Ref

• Diana 介紹
• 節目提及到嘅書： Kwok, D. K. (2023). Sexual Orientation and Gender Identity and School Life in Hong Kong. In M. Kasai, Y. Toda, & S. Russell (Eds.), SOGI Minority and School Life in Asian Contexts: Beyond Bullying and Conflict Toward Inter-Minority Empathy (101-118). New York: Routledge, Taylor & Francis Group.

Ep.49 【又關性別事】性教育點止教你戴 Dom (Feat. Diana Kwok)

M：馬天娜

D：Diana

M：歡迎返嚟《點止港同志》，我係主持馬天娜。講起「性教育」呢三個字，有人就會覺得好虛無縹緲，即係一路以嚟我哋成長嘅過程之中，好似對於性教育，雖然有教育呢兩個字，但係好似喺我哋嘅日常課堂入面就無真係接觸過。有啲可能喺大學裏面有接觸過嘅，但係嗰啲叫做性別研究，Gender 啦。到底性教育喺香港人，即係以我而家90後嘅人眼中究竟係幾時出現呢？點解會有人去花咁長嘅時間去研究性教育呢？今次就因為一個會議，一個國際論壇，令我遇到呢一位嘉賓。噉當時個論壇正正就係講緊亞洲嘅性教育。今次就邀請咗郭勤老師 Diana 去做我哋嘅分享嘉賓，歡迎Diana 可以介紹下自己。

D：Hello Martina 你好，Hi 各位，大家好。

M：噉我哋呢度嘅聽眾呢就…我希望去到…因為我曾經有聽聞過我哋呢一個聽眾群入面其實係有一啲仲讀緊書嘅朋友，噉可能都比較年紀後生一啲。我包山包海地都介紹一下 Diana 嘅一啲資料先，我引用下一啲佢官方嘅介紹啦。噉佢就係香港教育大學嘅特殊教育及輔導學系嘅副教授啦，佢有好多個身份喎，佢有呢個註冊社工啦、認可嘅性治療師啦，噉研究嘅題目都非常之廣，除咗我所講嘅性教育議題以外呢，佢亦都係會研究同志議題、酷兒、跨性別，以及係有服務性小眾同埋有特殊學習需要嘅學生，佢嘅輔導員、社工嘅專業培訓，好多嘅唔同嘅範疇。過往其實喺我喺香港做嘢嘅時候，已經曾經有一次因為講 Sex toy 嘅原因，都有接觸過 Diana 㗎嘞。噉事隔多年啦，終於喺台灣有一次，就係呢個講亞洲全面性教育嘅國際論壇裏面，又遇到佢，就造就咗今次第三季嘅今次訪談嘅契機噉樣。好，事不宜遲又想問下關於「Diana 與性教育」嘅呢個題目先。嗱，頭先我講緊呢個…本人就覺得學性教育呢樣嘢就非常之唔官方嘅，我都要同呢個聽眾坦白。

D：官方嘅意思，咩意思呀？

M：係嘞，我又要解釋下，官方嘅意思就係，我都要同我嘅聽眾坦白，就係我覺得呢，我嘅定義，我嘅性教育就係頂多就係 Form 3 嘅時候學過 Bio，跟住就開始見到有性器官嘞。噉但係當時見到有性器官嘅部分，就係，我知道咩叫性交啦、Sexual Intercourse 啦，跟住就係講性交之後就會有呢個懷孕，跟住就進入咗嬰兒嘅階段，胚胎嬰兒，就係非常之學術，非常之生物系嘅一樣嘢。

D：我覺得幾好喎，佢又講啲 Facts 畀你聽喎。

M：我係好好彩嘅，我未去到，我嘅學校係冇嗰種恐懼式教育嘅，即係佢冇話…你要結身自愛呀，你唔可以接觸異性呀，如果唔係你就會點樣點樣呀，輕則就懷孕呀，重則有性病呀，跟住你就大鑊嘞！我又好好彩，我係冇遇到呢種嘅。我又想知道 Diana 係點樣接觸呢個性教育嘅呢個議題，同埋你會想研究性教育以及性治療呢個方向？

D：其實多謝你提呢個話題，因為你啱啱講緊嗰啲恐嚇式，或者係講一啲與事實不符嘅性教育內容，正正係我中學經歷嘅。即係我嚟自天主教嘅女校啦，所以我哋基本上個性教育，其實 Biology 當然會講下身體啦，噉但我哋嘅性教育就係喺道德堂 Ethics class。噉佢唔係教你，你個身體係點呀，佢係教你點樣做一個淑女呀，噉裏面嘅內容就係教你插花啦、跳社交舞啦，即係女仔同女仔跳啦，不過有實習嘅，個實習就係呢，當聖誕節嗰陣時，我哋係可以同男校開 Party 嘅，噉有機會呢，即係喺 Ethics 堂學嗰啲社交舞嘅技巧呢，可以係即係同男仔一齊去跳舞啦，噉樣。噉即係佢假設咗我哋都係會鍾意男仔啦，係嘞，假設我哋會係一個淑女啦，係訓練我哋做一個好嘅太太啦、妻子啦，噉樣。佢亦都會教我哋呢，同男仔…嗱，同男仔相處，即係假設咗你將來嘅伴侶一定係男士啦。噉就係中間要隔一個人嘅距離啦，你要斯文呀，要 Decent 啦。

即係呢種嘅性教育係喺我中學嗰陣時進行嘅，噉另外呢就係都有恐嚇式㗎啦，例如播墮胎片呀，即係一啲黑白嘅墮胎片啦，即係睇完咗之後，即係其實你個心係好恐懼嘅，噉樣。噉所以呢一啲嘅經驗呢，即係當時其實呢，就我哋唔會去諗咁多嘛。但係當我哋慢慢大個，當我去到大學裏面，我係喺中文大學呢讀社工系嘅，噉都係嗰種冇乜人生經驗，讀完中六就入去讀社工。噉點知呢，即係社工系呢要求我哋呢係要接觸多元呀嘛，噉我當年呢就…學校就，社工系就冇乜多元嘅課堂畀我嘅當年，亦都冇性教育。噉所以我哋自己，我同我嘅同學呢就一齊去，當年呢，中大嘅禮堂呢，學校嘅禮堂好平呀，五蚊呢，就成個學期任你睇電影嘅。噉當時我就揀咗一套好爆嘅，當年好爆嘅電影《查泰萊夫人的情人》，一個文學名著，亦都好多性嘅場面，講情慾噉樣。噉當年我哋兩個，即係𡃁妹去到呢，睇完咗之後呢，個反應就係返到去宿舍，就我哋兩個嘔到七彩，我哋吃不消呀。噉呢個經歷呢，其實我哋兩個就去諗嘞，點解我哋會咁焦慮到咁緊張嘅呢？呢個係一個焦慮反應嚟㗎嘛，睇完一啲我哋頂唔順嘅嘢呢，身體反應就係嘔，個情緒背後就係焦慮呀，恐懼呀噉樣。噉所以我哋……

