【又關性別事】從實體返回虛擬，重新出發 (Feat. Fe@Common6）

M：Martina

Fe：Fe

M：歡迎返嚟《點止港同志》，我係主持馬天娜！非常開心可以搵到Common6嘅創辦人之一阿Fe，去成為我今集嘅嘉賓做今次訪問嘅。今集會講到關於佢本人以及剛才所講嘅Common6嘅發展。阿Fe，你可以自己介紹下自己先。

Fe：謝謝馬天娜。我係阿Fe啦，我係一個私影模特兒。約莫2017年左右開始喺IG度講關於私影相關嘅內容。去到2020年就同三位朋友開始籌劃開一個談性空間，Common6。亦都喺2021年嘅4月正式開咗呢一個實體空間。當時就開喺尖沙咀山林道。我哋淨係經營咗大概10至11個月左右，我哋就選擇咗休業。後面可以再同大家分享下點解會由興起咁樣想做呢一個談性空間，再去到後面就選擇休業。咁嚟緊嘅發展方向係啲咩，咁就今日可以同大家分享下。

M：我都有follow嘅Common6 Instagram嘅。咁我知道後尾就冇一個，即係regular嘅一個業務嘅operation。咁所以我都好好奇，即係同大家一樣我都好奇係Common6未來嘅動向會係點樣嘅。首先講起你同講Common6之前，咁我首先講一講其實喺2020年左近，香港都有幾個年輕人創辦嘅談性空間，除咗Common6之外都會有一坪半。一坪半之後會有一集係同佢哋傾有計，有興趣嘅都可以留意返。今次我哋講Common6，作為一個都有興趣傾性別議題嘅香港人嚟講，我係覺得好⋯⋯其實我覺得係有啲感動。因為好多時候我哋嘅討論都係好似覺得，要讀個書嘅嗰啲人啦。梳化裏面好似Seminar好似嗰啲演講咁樣，我哋先可以講到性別嘅議題。而我哋真係見到有一啲年輕人，可能佢係半工讀，或者甚至可能係佢返緊工嘅，用自己嘅收入去支持去創辦一個空間。咁可能係由於一坪半真係好細嘅一個空間，或者可能你係租一個商業單位裏面嘅一小個角落都好，其實我哋睇得到有一個實在空間，有人開始咗一個實在空間。咁但係呢個實在空間呢個idea係香港發展係點樣呢？佢會遇到啲乜嘢嘅阻礙，或者會遇到啲乜嘢嘅實在嘅困境？或者係唔一定可能係同錢有關，可能係同個文化有關嘢。

咁我哋今集就會講多啲咁樣。首先講Common6之前我想了解下多啲你嘅。首先我又要講一講，今集其實係2023年嘅6月，咁正正就係PrideLab嘅10周年嘅慶祝活動。亦都係因為呢個原因我返咗嚟。我哋PrideLab都有同Common6合作去搞呢個活動，所以都同Fe呢幾個月有咁密切嘅合作下傾談。咁樣亦都但係有一樣嘢就係，我哋就停留喺工作上面嘅討論，好忙咁樣去arrange好多嘢。但係其實對於你Profile，我自己本人都唔係非常之認識。所以呢就想睇下。頭先你講到私影…私影model之後呢我自己作為一個小小嘅follower，我都知道你有經營Twitter，亦都有經營一啲收費嘅會員平台。你可唔可以講多少少你係點樣接觸私影，以及之後頭先我講嘅嗰啲個人收費平台？

Fe：好呀好呀好呀，咁就可以簡單分享下。呢就係我由先講下我而家嘅年紀，咁可以推進返之前嗰啲唔同嘅時序啦。咁我今年而家就26歲嘅，咁我18歲開始做第一次嘅私影嗰陣時都係喺Facebook度。我突然有個人pm我問我，妹妹你係咪興趣影吓私影呀，咁佢就話300蚊一個鐘頭影內衣，咁我都幾有趣。我係一個好唔怕死啦，跟住咩都好好奇嘅人，咁所以我就咁不妨一試啦，咁就開始咗第二次嘅私影。咁嗰陣時嘅私影經驗其實第一次係幾好嘅，對方都好有禮貌呀，跟住亦都唔係會觸碰我呀，冇我後面經歷嗰啲奇怪嘅事情。咁但係當然而家有著帶咗啲知識，帶咗啲對於性別或者權力嘅認知，呢再回頭睇返第一次嘅經驗入面都總係啲地方係怪怪地嘅。咁但係當時嘅我冇呢一方面嘅意識啦，咁就覺得第一次都幾順利。咁後面因為，自己都係對私影呢一個part係好好奇嘅。尤其係點解會建立呢個好奇呢，係源自於2014年嘅時候呢有一單香港嘅新聞呢，都應該…可能大家都有啲印象。2014年有一單嘅新聞，係有個私影嘅model畀人棄屍咗喺旺角垃圾房。個單案件呢，嗰陣時係引起咗我嘅好奇同關注啦，咁但係我嗰陣時嘅好奇就係，到底點解好似私影係咪真係咁危險呢？有一個八卦同好奇喺度。咁後面有咗個契機開始咗私影啦，咁我就持續地繼續去影啦。咁包括喺論壇出post講話「因為我係私影model，想影下吓Nude」咁樣，咁就keep住持續地影，咁亦都係開展咗呢個探索。我覺得呢，一個嘅呢個私影嘅歷程係成為咗我人生生命當中都幾大嘅一個部分。因為喺私影入面除咗一開始遇到嘅一啲係愉快嘅事件咁，當然都會遇到唔愉快嘅合作。咁亦都係點解我後面開始會講咁多關於私影當中嘅性暴力，原因就係因為喺私影過程當中，係有你會遇到好多唔同嘅人，唔同嘅人對待你嘅方式都會唔一樣，亦都會隨住你嘅年紀學識或者你知到嘅嘢，佢哋嘅態度會完全唔一樣。

