M：馬天娜

K：Kelvin

歡迎返嚟《點止港同志》，我係主持馬天娜。呢一集都算係一個跨境嘅一集嚟嘅，好有趣地呢，一個香港人一個澳門人呢，我都係而家錄音嘅時候先知道呢。我哋都分別喺台灣呢個地方做呢個訪問嘅。可能對於好多香港人嚟講呢，澳門係一個叫做過大海嘅地方，除咗賭場之外呢就係大三巴，除咗大三巴之後就係得葡撻嘅。咁究竟係呢個賭場大三巴同葡撻以外，其實個size就係得香港荃灣區咁細，一個香港等於三十幾個澳門咁嘅size嘅。懸殊之下，作為一個澳門人，去建立一個澳門嘅同志組織會有啲乜嘢嘅心路歷程呢？以及係其實回顧過去，澳門以前曾經都有過一啲細嘅組織會唔會係有啲乜嘢可以傾返嘅呢？咁今次就邀請咗呢個澳門多元性別社群協進會嘅代表Kelvin嚟同我哋分享下嘅。Kelvin同大家say個Hi。

K：Hello大家好，我係Kelvin，嚟自澳門。

M：我頭先同大家講開場白嘅時候，我哋發現我哋兩個都唔係自己嘅原生地，兩個都用唔同嘅身份係台灣生活緊。講返澳門先，咁澳門咁細，其實喺澳門住嘅同志，佢嘅景況會唔會受到影響呢？例如我記得你喺有自己人嘅節目裏面有講過，其實澳門一出櫃或者係即係喺澳門好細，細到係其實你一出櫃就所有人都知嘅一種感覺。可唔可以分享下喺澳門嘅同志們，佢出櫃同唔出櫃嘅個決擇呀，或者個困難係點？

K：我覺得澳門係同志出櫃呢個議題上面，講緊嘅係你嘅姨媽姑姐全部住係你旁邊。我對於香港嘅區唔熟啦，但係我都知道港九新界咁樣啦係咪呀？香港嘅同志即使你係…譬如我住係港島，我今日同屋企人出櫃啦，咁我出櫃屋企人可能唔接受啦，可能會吵架啦，可能需要一啲距離咪去冷靜下啦。咁嘅時候我至少都仲可以搬去過可能九龍呀，可能去唔知咩新界呀嘅朋友屋企度住住先，避下風頭一兩個禮拜，等阿媽道火落咗啦，咁我咪返返屋企認低威囉。咁都仲有一個距離呀嘛。

但係係澳門呢，有一個狀況就係sorry呀，佢就係豆潤咁細粒。咁佢咁細粒嘅時候咩狀況呢？就係澳門有三個島啦，曾經叫做。而家填到得啦兩個啦。咁中間全部都賭場啦。咁但係個三個島裡面，你可以係點樣喺呢個A島，澳門島搬去氹仔咁樣，過咗條橋咁係咪就叫做搬咗屋呢？你阿媽可能今日搭巴士都係十分鐘之後就見返你咁樣，你嘅姨媽姑姐三姑六婆全部就住係你隔離街，係一個好緊密嘅一個城市裡面。其實你好難去做到出櫃呢件事，因為你會發現其實你，其實唔單止家人，你可能朋友圈亦都係有咁樣嘅狀況啦。譬如澳門人口少啦，雖然學校都好多間啦，咁但係可能講緊嘅係你由小學初中高中，嚟嚟去去嗰間學校，跟住可能都係嗰班同學仔。一間學校可能佢一個年級得四班五班咁樣啦，咁就算佢點樣洗班都好，其實嚟嚟去去嗰200人，你就係識咗嗰200人啦。咁喺呢個狀況之後請問一下你去到大學又係咩樣子呢？哦，唔好意思，大學都係那一屆嗰啲人喎。咁然後成件事係點樣呀？成件事其實就係無論你係朋友啦，屋企人啦，所有人都係住係你隔離街嘅啫。而呢種感覺係好，令到同志係好難出櫃，嗰個出櫃嘅壓力係好大。因為我出櫃之後我離開唔到，我冇辦法去俾到一個，假如大家接受唔到我的時候，我可以呢去邊嘅一個狀況。我覺得呢個位其實同香港有啲類似嘅地方就係，我哋都有一個一國兩制之下嘅政治邊界。就係澳門係澳門，香港係香港。假如今日我同一個香港人拍拖咁樣喺埋一齊咁樣，咁到底佢係來澳門生活，佢係一個外地人啦，定係我係去香港生活，我係一個外地人呢？咁甚至無論你去返大陸又好呀，去台灣、去英國、去美國、去邊都好，呢對couple佢係一個外地人。你有一啲福利呀，一啲保障呀，其實都唔關你事㗎喎。咁呢啲時候，你往往就會覺得更加困難成件事。咁所以你剛才如果問到，其實對於即係地方細係咪真係影響到出櫃呢，我覺得係，佢唔單單只係我哋過去，純粹就話出櫃係同其他人分享我自己嘅性傾向啦，我嘅性別認同啦，一個咁簡單嘅步驟。佢可能更加多嘅係講緊嘅係佢後面嗰個藤掕瓜瓜掕藤，掛嗰堆嘢，你係搞佢唔掂。

M：你講緊頭先嗰個200人一班，即係一級咁樣呢。諗返起以前小學呀，小學嘅時候就，因為香港十八區，剛才你都有講，即如果你跨區返學嘅話呢，你成個嘅社交圈子就會唔同咗啦。咁如果你假設你所有嘅學校都係跨區咁講，其實你以而家DSE制嚟計，即係你唔會中間唔會再出去，你讀成個中學讀到尾你就考一個大嘅考試，跟住你就會 whether or not你會入大學咁樣。如果你每一個大學，每一個入學嘅階段你都係跨區，其實你會大洗版一次你嘅社交圈子至少三次，即係你會小學就一個階段啦，跟住中學一個階段啦，然後大學一個階段咁樣。所以我聽到嗰個時候我突然間醒起好大壓力呀。我自己係諗緊我以前係住新界啦，咁我去咗個九龍區大學讀書呀，咁我至少就會大洗版呀，即係我就會大洗牌我嘅所有嘅friend呀，唔同學系呀唔同嘅朋友。最後可能係得一個人係同我由中學一齊讀到去同一間大學嘅咁樣。識我嘅人或者係認識我後尾即係意識自己呢個同志身份嘅人，其實係係經過篩選呀，即係經過你呢個轉學校同埋唔同地區嘅生活而有所改變咁樣。我就諗起以前去呢個金門呢，即係台灣金門同埋澎湖旅行嘅時候呢，佢哋呢有一個說法嘅，有個搞笑嘅說法，即係話金門呢，罪案率好低㗎咋。你做親啲作奸犯科嘅嘢呢，你成條村都會知㗎啦，即係你走唔甩㗎呀，除非你游水咁，你游水游去邊先得㗎。係，住喺裏面嘅人係會有一種內在嘅壓力，你覺得即係難以去，好坦露地，有一個安全嘅距離令到你去，即係試探下究竟你出櫃嘅程度呀。所謂究竟你淨係同你嘅朋友出櫃呀，你同同事出櫃呀，即係唔同階段嘅，嘅出櫃就變得好似好，好零與一嘅距離呀，即係你一係出櫃，一係唔出櫃。

