「家寶」嘅「拗直」經歷畫成漫畫之後，好多人先知原來香港今時今日仍然有改變性傾向嘅行為。
今時今日，香港有一班年輕研究員係學術期刊刊登一篇關於香港改變性傾向行為嘅研究，紀錄香港性/別小眾嘗試令自己成為異性戀嘅途徑同埋經歷，到底結果係點？點解「拗直」會有風險？就要聽今集嘅快速recap啦！

參考資料：

• Chan, R. C. H., Leung, J. S. Y., & Wong, D. C. K. (2022). Experiences, motivations, and impacts of sexual orientation change efforts: Effects on sexual identity distress and mental health among sexual minorities. Sexuality Research and Social Policy. Advance online publication. doi: 10.1007/s13178-021-00669-5
• Bishop, A. (2019). Harmful treatment: The global reach of so-called conversion therapy. OutRight Action International.
• Ho, P. S. Y., & Hu, Y. (2016). Pray the gay away: Identity conflict between Christianity and sexuality in Hong Kong sexual minorities. Gender, Place & Culture, 23(12), 1725–1737.
• Hong Kong Psychological Society. (2012). Position paper for psychologists working with lesbians, gays, and bisexual (LGB) individuals. Division of Clinical Psychology, Hong Kong Psychological Society.
• Position Statement of The Hong Kong College of Psychiatrists on Sexual Orientation

真光社同埋香港教育大學陳俊豪博士同埋喺2020-21年透過問卷，以隨機樣本嘅方式收集咗219位香港性小眾關於企圖改變性傾向行為，喺報告裡面叫「性向試改」，英文叫Sexual Orientation Change Efforts嘅經驗。

「性向試改」係指所有以消除被同性性吸引為目標，並促使個人被異性性吸引嘅嘗試，最常見嘅方法包括接受俗稱「拗直治療」、服用精神科藥物、尋求宗教輔導以及自我抑壓。

背景

• 香港同性戀除罪化已經超過30年，但俗稱「拗直治療」嘅改變性傾向行為喺香港並非違法。
• 香港精神科醫學院 (2011) 指出：同性性傾向唔係精神病（homosexuality is not a psychiatric disorder），現今仍然未有科學同臨床證據去證明嘗試改善性傾向會有任何好處。
• 香港心理學會 (2012) 指出：同性／雙性性傾向並非心理病，現時未有證據證實一啲改變性傾向嘅行為係有效兼無害。
• 香港政府喺2019年就曾被批評，去資助某些宗教團體（如新造的人協會、後同盟）去提供有關糾正療法嘅訓練俾社工
• 喺2015美國一個大型研究以問卷訪問咗1612位接受過糾正療法，同時喺耶穌基督後期聖徒教會 嘅性小眾，當中大部分受訪者嘅性傾向係冇改變到，但就帶嚟嚴重嘅心理影響包括抑鬱症狀、孤獨感，甚至係濫藥同埋自殺傾向。

性向試改 受訪者特徵

• 219位性小眾參與問卷，72.6%定義自己係男同志／女同志，21%係雙性戀／泛性戀，6.4%係無性戀、queer、questioning或者其他
• 竟然有5分之1嘅性小眾曾經接受改變性向。呢個比例係同2021年哥倫比亞另一個研究一樣咁高；而對比美國，只有7%嘅性小眾曾經接受改變性向。而有冇宗教信仰呢樣嘢，喺數據上係一個有效嘅原因去影響性小眾進行改變性向嘅決定。喺接受改變性向嘅人入面，超過7成係有宗教信仰。
• 試過改變性向嘅人，超過一半係18歲以下嘅性小眾；當中更加有差唔多4分之1 (23.19%) 嘅人只係10至14歲。當中，有3分之1 (33.33%) 嘅人係體驗超過一年，亦有4分之1嘅人體驗超過半年。

咁講到嘗試改變性向，研究就分「自發」同埋「他發」，「他發」即係當事人係被其他人叫去做治療。受訪者平均都被兩個人建議過要改變性傾向，有超過七成人試過俾宗教嘅弟兄姐妹 (34.6%)或者領袖(42.3%)叫佢地去做；又有七成人試過俾屋企人(50%)或者親戚(23.1%)叫去試；超過一半人就試過俾身邊其他圈子例如同事、同學，或者直人朋友叫。

