近排香港台灣唔同地方都有LGBT Pride 嘅相關活動，現身走出街頭，參與活動之後，回到日常，遇到性傾向相關嘅困惑，又可以搵邊個呢？
就咁search 「同志 輔導」係咪就可以搵到適合自己嘅機構呢？
今次搵到東華三院同一線24小時性小眾支援熱線嘅兩位員工同我哋分享。同志遇到情緒嘅困擾，其實有人願意幫助你化解目前嘅情緒。
性小眾嘅路未必容易走，但係有呢班同行者，至少可以一齊並肩分擔，慢慢繼續行。
【專訪自己人】前線同志同行者（Feat. Wing, Cleo）
M：馬天娜
C：Cleo
W：Wing
M：歡迎返嚟《點止港同志》，我係主持馬天娜。噉睇到個標題呢，就會知道今集呢就係去搵一啲訪問機構嘅時候啦。噉呢個機構呢，喺我合作嘅 PrideLab 呢，其實幾常會互動得到嘅。就係因為佢的確係一條服務熱線去支援多元性別啦。直接就開門見山同大家講啦。引用返佢哋機構嘅網站資訊呢就係：一條廿四小時嘅多元性別支援熱線，由專業社工去接聽，為性小眾提供情緒輔導、專業轉介、小組活動同埋跟進熱線嘅服務嘅。噉呢度呢就 Highlight 嘞，如果你或者身邊嘅親朋戚友有呢個性傾向或者性別認同嘅疑惑，或者有伴侶嘅關係問題呢，係可以撥打呢個電話嘅。
噉電話號碼我等陣畀兩位嘉賓自己講返，呢個直接 quotation 就講完啦。今次呢一個嘅分享呢，主要就係圍繞返佢講嘅服務啦，即係情緒輔導呀、專業嘅轉介呀、小組活動噉樣，就係畀大家更加認識下其實熱線背後嘅人，佢哋係有啲咩經歷，同埋就係對於香港嘅性小眾，佢哋打電話嚟係通常遇到啲咩狀況，都可以畀大家有多一個了解啦。噉我先介紹第一位嘅嘉賓先，我介紹下 Cleo 先啦！
C：Hello，多謝馬天娜，我係 Cleo 啦，噉我都係東華三院同．一線嘅同事嚟嘅。我同另一位同事都係專責去做熱線服務，但係我哋可能喺啲細分嘅工作上會有唔同，陣間可以再同大家介紹啦。噉我介紹埋另一位同事阿 Wing 畀大家。
W：大家好，我係阿 Wing 呀。我都係同 Cleo 一樣係同．一線嘅社工啦，噉我哋嘅分工會有少少唔同嘅，噉但係我哋兩個都會聽熱線嘅。
M：噉既然講起分工，不如可唔可以直接講埋阿 Wing 同 Cleo 嘅分工係點樣分嘅呢？
C：我同阿 Wing 嘅分別主要係一啲 Offline 活動，即係一啲非熱線上面嘅活動，噉可能陣間會再詳細介紹。例如有啲咩呢，可能有啲小組呀、一啲輔導個案呀，呢一啲我哋會細分嘅。噉其實細分嘅意思可能我哋 Specialize，即係我哋比較擅長或者遇到嘅群體又唔同啦，噉我係主要做啲女同志服務嘅，喺 Pride Line 度，係嘞。噉阿 Wing 就係主要負責一啲 Transgender 嘅，即係跨性別朋友嘅服務啦，係啊，噉就係呢個分野。噉但係 Hotline 上面，我哋喺係熱線上面大家都係會一齊聽嘅。
M：明白。開咗兩個頭啦，一個就主要服務女同志圈子，另外一個就會係 for Trans 嘅，for 跨性別嘅圈子啦。好，噉亦都解答咗我第一條問題：服務多元性別對象，噉我又舉手問嘞：Gay 佬點算呢？呢個 LGBT…有冇人聽㗎？明唔明㗎？明唔明 Memba 嘅需要㗎？
C：噉呢方面都放心啦，因為我哋同事就唔只得我同阿 Wing 嘅，我哋兩個都唔會聽到一條廿四小時線嘅，大家放心。噉所以呢，我哋都有唔同同事去當值啦，我哋都有同事係熟悉男同志嘅社群嘅，係嘞。 所以唔需要擔心，我哋都有男仔、有女仔嘅同事幫手。
M：突顯我哋年齡代溝嘅一個問題，就係呢，我發現有好多人其實已經唔鍾意打電話啦， 我自問其實自己都開始唔係好鍾意打電話。噉我嘅問題係，通常同．．一線服務嘅對象嘅年齡層係幾闊㗎？