M：我想打個岔先，我想問下，既然你哋之後係恐懼啦，即係覺得好…可能嘔心嘞噉樣，係什麼嘅原因令到你哋搵得到呢套戲嘅呢？而你哋又有興趣睇喎？

D：我哋唔係覺得嘔心，即係我哋冇覺得嘔心，係身體自然反應呢，睇完咗之後呢，係返到宿舍呢係嘔嘅。但係嗰個反應唔係覺得嘔心，而係覺得呢，即係背後可能有一啲焦慮恐懼。我哋自己有時都唔知。噉所以呢，即係其實經歷咗呢次嘅經驗之後呢，我哋去反省我哋自己所經歷嘅性教育，係點樣呢？係影響緊我哋，即係成個人呀，思維呀，或者情緒呀噉樣。噉所以我哋覺得呢，即係要好好噉樣呢，面對性教育囉。即係唔好講啲唔講啲，或者講一啲…淨係講道德化啦，係啦，即係唔講一個事實啦。噉到我哋大個去面對情慾嘅嘢，原來即係我哋根本就係冇好好噉、充分地去 Prepare 自己，去面對自己嘅身體，面對自己嘅情慾囉。

M：嗯。噉由呢個《查泰萊夫人的情人》啦，呢一套…當時我諗喺某個年代，某個年代係講17、18世紀嘅年代係被…被視為禁書嘅一個文學作品。你睇完呢套戲跟住造咗一個契機覺得你要反思，或者係重新審視你接觸過嘅性教育啦。噉作為一個學生，嗰陣時你係一個大學生，請問你當時候點樣去搵你認為係一個符合事實嘅性教育呢？

D：噉我自己就好鍾意文學嘅，雖然我讀社工。我覺得讀社工，即係文學係令到我哋對人性有更深入嘅了解。因為呢個《查泰萊的夫人的情人》都啟發咗我好多，所以我咪去睇好多文學作品呀、睇電影呀，噉用呢個機會去接觸，即係咩叫性呀，咩叫情慾呀。到我出嚟做嘢呢，噉其實喺工作裏面，社會工作裏面，我哋都遇到好多嘅精神健康嘅輔導個案，其實佢嘅精神健康呢，亦都會同性呀、性別呀、性傾向呢有關。噉亦都係我自己唔識做，係啦，亦都冇一個好好嘅師傅係可以畀到意見我嘅。噉所以當我去到美國讀書嗰陣時呢，啱啱好呢，我實習嗰個機構呢，我嘅老闆係一個…即係 Gay man，佢帶畀我一個新嘅 Perspective 啦，即係關於性傾向點樣係…接納多元啦。噉然之後我自己喺美國讀輔導係接觸好多 LGBT 嘅同學嘅，噉佢哋亦都係好暢所欲言地喺班房裏面可以 Come out 啦，有好多嘅互動啦。噉 So happen 亦都有一位朋友因為佢嘅性傾向係俾教會 Reject 嘅，噉所以呢佢…亦都好不幸地佢係自殺過咗身嘅。噉所以亦都畀到我好大嘅反省啦，即係覺得宗教同情慾，同埋個社會文化同情慾，如果性教育係咪淨係講直性別或者係直人呢、講異性戀呢？其實原來喺我哋身邊咁多人都面對緊性教育不足，亦都係唔夠全面，呢個處境嘅。噉所以呢啲個人嘅經歷，再加上工作嘅經歷呢，令到我覺得係要去…開始去自己去學啦。噉所以我就去咗荷蘭接受訓練，係 Sexuality Studies，佢會用一個比較全面啦，亦都好…唔同文化嘅角度去睇性呀、情慾呀、性教育呀、性別呀噉樣囉。Before 荷蘭之前呢，我都接觸過性治療嘅。

M：係。

D：係嘞。但係性治療畀我感覺呢，佢淨係用一個，即係 DSM-4 嘅角度。

M：即係比較醫學。

D：醫生嘅角度，比較醫學角度嘅。同埋我感覺到嗰個角度呢係限制係好大嘅，例如可能女性嘅性功能失調噉樣，佢淨係睇個 Symptom 啦，但係冇睇到呢，可能呢有機會其實係一個無性戀嘅性傾向嚟㗎嘛，可能係一個性傾向嘅一個表達嚟㗎喎，唔一定係一個性功能失調喎。噉所以我覺得嗰個角度呢係有啲限制啦，佢有佢嘅貢獻喺度嘅，但我覺得係嗰個角度呢係唔夠闊嘅。我覺得荷蘭嗰度呢就畀到我有一個嘅文化嘅角度啦，嗰度嘅學者係除咗心理學家都仲有社會學家啦，有人類學家啦，有女性主義者啦，噉所以佢畀到我一個好闊嘅角度去睇性，啟發咗我好多。

M：係。噉喺呢個…即係自呢個荷蘭嘅學習之後噉你就，就開啟咗你呢個即係研究性別小眾啦，跟住有即係性教育啦，以及係性治療嘅一個背景之下，去了解更加多喺華人嘅文化背景之下嘅呢啲嘅議題。噉返返去香港嘞，噉頭先都有講到話 Diana 去接觸呢個性教育，以及我呢個九十後接觸性教育嘅內容，同埋佢嘅方式都非常之唔同嘞。喺即係以一個學者，即係而家研究香港嘅性教育議題，可唔可以講下或者係總結一下，目前香港嘅性教育嘅發展呢？其實佢嘅階段，佢有冇一個轉捩點啦？或者佢有冇一個分水嶺嘅時段？

D：呢個可以寫一篇文㗎嘞喎。我簡單啲講啦，即係我唔當係一個研究，但係我從我所認識嘅可以簡單啲講。噉我諗最早期呢，我哋睇到文件上啦，喺1985年有個性教育課程。噉當年呢，就係將多數講性嘅嘢呢，係我覺得係問題化嘅，即係覺得性係一個社會問題。例如佢唔會用性傾向呢個字眼啦，佢會用呢個同性戀啦，然之後同性戀就會同係即係色情呀，同埋佢用 Prostitution 啦，即係唔係講 Sex Worker 啦，Prostitution 即係中文我哋譯妓女啦，即係佢當係一個…即係將呢啲噉樣嘅題目擺埋一堆，噉當係一個社會問題，噉所以叫 Sexual Deviance （性變態）呀，噉樣嘅角度呢去睇性，係嘞，噉即係話性教育呢要防止…