K：係呀，無錯。

M：作為一個香港人好好奇呢，係點樣識自己人（性小眾）嘅呢？

K：我諗其實可能都會比較多係譬如用交友dating app咁，然後或者係friend搭friend，即係始終都會有一兩個member friend咁，然後再friend搭friend咁識。不過，我其實近年感覺上就係多咗好多年輕人呢，有用Instagram嘅話呢，佢哋會係Instagram見到如果呢條友佢有好多共同朋友嘅話呢，即係好多共同嘅member（同志）朋友嘅話，咁佢就係㗎啦，咁就follow佢咁，咁大家互follow完之後呢，就會可能，就睇下⋯⋯可能有啲人唔講嘢㗎，佢互follow完之後就完咗，就隔離like大家story，like大家啲post咁。咁可能有一個契機，跟住佢哋就展開咗對話，咁就會互相認識囉。我見到目前，大概35歲以下嘅同志們嘅，樣態比較都係咁樣friend搭friend為主，或者係唔知點樣亂咁follow你哋ig，跟住就，形成咗一個神秘嘅呢個IG嘅社群咁樣囉。

M：好新奇呀，就為一個已婚婦女，即係第一次聽呢一個instagram互follow嘅交友法，但係我覺得呢個係make sense嘅喎。即係當你見到可能，假如係一個，天菜級嘅網紅咁計啦，跟住你可能見到有一啲人係，有呢個follow嘅數量係好多有共同account嘅，共同嘅主題嘅話其實，其實我覺得係一個好聰明嘅篩選方法嚟㗎。即係你知到佢鍾意啲乜嘢，咁佢鍾意佢先會follow啲account㗎嘛，咁可能佢唔淨只係follow啲人，佢可能follow啲主題咁樣，你就可以一下子就知道究竟嗰個人係咪同你有好多傾偈咁樣。我覺得呢個方法係幾聰明嘅。

K：但呢就都有一個狀況嘅，就返返嚟啱啱澳門又好細呢件事啦。咁就個狀況就係我有聽過一啲朋友就分享啦，佢就話咁但係其實因為譬如佢，因為大家都好清楚你係邊間學校度畢業咁樣，你人生，你可能，我同你又細到大廿年都係同一間學校㗎啦咁，咁變相就係我當我見到你IG follow咗其他人嘅時候，我就會話「咦點解你又識佢嘅？我去做義工識佢㗎喎，你又點解識到佢㗎」噉樣。咁跟住然後你就要去搵一個藉口出來話比人知，點解我識佢嘅呢咁。

M：ok，咁就變咗做，哎呀！突然間諗起嗰個互相指對方嘅Spiderman咁樣，即係點解你又會識佢。

K：冇錯，所以呢個又係啱啱你會提到，就話咁會唔會影響到come out呢？其實我諗其實喺網上面嘅come out都有咁嘅狀況，會唔會有佢哋都有提到就話有時候，可能要創一啲細號IG，Instagram嘅細號（小帳）去，去避開Instagram嘅細號，專門for呢個gay identity嘅噉樣。咁然後佢先至可以去咁樣互相follow，咁佢就唔會畀佢…現實生活中嘅其他朋友就係發現佢又follow到其他friend咁樣，即係佢可能會真係比較深櫃嘅狀態之下。

M：係做一個深櫃嘅同志就開一個小帳呀。所謂嘅小帳，即係開啲所謂幽靈account咁樣，就可以避開咗。我覺得而家好似時代嘅，即係用呢個社交媒體嘅人都開始興起有呢啲，完全唔po相嘅小帳呀。即係為咗純粹follow或者係會follow呢件事，而現身出嚟嘅一人多account嘅文化咁樣。咁除咗開，除咗開呢個虛擬嘅社交媒體之外，咁有實體嘅社交咁。咁我亦都有聽過你之前有分享喺澳門呢，問咗好多次呀個主持我記得。澳門呢有冇呢個gay/les bar？跟住呢你又講到話gay/les bar呢，就係通常得啲竇嘅啫，即係可能真係有一個擺其名叫自己gay bar或者les bar嘅，因為呢個澳門嘅生存空間真係太細啦。咁可唔可以分享下，即係脫離手機上面嘅虛擬嘅社交媒體之外，你哋會去啲乜嘢實體嘅地區、地方或者係場合去蒲呀，社交呀，郊遊呀。

K：最近咪香港囉。

M：你哋過大海過嚟⋯⋯

K：冇錯，我哋就係過大海調返轉啦。呢個問題真係可能呢一兩年有好多朋友都好好奇呀。其實都甚至有啲人譬如黎澳門玩，佢哋都會問我：其實澳門有冇啲乜地方可以我哋去玩㗎？我唔係淨對夜晚嗰啲地方蒲，喝吓酒。Sorry呀，我哋目前至少我自己啦，我唔可以代表全部人啦。咁我自己身邊所知道嘅就真係冇噉樣嘅地方，即係你話要一間完全係for member嘅一間就冇。即使佢可能話我係淨係for LGBT所有非異性戀、非順性別嘅族群嘅，都冇一個咁樣嘅空間。係啦咁樣，咁所以我諗實體係困難嘅。

咁當然啦有一啲次文化係存在嘅，譬如可能魚塘呀，呢啲咁都會有嘅。咁但係你話講緊一啲單純飲酒，單純比較純粹識朋友嘅，目前我聽到最多都係去香港啦，或者係去台灣啦，或者係有啲會選擇去大陸啦。咁樣嘅方式去實體交友。

M：OK，咁係香港即係香港目前嚟講都有一啲大型嘅活動啦。即係例如12月會有Pink Dot呀，11月可能會有同志遊行相關嘅一啲嘅活動呀，或者係可能會有一啲小聚會咁樣啦。Let’s say過大海咁你都所謂要出入境啦。咁如果呢頭先講到話台灣咁，有台灣同志遊行啦，台灣唔同地方都有遊行呀，或者係一啲聚落呀。亦都有一啲熱門嘅Gay and Lesbian嘅地點咁樣啦。咁你哋會唔會覺得，要過大海先可以搵多你哋所謂同聲同氣嘅呢個地方，會影響咗你哋對於澳門呢個地方嘅歸屬感？即係你哋好似覺得澳門好陌生呀，澳門好唔屬於自己。我要去到一個外地嘅地方先可以做自己呢個感覺。

K：因為我自己始終都離開，即係係澳門以外嘅地方生活過七八年啦。咁所以我自己個生命經驗確實有感受到，係澳門作為一個同志，同埋係外地作為一個同志嘅差別嘅。我諗嗰個狀況係有一個好大嘅差異，可能會係想提出嘅先呢。就係喺外地你可以係，我今日最priority最主要嗰個identity，我係一個LGBT。於是我weekend，我會去gay bar，然後我下午可以去同一啲member friend打波，去同一啲member friend玩board game咁樣。我可以成個weekend都好LGBT嘅，我淨係同LGBT社群一齊生活嘅。咁呢件事係外地係可以做得到嘅，但係喺澳門嘅話，其實可能嗰個社群嘅現況係，可能甚至講緊嘅係一班超過十個人嘅LGBT group埋一齊嘅圈子，實體一齊聚會呢件事都唔係一個常見嘅現象。所以其實我哋唔會話澳門嘅認同就俾人哋落後，但係澳門嗰個認同嘅現象，反而會係比較收埋咗係個人，同埋可能小圈子兩三個人之間嘅，嗰種咁樣嘅一個認同。佢就比較唔會去聯想到，即如果我係土生土長，係澳門嘅生活人，我好難去聯想到我要去，咁多member同時出現一個空間。譬如我哋組織咁啦，早排台灣呢邊台北嘅遊行咁，我哋都有邀請一啲，如果你唔想自己一個去遊行，或者你想一班澳門一齊行遊行嘅，你可以跟我哋一齊行啦。見到嗰個參加嘅人數都出乎意料嘅，即報名參加我哋喺台北嘅一個聚餐，再加埋遊行啦咁樣。