C：噉我哋頭先講到服務對象啦，其實除咗 LGBT+ 嘅朋友呢，其實佢哋嘅家人甚至朋友，如果佢哋係因為有有家人係有呢個 LGBT+ 嘅情況因，而係因為噉而有困擾，我哋都係支援嘅，噉所以就再闊啲啦個版圖噉，少少補充。Back to 頭先馬天娜嘅問題啦，我哋嘅年紀呢，以我自己經驗呢，其實都大啲啲嘅。即係一定唔係十幾廿歲最多囉，都係 Around 三十零、四十幾大啲，但係年輕人都唔係少嘅，係呀。但係掉返轉，我哋未必每一次打電話上嚟都會問佢「「你今年幾歲呀？」，噉所以有時資料都空白咗嘅，即係我哋 Quote 唔晒所有人嘅資料，但係年輕人都係有嘅，不過落到資料就可能大年紀啲啲囉。係嘞。阿 Wing 有冇？
W：冇錯，我哋二十幾歲呀、三十幾歲呀、四十幾歲都有，五十幾歲都有，有時可能六十幾都有㗎喎，我哋接聽過一啲係比較年長一啲嘅 LGBT+，另外就十幾歲嘅，其實我哋都有接嘅，但係的而且確就真係比較少啲嘅。
M：呢個同．一線嘅對象，即係打電話嚟嘅人嘅年齡層噉闊呢，可唔可以即係大概分享下畀我哋嘅聽眾們知道，唔同年齡層嘅性別小眾通常打嚟係為啲咩嘅？我嚟拋磚引玉下先，前幾排我真係非常之有緣地遇到我個朋友，我個朋友就讀呢個心理諮商嘅。佢就想做一個實習啦，所以就去咗台灣嘅同志支援熱線嗰度去做一個義工。佢就同我講，佢自己認定係一位女同志啦，所以佢自己的確係冇辦法可以好…即係好同聲同氣地幫到男同志。除咗男同志之外，其實佢有時都會收到女同志同埋一啲老年嘅同志嘅 Call。佢就話佢有接過，或者係佢嘅同事們有接過，有啲 Call 係長年累月 Call 嚟嘅，即係唔經唔覺打咗十年噉㗎嘞。亦都唔一定每一次嘅人打嚟都一定係有個問題要解決嘅，可能打電話嚟吹水嘅噉。所以就好奇下，香港嘅狀況係點嘅呢？
C：多謝馬天娜拋磚引玉，我回應咗呢部份先。我諗其實全球—我唔知啦，我淨係喺香港做過，但係熱線應該普遍都係有呢個特徵嘅。一嚟係真係會有長期嘅朋友仔啦，我哋冇開到十年噉長啦，我哋三年多啲啦，都真係確實有朋友係可能開線嗰一段時間打到而家都有嘅。亦都有一啲真係噉熟啦大家，真係有陣時可能打上嚟寒暄都未定嘅，因為就有嗰個親切感，又或者我哋熱線真係俾到個支援佢。
當然啦，大家又唔使喺度即刻覺得：「噉我哋返工咪好得閒？喺度寒暄。」噉我哋都真係會視乎情況都讓返對方知道，可能我哋講一陣真係好短時間，可能一陣就都差唔多啦。我哋熱線嘅用途都真係 Support 返啲可能危急啲嘅朋友呀，或者真係呢一刻有需要嘅朋友。噉佢都明嘅，可能真係幾句，即係五分鐘 Around，即係唔係噉長時間，但係都真係會有啲都好愛惜我哋熱線嘅朋友啦噉。
頭先馬天娜都講到關於我哋唔同年紀嘅朋友打嚟為乜啦，呀我剩係講少少啦，等陣間畀阿 Wing 再補充。我講年輕啲嗰班啦，真係好年輕嗰班呢，其實十幾廿歲呢，其實不外乎出櫃同埋感情問題，係嘞，都概括咗嘞。當然出櫃有包性傾向，或者性別認同啦，佢哋有啲真係好後生，可能真係十幾歲噉，我諗知識上面嘅提供呀，或者真係讓佢哋知道有人係明佢哋同支持佢哋好重要囉。呢個就係年輕人嘅煩惱啦。跟住就拍拖啦，無論係因為鍾意咗一個直嘅人，鍾意咗一個冇結果嘅人，關於前度啦同現任啦，即係等等嘅關係問題都有。等下可以再傾，又畀阿 Wing 補充下年紀大啲嘅朋友，有啲咩煩惱呢有時。
W：正如 Cleo 頭先講啦，其實我諗每一條熱線呢，都會有佢哋嘅常客嘅，而我哋同．一線都會有一啲嘅常客啦。 我哋都係正如 Cleo 講，我哋都會同佢傾下噉，因為其實我諗佢哋自己嘅圈子嚟講呢，可以接納佢嘅人其實幾乎係等於零，我哋可能係佢唯一嘅支援網絡噉，所以佢哋日日打電話上嚟都唔定嘅噉樣。但係呢，你話至於年紀比較年長啲嘅一啲 LGBT， 佢哋嘅困擾係啲乜嘢呢？我想講呢，其實有時呢，佢哋嘅困擾可能係同年輕嘅 LGBT 都差唔多，就係一啲感情嘅問題呀，或者係一啲出櫃嘅一啲嘅情況。可能年輕啲嘅 LGBT 佢哋係呢方面嘅包袱可能冇噉重嘅，但係年長一啲嘅 LGBT 可能喺佢哋後生啲嘅時候， 佢哋就未向人哋出櫃， 所以到咗佢都有返噉上下大年紀嘅時候，佢而家嗰個社會嗰個氣氛又好咗啦，可能佢夠膽出咗櫃嘞，但係佢可能都面對同樣嘅壓力噉喎，所以佢都會打電話嚟同我哋傾囉。另外，可能佢都會傾返一啲關係上面嘅問題，可能佢哋嘅關係比較穩定啲， 佢就會傾下點樣長遠地去 Keep 返一段親密關係。至於佢哋同其他嘅屋企人嘅關係，其實都有討論到嘅噉，噉所以就其實好多樣化。
