，或者係可能係總之有啲特定 Content 係畀佢哋㗎啦。我哋嗰陣時冇 Patreon 呢噉嘅嘢㗎嘛，係咪？呢個你哋可以多咗好多唔同嘅花款。同埋我覺得你話你哋而家係 Podcast 啦，其實我哋嗰陣時最初諗嘅時候呢，即係講返 03、04年嘅時候呢，其實嗰個 Idea，其實就係而家嘅 YouTube 嚟㗎 Somehow，因為我哋想做 Video，想做 Audio，亦都係想擺喺上面畀人入嚟聽㗎嘛，噉 Somehow 其實咪等於而家，即係你哋嘅 Podcast 或者之後嘅 YouTube 噉樣囉，係呀，噉只不過佢哋，當然 Google 梗係，個 System 呀其他嘢我哋冇得比啦呢啲嘢，但係個 Idea係喺度嘅，即係我哋係比之前啲人行前一步囉，因為我諗嗰陣時你話網台呢，都係跟返 Schedule 㗎嘛，5點至7點又唔知播咩節目，跟住我嗰個Channel 都好正，尤其是我之後去 Join 人哋嗰個 Channel 係，唔知9至11係啦，噉就一定要係星期四嗰晚，就嗰兩個鐘就要畀佢直播，然後佢就 Loop12次嘅，係嘞。噉佢就話自己24小時廣播嘅。（笑）係嘞，好得意嘅，每個禮拜都要趕節目嘅，我就唔鍾意噉樣嘅其實，噉所以先至話不如搞個自己搞個台算啦，我鍾意兩個禮拜又得，我鍾意三個禮拜又得，我鍾意一個禮拜都得，當然唔得啦，係啦，冇時間做啦。噉就跟住擺…開頭就係擺喺個定點畀佢哋 Download 啦，有個 Server 先嘅，畀佢哋 Stream 嘅。係啦，噉然後呢就開始畀佢 Download 嘞，即係話將個 Server 再擴大啲嘅時候，噉就方便咗，其實同你哋而家，即係你話 iTune 呀嗰啲一樣咋嘛，不過我哋行先幾步囉呢啲係…幾好玩嘅。

M：係呀。等陣 Risto 會講下呢一個 Streaming 嘅嗰粒掣，嗰粒掣係我哋嘅…

R：記載住啲當時嘅身份認同、認識呀、青春悸動呀，真係不得不提。

M：係呀。噉頭先 Henry 有提及過呢個，即係類 YouTube 嘅一個構思啦。噉又不得不提到呢嗰陣時，即係係我哋嘅回憶嘅一部分啦，就係呢個廣播劇嘞。噉嗰陣時你哋又…即係 05年就做咗一個廣播劇，網絡廣播劇叫做《只能曖昧的暗戀》啦，噉後尾又同葉志偉，又合作將同志小說呢個《突然獨身》，係啦，就推出咗呢個同志網絡劇，《我和他的99天》。噉我又想問一問即係，係點樣 Gen（Generate） 到呢件事出嚟嘅呢？

甲：其實嗰陣時我本身都有寫小說㗎嘛，噉 05年呢就係我出書嘅時間嚟嘅。係嘞，噉呢個其實就係我用嚟做一個 Co-promotion，諗住做一個宣傳，係啦，徵下文，然後就送書嘅一個比賽，噉獎品呢我係冇錢、冇獎品畀嘅，就話我幫你整套廣播劇啦，就有套廣播劇嘞。

但係嗰陣時其實佢嗰個…嗰篇文係千五字，然後佢再交咗個五千字畀我，然後我就將佢拆咗做七集噉樣去做嘅。做咗次 Casting 啦，都幾好玩嘅，開頭諗住係Cast 唔知有冇十零人嚟呢，結果嚟咗四十個。係啦，噉嗰次幾成功啦，因為我諗第一次啦，即係叫做大規模嘅一個廣播劇嚟講，我哋都用盡晒我哋嘅資源宣傳啦。另外套片套戲本身我好鍾意嘅，因為我哋剪嘅時候係剪得好…點講呀，好細緻囉，個音個聲啲背景嘅…我諗而家其實我有擺上 YouTube 嘅，你可以去聽返呢，其實啲音效嗰啲嘢呢我哋電影規格噉做嘅，做得好細，做得非常細。其實用音效可以係做到套戲囉，因為你聽到譬如有啲廣播劇呢，係好粗㗎嘛其實係，好明顯聽到佢哋剪埋一齊嘅，噉我覺得唔得噉樣囉，我覺得係要稍為剪得靚啲，錄得靚啲。噉嗰陣時係買一支靚 Mic 㗎喇開始，係嘞，噉啲嘢全部都開始 Upgrade 咗，噉慢慢去做嘅時候呢，噉個效果非常之好。噉我諗雖然出嘅 Schedule 唔係好穩定，因為冇時間，你要返工，係啦。但係之後呢就變咗都得到葉志偉佢哋注意啦，噉有一次食飯佢哋話：「阿 Henry 呀，你有冇興趣幫手去改編佢套劇呀？」噉樣。噉我話，咦，我一頭我都諗過，跟住佢自己提出嘅時候，我梗係「好呀，好呀！」係啦，噉然後就，係啦，噉就入咗套戲嘞。噉嗰次仲好玩啲，嗰次我哋 In 咗幾人呀？In咗差唔多百人，開咗兩日，噉都搵到晒我哋需要嘅演員啦，尤其是你知入面有個人，嗰個半唐番…係咪 Jason 呀？咩名呀？唔記得嘞，係 Jason 呀，噉嗰個係要半唐番呀嘛，噉你要搵一個真嘅半唐番先會做得似㗎嘛。噉而真係有一個真係半唐番，噉雖然佢啲廣東話真係麻麻地，係啦，噉啲戲都係麻麻地，但係 Anyway，Do the job 啦，唔需要夾硬扮啦。因為我記得以前有啲其他戲呢，即唔係我呀，人哋嘅戲呢，冇女人呢，佢就搵個男人，擠高把聲扮女人呢，呢個係冇辦法接受到㗎，呢個係完全得呀。