M：即係當時候性係容易理解為變態？即係病理化？

D：呃…佢就冇特別噉講，但係我覺得係佢理解為一個社會問題囉，係嘞，Social Problem，係嘞，Social Problem。噉跟住去到1997年呢，其實好可惜㗎，好多人批評1997年嗰個 Curriculum，搞到佢落咗架。其實呢嗰個 Curriculum 呢，係寫得相當好嘅，係嘞。唔夠，但係佢寫得相當好。1997年嗰個…即係嗰個嘅性教育嘅課程呢，係由一個 Multi-disciplinary Team 去寫嘅，即係話呢有心理學家啦，有醫生啦，係嘞，有社工啦，有社會學家啦，即係唔同層面嘅人呢，有教育工作者啦，合作去寫。所以佢當時呢，講性係一個人生美好嘅一件事，即係情慾呢，係人嘅其中一部分，同埋唔應該將性呢，係問題化。噉所以當年呢，佢有性傾向，即係唔再去講同性戀，佢係講性傾向，係嘞，有呢個性傾向嘅字眼，就唔會將佢擺落去，即係社會問題嗰度嘅。但係佢都係冇講到性別認同，即係跨性別啦，當年嗰個年代就係講到性傾向啦噉樣。所以我自己覺得呢，即係當年呢，佢嗰個97年嗰個性教育 Guideline 呢，其實呢係好，係好嘅。噉但係後尾俾人批評得太勁，唔知點解咁多人批評佢，跟住搞到佢落咗架嘞。

M：噉佢落咗架之後仲有冇發展啊？

D：而家就變咗係2021年呢，即係教育局嗰個性教育就擺咗落去呢，價值觀教育變咗，係嘞，即係叫做 Civic and moral education。噉裏面呢係所有嘢呢都擺晒落去，噉性教育係其中一部分嚟嘅啫，係。噉所以呢，即係變咗佢冇咗自己嗰個獨立嗰個 Curriculum，佢係話…即係你擺喺課程裏面，但係當老師唔得閒呢，就唔會理呢件事情，係嘞。噉所以而家呢，即係啲人可能會比較著重道德教育呀，公民教育呀，噉性教育呢，就變咗好似……

M：嗰個時數就越嚟越少嘞噉樣。

D：個比數呢，係嘞，係嘞，係嘞。噉我覺得其實性教育唔單止係屬於道德教育嘅一種啦，佢仲係一個健康教育啦，亦都係一個平等人權嘅一個教育啦。噉所以呢啲位如果純粹用一個道德教育去講呢，我就覺得不足夠囉。

M：嗯嗯。我覺得好常有一啲人會擔憂啦，擔憂喺呢個學校裏面講性教育嘅時候，往往都係就係講緊道德呢件事。由我中學時代到我大學時代，經常停留一個思維模式，就係覺得只要有一個人喺嗰個地方講性教育，就好似鼓吹嗰啲人去做性行為噉樣嘅。即係喺嗰個地方放一個安全套呢，就見套嘅人就會想有呢個性行為，噉樣嘅。即係唔知點解，個邏輯係點解，淨係 Mention 一個題目就會促使人哋去做一個行為咁犀利啦，真係一個信仰都冇咁誇張，竟然可以，但係掉返轉頭講呢個性教育嘅時候，竟然係可以有咁強大嘅推動能力噉樣啦。噉所以亦都有好多人就會擔心，到底我哋係要用點樣一個方法去講性教育。喺我哋台灣呢個 Meeting 嘅時候，我先知道呢原來呢個世界上面呢，有唔同類型嘅性教育嘅。噉頭先 Diana 有分享你以前喺中學時代遇到嘅嗰種，即係恐懼意識，即係嚇你，要令到你擔憂、令到你驚嘅嗰種性教育。噉我就算好彩少少就冇接觸到，但係其實呢，即係回想返嗰陣時我喺中學呢，因為我讀一間女學啦，我哋就未去到咁極致呢，就叫我哋要去即係成為一個好好嘅太太。雖然佢都係有強調做淑女嘅，但係其實喺裏面冇乜人聽呢句說話，冇乜人會理呢句說話嘅。但係掉返轉頭呢，學校係做咗好多嘅措施，令到我哋唔會接觸得到異性嘅。即係例如佢搞一啲活動啦，噉可能一啲係開放對外界嘅人士嘅一啲活動呢，佢哋係非常之提防每一個同學佢接過嚟嘅男性㗎。即係舉個例，如果個樣係似一個阿叔嘅，噉校方可能會假設佢係佢阿爸噉樣啦。噉但係如果係個後生啲嘅，又唔係好似樣嘅，究竟係佢阿哥呀，定係佢男朋友呢？跟住就開始又要認親戚嘞，即係例如指住嗰個人呢，呢個人呢，呢個男性呢就係我阿爸，嗰個呢就係我舅舅，嗰個就係我表弟。即係必須要係確認你身邊，係嘞，身邊嘅嗰啲人呢全部都係你親戚，如果唔係你親戚而有異性嘅人呢，就唔入得嚟嘅。即係好似入親嚟呢就好似係嗰啲，即係擺隻羊入去，唔係，擺隻狼入去個羊群裏面，噉我就會食晒噉樣，即係我當時候嘅感覺就係噉啦。噉所以縱使係冇嗰種好恐懼式嘅性教育呢，會令到我有一種感覺就係，總之間學校唔知點解就好唔想一啲我哋嘅女仔同學呢接觸到異性噉樣。

D：呢個其實都係一種性教育嚟㗎喎，性教育唔係透過，佢唔係透過課程㗎嘛，佢係透過一個嘅，校園嘅文化啦，係去製造緊一種嘅貞潔嘅一種嘅氣氛。所以我哋其中一個問題係話，性教育有邊幾種呢？世界上面有邊幾種呢？噉而家即係話你頭先講嗰啲，同埋我自己喺我自己中學經歷嗰啲，我哋話嗰啲叫做貞潔性教育，我哋英文叫做 Abstinence，我哋要做一個淑女啦，我哋要貞潔啦，婚前唔可以有性行為啦噉樣。呢啲係屬於道德層面嘅性教育囉，香港基本上好多嘅宗教學校都係用緊呢一套嘅性教育。而世界各地有一啲嘅宗教團體，或者宗教嘅…即係我哋話即係 Religious movement，佢都係喺一啲嘅非洲嘅地方，Even 中國內地某一啲偏遠地方，佢都係會進行呢啲嘅貞潔性教育。

M：我打個岔先。我想問下，頭先你講到呢個 Religious movement，噉我可唔可以…即係有啲聽眾就會諗，噉係咪只要有宗教就一定係要講貞潔嘅呢？會唔會有一啲宗教係唔使講貞潔？

