上禮拜喺觀塘嘅香港同志遊行2023同志一日空間你有冇去睇呀？
展覽入面用唔同味道去記載幾個同志嘅心路歷程。

M：馬天娜

W：Wing

E：Eunice

M：歡迎返嚟《點止港同志》，我係主持馬天娜。呢一集我會覺得係自己嘅一個挑戰嚟，因為呢條題目我比較多時間聽朋友同我講，可算係好彩嘅情況之下，我係冇乜經歷過嘅。但係縱使我冇經歷，我覺得作為一個同同志相關嘅節目，係應該比更加多同志們意識得到有呢一個狀態同埋有呢一個問題啦。同志之間裏面嘅呢一個問題係可能嚟得比較複雜，佢背後隱含嘅因素同埋佢嘅限制比較多，噉所以其實有好多人係有苦說不出地，係冇辦法一般典型嘅情感問題噉樣，好大聲上網同人分享。所以希望透過今次，幸運地得到兩個朋友信任，可以同我分享佢嘅經歷，噉我哋可以畀更加多嘅人知道，同志之間面對嘅呢一個情況會係點樣嘅。兩個嘅朋友，佢哋都係經歷過親密暴力嘅人啦，呢個題目就叫做有毒關係嘅過來人揮手區，點解一段關係變咗做有毒呢？毒嘅來源係喺邊度嚟呢？以及係點樣可以脫毒呢？噉就要請兩位朋友同我哋娓娓道來嘞。排名不分先後，我就噉 Call 名啦。噉邀請第一位係阿 Wing 嘅，同大家 Say 個 Hi 先。

W：Hello 大家好。

M：第二位係 Eunice，Eunice 同大家 Say 個 Hi。

E：Hello。

M：一開始我開門見山啦，講緊有毒關係呢，本人嘅拍拖經驗又未係好多啦，冇一啲好嚴重嘅事情發生過。所以呢今次你會聽到我好多問題㗎，我會好多…希望對收聽緊節目嘅你，以及我自己都可以做到一啲解答嘅。好，講咗好長嘅 Opening 嘞，首先問一問啦，可唔可透露下，你哋隨便自己 Jump in 啦吓，你哋之前拍過幾多次拖倒呀？

W：七至八次。

E：我就得三次嘅，我覺得呢啲就唔係話多就會機會率大啲嘅，遇到親密暴力呢家嘢，即係你可能一次半次都會遇到嘅。

W：一次半次好甘已經夠㗎嘞。

E：哈哈哈！

M：Ok，噉呢個證明就係唔一定話情場老手就一定避得過，亦都唔係話第一第二次情竇初開就會好純真呀吓，有機會就係喺中間裏面遇咗呢一次有毒嘅關係。當時點樣去搵到呢一個對象嘅呢？即係呢個有毒關係嘅對象。

W：呢個對象就係，都係喺交友 App 度認識嘅啫，噉點樣開始可以拍拖……都係試嘅心態囉。

M：即係因為你想交友，然後你遇到呢一個，即係 Match 到呢個對象，所以你就想試下同呢個人拍拖？

W：都會有啲 Feel 先嘅，因為呢啲階段都過咗好一段時間嘞。即係呢啲要 Dating 呀，要喺 App 度識人呀，即係要出去，可能認識咗一段時間，見過下……我冇特定，要點樣先係可以話呢個對象，咦，Ok，有啲 Check list，Ok 中咗，噉先開始，冇特定嘅。

M：嗯。噉 Eunice 呢？

E：我唔係玩  App 識嘅，因為我本身就好懶玩 App 啦，所以我同佢係機緣巧合，係因為嗰陣時我要做一份功課，噉嗰陣時做功課就特登搵呢個香港女同志去做訪問嘅，而佢呢就係我 Friend 搭 Friend 搭 Friend 搭 Friend 嘅其中一個受訪者。噉於是呢，即係大家都知啦，喺訪問嘅過程就會，其實就係好深入同一個人傾偈呀嘛，噉所以傾下傾下呢，通常啲火花就會噉樣走出嚟㗎嘞。噉 At the same time 呢，就係因為我嗰陣時嗰個狀況都好差嘅，我自己都真係仲喺上一段感情可能都未走得返出嚟啦，噉所以嗰陣時都好想搵一個水泡噉樣嘅物體捉住？噉所以就好快就可能傾兩傾覺得都啱傾啦，噉就一齊咗嘞。

M：我呢到聽到有一個新嘅字眼，叫水泡呀，即係到底一開始嘅嗰個心態會唔會影響咗呢？從上一段關係結束咗之後，中間嘅嗰個過渡期往往係最難跨越嘅。好多人係驚你由上一段關係，即係所謂散咗拖啦，散咗拖之後你搵唔到對象，即係你未搵到對象中間嗰個過程，就會陷入咗嗰種就係你可能周街見到啲嘢就會想起對方呀，然後你又可能會諗起你從一個有關係嘅狀態就脫離咗呀，然後你會進入咗新嘅困難嘅 Zone，即係啲人話叫 Comfort zone 嘅相反，叫困難嘅狀態啦。所以好多人就未必跨越得到。噉你嗰陣時覺得，呢一個人點解可以成為你嘅水泡嘅呢 Eunice？

E：真係純粹係因為…你都知道個女同志嘅圈好細嘅嘛，噉然後啱傾嘅人呢其實係好難搵嘅。所以真係嘩，突然間有個人好似傾偈都幾舒服喎，噉樣樣，噉所以就即係呢個破解唔到嘅迷思，真係女同志都係要傾偈嘅狀況之下，就好容易就會傾多兩傾就會越行得越嚟越近噉樣囉。噉但係嗰陣時我都係中晒嗰啲…即係嗰個困難 Zone 嘅，即係行去每一個地方，只要同個 Ex 係去過嘅時候呢，都係會諗起嗰陣時嘅一啲點點滴滴。噉但係因為都知道無可能可以返埋一齊嘞，咁所以就諗住搵個寄托可以，諗住洗走嗰啲開心嘅回憶噉樣啦。

M：噉所以就遇到呢一個後尾，你意識到係好有毒嘅一個前度嘞。即係由呢個水泡成為咗你嘅女朋友再成為你嘅前度呢，中間成個關係係歷時幾耐呢？

E：中間都係成四年嘅。

M：四年嘅。噉阿 Wing 呢? 阿 Wing 你話，即係喺呢個 App 你識咗之後，你想開始拍拖到佢成為你嘅前度，中間你經歷咗幾耐？

W：幾個月囉都係。

M：幾個月，好。好嘞呢度我哋聽到有以年計同以月計呀吓。去返 Eunice 到，你話呢四年裏面呢，你係……噉你同佢拍拖啦，即係我可以想像香港嘅女同志生活就莫過於就係 Date 啦，即係典型嘅 Date 啦，可能去唔同嘅地方啦，如果條件比較理想啲，可能會搬埋一齊住啦。你去到中間咩階段嘅時候，發現呢個人開始有啲唔係好妥呢？

E：我覺得我嗰個唔係好妥就好 Subtle 嘅，即係佢又唔係嗰啲會郁手郁腳，即係如果佢郁手郁腳就好容易覺得唔妥㗎嘛。噉但係呢，我嗰隻唔妥呢就係好 Subtle 地係會，即係會覺得越來越唔想同佢出去呀，跟住覺得好大壓力呀，慢慢會感覺係一個情緒勒索噉樣囉。噉因為一開始可能佢都知道我同佢嗰個差距好大嘅，因為始終我哋屋企嘅背景唔同呀，跟住讀書嗰個距離又差好遠呀，跟住返工呢就，我好快已經返工，又 Full time 噉樣，佢就中間仲經歷咗一啲實習呀，經歷咗一段時間冇收入呀噉樣。噉所以成個背景呢就會令佢覺得，嘩，我 Partner 真係好叻呀，即係我唔係讚自己，但係佢嗰時真係噉樣諗嘅，即係覺得，嘩一定係比唔上你啦，噉然後呢就會不斷係重複佢嗰種欠缺自信呀，欠缺安全感覺嘅 Loop。噉跟住後尾呢就好容易慢慢就係變成一啲情緒勒索嘅說話囉，即係會覺得我都知㗎嘞，你講咩都啱㗎嘞，我做咩都係錯㗎嘞噉樣。又或者係，我都知自己冇嘢比得上你㗎啦，你要離開我都明嘅。噉呢啲可能係好早嘅時候已經慢慢開始出現咗。

M：我想追問呀，頭先你講到話你同佢有年齡上面，同埋即係社會上面狀態有唔同啦，你同佢相差幾多年呀？

E：嗰個相差嘅年呢只係一年，係嘞，即係佢大過我一年添嘅。噉但係因為即係一啲讀書嗰度，佢可能會差啲，所以中間就會經歷嘅嘢比較多之後呢，所以掉返轉呢，可能我個讀書嗰個情況呢就快過佢好多，噉樣囉。