所以我哋係搵齊腳先做得，噉我哋個要求好高喺呢方面…係呀。噉 Run down 大法今次真係好有用嘞，因為人多呢，你真係要將我哋錄音嘅時間呀、日子壓縮到，因為我哋 Weekend 有限呀嘛，通常都係 Weekend 錄音呀嘛，噉所以你話錄…嗰次有幾多集呀？八集，九集。係啦，噉盡量都係攞個心出嚟囉，因為我知啲人鍾意聽，聽完之後大家又有啲共鳴嘅時候，即係能夠喺一個噉樣嘅，Back to 嗰個年代，嘩好耐，差唔多廿年呀，去到十幾廿年前，同志冇咁多，生活上個空間比而家少好多啦，噉亦都冇咁自由啦，比佢哋有一個同聲同氣嘅感覺，可以利用到網上嘅世界去 Connect 到呢，呢個我哋…即係透過佢哋嗰啲留言呢係感受到嘅。開心，我哋開心嘅，Somehow 都係呢樣嘢 Keep 住我哋去前進啦，噉尤其是去到後面去網劇嘅時候，就更加多嘅反應啦，因為我諗第一套。我諗呢個年代啲人可能比較多知道嘅係咩嘅嘢，Hehe 嗰套咩呀？係喇，《我的HEHE室友》。好似而家仲有一套再新啲嘅 BL，唔知咩 BL 我聽到見到啲新聞，好似又有啲第三代嚟緊嘞。噉我哋算係第一代啦，見到好多嘅留言係話睇完套戲，終於都對自己出櫃嘞，佢話佢40歲，對自己出櫃喎。呢個係幾匪夷所思嘅對我嚟講，因為我嗰陣時20歲都已經即係被出櫃啦，我同…即係喺屋企，噉然後我喺公司都出咗櫃嘅 Somehow，嗰陣時我喺 TVB，所以其實我對自己嗰個性向、身份認同就冇乜問題囉。噉但係其實身邊都好多人，即係匿喺衣櫃囉，甚至而家呢一刻，其實好多譬如我嗰代，或者…你哋而家少啲啦，你哋嗰代，但係我諗 40 開外嗰啲仲係好多都係未認同自己。噉所以當嗰陣時佢哋噉樣講嘅時候我覺得，咦係喎，我哋都做到啲嘢㗎喎，都幫到人㗎喎，噉 Keep it going。

M：Risto 係咪要補充下你講嗰個聽廣播劇嘅東西？

R：大家好，我係 Risto，噉我點解會喺呢個節目度出現呢？因為本身都係一個 Long story 嚟嘅。噉我就同馬天娜就識咗好耐啦，係大學嘅同學。噉但係機緣巧合呢噉就傾返一個，即係頭先有講過啦，就係對於 Gay Radio.hk 呢一個節目嘅一個回憶啦。噉頭先呢就已經聽咗馬天娜同埋記者甲啦，呀 Henry，即係作為一個同行嘅互相分享啦，噉我就想換一個視角啦，我作一個聽眾啦嘅一啲回憶啦，同埋一啲睇法啦，噉同埋仲有一啲好奇，噉就想問返 Henry 嘅。噉頭先呢就有講到幾樣嘢啦。噉我想首先講就係一個好專業嘅製作。噉我自己聽返係嘅，因為共鳴一嚟就係個台號啦，就係「起點同你同聲同氣， Gay Radio.hk」啦，噉我想知呢個嘅台號其實係點嚟嘅呢？同埋呢個台號有冇中間有啲變更過？因為之後我就，就噉聽應該就冇嘅，但係有冇，即係好似其他一啲公營機構，或者其他啲電台、大氣電波，噉佢哋會轉下台號呀，轉下主題呀，定係都唔係㗎，我由始至終都係，Target 都係同你同聲同氣呢？