M：歸納一個點就係感情問題呢係不分老幼嘅，哈哈！呢個感情問題無論係港、台都係一個最大…熱線最需要支援同埋幫助嘅地方。都幾有趣嘅，因為我知道其他嘅一啲地方，同志或者係性別小眾嘅感情關係好常係好顛簸嘞，好難先可以活出自己快樂嘅感情噉樣。但係同大家講啦，其實係有輔導啦。如果你係覺得身邊嘅朋友們唔接納你，其實你可以尋求唔同嘅協助，同埋有熱線支援，熱線支援 At least 係免費㗎啦，亦都可以慢慢幫你梳理下你當時呢一刻面對嘅感情困擾，或者係你嘅交友嘅狀況，交友嘅困擾或者係你嘅覺得身邊嘅人唔接納嘅狀況之下，你點樣可以心裏調適一下？我相信身邊嘅資源係有嘅，所以千祈唔好覺得自己係孤立無援。
噉講起呢個孤立無援，之前有一集我提起咗同志報喜不報憂，亦都有一啲作品係提及呢個話題。簡單啲嚟講就係，當我哋一啲大型嘅活動，或者係一啲我哋嘅倡議，或者一啲標誌性人物，佢係同同志有關嘅時候，往往我哋可以睇得到佢係好陽光嘅一面，佢好健康，身形好健康、好健碩，或者佢係有美滿嘅感情生活噉樣。但係掉返轉一啲相對嚟講暗淡嘅畫面、暗淡嘅景況，例如佢病咗，或者係可能係一啲文化裏面會涉及到濫藥嘅，噉呢啲嘅狀況就會越嚟越唔受歡迎，即係越嚟越唔見咗。
噉我又想問下，你講得呢個係熱線，除咗打電話嚟問你問題或者同你吹水，噉一定會有一啲危機嘅支援同埋轉介。你都有提及過話有啲跟進嘅服務，你哋網站裏面提及過一啲關於危機支援嘅部分，即係你哋係點樣 Handle，或者係會唔會有機會可以分享到一啲經驗？
C：我講吓我自己經驗，等陣間由阿 Wing 補充啦。我認同馬天娜所講嗰個現象嘅，即係嗰個報喜不報憂，或者我覺得 LGBT 純粹令呢件事再激烈咗，即係香港人都係傾向係噉嘅，但係可能喺呢個圈子就再激烈咗。我覺得呢個特徵令到我哋熱線會有一個面對嘅一個情況，就係可能嚟到就真係嗰件事已經好嚴重嘞，即係掉返轉佢唔會好小事就打嚟，因為唔需要求助呀嘛覺得，但有陣時就係忍到某一個位，或者覺得真係爆晒煲嘞完全，搵晒 Friend 都搞唔掂， 可能就會搵到我哋噉。噉我諗真係好普遍，大家可能諗返起自己遇到嘅問題，其實真係好正常嘅，香港嗰個求助模式就係噉。
所以我哋會真係遇到啲咩所謂危機呢？我又分享啲可能即係關於親密關係暴力嘅情況啦噉，噉個 Term 好似好專業，其實我自己嚟講即係伴侶之間有嗌霎，嚴重啲真係可能又打起上嚟，或者甚至有啲危急情況噉。其實噉樣打到上嚟，我哋可以提供到嘅支援，電話上面一定係傾啦，噉個傾係，其實我哋最大嘅指標一定係保障大家安全。咩意思呢？睇下電話上面會唔會可以都鼓勵到佢哋 Separate 咗先啦，即係如果嗰一刻已經係嘈緊嘅時候，係呀，噉 Separate 得，即係掉返轉大家肯去冷靜，容易傾好多啦，即係返返去傾，或者去睇下點樣幫佢拆嗰啲嘢，去令佢—頭先馬天娜所講—都知道唔係自己一個人，有 Resources 有資源，可以之後去支援噉。噉呢個之後就係睇下會落入，可能我哋可以幫手做輔導啦，或者如果佢個需要係大啲嘅，可能佢有多啲社會福利需要，簡單嚟講，可能佢唔係剩係感情，即係屋呀、錢呀，其實都係有困難嘅，可能我哋又可以幫手做專業轉介去返啲主流嘅服務，去讓佢哋有個可能個案社工，或者啲負責社工嘅照顧，噉樣都可以囉。
當然啦，講到關係暴力，頭先就係一個輕輕嘅例子啦，都有一啲例子係可能唔會噉輕易就可以妥協到或者傾得到嘅。可能直接啲嚟講，佢嗰刻可能需要另一個地方去住， 我哋都有試過去轉介一啲庇護宿舍啦，即係讓佢可以逃離一個家暴嘅情況，即係最直接嘅危機處理。 大致我想分享嘅嘢係噉啦，又讓阿 Wing 可能講下一啲跨性別個案，或者點樣。
W：你噉樣講令我諗返起我哋有啲嘅情況啦，例如係佢哋其實…佢本身其實都接受唔到自己嘅身份， 因為接受唔到自己嘅身份啦，噉佢又有啲自殺嘅諗法呀，有啲輕生嘅念頭呀。我哋都會係喺個熱線入面都會同佢做一啲嘅危機評估啦，如果佢都真係個情況好緊急嘅話，其實我哋都曾經試過報警呀，去幫佢，等佢可以冇咗嗰個即時嘅危險，因為如果佢想傷害自己嘅話。噉樣就，呢啲個案都間唔時都會有遇到嘅。