M：有幾多人到呀？

K：差不多接近15到20人，係有跟住我哋一齊去行個遊行，一齊出嚟聚餐。咁同一時間佢哋都有再同我哋分享嘅，嚟參加遊行嘅呢班朋友，佢哋話其實佢哋都有另一班朋友，係同時行緊遊行嘅，但係佢因為我哋舉住澳門嘅旗，所以佢哋反而係唔夠膽行過嚟。係啦，佢哋驚畀人影到，然後變成係畀人知道出咗櫃啦咁。咁所以變成係有一班朋友仔，佢哋會係我哋旗附近嘅可能20米咁樣啦，影我哋啲旗，話「我哋係附近啦，支持你哋」，都有啲咁嘅朋友仔嘅。咁所以我會覺得其實係有一部分人佢如果係想搵更加多嘅呢個LGBT community嘅認同嘅時候，佢係真係會願意離開澳門去搵。我覺得嗰種感覺係佢知道自己需要呢個，然後佢會出去向外尋求囉。但係唔會話掉返轉就話因為澳門冇，然後佢哋就不滿足於現象。我又覺得好似自己做一個澳門人又好似冇呢種感覺囉。

M：我諗呢個對於同志嚟講，我諗到呢個集結嘅力量以及歸屬感係非常重要。即係Pride Lab一路以嚟都搞咗好多唔同大大細細嘅，無論係網上，或者係實體活動都會凝聚咗唔同年紀，例如可能講新嘅議題會凝聚咗啲50後嘅人，純粹係吹水會嘅可能搵咗啲上班族咁樣。即係佢哋每一個階層嘅人，其實佢哋都好期待係會有一個更加友善、更加同志友善嘅組織或者係機會。即係可能係一次一晚噉嘅一個機會去聚集佢哋嘅傾計。我又諗起Kelvin你而家搞呢個組織，喺澳門搞一個同志嘅組織係點樣嘅呢？

K：喺澳門搞一個同志嘅組織⋯⋯

M；你有冇一個字去形容你嘅心態？

K：一個字去形容⋯⋯我會覺得係好期待但係又係好痛苦嘅一個歷程嚟嘅。點解咁講呢？係因為你好期待澳門嘅同志朋友們，佢哋會願意出嚟同你分享佢期望嘅澳門係乜嘢樣子。因為我覺得每一個城市每一個地方，佢哋唔同，喺唔同嘅時間點度開始同志運動呢，佢哋係回應整個全球各個同志文化嘅狀況之下，佢會產出唔同嘅火花嘅。譬如可能台灣佢哋嘅歷史可能會有包括一啲比較唔開心嘅事件，或者係一啲校園事件，或者一啲女性運動嘅事件咁樣。同樣地可能香港點解我哋成日講話Member，香港過去有一段Member term嘅一個歷史，所以先成就咗講呢個字。我好期待澳門會產出啲乜嘢火花，可以由澳門本地嘅Member話俾我哋知，其實澳門可以係乜嘢樣子。呢個係我好期待嘅。但係調返轉嗰個痛苦就會係就如同我啱啱所講，其實即使而家2023年啦，但係可能原來澳門嘅同志朋友們，佢哋基於我哋地方細人口好擠迫嘅狀況之下。我哋叫做熟人社會啦，佢哋可能即使去到外地遊行，佢都唔夠膽去參加一個澳門自己Local嘅一個單位，係外地搞嘅聚餐或者係外地碰面呢件事，對佢嚟講真係困難嘅。

你可想而知，更加係你點樣去邀請到一班人出嚟去做呢個社群嘅服務呢？我覺得係困難嘅地方係，甚至譬如我哋而家組織啦，譬如啱啱話做組織有咩困難之處。我哋組織而家大概有十幾，大約接近20人嘅人數，但係其實喺內部裏面我哋都會重要去再區分返，可以出鏡嘅成員同唔可以出鏡嘅成員。因為有一啲成員佢其實係都想幫忙啦，佢願意做行政但係佢始終話我冇辦法⋯⋯係始終我未想出櫃住咁樣。即係佢會好擔憂好焦慮呢件事嘅。咁我覺得就係其實有冇被正視到，呢啲擔憂呢啲焦慮其實已經係去到一個精神健康程度呢，我覺得係澳門其實係好需要被看見嘅咁樣囉。咁所以返返嚟組織呢個位嘅話，我就會覺得一嚟就冇錢啦，二嚟冇人啦，三嚟冇地啦。做組織全部好似NPO、NGO都係咁上下。咁就會變成係，個狀況就係。我有聽講啦香港有啲比較LGBT Friendly嘅地方啦，都會可以借用或者免費提供一些空間俾LGBT Community咁。咁但係喺澳門我哋仲尋覓緊啦。咁我哋而家其實搞活動，都有少少叫做友善嘅朋友仔啦，願意去用一啲比較廉價嘅租金借場地俾我哋嘅。咁但係我哋一來因為都未開始有，我哋即係我哋冇任何嘅funding啦，亦都未開始有收到任何捐款啦等等嘅問題啦。咁所以其實我哋一直都係自己扲緊荷包啦。咁所以我哋亦都考量緊就話噉樣，我哋要點樣去持續去做呢啲線下嘅聚會呢？因為我哋亦都認同一件事就係，當你想搞啲線下聚會，就係你又要求大家去畀錢嘅時候，嗰個動力又會再減低啲㗎喇喎。咁所以我諗可能組織係思考活動嘅一啲，執行上面亦都好拉扯嘅。

即係譬如我哋大家澳門嘅member個need係啲咩呢? 嗰個需求係啲咩呢? 大家想要多啲動態嘅活動，即係單純係打下波呀出嚟咁樣，定係大家會想要有一啲⋯⋯其實我想要一啲經驗分享嘅。因為我平時喺個dating app度，我唔會無緣無故同人哋講，喂，我幾時出櫃㗎喎? 你點出櫃㗎呀？咁唔會㗎嘛。即係會唔會係要有返一啲LGBT嘅社會服務啦，即係我哋可以係有一啲小組嘅，可以同大家去分享其實自己嘅identity係點樣嚟嘅，我係幾時嚟呢啲identity啦，我係點樣出櫃啦，或者甚至係有冇一啲真人圖書館咁樣去，同大家分享返，咦，我係出櫃嘅時候我做咗啲乜嘢喎，你可以點樣參考我嘅經驗。喺澳門可能其實社群裏面其實係，目前係未有呢啲可以參考嘅經驗囉。