咁所以呢一啲都係我後來好鑽研喺私影同埋性暴力同權力當中嘅原因。

M：OK，影你係影影吓影到啲乜嘢嘅契機，你會真係去鑽研權力同性別呢一啲嘅議題。例如我可以諗就係，市面上面你話影Nude嘅，影內衣嘅model，其實都好多啦。咁可能好多人都係會覺得，可能呢啲係搵快錢嘅，或者呢啲係佢自己喜歡嘅又好，但係未必個個都會真係會諗，即係講性別喎、講權力喎，係乜嘢情況之下係其實係唔應該發生嘅。即係呢啲嘅議題係你係幾時腦海裏面想起要研究。

Fe：呢個都幾有趣，呢個都關我讀咩有關嘅。咁我係18歲開始影私影啦，跟住我嗰一年就飛咗去台灣度讀社工啦。我覺得台灣係我嘅性別啟蒙嘅開端啦。咁因為喺台灣度讀書呢就會接觸到好多關於性別女性主義嘅一啲唔同嘅學說同學識。我喺飛咗去台灣之後呢都有繼續私影嘅，寒暑假呢返香港呢都會繼續私影。去到我20歲啦，即係影咗兩年啦，經歷咗唔同嘅事，之後呢去到20歲我真係覺得好奇怪，就係點解，點解影親我嘅都係一啲男人。影親我嘅都係一啲30到60歲嘅男人，我係冇遇到有女性嘅攝影師影我嘅，即係Pay俾我咁樣影啦。咁我就覺得，產生咗一個好奇和疑惑啦。咁亦都因為我，私影呢單嘢呢我係冇瞞過我身邊嘅所有朋友嘅，我身邊嘅朋友係第一時間知啦。咁我都有好多朋友講話「其實我都好想試下影相呀，不過我唔想畀人⋯⋯」，即係講，影得就一定同啲攝（影師）發生過啲咩事呀，或者因為我俾男人影過，所以就有好多唔同嘅污名出現。咁我就因為，朋友嘅呢啲說話呢，所以我就開始產生，要唔要我自己揸機影人呢？咁所以就係嗰度開始，對於性別又出現咗啲困惑，就係我點解好似，係囉點解好似掌權永遠都係男性，跟住好似女性總係要面對住嗰種污名化。咁所以就係呢度開展咗啲好奇，咁亦都多謝台灣嘅讀書同學習啦。咁後面就持續地接觸呢啲對於性或者性別嘅權力嘅探討。去到我Year  4果年畢業嘅時候呢，我甚至係用私影模特嚟做一個topic去寫，關於係台灣有好多model就會post佢哋自己嘅裸體啦，去喺網絡上面啦。咁佢哋會宣稱呢啲係佢哋嘅身體自主權。咁我嗰陣時就覺得好好奇，咁所以就同樣畢業呢唔使寫論文嘅，但我就自己選擇咗去寫啦。跟住然後就用女性展現身體自主權，咁到底社會嘅觀感同埋佢哋女性嘅自我認同係點樣嘅呢？我哋就做咗我嘅一個論文嘅題目。咁所以Year  4果一年我大概22歲左右，21/22歲嘅時候就強烈地塞咗好多嘅資訊喺自己嘅腦袋入面咁樣。

M：呢個可想言之做一次paper呢就突然之間長咗好多嘅知識嘅。我自己都係喇，喺台灣讀碩士嘅時候，真係一下子消化咗好多⋯⋯好搞笑我喺台灣讀但係我畢業嘅論文係同香港有關嘢，就係喺香港，Sex Toy嘅Sex Toy鋪頭嘅一啲發展，anyway總之就係研究呢就係有呢個長知識嘅契機。

Fer：無錯！完全係！

M：我又好好奇問，因為呢其實你講到話影內衣或者係影Nude嘅Model，好多時候都係男性掌鏡。我自己有過一次嘅拍內衣嘅，亦都係咁啱都係男性掌鏡。我嗰次嘅經驗其實係，我喺呢度會覺得係好彩，因為我其實對於影內衣嘅，我對於影內衣有啲咩行家嘅準則，應該唔應該做嘢其實唔係好清楚，但係嗰次嘅感覺係明顯有一種距離，一種好清晰嘅身體嘅距離。所以我係總之我係換咗啲衫，跟住影咗啲相，跟住就係一個我想佢見到嘅地方，show出嚟啦咁樣咁就完咗件事。咁亦都係男性掌鏡。咁到你自己掌鏡，你又從Model變左做攝影師嘅呢個角度，呢個身份嘅轉變。你覺得男性掌鏡同女性掌鏡，以及係呢兩個身份嘅轉變之下，你有啲咩觀察呢？

Fe：觀察係頗多，最明顯嘅差異對我嚟講，係我哋⋯⋯因為呢個性別只係一個教育嘅背景，我被教育成為一個女性。而我覺得呢個我被教育成為女性，同埋佢哋被教育成為男性呢一個框架底下，我哋對於性嘅呈現係毫不一樣。因為當我成為攝影師之後，我都係有影唔同性別嘅身體，尤其係佢哋都好願意相信我，所以願意裸體咁樣呈現。去到我後期，應該去到我23歲左右，即係2020-2021嘅時候，我就開始再影女性嘅情慾照片，即係想影佢哋嘅可能自慰，或者佢哋點樣展現自己身體。我嗰陣時就發現，我喺鏡頭前面，我好少係採取一個操控嘅形式去呈現佢哋嘅情慾，例如我好想淨係做一個旁觀者去影低嗰個女性喺我面前自慰，可能佢係玩震蛋，用手指，或者佢只係摸緊自己個胸。我好少會用語言去叫佢，你點樣做啦，但係我自己嘅經驗，同埋我實際地見到我當時同我一齊合作嘅另一位男性攝影師，佢係會開聲同佢講，你點樣用力揸你個胸，你點樣趷起啲個pat pat，或者係各方面，佢哋係，喺我嘅觀察底下，我見到男性嘅攝影者，佢哋係好似被教育咗，佢哋一定要去掌控嗰件事發生，而我嘅角度係，我相對地唔會咁操控嗰個過程，所以呢個係我嘅觀察，但係當然你話，我亦都，即係因為我有同唔同嘅朋友傾，我有啲認識嘅女性嘅朋友，佢哋未必本身係攝影師，但佢哋開始想掌鏡。有佢哋嘗試想去影情慾嘅就係，佢都會問我，點解我好似影唔出嗰啲男人影出嚟咗一種情慾感，色慾感咁強嘅畫面。我就話，呃，你諗下你係過程果中，你想唔想掌控嗰件事，你想唔想操控嗰個女仔。佢就話其實真係唔想，我哋就話呢個就係個個最大差異，點解有啲色慾嘅相片好似咁大張力。嗰張力除咗係源自於攝影師本身嘅拍攝功力之外，仲有係嗰個攝影者有幾介入喺嗰個拍攝當中。