M：即係作為一個社工，作為一個聽電話嘅人，你可能同嗰個人係完全冇見過嘅。可能呢個圈唔係好大，你可能喺某一啲場合見過噉樣啦，你可能同嗰個人你真係純粹係聽到佢把聲，完全素未謀面。對於你嚟講，你係點樣 Detect 或者偵測得到嗰個人想傷害自己呢？
W：我哋如果做…即係我哋內行嘅人就會知道，其實我哋會有啲嘅評估嘅，例如我哋會問返佢假設佢話佢想輕生嘅話，我哋會問返佢：你有冇一啲實際嘅計劃啦？你個計劃係點樣嘅啦？計劃嘅時間會係點樣？你係咪諗到好實，係一定要去實行呢個計劃？定係還是，如果有人同你傾咗，你會鬆啲嘅？我哋會問好多一系列嘅問題，同埋我哋會嘗試喺個電話度，首先就攞到佢個電話號碼啦，即係我哋會用我哋嘅方法去問到佢畀我哋嗰個電話號碼，另外就氹佢講返個地址出嚟，起碼佢去到最後有啲咩事，佢都冇放棄佢個自殺諗法嘅話，我哋都可以去報警處理到噉樣。當然啦，呢啲個案就危機嗰陣處理咗，但係佢之後…例如佢一啲嘅小眾壓力點樣去處理呢，都係需要長遠跟進嘅， 我哋係有個案輔導嘅工作，係可以跟進到呢一個位。
M：噉我又再問下嘞，即係我自己同 PrideLab 合作，有陣時都會遇到呢啲跨性別嘅人嘅一啲煩惱啦。佢好似同佢哋啲煩惱呢係非常之長期嘅，佢唔淨止係佢自己對自身性別認同嘅一個好長嘅轉折，或者係心態嘅轉變，亦都係因為佢隨住佢心態嘅轉變，佢可能要開始買一啲嘅衫呀，然後開始有機會同佢嘅屋企人、佢嘅同居者產生衝突噉，噉有啲會鬧交呀，跟住可能會嗌霎嘅，甚至有暴力嘅行為，趕佢出門口。我又想問吓同．一線呢係咪真係跟到最後㗎？你哋會唔會有 Quota？會唔會突然之間過一年就冇一件事？
W：我哋唔會噉輕易丟低人嘅，太殘忍嘞，我哋唔會噉樣做嘅。 你話我哋有冇 Quota 呢？ 當然啦，我哋同事嗰個數目係有限嘅， 你話我哋不停噉樣接呢，其實又冇可能嘅，因為我哋人力有限呀嘛。但係暫時嚟講呢，其實係未去到呢一個話，我哋唔可以再接個案嘅位，我哋都仲有足夠空間嘅。
頭先你講話一啲跨性別人士佢生活上面會面對嘅一啲困難啦，其實我哋都有考慮得到嘅，就例如頭先講話佢可能佢係喺裝扮度想有啲轉變嘅話呢，咁而佢喺佢屋企呢，其實唔方便做呢樣嘢嘅。 我哋同．一線呢，除咗有條熱線之外，我哋有一個好細嘅中心啦噉，噉呢個中心呢，其實我哋其中一間房呢，就係叫「心櫃間」。呢間房有啲咩特別呢，就係我哋會擺咗一個衣櫃嘅噉，呢啲衣櫃入面呢，就有我哋同事捐出嚟嘅衣物啦，另外都會有一啲嘅位置可以畀我哋嘅 Client 擺放佢一啲嘅衣物嘅。因為都知道如果佢擺喺屋企嘅話，有機會會俾屋企人偷，或者俾屋企人整爛或者抌啦噉樣，佢哋冇呢個空間去放衣物嘅話呢，噉我哋就畀一個空間佢。另外呢就係佢…如果佢冇一個空間可以畀自己扮靚，或者做轉變嘅話呢，其實我哋嗰個房呢都可以畀到一個空間畀佢做佢想做嘅嘢。
M：呢個係一個新嘅資訊呀，感謝阿 Wing 分享畀我知。我覺得呢件事係對於好多我諗比較年輕啦，即係未諗住，或者未有能力搬出去住嘅一啲跨性別嘅朋友們，係一個喜訊。
我特別去諗究竟個衣櫃有幾大啦，但係我覺得有呢個噉嘅 Offer 係一件好令人暖心嘅一件事嚟。因為我係有聽過有，其實唔一定係跨性別，可能係一個 Drag queen，可能平時日間，或者基本上佢嘅生活都係同佢嗰個性別氣質係相符，但係佢的確係有一啲同佢性別氣質係唔同，可能買條裙呀，或者係一啲好豪華嘅一啲裝扮噉，噉佢屋企人就會好有意見，佢亦都係要喺外面租一個倉去放呢啲衫噉樣。我覺得對於性別小眾嚟講，可能嗰一絲嘅希望係放咗喺個衣櫃裏面，亦都感謝同．一線分享咗呢一個服務畀呢一班跨性別嘅朋友仔啦。
我頭先聽到你哋話會轉介或者係會聯絡到其他部門嘅社工，亦都可以安排到呢個危機避靜嘅住宿啦，其實打得電話嚟嘅人呢，佢哋會去到幾 Urgent？即係，我想知道呢個問題嘅原因，係因為我想畀聽眾們去知道，其實所謂嘅「報喜不報憂」，我哋可能忽略咗嘅嗰面，就係有一啲嘅年輕嘅或者係相對資源冇噉多嘅性別小眾們，佢哋會經歷啲乜嘢，而我哋係需要更加多嘅資源去支援佢哋。
