呢幾年除左有談性嘅實體空間，仲有性別小眾友善嘅實體空間。

Ref
一坪半
一坪半《好坪友+》會員計劃

 閱讀性別，酷兒出版 (Feat. Erica&Astor@一坪半)

M：馬天娜

E：Erica

A：Astor

M：歡迎返嚟《點止港同志》，我係主持馬天娜。我哋呢一集係完咗我哋PrideLab文化祭之後嘅一集嚟嘅。咁點解要Highlight文化祭呢? 因為文化祭嘅時候我又返咗香港，咁就終於可以攞到一份性別友善嘅Safe Space出版嘅一本zine。咁等陣就會同大家娓娓道來去講呢一本zine係點樣嘅一個故事咁樣。除咗攞到本zine之外，我亦都真係好開心真係見到呢一個Safe Space嘅創辦人之一同埋佢哋嘅成員之一。而家事不宜遲，去介紹下兩位嘅嘉賓，兩位嘉賓都係來自一坪半。咁我由Erica開始介紹先啦。

E：Hello大家好，我係一坪半性別空間嘅創辦人，我叫Erica。Pronounce係they/them，係一位非二元性別者。咁我就由學生時期開始做一個同志運動嘅，咁就join咗Action Q。以前一路都係做一啲一陣學校園嘅政策倡議，跟住到一啲公民社會嘅性別友善嘅會議咁樣嘅。咁到而家就真係成立一個以性別友善，面向公眾同埋我哋自己Community嘅一個性別空間。

M：好，除咗Erica之外，仲有另外一位嘅。咁係大家可以順便認下大家嘅聲音，我哋介紹下Astor，Astor講下自己先。

A：Hello大家好，我係Astor。咁就係最近新加入咗一坪半嘅成員，點解我會加入咗呢？係因為本身我同Erica一齊合作做呢本The Gaze of Others，咁就係一本同LGBT議題相關嘅zine嚟嘅。咁等陣都可以同大家分享啦。咁我本身呢，點樣認識Erica呢? 其實都係喺一坪半呢個性別空間度認識佢，然後我哋講下講下就好投契，所以就一齊開始發展咗呢個酷兒嘅出版咁樣。

M：正呀，我乜都未問已經開始已經有一個實例話比我聽，呢個一坪半係造就咗呢個production嘅機會咁樣。好，咁正式入主題啦，一坪半呢三個字，也許一啲有follow開性別圈嘅朋友都認識一坪半㗎啦。咁算係即係喺香港呢五年以內啦，就算係其中一個比較多年輕人認識嘅一個性別友善空間咁樣。咁幫一啲未係好認識嘅聽眾們去問一問先，點解開呢一個空間嘅呢?我呢就拋個書包先，之前你哋有啲訪問呢，就話開一坪半呢就希望可以畀性別嘅小眾有一個舒服嘅safe space，即係安全嘅空間。咁亦都可以畀公眾嘅人士去探索自己嘅性別嘅，但我又好想再dig deep啲去問深啲，你哋點解會覺得要開一個實體嘅空間，同埋你哋係點樣揼呢個地方出嚟㗎呢?

E：好籠統咁講啦，我哋成日都有句slogan嘅，就係一坪半嘅空間，擴闊你對性別嘅想像。咁所以啱啱就符合咗馬天娜講嗰句啦，就係性別小眾嘅一個safe haven。而家我會叫做haven多過一個safe space，因為已經聚集咗一啲人同我哋community。同時佢都係一個性別教育嘅推廣嘅一部分，但呢個都係幾官方嘅說法。咁我覺得要講一啲我哋理念嘅嘢，譬如我哋三位創辦人都係由一個同志運動出身嘅。咁我諗即係點解營造一個實體空間首先係一個需求，但其實我哋好重視嗰個空間同community building嘅一個社群營造嘅事情。我哋成日都諗即係點樣有一個性別小眾，由一個私領域去走到一個公共領域嘅。私領域可能講緊嘅係我作為一個同志，我有呢個性別身份，咁我係匿喺屋企，我係自己拍拖，或者我哋自己玩app就完咗件事，定係其實我哋有好多時候係需要去行出嚟，或者畀人見到去爭取更加多我哋本身可能要有嘅權益，或者講被看見呢一樣嘢。咁所以個個公共領域我覺得係一個真係以比較資本，可能我哋租一個實體嘅地方去有一個半租金嘅形式，跟住亦都係一個business model咁樣去一個比較商業嘅路線，雖然我哋都唔好商業，我哋有啲似NGO，亦都有啲似善堂嘅，係啦。咁就走向一個公共領域囉。

咁我哋個源起真係其實覺得，即係以前我哋即係2019前我哋仲有同志遊行。咁我哋都行咗好多年啦，跟住之後慢慢變成同志集會啦，跟住市集。咁我哋又覺得，原來性別小眾可以發聲嘅機會變到由我哋喺銅鑼灣，喺一個維園，到添馬公園咁樣行俾人見到變成一個困咗喺一個實體空間嘅地方。咁一嚟係唔甘心嘅，作為性別小眾，係啦。但二嚟就係知道嗰個現實嘅需要囉。咁我哋亦都會諗，原來每一年淨係得一兩個月嘅pride month，咁但係我哋一年十二個月都係生活喺呢度，我哋都有存在嘅喎。咁我哋係咪存在之後係需要做更加多嘢呢? 係啦。咁基於我哋嘅一啲理念，一啲對性別小眾或者我哋個社群嘅想像同埋勇氣啦，咁就真係想成立一個空間啦。咁一開始都係一啲好試行嘅方式，就係覺得做囉，去做咗先囉，睇下我哋會凝聚到幾多人。咁到而家我哋就真係變成一個，好似一個共同體咁。即係有啲圈內嘅人，即係本身係圈子呢嘅朋友啦，但係佢係冇乜入圈嘅，係啦。咁跟住同埋啲前輩啦，一啲學生啦，咁佢都會嚟approach我哋。我哋就覺得，哦，呢個真係變成一個community，係啦。

M：簡介非常之詳盡以及完整嘅。咁又想問下啦，就住呢三個字去問。一坪半啦下，坪呢我理解呢，就係一個尺寸嘅單位啦。而一坪半呢，喺香港嚟講係比較少用坪去形容一個尺寸嘅單位嘅。即係香港你睇呢個租盤，或者係地產網站呢，佢都係講平方呎嘅。咁咪想問下點解你會用一坪半呢一個尺寸單位去形容你哋嘅空間呢? 

E：哦，呢個係一個虛幻嘅數字，其實完全符合香港嘅尺寸比例嘅。咁，源於其實有啲啟蒙嘅，我哋見到台灣有女書店呀。咁我哋好多性別上嘅啟蒙，或者一啲研究學說呀，或者我哋嘅理論實踐都取自於台灣。咁我哋可能就會比較偏向嗰個思維去諗嘢。咁一坪半其實就係咁啱就引致我哋租一個好細嘅地方，因為租金問題，咁嗰度可能係得三百尺左右。一開始嘅一坪半，咁跟住亦都好符合盧廣仲嘅嗰首歌叫一坪半，咁佢裏面有幾個歌詞我覺得好深刻。佢話係一坪半嘅套房可能係容不下一啲大夢想，跟住佢到最後呢個歌詞演化到就係一坪半嘅套房係一個違建嘅避風港，咁我哋可唔可以租一啲堅強可以去療傷之餘亦都可以去闖咁樣。有啲符合，即係佢可能講音樂，可能講人生，但我哋每個人特別係我哋作為一個性別嘅community，我哋都需要去租一份堅強，即係喺裏面我哋亦都做緊情緒治癒嘅嘢，我哋一路去同我哋嘅community溝通。咁同時我哋亦都一路開拓緊性別呢樣嘢可以做到啲乜嘢。

M：我嗰時上網搵一坪半嘅時候，好似以我Google嘅搜索結果第一第二都係盧廣仲嗰首歌嘅歌詞。

E：每次採訪都有呢個官方答案。

M：我諗佢同時唔單止係反映咗香港真係租金好貴啦，地方好少啦，但係喺呢個小小嘅空間係唔會唔會限制咗一坪半嘅成員們佢哋想幫忙想發展一個實在嘅公務空間嘅呢一個想像。咁我哋都想像佢哋嘅一個熱血嘅心。我又想從一個好現實嘅角度，我仲有補多句嘅問題，就係你哋一坪半啦，咁你哋點樣搵呢個一坪半嘅呢？