甲：好，個台嘅口號係冇變過嘅，係嘞，呢個就係我哋由頭用到尾啦，真係冇變過。因為我諗同聲同氣呢個係，我諗唔會變嘅嘢嚟㗎嘞，因為我諗，同志電台點解係叫同志電台，因為我哋係同志呀嘛，噉如果我哋唔係講，即係同志出發點嘅嘢，噉其實就已經唔係我哋自己嘅，唔需要聽啦其實已經，都唔係我哋嘅台嘅話。噉嗰陣時叫「起點」係因為，大家一齊出發嘅起點囉，一齊希望可以透過一個網台…因為最初反而好得意嘅，最初係冇 Gay Radio 嗰個字嘅，後來06年先至擺落去嘅，唔係，05年，係嘞，05年擺落去嘅。點解呢，開頭係一班同志自發去搞一啲，即係興趣為主嘅電台啦，噉但係搞下搞下其實，講嘅嘢好多都係同志嘅，出發嘅生活嘅。譬如有個節目第一集，已經講話去呢個泰國，旅行去啲同志嘅地方，跟住開始搞下搞下，就有個小小爭論，內部就話，係咪應該加個 Gay Radio 呢？有啲人話太 Gay，噉究竟邊樣先至係呢？但係當然我哋覺得，即係歷史證明咗，就係我哋想行嘅，就係想行 Gay Radio 嗰條路囉。噉所以先至變咗係，即係成個網站嗰個名，就變咗係「起點網播平台」，跟住 Slash，跟住就一劃 Dash，噉就 Gay Radio.hk，噉就係成個 Full name 係噉樣，噉就主要用返Gay Radio.hk，因為始終你要個 Website 容易入去呀嘛。

R：冇錯，講起呢個 Website，點解當時，即係作為一個聽眾啦，當時我都初中年紀啦，噉就喺個 Keyboard 上面，都當時算係啦，噉就喺個 Keyboard 上面，就撳呢個網站嘅 Address，就係好緊張嘅，跟住入到去，係有一種，嘩大開眼界，蔚為奇觀。因為當時我，因為頭先聽 Henry 講，即係有幫助到一啲同志嘅啟蒙，認識自己，噉呢一個件事都係有發生喺我身上嘅。嗰陣時…要形容下個網站界面畀一啲可能冇聽過、冇睇過嘅聽眾知道啦，噉其實就係一個白色底色嘅網站啦，噉然之後呢噉就會有上下嘅 Bar 嘅。噉上面條 Bar 呢就係一啲 Menu 噉樣啦，就係會有一啲聲音節目啦，噉然之後有啲影象節目啦，噉然之後有介紹 Gay Radio 啦，噉同埋就有個討論區啦。噉而中間呢就係佢一個，一啲主頁噉就係佢嗰個內容嘅一啲主題啦，亦都隨住你撳唔同嘅節目就會有唔同嘅內容顯示啦。噉而最底呢就會有個 Toolbar 嘅，噉就會類似現在你某啲電台即係撳入去嘅時候就會有啲 Toolbar 嘅點播噉樣啦。當你撳到入去一個聲音節目噉為例啦，噉佢就會有一頁呢就係好多個正方形嘅 Icon，噉然之後就係有啲似好似 iPad 放咗落電腦噉樣嘅，就會見到一粒粒 Icon 啦，噉下面就有節目名啦。噉你就可以從呢個節目名去窺探下，大概講啲咩嘅呢？噉而作為一個 Lesbian 啦，噉我自己呢當時最鍾意聽嘅節目呢就係《凹凸女流》啦，噉我就唔知 Henry 有冇…應該都有印象啦，噉就係由四個女主持噉就一齊做，噉有分兩 Part 嘅。噉呢就係用將 Gay Radio 嘅兩大特色呢就完美噉融入咗喺個節目度。