C：我係 Cleo，我又講吓，其實真係幾危機都有。因為我補充返啱先阿 Wing 嗰個情況，即係關於自殺嗰個情況。頭先大家一路聽可能又會心驚膽跳：嘩會搞到噉呀？或者好多想像。再補充多啲，因為我又掉返轉有個擔心，可能大家又唔知，有啲朋友可能會覺得：社工都係報警 成日報噉，係咪噉呀？係咪日日都報警呀喺度噉？噉梗係唔係啦。同埋阿 Wing 其實都好好，佢講得好詳細，其實嗰個評估係其實掉返轉真係有 Client，其實嗰刻佢就做緊嗰件事㗎嘞，即係嗰危機去到噉囉。所以，其實點解我哋會諗到去報警，嗰個情況，或者去其實真係搵啲外在嘅—因為我哋隔住電話，我哋搵唔到佢㗎嘛—幫手望一望，或者真係個保安，即係我哋用盡方法去睇下呢個朋友係點，噉如果掉返轉唔係嘅，其實佢前面係一啲情緒呀、一啲唔開心嘅狀況，其實未去到噉呢，其實我哋都唔會輕易去報案，我哋都係一個互動，所以大家唔使擔心話，我係咪打上嚟就會好大件事呢，希望大家唔好噉樣諗，都係打上嚟傾偈，冇嘢嘅。
第二樣頭先嗰個補充回應返就係關於有幾危急啦，或者幾多啦，都真係有朋友可能就係俾人趕咗出門口嘞，嗰刻就係，係啦，跟住就打嚟，我諗都…好定唔好，我哋有三年啦，即係大家可能真係透過唔同嘅地方知道，其實可能可以有個地方可以暫避，所以先打嚟，有機會係噉嘅。都係好事啦，謝謝之前任何機構或者所有人幫手去介紹我哋服務啦，係嘞。都有趕出門口啦，或者真係嗰刻啱啱嗰個衝突好激烈嘅，覺得自己返唔到屋企啦，有可能會打嚟，亦都有噉。噉所以可以去到噉危急都有囉，亦都真係可能打緊囉，跟住打到嚟，跟住你聽到個電話係，唔係得一把聲嘅，係嗌緊交嘅，都有，係呀。 所以真係一個 Mystery box，即係一個神秘盒，你一 Pick 個電話，你真係唔知對面係噉點㗎，噉樣囉。
M：我即刻要 Hard sell 你哋，你哋電話幾多號？
C：係，我哋同．一線係 2217-5959。
M：好呀！有冇話限幾多條線㗎？
C：我哋會努力聽電話，最緊要係聽唔到嘅話，記住要留言，我哋一定會覆嘅。因為都真係未必入到線嘅有陣時， 就安排留言，我哋會覆返你嘅電話。
M：噉呀緩和下啲情緒，唔好成日講話啲噉緊急嘅嘢，因為同志有啲緊急，有啲唔緊急。好啦，我哋講下唔緊急嘅狀況噉，伴侶關係呀，或者係對於性別認同、性傾向嘅疑惑。你都有講過，有人打電話嚟吹水，或者同你分享吓自己內心近排經歷過啲乜嘢事情呀，或者同佢嘅伴侶發生啲乜嘢事，可唔可以分享吓？有一啲你聽咗電話好驚訝，然後發現竟然呢個圈子係會發生噉樣嘅文化，或者發生噉樣嘅現象嘅呢？即係嗰種現象，可能係連自己人，連同志們都未必知嘅。你哋有冇聽過呢？
C：我都係突然間有個新嘅例子，就係諗起一啲…我諗我哋圈子裏面再次文化啲嘅嘢囉。真係可能因為都係啱啱呢一段時間嘅事，我接到個電話就係講可能一啲 BDSM 嘅嘢呀。
當然佢打嚟就唔會噉直接，「可唔可以傾啲 BDSM 嘅嘢」，唔係噉樣啦，但係可能佢言談之間隱約，你就會聽到其實佢係咪想講一啲佢係比較 Submissive 或者佢嘅性唔係噉主流，然後佢覺得好孤單，或者佢覺得唔知點樣搵到朋友。或者甚至有啲朋友係佢打嚟，佢伴侶可能唔知嘅，但其實佢有某一啲嘅性喜好噉，噉點算呢？搵邊個講呢？又唔知去邊度搵人？然後可能佢會做一啲比較 Risky 嘅行為，噉佢都擔心自己，所以打嚟。
呢個時候，我諗就都好靠第一喺我哋同事嘅敏感度啦，第二就係真係都多謝佢肯打嚟講， 我哋就同佢傾囉，即係讓佢去了解多啲，同埋都去接納，嘗試畀佢知有人會明白佢，接納佢嘅部分噉，呢個係我覺得幾深刻嘅，因為都真係未必呢個圈每個朋友都會知道。仲有啲可能係我再諗起性 Related 嘅嘢就可能即係啲性病啦都有，我都真係試過有朋友打嚟係講自己做咗 HIV quick test，兩條線點算？噉好直接嘅。 當然我哋都會同佢講返啦，即係噉 HIV，希望…又插入個小知識先，大家記住穩定食藥就冇事㗎嘞，係輕鬆嘅，醫療上面係好支援到嘅。所以大家唔知嘅真係可以去問多啲，都想支援返大家呢個部分。