M：好驚訝呀，因為你哋係自資嘅一個組織。我喺度呢都攝一個關於Pride Lab嘅資訊，坊間有好多人以為Pride Lab係一間公司，係有個長期有個基地。我喺度同大家澄清，Pride Lab係有一個工作嘅空間嘅，但係個工作空間就唔係好似你去一個企業咁樣，你可以撳門鐘去搵我哋。OK，即係我哋嗰個架構其實好多，我哋係100%全義工啦。咁可想言之，我哋自己都有正職咁樣啦。咁但係自資起上嚟呢，我又諗起，如果一個組織係全自資嘅話其實係好內耗嘅。點解我會咁講呢? 因為過往都有訪問過，兩個喺香港比較有新興嘅談性別嘅空間，一個係一坪半，一個係Common 6。其實佢哋兩個主要嘅資金來源，都係來自於自己嘅工作，即係自己嘅薪水收入。咁佢哋搞一啲嘅活動呢，佢哋都會有少量，例如自由捐獻呀，或者自由定價，有一啲指定嘅speaker嘅活動，可能佢哋就會有收費或者係租場地，以租場地嘅方式去收取佢哋嘅費用。但係其實都係好困難嘅，唔會咁容易俾你用呢個，所謂半商業嘅模式可以營運得到。所以好多時候都會透過一啲，指定嘅可能一啲慈善團體，或者係你要寫proposal要交去一個，再大啲嘅分錢嘅平台，佢就會分啲錢俾你。澳門係咪其實都冇呢啲，頭少我所講嘅嗰啲分錢平台，或者係資助funder咁嘅平台，你哋有冇搵過? 

K：尋覓緊呀。

M：都係尋覓緊。

K：無錯，我哋尋覓緊，同埋都…因為我哋自己成員裏面都有一部分，都係社工背景啦，都算係識得搵funding嘅，都努力緊。但係因為個狀況其實我哋都頗新啦，我哋其實係，而家2023年啦，其實係2023年嘅8月先至正式簽紙成立嘅。當然啦，我哋喺社交平台就run咗已經年幾㗎啦。咁所以，但係就你始終成立咗個正式嘅社團之後，你先至有辦法用呢啲單位嘅名義去做更加多嘅嘢。咁所以我哋都只可以話係人手不足嘅狀況，都係一樣啦，大家都係義工嘅情況之下，我覺得係要慢慢嚟嘅，比較困難但係都慢慢嚟。

M：你呢義工呢，目前係咪都係喺澳門呀？定係你哋係點樣運作？ 可唔可以分享下俾聽眾知道？

K：其實好羨慕呀，好羨慕呀香港各位單位呢，即使個office係細啲啦，起馬有張桌張凳啦。我哋目前呢就未有一個固定實體嘅空間嘅。咁that’s why我都啱啱講就話，比較會冇聚會嘅空間啦。咁我哋目前其實組織嘅成員呢，就周街飛嘅。如果有澳門嘅朋友仔你哋聽到呢段錄音，記得如果你唔係澳門你都可以加入我哋㗎。係啦，目前有啲成員可能係，因為佢哋有啲其實都係讀緊書啦，碩士呀咁樣。咁所以佢哋有啲人可能會係我所知道嘅歐美地區啦，或者係台灣呢邊啦咁樣…或者澳門啦咁都係有嘅。所以我哋其實而家就變成係，通常呢搞實體活動嘅就會係喺澳門嘅成員為主啦，有一啲online嘅譬如出post呀，一啲行政工作其實你線上處理到嘅基本上就會係海外嘅成員幫手呀咁樣。

M：澳門嘅…澳門組織嘅流動係顯然地係顯得更加water，即係更加呢個流動性更，使用呢個網上資源嘅機會係比較高呀。頭先你講呢個香港有機構係可以比較廉價借出一啲空間，或者係讓出一啲空間去畀本地LGBT組織呢，呢個都係一個好嘅契機嚟嘅。我亦都見咗有一啲可能係同志友善嘅商業機構或者係佢哋嘅NGO們呢，就係咁樣因為咁就進駐咗喺嗰個地方。我覺得都有個雙贏嘅，即係如果有一個地方他…呢個澳門有一個地方係願意做出咁樣嘅舉動嘅話。我覺得會係一個好破格嘅一個舉動嚟㗎，係竟然係一個係一個金錢嘅大地區。金錢娛樂大地區裡面可以見到有LGBT聚集地嘅話會係一個，會有一個好多華人傾計，驚訝嘅一個地方。

K：冇錯，我覺得係好啱就係…點樣呢？可能有啲單位佢願意去表明佢自己立場，去做一個LGBT Friendly嘅狀態呢件事好重要。然後如果啱啱講話澳門見到有一個好特別嘅狀態，可能有啲…可能彩虹旗嘅葡撻，大家夠唔夠膽食？

M：我諗會嘅，彩虹芝士都有人食啦，彩虹葡撻應該ok嘅…

K：ok…

M：或者彩虹蛋糕都有啦…ok，都可以嘅，ok。我又想問呀，頭先你話即係你嘅組員們係來自唔同嘅地區啦。咁即係所以你哋又透過呢個互聯網嘅方式去做呢個Admin嘅工作咁樣啦。亦都講到話，你2023年嘅8月先正式去做一個註冊嘅組織咁樣。咁你係澳門註冊嘅組織係叫做，即係officially叫做乜嘢嘅組織呀？慈善組織？非牟利組織？咩組織呀？公司咁樣？

K：我哋而家算係社團囉。即係，因為澳門嘅法例講，佢如果你唔係公司嘅話，應該就算係民間社團嗰種，即係有結社嗰種社團咁樣囉。

M：咁係你哋做呢個民間社團嘅時候呢，要畀啲乜嘢嘅資料？即係因為我哋都會好想知道。我係好細個嘅時候有去過個大海，就知道澳門你會見到有呢個簡體字呀，有陣時會有繁體字呀。跟住通常會聽到，即係我而家同你講緊呢個廣東話啦，粵語呀。有陣時喺路牌見到葡文呀，咁亦都會長期聽到有普通話啦。咁到底你哋要搞呢個社團嘅時候，你哋要提供幾多唔同語言嘅資料俾佢哋，去做呢個註冊嘅呢？我又好想知。

K：其實我覺得你啱啱講嗰啲仲係唔夠先。仲有更多，我覺得港澳呢，港澳地區都應該仲，除咗啱啱我哋講日常我哋華人嘅話，你啱啱講緊廣東話，普通話，英文呀呢堆嘢之外。其實如果你計埋非華人嘅族群嘅話，其實可能甚至有好多歷史原因，所以有好多東南亞裔嘅朋友仔亦都喺度啦。咁所以我認同嘅，即係其實去到現代，而家呢個社會裏面嘅九千幾百萬種語言係好正常。咁你啱啱講緊就話，我哋喺社群工作上面啦，到底嗰個語言情況係點其實╴譬如for example，我哋而家出post咁樣呢，我哋會盡可能地用書面語嘅，點解呢？因為我哋覺得就，因為而家手機好方便啦，你求其撳咩翻譯，即Google post文下面有個translation咁樣，你撳左佢之後就自己轉語言。咁但係你打廣東話嘅字其實好多時候會轉唔到過嚟嘅。咁所以我哋就會，即係大家內部就覺得，與其我哋去一個post出十個版本，或者出十個唔同語言嘅平台，why not我哋寫一個大家都睇得明嘅，電腦都睇得明嘅一個語言。