噉呢第一 Part 呢就係一個廣播劇啦，叫《女流與狗》啦，噉就大概故事就係講四個 Lesbian 啦，噉佢哋同一隻狗仔，都係有人配音㗎吓，噉嘅故事啦，噉然之後就係好溫情嘅，噉就好好笑嘅，噉就四十零集嘅。噉然之後第二 Part 呢就會有一個，叫做《女流 Hot Chat》，希望冇記錯，噉呢就會係有四個，都相信聽把聲都係年輕嘅主持啦，噉就喺度講下啲 Lesbian 嘅一啲生活上面嘅小事啦，或者係一啲會面對嘅問題啦，例如出櫃啦，例如出軌啦，例如可能係結婚呀、生BB呀。噉其實呢啲 Topic 呢，擺到嚟而家都可能會覺得好過時啦，對於當時嘅我，或者可能一啲聽眾嚟講，就好新但係又好貼身嘅一件事就係，原來我唔係淨係得我一個係噉樣㗎喎，原來係好多人都面對緊呢個問題。所以當時我就係節目一啲唔同嘅 Frequency 嘅嗰個更新啦，噉可能係以《凹凸女流》為例啦，我冇記錯就應該係一個禮拜一集嘅，噉呢佢就會有個去到佢個頁面呢，噉就會有一條黑色嘅細 Bar 啦，噉啲掣都好細粒嘅，噉就有個好細嘅 Play 嘅播放掣，噉你撳入去呢，真係好細粒㗎，噉你就可以聽到，突然間就會有啲好似電台節目噉樣啦，噉然之後就會有啲 Jingle 啦，即係一啲音樂呀一啲…我記得就冇 Teaser 嘅，應該就係 Jingle 噉樣就入㗎嘞。噉然之後就去講啦，噉跟住之後就會叫你又起台號啦，噉然之後完咗節目噉樣就係嘻嘻哈哈呀，噉樣啦。噉我就會覺得，嘩好自己係一份子呀，雖然我唔識嗰四個主持，當時亦都唔識 Henry 啦，純粹就見到有呢個網站就會覺得，好開心喎，每日放學就會好期待，撳個 Refresh 噉撳入去睇下有啲咩。

噉所以作為一個聽眾，係好感謝即係 Henry 啦，同當時嘅夥伴啦，噉同埋一啲主持啦，即係佢哋去分享自己嘅諗法啦，去規劃呢啲咁唔同嘅，策劃唔同嘅節目啦。呢個就係我當時嘅一啲經歷啦。噉另外都想簡單講下，仲有咩節目會都係好特別嘅，譬如可能係《姐妹同志口水房》啦，頭先都提過係一個好長壽嘅節目啦，噉亦係年長少少噉嘅一啲 Lesbian 去分享一啲生活嘅嘢啦。噉仲有好多 Gay 嘅節目啦，或者係有啲文藝嘅節目啦，噉頭先廣播劇都有講過，噉仲有啲係同志新聞啦噉樣。噉我講咗咁多我唔係想逐一介紹嘅，噉我純粹就係會希望話畀大家聽，嘩係好豐富㗎當時，即係喺聲音嘅節目上面，即係可以媲美一般大氣電波嘅。噉但係呢頭先有提過啦，噉個台呢就 04年正式開啦，噉但係其實 06年呢就香港電台嘞，公營機構鐵飯碗啦，《自己人》就登場啦。噉其實有冇話即刻令到你啲聽眾 Draw 走咗呀？即係一啲競爭嘅關係。

甲：噉唔關事嘅，因為其實個聽眾群其實有少少唔同㗎，我覺得。因為我哋其實自己嘅節目仍然係有個收聽一路上緊啦，噉所以我諗，即係時間我哋都好浮㗎嘛，我哋係隨時聽得，隨時 Download 得，噉佢嗰個時間都係要…係咪禮拜六呀，唔記得咗啦，Anyway，噉就係嗰個時間去聽，唔知佢哋有冇得 Download 啦嗰啲嘢。其實唔存在啲乜嘢嘅競爭囉，但係啲人係會攞我哋嚟比較嘅。啲人係會攞我哋嚟…開頭啦，我諗去到你嗰個年代，即08、09年，啲人就開始攞「903」嚟比較嘞，因為啲主持啲年紀開始再跌緊啲啦，即慢慢開始後生返啲。因為其實女流呢，點講呢，都係唔好打破你幻想啦，都唔係個個咁後生嘅其實，哈哈！

R：我聽落去好後生㗎！

甲：聽落去好後生。

M：姐姐，但 Anyway 都對我哋嚟都講係姐姐啦。

甲：係，有啲大姐姐嚟嘅，係嘅，噉都幾有趣嘅佢都。噉所以其實開頭我係一個，點講呀，我諗住係一個互相互補嘅關係啦，我會覺得係自己好 Wishful thinking 係噉啦，因為嗰陣時佢想我哋搵人，搵啲嘉賓畀佢。噉我哋都話好呀噉幫下手囉，無乜所謂嘅。係啦，大家都係叫做，即雖然大家都係電台，噉我覺得大家嗰個路向有啲唔同。始終我自己噉睇，人哋又未必噉睇嘅。因為去到後面，《99天》去到宣傳嘅時候，我話噉我哋可唔可以上嚟做下宣傳呀，跟住佢就話啦，又唔係太方便呀，因為大家都係電台。噉我話收到，嗯，哦，OK，噉囉。噉所以就係個關係就係噉啦。

R：如果話講即係唔完全，呢個競爭關係算唔算存在呢，呢個可以就可圈可點啦。噉無可否認係真係行得好前嘅，都聽到頭先 Henry 講話係年青啲啦，有冇啲聽眾一啲數據可以分享下？有冇話係咩年紀多啲呀，即或者係，係男同志多啲，女同志多啲？或者係都有一啲直嘅聽眾去聽㗎？