我舉個例啦，因為之前你哋對上會有一集去訪問另外一個性別空間叫Common 6，咁佢哋都大概有講話我哋係想點樣搵一個佢哋嘅租嘅單位。咁當時可能係點樣同業主傾呀，好實在嘅問題。咁你哋當時係點樣搵到呢個一坪半嘅呢。

E：我諗我哋考慮唔係好多，其實我哋好理想。我唔知係咪因為女同志，我哋創辦女同志居多啦，就係其實又想搵間村屋囉，跟住自己煮飯，跟住我哋community嘅人呢就嚟傾計，跟住嗰度就一個性別空間，跟住可能養一兩隻貓。呢個係一個比較，係囉，佢放下音樂，比較夢幻嘅想像。咁但係出嚟就發現，即係其實嚟嚟去工廈嘅租盤或者比較平嘅二樓三樓嘅租盤呢，就係可能係荃灣，葵嘟葵嘟，跟住觀塘呢啲工廈區。咁我諗比較近，或者係一啲叫做未發展，譬如我哋見到旺角、油麻地，跟住其他地方有好多獨立書店。咁我哋就想開拓一啲係比較偏可能真係啲人返工，但係喺一個商業裏面有好濃厚嘅理想主義味道嘅，烏托邦咁樣嘅方法。咁所以呢就會揀咗觀塘。咁最後亦真係睇得啱。

M：講起觀塘都回想返之前PrideLab搞文化祭，其中一個契機，陳驚當時呢非常激動咁喺度呢就不斷咁多謝呢個一坪半嘅Erica就係話，咩唔係因為你呢就唔會有呢個文化祭。咁其實呢，同一啲可能未必好熟，即係而家香港嘅性別空間或者係即係地域嘅人，補充下其實係觀塘呢當時，即係今年呢我哋文化製造其實都有link up咗，都有即係策劃咗一個路線，即係一個類似係野外定向，即係類似係city hunt嘅一個形式，去搵返喺觀塘裏面唔同嘅性別空間。咁有啲性別空間可能係性別友善嘅店主，咁佢哋可能係沖咖啡嘅，賣一啲衫呀飾物呀咁樣。咁佢哋全部嘅共通點都係喺觀塘裏面嘅工廈地區，咁所以對於冇咁熟悉香港而家性別地域嘅人嚟講呢，好得意嘅就係觀塘成為咗一個小小嘅空間，造就咗性別小眾或者係性別友善空間嘅可能啦。咁當然喺香港其他地方例如銅鑼灣、尖沙咀呀、中環、灣仔呀都會有一啲性別嘅友善空間或者同志空間，但係嗰啲可能通常嚟講係享樂時比較多。如果係話一啲係喺樓上鋪嘅一啲空間，喺觀塘呢就反而相對嚟講就集中多少少。

喺度補充返，頭先你都有講過一個烏托邦啦，同埋一個對於一開始對一坪半嘅想像，可能女同志裏面離不開貓啦、煮飯啦、同居啦、相處埋一齊啦。我自己聽到頭先Erica咁講我都有一啲心入邊有啲少少嘅共鳴，我而家身在嘅地方咪就係咁，我屋企又有一隻貓，跟住我同我伴侶一齊住，有個廚房呀，即係唔可能冇一個廚房咁樣。去返香港呢個地少人多嘅地方，我哋都講一個好現實嘅問題就係開業同守業嘅問題。一坪半呢，據我所知都開咗兩年左右啦。咁，即係搵返你哋近排嘅post，喺你哋社交媒體上面嘅post都有講起話即係存留嘅問題呀，究竟仲要唔要繼續呢？咁樣。

咁又都有很多人都會講話呢個開業容易守業難咁樣。我唔淨只做生意咁，其實原來搞呢個性別空間都係⋯⋯因為，即係參考另外一個嘉賓Common6佢哋都重組緊呀。咁佢哋都，都曾經有一段時間係停辦咗咁樣，證明咗喺香港其實搞呢個性別空間唔係就話「我有股熱血」咁就可以繼續做，我哋都係面對緊一個好現實嘅問題。當時即係喺你哋嘅post上面都有講起一啲嘅問題，我諗可以即係引用返去問返讀者要有返呢啲思考就係：你哋文章裡面有講到話係香港對於性別嘅議題唔關注嗎？定係係一坪半嘅模式唔夠商業呢？定係我哋嘅community根本冇需要呢一種嘅空間？或者係我哋做緊嘅嘢有冇意義？呢樣嘢係可有可無呢？我睇到呢啲問句嘅時候呢，我係我心裏面有啲戚戚然，我有陣時做做吓都會諗起，其實呢個community係咪真係需要呢個podcast嘅呢？我會唔會只不過係自己自high，話我自己呢就又約人做訪問啦，繼續剪啦，剪完之後就要擺上架，之後呢其實係冇人理我嘅咁樣。究竟啲人係咪又有冇真係需要呢一個記錄喺度呢？定係只不過我係度自high咁樣？我相信呢一個存在與即係需唔需要自己，需唔需要我而家諗緊嘅呢件事，其實經常性會出現喺一啲搞組織嘅人身上，係呀。

咁所以呢，我又想同大家回顧返go through下兩年前嘅一坪半同而家兩年後而家嘅一坪半。你哋一開始預期呢一坪半，除咗頭先所講嘅烏托邦，或者係以一個lesbian嘅典型lesbian嘅一個空間之外呢，一坪半對你嚟講會係點樣嘅呢？你係可唔可以描述下你當時想像嘅嗰個brainstorm嘅圖片係點樣？

E：我都要洗脫呢個一坪半呢唔係lesbian嘅hub嚟㗎。我哋都歡迎gay man同多元性別人士同埋公眾嚟嘅，但係通常啲係嘅gay man嚟到跟住佢哋就會全部都係lesbian嘅，跟住就走咗喇。

A：我哋需要多啲，我哋需要多啲朋友。

E：係呀。咁我哋就係呀，咁所以其實本身想像就係。我到而家都覺得係呢個比喻都仲啱嘅。一開始想做嘅就係覺得真係譬如香港嘅同志運動如果冇咗一啲好大型，好年度嗰啲遊行或者集會咁樣呢，之後我覺得好似一個花樽囉，跟住就打散咗，跟住啲玻璃就散咗喺一個地下。咁我覺得有一個實體空間係好似有啲，我唔知有啲啲魔力或者啲MV魔法電影咁樣佢就慢慢黐返埋一齊，所以嗰個想像都係一個社群營造。我哋每一個經歷過同志運動或者自己一個性別探索，或者係覺得屬於呢個圈子，或者慢慢尋求緊呢一段路嘅人，嗰啲同路人都會黐返埋嚟。咁所以嗰個想像我都覺得係仲符合緊一坪半啱啱開嘅初心嘅。咁但係嗰個困難就係，你定緊嗰個性別空間，跟住啲媒體就爭相採訪，哦呢度有個Safe Space！咁但係，好奇心好快就燒盡㗎啦。可能嗰一年呢就我哋就蜂擁認識曬好多好多嘅人啦，咁但係下一年就係守業嘅問題就係點樣去繼續？咁但係其實我諗緊真係你回憶返成個我哋性別小組圈子嘅脈絡就知道，其實呢啲嘢一路都有人做緊。幾十年前，亦都有班女同志做一啲文藝嘢，亦都有唔同嘅空間、甚至唔同嘅組織去申請做非牟利或者行商業路線。咁但係啲嘢都會回歸，一路會掙扎，就係諗究竟係咪我哋嗰個香港嘅社會仲未夠開放，去關注性別議題或者其實佢哋嘅認知，只係得每年一度嘅，譬如Pink Dot一啲遊行咁樣囉。係啦，咁我諗呢個問題都圍繞咗幾十年，我哋都冇辦法去解決呢啲根深蒂固嘅嘢。

係咁跟住你就開始諗我哋係咪夠唔夠商業性，因為我哋其實係主打，我哋係想做一個社會企業嘅，一個認真做性別小眾議題嘅社會企業。咁而嗰樣嘢你就開始牽涉到你周圍去搵資源，而啲資源可能都係一啲，無論係機構呀單位呀或者政府嘅資助。咁佢哋就會問你你哋嘅商業模式係乜嘢，第一次被問嘅時候你就啞咗囉。可能我哋係符合創新，或者原來有呢個社群需要，亦都冇乜其他單位係做性別議題嘅。咁但係一問到呢度我哋都口窒窒，咁到而家我哋都喺度探索緊嗰條路囉。咁我哋最希望梗係，又係我哋嗰啲本性啦，就係好想用藝術呀創作呀去，去做到呢樣嘢先。跟住先再諗商業呢個面，可能呢啲就係一個吸金嘅，或者吸資源嘅法則。咁所以我哋暫時都係理念行先。