聽到呢度，你可能會問，咁佢哋自發同他發嘅原因係咩呢？

從自己信念認知角度，研究數字明顯反映到收到他發嘗試嘅原因係因為覺得同性戀係邪惡、違反大自然法則、同埋係病態嘅。

從家庭角度，他發嘗試嘅人主要覺得因為有違傳統家庭觀念，同埋要傳宗接代。宏觀啲睇，從社會角度而言，佢哋希望可以異性戀咁生活，人始終要有歸宿，呢班人都有表達擔心自己晚年生活，所以嘗試改變性向。

而自發嘗試嘅人最想獲得家人接納，佢哋唔想被社會歧視，加上唔肯定自己性向，加上違反信仰觀念，喺呢幾個主要原因之下就自發尋求改變同性性向啦。

咁佢哋經歷啲咩形式嘅治療呢？
自發同埋他發嘅受訪者最常體驗改變性向嘅途徑都係透過宗教方法，例如祈禱、禁食（教會有一種叫做「禁食禱告」）、甚至係驅魔 (49.28%)。其次自發嘅受訪者會嘗試壓抑或者改變佢嘅性別表達方式，他發嘅人會尋找心理輔導，亦有少數但聽落好極端嘅方式，包括接受藥物治療 (8.7%)、甚至係逼佢同異性進行性行為(4.35%)。

糾正療法 正面影響

• 12個正面影響嘅選項之中，有11個接近7成人覺得係完全冇幫助。當中最多人覺得冇幫助嘅係「應對以前受創傷嘅經歷」；之後並列第二覺得完全冇幫助嘅係「增進家庭關係」(77.1%) 、「認識親密伴侶」(77.1%)、同埋「提升心理健康」(77.1%)。
• 喺「感覺會被身邊嘅人接納」呢個選項上，有16.7%嘅受訪者喺糾正療法期間，或者短期內都有20.8%嘅人覺得有幫助，但講到長期的話就淨返1個受訪者認同。
• 當中有一項，有差唔多一半人覺得長久正面影響，就係鞏固咗自己嘅性／別身份
• 而問到有冇其他諗到嘅正面幫助，95.8%嘅人都係話冇。

糾正療法 負面影響

• 12個負面影響嘅選項之中，長遠而言影響到受訪者係嘅頭三位分別係：「發展出羞愧、内疚和自我憎恨嘅感覺」(29.2%)、「損害心理健康」(29.2%)、「對自己感到失望」(27.1%)
• 改變性傾向期間，最多人覺得「浪費時間」(41.7%)，之後亦有35.4%人覺得「有羞愧、内疚和自我憎恨嘅感覺」、同埋31.3%人覺得「對自己感到失望」
• 值得留意嘅係，有29.2%嘅人曾經喺之後短期內觸發自殺嘅念頭添

我都聽過唔少經歷過拗直治療嘅人嘅分享，改變性傾向行為往往充滿宗教嘅設定，利用人性的信心同埋宗教，用「祈禱」去作為「糾正」嘅動機同力量。而當事人喺內心充滿困惑、自我質疑嘅時候，利用「信心」、「懺悔」等等嘅字眼黎加強性小眾嘅愧疚感同埋罪惡感。即使後退一萬步，某啲行為真係改變到性傾向啦，點解要將內心掙扎，同埋難以言喻嘅內疚，成為治療嘅經歷呢？

聽完研究裡面嘅數字，大家應該更知道改變性傾向嘅效果以及矛盾。

下一集除咗我，仲有邀請到研究團隊裡面嘅真光社，繼續傾下研究裡面受訪者嘅心聲，「自發」嘅人點解其實唔係心甘情願去改變性向呢？同埋會有拗直治療生還者嘅親身經歷分享，用過來人嘅角度，講吓咩先係適合性別小眾嘅心理支援呢？

《點止港同志》喺一個以香港同志角度出發嘅Podcast，希望可以將大家生活裡面嘅性/別同同志議題同廣東話聲音同文字方式保留同流傳。每一集嘅Podcast我哋都可以製作文字檔，畀唔方便聽聲音嘅朋友都可以知道我哋嘅資訊。

多謝你收聽呢個節目，而且聽到最後。想收到下一集嘅內容，就訂閱我哋啦。假如你對呢個主題有共鳴，想分享你嘅故事畀我哋知，歡迎你dm我哋@Pridelabhk。亦都歡迎你喺Apple Podcast留言同埋畀星星回饋，你嘅支持同鼓勵會係我哋默默耕耘嘅動力。

今集就講到呢度先，期待下次同你《點止港同志》。