咁然後佢可以自己轉，咁有需要嘅人就可以轉得到囉咁樣。咁呢個係出post上面嘅狀況啦。咁但係你講緊話，如果你係活動實體活動上面嘅，我諗呢個係一個困局嚟嘅。我諗可能香港呢邊都仲係一個相對困難嘅狀況，我哋點樣提供非廣東話、普通話、英文呢三大語言，即係以前講緊兩文，細個講嗰啲兩文三語啦，之外嘅嗰班語言使用者嘅LGBT服務？我諗係困難嘅。咁但係亦都係我哋會想要見到嘅，即係未來可唔可能有提供到少量嘅一啲服務資訊呢？

我諗呢個係而家係社群服務上面一個困境啦，即係我諗唔單止澳門嘅噉啦。咁但係如果你話，你啱啱講話其實澳門，你都提到一個特別嘅地方啦。澳門有葡文啦咁，咁其實行到而家2023啦，回歸咗之後啦，其實澳門嘅官方語言都仲係，葡文同中文兩種語言去做一個官方語言啦。咁所以你嚟到，如果你嚟澳門玩，你都係聽到個巴士報站系統就係 blablabla，咁你聽唔明一堆嘅葡文啦。咁所以呢個狀況就係，我記得我哋成立社團嘅時候，就會有一個可愛嘅狀況出現咗啦，因為我會話佢可愛就係一個語言上嘅小trouble嚟嘅。係啦，咁就係我哋本身其實就，而家簡稱就叫做GDC啦，Gender Diverse Community啦。咁但係其實之前我哋就叫MGSA啦，咁就係Macau Gender and Sexuality Association之類。我記得類似咁樣啦吓，Gender and Sexual咁樣，咁但係就當我哋當時係交文件去，政府同佢講下我哋想要成立一個社團。咁因為佢官方語言中文同葡文，咁我哋就交中文同葡文嘅嘢去咗咁。咁葡文我哋就搵咗啲叫做識葡文嘅人，寫咗兩隻字，畫咗隻龜俾佢啦咁。咁佢就彈返返嚟，佢就話你葡文上面你唔可以用Gender同Sex嘅葡文作為一個組織名嘅喎。咁點解呢？咁我哋後面真係走咗去問啲真係翻譯人士啦，比較專業嘅啦咁。咁我哋翻譯人士就同我哋分享返，原來喺葡文嘅語意上面呢，Gender嘅語境唔係咁樣用嘅，即佢唔係作為一個組織嘅Noun Form，係嗰個位置嗰個呈現係比較少有人咁樣用嘅。咁所以其實我哋亦都喺過去呢半年重新去Review返澳門一啲唔同嘅官方文件，確實呢，佢哋喺性與性別呢個欄位呢，都係用Sex呢個字嘅葡文字去用嘅，就唔會用Gender咁樣嘅。咁所以我呢個都提醒返我哋一個好好嘅位我覺得，其實我哋而家用緊嘅Gender同Sex係英文語境之下嘅嘢啦。咁廣東話或者華語地區因為台灣佢哋發展出嚟嘅，我哋可能開始講性與性別咁樣嘅概念啦咁。咁但係其實可能有好多唔同歐美地區，或者其他語言系統有唔同嘅嘢啦咁。咁但係呢個小Trouble呢就導致我哋就改咗名啦，因為我哋發現原來MGSA呢個東西係做唔到，佢個G同S係唔可以一齊出現嘅咁樣。

M：繼續呢個語言嘅話題啦，既然呢個Gender呢個字，可能唔係如英文嘅嗰個語境去應用喺一個即係以一個名詞呀新聞存在咁計啦，咁會唔會其實影響咗澳門人，可能係使用葡文嘅人，或者係住喺澳門裏面嘅人，理解LGBT同志以及係多元性別嘅呢？

K：我覺得呢個位呢因為我唔係葡文專家，我真係答唔實你，但我可以分享我嘅經驗。基於我自己個人經驗，點解咁講呢？就因為其實就會係等於好似香港咁，你香港回歸咗之後，咁然後其實會有一班英國人佢繼續留咗喺香港生活嘅。

咁澳門一樣啦，咁澳門都會有一班葡國人留咗澳門生活啦。咁後來有一二代三代之後，我哋都會出現咗一班我哋而家一個新嘅族群叫做「土生葡人」啦噉樣。咁土生葡人佢哋，如果大家有興趣可以自己Google下呢個terms啦。咁土生葡人佢哋甚至會發展咗一啲類似土生葡人嘅方言啦，咁樣嘅一種即比較同葡文有少少脫鉤，但係又唔至於完全脫鉤嘅語言啦。咁所以我哋其實都，我哋個組織都開始去嘗試了解返，當你要討論澳門LGBT嘅本土化嘅時候，其實你要去見到呢班人，見到呢個葡國嘅殖民史，見到呢班土生葡人，見到啱啱我講嘅其他唔同生活喺呢個地區裏面嘅所有人嘅面貌嘅。咁我哋就走咗去八卦啦，就話其實土生葡人有冇啲咩terms係啲自己人嘅術語呀，即係講我哋男同志就member member咁叫啦。咁土生有冇呢？咁我哋問咗啲識嘅朋友就話好似都冇喎，就真係冇呢啲咁嘅terms喎咁樣，係啦咁我哋都覺得好好奇咁樣。

咁所以我自己經驗就係我走去特登走去查埋，其實2010年左右呢就通過同性婚姻嘅，2010年就通過同性婚姻，2018年嘅時候就通過咗呢個性別承認啦，即係你只要成咗年之後你就可以自己更改性別啦，就唔需要其他人認同咁樣啦咁。咁呢個東西點解我哋呢度提出嚟呢？就因為大家要即係等於香港咁樣，我哋當時回歸嘅時候其實好多嘅遺留落嚟嘅法律都係基於殖民時期嘅法律。咁所以就會變成係澳門而家有一部分嘅法律，佢亦都係基於當年係99年之前葡國嘅法律，然後同而家嘅法律係澳門回歸之後由澳門人自己再繼續延續落去嘅法律，所以佢已經開始有少少同葡國當時嘅憲法嘅解釋又有啲脫鉤嘅咁樣。咁所以變成就係你講話，即係嗰個殖民到底影響幾大呢？咁，或者係佢嗰個，嗰個大我諗真係會局限於回歸前佢嗰個文化影響。我哋要睇得出，當佢回歸咗嗰個moment，佢已經拆開兩part嘅時候，會見到嗰個嘢咁樣。死啦我有啲唔知自己嗡乜添。

M：唔緊要唔緊要。你講啲土生葡人，我而家就係邊錄音嘅時候都自己去搵下，土生葡語。咁喺度就引用呢個維基百科就係講，叫做土生葡語，亦都有叫做澳門甜蜜語，或者叫甜美語之稱嘅，甜酸苦辣嘅甜、美國嘅美咁樣嘅。咁佢就話呢一種獨特嘅方言，喺澳門有三百幾年嘅歷史。而家就係得澳門部分嘅屋企，部分嘅家庭，或者係流散嘅土生葡人講呢種語言嘅。截至2017年，流利地操呢個土生葡語嘅人剩低係唔夠五十人。咁所以呢，係被呢個聯合國家科文組織列為瀕危嘅語言咁樣。頭先呢個土生葡人呢個概念，咁亦都畀咗大家一個新嘅訊息，我都順便學咗呢件事。點解我會問呢個語言呢？就係除咗頭先係所講gender呢件事，即係你哋註冊做嘅事，我成日都有一種感覺呢，就係當我哋好喺其他嘅論壇，尤其係啲歐美嘅論壇，會搵到好多新嘅詞彙嘅時候呢，係好難一下子將佢引用返係香港嘅組織，或者係香港我哋呢啲搞組織嘅人，出posts宣傳嚟用嘅，因為係唔會咁容易去將一個英文字按字面嘅意思翻譯咗之後呢，就會好快畀人哋去普及同埋去理解。