甲：我諗每樣都有啲嘅。因為其實我哋啲主持呢，你記唔記得嗰陣時咪有個《巨根．格．鬥場》呢，念慈係直女嚟㗎嘛，講 GV 呀，講好多，講 Porn 嗰啲，噉我諗冇乜嘢節目而家真係走去講 Porn，你話同志嘅 Porn……都係得我哋啦，我哋其實真係走得好前嗰陣時。點講，我覺得係最緊要 Open 囉，我哋自己都唔 Open 嘅話，冇辦法可以做，噉所以有啲乜嘢嘅 Idea 嚟到同我傾，或者我自己諗到，有人肯做嘅時候，你就去啦。反正都唔需要，又唔需要對啲收聽負責，又唔需要對廣告商負責，所以收聽好當然開心啦，噉收聽炒咗噉我都覺得冇所謂啦。有啲嘢我覺得係要做嘅，即係悶嘅嘢係要做嘅，但係，爆嘅嘢當然可以做，當然你去到排節目嘅時候你就會見到其實我哋係有啲，即係可能有啲承托，可能一個冇咁受歡迎嘅節目，擺喺受歡迎嘅節目嘅上面等大家望多兩眼，希望佢去撳落去啦，噉嗰啲我哋都會做啦。噉然後呢，就《99天》之後呢就多咗好多人嚟 Interview 嘅，嗰度可以有啲數據，大嘅可能有啲四五十歲嘅嚟 In 啦，細嘅呢有阿媽陪個著校服嘅女仔嚟 Interview，係啦噉我都 Odd 咗，嗰下我都已經，咦，哈哈，應該 14歲呀，好犀利。係呀，噉所以個 Range 係好大囉，噉但係我諗 08年嗰個平均主持個年紀可能三四十啦，噉然後去到09、10年嘅時候就已經一路去到差唔多二字頭㗎嘞，因為有《快樂零聲》呀個個堆，其實嗰啲已經係二字頭啦，噉去到《GR學園》嗰啲即係十幾歲㗎咋嘛，即係阿 Nardo 呀佢哋嗰啲十…嘩嗰陣時第一次收佢入嚟嘅時候，15歲未成年呀，真係睇住佢大呢啲，好驚。係呀，佢哋真係去到嗰輩呢佢哋就真係好搏囉。佢話，「阿佳文，可唔可以一個禮拜做一集呀？」我話好呀。因為我自己通常同啲人講呢，你兩個禮拜做得一集畀我呢，好開心㗎嘞已經，正常嚟講。因為女流…《女流》好似係，一個禮拜，得唔得呢？佢好似都係兩個禮拜，一個禮拜佢哋做唔到。係呀，噉但係錄音呀嗰啲就喺我哋度做嘅，嗰陣時有晒 Panel 㗎喇，基本上05年之後有晒齊 Panel，但係錄音都係喺返晒我哋度做，後半段就佢哋自己做囉。但係啲創，即係創作方面嗰啲嘢呢，噉主要就開頭我哋一齊搞啦，後來就佢哋慢慢就自己自立，做得多少少佢哋嗰邊嘅嘢囉，因為我哋自己都 Keep 住要開啲新節目呀，所以其實你話，女同志嘅節目其實都唔止頭先嗰兩個，仲有其他嘅節目噉，希望可以叫做有唔同嘅年齡層啦，或者唔同嘅興趣啦，BL 嘅又有啦，跟住有個講乜鬼嘢，講…我拉咗阿媽落去講泰文啦，哈哈！好好笑，呢個好癲。跟住《性在夠吉士》啦，呢個又係超長壽啦，噉但係你話，《姐妹同志》呢我都好鍾意呢個節目嘅，噉同埋我都好開心係，係呢個真係喺呢個土度挖返佢出嚟呢，因為其實嗰陣時佢已經跟住個「Radio Republic」摺咗㗎啦嘛，2000年呀，隔咗四年掘返佢出嚟。我開頭打歐小姐噉樣呢，跟住「Hello 歐小姐你個節目仲可唔可以攞出嚟播呢？」，好生外呀，因為通常嗰陣時係全部都係自己 Friend 嚟㗎咋嘛，或者係自己同一個 Forum 嘅人嚟㗎咋嘛，即係出去外面搵個女同志係未試過，噉唔知合作得點，或者係話「我退隱嘞唔做啦」噉樣。噉但係佢又真係好嘢喎。即係我開頭嗰四十集都係我幫佢剪返啦，因為佢開頭播佢比我嗰啲 Archive 係可以再剪緊啲嘅。即係我諗我對於整 Talkshow 要求都好高啦，你譬如你聽《女流，聽嗰啲其實錄完之後我仲會後製嘅，即係我會將佢哋剪得緊少少，或者有啲係 Dead air 嗰啲呢我會剪啦，或者有啲剪到好似有少少疊聲噉呢，真係好似好緊湊噉樣呢。噉嗰排係人手唔夠，自己又要求太高嘅時候就剪到好夜，即係呢個時候我仲喺度剪片嗰啲呢，噉有啲變態嘅其實。後來多咗幾個人剪就好啲囉，噉但係啲人我諗做電台其實全義工呢，點解話梁兆輝佢哋著數啲呢，佢哋收錢人工噉過，有後製幫佢搞，但係我哋呢啲全部後製全部人都係義工嚟㗎咋嘛，噉你好難 Manage 㗎。即係我諗同志自己都好多情緒，噉或者係我自己都好多情緒，或者合作嘅時候大家有啲意見唔同嘅時候你就要……（嘆氣）都嘥好多精神呀，我諗錢都係其次，呢個先至係問題呀真係。義工係，話走就走㗎嘛，你 Funding 呢啲你都唔可以走，你走唔甩啦係咪？但係人哋呢啲可以走，呢個挑戰都好攞命㗎。