M：如果你頭先講到話，男性嘅話，通常都會喺嗰個場合裏面會比較多指示，會比較想有種控制權。知道即係佢眼前嗰個模式，佢係一個⋯點講呢，即係佢可以好清晰地話到俾對方聽，佢想個畫面係點樣。而你嘅經驗就係你會俾個女性自己去實踐，自己去探索，自己去呈現佢想做嘅嘢。咁佢⋯⋯點講呢，你覺得影嘅角度、影嘅畫面、構圖上面會唔會有⋯你會有點樣，即係你會唔會有分別嘅呢？

Fe：會唔會有差異呀？

M：舉個例就係，可能有一啲角度，男性會覺得嗰啲位係好好睇嘅，但係你會覺得嗰啲位係平常到不得之了，所以你唔會諗呢個位係靚嘅。你反而會覺得你另外一啲角度，可能舉個例，影手指咁樣，咁呢個係好靚嘅，但係喺男性嘅攝影師角度可能會覺得呢啲係一忽（身體部位）。咁你哋係掌鏡當中，你哋個角度上面會有唔同？

Fe：我覺得呢個地方係好有趣嘅。我又發現無論係觀看嘅人，定係掌鏡嘅人，如果佢係比教育成為男性嘅話，佢好喜歡影close up，close up係陰部同埋胸部。我剛講到我後面係有同另外一個男性嘅攝影師合作，我哋嗰陣時係一個Mindful Studio，專門出售女性情慾嘅平台，經過我哋嘅model知情同意下，我哋影咗佢所有相片都會作出販售。我哋就收到一個comment⋯⋯

M：舉手舉手，想問下販售係乜嘢？

Fe：我哋會放喺網路平台上面買佢哋啲相片，你可以想像一個係商業嘅形式去買唔同model嘅相片。我哋會標註嗰一輯相片入面係有全裸，可能入面係得一兩張相係全裸。跟住就收到有啲觀眾或者買家就會話「你入面都唔係全部全裸，同埋都睇唔到啲重要位置」。佢嘅重要位置就係冇影到嗰個閪，我哋就想「why？」我哋覺得呢件事係幾有趣，同埋係我哋話唔係所有嘅攝影者都一定要影到女性嘅所謂嘅性徵。但係無可避免地影到陰部呢件事對於佢哋嚟講，如果係裸體入面佢哋會希望有呢件事發生。但係當然唔能夠一概而論，因為我都遇到好多唔同類型嘅攝影者，但係如果攝影者唔係經過思考，唔係諗過自己想影啲咩題材，而佢只係想影到一個囡囡嘅話，咁就會有一個好大嘅方向。但係呢個都好有趣，啱啱有講到賣其他女仔嘅相，咁我後面都開始咗自己賣相，都係源自於呢一個平台。啱啱講嘅Mindful Studio，而我係開始咗自己嘅賣相之旅。

M：你去到邊一個位，或者你有啲咩人嘅言語激發咗你覺得，咁不如我自己賣我自己啲相啦。

Fe：咁呢個係事源，可以再推返前少少，點解會開始咗Mindful Studio呢個計劃，影其他女仔，然後就開始咗賣相呢？剛講我18歲開始影私影，我20歲的時候，我第一次知道我啲相畀人外流。咁就可能外流咗四五輯相，嗰個四五輯嘅意思係講，可能佢影咗300張相，佢係冇篩選過嘅情況下，掉咗300張相出去賣。咁我呢第一次知道我畀人外流啲相啦，我第一個反應係覺得好嬲，嬲唔係嬲佢外流，嬲佢係冇揀過啲相，300張相畀人有好多相都好醜。好醜喎，我真係好難接受我啲黑歷史。