M：哦，明白明白明白，Ok，所以一年嚟嘅。我順便問埋呀阿 Wing，你同你嘅前任嘅年紀有冇相差好遠？

W：相差三年左右。

M：相差三年。

W：對方細我三年。

M：對方細你三年，Ok，好好。噉我去返 Eunice 嗰個 Case 先。講咗幾次呢個情緒勒索啦，然後佢就話即係你啱晒因為你，你可能讀書比較好，成績比較好，所以你乜都啱嘅，佢自己就錯晒噉樣，而喺你眼中佢係比較缺乏自信啦。聽緊節目嘅網民即刻喺度諗就係，噉會唔會純粹係你 Mean 咋？即係點解會，點解…噉佢都好慘啫，冇自信呀嘛，噉佢啲自信唔係應該 Partner 畀佢㗎咩？你做乜唔支持佢呀？

E：我有㗎，即係嗱，呢個方面呢，真係要平反返真係為我自己。一開始我都覺得可能佢只係冇自信啫，噉所以我都有幫佢建立返信心㗎，即係大家拍拖嘅時候都會不停去讚對方㗎啦，不停去嘗試希望佢從一啲佢叻嘅嘢嗰度幫佢搵返個信心。噉但係你慢慢開始呢，你就會發現呢，其實佢唔係純粹冇自信呀，佢係根本就唔想有個自信，即係佢嗰個係…佢嗰個被害者嘅情緒嚟㗎。即係你會發現呢，佢係會不停去轉入嗰個 Loop 入面，然後就會不停就會係擺自己喺嗰個被…比較弱嘅嗰一方嗰度，噉所以就會令到佢可以不停噉樣繼續重複嗰啲 Loop，就係不停擺自己喺一個冇安全感、冇自信嘅一個位置上面去勒索返我轉頭噉樣。

M：噉你頭先講到嗰個 Loop 呢，舉個例啦，佢話你成績好好呀，你好勁呀，噉即係你掉返轉頭可能讚佢 ABC 噉樣啦，其實你都好好㗎噉樣啦，呢個典型嘅關係裏面互相支持啦。噉會唔會係……即係個 Loop 係 Loop 咗幾多次你先發現，其實根本佢唔係欠缺自信咁簡單，而係佢係自己選擇咗一個弱勢嘅一方去放喺自己嘅關係度呢？

E：我覺得唔係話數幾多次嘅，而係即係你慢慢去到個位你會攰囉。即係我諗呢種感覺好似呢就係，慢慢開始對住佢呢，你會避開，你會覺得佢嗰種負能量，佢嗰種負面情緒不停噉樣投放出嚟嘅時候係會攰嘅，噉你慢慢就會寧願自己一個呀，放假嘅時候會唔會搵多啲嘢去做，令到自己唔需要去見佢呀，呢啲其實都係一啲先兆嚟嘅。

M：從心裏面，即係打從心底裏面唔想，開始萌生唔想再見到呢個人嘅一個感受，跟住就開始覺得呢個感覺唔係好…即係呢個關係唔係太妥嘞噉樣。Ok。

E：冇錯。

M：噉我去返阿 Wing 嗰度，Eunice 嗰個 Case 呢，佢就話佢係唔係好明顯嘅，即係唔係要出到手嘅、唔係出到腳嘅噉樣。噉你個 Case 呢？你同你嗰個相差三年嘅前度嘅情況，你嗰幾個月，呢個比較短嘅時期裏面你幾時發現有唔妥呢？

W：係認識咗幾個月嘅時候開始啦，噉個關係其實都維持咗一年半嘅，但係就斷斷續續啦。噉我發現有啲狀況嘅時候係大概我哋一齊咗三四個月，但係我個 Case 就應該相比起阿 Eunice 激烈啲。

M：喺激烈…喺你講激烈啲之前，我想問埋呀，頭先你話年幾裏面有啲斷斷續續，噉你啲斷續發生咗啲咩嘢事呢？

W：斷斷續續嘅意思即係我哋有分開過跟住有一齊返噉樣啦，即係喺呢年半嘅時候。

M：噉你話激烈啲係點樣激烈化呢？

W：激烈啲係對方係好容易情緒唔穩定嘅。噉但係我唔知嗰啲情緒唔穩定係嚟自佢本身工作呀、生活呀，或者朋友呀，定係…嗰一刻我未理解到啦定係。我哋中間相處…因為我個人係比較冷靜嘅，但係對方係…總之佢問你要答，佢要嘅嘢你要畀噉樣啦。第一次遇到呢個情況就係，都係一啲好…其實只係一啲好少嘅事，噉就鬧交，但鬧鬧下佢開始，開始有啲唔對路喎，即係對方失控呀、狂喊呀，跟住就開始扔嘢呀。無意識嘅，即係無差別嘅噉樣。

M：即係點呀？即係佢眼前，例如佢會掟啲咩呀，即係佢會掟電視噉樣呀？

W：未有咁盡，可能係枱面一啲雜物。

M：即係譬如佢張枱上面有本書、有遙控、有電話，電話都掟嘅噉樣。

W：電話都掟，呢個之後真係有經歷過，即係掟爆 iPhone 呢樣嘢。之前嗰啲 iPhone 都仲係好易爆㗎，爆 Mon。跟住就垃圾桶囉，即係唔知踢到個垃圾桶飛去邊噉。

M：當你意職得到嗰個人，開始會掟嘢同埋會狂喊之後，你就會覺得呢個人開始有啲唔妥嘞。

W：係呀。

M：頭先你講到佢情緒唔穩定，佢有冇講過畀你聽佢點解情緒唔穩定？

W：冇㗎，其實冇。即係嗰件事係嚟得好突然嘅，即係佢本身個生活或者工作都係…即係有一份正常嘅工作啦。噉我覺得呢個工作都未至於要影響佢要有咁大嘅情緒啦。噉就係嗰刻就係咁突然啦，所以我嗰刻係完全唔識去反應或者係處理啦。

M：噉我再問一問，如果你方便講就繼續講啦。噉你可能同佢有一次鬧交，噉佢就開始抌垃圾桶、掟嘢啦，噉即係你眼前嘅東西就會亂啦，跟住就會好亂嘞，即係可能垃圾到處飛，噉跟住啲嘢爛咗碎咗噉樣。噉你嗰一刻嘅感受係點樣呢？

W：就我嗰一刻個反應呢就係錯咗，所以令到佢嘅情緒更加激動。就係因為我係一個好冷靜嘅人呀嘛，我係一個唔亂得嘅人，我見到嗰刻，嘩，搞錯呀，你搞到…你發脾氣啫，唔使搞到間屋咁亂呀，扔到周圍都係。我呢就保持冷靜就係，一路喺度執囉，執返佢整亂咗嘅嘢囉。但係就冇，嗰刻就冇理到佢，即係冇處理佢嘅情緒啦，都唔識去安慰佢話，究竟發生咩事呀？或者大家靜落嚟坐低，即係唞一唞。噉我就，我嗰刻係自己係，𢛴呀或者嬲呀，做咩要掟爛啲嘢啫，掟爛啲嘢要畀錢買返㗎嘛，即係整爛啲玻璃要去掃地㗎嘛。