M：理想可能係好多個組織，或者係，點講呢，搞組織嘅人目前嚟講，都係靠以為生嘅一個元素。我相信，我認識嘅香港嘅唔少搞組織嘅人，佢哋其實都，都唔會一開始搞組織，就整起咗個business model先嘅。係啦，佢哋通常都係因為一股火啦，不滿啦，對於制度嘅不滿啦所以就聚埋起嚟啦，咁結果就係出現咗一個問題就係冇錢啦，冇錢就係要搵funds，搵錢啦。咁除咗自己返工嘅搵錢之外，就係要搵一啲財主呀，咁財主可能係有政府呀，政府嘅資助呀，或者係其他嘅一啲，基金會嘅資助咁樣。咁跟住你就要話，又又進入呢一個制度裏面嘅問題，呢就要話畀你聽話我究竟係點樣嘅一個模式。

A：我係Astor，係，係可能係我哋本身係做緊一啲，我哋覺得有價值嘅嘢嘅，即係我哋為個社群建立定一個空間，呢個空間你確實係咪話，每一刻佢都好有意思做緊，或者佢每一刻都有人喺度做緊嘢其實未必係嘅，但係我哋就係印證住佢呢兩年嚟其實係，做咗好多唔同嘅project出現囉，即係包括係我哋本zine就係，咁樣喺個空間裏面困出嚟啦，然後好多人，譬如唔同嘅組織都會借用呢個空間去搞唔同嘅活動呀咁樣。咁我哋會見到呢一樣嘢，呢就算係個租金係我哋要孭住，佢都係好有價值，要繼續保留，要繼續存在嘅一樣嘢。咁變咗，我哋就係要做另外一個model就係，我哋要寫其他funding或者搵其他資金係賺到錢嘅嘢去cover呢一個，本身我哋即係比較現實啲，要孭住佢嗰條租金呢一個部份咁樣囉。

M：咁咪你要cover到呢個租金，呢個好現實啦。咁，另外一樣好現實嘅問題呢，就係你哋搞咗呢一個空間呀，你哋要營運呢個空間呀，兩年前你哋，你哋啱啱真係有一個實體鋪頭，你揸住條匙啦，你真係要搞呢個空間嘅時候，參與嘅人同而家兩年後參與嘅人，佢哋嘅活躍度或者佢哋嘅背景，會唔會有同你預期有差異嘅，呢即係，可能舉個例啦，我預期呢，嚟嘅人呢，可能係大學生咁樣，點知原來你嘅人係另外一班人喎咁樣，會唔會出現咁嘅情況呢。

E：我係Erica，第一年呢，嚟一坪半呢，我哋有好多好精彩嘅故事囉，即係我哋如果你有睇我哋ig，你都見到我哋寫每一個人嚟到，佢哋背後有啲咩，佢哋想講啲乜嘢，我哋都會寫晒出嚟咁，咁呢佢就係我哋本身好想接觸到嘅人啦，即使係圈子內呀，或者一啲冇入圈嘅人，或者好多讀Gender Studies嘅同學，甚至一啲內地生。咁到第二年嘅時候，人係固然少咗啦，但係呢好似佢哋已經變晒啲中堅分子，即係你有一啲活動呀，你喺出面，譬如擺一啲主流啲嘅市集呀，佢哋會真係走嚟撐場，會同你講，食咗嘢未呀咁樣，亦都會同你update下一個近況囉。咁所以我覺得，嗰個係咪呀，轉化咗佢哋成為一個好坪友，係呀，，呢一個形象我覺得係幾好囉。咁同埋，第二年呢，我哋會，雖然人少咗，但係嗰個深度係多啲嘅。第一年呢，啲人會覺得好好好呀，有你呢個性別空間。跟住佢哋會講好多對性別議題嘅想像。咁但係呢，唔知點解今年嘅人呢，會講多啲自己情緒。特別遇得多可能係好似我哋community或者係一啲非二元性別嘅朋友，會上到嚟啦。佢哋會玩情緒卡嘅時候，佢哋會抽一啲可能係痛苦、孤單或者係需要陪伴同行。咁我就覺得嗰個深度再多啲，真係會吸引到一啲真係探索緊或者真係好想搵到自己圈子嘅人上嚟囉。咁我覺得有一個情咁樣嘅情緒轉化係喇。

M：我聽到呢個好坪友嘅轉變呀，真係由學生們開始了解呢一個組織呢個空間，到開始成為真係朋友嘅關係，真係你會真係想關心呢一個成員，關心呢個一坪半嘅成員。佢哋擺檔擺成點呀，咁樣我覺得好重要一樣嘢就係，頭先聽Erica講，一坪半佢可以做到一個社群支援嘅民間嘅網絡。因為我自己都認識一啲非二元或者係跨性別嘅朋友啦，之前都有搵過跨青呀，亦都即係認識嘅朋友都會有一啲係非二元嘅朋友。的確嚟講，目前嚟講係好多來自佢哋圈子嘅人會面對一啲身心嘅困擾。而家有學者會做緊一啲研究啦，佢哋嘅即係自殘呀，或者係需要精神或者係身心嘅嘅治療嘅需求係特別高嘅，相比起其他例如即係女同志、男同志、雙性戀咁樣嘅人嚟講。咁佢哋係需要一即係真係需要一個出路或者係一個表達自己情緒或者困惑嘅出口。而我頭先聽Erica所講，我都諗到係呢個空間係必要嘅。因為即係當人哋可能會諗你咪上網呻囉，你咪出post囉，或者係你唔知可能twitter你咪呻咁樣。但係當人有一個真實嘅人面對住你嘅時候，你會意識到你嘅情緒係容易啲抒發出嚟嘅。你會真係見到有人係望住你嘅雙眼，係我而家企喺度我哋支持你。我哋係嚟聽你講嘢，我真係畀你見到我嚟聽緊你講嘢㗎嘛。即係你唔會似以前嗰啲叫咩Clubhouse或者係一啲chat room咁大家好似好多嘅人像喺度，但係全部都係listening，全部都聽緊。但係嗰種真實聽緊你講緊嘢嘅嗰個感覺，我相信係要真實嘅空間先可以做得到。咁我頭先聽到Erica嘅分享裏面係，係確實實係實踐到出嚟啦。

E：我亦都有個補充嘅係啦，我會特別想講呢兩年嘅變化就係因為我哋一向都做開性別平權或者創意工作㗎嘛。咁我哋係真係呢，譬如我哋開辦咗第一期嘅性平學徒訓練啦，第一期呢係得6個人，跟住之後呢係12個人，跟住到而家係15個人，係啦。我覺得真係做三期嘅時候你就會見到嗰啲學員或者佢哋，再開始走返出嚟由本身可能唔敢或者冇乜信心，跟住到慢慢越嚟越多人跟住佢哋嘅熱誠上堂嘅熱誠同態度，越嚟越積極嘅時候你就覺得仲有人係好熱衷於性別平權呢樣嘢，即使嗰個現實環境係咁困難。咁呢一點我都係非常之想提及。

M：多謝你有提到呢個學員嘅計劃呀。頭先啲數字聽起上嚟係，雖然係，我哋而家比較嘅係一個個位數變雙位數嘅一個比較。但係如果你以percentage嚟講其實佢係，佢係dub返咗個dub嘅，即係佢係雙倍咁樣增長。而即係我覺得好鼓舞嘅係，你係真係聚到一啲人去真係實踐去join一個學員嘅計劃去學、互相同而家嘅性別圈裏面嘅人溝通去學習去傾。咁縱使冇咗好似冇咗啲叫做山頭或者係一啲即係主要嘅帶領嘅聲音，但係我哋香港仲有年青人㗎嘛。啲年青人就走咗去一啲更加更加mobile，更加流動性高嘅一啲嘅組織去繼續聚集起嚟，同埋繼續學關於性別嘅知識咁樣囉。我覺得係好振奮呀，聽到呢個數字我覺得係。點講呢，即係雖然我人就唔係成日喺香港，但係聽到呢個就係覺得香港仲係有好多嘅年青人係想理解、想聽下啲性別嘢咁樣。ok，咁除咗性別同學習，即係呢啲新力軍之外呢，我又想講下一個比較現實嘅狀況。我哋一開頭講講呢個一坪半模式是否不夠商業，以及係你哋申請funding嘅時候，都會被問到你哋係咪有business model。你哋曾經會唔會去到有一刻，即係交租交到有啲氣餒呀，或者自己返嗰份工仲要摵一舊糧出嚟交呢一個地方去租嘅時候，你會心裏面有一刻嘅諗就係：點解我搞一坪半我賺唔到錢㗎？點解我仲要貼錢㗎？有冇諗過如果一坪半係要走去一個business model係要搵錢嘅？即係我要從參加嘅人生上攞到錢嘅，係會點樣賺錢㗎呢？你哋有冇一刻咁諗過？