D：我去西藏呢，我就睇到呢樣嘢，我覺得係…即係好唔同嘅。西藏嗰邊嗰啲嘅圖畫、藝術，同埋啲小說，講好多故事呢係…西藏啲和尚呢可以還俗啦，有啲和尚可以娶老婆啦。同埋嗰啲嘅藝術作品呢，裏面有好多情慾嘅表達。噉所以我又覺得唔係所有嘅宗教呢，都係會唔講呢個情慾㗎喎。

M：噉講起呢個禁慾式嘅性教育之外呢，另外仲有兩款嘅性教育嘅。噉一個就叫綜合型嘅性教育，一個叫整體性嘅性教育啦。綜合同整體聽起上嚟就好似好類似嘅，噉但係可唔可以分享下究竟佢哋差喺邊呀？

D：仲有兩種，一種係其實係貞潔性教育就係道德為本啦，我哋話 Moral-based 啦係咪？另外一種呢其實就係香港嗰個叫做衛生署啦，係咪？做緊嘅啲叫做健康教育啦，好似你講頭先講你學校嗰啲，即係真係教你身體係咩，講啲 Facts 畀你聽嘅，噉嗰啲叫做係健康為本嘅，即係講月經幾時嚟呀，你嘅青春期呀，你個身體係點㗎變化，講一啲事實嘅，噉呢個就係健康為本嘅性教育啦。根據你嘅成長唔同嘅階段去講嘅。噉另外一種呢，就係…喺我嘅研究裏面講啦，然後我哋都會將佢擺落去性教育裏面，就係我哋講平等為主嘅性教育。即係個意思就係話呢，每一個人呢都有權得到適合佢嘅性教育，例如直性別嘅學生同埋跨性別學生，都有權去得到適合佢，唔係以呢個直性別為主嘅。或者係異性戀同埋非異性戀嘅學生呢，佢哋都有權得到適合佢哋嘅性教育，唔可以講啲唔講啲，或者淨係講某一啲噉樣。或者 SEN 學生裏面一啲自閉症學生，佢哋有時一大班人嘅時候佢哋接收唔到嗰啲訊息，噉但係佢點攞到啲性教育，你就要設計一啲針對佢需要嘅性教育啦。噉所以我哋話呢，即係有平等為主嘅性教育啦，跟住有呢個健康為主嘅性教育啦，然後有呢個道德為本嘅性教育。噉如果將呢三樣嘢呢全部夾埋一齊，我哋咪講 Comprehensive 囉，即係我哋話全面性嘅性教育呢，即係話我哋係會講人權嘅，講平等嘅。噉我哋亦都講呢有啲資訊係成長為本嘅，你有需要嘅你要畀佢，你唔可以畀佢囉，係嘞。噉另外呢就係我哋都會講，即係其實道德為本唔一定淨係講貞潔㗎嘛，我哋都會講尊重呀，尊重呀，即係呢啲都係一種道德嚟㗎嘛，係咪？尊重其他人，係嘞，然後接納其他人啦，接納自己呀，呢啲價值觀嘅嘢。噉所以我哋睇到全面性嘅性教育呢，其實係包含咗呢幾個元素喺度囉。

M：喺台灣呢，我縱使冇著手研究性教育啦，但係有陣時佢講關於性平，即係性別平等嘅一些議題嘅時候呢，佢都會講話喺呢個「性平教育」呀，即係台灣佢哋有一個性平教育裏面呢，都會至少有一個題目就叫做，即係講愛情嘅，講呢個浪漫關係嘅。噉喺裏面就可能至少就係話，先將呢樣嘢簡化為呢個異性嘅浪漫關係啦吓，噉浪漫關係裏面呢，如果男仔喜歡女仔，噉到底係要點樣尊重佢嘅人身自由呢？咩叫知情同意呢？即係呢一啲聽起上嚟好似係，即係純粹你以為係尊重呢個部分啦，但係其實原來你講返其實係同呢個道德係有關。個道德唔係純粹就係話應唔應該做性行為…

D：唔好做某一啲嘢。

M：係嘞，應唔應該做某啲嘢，或者係應唔應該談戀愛。而係如果你要遇到你心儀嘅人嘅時候，你嗰個道德嘅位，你同對方嘅嗰個道德嘅界線，同埋你中間嘅嗰個私隱嘅距離，其實呢啲都係喺性教育裏面要提嘅。

D：我覺得呢個都係價值觀教育嚟㗎，Value education，即係我哋需要有一個嘅價值觀呀嘛，有對有錯啦，我哋要尊重人啦，唔 Bully 人呀。噉呢啲對於年青人嚟講，我覺得喺成長階段裏面嘅教育呢，都係重要㗎囉。

M：以我自己嘅親身經歷呢，好老實呢，我當時嘅中學嘅教育係冇講及任何關於呢啲咩，知情同意呀，拍拖呀嗰啲。即係我諗喺我間學校眼中呢，每一個女仔呢都唔應該會有拍拖嘅，噉樣。噉總言之呢樣嘢根本係唔係，即係唔 Practical，根本係不切實際，但係佢哋就偏偏唔會特別去講啦。噉即係而家聽上嚟就係，如果我哋嘅地方，例如香港、台灣都好，可以實踐得到呢個，綜合型或者係全面型嘅性教育呢，咁就會一個比較理想嘅狀態。噉我又想問兩個問題嘞，即係第一個問題呢我自己有啲好奇嘅就係，對於 SEN 嘅學生呢，其實係點樣會…即係佢哋係會點樣有一套，屬於佢哋或者適合佢哋嘅性教育呢？

D：SEN 學生呢其實本身香港政府有一啲嘅價值觀呢，即係我意思即係 Philosophy 去睇嘅，即係我哋係用一個共融嘅角度，存納嘅角度，即係話唔係要佢係去 Fit 我哋嘅文化。即係如果喺台灣呢，係做得更加好啦，台灣嗰個 SEN 嘅政策呢，即係佢哋嘅學校會設計一啲嘅課程呢，係去 Fit 個學生嘅。就算喺外國噉，咩叫做存納嘅意思呢？即係我哋話 Inclusive，就係唔係淨係要個 SEN 學生去 Fit 個主流嗰個課程，而係學校課程呢，會設計三種唔同程度嘅課程。例如數學可能課程A、課程B、課程C，噉可能課程A係 For 一啲某一 Group 嘅學生，課程B又 For 某一 Group，課程C又 For 某一 Group。噉可能 SEN 學生就可以 Take…佢唔 Take 課程A，佢應付唔到課程A，佢可以 Fit 到課程B或者C囉。即係你有得選擇呀，個課程。香港冇㗎嘛，你得一種課程㗎咋嘛，即係如果係 DSE。噉所以所有學生包括 SEN 學生呢，就要融入主流，而唔係話個學校包容或者係去尊重佢哋，但其實可以畀個選擇佢哋囉。噉所以如果你用呢個角度去睇性教育嘅話呢，即係話性教育課程呢，你唔可以淨係用主流嗰一隻性教育，SEN 學生需要設計一啲係適合佢哋。舉例啦，譬如好似我個女噉樣，我個女本身呢係一個 SEN 學生嚟嘅，佢係讀寫障礙。讀寫障礙嘅學生對住一大堆字呢，你見到呢即係香港嘅性教育好多工作紙㗎嘛…