M：Ok，即係你嗰一刻嘅諗法就係，你想快啲還原返屋企嘅狀態，因為你唔想咁亂。Ok，噉去到，聽眾們都知道，有毒嘅狀況或者嗰個出事嘅狀況其實係可以有，即係你眼見見得到啲嘢掟爛咗啦，亦都係有一啲可能係你，主觀感受上你個直覺覺得，咦，即係呢個人開始令到你唔係好想，再咁常規地同佢去拍拖呀，去約會呀噉樣。我想喺度先落一個，小小嘅註解呀，噉點解會問到頭先呢個，即係去到咩位會覺得有啲奇怪呢就係，因為我……呢個亦都係一個解釋咗，點解我會想做呢一集啦，就係其實我好耐之前呢聽過有一集節目，我已經…因為我真係，我相信都市人而家有好多好多媒體要聽啦，噉所以我都唔係好記得嗰一集係乜嘢嘅一個集數嚟嘅。噉呢，當時呢就係一個女同志嘅 DJ 啦，佢就喺個節目裏面分享咗一件事。嗰件事呢，就係佢，個女 DJ 搬咗屋，因為佢女朋友本身係冇 DJ 嘅鎖匙嘅，噉佢搬咗屋之後自然就係要執屋啦，然後要整理屋企啦。噉當時候女 DJ 好似似係一個比較需要有空間，有自己空間嘅人，所以佢就冇畀鎖匙啦，亦都唔期待呢一個女朋友要去自己屋企度執屋嘅。噉但係呢，有一天呢，阿 DJ 返到屋企嘅時候發現女朋友喺屋企喎。女朋友喺屋企可能就買咗外賣呀，然後執咗啲嘢呀，即係好似將屋企打理過噉樣。噉佢就好錯愕，佢就問點解你會嚟咗我屋企嘅？噉佢就話，哦，我問咗隔籬鄰居，然後同咗你嘅業主講，我係你朋友要幫你執屋，噉我就借咗條鎖匙去咗你間屋。噉佢就好錯愕，即係佢一啲都唔覺得呢件事係好事嚟嘅，然後個 DJ 就覺得好驚。個重點係個 DJ 將呢件事話咗畀身邊嘅人聽之後，身邊嘅人畀佢嘅反應就係覺得女朋友好 Sweet，女朋友去咗 DJ 屋企度執屋呢件事係好為 DJ 設想嘅，即係好 Considerate 嘅，噉佢完全唔覺得呢件事係一件危險嘅事啦，唔覺得呢件事係一件唔禮貌嘅時候啦。噉所以 DJ 當下佢係覺得好受挫呀，佢會覺得呢個關係嘅狀態唔係太正常，因為呢個唔係佢想要嘅嗰個關係距離嚟嘅，但係佢講畀人聽嘅時候竟然係得唔到回應，噉所以呢件事令到我一路積咗喺底，希望透過更加多過來人嘅經驗，可以畀到收聽緊節目嘅你知道，其實有啲嘢行為佢唔會構成一個威脅，但係只要你個心情係覺得呢件事係 Odd 嘅，或者呢件事係唔合理嘅，噉就係一個需要留意呢段關係嘅狀態嘅契機嘞。

想問下兩位呀，雖然有一位就係講比較…你嗰個覺得 Kam kam 地、覺得有毒嘅狀況比較明顯啦，你哋喺嗰段關係裏面有冇遇到暴力呢？即係喺自己身上或者係見證對方身上有嘅暴力，肢體暴力，即係佢打你啦，佢傷害你啦，有冇經歷過呢？

E：我好老實講真係冇嘅，所以我就係話成件事都係好 Subtle 啦。噉反而係你啱啱講嗰個 DJ 嘅經驗呢，我就真係好 Relate 到囉，因為你啱啱講又係一啲，嘩，看似係佢想對你一啲嘅關心或者對你好嘅狀態，但係掉返轉可能喺我嘅身上我就會覺得，嘩，呢啲真係唔 Ok 喎，我嘅嗰啲位呢係好多嘅。即係所以我就係話我嗰段關係唔係一啲好明刀明槍嘅毒，而係即係陰啲陰啲嗰種嘅感覺係，我覺得係更加辛苦同埋更加難去令人理解嘅。噉可能我好簡單地又係講一個例子，類似佢係會覺得將我去介紹比佢嘅屋企人係一件好幸福嘅事嚟嘅，所以嗰個過程就係可能我同佢一齊咗我諗一個月都冇，佢就已經將我帶去佢嗰個有九萬幾親戚，嗰啲姨媽姑姐嘅屋企聚會。嗰陣時係大家都冇 Come out，所以呢就係勁奇怪嘅，你無啦啦去拜個年，你帶咗個朋友一齊去個家族嗰度一齊拜年喎。而我嗰一刻因為啱啱開始一齊，噉所以一定係唔會拒絕㗎嘛，即係呢啲時候，啱啱開始嘅時候乜嘢都應承啦。

嗰種都唔係幾好嘅心態嚟嘅我都明，但係即係照去啦，噉就會係好 Odd 嘅，因為你究竟用咩身份去呢？但係你會見到我嗰個想當年嘅 Partner 呢佢係好 Enjoy 呢件事，因為佢再有另外兩個可能堂家姐，佢哋都會帶埋自己嘅男朋友上去，然後佢就會覺得帶埋自己嘅 Partner 上去呢好似好 Sweet 呀好幸福呀，然後將我介紹畀唔同嘅親戚朋友，又話佢好叻㗎，佢讀到乜乜乜呀，佢做緊啲咩工呀噉樣，周圍將我介紹畀啲人識。噉嗰下我係好唔舒服嘅，因為第一我哋啱啱一齊冇幾耐啦，第二就係你會感覺係，你今日已經識晒呢一班嘅親戚嘞，你要離開好似嗰個成本又大咗喎，你想分開嗰下噉點呢？係咪要再同呢啲屋企人交代呢？噉所以如是者，當佢不斷重複去將我介紹畀呢啲唔同嘅屋企人知呀，跟住又要去佢屋企過夜呀，同佢呀爸呀媽又建立咗一啲關係呀，之後你就會覺得好似越嚟越走唔到，越嚟越透唞唔到氣，覺得自己好似一定要留喺呢段關係入面噉樣，噉 Which 可能喺外人覺得係好 Sweet 嘅，即係佢願意將你介紹畀自己嘅屋企人知喎，介紹畀自己嘅朋友知喎噉樣。但係我覺得呢一個位都係要攞 Consent 嘅。

M：阿 Wing 呢？阿 Wing 有冇遇過頭先我問嗰個暴力嘅狀態呢？

W：身體上面有嘅，但係有唔同嘅層次？或者係有啲唔……

M：可唔可以講下點樣嘅層次呀？

W：即係有啲係未至於係身體上，即係肢體暴力嘅，即係有啲唔舒服嘅位啦。即係嗰時嘅電話都仲係可以用指紋去解鎖嘅，噉對方就要求我，可唔可以加佢個指紋落我部電話，即係去 Unlock 我部電話。噉我就覺得，即係點解要噉？噉我哋大家要 Open 到去邊一個程度？即係佢想睇下我電話入面，譬如啲相呀、Message 呀或者 Email 呀，噉呢個係其中一種我覺得唔舒服嘅位啦。噉另外都係，平時可能大家都係正常嘅工作時間，佢有時會不停…即係佢嘅工作係可能中間多啲空檔嘅時間，噉佢會不停打電話畀我呀，或者 Send message 畀我，即係就算係我哋返緊工，噉其實都冇…唔係話特別有啲咩要傾呀，噉佢都會 Keep 住可能一個鐘頭打畀我一次呀，但係期間其實 Within 嗰個一個鐘頭中間係 Keep 住其實已經 Send 緊 Message 㗎喎，即係冇間斷噉嘅。但係如果呢，鬧交嘅時候個情況就真係更加嚴重，追魂 Call 咁樣，連環噉樣 Send message 呀，冇停呀，即係可能佢要搵你，即係可能就真係好似睇戲噉樣，即係要你可能幾分鐘擗低咗個電話呢，你就會見到不停 Pop up 咗好多未睇嘅 Message 啦，或者會見到好多，幾十個 Miss call 呀。噉呢個唔係身體上令我唔舒服嘅，但係係可唔可以話係精神上嘅壓力？

M：可以呀，可以。

W：如果你話身體上嘅暴力係有試過嘅，因為噉我之前有提過，佢會…對方如果真係要有情緒發脾嘅時候，佢會扔嘢㗎嘛。噉呢啲情況喺之後其實越嚟越頻密囉，噉我開始有意識過係想，即係阻止佢去扔嘢噉樣啦。你阻止佢扔嘢，噉你唔係下下都擋到佢扔個垃圾桶㗎嘛，噉你擋唔到垃圾桶嘅時候，你就係要擋佢㗎啦。你擋唔到件嘢你就擋佢個人，噉你要擋個佢人嘅時候自然就有身體接觸，噉你有身體接觸，即係輕嘅就碰撞啦，如果佢再隨手真係攞到嘢嘅時候，噉其實佢就會傷害到自己，即係啲硬物囉。

M：聽到阿 Wing 講到幾個階段，即係都要去到第三個階段，或者係講到第三個部分，你先會聽到有肢體上嘅暴力。而之前嗰兩個階段其實係，我諗係…我相信其實喺好多人眼中，呢啲係所謂關係會發生嘅事呀，即係你要經常傾電話，經常要聯絡啦，然後要透過俾對方睇到自己手機，去證明呢一個忠貞度啦，證明呢個一對一嘅誠實嘅程度啦。如果啲人最興去解釋自己呢一個行為，就係你係咪唔信我？你信得過我呢，你就要比我用到你電話。

E：呢啲都係真係好典型嘅，我都試過因為。即係一換完電話呢，唔記得加佢指紋，佢就會話，點解我唔加埋我指紋入去呀？即係佢會問呢啲問題，你就會覺得，原來係一定要做嘅呢啲事。