E：我未代表到Astor去答啦，但係呢我作為一個中大新亞書院嘅手空空無一物嘅人呢，即係你叫我諗錢係有啲難度。如果你諗商業架構嘅話，而家都係用理念啦、熱情啦，去發聲做一個好基本嘅、繼續營運嘅信念啦。但我諗當我哋好悲觀呀，好沮喪嘅時候，我哋反而係會諗，點解香港嘅性別社群係support唔到一個細細嘅空間。即我諗緊究竟有咩，即譬如農業佢哋都可以用佢哋嘅地，可能係自給自足，自己耕、自己食返嗰啲農作物。咁點解我哋community又做唔到呢樣嘢。跟住你就會開始諗，同志嘅消費模式係乜嘢。即大家無論你睇好多…端（傳媒）呀嗰啲，佢哋都會寫：同志社群就係可能比較高收入嘅一群，佢哋人均消費力好強。譬如中國，即可能2016年嘅數據就係話佢有8500萬都可能係同志啦。咁所以佢哋亦都係冇孩子有兩份，譬如如果係同志伴侶有兩份收入之下呢，咁佢哋個消費力又會更加高。咁但係跟住我就開始睇，原來佢哋有三大主要嘅消費嘅。第一就係休閒用品啦，即係生活品、個人衫呀、跟住個人喜好嘅嘢啦。第二就係一啲旅遊，即係佢哋會好鍾意出國一齊去玩嘅。咁就係一啲佢哋性小眾旅遊嘅嘢。咁第三就可能如果有同志婚姻嘅地方，可能就帶動埋嗰個婚姻嘅事業啦。跟住我就諗「噢！一坪半一瓣都碰唔到喎。」咁我就開始諗：「哦！我哋仲堅持喺度做文藝呀，做出版係乜嘢囉。」咁所以我就順應返就係作為一個中大歷史系嘅朋友啦，就會覺得即係你點樣做啲嘢，留返一啲嘢，或者一度記錄一個實體嘅存在，或者係呢一個歷史脈絡裏面都叫做有人做過，或者一坪半曾經存在大家的記憶，某啲嘢又會發生。即使好似以前參加大專同志行動，就係而家雖然係解散咗。但係遺下嘅遺孤們，全部都喺佢自己嘅領域做緊一啲性別嘅議題。咁所以我覺得呢樣嘢，我永遠都答唔到好商業嘅嘢。睇下Astor答唔答到。

A：好呀，作為一個人類學嘅學生，我都係冇辦法自己好商業頭腦地去進發嘅。但係我會有少少同Erica嗰個設入點有啲唔同。我唔係淨係望我哋同志圈自己本身嘅消費能力，而係睇緊性別呢一樣嘢，喺個社會嚟講到底係乜嘢？即係佢喺個社會層面佢有冇價值呢？而我哋見到喺外國其實係有一啲都幾成功嘅性別嘅model，可能有一啲係做一啲性別嘅consultant，就係因為一啲公司可能唔知道咁樣寫嘢會唔會唔夠敏感，呢套劇到底可唔可以出街呢？如果佢講到跨性別呢個議題嘅時候，不如問下啲跨性別，佢哋係咪咁樣做係足夠、即係夠敏感呢？咁我覺得，喺外國既然有啲咁樣嘅模式，一啲商業嘅模式出現到嘅，即係可以有consultant、性別嘅consultant嘅時候，喺香港有冇咁樣嘅可能呢？其實，香港點解呢個社會仲係未係好接受到。我哋原來所有議題其實每一個方面我哋都需要顧及到性別呢一個元素喺裏面。咁樣，咁我就希望可以如果有咁樣嘅能力我哋儲多啲profile，然後一坪半可以往嗰個方向發展。即係既然我哋都儲緊一啲我哋自己創作、我哋自己出版，又或者各方面，所謂Erica剛才講文藝啲嘅嘢嘅時候，我哋可唔可以都參隻腳落去，幫其他人去睇下，其實佢哋address性別議題嘅時候，佢哋個劇本夠唔夠性別敏感呢？又或者會唔會可以俾到啲input佢哋創作咁樣。

M：你講緊嗰一個consultant呢？其實，即係，直點講呢？即係，我唔記得突然間語塞添。你講起嗰個consultant呢？其實不妨我都要坦白呢，其實呢一樣嘢我都有諗過。因為我喺台灣讀完性別研究，咁我讀完性別研究之後就，即係，都要搵方法留喺台灣。所以我就去咗打工，咁打嗰份工其實就，好老實講就同我份，我嘅，即係研究專長係冇乜關係嘅。咁但係喺我打嗰份工嘅時候，喺我打緊字嘅時候，咁我就喺度諗緊，如果我可以利用我喺PrideLab或者我喺香港認識嘅一啲性別嘅組織，或者係喺裏面了解呢個圈子嘅經驗去做到一啲嘢，協助，即係唔好講到顧問啦，純粹係畀你啲意見嘢。其實我相信都會係一個我自己希望可以發揮到一個少少嘅綿力嚟嘅。

目前嚟講，我而家就做緊呢個Podcast啦。希望做到一個記錄嘅工作啦。咁亦同時即係，頭先Erica所講，記錄一坪半喺呢一個語音嘅記錄裏面啦。除此之外，其實我都有去，即係關心下，後面我任何啲朋友係後尾有做到呢一種，而家坊間或者係一個人力市場裏面，會叫做DEI Specialist或者係DEI Consultant。DEI係英文簡寫啦，即係佢嘅詳細係Diversity, Equity，同埋Inclusivity。咁即係呢個多元、共融同埋平等係啦，呢三個英文字母加埋嘅呢個DEI嘅簡寫咁樣。咁其實DEI呢點講呢，而家都可以畀聽眾有個picture嘅就係其實喺，跨國企業嚟講呢係越嚟越需要講求DEI政策嘅。即係如果你講緊係話一啲全球性嘅大企業，或者係一啲銀行，我哋見到PinkDot裏面經常都會出現嘅一啲銀行，其實佢哋係因為需要提倡有呢個DEI嘅政策，而係去協助唔同地區或者唔同背景、唔同背景唔同宗教唔同性傾向、唔同種族嘅人同事們員工們去得到佢哋平等嘅權利。所以喺跨國比較大嘅企業裏面係會開始講求呢件事。

咁但係去返縮返細，到去香港有冇企業係做呢？其實係有嘅。以服務業嚟講酒店，咁例如或者係一啲公共交通嘅行業，其實佢哋都會其實背後係有想關注DEI呢件事。咁我係知道呢，原來喺台灣呢上市嘅公司，即係嗰啲股票嗰啲上市嘅公司，其實如果佢超過一定嘅資本額，如果我冇記錯就係20億嘅台幣，咁政府係要求佢哋要做到呢個DEI嘅政策嘅。係啦，咁佢哋係會有一啲類似叫「性平」，即係性別平等嘅一啲政策，佢哋需要寫喺佢哋嘅報告書入面，即係俾佢哋嘅股東或者係持有人，或者持份者去知道，我哋公司其實喺人哋資源架構上面呢係有咁樣嘅安排咁樣。咁喺台灣嚟講，係有咁樣嘅政策要求公司做呢件事。咁香港嚟講，目前就好似未見到囉。咁之前睇過一啲，做過啲資料搜集就係，佢出咗啲約章希望啲公司配合咁，但係又冇強制性嘅咁樣。咁目前嘅嘅現況就係咁呀。咁講咗咁多啦，去返呢個一坪半，如果邁向商業嘅方向有啲乜嘢發展方向嘅話，咁我哋知道近排一坪半出咗本zine啦，本zine就要畀錢㗎啦，你哋有預購啦。咁我哋都即係都喺我哋嘅市集裏面有做呢個販售咁樣啦。咁我哋返返去一坪半，其中一個而家嘅點講呢，做生意嘅其中一個範疇就係出版啦。我哋啲一集裏面都係講酷兒出版啦，同埋出版酷兒嘅東西。講返今次本zine啦，可能畀Astor有多啲回應嘅時間啦。可唔可以講下，你哋呢本zine，點樣創作嘅，即係點解會諗起The Gaze of Others，點解會用zine去做一個載具，做一個載體，以及係你係幾時，諗起呢個idea嘅？