M：即係點呀？啲眼係好似照妖鏡咁樣。

Fe：係呀！係個照妖鏡咁樣。

M：或者可能係根本係完全未set好嘅狀況，可能係純粹係轉緊身嘅時候，嗰啲樣係花晒。

Fe：係呀！真係可能係花晒。好醜喎，總之係好醜啦。

M：唔ready。

Fe：唔ready嘅相片竟然可以畀人外流啦。第二三個反應先覺得，覺得點解會畀人外流呀？但因為我私影之前，我已經預咗有呢個風險存在。即係我一向都話，做咗嘅風險評估唔等於對方可以咁樣傷害我嘅。只不過係風險評估我有做到，咁我都揹起呢個飛啦。咁但係外流都係佢哋仆街。知道咗有外流啦，跟住就後面我，我嗰陣時Mindful Studio合作嘅嗰位攝影師，都係其中一個當初話畀我聽，話「妹，你有畀人外流」喎。佢係知情嘅，咁我都係因為佢而知道啦。咁後面Keep住都有合作，呢一個攝影者對於我嚟講係一個，當然佢唔係一個完全係理念上面，完全一致嘅人。但係佢係一個respect我啦，我唔能夠代表佢能不能respect其他人，但係at least佢同我係相處比我感受到被尊重嘅。咁後面就佢提出話要唔要賣相呀咁樣。咁我其中個諗法就係，與其畀人賣，不如我自己賣啦。咁係抱著呢一個心態就開展咗Mindful Studio同其他女仔合作嘅呢個section。咁我到邊個位決定要自己開OnlyFans賣相呢，其實都係因為呢一個合作嘅攝影者。咁我稱佢做阿D啦，咁我哋一齊共同，嗰陣時一齊經營Patreon咁樣。咁我哋就有D唔同嘅tier啦，有D tier就放咗我哋賣其他女仔嘅相。咁其中有個tier呢，係放我自己嘅相嘅。咁嗰個係屬於一個最高tier啦。嗰陣時個定價呢，就源自我係生日，4月22號。咁所以我就定咗42.2嘅美金。咁跟住呢，咁我都會post自己啲自拍，因為我本身呢就清楚我係一個好鍾意展露自己身體嘅人。我係透過展露呢，去獲得快感嘅。咁跟住就啲人就會留言呀，comment呀，或者PM我講，你啲相好正呀。咁因為嗰個係一個我允許同意嘅地方，所以啲人會咁樣同我講。咁我覺得呢啲事係ok嘅。就IG我冇agree你性騷擾我啦。咁但係喺嗰個地方我係同意咗呢件事發生。咁但係呢啲就話我唔想睇到啲comment，啲麻甩佬講嘅嘢好難聽，或者佢覺得唔舒服。但係嗰個platform我哋一齊經營，佢會有少少comment，你咁樣張自拍唔好睇。我就覺得點呀？我又唔係serve緊你，唔係畀你睇。咁我就覺得好難。佢唔係一個喜歡我，或者佢欣賞我嘅狀態。佢睇到我啲相佢當然覺得唔鍾意，所以就喺嗰一刻就開始去諗，其實不如我自己經營一個自己嘅小天地。咁我淨係畀喜歡我嘅人去睇。咁咪唔使污糟咗你嘅眼睛，我又可以有一個地方去擺我sexy嘅相。所以就由嗰度開始，有咗呢一個契機再去做自己嘅platform。

M：聽起嚟有啲似係藝人做做下，跟住就自己做咗自己經理人，跟住就將自己嘅嗰個接job嘅大權放返喺自己嘅身上。係呀，會好忙㗎。會經營好多個platform，非常之忙。但係至少你擁有最大嘅主導權，你可以控制自己想show啲乜嘢出嚟。我覺得呢個動作其實係，你聽到係你一步一步地從唔同嘅合作，唔同嘅可能磨合當中你搵得到，你最適合最舒服嘅嗰個自主嘅位置會係點樣。

Fe：我完全同意。因為當我係幾時開呢，我係2021年嘅大年初二開咗OnlyFans。咁我喺嗰一刻開完之後，我係即刻覺得我唔使再畀人好似監視住，或者係監視住我咁樣去經營我想展現嘅模樣。咁我覺得係一個自主權嘅彰顯。

M：咁去到呢度我又有個challenge。呢樣嘢其實係香港嘅性別圈裡面，經常會發生嘅。女仔賣相到底係自我物化定係以呢個性解放或者係性自主為名嘅商業行為？咁樣頭先Fe有講到，就係佢一步一步地，最後就自己開咗OnlyFans，去自行去做嗰個老細，自行去賣相。如果講起物化自己有討論，好多時就係啲人就會去討論話，咁你自己將自己影咗啲相，然後畀人地去觀看，咁人地平頭品足你喎，人地當你好似商品咁樣，話你呢一忽唔好睇嗰一忽要點點點嘅時候，唔係一種物化自己嘅行為咩？你有冇聽到咁樣嘅說話呢？

Fe：咁當然有啦！點會冇呀？呢個賣相嘅討論係周不時都會出現。我自己係開始賣相之前，即係講下經營Mindful Studio之前，已經同過唔少人傾過呢啲議題。咁可以到而家嘅我點樣看待自主同物化呢兩個字呢？我會話呢兩個字唔係對立嘅，佢哋只不過係觀點與角度嘅差異。即係我自己影完啲相，我自主地決定賣相，呢個真係一個自主行為。但係在於買家嘅角度，即係睇嘅人嘅角度，佢睇緊嘅一張相，咁呢個當然係一個物化嘅位置。咁所以呢件事本質兩樣嘢係唔衝突嘅，佢哋兩個都係中立地存在嘅。咁我自己覺得呢度係無任何可以討論嘅空間，因為我哋其實係自主地做呢一個行動，而你嘅角度去睇係一個物化亦都係冇錯嘅。咁我地好難自己物化自己，因為我自己影嘅所有嘅上面，真係一個我自己做嘅決定，所以呢個就本身係一個自主嘅位置。咁而我自己覺得，喺呢啲關於賣相嘅咩自主呀或者物化嘅討論入面呢，其實從來討論嘅嘢都唔係呢一啲自主同物化。討論緊嘅係講緊，喺呢一個社會入面，邊一個有咁樣嘅權力去定義女性嘅性。其實講緊嘅係背後係講緊係，性嘅掌控權喺邊個手上面。真係好老實咁講，AV、Porn行咗咁多年，有冇人出嚟嗲個女性嘅自主權？有冇人嗲個話啲女性係被物化？有嘅！喺女性主義嘅爭論入面，但係喺普羅大眾入面，從來呢一個討論都唔存在。但係點解去到有女性行出嚟，自己開OnlyFans，自己開Twitter等等，去賣相嘅時候，坊間嘅人有咁大嘅爭議性？個原因係嚟自於，大家覺得性嘅掌握權或者性嘅主導權，唔應該喺女性自己身上。有冇普羅大眾有講過，AV、Porn呢啲係剝削，好少會聽到呢一啲嘅言論。佢哋自己集中喺，點樣觀看呀邊啲片好睇呀，但係呢啲討論從都唔出現。只有喺女性自主地行出嚟，販售自己嘅性嘅時候，佢哋先出現呢個討論。咁呢個其實根本喺底入面講緊嘅就係，大家覺得女性係無權去決定自己嘅性點樣呈現。