M：噉其實你覺得對於你嚟講，點解你唔加得人哋指紋落去呢？我掉返轉頭問，反例噉問。

E：係有冇需要呀嘛，即係你究竟想踏入對方嗰條界線去到幾深？定係你要…即係我覺得有個位真係，女同志呢都係好容易成日犯錯呢，即係唔係犯錯嘅，即係成日都會發生就係，會將兩個人變成一個人啦。即係好似我嘅嘢呢就係你嘅，跟住我啲密碼呢你要全部知晒嘅，最好將啲密碼呢就改埋我生日，或者我哋嘅咩拍拖周年紀念日添。噉嗰啲嘅地步呢，會覺得冇咗自己個界線。即係我個電話入面唔係話有咩秘密，而係呢個係我嘅界線囉，呢個係我嘅私隱嘅嚟㗎嘛，噉即係你想睇嘅我可以畀你睇囉，但係而唔係連我可以有 Consent 嘅部分都冇埋。

M：我聽到阿 Wing 有講到就係即係高度重複打電話啦，仲要係本身已經係 Send 緊 Message 仲要打電話啦，仲要定時定候打電話，即係有個好常規式嘅所謂嘅高度互動啦。我諗其實係即係第一第二階段嘅嘢，好多都係關乎於嗰個信任度，同埋你所謂嘅你對於呢個關係裏面，你要表達嘅誠意，透過成日聯絡去表達你投入喺呢個關係裏面啦。咁即係去到第三個階段就係因為佢情緒上面，佢掟嘢，噉所以就喺肢體上面會有接觸，噉亦都因為有硬物接觸噉所以就會受傷啦。你哋有冇曾經遇過係佢威脅你，佢會自己傷害自己呢？即係可能去到你呢段關係裏面嘅任何階段。

W：有。

M：阿 Wing 話有嘅。

W：噉個情況係準備去旅行，返屋企去執行李啦，噉佢就發脾氣喎，發脾氣呢佢就話我唔去旅行，佢要剪爛自己本 Passport，嘩我心諗，即係我聽到呢度我已經覺得，咁爆炸做咩，剪爛自己本 Passport 係咩一回事呢？好唔好彩呢就係我返咗屋企執行李，但係我忘記咗，我自己本 Passport 係放咗係同當時……

M：嗯，即係你嗰本 Passport 同佢本 Passport 放埋一齊嘅。

W：係呀，即係唔係放咗喺一齊，即係放咗喺同一個地方。噉我純粹係想返自己屋企，純粹想執行李啫。佢就話，即係類似，佢威脅話如果你唔快啲返嚟嘅，即係我同佢居住嗰個地方，佢就話，連我本 Passport 都剪爛埋喎。

M：即係兩個唔好去旅行嘞。

W：係呀，大家都一齊唔好去啦，即係嗰啲叫咩話？

M：攬炒！

W：係呀，攬炒，大家唔好去啦，我哋大家剪爛咗本 Passport 佢就話。噉我又係好理性，剪爛咗本 Passport，我咪又要去再補領過囉，又要搞好多手續上嘅嘢嘞。噉呢個係，即係嗰件事就再繼續去發大啦，因為我覺得好無理啦，噉梗係好無理啦，你剪爛你本 Passport，你咪剪爛囉，你自己再申請過，但你做咩要剪爛我本 Passport 先？……有威脅過佢要自殺啦，嗰段關係其實我哋都斷斷續續呀，有時我都覺得喺同佢一齊住嗰個地方，我都好似好唞唔到氣噉，我都要返下屋企處理我自己嘅嘢呀，或者見下屋企人。噉佢都係 Keep 住噉樣囉，會不停 Send message 呀，打電話呀。我再回想返去，其實佢冇辦法一個人去自處呀，噉所以佢一定要有人去陪佢呀，噉佢就不停打電話畀我，佢話你再唔理我，我就會自殺㗎嘞，點點點㗎嘞。噉開始我就收到相囉，即係佢影咗一堆藥物，跟住 Send 俾我，即係我唔理嗰啲係咩，即係佢有呢個意圖呀，或者我覺得嗰一刻係一個威脅囉。我記得點解有……我最後真係報警呢，係因為嗰時住嗰個地方，因為有養小動物嘅，噉就有裝嗰啲 Cam 呀，佢呢要求我去開個 Cam，去睇下佢咩情況。點樣呀，好似死亡直播呀，我冇睇到佢係咪真係食咗嗰啲藥，噉但係我已經覺得佢嘅情緒好唔穩定，我報咗警嘅，我選擇報咗警。噉我唔在場啦，噉警察真係聯絡我啦，就問我…即係我又冇辦法聯絡到佢屋企人呀點樣。噉又未至於要破門嘅，檢查過，噉佢身體上嗰刻個情況係 Ok 嘅，噉樣就離開咗嘞，即係消防同警察就離開咗。

M：哦，即係佢未去到下一步要入醫院呀、洗胃呀？

W：即係未至於要噉，個身體狀況唔係好差嘅，只係佢嗰刻太激動嘞。噉呢個係我一次嘅，真係我覺得我處理唔到，我要報警。

M：噉經歷咗呢啲事啦，又頭先你講到有唔同階段嘅嘅暴力啦，不論係一個可能係科技上面、溝通上面嘅，令到你覺得好有壓迫感啦，連同居嘅呢個地方，人哋以為應該係一個 Home sweet home 嘅地方，你都會認為係其實係一個壓力嘅來源。以致到頭先你講咗其中一個例子話即係佢要威脅你，要你…即係用圖去暗示佢要服用大量藥物啦，跟住呢就仲要話噉你即係屋企有 Cam，你又要去望下佢點樣做嘞噉樣，即係要你好似要親眼見證住佢自己傷害自己噉樣。噉即係經歷咗呢啲事情嘞，即係可能之後仲有啲其他事情，阿 Wing 你係去到……即係你呢個噉嘅狀態維持咗幾耐、去到幾時你先決定要停止呀？

W：維持咗我諗都有半年至一年嘅時間。噉因為我最影響係影響埋我自己嘅情緒同埋工作，同埋係嗰刻即係影響到好似我為咗成日要陪對方呀，或者係處理對方，我係冇晒時間去見自己啲朋友呀，甚至乎屋企人嘅。即係我係冇辦法講出嚟，我自己都有啲好似頂唔順噉呀。

M：噉你中間有冇同過其他人講過呢件事呀？即係講到話你女朋友叫你開死亡直播呀，叫你…即係掟嘢，然後可能你身邊會有人會，唔知有冇人會見到你手上有傷痕，或者有啲即係碰撞過嘅一啲痕跡？呢件事有冇其他人知過㗎？

W：我朋友係有講囉，但係佢哋都唔會懷疑係咩一回事囉。噉同屋企人冇特別講呀，如果你話我嗰下係有啲…有碰撞即係佢有傷痕、有瘀傷，其實都會見到嘅，噉但係佢哋冇特別問囉。

M：即係覺得可能你純粹係行街仆親，行街撞親噉樣嘅認為噉樣，OK。即係以至到你親戚及朋友都唔知道你經歷緊呢個狀況嘅。

W：佢就算…即係朋友就算知道都未會想像到係一個咁嚴重嘅情況，可能佢哋覺得都係一般，你哋一般情侶鬧交，噉你哄返佢咪無事囉，傾下啦或者哄返佢咪得囉。

M：Eunice 呢？你呢種更加唔明顯，即係未去到咁緊張嘅情況，你有冇同過你身邊嘅朋友或者屋企人提及過自己有噉嘅狀況？

E：我係應該真係冇嘅，因為第一係冇特別…即係好少人知道我呢個性別身份啦，噉所以係，即係直情好多朋友可能連我係拍緊拖都唔知嘅，或者屋企人更加唔知嘅。然後呢，如果係有一啲 Common friend 呢，即係嗰陣時佢都會好需要我一定要帶佢去見一啲嘅朋友啦。噉呢啲時候佢都會搶閘衝出嚟講呢，就會話我哋係好幸福㗎，我哋幾年都冇嗌過交呀，我哋呢就每一朝呢都會講早晨呀，每一晚都會講早唞呀，噉呢啲。你就會好似呢，去到一個位你會覺得我要幫手去製造呢一個場景噉樣。即係好似，如果我攞咗一啲關係入面一啲唔開心嘅嘢出嚟呢，好似破壞緊呢段關係，或者係破壞緊大家對我哋呢段關係嘅想像噉樣。噉所以係，真係係冇對象可以講囉，最初嘅時候。係去到後尾我開始，即係認識到 PrideLab 啦，嗰陣時都係佢捉我，其實嗰陣時我係完全唔想參加 PrideLab 嘅唔知一個乜嘢活動嘅，嗰陣時佢又捉住我一定要我參加噉樣，噉 Anyway 啦噉就去咗。噉嗰陣時先發現，原來喺一個咁…一個安全嘅地方去講呢，係一個咁緊要嘅一個狀態嚟嘅。噉嗰陣時好記得係，我……好似 PrideLab 有位成員都會問我哋段關係嘅一啲事啦，嗰陣時我係直情同佢講係我哋應該瞌埋眼就一世㗎嘞噉樣嘅。噉呢啲情況之下呢，佢就覺得，喂，唔得喎你呢個狀態，你唔係…完全唔係一個開心嘅關係啦，唔係一個健康嘅關係啦，而我亦都好似只係等緊呢個時間流逝噉樣嘅。噉所以係直至嗰刻先會意識到，原來我係需要離開囉，呢個位。