M：係呀，我要無償地變成一個 Human resources 嘅 Management，但係我冇錢收嘅，我仲要培訓一班人去做返我想做嘅 Workflow，去做後製、上架、Management 嗰啲嘢。

甲：唔易㗎呢個，我到而家都仲學緊，間唔中都會 Fail 㗎，噉咪當學嘢囉。要Zen啲，你知我心急又好perfectionist，所以我要Zen。要Zen，如果唔係啲義工會走㗎。

M：希望聽到呢集嘅義工們唔好走住，哈哈！坐返喺呢個位度。

甲：馬天娜好辛苦㗎，你哋唔好走呀，哈哈哈！

M：我咇多幾滴眼淚先！好，Risto 係咪仲有冇其他嘢想問埋呀？

R：因為知道2020年突然之間喺網上面滄海遺珠搵返，有啲節目出返土啦，噉想問下點解會有呢個契機呢？

甲：因為 12年嘅時候，個網站隨住另一位拍檔消失咗，但我發現原來個 Domain 佢又畀咗錢㗎喎，延咗五年，噉我就拎住嗰個 Domain 又唔知想點啦，因為其實我自己跟住就去識咗我而家個老公，然後結咗婚，拍咗套紀錄片，之後就搞咗「原色人」。噉就開始好似馬天娜噉就靠自己繼續返工，然後就攞 Funding 又去搞 Project 嘅人生嘞，今次就學到 Gay Radio 上咗最重要嘅一課就係冇錢唔做嘢，哈哈！就喺平機會攞到 Funding，就喺「原色人」就搞咗幾個 Project，主要搞返性別平權嘅嘢啦，唔淨只係 LGBT 嘞，我諗希望可以等個訊息可以入到大眾嘅視野啦。噉的確我哋都做到啲嘢嘅，譬如我哋搞攝影嘅比賽啦或者係紀錄片嘅比賽，噉之後我哋做咗 School tour 啦，噉亦都搵咗啲傳媒訪問啦，個反應幾好嘅，同埋容易過你用 LGBT 噉樣入去 Media 囉。即係嗰個年代普普通通囉，因為嗰陣時應該係，趙世曾十億元搵女婿嗰陣嗰段期間嚟㗎嘛，係啦，我哋套紀錄片出嘅時候。噉我哋出嘅時候都係出咗喺華語紀錄片節呀，啱呀，呢排鍾意講，係咪呀？「恰我的19歲」嗰啲，哈哈哈哈哈哈，「恰19歲的我」，唔係「給」。噉紀錄片啦，噉嗰陣時都好好玩嘅，因為我諗…最初啲人都會問我點解唔去同志影展出啦，噉其實都有接洽過嘅，噉但係佢又畀咗啲好奇怪嘅 Terms 我啦，噉所以就冇出到嘅。因為我，華語紀錄片節出，幫我話做特別推薦，噉我話好呀唔該晒噉樣。噉然後，同志影展話「我哋都想播呀，不過呢前提係你要 Pull out from 紀錄片節先。」我話，唔得喎，我應承咗人喎，人哋 Print 晒嘢囉喎。唔知佢呀，唔知咩操作啦，呢啲都係神操作，噉我哋冇去啦。噉之後就去咗其他，反而去咗上海，去咗北京嘅紀錄片，即係同志影展啦，噉同埋澳門同台灣嘅，台南啦，嘅電影展噉樣，噉就變咗唔同嘅 Mix 都會有。噉所以講到返，講返轉頭就係話，我哋中間有啲時間停頓咗落嚟啦，噉因為搞呢啲噉樣嘅 Project base 嘅嘢，噉同埋其實我哋本身嗰陣時都籌備緊出本同志婚姻嘅書籍。噉但係隨住我嘅移民，噉又變咗停咗啦好多嘢都。去到 20年嘞，我哋 Fast forward 去到嗰陣時，噉喺屋企困咗喺度啦，你知呢個武漢肺炎噉大家都唔出得街，跟住 Lockdown 冇咩好做。然後中間不斷都有人去間中就問，阿 Henry —佢話佢哋搵到我哋—你其實啲節目會唔會有得聽返呢？但係中間其實個情況就係我 15年攞晒啲 File，攞咗去加拿大，噉但係因為個 Hard disk crash 咗呢，噉就連埋啲節目一齊冇咗。噉中間就忽然間有個聽眾啦，佢係大陸嘅應該，喺17年、18年倒就將佢手上成 Set 嘅節目畀晒我，噉然後我就磨多咗兩年，因為自己真係返工好忙啦，嗰陣時返緊喺多倫多返工，係囉噉跟住後來搬咗去溫哥華，然後開始 Lockdown 噉然後見到啲 File，不如出咗佢啦，因為始終你唔出就有機會又再唔見㗎嘞，係呀，噉所以呢就一個一個噉掟上去 YouTube 嗰度囉，雖然攰但開心嘅。