M：頭先你講有個好重要嘅位就係，當人哋講起賣相係物化自己嘅時候，你係講緊話，我拍嘅相，喺我拍落嚟嘅時候，我可能做咗好多preparation，做咗好多嘅準備。我要準備我身材，我嘅角度，我當日嘅場景咁樣。其實所有嘢加加埋埋，你係營造咗一個作品。我哋自拍呀，我哋而家影呢個IG story其實都係一種呈現。咁我哋都隔個角度㗎，你自己搵個filter，走個角度，你影你理想覺得擺得出街嘅一幅相，其實呢個行為亦都解釋緊就係，當你賣緊自己相嘅時候，你嗰每一幅相，你係點樣呈現自己畀人哋睇呢？咁但係呢，有陣時就有啲人就會話，咁你賣咗啲相畀人睇嘅時候，人哋畀意見你啦。咁你又話係冇衝突啦。咁會唔會出現有啲人就話，但係如果你唔賣相你唔畀人哋睇，咁人哋咪唔會對你身材有意見囉。你咪唔會收到一啲人嘅comment話如果瘦啲就好啦，或者你如果點點點點就好啦，咁你咪唔會收到呢啲咁嘅comment囉。對於呢一種，即係，應百客，應客人嘅呢一種嘅嘅權力嘅關係，你係點樣睇嘅呢？作為一個OnlyFans嘅account主人。

Fe：我自己覺得⋯⋯評論呢件事呢，唔無論你有冇賣相或者你係如常你生活呢，佢都總係充斥喺我哋生活當中嘅。咁所以唔理我買唔買相，我都一定會收到呢啲嘅comment。所以呢個地方唔會令到係，我阻止我去買相嘅原因。咁而你話，呢一啲嘅comment我點樣看待或者點樣應對？

M：打個岔，簡單啲嚟講就係，因為嗰啲買你嘅相嘅人，好似因為畀咗錢你啦，佢成為你嘅老細你嘅財主之一啦，咁所以佢有權喺你嘅身上面有個say，即係有個發表意見嘅權利。如果啲人話，影相係…彰顯自己或者係展露自己嘅時候，嗰個自主性嘅時候，你又要接受人哋，即係你嘅客，對你嘅批評喎。咪變咗做你會唔會之後影嘅相，越走越去迎合你嘅客嘅呢？

Fe：但係我真係冇喎，我覺得好好有趣嘅。即係我呢個位置可以講下我OnlyFans嘅定價，我都係一樣keep住42.2嘅美金啦。其實呢個金額對於係香港嘅OnlyFans嘅content creator入面係一個高價位。咁我當初點解會定呢個價錢，就係因為我想調高個門檻。我想調高個門檻，就係我想喺你，即係你好衝動嘅時候，你見到要畀三百幾蚊睇一個唔知點嘅女，唔知入面有咩內容嘅時候，你使唔使停一停諗一諗呢？我想做到呢個效果，我覺得係成功嘅。因為我真係冇遇到任何嘅，我OnlyFans嘅subscriber會對我嘅身體，評頭品足，而且佢哋係好supportive嘅。我係可以好驚訝咁樣同大家分享，我6月好忙，自己屋企等各方面都發生好多事情。所以我就send咗個罐頭message俾subscriber。就話我呢段時間真係好frus(frustrated)，所以我更新頻率好低，CP值低咗，大家要唔要考慮下退訂閱？我係說服大家退訂閱。我係收到好幾個嘅人會同我講，你take care，你take your time，唔緊要，你嘅價值唔係係啲相到。我係想support你。所以你話我會唔會遇到對我評頭品足呢？我覺得係喺subscriber入面係冇嘅，真係俾啲錢我，支持我入面係冇嘅。反而可能IG，Twitter一啲免費嘅，咁就有啲免費仔喺度評價我嘅身材，咁佢本身就唔係我嘅audience，咁我就唔需要理會。

M：呢個我覺得呢個非常重點。當我哋可能架空咗一個高度，你講話真係賣相呀，然後你就會百貨應百客，慢慢呢就係為咗要迎合嗰啲人嘅目光。所以就改變咗自己嘅時候，咁Fe嘅例子就係足以證明，當你經營咗嘅呢個案例，係成立咗嘅。唔單止係你同subscriber，當你以為係你係服務者同客人，呢啲關係之外，其實你仲建立咗一個小小嘅支援嘅網絡，係少少嘅支援嘅一個關係。即係佢唔會真係好似點講呢，即係同你計分鐘計錢話，我今個月呢唔收夠300幅相呢，我就覺得佢唔抵。因為42.2美金呢，我呢係一蚊計一幅相咁計嘅，就唔會出現咁樣嘅討論。反而呢係好諷刺，你喺一個免費平台嘅時候，你將啲相可能放上一個免費，例如Twitter呀、Instagram呀，嘅時候，就會有啲免費仔就同你知啲點點呀。

Fe：係呀係呀係呀。同埋我覺得係，可能亦都因為我嘅OnlyFans可能訂閱我唔多啦，咁我都會約佢哋食飯嘅。即係我有個機制叫做四個月，訂閱滿四個月呢，我哋就可以食一餐飯。我好珍惜每一次同佢哋食飯嘅時間囉。咁後面都有一啲嘅subscriber係會，會去我Comment6嘅嗰個空間度同我傾計啦，會參與啲活動啦，亦都會有唔同嘅update咁樣。咁我覺得呢個位係，我冇好將自己視為一個content creator或者一個賣相嘅人，或者各方面，而係因為佢哋嘅回應讓我知道佢哋都好理解，我將佢哋每一個人視為一個人，佢哋都將我視為一個人啦。

M：當大家可能會將人賣相，或者開呢個收費平台視為，即係正式販賣自己嘅時候，你作為一個即係裏面嘅行家之一，你企出嚟就係話其實，裏面嘅互動唔係想像中咁商業，你真係見到一個人性，即係treat you as a human，當你好似人咁對待嘅一個反應。所以大家當你考慮下研究呢個OnlyFans呀、Patreon嘅時候，可以有多一場思考。其實你企入去，即係踏入呢一個空間嘅時候，其實想像空間，或者嗰個互動嘅空間，其實係比你想像中更加大。

Fe：或者我自己嘅定性，即係我本身將自己放喺呢一個行業入面嘅時候，我嘅定性就係，我係一個不定期更新人嚟㗎嘛。呢個就係我個小天地，咁你自己諗清楚啦。咁所以就係一個，我都尊重佢自己嘅考量。我都係講到明我會發生啲咩事，咁就大家有個秤啦。然後喺呢一度就再進行互動咁樣。