M：嗱，我呢度同大家利申先吓，呢個唔係一個間接宣傳 PrideLab 嘅一個訪問嚟，但 Eunice 係 Join 過 PrideLab 嘅活動嘅，即係同我其他朋友分享咗。頭先你講到呢個 Safe space，即係你意思係對於呢個性小眾嚟講，或者係未 Come out 嘅性小眾嚟講，去一個安全嘅空間，或者係一個令到你可以安全地表達自己性別、氣質或者性別表達嘅一個空間、一個組織，係可以令到你將你嘅關係狀況畀人知噉樣？

E：係呀，我覺得係囉。因為尤其是我嗰啲好 Subtle 呀，好似如果講畀朋友聽呢，即係個感覺就好似第一係破壞咗佢哋對我哋呢段關係嘅想像啦，因為啱啱都講到係我個 Partner 係好鍾意係將我嘅朋友呢，就強行加晒做佢嘅朋友嘅，噉所以就好難去同朋友去講嘅呢啲位。噉第二就係講完畀一啲可能直人聽，佢哋唔會明白即係性別小眾拍拖嘅一啲嘅事囉。即係可能佢哋會好容易話，噉分咗就會搵第二個啦，但我覺得即係如果對於性小眾嚟講，可能話分咗要搵第二個，嗰個中間嘅過程係好難嘅，個基數又少呀，跟住然後你要再重新認識一個人，又好似好難呀。噉所以好多時我覺得係 Stuck 咗喺個位，就係覺得其實呢個冇乜特別，就不如就繼續落去啦噉樣。我覺得如果返返去一個安全嘅地方嘅時候，同大家講落大家就會…即係一嚟個性別意識又高啲啦，即係大家都會感覺到原來呢一個關係其實唔健康㗎喎，然後佢哋亦都會好企喺我嘅身邊，唔會去批判我做錯咗啲乜嘢，而係即係段關係本身如果真係有問題嘅時候，佢哋會畀一啲建議我，或者係應該要離開啦噉樣嘅嗰啲狀態。

M：Eunice 你係大概四年，即係呢段關係大概四年倒呀嘛，噉你就四年後離開呀。Recap 返頭先阿 Wing 講噉其實大概年幾，經歷過頭先你都講過有唔同階段嘅暴力嘅狀況，你感覺係唔健康嘅一個關係模式之後……我都係由 Eunice 開始問，噉你係點樣同呢一段關係劃上句號嘅呢？即係 A.K.A. 你係點樣分手嘅呢？

E：應該係噉講有個決定啦，有個決定要分開嗰刻呢，噉我就做咗好多部署嘅。因為嗰陣時呢，即係佢係一個好無自信嘅人呀嘛，我哋要即係返返去嗰個故仔嘅最初，佢係一個無自信嘅人啦，噉亦都佢本身有一啲嘅情緒健康嘅一啲嘅病歷啦。噉所以我嗰陣時呢，每一刻都好擔心，嘩，死嘞，如果我同佢分開咗之後，佢會唔會跌咗返入去可能佢一啲精神健康嘅 Loop 入面，噉就好似，嘩，係咪我害咗佢呀，噉樣嗰啲狀態，甚至乎嗰陣時呢，佢亦都係…佢嗰世界好似得返我噉樣嘅，嗰陣時最初。係啦，即係佢嗰陣時係要講到每一個禮拜六日呀，一有時間就要一齊呀，跟住收工又會，即係如果有機會嘅話都一定要見面呀噉樣嗰啲。噉所以會感覺就係佢，個世界好似得返我噉樣喎，噉所以我都好盡力噉樣用咗一段時間，就係去令佢建立返佢嘅社交圈子。我嗰陣時係用咗啲時間係首先要鼓勵佢，約吓呢啲朋友呀，識吓呢啲人呀，培養返呢啲興趣呀，噉嗰度都嘥咗啲日子啦。噉所以呢，成個過程我諗都用咗兩至三個月，係先正式分開到嘅。同埋因為我又唔可以…即係又唔敢直接講分開呀嘛，噉所以中間呢，我就做咗一啲，我哋呢段關係好似有啲唔健康喎，噉所以呢，就大家寫低我哋有啲咩覺得，個關係可以進步嘅位啦，即係做咗呢啲類似 Couple therapy 嘅嘢，希望佢意識到我哋段關係係有距離，同埋係真係唔健康嘅噉樣，所以都中間花咗頗長嘅一段時間。

M：噉佢有冇覺得呢段關係唔健康呢？

E：誒，真係呢個問出個重點嚟呀，原來佢係冇㗎喎。

M：噉佢點睇呢段關係㗎呢？

E：係呀，真係我崩潰嘅嗰刻，佢覺得自己，佢睇完我寫嘅一啲問題，然後再睇返佢自己寫嗰啲問題，噉佢就覺得呢啲都係能夠解決嘅噉樣啦，噉佢就話我會努力啲點點點呀，我會努力啲呢就係去了解下你嘅世界呀呢啲，噉 Which 其實我嗰刻其實已經覺得，都用咗咁長嘅時間啦，亦都我都已經好大壓力之下，噉我都唯有係畀啲時間佢嘗試去改善嘅。噉但係我都會逐步疏遠囉，即係好似啱啱話齋，慢慢由可能佢嘅世界得我，噉跟住我慢慢又行遠少少，行遠少少，即係令到佢有返自己嘅社交圈子之後，我就有一日令到佢自己去同我講分開嘞。呢個係我嗰一刻係好高興嘅一件事，即係最後係佢自己提出嘅，噉而我都亦都係覺得鬆一口氣嘅最後。

M：我好想知喎，真係唔好意思呀，阿 Wing 你要稍等一陣。我想問你做咗啲乜嘢可以令到一個一開始覺得即係你呢段關係好健康嘅人，自知係要分開嘅呢？我喺度諗呢，如果我自覺自己健康，我唔需要睇醫生，你要去到一個點係我覺得我要去，接近做一個手術喎，我中間嗰個心理裏面嗰個轉折係有幾大。你係做咗啲乜嘢令到呢件事係由佢提出呢？

E：都係 Keep 住去溝通嘅，不過即係唔係 Verbally。呀，我哋有 Verbally 嘅溝通，亦都有 Message 上面嘅溝通，因為我覺得呢啲要傾嘅時候就要認真啲攞出嚟講，噉所以我要畀佢 Feel 到係我同佢之間嗰個距離係太大呀。噉所以呢，我係喺傾嘅時候都幾特登地係好凝重去做成件事嘅，噉所以呢，可能呢啲位都會令到佢覺得，真係自己嗰個… Intellectually 可能追唔到，即係嗰個關係上面嘅距離。噉然後我諗佢都開始有返自己嘅社交圈子嘅時候，佢都會有同佢嘅朋友傾，噉呢個係佢以前冇㗎嘛，即係可能佢以前世界得我一個嘅時候，可能佢嗰個就會住咗入去嗰個粉紅色嘅泡泡入面。噉但係當佢開始真係有返朋友呀，有返其他個圈子嘅時候，我諗佢都會有同佢朋友傾嘅噉樣。所以即係我覺得呢個都好緊要囉，可能其實佢自己都喺個關係入面都有辛苦嘅時候嘅，但係可能佢之前唔察覺，噉而佢最後察覺咗，而令到佢能夠提出自己提出呢件事囉。

M：以為 Eunice 個 Case 最後就係你要自行斬纜噉樣，點解原來係可以出現到呢個局面係對方同你完咗個關係噉樣。好，噉我將鏡頭返返去阿 Wing 嗰度。你去到邊一個狀態，或者你心裏面去到一個乜嘢嘅階段，你覺得呢個人你要斷呢？佢做咗啲乜嘢，或者你諗到啲乜嘢心路歷程，你覺得呢個人唔可以再一齊？因為我覺得呢，同埋我要再問，因為你係同佢一齊住過，即係你會同 Eunice 嘅狀態有啲唔同嘅，你哋係有同居嘅，噉所以你哋要，捨離嘅嗰個狀態係更加多同複雜啦，即係可能你要搬走呀，退租呀，乜乜噉樣。係嘞，噉你幾時係覺得，去到咩階段你要同佢斷開？

