密鑼緊鼓邀請緊更多嘉賓，籌備Podcast專屬網站嘅同時，同大家預告下EP32 訪問嘅內容，仲有客席主持！
【GAY RADIO 集念】（十五）香港也有同志網劇 ｜林國賢
【節目預告】香港同志語音節目
M：馬天娜
R：Risto
M：歡迎返嚟《點止港同志》，我係主持馬天娜。今次大家聽到我把聲，可能會有些微嘅唔同啦，主要係因為呢，我哋有錢換咪嘞，Yeah！噉如果你哋對於嚟緊節目嘅音質有啲咩意見，歡迎你 DM 我哋，話畀我哋聽。
從呢支咪開始講啦，講起我哋嘅語音節目，大家睇到呢個題目呢，就知道我哋嚟緊上下集會訪問一個香港嘅同志電台節目。噉呢個電台節目係網上嘅版本嚟嘅，佢冇一個實際嘅大氣電波去傳播佢哋嘅語音嘅節目啦。
我會先介紹下 Gay Radio Hong Kong 係乜嘢嘅一個團體，同埋佢嘅歷史啦。噉接住落嚟呢，我就會介紹呢一上下集嘅一位客席主持，講下點解我哋會變咗做雙主持啦。噉接住落嚟就係講下我哋做呢一集同埋一齊做呢一集嘅契機。噉好喇，我哋正式開始啦。
Gay Radio Hong Kong 其實係有伴隨住我中學讀書時期成長嘅一個網上電台節目嚟嘅。搵返佢嘅歷史啦，佢係活躍喺 2006 年至 2012 年間嘅香港網路電台之一，佢都係用廣東話去製作一系列嘅同志相關題材嘅清談節目、人物專訪同埋播音劇，即係廣播劇。維基百科上面嘅一啲資訊呢，噉呢啲資訊呢已經有畀咗下集嘅訪談嘉賓 Check 過，係準確嘅。我就同呢度大家聲音導航一下啦，Gay Radio 嘅前身呢，就叫做「起點影音像網播平台」，噉英文就叫 Netcast Platform 啦，佢哋簡稱叫做「起點」，噉由四位人士叫記者甲、Roadster、浪人落雁同埋犬飼哲喺 2004 年共同創立嘅。佢哋希望有一個平台去畀參加者用聲音同埋錄像去分享佢哋多元嘅生活百態。當時嘅本地網台呢，就大多都係用串流實時播放嘅形式去運作啦，噉有好多人，其實佢哋唔係專業，或者本身唔係全職去做主持，或者係做呢啲嘅語音創作呢，噉所以用實時嘅創作形式呢，係好有即係時間上面嘅限制同埋壓力嘅。而當時呢，記者甲呢喺本地網台「Gay Channel」呢，就主持一個寵物嘅節目叫做《貓朋狗友》，亦都因為佢當時嘅工作呢，就冇辦法兼顧就請辭啦。
噉 Roadster 呢就提出就唔用串流實時播放嘞，就用呢個錄製然後放上平台，做呢個播放嘅形式，所以佢哋喺 2004 年嘅 5 月呢，就做咗本地用 On Demand 嘅方式運作嘅網台就係「起點」嘞。對於我嚟講呢，最重要亦都最有記憶點嘅位呢，就係佢哋每一集播之前都會有一個宣傳嘅口號啦，就叫做「起點同你同聲同氣，Gay Radio.hk」。當時對於我嚟講係一個又緊張，但係又好刺激嘅一個內容嚟嘅，因為你可以即係，喺你耳筒裏面你聽得到廣東話，去講同志嘅議題。噉佢哋嘅節目嘅形式亦都非常之廣泛啦，噉佢哋有自己嘅創作嘅節目啦，其中有一個節目呢，就係叫《姊妹同志口水房》，以前呢佢哋就喺「Radio Republic」度做嘅，噉停播咗好一陣之後呢，記者甲就邀請返佢哋去加盟做「起點」，做一個女同志嘅題材節目啦。
除此之外，佢哋亦都有一啲題材係比較成人向嘅，例如《性在夠吉士》，亦都有一啲比較即係個人述事式嘅節目叫做《突然獨身》都有好多形式、主題、題材嘅語音節目。噉後尾仲有一個節目呢，就同「關懷愛滋」去聯手去合作，做一個叫做「點解關懷愛滋」嘅節目，所以佢哋對於同志社群裏面關於一啲健康嘅資訊都有 Cover 得到噉樣。去到 2005 年呢，佢哋「起點」就籌備製作呢個網路廣播劇啦，《只能曖昧的暗戀》，當時亦都有好多同志嘅論壇啦，男同志女同志都有嘅，對於啲同志嘅網民嚟講呢，呢個廣播劇係會有引起好多嘅討論啦，因為真係唔係純粹係一集一集嘅內容，而係真係可以…你可以追一劇噉樣去聽一個廣播嘅節目。除此之外呢，亦都有將同志嘅小說《突然獨身》聲音化啦，喺愛滋病基金會嘅支持之下呢，亦都推出咗首齣香港嘅同志網劇《我和他的 99 天》。當時呢，有《AM730》同埋《號外》都係有報道過呢一件事嘅。