A：我諗，可以講下先呢個媒介先啦。咁我哋我同Erica本身，都對於出版係非常之有興趣。我哋本身都係有做採訪同埋寫作嘅人啦。咁我哋係好想可以做一啲，一齊出版一齊嘗試咗一啲創作嘅project嘅咁樣。咁去返zine呢一樣嘢，我覺得其實佢係對於同志運動係有個幾舉足輕重嘅位置。即係我哋其實，可以見到因為zine作為一個係叫做次文化，佢哋好容易因為佢係一個獨立嘅出版嚟㗎嘛。大家其實好少錢就可以自己自資出嚟做咁樣，亦都係好…好能動嘅一件事咁樣啦。

咁其實好多唔同，世界各地嘅次文化都會用佢作為一個媒介，去表達自己想講嘅嘢，因為我哋其實有部printer就可以喺屋企自己print出嚟咁樣。而去返同志運動嘅歷史，其實喺外國係由1945年嗰啲時間開始，其實佢哋已經有好多zine嘅publication，即係zine嘅出版咁樣。即係好出名嘅，有本叫做One Magazine咁樣，關於，可能講緊係同志運動嘅一啲新聞呀，然後啲故事呀，然後大家點樣可以，我哋呢個subculture裏面有啲乜嘢呀。1980年代嘅時候，即係可能到愛滋病比較流行嘅時候嗰啲zine都成為咗另外一個好重要嘅工具，有個教育嘅意味，即係傳達一啲正確嘅或者係健康嘅性愛嘅資訊咁樣。所以zine呢一樣嘢對於同志運動其實嗰個脈絡係一直都喺度。咁去到香港我哋而家，2023年，咁我哋係好想有啲新嘅實體嘅記錄，或者新嘅實體嘅zine，去出現然後去，秉承住呢個同志運動嘅精神咁樣。呢個就係點解我哋會選擇用zine呢個媒介去，做創作同埋做，就做一個出新嘅出版。《The Gaze of Others》呢一個意思係啲乜嘢呢？你就可以講吓，其實我哋兩個都諗咗呢個名都諗咗一段時間咁樣。

咁其實我哋一開始，返返去我哋覺得好多時候我哋第一期嘅主題係有幾種，涵蓋咗好多種不被看見喺裏面嘅，即係去到香港2023年。我哋其實Flexibility呢一樣嘢係同志運動，講咗咁多年都講到口臭嘅一樣嘢，但的確係仲有好多位都仲係覺得係呢個社會見唔到我哋，好想帶俾大家知道嘅。咁所以我哋就會覺得呢個，尤其是我哋去consider下呢個主流嘅社會望住同性戀，或者LGBT議題嘅時候，佢哋會帶住一定嘅目光，佢哋會帶住某一種眼鏡去睇定型咗呢班群體係啲乜嘢呢？打破傳統家庭價值或者有好多唔同嘅已經定下咗嘅刻板印象。咁喺主流群體嘅論述裏面呢，性小眾呢個群體好似一直都係被觀看嘅一群，即係被凝視嘅一群。咁我哋自己望返呢個世界嘅時候，到底係點樣㗎呢？我哋作為主流嘅他者，我哋凝視返出去嘅時候，我哋會見到啲乜嘢呢？咁我哋就想用我哋自己嘅方式，我哋自己嘅論述去講返我哋自己嘅故事。其實就係一個幾簡單嘅一個概念咁樣啦。咁我哋都希望之後《The Gaze of Others》嘅發展都係會係有可以包含到唔同嘅交織性，即係唔單止係性小眾呢個比較邊緣啲嘅社群，仲可以即係訪問吓其他香港社會嘅都係同樣地邊緣嘅社群，咁樣一直做落去咁樣囉。

M：《The Gaze of Others》呢佢後面呢其實係跟咗一串英文嘅，我再補充一句就係The Gaze of Others咁就係Volume 1，然後就然後Volume 1嘅主題就係The (In)visible咁樣啦，即係visible與invisible、看見與不被看見之間咁樣嘅一個表達。剛才Astor呢個都講咗就係，觀察嚟講係香港經常性就係，同志嘅真實面貌不被看見，但係同時同志亦都經常性被一啲刻板印象，所以為被看見啦。呢度唔係話同志嘅刻板印象一定要即係一定要摒除，一定話唔好，而係當一個族群或者一個群體佢只能夠活喺一個刻板印象嚟嘅，咁就會一個問題，因為就係喺個群體裏面一定會有刻板印象以外嘅嘅可能。咁不論係可能係我哋嘅性別氣質、我哋嘅裝扮、我哋嘅外表，我哋點樣去去判斷嗰個人係唔係一個同志，其實係一定會有好多唔同嘅元素，唔係上次話你短頭髮乜乜乜、你著點樣、著條褲咁你就係女同志咁樣，唔應該係咁樣嘅一個理解同志嘅方法。The Gaze of Others嘅第一期裏面其實係有七個印刷⋯⋯

A：七份⋯⋯

M：係啦，七份嘅部分。咁因為裏面呢有主要嚟講都係用中文啦，繁體中文，咁會有英文啦，當時你出呢七份嘅時候呢，你哋嘅預期嘅讀者群係咩人呢？

A：出版呢一本zine嘅時候呢，本身係有少少想面向公眾，因為我哋講緊就係嗰種他者嘅凝視。咁其實我哋就係同緊佢哋直接對話緊呀，通常就係公眾對話咁。咁所以我哋係嗰個創作期間嘅時候，我哋都唔會話用啲好…盡量唔好用啲好深好學術嘅嘢，我哋盡量用一個比較日常啲嘅角度去切入性別議題。其實就係畀佢哋認識，其實同志嘅生活唔係理想像中咁樣，我哋都可以有啲好恩愛結婚嘅情侶啦，我哋都可以有好多元啦，我哋有移工姐姐嘅朋友，同志朋友咁樣其實唔係淨係得一種聲音、一種嘅面貌咁樣。咁但係呢我哋係嗰個創作過程裏面呢，我哋都因為佢係一本探索式嘅出版，換言之佢唔係一本傳統嘅書啦，佢有好多唔同嘅元素咁樣。咁我哋就驚香港嘅讀者唔係太過習慣呢一種咁嘅出版形式咁樣。咁所以我哋就搞咗總共兩次嘅圍讀嘅聚會咁樣，圍讀嘅意思就係我哋請咗唔同朋友咁，佢哋可能本身係唔同身份嘅，有一啲就係可能我哋性別小眾圈子裏面已經打滾咗好多年嘅資深朋友咁樣，有啲可能就真係我哋以前認識嘅一啲可能異性戀嘅朋友咁樣。咁我哋就喺個過程裏面發現異性戀嘅朋友可能真係對我哋圈子好多terms都唔理解，即係佢哋可能有啲好簡單…我哋會覺得佢會知嘅嘢，例如”queer”呢樣嘢原來對於大家嚟講係好難理解嘅一個概念，或者佢哋一生人真係可以冇聽過。咁所以我哋就喺嗰個時候就決定：不如我哋既然係咁不如我哋就做到盡啲咁樣，所以就產生咗一個新嘅性別ABC。

所以性別ABC呢樣嘢係一開始係冇嘅，佢係之後我哋經過咗呢個圍讀之後，我哋自我修訂或者想補充嘅一個延伸嘅一個project。咁就係將好多我哋平時LGBT討論性別議題嘅時候會用到嗰啲性別嘅字眼，譬如即係「非二元」係啲乜嘢呀？”Sex”同”Gender”嘅分別係啲乜嘢呀？呢啲所有嘢都叫做我哋唔可以話自己好權威性地解釋，因為我哋都唔想，因為呢個係一個Continue，即係一個持續嘅對話。我覺得呢啲裏面嘅terms係咩意思，但係我哋就叫做有一個輔助閱讀嘅一個工具，比嗰啲可能大眾都可以理解到我哋呢本zine，同埋理解多啲我哋性別小眾。