W：你頭先講嗰個嘢都啱嘅，因為我哋嗰刻係，即係叫做一個同居嘅狀態，一樣好現實嘅嘢就係，一個經濟嘅壓力啦我覺得。之後就覺得，咦，唔得喎，之後我覺得自己經濟上係有，再噉搞落去係唔得嘅經濟上壓力啦。第二就係我同屋企人嘅關係係差咗好多啦，開始覺得咦，點解，唔對路，我同屋企人關係係差到，會因為對方而嘈交咁耐以嚟，我未試過同屋企人去嘈一場咁大嘅交喎。唔得，即係我覺得，嗰刻我就選擇咗，應該係修補返同屋企人嘅關係，而多於同對方嘅關係囉。噉所以就做，即係慢慢……而開始都發現對方有好多古靈精怪嘢囉，即係佢，噉因為我哋最初係交友 App 嗰度認識，噉其實佢都會有認識其他新嘅朋友仔，即係就算真係純粹係想識多個朋友又好，或者有一啲新嘅對象想追佢又好，Flirt 都好，即係開始有好多呢啲嘅狀況出現。噉呢啲狀況出現都好嘅，即係佢有另一個新嘅對象，噉我都有一啲藉口可以去分手。

M：噉所以你主要分手嘅方法係，你想修補你同你屋企人嘅關係，與此同時其實佢開始又搵到新對象，所以就因為呢個對象轉移就分開嘞。

W：係呀，我覺得拖拉得太耐囉，因為其實去到關係嘅後段其實都係拖拖拉拉嘅，噉我覺得點解我仲要返返去嗰個地方，即係好似兩個人困獸鬥噉樣。噉我就即係，我都要有啲部署嘅，因為個情況都有啲複雜噉樣，點樣部署，但係真係要一刀切呀，真係要停止呀，噉樣囉。

M：聽到你兩個都有講起部署呀，即係要有個準備呀噉樣。我會想問多一個問題係，當然即係每個人要遠離一段關係，不論係咪一個愛情嘅關係，你都會有一啲，即係斷聯呀，而家我哋都市人有好多 Social media，噉可能又有要 Unfollow 又要 Block 呀噉樣啦。即係呢啲斷開社交媒體，斷開聯絡，呢啲都算係技術上面嘅一件斷開啦。噉斷開之後但係佢會知道你，例如你喺邊度做嘢，你住邊，你屋企人喺邊度噉樣㗎嘛，即係佢會 At least 知道你身邊或者你最親近嘅一啲個人資訊噉樣啦。你哋有冇因為呢個斷開嘅呢個關係而受到任何嘅，即係騷擾呀、唔愉快呀、威脅呀？

E：我講先啦或者，我就好幸運地係冇呢啲實質嘅騷擾嘅。因為嗰陣時好…我哋好早嘅時候都有傾過呢一部分，即係分咗手之後會點，噉所以嗰陣時一開始呢，我都好明確同佢講話，嗱，我分咗手呢就一定唔會再同你聯絡呀，亦都佢都有講話，因為佢再上一段關係嘅嗰個 Ex 呢就真係會喺屋企樓下捕佢呀，呢樣嗰樣嘅，噉所以我都好早同佢講，喂，放心我一定唔會呀，噉樣呢啲。噉所以呢啲位呢，即係 Physically 呢係真係冇嘅，噉但係即係嗰個騷擾呀，或者係一啲攻擊啦，我會話係，即係佢真係會喺返佢嘅 Social media 嗰度處理囉，係嘞。我諗現代人都係噉樣㗎嘞，即係完咗之後就會 Black mouth 你噉樣囉，係嘞，即係佢就會因為我哋個 Social media 已經冇再 Follow 對方呀，佢又 Block 晒一啲，佢想當年自己去 Follow 人哋，我嘅朋友呀噉樣。噉佢就喺 Block 晒一啲會識我嘅人之後呢，噉佢就開始去喺個社交媒體嗰度就話返我，呢幾年點點點，又唔畀佢呢樣，唔畀佢嗰樣，噉樣嗰啲囉。噉嗰個位係覺得真係好似，即係有理說不清噉樣，即係你已經……我就好幸運地呢，有啲漏網之魚嘅朋友話返畀我知啫只係。噉但係你嗰個位你都駁唔到啲咩。

M：因為你啲 Account follow 上面嘅嗰個隔閡，所以你根本冇辦法回應嘅噉樣。

E：係嘞，亦都係，佢都會喺佢嘅主觀感受去出發，去將一啲失實嘅嘢去講出嚟噉樣。

M：嗯，噉佢既然都係主觀㗎嘛，咁佢就唔會包係真唔真實㗎啦，主觀嘅嘢。

E：係呀，就係噉樣。

M：噉我即係想像中呢個 Black mouth 人哋，分咗手之後，自己建立自己嘅黨羽，噉呢件事，我諗好多人喺關係當中都會經歷過嘅，呢樣嘢相對嚟講比較常見。阿 Wing 呢？你喺你結束呢個關係，你話你拖拖拉拉咗好一陣，然後你話想修復你同你家人嘅關係，噉佢亦都可能搵到新對象。噉你哋之後點樣完結，以及中間有冇即係撠住咗，有冇威脅或者唔愉快嘅過程？

W：點樣完結就係我真係諗住離開嗰個地方嗰日呢，我係有同我嘅朋友講嘅，同埋我係已知佢嗰日係唔會返去嗰個地方嘅，噉我咪返去執哂我自己啲嘢囉。噉我搵朋友車我去，可能喺附近停車場嘅位置等我，噉我即係好似睇戲噉，嗱，如果我幾多分鐘之後唔出嚟呢，喺嗰個住所嗰度都唔出返嚟呢，你就要衝入去救我嘞。我唔 Sure 我入到去會見到啲乜嘢呀，我可唔可以用到我嘅電話呀噉樣，我已經畀埋個地址我嘅朋友，我大概幾耐呢我就應該要……我一入去呢，好似我衝入去呢，我就會執哂我啲嘢啦。

M：好似衝鋒隊噉樣。

W：係呀，就係衝鋒隊，我哋就即刻上車，上車就走㗎嘞，唔好擰返轉頭嘞。噉點知我真係返到去嗰日，因為我冇辦法一次可以拎得走哂啲嘢，我其中一次返去，我返到去就真係撞正對方係喺屋企入面嘅，噉好彩我真係嗰日有朋友陪我返去啦。我返到去對方係好，最初係好正常嘅，但係個感覺係怪怪地嘅。覺得你返到嚟呢佢就好殷勤，即係佢真係煮好哂餐飯，諗住等你返嚟食，諗住畀個驚喜你。但係我入到去間屋就話唔得嘞，唔可以理呢啲嘢，我今日嚟嘅目的就係，我要拎返我啲私人物品，我要離開呢個地方。噉當然啦，我由入到去到離開嗰個地方，去搵返我嘅朋友中間係又糾纏咗陣啦，因為最初我入去好似，哦，你返嚟嘞畀個 Surprise 你，之後原來……噉我都同佢講我哋要停止嘞，噉佢開始又嚟料啦。

M：又開始情緒嚟嘞。

W：係嘞，情緒又嚟嘞，跟住又好激動嘞，唔知係佢推跌咗啲……

M：有掟嘢？

W：冇掟嘢嘅，有推跌咗唔知啲乜嘢，倒瀉咗水呀。但係我真係唔理呀，我係真係堅係走呀。跟住我 friend…跟住我執晒啲嘢，跟住走上返上我個 Friend 架車呀friend，跟住佢就，走嘞！開車呀唔好理嘞，佢追出嚟都唔好理嘞，開車走啦快啲開車走。但係走嗰刻，即係上咗個朋友架車，我係又擔心我個電話又會俾人轟炸啦，真係唔知嗰一刻我離開咗之後，對方會唔會又即刻做啲咩自殘呀、自殺呀，或者威脅嘅。由上咗我個 Friend 架車到返屋企嗰段路，個人係驚囉，即係嗰刻真係驚。

M：噉你離開咗嗰個場合嘞，然後你又真係同咗你個信任嘅朋友，上咗架車遠離咗個地方之後，你去到幾耐先平靜到呢？你係咪要去到嗰個目的地你先平靜到，定係你需要更加多嘅時間？

W：我目的地就係返屋企，返返我自己屋企。返返我自己屋企，即係我 Make sure 嗰一晚都唔會再有事發生，噉我個人就叫好啲囉。

M：你一口氣好有策略地，好有呢個應急情況之下將你所有嘢搬走咗。噉你之後就將你同佢嘅通訊全部都 Block 哂 Delete 哂，噉佢仲有冇轟炸你呢？即係雖然你已經唔再同佢同居嘞噉樣。