大家頭先聽到話佢哋係活躍喺 2006 年至 2012 年啦，中間發生咗一個好大嘅插曲嘅，個插曲呢就係喺 2009 年嘅時候呢，當時做立法會議員嘅黃成智呢，同埋佢嘅教會組織呢，就去指責「起點」裏面有一個節目叫《基場超新星》，呢個節目呢就鼓吹同性戀，令到當時資助 Gay Radio 嘅資助方小童群益會呢，就因為顧忌而中止咗呢個合作嘅計劃嘞。 Gay Radio 呢係由一班即係有正職嘅人，用自己嘅資金去營運嘅一個網台啦，因為冇咗呢一個額外嘅資金，其實會令到 Gay Radio 嘅財政壓力大增嘅。去到撐到 2009 年呢，Gay Radio 呢就因為欠租嘅關係呢，就真係令到佢哋冇辦法再支持營運下去啦，噉最後就淡淡地黯然地就結束咗一個常規嘅語音節目嘅更新嘞。
去到後尾，我哋點樣會 Call out 返呢一個節目呢？喺呢個時候呢，我又要去呼喚下坐喺我隔籬嘅客席主持 Risto，你要唔要講幾句呀？
R：係，唔該曬馬天娜，係。大家好呀，我係 Risto，噉呢就係馬天娜嘅大學同學啦。噉會做呢一個客席嘅主持呢 其實個契機就因為有一次我哋食飯啦，馬天娜就提到佢就做緊 PrideLab 呢個節目呢，就係希望記錄返香港本土同志嘅文化歷史。佢就已經做咗一啲書刊啦，一啲影片啦，或者一啲同運嘅歷史啦，嘅相關嘅嘢。噉就爭聲音嗰度就好似都有啲空白，所以呢就問起啦，講起啦，就分享到我讀書嘅時候就有聽過呢個 Gay Radio 嘅節目啦，講起之後原來馬天娜都有聽過喎，所以就促成咗我哋一齊做節目啦。
M：不如講下我哋對於 Gay Radio 嘅嗰個回憶係點樣啦？頭先我講到佢係陪伴我中學成長嘅，噉佢係點樣陪伴你嘅時期呢？
R：呢個就不得不要暴露下個年齡先啦。噉呢，印象中呢，其實就係我初中嘅時候呢，就偶然之間就發現呢個網站嘅。噉嗰陣時因為對自己個即係女同性戀嘅身份呢，即係好迷蒙嘅仲係，噉就會係 Search 下呢啲 Gay 呀 Les 呀啲字眼啦，噉無意之中呢就，咦，有個網站係一個網台嚟嘅喎，噉就 Search 到啦，噉然之後就撳入去啦，好似開咗一個新世界嘅大門噉樣啦。噉嗰時就見到啲女同志嘅節目啦，就揀嚟聽啦。
我覺得好神奇呀，即係有一個電台係可以隨時噉聽，跟住之後又撳落 Play 嘅掣就可以聽到一啲關於自己身份呀，即係有啲出櫃嘅一啲經歷呀，聽到人哋啲主持嘅經歷呀，就覺得好神奇。另外有啲尺度比較大嘅節目，可能講下一啲性啦、愛啦，即係亦都係當時一個初中生嘅我，完全想像唔到嘅世界，亦都係除咗大開眼界之餘，就係都袋咗啲嘢落袋喎。
M：嗯，係嘞，佢呢就如數家珍講到自己可以聽到幾多個節目啦。我哋要準備呢個節目嘅時候呢，Risto 都有問我，我對於呢個 Gay Radio 嘅記憶係點？嗱，我不得不要同大家告解呢，我好老實講，我而家回想起嗰陣時中學做過啲咩呢，我係有一段時間空白咗嘅，總之就係唔係一個非常清晰嘅回憶啦。