M：係呀！

D：係不斷噉做工作紙㗎嘛，跟住又係睇好多字㗎嘛。其實對佢哋嚟講呢係好大嘅 Burden 嘅。噉所以佢就…當年我哋就選擇咗一啲漫畫書囉，一啲得獎嘅性教育嘅公仔書，噉然之後畀我個女睇，噉佢睇完呢，消化得好快㗎。佢五年班要考呢個…即係要上常識堂㗎嘛，常識堂係講身體㗎嘛，噉佢睇完嗰套漫畫書去考試，好過佢睇嗰本常識書啦，噉佢就明嘞。另外呢就我亦都會用歐洲嘅一啲嘅小學生嘅性教育嘅 Video 啦，佢用真人去示範身體部位嘅，然之後用真人去講解，咩嘢叫做荷爾蒙呀，點解呢你會有乳房呀，點解你會有體毛呀。噉佢用真人喎，又講得好好，用影像喎。SEN 學生用影像，對佢哋嚟講，即係佢就會吸收到囉。噉因為我個女啦，亦都令到我即係感覺到，即係我都會關注一啲嘅 SEN 學生啦，包括讀寫障礙啦，同埋自閉症學生，即係佢哋喺性教育方面嘅需要噉樣。

M：嗯嗯。噉除咗 SEN 嘅學生呢，可能有一啲會關注即係香港唔同族群嘅議題嘅人，都會關注到呢個，少數族裔嘅學生，即係 EM 嘅學生。噉對於…當然如果我哋係講緊全面嘅性教育，噉希望就可以係用 Inclusive，即係用呢個包容或者多元嘅方法去教啦。噉但我哋而家講香港嘅 Case，噉可唔可以，或者你有沒有接觸過，如果用香港而家嘅方法，用一個模式去教，入去呢個 EM 學校嘅話，會發生咗啲咩事呢？

D：我覺得好危險囉，好 Risk 啊，好 Risky。即係我個意思 Risky 嘅意思呢，係…我哋有文化差異喺度啊。我哋都開始研究，即係 Ethnic community 裏面嘅性教育嘅處境啦，但我唔會自己走埋去，好 Intrusive，即係好侵入式噉樣，好魯莽地入去嗰個社群裏面囉，係嘞，我問嘅問題可能用緊，我中國人嘅角度或者西方嘅角度。噉所以我哋嗰個做法呢就係，我會接觸佢哋嘅社群啦，認識佢哋嘅社群嘅領袖啦，係嘞，噉就同佢哋合作啦，亦都搵一啲做咗好多年 EM 服務嘅社會工作者，就佢哋好熟悉一班婦女，亦都好熟悉一班青少年，噉然後由佢去帶我哋去認識呢個社群囉。

M：當中嗰個差異一定係好大，即係單純一個非常之，即係表面嘅一個刻板印象啦，喺香港嚟講就係會覺得佢哋信奉嘅宗教唔同啦，有啲人可能信奉伊斯蘭教或者係呢個印度教，噉佢哋…喺佢哋嘅教義成個嗰個 System 係同呢個基督教、天主教係完全唔同。到底對佢哋嚟講所謂嘅守貞呀，或者所謂嘅唔同嘅性傾向呀，或者係一個即係女性男性或者係多元性別，佢哋係點樣去辨清呢件事，我覺得一定係會有唔同嘅一個理解嘅。

D：我自己作為一個研究人員呢，我自己親身感受到嗰種困難嘅，嗰種困難係…自己真係唔識囉。同埋宗教上面或者文化上面，一定係佢哋有某一種嘅習俗呢，我哋係要尊重嘅。但係我哋亦都係訪問嘅過程裏面呢，都有啲女孩子講畀我哋聽，佢唔想用這個 Arranged marriage（包辦婚姻）嘅。但亦都有啲年青人話畀我哋聽，喺 Arranged marriage 裏面呢，佢又諗到一啲嘅生活嘅智慧，點樣去同佢嘅父母呢，做一啲 Negotiations（談判）嘅。亦都有婦女呢，即係啲由南亞國家移民嚟香港嗰啲婦女話畀我哋聽，佢哋好多時係嫁表哥㗎嘛，噉呢就「其實嫁表哥都幾好啊，因為我哋嘅媽媽呢，安排我哋嫁表哥㗎嘛，嫁幾個兄弟㗎嘛。如果呢個兄弟家族好呢，噉嫁咗畀大佬呢，呢個大佬呢，即係好人呢，佢成個家族都係好呢，噉我相信我媽媽嘅抉擇嘞」噉。噉其實都好唔同囉我自己睇到，即係冇話有一個 Stereotype，或者有個整體嘅一個睇法話，噉樣一定唔好，或者噉樣一定好囉。噉我覺得呢個都係我哋想再深入去了解嘅一個社群，都係啱啱開始嘅一個工作嚟嘅。

M：我覺得作為…即係自己都係一個華人啦，一個香港人，我會覺得以…即係聽過你嘅分享，亦都聽過之前可能研究一啲關於印尼人士佢哋，即係印尼女性，印尼女性佢哋嘅一啲分享，可能對於佢哋嚟講，佢哋有自己獨特，對於唔同種族，同唔同種族嘅人、唔同國籍嘅人拍拖，都會有一個佢哋嗰個圍內嘅人，會有唔同嘅印象，可能會有階級上面嘅差異，而呢啲嘅概念係喺香港華人當中係唔適用。所以我諗喺呢個互動嘅當中呢，都需要大量嘅一啲溝通呀、理解呀，然後令到佢哋會即係娓娓道來更加多自己點解會覺得，其實 Arranged marriage 都唔係太差呀。可能佢哋會有自己嘅說法，或者可能佢哋求偶或者搵一個結婚對象，其實係有幾大嘅困難，因為可能又會有嫁妝嘅部分呀之類之類，可能一啲華人唔好理解。所以我覺得都會係一個好漫長，但係係有意義嘅一個研究題目嚟嘅。我哋目前即係而家知道就係，香港而家目前就得一個，即係一個教學嘅方式去教性教育，喺呢個道德教育裏面，喺 DSE 教育裏面。Diana 亦都有分享咗你以前係，即係有一段時間同你嘅小五嘅囡囡去學習身體嘅部分啦噉樣，我可以聽得到就係 Diana 你都好努力去搵到一啲教材，用一個即係視覺嘅方式去令到你女女認識呢個性教育同埋身體嘅部分，作為一個家長自己都有落力去做呢個教學嘅工作噉樣。但係有好多人其實佢哋又好困惑啦，因為一嚟都好困惑就係究竟我幾時適合同我嘅年輕嘅人，包括可能係自己嘅孩子，或者係我見到嘅小朋友們噉樣，我究竟幾時開始進行呢個性教育嘅部分，有冇一個所謂嘅好嘅 Timing 嘅一個關口、嘅關鍵時間呢？