呢啲我哋都會去答啦，會去講啦，亦都讓佢真係安心啲囉，因為可能佢唔係好認識啲知識嘅時候可能會諗到好驚啦，會覺得係咪冇得醫㗎？係咪要死嘞？即係可能呢啲朋友係有㗎，我諗香港或者等等嘅教育真係差啲，所以有啲資訊真係流通得唔晒。可能啲朋友聽完會覺得鬼唔知 HIV 有藥食咩，但有啲朋友真係唔知。所以呢啲部分，我哋都會支援囉。
M：有你講嗰句肯定嘅說話，話可以食藥或者 At least 可以進入一個醫療程序係好緊要。縱使呢一個知識可能對於同志嘅圈子裏面至少會有熟悉嘅，但係畢竟嗰個人係當刻確診咗，你試諗下你確診自己有 COVID，你都會覺得自己唔知病咗幾耐㗎啦。你都係要人哋話畀你聽，你可以食特效藥，或者你要隔離或者飲多啲水，真係有一個肯定嘅說話話畀你聽，you will be ok。 你就會慢慢嗰個理智返返嚟，即係返返嚟，我應該要點做，我下一步應該要點做？我覺得呢一個就係輔導最重要嘅角色。講起呢個 HIV，我都係 Recall 返之前朋友同我講嗰位台灣接同志熱線嗰個朋友，佢哋都接有一啲 HIV 相關嘅問題，但係佢哋就比較搞笑，佢就好似講咗一篇複述返自己嘅一啲情色故事， 點解要講到情色故事呢？就係因為佢要話畀嗰個接線生知道，佢哋經歷咗啲乜嘢嘅接觸，最後係想問一個問題嘅啫，就係我會唔會中 HIV，即係講咗一堆發生過嘅事情之後，就係想問返個接線生，我會唔會中噉呀？噉樣會唔會掂到呀？我相信接線生冇辦法真係可以百分百 Guarantee 你有或者冇，一定要做一個 Check，做一個 Blood test 你先可以知道。我諗而家好似唔止係做 Blood test， ，anyway，呢樣嘢係接線生做唔到，但係接線生，或者係呢啲熱線嘅朋友們係可以做一樣嘢，就可以輔導你梳理返你當刻，要做啲乜嘢，或者能夠做啲乜嘢囉。
我又想問下阿 Wing 嘞，即係同樣問題就係，你有冇聽過一啲即係可能問題呀，吹水嘅一啲 Calling，聽完之後係令到你即係大開眼界，或者你會發現原來係一個噉 Amazing 嘅一件事或者一個現象呢？
W：有啲嘅來電者，噉佢會打電話嚟呢，佢會講自己接受唔到自己呀。佢嗰個接受唔到自己嘅程度係好嚴重，佢係會用盡方法去令到自己變直啦。我覺得呢個係我聽噉多電話嚟講，我覺得係最比較驚訝嘅嘢。我諗佢喺搵我哋傾偈之前呢，佢都應該同好多其他嘅人去傾，但其他人同佢傾，可能佢會覺得你哋傾完都係，你哋話冇問題啫，但其實我都覺得自己係有問題嘅。我諗我哋要陪伴佢去感受嗰段不安呢，其實都好 Feel 到佢嗰個壓力囉。但係，你話佢同我哋傾完之後，係咪有好大嘅轉變呢？ 我諗暫時係未有嘅，但係，起碼佢都可以感到有人陪住佢，聆聽佢嘅唔開心呀，我諗都幫到佢一啲啲嘅。但係，佢接受唔到自己嗰樣嘢真係好少見係噉樣。
M：你可唔可以講多少少呢一種接受唔到自己，佢係有幾接受唔到？佢用啲咩字眼去描述過自己？你記唔記得？
W：佢話，例如佢信嘅宗教入面嘅一啲主張佢噉樣做係錯，係唔正常。仲有佢講過，佢好想同異性拍拖，佢好想同異性拍拖，但係佢係喜歡唔到異性嘅。
M：OK，好感謝阿 Wing 去畀多少少嘅資訊。我相信其實佢內心係有經歷好大好大嘅掙扎，佢應該係四方八面去搵人去畀啲意見佢啦，噉啱佢又打到你呢個同．一線去得到你哋嘅回應。因為點解我會想問多少少呢，就係近排 PrideLab 耳聞一啲求助嘅個案，求助個案就係家長知道自己嘅小朋友係有同性傾向噉，噉佢就真係單刀直入直接問，我個小朋友係同性戀點算？一個噉嘅 Message 扔埋嚟。
對於好多人嚟講，好難想像小眾會經歷幾多嘅風浪或者幾多嘅社會上嘅待遇，其實，可能對某啲人嚟講係好困惑或者好不安嘅。真係感謝同．一線有呢條熱線可以疏解到打電話嚟嘅人嘅一啲情緒啦。我又想接住嚟再想問下，就係一個好現實或者好 Technical 嘅一個問題，就係，我一開始都有問到呢一個有 Generation gap 年齡代溝，有好多人都唔打電話嚟或者唔鍾意打電話噉。同．一線噉作為一個聽電話嘅一個平台，當然頭先已經有好多嘅分享已經證明咗係有呢個需要，係有人打電話嚟，but 我又想問下，有冇啲乜嘢機會可以令到更加多嘅人知道同．一線？你哋係話有啲 Offline 嘅活動呀嘛，可唔可以講下啲 Offline 嘅活動有啲乜嘢？