但係呢，我自己依稀呢有一個印象，就係因為我當時呢，從我屋企要返學校呢，每一程都要接近一個鐘。我當時呢就係做一個少少壞學生嘅行為啦，就係我會帶一個 iPod 嘅。到底嗰陣時，Gay Radio 有冇放自己嘅台上 iTunes，而可以令我下載到去個 iPod 度呢，就真係不得而知，我亦都不可考，即係我都唔係好肯定究竟我係咪可以用噉嘅方法去聽。但係我好肯定嘅係，就係當時我嘅電話冇辦法聽到呢啲電台節目啦，噉我點樣去聽得返呢啲節目呢？就真係非常之依賴佢哋將呢啲節目放上網，而我哋可以即係透過互聯網，嗰陣時有可能淨係得 56K 啦，我哋就慢慢噉樣慢慢 Load 嗰個 Streambar，然後就聽一集一集嘅節目。對於我嚟講，就係一樣我哋可以悄悄地自己去聽一啲大人嘅同志生活嘅事呀，即係我哋自己可能錢又冇多個啦，然後日日都要返學啦，我哋其實好多時候係冇辦法想像一個同志生活係點樣嘅一個形態，所謂去桑拿係點呀，TB 係點呀，Les 係點呀，我哋係唔清楚。但係佢哋係可以畀我哋感覺得到，即係其實外面係有一班人已經係成人嚟嘅，佢哋係同志嘅身份去活喺香港呢個地方，係好 Vivid 好清楚呀。
對於我嚟講，點解縱使我冇辦法好清晰去回顧到，我聽咗啲乜嘢金句呀，或者係啲咩特定嘅主持，但係仍然好惦念住呢一個，呢個 Gay Radio 呢就係因為，當時嘅我有接觸咗呢個節目，而呢個節目令到我更加想像得到同志係咩模樣噉樣囉。
R：想問下你本身有冇聽電台嘅習慣㗎？
M：我嗰陣時有嘅。嗰陣時我聽電台嘅主要原因係因為我哋即將要考試，噉呢，初中嘅時候大概可能會知道呢，當時我哋考試要準備一個……
R：練聆聽噉樣。
M：係呀，練聆聽，跟住同埋我哋要準備一個好便攜式嘅小小嘅收音機呀嘛。對於我嚟講，當時已經有聽電台嘅，但係電台大家都知道呢，到而家大家都都有聽過電台，就係佢哋係直播式嘅，即係你冇辦法回顧，就唔會好似你而家噉可能上 903 或者 RTHK，你去撳返個節目可以回顧得返去聽，即係對於我嚟講，聽電台係冇咗就冇咗㗎啦，你時間唔配合就聽唔到。但係 Gay Radio 就係好似一個，而家嚟講就好似一個 Netflix 噉啦，即係你可以任何時候返去就聽得到噉樣囉，所以就係有噉嘅差異囉。
R：都明白，嗰個，即係個體驗好唔同啦，尤其是頭先聽到你，嘩，排除萬難，仲話要係轉 iPod 轉 iTunes 噉去入嚟聽，我就覺得，嘩，呢個，令到你即使唔係話太記得嗰個內容，但係呢件事本身就同你就噉扭開收音機嗰個體驗已經好唔同啦。噉又退後一步啦，而家就 Podcast 好流行啦，噉你又覺得 Podcast 同網台嘅分別係邊度呢？
M：我覺得我而家算係一個網台裏面嘅一個節目囉，即係以 Gay Radio 嚟講呢，頭先 Risto 有提過佢係一個網站嚟嘅，我呢就未有一個網站，而我縱使有一個網站，我都唔會有咁多個節目嘅。所以《點止港同志》如果要放返去 Gay Radio 噉樣嘅層面去比較嚟講呢，我會係似係佢個台裏面其中一格嘅節目囉，噉會比較似我哋個 Scale，我哋嗰個形式會比較似一個個體戶去產生一啲內容，即係 Content creator 啦。噉而 Gay Radio 要做嘅嗰個規模係大好多嘅，佢係要牽涉唔同嘅節目啦、唔同嘅題材啦、唔同嘅人啦，我覺得以規模嚟講係有差異囉。講到我哋《點止港同志》同埋 Gay Radio 嚟講呢，嚟緊呢下一集呢，我哋就會正式去越洋訪問到 Gay Radio 嘅主理人之一，記者甲嘅，記者甲喺我哋搵到嘅功課裏面啦，算係即係當中由頭搞起到最後即係結束呢一個定期更新 Gay Radio 嘅人啦，以及到之後佢開返一個 YouTube channel 將 Gay Radio 裏面嘅節目再放返上網，都係佢有經歷過，相信佢會為我哋帶嚟好多關於 Gay Radio 背後創作嘅一啲念頭呀、一啲動機呀，以及可能同佢可以有類似同行嘅傾談，分享下即係所謂嘅兩代嘅同志節目到底差異，同埋相同嘅地方會係點嘞。
今集呢就唔放一個經典嘅 Closing 啦，噉但係大家記緊要留意下一集呢，我哋會有一個非常精彩嘅訪談，就唔好錯過嘞。今集就去到呢度先，期待下次同你《點止港同志》。Bye Bye。
R：Bye Bye。