咁所以我哋喺呢個消化過程之中，成日都係諗：咁我哋自己廣東話，操廣東話嘅人係咪會有一啲term去形容同志呢？過往嘅嘢都訪問過一啲老年嘅，做過老年同志研究嘅學者們。其實好搞笑，「女同志」呢個term呢，喺而家六七十歲嘅人嚟講呢，係唔存在。女同志呢個字其實係，可能係available嘅時間，係而家四十幾歲嘅人，佢哋就會用呢個字。咁以至到而家已經開始係，衍生到一個討論就係究竟，喜歡女性嘅女性係咪真係叫做lesbian呢，定係唔應該再叫女同志啦咁樣。

呢個語言上面嘅轉變，佢嘅進化，以及係本身當地語言，佢哋會唔會用另外一啲詞彙去形容，多元性別呢，往往都係我好好奇嘅部分。如果葡國語言或者係澳門裏面，當地會講嘅語言係唔講LGBT咁計，佢哋會唔會可能有一個term去形容，所謂「唔男唔女」嘅人。因為例如喺印度嘅context嚟講，佢哋會有一啲字去形容呢個性別流動嘅人，佢哋唔會用LGBT呢個T呢個字去形容transgender。所以我會好好奇，我亦都期待喺呢個組織喺慢慢耕耘嘅時候可以比更加多唔係住喺或者唔係成長喺澳門嘅人裏面知道，會唔會有一啲字係令我哋更加了解到呢個澳門嘅文化脈絡嘅同時，我哋亦都可以更加了解到呢個自己人嘅發展。舉個例，身在台灣，我哋可能有陣時會理解到，喺台灣嘅原住民裏面會有一個叫做「阿嘟（Adju）」。「阿嘟」呢個字就係好明顯唔係一個中文，佢哋嘅意思同理解都係唔一樣。可能喺我哋嘅理解裏面，喺我哋都市人理解裏面嘅範圍裏面，就係話佢可能係同志啦。但每個地方對於呢個多元性別嘅理解都好豐富，我就期待住澳門嘅朋友們，睇下會唔會有更加多嘅討論或者係回顧。有陣時回顧到老年嘅歷史會更加有趣。係回顧歷史方面，我又想問一啲比較hardcore嘅東西，講下政策。香港今年就有好幾單嘅官司講關於認可同性婚姻，認可海外嘅同性婚姻，以至到係同性配偶。佢哋獲得權利咁樣有好多嘅上訴案，係2023年。係澳門政府或者係法例裏面會唔會係有一啲嘅惠及到呢個同志同性伴侶／同性同居者嘅法例呢？可唔可以分享吓？

K：我覺得呢個東西就係你要講比較基礎版本嘅，工作上我哋唔可以歧視大家。所以工作上你要人人平等，性別個啲唔可以歧視他，因為佢性傾向來唔畀佢返工。如果你話講得真係要hardcore少少嘅話，都補充返少少，譬如大家家暴咁樣。其實係澳門當初發展家暴法嘅時候，曾經有議員討論過將同性同居納入《家暴法》嘅保護範圍，但後來都被反對咗啦，就無納入到啦。所以我覺得係有少少可惜嘅，因為通常其他地區係，一開頭無考慮到同性同居嘅人，於是《家暴法》就有啲憾事。

但係反轉係我哋係一開頭修例嘅時候就已經，已經提出有呢個概念嘅時候，反而係，有一部分反方，佢哋就會覺得，同性同居唔係一個家庭概念裡面嘅嘢，所以就排除咗佢。因為其實係澳門嘅話呢，澳門本身就係有一個家庭政策干預法嘅東西。然後呢一個東西呢，其實佢好似我冇記錯，應該係回歸之前就討論緊嘅嘢，回歸前嘅東西。咁當時呢佢嗰個東西呢就，其實佢裡面就係有冇提到，到底同性同居呀、異性同居呀呢堆嘢到底係點樣呢？其實佢又冇話真係寫得好清楚。但因為我又嗰句啦，我又唔係法律人啦，所以我又答你唔實啦，係啦。但係你話真係好真真實實咁樣去惠及到，而家LGBT嘅呢個嘢，我只可以坦白地就係話…冇一個大嘅法律去扣住後面其他的法律，可以去做到呢啲咁樣嘅細細嘅行政性質嘅保障。咁但係我會，亦都會講緊嘅係，係推行呢個法律呀、政策呀，呢啲咁樣嘅概念嘅時候，我亦都想再去帶返大家返返去澳門人口問題。我哋見到啦，香港其實最近呢幾場官司好開心啦，我哋一定係拍手慶祝先啦，因為係一個好大嘅進展嚟嘅。咁但係睇緊喎，香港七百萬八百萬，七百幾萬嘅人口啦，講緊我哋可以有幾多個跨性別人士，而又有幾多個人願意現身去做呢一場訴訟，係咪呀？我哋可能講緊最近上新聞幾有十位朋友左右啦，係香港。Sorry，澳門係60萬人口，係啦，請大家記得返澳門60萬人口裏面有幾多位跨性別人士，然後佢再有可能法律嘅背景啦，然後或者係有法律嘅幫助啦，再願意現身出嚟去行呢個訴訟。當我去睇返呢個咁樣嘅規模比例嘅時候，你會明白好難，係好困難去有向前一步嘅動力。特別係…我哋按比例縮細，假如有一條友，有一個人願意行出嚟都好，佢有冇back up呢？係啦，我哋啱啱講緊香港可能十個人，佢都仲可以有一個小組去互相back up，互相支援。但係澳門嘅困境其實…我會反而，與其講返政策佢嗰個受惠與否，我會覺得係其實你係嗰個前置嘅推動過程中，係一兩個人佢好難去有一個back up去持續去推呢件事。係呀係呀，咁所以以至於我覺得係困難嘅。

M：多謝，有一個科普，讓我知道有一個淨係得60萬人口，成個scale縮細咗10倍，10倍有多，你講呢個back up係非常重要。回顧返以前，尤其係香港仲係struggle緊呢一個男男性行為，同性性行為嘅合法年齡嘅一啲訴訟案嘅時候，去打官司嘅人佢哋承受嘅壓力之大，一定係會比而家去打官司訴訟案嘅人為之大，因為佢要背負嘅嗰個壓力以及嗰個目光，你唔先講人哋鬧佢，淨係人哋望住佢，呢個目光嘅壓力都已經係好強。所以當時激起咗就係香港嘅組織會去做呢一個遊行，當時有上街，亦都有一啲組織，過往有一啲組織去做，喺街頭上面做過一啲活動。以至到而家，街頭上面活動唔多，咁樣變咗做好多活動都變咗好比較細分，比較流散噉樣。但係就我覺得佢係一個轉型，我相信香港同澳門呢，至少有一樣嘢係有共通點嘅，就係未有呢個性傾向歧視嘅保障。咁即係不論係60萬又好，700萬800萬人都好，如果一個同志或者多元性別嘅人士佢係受到歧視，佢係求助無門嘅，即係你冇一條法例去話畀人哋聽，我而家就因為某某嘅原因被歧視，我就冇咗份工，或者我畀學校嘅人欺凌我咁樣，即係呢一個保障係冇。