C：其實係嘅，因為熱線學你話齋，未必而家最主流，大家唔係傾電話，可能主流啲係用 Social media 去 Text。所以，我哋都會做一啲 Offline 嘅實體活動去吸引啲朋友仔。 我負責啲女同志嘅活動啦，我哋之前都有舉辦一啲有關親密關係嘅工作坊，白啲講，去學下點拍拖啦，女同志好 Concern 拍拖嘅嘢。噉我哋都有一啲其他嘅聚會啦，一啲可能小工作坊，即係整啲手作仔都有嘅，啲男同志嘅朋友噉，噉樣。我哋都會做一啲 Training 啦，當然呢個就唔係話向公眾 LGBT 嘅朋友，可能係 for 一些專業人士，可能佢哋就會識介紹我哋，都緊要囉。我講埋跨性別嗰邊啦，跨性別活動佢哋都好好嘅，佢哋都會做一啲可能女聲班，化妝班呀，呢啲真係 for 返社群嘅需要， 所以係兩邊走嘅。可能掉返轉 Offline 嘅人認識咗我哋噉嘞，就知道原來熱線…即係有個信任度呀。因為掉返轉有啲人真係貿貿然打上嚟，你鬼知邊個聽咩，噉所以都未必噉信得過。如果面對面見咗，對個服務有信心嘞，可能又肯打上嚟噉亦都有。又或者我哋自己同事們喺實體活動嘅時候，見到似乎佢都有啲嘢可以傾下喎，都會邀請佢哋打上嚟都有。所以係一個互相嘅平台。
M：想問吓，有冇可以再分享下呢啲 Offline 嘅活動，點樣可以，即係，你有冇遇過一個 Offline 嘅活動嘅一個路人甲，但係最後變咗一個你哋嘅服務對象嘅呢？
W：有，好多啊。佢哋可能最初係朋友搭朋友嚟參加我哋嘅活動，噉佢最初可能參加嘅活動就唔會講好多佢自己嘅個人嘢，可能直到可能參加咗我哋嘅聚會，半年或者一年呀，佢就會同我哋講話，其實我屋企有啲唔開心噉，噉再傾落去發覺原來佢都係有啲困擾，其實可以透過輔導或者可以喺熱線嗰度同你傾吓。有啲會叫佢打上嚟熱線啦，有啲我哋會開個案處理，都唔少嘅。同埋，我想講係跨性別嗰個社群，因為我哋嗰個年齡層係的而且確係比較大少少嘅，佢哋可能有啲已經係冇同屋企人聯絡嘅。變咗其實好多節日嘅活動對佢哋嚟講都好孤單。噉我哋嗰啲聚會就會比較針對一些節日嘅活動啦，例如係啲中秋節、做冬、聖誕節、新年，可能會有啲以前未有疫情嗰陣時就可以食飯。我哋就透過一啲飯聚，令到佢哋都有返啲屋企嘅感覺，佢哋都好 Enjoy 呢啲活動。
M：阿 Wing 畀咗一個好好嘅例子，回應咗其實我本身都想問吓，同志需要啲咩情感嘅支持？我諗呢個就係一個好好嘅例子。可能對於好多，唔知啦，對於我嚟講，我係幸運嘅一群，我自問，節日有身邊嘅人同我一齊度過，但係對於好多小眾嚟講，無論係你咩年齡都好啦，有機會可能係一個人度過，可能你搬出去住，或者你身邊嘅朋友們或者你屋企人係唔接納你嘅情況之下，孤獨係一個對於我嚟講，我覺得係一個好致命嘅一件事嚟嘅。所以有同．一線 Offline 嘅活動令到你哋可以聚集到一班嘅同志，我唔知「圍爐」會唔會聽起上嚟太行，但至少嚟講會提供一啲溫暖畀佢哋，令到佢哋覺得自己唔係孤單，可以講多啲嘢畀人哋知，即係分享自己嘅經歷或者佢嘅困惑畀身邊嘅人知道，係一個好重要嘅一個活動。我諗呢個亦都係凝聚更加多同志，即係需要凝聚組織，凝聚 Group，WhatsApp group 又好，乜嘢 Group 都好，同志們係需要呢啲噉樣嘅支持。
好嘞，去到呢度臨近呢個節目嘅尾聲，有幾樣嘢係想介紹或者係趁機去推銷一下嘅。 就問下同．一線嘅兩位，有冇嘢係想推薦下或者係推介下？嚟緊有啲咩 Plan 呀或者係你哋有啲咩新嘅服務之類？
C：最推薦梗係大家 Follow 我哋嘅 Social media，Follow 我哋 IG 啦最好就，因為我哋真係有啲任何活動嘅宣傳，我哋都會放上去嘅，而家都相信大家應該都會有 Instagram， 我哋 Facebook 都會同步更新嘅， IG 你可以 search prideline，串一次俾大家聽，就係 prideline22175959 噉，就搵到我哋㗎嘞。Facebook 你打同．一線就搵到，就可以上面追蹤我哋新嘅活動啦，亦都可以報名參加去認識我哋。呢個係其一噉。噉其二，阿 Wing 有冇咩想講？