W：都有試過一兩次，佢又去我工作嘅地方度等我嘅，要求復合呀噉樣。但係糾纏一啲時間囉，但係我真係唔會再返返去嗰個地方。但係佢就可能言語上都會有再話我呀，即係因為噉我無啦啦走咗，噉我喺嗰度生活嘅開支噉點呀，交租原本兩個人 Share 㗎嘛，噉樣點樣處理呀？我都有類似 Offer 過話屋企餘下呢半個月，噉我自然同你 Share 返個租囉，噉但係之後即係過咗呢個月之後嘅事，噉我覺得你要處理㗎嘞，噉我就唔會再去處理嘞噉囉。

M：最後你就狠心地將，即係唔再處理佢之後嘅事情嘞，丟畀你嘅嗰啲咩錢銀嘅責任呀，令到佢一個人住呀，責任上面嘅責怪呢你都唔再處理嘞，唔再面對嘞噉樣。

W：係呀。

M：我哋而家由開頭認識到進入關係啦，跟住喺關係裡面發生咗一啲事情，導致你覺得有一個轉捩點，你覺得呢個關係唔健康。去到有升級到一個層面之後，你哋就要脫離呢個關係嘞。噉脫離咗呢個關係嘞，屋都搬埋嘞，Contact 都斷埋之後，你哋覺得回顧返呢個關係呢，即係可能你哋而家都…以而家呢個時間啦，回顧返以前嘅關係，對於而家嘅你帶來幾大嘅影響呀？

E：係，我講先啦。噉我覺得嗰個所謂創傷呀，即係我到而家都係會好驚經過返佢屋企附近嘅，因為我好驚會撞到佢嗰堆屋企人呀，噉呢個係其中一個，係到而家我都好…即係唔舒服嘅位囉。即係我搭巴士經過我都會擔心「死嘞，如果撞到佢屋企人我應該要講啲乜嘢」，或者佢會唔會…如果佢同我打招呼我應該要做啲乜嘢噉樣，嗰個感覺就好似係佢嗰個勒索係好似一直都仲存在噉樣嘅某啲情況。噉但係另一方面我覺得都有正面嘅影響嘅，即係唔係純粹創傷嘅，就係我會更加 Alert 囉，即係唔希望之後嘅人會再能夠用呢一種情緒勒索嘅方式去對待我，或者我自己都好 Alert，我唔會去噉樣去勒索另一個人。噉所以都係，係囉，呢個係一個進步嚟嘅，都希望遲啲會能夠有一段即係比較好，比較穩定，亦都係互相係舒服嘅關係噉樣。

M：嗯，即係對你嚟講你會更加意識得到情緒勒索，即係個敏感度提升咗，OK。

E：呢個好緊要㗎，因為你意識到嘅話呢，其實你係可以避得開呀嘛，件事係。如果你唔知呢你就會轉咗入個 Loop 入面，但係當你知嘅時候，而你唔當人哋嘅勒索係一件事呢，其實佢係勒索唔到你㗎，即係我覺得呢個就係巧妙嘅地方，即係所以我覺得你意識到同你唔意識到呢件事呢，其實差好遠㗎嘞已經。

M：阿 Wing，你有冇經歷咗啲咩感受？或者會容易令到你有 Trigger 呀、陰影呀？

W：電話囉主要係。因為個電話就係…而家好啲嘅，即係最初分開咗嘅時候，即係可能都有一段時間如果個電話呢突然間響呀，好多 Message 呀，或者好多冇來電顯示嘅電話號碼呢，我就個人就會好緊張呀，就好驚會唔會係對方用啲唔同嘅電話嚟想聯絡返我呀，咁樣囉。就會好想，即係避開或者都會有同 Eunice 同樣嘅情況就係，如果我喺街度撞返對方噉會點呢？究竟我係要扮唔知呀？扮見唔到呀？定係都好友善地同佢打個招呼呀？即係成日都會有諗好多呢啲情況呀，見到對方會點呀？或者有時會諗返起，即係自己生活上都會諗返起以前一啲即係爭執嘅畫面，因為就係因為以前太多嗰啲暴力嘅情況，其實就係喺屋企生活嘅環境呀，即係好似廚房呀、睡房呀呢啲，噉其實我每一日生活緊其實都係接觸緊呢啲地方，都會有呢啲畫面。

M：有冇因而要去有其他嘅 Follow up 呢？即係常見嘅會係要睇心理醫生呀、Counseling 呀，呢啲嘅協助呀，你令到你舒緩啲噉樣。

E：係呀，我又未至於要尋求呢方面嘅需要嘅，噉但係我覺得都係最緊要有人可以講到囉，即係你當你嗰個感受可以講到出嚟嘅時候，就會好好多嘅，噉我都好幸運地有啲，後尾有啲小夥伴係能夠傾訴到呢啲事情嘅，多謝 PrideLab。

W：我係有搵同 ‧ 一線嘅社工去做 Counseling。因為最初即係對方發生呢個，即係親密暴力嘅關係，有搵佢哋嘅社工介入嘅，噉係分開啦，即係我同對方噉係一人一個社工 Follow up。噉呢件事完咗，即係個關係完咗之後呢，我自己係有繼續搵同 · 一線嘅社工去做 Counseling，或者 Join 佢哋啲 Program，都有一兩年嘅時間嘅。噉其實佢哋本身個 Program 冇咁長，不過我係即係連人哋嘅進階版噉我都去上埋。即係可能而家即除咗係伴侶嘅關係，即係家庭嘅關係，噉佢哋就…唔好話係幫我處理，即係教我點樣做返好啲呀，或者個溝通上邊，自己對唔同嘅關係表達上面點樣去，表達得好啲，即係令自己舒服啲囉。

M：我想問下兩位呢，作為呢個有毒關係嘅過來人呢，同志友善嘅組織或者係一啲服務嘅機構，對於你哋去梳理、分享、求助，你哋呢啲嘅，即係有唔健康嘅關係之下，幫到你哋幾多呀？

E：好似我最初話齋，即係一個 Safe space 嚟嘅。噉而嗰個幫嗰個狀況係，即係未必佢需要…即係未必 PrideLab 係好實質地去將我變成一個 Case，而係你有一個安全嘅地方你可以去講。噉你講下講下你就會發現當中有一啲嘅問題係你之前察覺唔到嘅，又或者有啲感受你可以好安全地講到出嚟嘅時候，你就會令到自己願意去開始要去解決一啲，原來自己覺得唔舒服嘅嘢。噉呢個位係好緊要㗎，因為即係本身同志嘅身份可能，好似我噉啦，以前好少去同人 Come out 啦，亦都好少人會知道原來我有一段關係啦。你冇人講嘅時候其實你就自己會喺個 Loop 入面囉，你會覺得係呀，係噉樣㗎嘞，又唔可以同人講，跟住搵到個伴侶之後呢就覺得應該係要繼續落去嘅，因為之後好難會搵到下一個伴侶㗎嘞，噉樣嘅狀態其實係好差嘅。噉所以有一個擺明車馬係一個同志友善嘅組織，噉係嗰個感覺係好舒服同埋係好…即係嗰個情感疏導上面係好幫到手噉樣。

W：同 · 一線佢，即係喺我當時嗰個關係，即係要處理啦要離開啦，噉佢哋係真係教我一啲危機意識上面係要點樣去做呀，或者就係走佬嘅後備方案啦，佢哋都會教我點做。即係除咗報警之外，走佬嘅時候你要拎啲咩走呀，真係再危急嘅時候你要帶啲咩嘢走，除咗你保護你自身嘅安全之外，有啲乜嘢係要做呀，噉同 · 一線佢哋可以提供啲，真係需要一個安全嘅地方暫避呀休息下，佢哋都會做到嘅。

M：唔好忽視一通電話呀，即係你可以將你嘅 Case 分享畀一啲資深，知道同志圈子知識嘅呢啲平台，同埋服務供應者啦。因為我諗相信有好多聽眾或者好多同志們佢哋經歷緊自己嘅一啲同性關係當中，係唔容易好似平時啲關係語錄噉樣呢，就動不動就寫出嚟。呢兩個過來人就親身就話畀你知，你係可以去尋求一啲安全空間嘅協助啦。噉但係呢，講起呢個安全空間裏面呢，我知道坊間係有啲地方呢，佢哋就成日就話呢「我哋就係成日接收呢個同志輔導嘅。」同志嘅輔導好多時候呢，就因為呢，同志嘅圈子裡面呢，好難搵到真愛啦，成日都喺呢個圈子裏面呢就碰碰撞撞呀，經常受傷啦。