M：你講起呢個，我自己有啲小共鳴，我自己冇Patreon亦都冇OnlyFans，咁至少我有一個小小嘅平台，就係呢個點知港同志啦。呢個平台其實對於我嚟講，我嘅更新次數其實真係會比其他，不論係本地或者係台灣嘅，講性別嘅Podcast係嚟得慢嘅，甚至嚟得唔單止慢，仲要係少。咁但係我可以肯定同而家仲收聽緊嘅聽眾們講，其實我每一集，每一個部分我自己有自己親身去錄啦，亦都，同Fe好似嘅就係，呢個係一個小天地，呢個係一個對得住自己。我呈現我想，搜集嘅或者我想搵嘅人，同我一齊做呢個互動之後嘅一個錄音嘅紀錄。雖然而家係唔收錢啦，咁我亦都唔打算呢樣嘢係成為我個人收錢嘅部分，因為呢個都係同PrideLab合作嘅呢個project。但係，對我嚟講係一個好，我對得住自己，我對得住自己嘅一個創作嘅天地。係呀，係呀係。咁我講起Patreon、講到OnlyFans啦，亦都講到頭先啲關於，即係物化嘅討論啦。咁我哋呢幾年可能由電視台嘅節目，以至到係一啲，你見到Instagram嘅一啲，講性嘅，以個人身份起家又好，以一個機構身份起家都好啦，甚至好似Fe所謂Comment6嘅嗰種實體嘅，其實討論性嘅嗰個account或者嗰個渠道係變多。有一啲人呢，或者我觀察到個感受度呢，香港好似有種氛圍嘅就係，我講性呢，我要有一啲資格，即係我唔能夠喺條街度執個人，問你關於性嘅睇法。你要搵一個，你可能係好多性嘅經驗嘅，或者係讀咗好多書嘅，讀過性別研究嘅，甚至話可能係你係賣過性相關嘅玩具嘅，性相關嘅行業嘅人，你先有資格講。作為你有經營一啲尺度比較大嘅平台，或者係收費平台，以及係你去籌辦Comment6嘅平台嘅時候，你點睇呢一種談性資格論嘅呢一個現象？或者你又冇感受到呢一種感覺？或者甚至係有冇人挑戰過你，你憑咩開呢啲咁嘅嘢？你憑咩開Comment6？點解會係你？我點解要過嚟聽你講嘢？有冇收到咁嘅互動或者feedback？

Fe：資格嘅呢個討論我係未有收到嘅。咁但係呢，自己當初會開Comment6就係源自於我覺得唔係下下都要好專業咁樣談性，即係Comment6係一個堅持唔做專業嘅事。即係如果佢有啲性嘅求助，或者有可能遭遇到例如性暴力，或者佢有LGBT相關嘅一啲需要嘅支援，Comment6未必俾到佢，但係Comment6可以做嘅係我轉介佢出去。咁呢個就係我哋好堅持我哋唔做專業嘅事，呢度只係一個入門嘅地方。咁所以我自己係我自己親身地去同唔同嘅人去傾，因為識我就知我係一種好鍾意吹水嘅人。所以會遇到好多唔同嘅人、唔同嘅年紀、唔同嘅背景。我自己覺得喺真實地對話嘅時候呢，係冇一種資格咁嘅存在。但係喺佢哋嘅言談之間，佢哋會講得到佢哋喺佢哋嘅社會背景或者佢哋嘅身位入面有一種壓抑嘅狀態。咁所以呢個我覺得唔完全係源自於嗰個資格感，反而係一個身份嘅規限。例如可能我係讀性別研究嘅或者可能我讀文研嘅，我可能比較多有多啲資源可以講呢一方面嘅內容。但係如果換轉係一個可能係教中英數嘅老師，佢可能嗰個身位入面，佢自己有啲自我審查自我限制，佢本身嗰個崗位亦都唔係一個彈性嘅位置嘅時候，咁就會變咗嗰個限制比較大一啲。

M：講講呢個Common6嘅定位，我自己作為個體戶我都有一啲睇法嘅。非常之耐之前呢，我用一個叫做「非學術女性情慾研究員」嘅身份去寫咗一啲文章。其實呢個term呢，我係有喺其他評論面有解釋過，點解要咁堅持要用非學術呢三個字開頭呢？我當時嘅定位我好唔想成為一個學術專家。

Fe：同意。

M：但係有啲人做個點樣嘅就串我：自己有讀性別研究嘅，讀到碩士嘅，咁你又話自己非學術，即係你係咪真係點講呢？

Fe：搞串個party。

M：係囉，你明明係insider，你又話自己非學術做乜鬼呢？而係我好想強調一樣嘢就係，其實我好想用一個peers，從一個同行者嘅身份去講我睇到嘅嘢，而唔係我去⋯⋯下下你見到一個現象。一係係唔係都搵我嚟批判，話「馬天娜你有咩想法？」、「馬天娜你有咩睇法？，你點樣評論呢件事呀？」嘅時候，我唔想做呢個角色。我唔想做一個，我都係觀察嘅一員。我可能觀察嘅位其實同你睇到嘅係差唔多，只不過我正如你所講，我係有多一啲嘅字眼，多一啲嘅資源。可能我自行花咗幾年嘅時間去搵到一啲字眼，去描述一個現象。咁可能你嗰段時間你又返工返學啦。而我做嘅非學術係，我想畀人哋覺得係性或者係女性情慾，或者係我講嘅女女情慾，其實係就係喺你身邊發生嘅一啲嘢。我唔需要將佢好似包裝成某一樣嘢，都係一種“ism”或者某一種主義，或者某一種係一個社會嘅現象，係一個社會架構嘅問題。甚至我會講係好多時候我嘅想法，我有陣時會諗，如果係一個政治正確嘅框架，你會係點樣諗；係一個非政治正確嘅框架裏面我係點樣諗嘅時候，我會覺得用學術去將我框咗落去係一件。係一個錯誤嘅方向嚟嘅，我不能夠接受呢個方向，所以我就會強調我係非學術啦。