W：其二就係宣傳下我哋條熱線 2217-5959。大家有啲乜嘢困擾或者唔開心呀，或者開心嘅時候都可以打電話上嚟嘅。另外就其實我哋都有輔導嘅服務，如果大家有情緒困擾嘅話都可以打電話去同．一線，去問返其實我噉樣嘅情況可唔可以提供輔導服務畀我噉呀噉樣噉，噉我哋都會睇返你嘅情況，然後再作安排。
M：好，噉感謝有呢個埋尾講多一次電話 Number，實在太好嘞，唔使我 Push。Cleo 係咪有嘢想講呀？
C：冇呀， 都俾你望到。係呀， 我係 Cleo啦。如果我想再去推薦呢，我諗條熱線大家真係可以袋定落袋囉，因為我諗無論危急情況啦，當然唔希望成日遇到危急情況啦大家，同埋我覺得有一個係家人呢個部分，因為頭先可能前面講到出櫃問題，仲有啲部分可能係家長未必接納我哋，我諗可以真係如果家長願意或者點，其實又唔一定要迫佢哋打嚟，但係要讓佢哋知道有 Resources 囉，即係有資源，原來家長都服務到可以傾。因為可能市面唔多去照顧 LGBT+ 嘅家長朋友，因為掉返轉，我自己個人都好擔心佢哋會 Reach 咗其他未必真係噉友善嘅機構，你知家長嘅 Networking 好容易接觸到一啲，其實唔係真係噉 Friendly 嘅機構，但係個取態可以好唔同 。我哋行 Affirmative 係肯定 LGBT 傾向嘅路線， 我哋同家長，當然我唔係迫家長接受啦，即係用呢個傾向同家長傾，就會我對我哋嘅服務有信心啲囉，比起某一啲機構。所以就係囉，大家都可以袋定，有啲家長真係有需要，推薦畀佢囉，都唔一定要打嚟，袋落袋先囉。
M：如果呢度有啲可能聽咗唔係好耐嘅啲聽眾們，或者你聽咗好耐都好啦，Affirmative 呢一個字其實前一兩集都有提及過嘅，就係一個肯定性嘅一種，即係處理性別小眾嘅一個方式，嘅一個取態啦。唔係話佢一定係最好或者最完美，但至少呢一個取態對於任何人嚟講，無論係你自己係性別小眾或者你係性別小眾嘅朋友或者屋企人都好，都係一個選擇嚟嘅。呢一個方法，係以肯定返嗰個人自己嘅自我認同為主， 就少啲嗰一種「你唔應該噉做呀，你要改變呀，你要變返正常呀」嘅論調。對於好多人嚟講，頭先 Cleo 講得好好就係，小眾們可能佢哋有自己嘅同儕啦，佢哋自己圍起幾個人就可能已經開咗個 Group，但係對於一個可能有少少年齡上面嘅差異嘅屋企人呀，或者朋友，或者長輩呀，佢哋其實個支援嘅網絡反而係唔多，所以如果聽到嚟呢度嘅朋友，可以真係攞支筆，攞…我唔知呀，攞張紙又好，攞張卡仔都好，其實你可以 Mark 低同．一線嘅電話 Number ，唔係任何時候攞部電話 Send 到呢個 Contact 嘅，有陣時可能真係一張卡，一張實在嘅卡係可以幫得到忙。再嚟 Hard sell 多一次，電話幾多號？
C：係！2217-5959，24 小時，年中無休，感謝大家。
M：耶！太好啦。 呢一集就差唔多去到呢一度嘞，喺度再次感謝 Cleo 同埋阿 Wing 嘅時間。《點止港同志》係一個以香港同志角度出發嘅 Podcast，希望可以將大家生活裏面嘅性別同埋同志議題，用廣東話嘅聲音同埋文字嘅方式保留同埋流傳嘅。每一集嘅 Podcast 我哋可以製造文字檔畀你，畀唔方便聽聲嘅朋友們呢，都可以知道我哋嘅資訊。 多謝你收聽呢一個節目，而且聽到最後。想收到下一集嘅內容就訂閱我哋啦， 如果你對於呢一個主題有共鳴，或者你係有你嘅 Story，想分享畀我哋知道嘅話，歡迎你 DM 我哋 Instagram @pridelabhk，亦都歡迎你喺 Apple Podcast 或者其他嘅聲音平台上面留言，同埋畀你嘅回饋，你嘅支持同埋鼓勵將會係我哋默默耕耘嘅動力嚟嘅。 今集就講到嚟呢度，感謝兩位，期待下一次同你《點止港同志》。Bye Bye！