D：如果你覺得性教育係生活教育呢，由佢一出世開始囉。即係性係屬於身體一個部分，屬於人生裏面一種嘅價值觀教育，亦都係平等權利嘅教育嘅話，噉呢個就係一出世家長就會教㗎啦。小朋友細細個開心或者唔開心，喊嘅，你大個咗會教呢個情感教育，你會有同理心㗎嘛，同伴侶相處，你係要有同理心你先可以同伴侶相處得到㗎嘛。

噉你細細個佢喊、唔開心你已經話畀佢聽，媽媽聽到你係唔開心，肚餓嗰陣時媽媽知道你肚餓囉，噉其實你係講緊一種嘅理解同明白畀佢聽，到佢再大個識得講嘢，或者識得觀察周圍身邊嘅嘢嗰陣時，佢可能會指住你嘅身體，或者指住屋企哥哥嘅身體去問嗰啲係咩嚟嘅，噉就係你要話畀佢聽囉，用一個準確嘅字眼囉，呢個就係胸部，呢個係臀部，係嘞，呢個係女孩子嘅陰部。噉即係等於你教佢呢個係眼睛呢個係鼻哥，你會教㗎嘛，噉點解臀部、陰部唔使教呢？身體部位，你又不斷噉講耳仔，成日教佢英文 This is nose，但係你就唔去教佢，呢個係你嘅臀部，呢個係你嘅陰部，所以我覺得呢個就係你由細到大去教啦。

去到青春期嗰陣時，佢可能會唔識著胸圍呀，會 Prepare 緊月經嘅嚟到呀，呢啲咪係你隨時…佢學校有教嘅，幾好嘅學校，四年班已經開始，即係 Prepare 佢哋話你隨時會有機會有月經嘞。噉所以佢有一年五年班，定係六年班我唔記得咗嘞，佢去學校去新加坡旅行，噉佢就好緊張，因為學校教咗呢，所以佢自己緊張啦，佢就會話，媽咪，噉如果去旅行嗰陣時嚟到點算呀？噉我話你去買定，你話你學校都派咗呀嘛，噉但係唔可以擺、用咁耐，過咗期唔得嘛，你要去買。買咗之後呢如果你真係月經嚟，你咪搵大隊嘅老師，如果有需要幫手。但係嗰年佢真係就係個 Trip 嗰度嚟咗月經，佢就好興奮嘅，佢就唔再驚嘞。

噉所以我覺得如果你有好好嘅準備嘅話呢，你會更加坦然地去面對自己身體囉。噉所以我自己覺得呢個係一個生活教育，當你都教過小朋友點樣扣鈕呀、認識自己身體呀、點樣食飯，點解唔可以教佢呢啲，關於自己身體上面要面對嘅嘢，點解要用一個要逃避呀，或者覺得要講「脧脧」呀，或者係要講一啲奇奇怪怪嘅字眼，要避咗佢呀，唔可以坦然去講呢？噉所以呢個都會係我自己教老師性教育裏面，幼稚園老師、小學老師、中學老師，我哋都係用緊呢個方法去，用緊呢個態度去面對、教學呀。另外呢，即係家長嘅性教育就好似家長教育，有好著重…我自己覺得啦，即係唔係，即係好多種理論喺背後嘅。有一啲理論就係我哋係教家長，但有啲理論就係話唔係，我哋呢係同家長一齊去經歷一啲嘢，然之後透過經驗學習，互助，去…即係有個人成長喺度。噉所以呢，即係我自己都傾向於後一部分嘅，即係話呢，即係要同家長建立關係，唔係用一個即係專家嘅角度去同家長相處。你要相信每一個家長，佢有能力係用自己嘅方法教好自己嘅小朋友，佢唔一定需要用你嘅方法嘅。噉所以呢，我覺得呢個畀家長感受到呢，佢係有能力嘅，佢唔一定要靠專家嘅，我哋嚟呢度係互相交流嘅。噉呢個係畀到佢哋有一種嘅能力感呢，噉佢就會願意同你傾囉。如果唔係你嚟到呢度，嘩，我聽晒你專家講，你講啲嘢同我喺屋企經歷嘅嘢都唔一樣，都唔啱使嘅，噉佢梗係唔會睬你啦。

M：而家即係用幾秒去諗返起，我阿爸阿媽有冇同我講過性教育呢？其實好似冇。噉所以頭先我同大家一開始分享我所謂嗰啲 Bio 裡面學到嘅嗰啲性教育，應該就係一個僅僅有嘅 Proper 遇到性教育嘅途徑啦噉樣，其他部分就係從我以前可能上網呀，即係努力去搵網上嘅資訊，我相信而家聽緊呢個節目嘅人呢，你哋應該都係扤緊頭嘅，即係講緊你上網搵到好多嘅資訊呀，又或者懶人包呀，或者係而家嗰啲咩短影片呀，話畀你聽一堆嘅資訊噉樣。即係喺資訊爆炸嘅年代，究竟我哋點樣去分析一啲良好嘅性教育，同埋一啲可能充滿住商業，或者充滿住一啲獨特…即係佢有自己目的而教嘅性教育噉樣，我覺得係建議有個 Guideline。而其實我頭先聽到 Diana 嘅分享，有好多嘅部分係溝通，你一日唔開嗰個溝通嘅橋樑呢，就好難將你嘅經驗或者你嘅知識分享畀老師、大人、家長們，以及係一啲後生啲嘅小朋友呀、年輕人噉樣。