其實我自己嘅身位就變咗做係，我有識多啲一啲嘅terms，去可能俾到你更加清晰去描述一件事，但我唔想令到人哋覺得就係我係批判家。係啦係啦，我係一個可以令到你知到我哋有啲乜嘢字眼去表達你感覺到嘅一啲狀況。例如係我見到個forum上面會問，「點解女同志而家現時嘅女同志仲會有人想做TB咁樣？」咁可能我就會企出嚟做話，其實你話你而家反思點解有TB之前，你要諗下點解會有Tomboy呢一個身份嘅角色。佢同建立女同志呢一個文化，一開頭嘅歷史可能係有關係，只不過係你而家去到咁多年今時今日，你企返呢個身位，你批判返以前發生過嘅一個文化嘅時候，其實係一個時間上面嘅一個落差。咁我可能俾到啲資料你囉。咁但係我會希望係同身邊嘅人以一個，即係朋友或者同行者嘅角度去講一件事。亦都解釋咗點解我到而家呢，非常之輸蝕地我唔會特別去露樣啦，亦都唔會特別鍾意拍片去分享我自己嘅生活啦。最主要原因係因為我希望維持到一種匿名性，或者一種我可以融入到呢個社會，即係如果我調返轉頭，我想像假設我可以，他朝有一日有出名到好似你會subscribe去一啲香港或者外國嘅YouTuber咁樣，咁我行出條街度，你就會知道我係邊個嘅啦。咁你就會認得出我係一個乜嘢嘅身份嘅人囉。咁我所以你就會想像我好多嘢都會同我呢個身份有關囉，即係可能我吃喝玩樂，我去嘅場合，以至到我去嘅唔同嘅地方，我都會掛住呢個身份係身，而我唔想做呢件事。咁我呢件事，即係所以我亦都係解釋咗我呢個非學術女性情慾研究員啦，以及我一路以嚟做到Podcast、其他嘅account或者唔同佢合作嘅一個堅持就係咁呀。

Fe：我諗呢個位就係我有同樣嘅睇法就係，我將自己視為一個有資源嘅人囉，而我哋係善用呢啲資源囉。咁即係我可能我同其他人唔係好大差異嘅，只係可能我願意或者我唔介意，我嘅身係我嘅資源之一，佢可以成為一個教育嘅方向，或者佢可以成為一個展現嘅方式。咁呢啲資源係我見得到，並且我哋願意善用。

M：好講起資源，我哋就move on去講呢個Common6嘅空間啦。我只能夠好抱歉嘅呢就係Common6開，同埋呢個休業呢，我都冇去過。

Fe：唔緊要啦。

M：依段時間我都唔係喺香港，或者係我喺香港我都好忙做meeting，咁所以冇見過啦。咁但係我有知道呢個空間嘅，咁你都解釋咗，真係開呢個Common6空間嘅契機啦。咁我順便都拋拋書包，即係上網搵呢個Common6呢。Common6嘅名嘅來源係，即係實體空間談性啦咁，Six，即係6啦，英文Sex S I X有六大嘅原則啦，六種感官啦。咁亦都同英文Sex類似嘅發音啦。咁你可唔可以講一講你嘅六大原則係啲乜嘢？

Fe：嗯，呢個Six係好有趣，總之嗰陣時嘅諗法就係我哋又想，一方面知道香港人嘅性好禁忌啦，但係一方面好想大家講得到啦。咁我唔想大家如果同人哋講，我哋想係common sex到坐下，可能冇人會上嚟，冇人夠膽帶friend上嚟，咁所以就用咗Common6呢一個字啦。咁我哋嘅六大原則呢係三個C，三個S。咁三個S係啲乜嘢呢？就係space，即係空間啦，safe，即係安全啦，跟住就係self awareness，自我覺察啦。咁三個C係啲乜呢？就係choice，選擇，跟住係consent，知情同意，同埋communicate，交流。咁就係呢個六大原則。咁呢六個都係我哋嘅宗旨嚟嘅，即係冇將尊重買落去就係因為expect大家應該有尊重啦。咁但係呢六個元素本身就係構成咗何謂尊重，何謂有界線地談性啦。

M：咁可唔可以順便講埋呢個六種感官你應該講埋？

Fe：冇呀，其實呢六種感官就係我哋本身平時聽到嘅五感啦，即係聽過觸覺，味覺，嗅覺，視覺，最後一個就係心覺囉，就係我哋個心啦，我哋心點樣去諗唔同嘅嘢啦。

M：ok，好，咁Common6嘅資料就講到呢度啦。我剛才講到Fe係Common6嘅創辦成員之一嚟嘅。咁你有其他成員吖嘛？

Fe：係呀。

M：咁請問你點樣遇到呢一班嘅成員而去開呢個Common6？咁你分工係點樣嘅呢？我哋四個人啦，其實都係順性別嘅女性嚟嘅。我分別遇到佢哋，一個係我大學四年嘅roommate，咁所以我哋已經認識咗好耐啦。會開Common6都係因為佢嘅，即係佢係望住我喺網絡上面做好多嘅性或者性別嘅倡議啦，跟住佢就問我，喂，你要唔要開間sex toy shop，然後一邊做性教育呀？咁我就講唔啦，香港人做緊嘅。而且做得好好，何必要去分一杯嘅，或者係爭嗰片天地呢？咁但係因為佢呢一個提出呢，我就去諗我有冇嘢想做。我覺得香港有冇一啲嘢未有，或者係有啲空間要填補。咁我就諗，我想要有個實體嘅空間。咁所以呢個係嗰個源起啦。咁跟住另外兩位嘅partner呢，一位係我上一份，即係返嚟香港之後嘅全職工作，喺做基層倡議嘅時候認識嘅朋友啦。咁我睇中咗佢嘅財政嘅能力啦，所以就搵咗佢入嚟一齊協作啦。咁佢都係一個頌缽嘅行者，亦都係一個頌缽嘅治療師，療癒師咁樣。咁佢喺呢一個Common6入面，就係如我講嘅，負責住財政，同埋又做呢一個頌缽嘅服務咁樣。咁我仲有最後一位嘅partner呢，咁佢就係我當年影過嘅一個女仔嚟嘅。咁佢亦都係一位塔羅師啦。咁所以喺最一開頭組成一個Common6之前，即係佢未埋班之前呢，我哋就成日都搵佢，不如幫手塔個羅，Common6應唔應該做啊咁樣。咁所以就係一個咁樣嘅組合，我哋四個人。