E：嗱我覺得碰唔碰撞呢家嘢呢，就係咪同志都會碰撞嘅，呢個又唔係純粹係同志嘅一啲事情嚟嘅。真唔真愛所以都係一樣喎，你都係愛嘅一種嘅時候，噉你無論直定係攣都係，你搵一個愛嘅人都係，再真唔真愛再到時先再算㗎嘞。噉但係反而可能，同志嗰個難嗰個位置係，當你遇到嗰個愛係錯愛嘅時候，尋求一個協助係難啲噉解嘅啫。噉但係，我都信係無論咩人都會有佢嘅真愛同埋佢一個幸福嘅彼岸嘅。

W：我覺得首先呢句說話已經係標籤咗呀，點解要係同志先有或者冇真愛啫，其實就算係即係異性戀都唔代表佢哋咁容易去搵到真愛。我覺得係個…可能係其一係個年齡層啦，你睇下屬於邊一個年齡層啦，你嘅經驗或者你嗰刻你需要啲咩先，即係可能你嗰刻就算係異性戀，其實我唔係想拍拖㗎，我嗰刻就已經係要結婚生仔㗎，去到嗰個階段，噉你嗰刻係咪真係搵到一個對方係一認識就可以同你結婚生仔先？係個時間性嗰個問題呀。噉我又唔覺得係因為同志嘅圈子而難搵到嘅，不過可能個時間要耐啲？

M：我唔知你身邊你會唔會開始有一啲人，睇佢哋嘅動態已經係佢結咗婚啦，擺咗酒啦，跟住就冇隔一兩年之後就見到有個 BB 出現嘞。噉喺直人嘅世界裏面即係好似仍然都係停留喺一個比較多，結婚就等於要生育啦，或者係拍拖之後都要諗到生育呢個部分，以生育為主嘅一個關係模式。我成日時不時都會聽到有一啲直人呢，佢哋會覺得呢，面對一段唔健康嘅關係呢，解決嘅方法係結婚，要解決一對唔健康嘅婚姻嘅方法就係生仔。

我好驚訝，聽到呢啲內容嘅時候呢，作為一個同志我係覺得：嘩！我諗我遲咗結婚或者遲咗有個結婚嘅權利，對我嚟講都係一個對婚姻意義嘅反省嚟嘅，我真係要好仔細去諗下點解我冇得結婚，同埋點解我需要結婚呢件事。我諗其實好多直人喺佢身邊擁有嘅呢啲權利，即係可以生育嘅權利、可以結婚嘅權利之下呢，呢啲嘢可以變咗做就係一個避風港。但係呢個避風港能唔能夠面對到，或者解決得到自己嘅嗰個有問題嘅關係呢，我覺得係完全一個大問號嚟嘅。

再者嚟講我哋都唔係直人啦，我哋冇辦法完全去分享到究竟呢件事係點樣啦，但係我相信聽到嚟呢一度嘅你，你都會覺得頭先我所講嗰兩個方法呢，解決有問題嘅關係用結婚嘅方法，如果解決有問題嘅婚姻方法就係用生仔，呢個方法係好匪夷所思。你只會一路一路噉樣進入一個更加搣唔走，同埋更加成本大嘅一個 Commitment 啦，因為你本身由一個同一個或者係一個關係裏面牽涉咗兩個人啦 At least，嘅一個關係模式裏面變咗做多咗 At least 多一個人，噉嗰個就會係一個無辜或者係一個非常之細而需要照顧嘅一個個體噉樣啦。聽到呢度嘅你，或者可能你都經歷過呢個有毒嘅關係，你也許可能係卡咗喺一個唔健康嘅關係，或者卡咗喺一個心理好…承受咗好多壓力呀，好多點講呀，即係俾人追魂呀，有一個潛在壓力呀。

無論你有經歷過呢種言語上面威脅呀，肢體上面嘅暴力呀，好多嘅瘋狂嘅追 Call 呀，干預咗你嘅個人空間呀，無論係你自己嘅居住空間，生活空間，以及係你嘅科技空間都好呢，我頭先講咗好多唔同嘅類型嘅唔健康嘅狀況啦，你既然都聽到呢個節目你都可以去尋求一啲協助，呢啲協助呢通常都係免費嘅，即係唔好諗住呢啲嘢一定要好高門檻，可能打個電話去求助係一個令到自己尋求到一個出路嘅方法。噉我亦都知道其實，即係中間我哋有 Miss 咗好多唔同嘅狀況，例如有啲人可能因為有經濟上面嘅負擔，即係可能一個人負責畀錢嘅，一個人係冇咁有錢嘅，或者可能係佢哋社經地位上面會有個好懸殊嘅關係，以至到可能係更加嚴重、更加不堪嘅，可能係有啲人會威脅你要將你踢出櫃，將你嘅資料將你嘅歷史將你嘅私生活公開。你可能會覺得呢啲嘢好匪夷所思，即係點解會捨得，或者點解會忍心用喺你嘅情人身上嘅呢一啲嘅暴力行為呢？的確我哋喺我哋圈子裏面係有聽過嘅，噉我相信呢一個唔係只限於同志，只不過喺一個感情嘅關係上面呢，即係咩人都有啦，有幾瘋狂嘅人都有啦。呢個世界上點解會有「恐怖情人」呢個 Term，就係因為有啲人真係好鬼恐怖呀嘛，亦都不分國界啦吓。噉係啦，噉所以真係希望大家就係…首先祝福大家希望可以遇到一個好嘅姻緣，好嘅桃花啦。但係如果假設你而家遇到嘅桃花唔係比你想像中咁好呢，噉呢個世界上係有求助嘅，至少可以搵個喘息嘅空間啦吓，即係唔係話打完個電話嗰個人就即刻斷聯同你斬纜，但係至少你要知道點去保護自己。兩位嘅嘉賓有冇咩內容係想分享畀我哋嘅聽眾？

E：有冇咩想分享呀？我覺得真係最緊要點樣去意識到呢一段關係係有毒關係嘅嗰個重要性，係好緊要嘅。即係當你哋發現呢段關係係有毒㗎喎，噉你應該點樣去即係要決心去離開呢？即係有時啲嘢呢就唔係你可以用愛融化所有嘢嘅，即係段關係係有毒嘅時候，其實你應該想辦法一係去處理啦，噉如果對方根本都冇個心同你一齊處理嘅時候，其實係真係需要離開嘅。噉所以即係唔好留戀呀，呢啲有毒嘅嘢呢就大家都要保住自己先係最緊要，最緊要愛惜自己先。

W：衝突或者呢個即係有毒嘅關係入面，即係未必係得一個受害者嘅。你受傷你係受害者，但係其實係一個循環囉，因為個關係係你哋兩個人㗎嘛，即係可能個角色其實有時係會調轉嘅。但係要即係留意住自己嘅行為情緒囉，即係你嗰刻你唔想你自己受傷嘅同時，但係其實你自己都唔好變做一個加害者。

M：多謝兩位過來人嘅親身經歷同埋現身說法啦，亦都感謝你哋兩位嘅信任令到你哋嘅 Story 可以比聽眾們聽到呀。我相信分享你哋自己嘅親身故事都唔簡單嘅，噉所以再一次感謝你哋。噉走到呢個節目嘅最後呢，就係一個典型嘅 Closing 嘅：《點止港同志》係一個以香港同志角度出發嘅 Podcast，希望可以將大家生活裏面嘅性別同同志嘅議題用廣東話嘅聲音同文字嘅方式保留同流傳嘅。上我哋 Podcast 專頁 PrideLab.hk/podcast，或者上我哋 Instagram @Pridelabhk 嘅 Bio 入面就會見到㗎嘞。噉首先多謝收聽呢個比較長嘅節目啦，聽到呢個節目聽到嚟呢度呢都唔簡單嘅嘞。

如果想聽更加多呢一類嘅節目，除咗訂閱我哋之外呢，噉就希望你可以喺你收聽嘅平台上面留言同埋畀星星嘅回饋啦。如果你嘅留言我搵得到呢，噉有機會上到節目嘅。多謝今次兩位嘅信任，令到你哋嘅同志關係嘅故事得到呢個保留同流傳嘅。唔淨只兩位，我哋身邊可能其實有好多人，無論係乜嘢性傾向都好，佢都係會面對住唔同程度嘅唔開心嘅關係。可能你多一啲嘅理解，多一啲嘅問候，係可以令到佢自己嘅嗰個困局有所舒緩少少嘅。唔係每一個人都要做一個，嗰啲叫咩呀，和事佬，或者係要幫人哋出口氣或者出頭，但係你都可以幫助你嘅朋友，喺嗰一刻裏面舒緩下少少，都係一件好事嚟嘅。今集就去到呢一度，期待下次同你《點止港同志》，大家講拜拜。

E、W：拜拜。