D：都會㗎，即係譬如有陣時啲老師呢……我有一年教性教育，係教盲人…即係嗰個 Visually impaired，即係視力障礙嘅學生，佢面對嘅性教育。噉我就播一套係歐洲嘅嘅影片，就係啲學校，男仔企一行女仔企一行，係除晒衫嘅。然後老師係……即係佢哋點樣去認識自己嘅身體同埋對方嘅身體呢？就係老師教佢哋係摸自己身體，又去摸對方身體，即係話男仔一排就摸女仔嘅身體，老師就係側邊 Guide 住，嗱，呢個就係女仔嘅手臂嘞，你摸落去呢，你摸到女仔嘅乳房，你見到好柔軟嘅，然後再摸落去女仔條腰，然後就係女仔嘅臀部，噉男仔都係，女仔就摸男仔。噉當我播呢套戲嗰陣時呢，呢套 Documentary 嚟嘅，即係紀錄片嚟嘅，噉我其中一個學生，即係佢係特殊學校學生，可能佢都有宗教信仰，佢一起身呢就話，呢堂係第二堂嚟嘅，佢就起身就話，呢個噉樣教唔得㗎喎，好唔道德㗎喎，好變態㗎喎噉樣。噉即係呢個係，即係我自己覺得我都唔會指責佢，因為呢個係佢真實嘅感受嚟㗎嘛，同埋喺我哋嘅中國人嘅文化裏面教性教育呢，或者喺一個開眼人嘅文化裏面教性教育呢，我哋係唔會噉樣教㗎嘛，即係佢用緊開眼人嘅角度去睇盲人嘅世界。噉所以我覺得唔緊要，因為佢未有呢種噉樣嘅認知，但係佢有呢啲感受。

如果我哋喺嗰個位批評佢呢，我就覺得佢會…即係佢就冇得再去學㗎喇嘛已經，啱唔啱先，噉所以我就會覺得，我話畀佢聽，你有呢啲感受呢係 Ok 嘅，你可唔可以 Hold 住你呢個感受，然後呢，將自己呢，再放低啲，然後去了解多啲。噉你上完呢13堂之後呢，你再話畀我聽，即係你今日嘅感受會唔會有改變囉。噉當然如果我講 LGBT 議題呢，就好多宗教團體有好多反應啦，例如會寫信去畀我 Department head，或者係畀我大學嘅校長室噉樣。不過我都好幸運啦，即係我嘅大學裏面嘅同事相當支持我啦。噉大學，整個大學都係相信學術自由啦，噉呢個係好重要囉，同埋都相信平等呢個價值觀，包容、平等、接納呢啲嘅價值觀，噉呢個係，我覺得係有挑戰，不過唔係冇辦法可以面對囉。

M：即係寫信去投訴呢，我諗起好耐以前曾經有一個事情啦，就係有一個社福團體都曾經係俾過一啲反對同志嘅團體用電話去轟炸。點解我會記得呢件事，就係因為當時我係有演一齣嘅舞台劇，而嗰齣舞台劇裏面又重演返呢一個畫面，即係社福機構本身人又唔好多，但係一下子係俾人疲勞轟炸式噉樣打電話嚟投訴，其實都唔係咁簡單嘅，你唔係話，哦，噉我唔理佢囉，剪咗條線就可以解決呢件事咁簡單。所以我相信 Diana 用幾句嘅說話去描述收到呢啲投訴信，連自己嘅所謂老細嘅校長，自己 Department 都收到，我相信其實係曾經會有過一啲艱難嘅時候。

D：我 Department head 講得好好啊，佢話：「噉我哋做緊共融呀嘛，我哋會接納，所有學生都係我哋需要去支持㗎嘛。」噉我覺得佢呢句已經係好肯定我嘅工作啦，係嘞。噉校長室嗰邊就會講，哦，噉樣對個同事嚟講係，即係類似係一種恐嚇喎，噉佢又好明白囉。不過呢個係好多年前嘅事嚟㗎，五六七年好似都冇呀，都係十年前嘅事嚟，即係呢幾年佢哋就冇咗呢種嘅情況㗎嘞。

M：哦，佢哋而家唔走呢一種攻擊路線㗎嘛，佢哋而家就走同行路線嘅。我哋呢啲知己知彼嘅組織們呢，我哋有陣時都會去研究下，究竟佢哋而家嘅嗰個營運嘅模式，同埋佢哋而家嘅嗰啲 Campaign 呀，啲 Project 呢佢哋係點樣運作嘅。

D：哦，噉我記得啦，以前有一次呢佢係跟蹤我去一個學術會議嘅，係嘞，就擺咗佢哋啲單張呢就喺我枱面，然之後佢就坐喺我對面，用隻眼望住我。我記得我嗰次好似講呢個點樣喺中學裏面，係去講呢個同志學生嘅權益噉樣嘅，係啦。呀，唔知點解佢哋會收到啲 Information 呢，係入嚟大學裏面嘅 Seminar room 呢，噉樣做喎。

M：好驚呀！

D：係呀，噉我又冇睬佢，噉咪見到單張咪搣咗佢囉。

M：嘩，十年前竟然會有個噉樣嘅事情發生，好驚呀。

D：係呀係呀。另外去社區裏面做一個講座呢，都試過，即係佢哋係又會知道我喺嗰度出現喎，然之後就遞張卡片畀我，就話我哋可唔可以交流下噉樣囉。

M：嗱，由以前跟足畀單張你，跟住變咗做要同你交流，跟住到而家唔打電話畀你，同埋唔寫信畀你嘞。

D：哈哈哈，我話有機會可以嘅，不過我哋…即係睇下我哋嘅理論層面呢，可唔可以吻合到囉。

M：呢個非常學者嘅回應呀，哈哈哈！

D：所以我理解 Coming out 係幾咁艱難。所以我嘅研究係 Based on 呢啲經驗呢，我就係講喺性嘅偏見，呢啲偏見呢就係一啲嘅社會文化裏面出嚟嘅。噉如果，即係佢滲透喺每一個層面啦，所以唔單止係 LGBT 嘅朋友需要去面對呢啲嘅性嘅偏見，同佢哋有關嘅老師啦，或者研究人員呢，都面對緊呢啲嘅挑戰。而呢啲挑戰係我哋難以逃避嘅，即係點都係要面對㗎嘞。

M：Diana 好似畀咗個，即係 Come out 成為一個研究 LGBT 議題嘅一個老師之下，呢個身份都會遇到噉樣嘅一啲待遇。喺十年前遇到，總之俾人跟咗過去一個活動嘅現場，然後派過一啲傳單喺佢，喺正佢張枱嗰度，派卡片噉樣，甚至係收到投訴信。

D：呀，我個枱面都試過放過一本聖經㗎。

M：你意思係你而家辦公嘅 Office 嘅枱呀？

D：係。譬如我上個禮拜五講完一個講座，講點樣喺家庭裏面支持你嘅同志孩子，跟住返到去 Office 呢，就見到一本聖經，嗰本聖經裏面就夾咗張紙話你係一個罪人噉樣囉。

M：吓？好驚呀！但係等陣先，我問多一句就係，你個 Office 係長期中門大開嘅？

D：以前係我哋 Share with 幾個同事嘅 Office 嚟嘅，係嘞。即係早期嗰陣時嘅，早期做呢個講座嗰陣時，即係嗰陣時係好少講呢個題目嘅，係啱啱開始嗰陣時。噉當年我仲係同兩三個同事 Share 一個 Office 嘅，噉所以個 Office 係長開嘅，所有人都入得去嘅，包括同事或者學生囉。