M：係，我覺得即係「雖然攰但開心」可以去總結下我哋而家點解我要……點解大家要真係工餘時間仲要做咁多嘢，因為其實都係因為攰但開心嘅，噉樣。頭先 Risto 有提及過呢個2020年嘅 Podcast 嘅崛起呢，其實我都可以分享多少少嘅，噉就係呢個亦都係解釋咗點解我哋會有呢個 Podcast 嘅緣由啦喺2021年。其實喺2020年有COVID嘅時候呢，我嗰陣時喺台灣啦，噉台灣我就會發現有非常之多一啲講性別嘅議題嘅 Podcast 就冒起咗，即係佢冒起嘅速度快到呢，可能係會突然之間有多五十幾個，講唔同 Topic 嘅，即係你可能講直嘅啦，講純粹講約炮嘅啦，即係嗰啲 One night stand 嘅啦，亦都有同志嘅、BDSM 嘅……好多，非常之多。但係呢又好得意地呢，即係可以用曇花一現去描述嗰個現象呀，就係其實真係做得長嘅真係唔多，可能有啲做咗唔夠半年就自行收皮，你見到佢最後 Update 可能係2021年噉樣。因為呢一啲嘅語音節目呢就激發咗我去做自己呢一個同志嘅語音節目啦，所以就2021年開始利用僅有嘅一支 Mic 去做呢個節目，直到而家嘞。

R：頭先馬天娜就提到 Podcast 嘅冒起啦，而家就會發現即係出街好多人就唔係淨係話聽電台，會聽 Podcast，因為好方便啦，可以唔同嘅裝置，都可以做到收聽節目，亦都係呼應咗頭先 Henry 講嘅情況，唔使話係實時嘅直播，可以隨時 Download 落嚟就隨便聽。根據喺澳洲2022年就做咗一個 Soundsmart Asia 報告就指出，亞洲地區咁多個受訪嘅地方，菲律賓、香港、南韓、日本、馬來西亞、台灣呢啲地方入面，香港係以一個比較高嘅比例有聽 Podcast 嘅人，噉就去到 32%，當中香港亦都係恆常聽 Podcast 嘅人數比較多。當中呢啲聽 Podcast 嘅人，佢哋有咩嘅目標呢？佢哋有過半數人，51%佢哋會希望去有啲娛樂嘅目的，希望可以喺搭車呀、得閒、瞓覺之前，可以娛樂下啦。裏面呢另外就有23%嘅人，希望可以學到一啲新嘅嘢，其他仲有20%嘅人，希望可以用聽覺，避開一個長時間用電話、Mon 嘅情況。噉可以睇下呢個 Podcast 冒起嘅趨勢，噉會唔會令到 PrideLab 呢個節目可以有多啲黏著度。

M：多謝我哋 Risto 嘅新鮮嘅學術分享呀，老實講呢篇嘢我都唔知，我剩係純粹自己親身經歷過呢個台灣性別 Podcast 嘅曇花一現。自問呢，我有認識另外一個喺香港做講性別相關嘅 Podcaster，但係我發現其實喺香港嚟講，講性別 Podcast 的確不多。回到我哋今次呢個主題，香港講同志嘅語音嘅節目，又的確真係唔多啦。以歷史嚟講，我哋有 Gay Radio，再以前有 Gay Republic，一路以嚟做緊鐵飯碗嘅公營嘅有《自己人》啦。時到而家，大家到底聽到呢個節目嘅人，你哋仲會 Follow 其他唔同平台嘅咩嘅節目呢？我哋今次可以算係細數咗，我描述為兩代啦吓，兩代嘅語音節目，亦都邀請咗記者甲去同我哋講咗好多，我係好 Amazed，你係講咗非常之多，你以前即係點樣去喺工餘時間 Split 到自己做咁多嘅嘢。準備進入呢個節目嘅尾聲之前，同行嘅我去邀請返記者甲，你哋有冇啲乜嘢係想話返畀而家，也許其實都唔係好後生，可能都係返緊工嘅聽眾們呢？