咁法律上面我哋，其實我都聽到好多香港人講呢，就係香港嘅法律上面點解，即係就係咁樣，唔會再有下一步㗎啦，即係停滯不前㗎啦咁樣。咁如果唔講法律嘅話，咁我哋就講一啲爭取權益嘅組織咁樣啦。喺澳門呢，之前都有搵過一下嘅，曾經喺2013年呢，喺澳門嘅大三巴亦都有呢個彩虹嘅快閃啦。我想問，我見到你嘅樣呢，你係一定係2012年之前出世嘅。係啦，咁你又冇了解過，又有冇接觸過，有冇聽聞過呢啲嘅歷史呢？

K：當時我係知道，嗰個一期呢，應該係搞緊家暴法嗰期嚟㗎，我冇記錯過，應該係2012年2013個期。應該就係搞緊澳門嘅家暴法嗰期，咁所以嗰一期就，就係因為呢個啱啱我講嘅，即係同性同居嘅人到底可唔可以立喺裏面啦，咁所以就會比較多LGBT嘅東西就彈出嚟啦。咁但係呢老實講我自己，係準備呢個訪談之前，我都問咗我哋組織嘅成員啦，甚至問咗好多唔係我組織，但係我身邊嘅澳門嘅朋友們啦。大家都好似，唔係，基本上冇人知道有嗰個遊行，我自己係知道有嗰個遊行嘅，但係冇人知道有嗰個遊行，咁然後更加唔會有人參加，既然大家都唔知噉樣。

咁呢個我覺得係一個好可惜嘅地方，即係澳門嗰個社群嘅連動性係非常之差嘅。即係確實係…呢個必須承認嘅，因為你話我都講佢你都唔知藤㨢瓜瓜㨢藤，你都驚緊出櫃，當有一個朋友問你點解你又識佢架嘅時候，本身可能佢係善意嘅，其實我係member嚟㗎，你又識佢嘅，我又識佢。但係可能你自己好深櫃嘅時候，你會反過來覺得，會唔會俾人篤穿㗎？我唔知呀，所以嗰個連動性係真係差嘅。我覺得…有啲遙遠啦。講緊10年前嘅事實啦。

M：係，當然啦，當然啦，我係純粹好奇，就係好老實啦。我本人去做返啲訪問嘅時候，人哋講緊話，我以前啦，將自己綁咗喺嗰個警察總部嘅時候，跟住呢，有啲乜嘢嘅策略嘅時候呢，我係一片腦海一片空白嘅。即係，縱使我嗰陣時我係已經出咗世啦，係我嘅，即係，不過歷史嘅空白嘅位仍然都係存在嘅。而家有一個組織喺度，而相對係以前呢，其實係曾經出現過。咁佢哋兩者嘅關係呢，係會係點樣呢？

咁香港也許有人做緊噉樣嘅研究嘅，有人做緊咁樣嘅回溯咁樣。係澳門嚟講，我覺得係嗰個恐懼，即係嗰個好驚畀人篤穿自己嘅身份，以及係因為太近距離，所以唔敢去親近嘅嗰個內心嘅恐懼，令到，縱使你知你未必會去，即係你，Kelvin，你都有講到話，你而家縱使喺台灣舉住一支澳門旗，都唔等於會有澳門人企喺你隔離。即係嗰個距離，咁我覺得係，係60萬人嘅澳門人入面，可能入骨入血入面會有一種咁樣嘅心態。咁樣，咁我又調返轉頭問，即係既然你未必同呢個快閃行動搞過遊行嘅人，有過任何嘅理解聯繫咁計，作為一個新嘅組織，點解你會喺2023年搞呢個組織嘅呢？你嘅契機係咩呀？

K：呢個好長呀，呢個原因係好複雜。因為我自己本身都係一個社工背景，然後其實我當年喺2012-13嘅時候，我知道有人願意搞呢件事，我其實相當開心嘅當時。因為當時我個人，應該話我係2015年先知佢哋係，在2013、14、15嘅時候發生咗呢件事，我係後來先知嘅。我自己其實一直以來都覺得我由大概中學嘅時候已經都好想話，其實我覺得澳門真係好需要呢啲咁嘅服務啦，所以我當初選擇做去台灣讀社工啦，就係為咗去了解一下LGBT嘅服務係點樣運作㗎啦。咁所以其實而家我哋喺澳門有一班噉樣嘅，大家都係有興趣為LGBT社群做多少少嘢嘅人。咁就大家突然間就瓜㨢藤噉樣，又係㨢嚟㨢去，咁就話「喂，你個朋友有興趣嗰個又係搞好活動㗎喎，一齊過嚟啦」咁就join起咗。

咁我覺得其實澳門呢，係過去疫情呢兩三年呢，因為即係，我唔知到底有冇存在因果關係啦，咁但係其實疫情呢兩三年啲人太得閒啦，即係大家喺屋企冇嘢做，咁咪你搞個組織囉，搞個平台囉。咁其實澳門係過去呢兩三年，佢有好多唔同角度，唔同領域嘅組織呀，或者係團體呀，都慢慢咁樣冒出嚟嘅，唔單止LGBT。

咁所以我就會覺得，就真係嗰陣時可能真係唔知係咪太得閒啦，就搞起壇嘢啦咁。但係其實如果講到再detail少少嘅，其實就真係喺疫情期間呢，我自己個人都喺澳門啦，嗰陣時都有返緊工啦，其實嗰陣時有見到澳門嘅社群同我，十年前喺澳門見到嘅社群係完全唔同㗎。十年前喺我記得有一個雜誌曾經喺2012年嘅時候，報導過澳門嘅member為咗唔出櫃呢，佢哋係會去特登去過大海去香港啦，或者每個weekend飛去台灣拍拖咁樣嘅。喺2012年嘅時候就已經喺雜誌報導過呢件事。但係當然去到2023年我必須要講，依然係有噉樣嘅人存在，依然係有為咗唔出櫃，每個禮拜而家仲平咗，搭金巴仲方便咁樣嘅方式，過香港拍拖嘅一樣有。但係我覺得因為可能呢十年裡面，其實手機嘅普及呀等等呀，其實，我會覺得呢十年過去，同自己嗰個氛圍係唔同咗嘅。即係，我哋組織裏面亦都有服務過一些，因為我哋現在有搞一些聚會啦，咁我哋亦都有服務過一些中學生咁啦。咁其實佢哋都已經同咗父母出櫃㗎啦，咁亦都講緊係全校都知㗎啦。佢玩得好開心呀，玩得好癲㗎啦咁樣，都有嘅。咁所以你會見到呀，我覺得generation本身已經係慢慢唔同咗，改變咗。咁然後我覺得亦都有一啲三十零歲嘅朋友，就係我哋又係參加過我哋服務嘅，佢哋都係會覺得，佢哋其實覺得三十零啦，佢哋已經唔需要再去考量到底我屋企人解釋單不單身與否呢件事呀。總之我而家就係咁嘅狀態㗎啦。咁嘅時候，佢哋都覺得我哋可以參加下呢啲組織，然後去認識下實體、認識下朋友咁樣。咁所以嗰個氛圍真係唔同咗，咁我哋就會覺得好似可以做多少少嘢。咁其實做多少少嘢呢個位我就會覺得，當我哋講一啲社會上嘅倡議呀，或者社會上嘅運動都好啦，我覺得有時候唔一定係要你舉牌出嚟示威先至叫做一種運動。有時候反過來說，我哋同社會點樣去對話呢件事好重要。所以我哋一開頭我哋會選擇用社群平台啦，用Instagram噉樣去持續咁樣去有一啲文章，去為澳門嘅讀者去介紹一啲terms，或者反過來說，為外地有興趣了解澳門嘅朋友仔介紹澳門一啲特有嘅LGBT嘅文化。我覺得呢個係我哋平台一個好重要定位。