M：哦，原來係噉。Ok ok，有種感覺我純粹嘗試去聯想嗰個畫面，真係有夠嚇死人呀真係，竟然會有噉樣咁直線式嘅選項。

D：其實呢個係一種 Bullying 啦，一種恐嚇啦。噉所以令我覺得呢，更加重要啦，一啲嘅偏見呢，唔係透過明刀明槍噉講畀你聽嘅，佢就係用緊一啲唔同嘅方法，去散落喺唔同嘅處境當中，希望你係可以停止去做一件事情。

M：連學者，講緊一個學術分享或者係一個，都算係一個喺一個比較我哋所謂叫做斯文人嘅一個層面裏面講，我哋都會接受到噉樣嘅一個恐嚇或者噉樣一個警告。如果我自己作為一個性小眾嚟講，我都覺得推演返去一個性別小眾，自己喺日常生活裏面遇到嘅嘴臉，或者係一啲批評嘅說話，我相信聽到呢一度嘅大家都會感受得到，其實確確實實呀，即係好似係接觸 LGBT 嘅人，不論你係唔係同志、係唔係性別小眾都好，你都會有機會遇到呢啲噉樣嘅憂慮，噉你何況係性別小眾本身呢？噉我去到呢個位我都想打個小總結地，就係話 Diana 今次呢個分享令到我哋更加確實得到，點解學者如 Diana 要繼續做呢個研究，或者繼續研究呢一啲唔同嘅範疇，而點解《點止港同志》做到第三季仍然都會繼續做，就係，就係有呢啲噉嘅聲音要繼續錄低，畀人哋知道香港係有遇過噉樣嘅人嘅遭遇，會有噉樣嘅待遇，而呢啲都係從香港同志角度裏面要記錄落嚟嘅一啲片刻噉樣囉。

D：所以自此之後呢，我嘅辦公室呢就會大鑼大鼓噉樣呢，話畀所有人聽我係研究性嘅，唔同層面嘅性嘅，所以我嘅門口就貼滿晒呢啲。因為我覺得你越受到恐嚇呢，你係越要呢係話畀所有人聽，係呀，我係做緊呢啲嘅工作，我係做緊性教育，我做緊性別多元，我做緊性別平等嘅教育嘅，噉樣囉，噉即係直接啲囉。

M：希望今次呢一集嘅分享，Diana 嘅勇氣可以鼓勵得到我哋身邊可能仍然有一啲忐忑呀，或者係生活裏面遇到有啲怯懦嘅性別小眾們，可以知道，當你遇到有一啲嘅批評嘅時候，反過嚟更加去擁抱你嘅嗰個身份，其實就係令到自己更加強壯，更加免於恐懼嘅一個方法嚟嘅，係其中一個方法嚟嘅。

D：我相信身邊嘅人嘅支持係好重要啦，即係你唔可以單打獨鬥嘅，即係當你面對恐懼嗰陣時，即係你會匿埋，係我理解得到，好理解嘅。所以如果係要 Come out，係要有支持者，即係身邊有一啲嘅 Peers 啦，或者係明白你嘅人支持你啦，噉我覺得呢個係好重要嘅。

M：呢個正正就係 PrideLab 其中一個想推廣嘅部分，就係希望聽到呢個節目嘅你，如果你身邊有朋友，可能未必係呢個性別嘅小眾們，但係「盟友」呢一個概念係非常之重要嘅，即係你唔好低估你作為一個盟友嘅作用。Diana 已經非常清晰地去分享咗佢嘅重要性，就係去支持你身邊嘅性別小眾們，就係去繼續自己發掘自己嘅小眾嘅身份，同埋即係更加去了解自己嘅一個，即係身與心嘅心路歷程噉樣囉。喺走到呢個節目嘅尾聲呢，我又想問下 Diana 有冇啲咩嘢東西係想畀聽眾知道或者係宣傳嘅呢？

D：不如宣傳下我嘅 Sexuality for All 個 Instagram，大家得閒可以嚟 Like 下，雖然我哋即係做宣傳能力比較低，但係嗰度都係一個平台呢，即係我哋會講下我哋而家做緊啲咩啦，包括係公眾教育啦或者入學校做一啲嘅工作坊啦噉樣。另外我哋都有啲社區裏面嘅輔導工作啦，LGBT 嘅輔導工作啦。最近我哋出版咗幾篇嘅文章啦，即係同亞洲區嘅學者一齊，講學校嘅性別平等啦，噉所以我都會畀嗰本書嘅 Link 畀 PrideLab 啦，你哋可以擺喺度，如果有興趣嘅朋友可以了解啦。噉我哋亦都啱啱出咗一篇文章講呢個跨性別盟友啦，即係老師作為一個跨性別盟友係可以點做啦，噉呢啲都係我哋而家著力去做嘅一啲嘅工作啦。

M：好啊，感謝 Diana 嘅分享同埋宣傳。噉 Diana 嘅 Instagram 嘅名我都會擺喺呢個 Post，呢一集嘅 IG post 裏面啦，噉喺 Description 裏面你都會見到頭先佢講到嘅嗰本書啦，同埋一啲相關嘅資訊嘅。噉喺呢個節目嘅收結呢就會有我呢個，每一集一定會有嘅一個收結嘅段落嘞。噉呢，呢個就係《點止港同志》係一個以香港同志角度出發嘅 Podcast，希望可以將大家生活裏面嘅性別同埋同志議題，用廣東話嘅聲音同埋文字嘅方式呢保留同埋流傳嘅。噉上我哋嘅 Podcast 專頁 pridelab.hk/podcast 或者上我哋Instagram @pridelabhk 嘅 Bio 裏面呢，就會睇到我哋呢個 Podcast 嘅資訊㗎嘞。噉多謝收聽呢個節目，而且聽到嚟呢度嘅最後啦。如果你想聽到更加多呢一類嘅節目，除咗訂閱我哋之外呢，亦都歡迎你喺自己收聽嘅平台上面留言，同埋畀星星嘅回饋嘅。噉你嘅留言呢我係會睇得到嘅，噉或者有機會可以上到我哋嘅節目嘅。噉今集呢就講到呢度嘞，非常感謝郭勤 Diana 去做呢個分享，非常之圓滿、全面性嘅一個分享。

D：多謝馬天娜，多謝 PrideLab。我好鍾意睇你哋嗰啲嘅 Post 㗎，我成日都睇，好有質素。

M：噉我哋兩個平台嘅 Post，大家聽眾們都可以多啲留意啦。期待下次同你《點止港同志》，噉我哋同聽眾講拜拜啦！

D：拜拜！