M：同一啲可能冇睇到實體zine嘅朋友描述下你哋本zine係點樣呀。佢本zine呢，當我收到嘅時候呢，係一個帶呢個，即係類似係帶銀色然後有帶彩色嘅嗰啲閃光嘅一個密封袋包裝咁樣啦。因為摵開密封袋包裝之後呢，你就會出現有七份嘢呀。頭先我所講嘅七份嘢，裏面有兩個講關於同婚嘅couple嘅，用萬字夾攝住嘅兩個story啦。咁嗰度就兩份啦。咁有一份就頭先Astor所講嘅「性別ABC」，咁佢就一個三角形嘅散裝嘅紙。然後就每一張紙佢係一個主題咁樣。咁就係裏面一張一張，咁都可以想像就係一張倒轉三角形。跟住你摵你，打開呢就可以摵呢個，摵三文治咁樣呀。摵三文治又一層一層咁樣。咁你就摵有七⋯⋯係咪有幾多頁呀？

A：有六頁，但係彩紅色嘅⋯⋯

M：分別係彩紅色嘅，即係有呢個，係啦紅橙黃綠藍紫。係啦六隻色咁樣。咁第三份，第三份就係性別ABC，第四份呢就係呢個queer migrants，就係英文版本嘅一份細細本嘅，有釘裝嘅。係啦，咁佢就係有圖同英文字，去做一個，即係義工姐姐嘅分享咁樣。咁除此之外呢，就有一份，有一張卡嘅，有一張大概A4 size嘅卡，硬卡紙呢就係介紹The Gaze of Others Volume 1嘅核心嘅主題咁樣。就係講緊即係Seeing啦，睇到而不被看見咁樣。呢個係一二三四五，一二三四五。係呀，第五張。跟住第六張，第六張就係呢一個性別觀察練習，係一張好大張。係咪A1呀，定係大過A1呀？

A：佢係A比較近A2係咪呀？

M：應該接近A2⋯⋯

E：係啦A2。唔記得咗⋯⋯

M：總之係一張大過A4，好大張係要即係攤開出嚟，見到有個香港嘅，即係成個香港嘅版圖嘅一個描繪。跟住就係講，你點樣可以從日常生活裏面去觀察自己嘅性別嘅元素，以及身邊嘅性別嘅一啲元素係其實係你生活裏面不斷咁出現啦。

Last but not least呢就係有一張紙條仔咁樣嘅，咁就係講緊你哋有一個Podcast嘅節目啦，係講酷兒時刻。我個名應該係唔準確嘅，但係就類似係講呢個酷兒時刻咁樣。就係唔同嘅人去投稿講係香港嘅唔同角落裏面呢係有實踐咗佢哋嘅一個酷兒時刻，記載住佢哋自己酷兒嘅回憶。咁我非常之飛快地就同大家⋯⋯

A：好厲害喎！

E：一個咁樣講晒出嚟嘅。

M：係呀，呢個同大家少少嘅介紹咗裏面嘅個餡係點樣啦。咁因為裏面嘅印刷同包裝呢，就實在係好多唔同嘅variation，好多唔同嘅變化。咁所以如果你係有興趣收集zine，或者係有興趣收集香港嘅同志印刷品嘅話呢，一本zine係非常之有價值，佢俾大家做呢個收藏。

E：呢個我補充。我係Erica，我哋點解要做一啲咁多元或者探索式嘅嘢呢？我真係會成日諗緊出版同讀者同我哋嘅閱讀習慣嘅嗰個態度同埋眼界。我哋成日覺得一啲性別…講性別嘅嘢就係一啲性別研究嘅書，可能係一啲好悶，排版好好核突，跟住一般好厚實嘅書。咁但係我覺得做性別，即係我哋都係一啲咁多元嘅人，我哋係咪應該試下用唔同設計，唔同紙質去擴闊我哋嗰個性別出版嘅想像。但我同時亦都可能做緊跨青嘅《明心見性》嘅文集。咁我哋就選用咗孔版油印（Risograph）去印。原因就係覺得一層層嘅顏色去堆砌我哋嘅故事，跟住我哋唔用粉紅色藍色，唔用彩紅色，反而用紫色去⋯⋯紫色係一個粉紅同粉藍混合咁樣嘅顏色，用呢一啲嘢去諗一本書嘅設計會唔會更加多元呢？咁所以我哋就會今次係咁樣去做，希望後浪可以學習下，唔好再設計一啲又厚實又悶又傳統嘅性別書。

A：希望啦，因為我哋本身個zine係一個袋裏面有好多唔同嘅元素。我哋希望大家拆呢本zine嘅時候，有嗰種拆禮物嘅感覺，好似可以不斷喺裏面發掘一啲新嘅嘢。就正如我哋覺得性別呢一樣嘢好值得每一個人都深掘嘅一件事，咁希望可以喺呢一個zine嘅閱讀過程裏面，俾大家體驗到。原來性別探索都可以係一件好有趣嘅事。

M：頭先我又有少少半少少少嘅劇透式去同大家講咗，有裏面有七份嘢。咁但係呢，頭先兩位都有講到，就係其實佢哋係非常之用心係選紙呀，紙張嘅紙呀。選紙上面呢同埋啲釘裝上面呢，落咗好多心嘅嘢。如果你有興趣嘅話，係非常之建議大家去望佢哋嘅實體呀，望下嗰七份嘢係點樣嘅一件事。我自己分享一下，我當時收到實體嘅時候係嘅感受係點呀。好老實同大家講呢，同兩位講呢，其實當時我同我嘅podcast嘅組員講話，我收到嗰份The Gaze of Others嘅時候呢，佢哋心目中嘅嗰個想像呢，係覺得好似一本一本刊物咁樣嘅，即係有少少似明周咁樣，即係一本嘢揭揭揭咁樣。但係呢到我，因為我人就唔係香港嘛，咁但係本嘢就跟咗我走啦。咁所以我就要同佢哋呢，呢個zoom呢，zoom嘅網上開箱，跟住就剝開佢，跟住就七份嘢拎出嚟，跟住就咪攤開出嚟俾佢哋望咁樣啦。

先發現原來佢係一個袋裏面有七份嘢。有人嘅意見就係覺得好散呀，即係所有嘢都散修修咁樣啦。但係對我嚟講，我又會覺得，散係一個形容詞呀。但係佢亦都，喚醒咗我去好多唔同嘅同志場合，唔不論係嘉年華、書展、遊行呀。同志嘅場合裏面呢，會出現就係我嘅以前孭嗰啲toe bag背囊呢，總係喺行完之後返屋企，就一堆嘢，一堆紙呀、一堆刊物啦嗰啲小冊紙啦，然後又有嗰啲宣傳單張。裏面呢，就會好多嘢。即係我而家都可以俾聽眾，描述比聽眾知道呢，我上次去完一個文化祭之後呢，返到台灣仲有一個袋。個袋裏面有一堆嘢，可能係我去一個市集裏面買嘅一堆紀念品呀，或者係啲，即係東西呀以及佢哋送嘅彩虹嘅一啲手帶呀、樽呀，盛呀。呢個係行完一個同志活動之後會有嘅，嘅痕跡呀。咁而對於我嚟講，The Gaze of Others Volume 1嘅包裝呢，係喚醒咗我以前去唔同嘅同志活動會有嘅，一個少少嘅回憶啦。作為一個讀者嘅回饋俾兩位知道，對於我嚟講，即係散修修唔會係一個負面嘅字囉。對於我嚟講，佢係一個描述嚟㗎。即係，我哋每一個同志嘅片刻，或者係個形象，或者佢嘅故事係，唔必須係用一個好有組織、好edited嘅一個方式去排出嚟。佢哋就係咁啦，即係義工嘅一個story。咁佢哋釘裝嘅，跟住性別ABC可能係一張類似note pad、類似一個notes咁樣嘅方式去做一個記載。咁裏面係睇到好多印刷者嘅心思，好咁。我想再埋入啲去講關於裏面一啲嘅專題。咁裏面我又想raise兩個專題，一個就係外籍義工，同埋另一個就係講同婚嘅。首先講咗一個外籍義工先。咁因為頭先我都有講到，裏面係有一份英文嘅小冊子，有釘裝嘅。咁，就係講呢個外籍義工，同埋佢哋參與嘅義工嘅同志遊行，Migrant Pride係香港嘅。你哋係點樣傾呢個合作，同埋係點樣製作呢一本英文嘅小冊子？