咁然後而家我哋最近呢兩三個月啦，其實就持續咁去推動一啲本地嘅小組聚會，就希望我哋畀大家有一啲機會去碰面啦噉樣。係啦咁礙於呢個人力同錢有限啦，咁我哋嘅場次就有限啦咁樣，咁都見到報名係踴躍嘅咁樣。

M：呢個亦都係個好嘅收結，就係點解我會搵到你哋，而做到呢個podcast嘅訪問啦。Kelvin有同我講呢，佢之前係香港有遇到Pride Lab曾經嘅，咁我嗰陣時唔係香港啦，我係完完全全100%係透過IG搵到你哋嘅。咁我嗰陣時見到話講到澳門人嘅同志，我好好奇嘅喎，真係一個一齊，即係一樣都主要係講廣東話嘅地方，成日都以過大海嘅概念去理解呢個澳門嘅呢個地方，裏面嘅人係點樣嘅呢？《點止港同志》就唔止係講香港嘅同志，都希望可以講到其他講廣東話嘅同志。咁亦都我相信呢個，講多一次個組織呀，澳門多元性別社群協進會呢，即係呢個Instagram就組織咗我哋去傾談同分享更加多關於澳門同志嘅資訊以及佢哋嘅文化咁樣。OK，去到節目嘅尾聲呢，就想問下既然頭先你講到有一啲實體活動，你係咪順便去promote下你哋嘅組織呀，anything你想依個我免費宣傳時間俾你哋，隨便拿去用。

K：我哋其實而家開始呢，已經構思緊，下年六月呢，有冇可能呢係澳門呢，做一啲，即係Pride Month活動相關嘅系列活動啦。咁我哋都希望如果有機會呢，即係有一啲可能已經出櫃啦，或者你覺得你嘅故事值得同人哋分享嘅，然後你想被訓練成為一個類似Ted Talk咁樣，一個18分鐘嘅一個story嘅講者嘅話，歡迎聯絡我哋啦。因為我哋呢邊都有一啲朋仔可以幫你啦去將你一啲特定主題嘅故事啦，LGBT相關嘅故事啦，我哋都希望train up更加多嘅真人圖書館，可以有好多唔同嘅真人圖書可以借出去畀人哋使用嘅。咁如果你覺得你係澳門啦，或者係其他地方，你作一個澳門人，一個澳門嘅同志，你有興趣去將你嘅一啲LGBT嘅一啲生命經驗同人哋分享，歡迎聯絡我哋啦。咁另外亦都可以繼續關注我哋嘅Instagram啦，咁然後呢就可以睇到我哋其實大概每個月都有唔同嘅聚會啦。咁嚟緊會有動態嘅亦都有靜態嘅，係啦咁咪歡迎追蹤。咁然後呢都幫我哋澳門其他單位去宣傳啦，咁其實六月份呢，我哋都會再串聯其他單位啦，有可能，係啦…未知嘅，但係呢可能會有啲sport day啦運動日啦一日嘅就好簡單啦，咁然後可能亦都有一啲關於Drag Queen嘅一啲演講啦，一啲工作方啦咁樣。不過未定嘅，係啦，一切都係期待當中，咁更加仔細嘅都係睇我哋post為主，謝謝。

M：Yeah，多謝，你哋好Pro呀。我而家呢一路聽你講嘅時候，我又即刻望下你哋有啲咩聚會活動嘅post啦，在Instagram，你有文章編號嘅喎，咁鬼P

ro嘅。

K：我哋，即係都想做系列性嘅嘢，咁未來如果用啲hashtag可以tag返返嚟咁樣。

M：哦ok，正呀！咁呢有呢個聚會活動我覺得係非常之期待啦，咁我覺得每一個願意自資即使唔係自資自己花時間去做一個組織呢都係好難得嘅。咁即係唔論你裏面有幾多人都好呢，能夠建立到一個凝聚嘅空間，凝聚更加多呢個同聲同氣嘅空間都係非常之難得嘅。咁即係好期待之後澳門會有更加多同志嘅實體嘅活動啦，有運動又好啦，運動我就唔會join嘅啦，我就唔good at呢個運動嘅，哈哈。咁但係有更加多嘅，例如真人圖書館呀，俾更加多嘅人知道其實澳門至少有人啦，除咗呢個賭場之外，除咗人之外亦都有同志。咁有好多傾談傾計，Chat LGBT嘅傾計活動我覺得都好唔錯呀，真係傾計千祈唔好睇少傾計嘅力量。其實Pride Lab又好，或者其他的一些組織，佢哋搞啲傾計會呢，傾下傾下呢就會有一啲火花㗎啦。

K：火花呀…

M：成員呀，義工呀，幫助嘅力量呀，我哋好多人都係咁樣傾返嚟。佢都唔知可以傾生意咁傾返嚟咁樣。咁再一次感謝Kelvin做呢個訪問啦。咁每一集我哋收集嘅時候都會有一個經典嘅收結嘅。咁就係點止港同志係一個以香港同志角度出發嘅podcast，希望可以將大家生活裏面嘅性別同同志議題用廣東話嘅聲音同文字嘅方式保留同流傳。咁今集呢作為呢個第三季嘅最後一集，點止港同志呢，希望期待都可以做到點止其他講粵語嘅同志。咁今集我哋就做到澳門同志啦。咁上我哋嘅podcast專頁PrideLab.hk/podcast，或者上我哋Instagram: PrideLab.hk嘅bio裏面就會見到我哋嘅資訊或者係其他嘅活動資料咁樣。

多謝你收聽呢個節目，而且係睇到你哋嘅最後。如果你想聽更加多呢一類嘅節目，除咗訂閱我哋之外，亦都歡迎你喺自己收聽嘅平台上面留言，或者畀星星有回饋嘅。如果你而家聽到呢度呢，我哋會每一集嘅description裡面，除咗放嘉賓嘅一啲嘅補充資料之外，都會有一條連結係專門嚟留言嘅。咁你撳入去就可以留到言㗎啦。我會定期check留言嘅，如果你又留言，我係有機會上到節目去同大家分享嘅。今集就去到呢度先，期待下次同你點指講同志，Kelvin同大家講拜拜啦！

K：拜拜。