甲：我諗其實大家可以係趁，即係而家香港嘅 Podcast 其實真係唔係好多，噉 PrideLab 而家做呢個節目都好，因為 PrideLab 我聽過你都好耐㗎喇，呢個平台都已經，但係真係聽你嘅節目都係因為馬天娜嘅邀請。雖然話 Gay Radio 而家唔係一個正式即係 Active 營運嘅狀態啦，但係其實，我諗就算唔需要一個真正嘅平台，大家都可以去開一個 Podcast，開一個平台去做囉。我諗即係男嘅又有女嘅又有，其實點解唔試下做呢？當然可能好似你話喺台灣，即係百花齊放，然後好多凋謝咗落嚟，我哋都試過呢啲噉樣嘅，試過一輪嘅，即係04年嗰陣時開咗十幾個節目，然後就幾乎死晒咁滯，嗰啲都試過嘅。係嘞，噉但係都係汰弱留強嘅過程囉，噉但係要試囉，尤其是我諗你話喺香港而家言論空間不斷收窄嘅時候，噉呢一個係唔會真係掂得到，又或者可能會掂得到紅線嘅，噉趁呢個時候，仲講得到嘢嘅時候就講啦，我會覺得，係嘞，唔好等到大家冇咗個空間嘅時候，噉就後悔囉，我會覺得係。即係聽到 Rristo 頭先嗰個分享，我都好開心，佢記得咁清楚當時佢見到個版面係點，都好開心曾經 Gay Radio 喺呢一代人入面留低咗一個咁深嘅記憶啦。當然我見到譬如話你去維基嗰啲，我哋同同運嘅人始終都唔係行得好近，即係我哋係有少少若即若離，所以你見到好多同志嘅歷史入面，都唔係好多對我哋嘅記載。反而你話 G Dot 或者係《自己人》佢哋就要寫多啲啦，但我哋呢啲好似係有少少 Non-existent 噉，唔知呀，可能係因為網上嘅嘢啦。但係我諗譬如今次呢一個節目嘅記載，我希望今次聽到馬天娜呢個節目嘅人，可能年輕一輩啲嘅人，都會將呢個噉樣嘅記憶再傳落去。或者係我哋舊嘅節目有機會再掟返上去網嘅時候，聽得到啱嘅 Topic 嘅話，噉其實我哋，即係好似關淑儀嘅歌噉，行先廿年，其實廿年後都聽得嘅。我覺得啲 Topic 啱你咪聽下囉，反正都錄咗囉。反正大家嘅義工嘅付出都已經喺度，噉咪希望亦可以幫到大家。

M：感謝你果然係好 Pro 做過語音節目嘅同行記者甲，做呢個收尾就收得靚啲嘅。好呀，噉就非常感謝你啦。噉係呀，今次呢一個越洋嘅訪問，我哋又跨越一個非常非常之遠嘅一個時區去訪問到佢。《點止港同志》係一個以香港同志角度出發嘅 Podcast，希望可以將大家生活裏面嘅性別同埋同志議題，用廣東話嘅聲音同文字嘅方式保留同流傳嘅。每一集嘅 Podcast 我哋可以製造文字檔，噉今集嘅呢一段呢我係有做一個 Update 嘅，就係我哋即將會將我哋嘅文字版呢，就放上一個專屬嘅網站，敬請大家要留意。多謝你收聽呢個節目，而且聽到嚟最後。想收到下一集嘅節目呢，就訂閱我哋，而家你可以喺 KKBOX、Spotify、Apple Podcast 都可以 Subscribe 到我哋。如果你對呢一個主題有共鳴，想分享你嘅故事畀我哋知道，噉就可以喺 Instagram DM 我哋 @pridelabhk，噉亦都歡迎你喺唔同嘅平台嗰度留言同埋畀回饋我哋，噉你嘅支持同埋鼓勵呢就會係我哋默默耕耘嘅動力嚟嘅。嗱我喺度攝多一句啦，就係頭先記者甲嘅節目裏面呢，又話有好多人話真係已經 Comment 過話，佢聽完個節目之後自己感覺出咗櫃啦，我都希望可以收到一啲聽眾可以喺我哋嘅節目下面留言下嘅，因為呢真係單方向畀啲節目出去呢係有啲孤獨嘅。我希望可以有啲 Interaction 啦，就係噉啦。噉今集去到呢度啦非常感謝記者甲嘅時間，同埋分享製作咗今次嘅一個語音嘅記錄。就係噉啦，下次期待同你《點止講同志》。噉記者甲我哋講拜拜啦。

甲：好啦，多謝各位聽眾，多謝兩位主持。Thank you.