E：我係Erica，其實只要係⋯⋯因為我本人係一個獨立記者，亦都關注性別議題。咁其實一開始接觸Migrant係因為佢哋嘅一啲，佢哋嘅Me Too案。咁但係，但係都要講嘅就係，當你接觸咗義工呢個團體呢就發現其實佢哋歷史好悠久嘅，即係每年同志遊行佢哋喺後面必然有一個Migrant Pride嘅。咁就可能係翌日嗰度啦。咁我就會覺得其實呢一個咁都叫幾悠久或者佢哋咁用心。佢哋⋯⋯我哋嗰個zine名叫七分一嘛，即係意思七日裏面佢淨係放得一日假，而嗰一日佢會攞嚟去做一啲性別平權嘅嘢。我就覺得好難得同埋真係好厲害，我哋會覺得好佩服。咁所以我哋就會每一年都會去關注個Migrant Pride。咁而喺裏面我哋就會識咗好多，可能嗰度講人權啦，推動性別議題嘅嘢，或者一啲叫菲律賓女同志組織嘅朋友。咁就喺呢個Migrant Pride裏面認識咗，並且成為好朋友咁樣。跟住我就話，同Astor裏面有一份，係值得有佢哋嘅位置同埋佢哋角色嘅。佢哋亦都有嘢想講嘅，咁就做呢樣嘢囉。

A：我諗佢哋都，作為即係同我哋一齊生活喺香港嘅人啦。其實我哋都好值得去支持佢哋嘅LGBT嘅行動，即係我哋可以係互相支持然後擴闊我哋嘅LGBT嘅群體，同埋我哋嘅同志運動咁樣啦。咁我哋一開始嘅時候係同佢哋首先係有咗一個交流，一個開咗一個會咁樣啦。佢有一啲分享嘅環節係關於佢哋喺菲律賓嘅同志運動，係囉，而家佢哋喺嗰邊發展嘅現況咁樣啦。跟住我就覺得佢哋呢一班人其實都好值得有一份，係囉，有個元素喺我哋嘅zine裏面咁樣。咁我哋就決定呢，就同佢哋傾點樣合作啦。咁喺個過程裏面我諗好重要嘅一樣嘢就係我哋唔希望再好似以前咁樣，我哋作為一個記者又或者作為一個採訪人員去影佢哋，去代佢哋去講呢個故事。我哋好希望佢哋可以有自己呢個主動權，自己嘅能動性去講述佢哋自己所睇嘅香港，同埋佢哋而家做緊嘅同志運動嘅服務咁樣。咁所以我哋就係畀咗個菲林相機佢哋啦，等佢哋去自己影佢哋自己嘅日常啦。咁佢哋嘅日常可能佢哋平時喺屋企，即係返工嘅時候都冇辦法自己影得到，但係通常佢就會影咗嗰七分之一日。咁所以我哋個zine個名就係呢一樣嘢啦，就係嗰七分之一咁樣。咁同埋佢哋都花咗好多精力去紀錄佢哋嗰個同志驕傲日嘅嗰個活動啦，因為對於佢哋嚟講係個好大嘅盛事啦。然後就係維多利亞公園，大家就係唱曬歌跳曬舞咁樣，有好多嘢食，大家一齊分享，即係對佢哋嚟講係好開心嘅一日。就係嗰日佢哋就記錄咗好多菲林嘅相啦。然後我哋後來就做一個訪問咁樣。點解我哋會採用英文嘅呢個形式呢，因為其實我哋基本上係冇乜點樣執過佢哋啲字句，即係除咗我哋改咗啲grammar令到佢可以通順啲，大家可以閱讀啲之外呢。其實喺本小冊子，嗰本小zine裏面呢，你可以睇到嘅所有字基本上，基本上都係佢哋自己嘅言語嚟嘅。即係佢哋真係講緊佢哋自己所睇嘅世界係點樣啦，佢哋點樣睇佢哋呢個同志驕傲日同埋佢哋本身自己嘅嗰啲性別經歷。

M：我諗緊佢哋本身主要同香港人溝通嘅語言都係英文，畀咗一個拍攝嘅工具畀佢哋去記錄佢哋嘅Migrant Pride，再輯錄成為一個小小嘅zine。我覺得會係一個新嘅記錄去記載住喺香港嘅外籍移工佢哋其實係有自己嘅……點講呢，工作以外嘅一面，因為之前都有同過一個研究印尼傭工嘅學者傾過啦。咁佢自己嗰陣時都花咗啲時間研究，外籍傭工經常性呢都會有一種感覺就係，當我哋成日覺得其實香港好多嘅家庭裏面都有一個外籍移工。佢哋嘅感情嘅嗰一面好似係完完全全被忽略，不論講緊佢哋本身係咪已經有一個異性嘅家庭呀，定係佢哋有一個同性嘅情誼呀，定係佢哋有自己嘅一個感情嘅生活咁樣都好。喺香港人嘅眼中係完全被忽略，即係唔會特別去看見。

咁所以呢個七分之一嘅Migrant Pride嘅記錄，係令到讀者們可能會更加知道，其實佢哋第一：放假係來得不易呀。佢哋真係得禮拜日，仲要係有限定嘅時間喎！即係因為你唔可能，個僱主唔可能畀佢哋話你夜晚凌晨十二點先返嚟啦咁樣。佢哋可能係一個指定嘅時間，可能要夜晚九點鐘就要返到屋企咁樣。咁喺一個指定嘅限時之內仲要籌辦咁多嘅嘢，可能要開會，要搞Migrant Pride，要搞佈置或者係策劃嘅時候，其實係相比其他嘅可能放兩日假，或者係比較容易啲有佢嘅時間安排嘅，時間安排比較彈性啲嘅香港人嚟講，其實係來得更加唔容易咁樣啦。

我去move on去問一問關於同婚呀。頭先我講到嗰份Volume 1嘅zine裡面，七份有兩份係記載住兩對couple，一對係女同志，一對係男同志couple，佢哋都已經係已婚嘅露面嘅訪談記錄咁樣。你哋係搵呢個同婚嘅couple嘅時候呢，有冇遇到啲乜嘢問題啦? 因為呢兩對couple喺你哋嘅zine入面係完全嘅露面啦，亦都有佢哋嘅名。咁，點解會揀中咗呢兩個couple呢? 即係，兩對couple，呢兩對couple係，點講呢? 呢兩對couple係點樣產生咗，出到街成為zine嘅一個部分。

A：關於我哋嗰個外盤嗰兩份嘅同志couple嘅嗰個zine呢，其實我哋就透過一啲相認識嘅人啦，然後搵咗兩位可以願意接受採訪，亦都願意露面嘅同性結咗婚嘅伴侶咁樣。咁其中一個，Dino同埋佢老公，佢個伴侶啦，其實就係，好多採訪都即係可能會搵到佢哋。咁因為佢哋都同屋企人嘅關係仲係好好啦，然後佢哋，就算係所謂我哋而家叫做out曬咁樣都，都可以繼續即係可以出版嘅咁樣。另外嗰兩位朋友呢，佢哋就係都係同屋企已經可以come out咗㗎啦。咁樣，佢哋都唔介意其他人可以分享同埋閱讀佢哋嘅故事咁樣啦。咁，佢哋都有同我哋特別分享到，話其實佢哋都係第一次接受咁樣嘅訪問啦，然後由頭到尾咁樣組織一次佢哋嘅愛情嘅故事，由佢哋相遇到最後尾結婚嗰一刻咁樣。咁呢個過程對佢哋嚟講都係個，幾therapeutic，幾有治療性同對方對話嘅一個機會咁樣，所以佢哋都好珍惜呢個採訪嘅過程咁樣囉。

E：我諗我補充就係我哋點樣搵啦。即係其實一開始有困難嘅，即使我哋發散喺唔同嘅社交圈裏面，我諗好多係一係就唔願意露面啦，一係就唔覺得自己嘅故事值得被看見啦。咁所以對我哋嚟講，即係公開跟住會見到個樣會有一個完整嘅採訪，呢樣嘢係重要嘅，因為我哋要佢夠visible。咁我哋都必須承認呢，我哋係有啲自己嘅局限，即係我哋做完先發現：點解我哋往往搵嘅採訪對象都係男同志、女同志，唔會係更加多多元性別嘅同婚伴侶。咁呢個我就覺得原來我哋都有盲點，有個局限。咁呢個就好有趣啦，我哋就之後就要繼續做啦。

咁同埋即係我哋採訪之後先發現呢，因為兩位，兩對couple嘅背景其實係有啲類似，可能我哋都係透過一啲佢哋本身有宗教嘅信仰咁樣。咁我哋先聯絡到佢哋嘅。咁因為喺Dino嗰個採訪就講過佢話，佢覺得自己係一啲比較privilege嘅人。咁可能喺中產背景，接受過教育，亦都有一個宗教信仰去support，咁所以呢佢就唔介意，希望用呢一個嘢嚟，佢就係咁講，會消費自己去令到自己更加被看見。咁喺一啲再基層啲呀，或者再唔同界別啲嘅人都會願意一齊去come out去畀人見到囉。咁亦都同時女同志嗰part都係有啲宗教背景，咁所以呢就會搵到佢哋。咁我又覺得原來呢兩個因素，係一個作為一個性別小眾會concern或者會諗嘅嘢。咁我就覺得呢個觀察幾有趣。

M；香港嚟講比較難會做到頭先Erica所講嘅嗰個，更加其他性別小眾嘅婚姻關係。我諗到如果可以搵到同性婚姻嘅配偶們，係唔容易啦。你要再搵到係性別小眾裏面嘅婚姻關係嘅人，係會更加唔容易啦，係香港嚟講。係台灣嚟講可能會相對嚟講容易少少，可能係會見到有偽娘或者係佢哋係跨性別嘅人士，佢哋嘅婚姻關係。係香港嚟講係有打過官司，因為跨性別嘅婚姻關係。但係case嚟講好少，佢哋會唔會上露面嘅可能亦都唔係好肯定。可能呢個會係一個鋪墊，係一個伏筆，可能Volume 2之後嘅集數會講到呢一個性別小眾嘅婚姻關係或者係其他結合嘅關係都唔定。呢個我唔知，呢個我自己自行判斷。呢個唔代表兩位嘅立場。

喺我哋收結之前呢，我又想引用返當時搵資料嘅時候，你哋話希望呢一本zine可以建構酷兒記憶嘅database。呢句字對我嚟講係會有一多啲共鳴嘅原因，係因為作為一個語音嘅記錄載據，呢個podcast亦都希望可以建構得到香港同志嘅一啲片刻嘅database。我嘅database就係用podcast嘅方法去做，做一個記錄。而一坪半嘅出版團隊們呢，佢哋就係用印刷品，用zine嘅方法去做到呢個記載。除咗zine以外，你哋有冇打算用其他嘅形式去做呢個建構酷兒記憶嘅database工程呢？

A：本身今次呢都有一部分係有podcast嘅形式。其實都唔可以完全唔叫podcast，因為佢係一個錄音嘅一段sound track，因為佢唔係一個傾談嘅傾談節目。咁我哋裏面呢就係，因為我哋想運用一啲多媒體嘅嘢，唔好淨係閱讀，咁我哋都試下聽下啲聲音啦。咁我哋就收集咗一啲酷兒嘅空間嘅回憶嘅故事咁樣。咁就係之前我哋喺網上面叫大家，不如你哋可以分享一下你喺香港嘅邊啲地方，係有突然之間會有一啲queer moment出現嘅。即係覺得一係你就係意識到你自己嘅性別，又或者對你嚟講個性別嘅身份認同係好重要嘅一啲地方，即係譬如我第一次同人出櫃，我第一次同人傾訴，原來我好似鍾意一個女仔喎，又或者同你嘅初戀first kiss嘅地方。咁呢一啲地方都係我哋好想收集嘅一啲故事。最重要嘅就係佢係可以連結到我哋香港呢個地方，即係嗰個故事並唔單止係一個任何地方的queer嘅故事都可以。佢就係同我哋香港嘅某啲地方係有個連結點，有個記憶點嘅咁樣。咁我哋就將呢啲收錄咗返嚟嘅故事呢，就錄咗音。我同Erica喺一坪半就進行咗呢個錄音嘅工序，我哋就讀咗佢哋嘅故事出嚟。然後我哋中間都會收錄咗一啲可能嗰啲空間嘅聲音，即係譬如有一個故事係有講到同志遊行嘅回憶嘅。咁我哋⋯⋯Erica就好好咁樣剪咗一啲當年同志遊行嘅一啲sound track，即係一啲sound track落去。佢令到嗰個成個聆聽嘅體驗呢，除咗係嗰個故事以外，佢嘅背景聲音都可能有啲係同嗰個空間相關嘅聲音咁樣。咁就係一個聲音導航嘅酷兒回憶禪咁樣。

M：建構酷兒回憶唔淨只係好似今次呢一個zine裏面用文字，用圖片用印刷嘅方式去做一個記載。以今次嚟講我哋呢個podcast用聲音，佢哋一坪半嘅朋友們都用咗一個聲音用咗一個錄音嘅方式去做咗一個記錄。亦都期待住其他一坪半…唔只一坪半，仲有其他嘅團體們可以，發展香港同志以及酷兒們片刻回憶酷兒身份嘅一個方式去表達。可能會有舞台劇？會有拍攝？會有插畫？有唔同嘅方法咁。亦都希望縱使一啲，點講呀…主流性嘅一啲活動消失或者係轉咗形式，都唔會撲熄咗香港酷兒，或者性別小眾門佢哋發展同埋表達自己、身份表達自己回憶嘅可能性。因為一方嘅主流嘅形式唔見咗唔等於其他所有嘅形式都唔見咗。咁我哋而家都見到有更加多流動性更加強嘅方法，去記載住香港嘅同志同埋香港嘅性小眾咁樣呀。

去到收尾嘅一部分，想問下兩位對於一坪半呀、你哋嘅zine啦，有冇啲乜嘢嘅補充，或者有咩想宣傳嘅部分呢？我依家開放呢個宣傳易時間畀你哋。

E：一坪半走咗兩年呀，我哋都想繼續行落去。正如個post我所我哋想繼續行落去試下，利用我哋社群嘅力量，睇下一坪半可以走到幾遠。

A：就係《The Gaze of Others》我哋而家出咗第一期啦，我哋好希望都可以繼續出落去，出更加多期，然後記錄更加多嘅香港酷兒嘅故事咁樣。咁所以如果想我哋有第二期嘅朋友就要多多支持我哋第一期啦。

M：而家係錄音嘅時間係2023年嘅7月啦。目前嚟講，如何可以買得到你哋嘅第一期呀？

E：大家可以上一坪半嗰度買啦，但同時我哋都寄售喺唔同獨立書店嘅。咁如果你咁啱喺出面比較主流少少嘅市集見到我哋呢，就不妨過嚟打個招呼，或者買多本畀朋友。

M：好呀！咁唔喺香港嘅朋友，咁就用郵寄嘅方式搵你嘅朋友喺香港嘅朋友買嚟之後寄畀你哋啦。就係咁呀。感謝兩位今日嘅時間啦，同我哋講咗一坪半，同埋一坪半近排嘅Zine 《The Gaze of Others》 Volume 1 The (In)visible嘅嘅內容同埋心得啦。喺每一集我哋收集之前呢，我都會例牌去講下我哋我嘅收結嘅段落嘅。就係點止講同志係一個以香港同志角度出發嘅podcast。希望可以將大家生活裏面嘅同志同性別嘅議題，用廣東話嘅聲音同文字嘅方式保留同流傳嘅。想我哋嘅podcast專頁PrideLab.hk/podcast，或者想我哋嘅Instagram @pridelabhk嘅bio，即係介紹個link對面就會見到㗎喇。多謝你收聽呢個節目，而且聽到嚟最後。如果你想聽到更加多，如果你想聽更加多呢一類嘅節目，除咗訂閱我哋之外，亦都歡迎你喺自己收聽嘅平台上面留言，同埋畀星星嘅回饋嘅。你嘅支持同埋鼓勵，將會係我哋默默耕耘嘅動力。咁今集就講到呢度，非常感謝Erica同埋Astor嘅時間同埋分享。咁亦都會期待住《The Gaze of Others》會有之後發展嘅新嘅Volume 2。如果無論係任何載據都好，都希望會有繼續發展嘅。咁就下次同你點止講同志喇。兩位同聽眾講拜拜喇！

E、A：拜拜。