M：OK，我哋想像成個空間就係你要開一間店，當時人有啦，錢有啦，咁就空間。咁請問你呢個空間，搵呢個空間，山林道呢個空間嘅時候，首先係點解會係呢個空間，二嚟就係搵呢個空間時候，你會唔會遇到啲乜嘢嘅困難，或者係可能唔係嘅，可能好順利嘅咁樣。

Fe：我諗嗰個困難呢係⋯⋯係我哋之間嘅共識。因為我哋四個人啦，咁我係一個好堅持，我一定要開實體空間嘅人。咁其實呢，對於我嘅三位partner嚟講呢，佢哋佢覺得點解，即係點解唔可以開個網絡空間就咁算啦。咁多人都係網絡上面談性，why？點解一定要咁堅持實體空間。咁我就同佢嚟講就話，我正正就係因為而家網絡上面，已經有好多人都係透過網絡去談性，通過一啲單向式嘅資訊輸出，但係我哋好少會坐低落嚟，真係傾下性呢件事。我面對面見到一個人，我面前傾性係好重要嘅。嗰個你會真係見到嗰個係一個人，無論佢講啲咩都好，你首先認知到佢係一個人先。咁所以我就好堅持要揀實體空間，我哋就話冇實體空間我唔開㗎！咁所以就係我自己堅持啦。最後就講啦，我係2020年pop up呢一個嘅諗法，我哋網絡都搵咗半年。因為我對空間本身有一個想像，我好希望嗰個空間係入嚟嘅時候，有一條小小嘅走廊，轉彎先至見到成個空間嘅原貌。原因係因為我覺得呢個係一個安全嘅考慮，係安全感嘅考慮。你試想像下，我打開門就見到晒成個空間，甚至係外面已經見到晒成個空間。坐入面嘅人覺得安唔安全呢？係出面嘅人睇到嘅時候，佢會點諗呢？但係如果有一個，係有一個小小嘅走廊，打開咗入嚟你可以有一個小小嘅停留，先至再進入嗰個完整嘅空間。對於我嚟講係感受上面好緊要嘅。咁同埋咁，我哋當初對空間嘅想像呢，都係我嘅想像啦。我想嗰個空間有塊鏡，我哋有鏡鏡嘅地方就係自我意識。我要先見到自己我先有辦法產生覺察，同埋對自己嘅想像，思考。所以又要有走廊啦，跟住又要有鏡啦，跟住個地點又唔可以太偏僻，因為我哋都係一個安全考量。畢竟我哋可能係探性，我冇辦法預計嚟嘅人係啲咩人，我冇辦法預計會唔會有仇家上門，我會預計會唔會有啲咩風險存在。所以我首先考量呢個地點，一定係一個有人流嘅地方。咁商廈係我當初比較堅持嘅一個位置，好多人話其實你咪喺工廈度囉，平租啲喎咁。但我覺得我喺平租同埋我感受上面嘅安全感，我選擇咗感受上面嘅安全感。所以搵咗半年兜兜轉轉，跟住就遇到呢個空間嘅時候，我哋係大家一行入去嗰個瞬間就覺得，其實係呢度㗎啦。跟住我哋就花咗一晚嘅時間，就坐低嚟傾，到底係咪開，係開我哋就租。咁我哋就花咗一晚時間就決定咗扑錘（租）呢個地方。

M：你係book…，你決定要租呢個地方嘅時候，你點同經紀講你呢個房你做乜嘢？點解我問呢個問題呢？係因為我以前做，我以前做Sally Coco，可能好多人都知。老闆娘Vera成日都同啲記者講，就係佢因為佢係擺明居馬，賣toy㗎嘛。即係你冇得瞞嘅，即係你即使當下，你同經紀講，我哋賣電子產品㗎咁樣。但係業主可能有一日會衝上嚟，咁你就知道成件事爆煲㗎嘛。咁所以其實當時候佢，即係如實稟報畀經紀話，我要用嚟做乜嘢嘅時候。其實遇咗好多嘅困難就係業主唔租。咁你哋點樣同經紀講呢件事呢？

Fe：又好有趣嘅，因為我啱啱講啦，我哋有頌缽啦，有塔羅啦，跟住我哋本身亦都有planning to 係搞啲討論會啦，即係一啲談性討論會。咁所以我哋，的而且確我哋同經紀講嘅時候，我哋冇如實地講，我哋要搞一個談性嘅空間。我哋有講話我哋會針對住一啲性或者性別嘅topic去搞啲讀書會呀，討論會呀，咁樣。即係將我哋部分話咗畀業主同埋我哋嘅經紀聽咁樣啦。咁大家都係幾有趣，你話我係咪嘗試同個業主講呢？我係有呀，我嘗試同業主解釋我哋會做啲咩。咁佢就話，係咪真係好似嗰啲搞瑜伽班呀，咁我就好啦，咁你用呢個方式解讀，我都唯有接受啦，咁我就無再試圖再解釋更多啦。

M：好啦，咁你租到個約啦，咁你開始營運啦。咁你營運，頭先你有講話你有頌缽啦，塔羅啦，亦都有談性嘅一些實在空間啦。你喺籌辦呢一段時間嘅活動裏面，有冇遇過啲咩特別嘅時刻？即係例如你所講嘅仇家上門呀，或者可能係遇到一啲好突然期待發生嘅事呢？

Fe：都好有趣嘅，我覺得喺成個籌辦嘅過程入面，我用最多心力嘅就係喺規矩嘅設計入面。咁例如我哋有談性手帶啦，你入門口嘅時候，你已經有揀紅綠燈啦，即係代表出你準備唔準備好去談性呢件事啦。即係我哋會有啲小夥伴，我哋會叫嚟緊有小夥伴，佢會問，咁可唔可以三條都帶呀？好呀，咁三條都帶呀，咁佢會話，因為我哋係可以切換嘅，只不過係我哋都發現，會同我哋講三條都帶嘅小夥伴呢，都係一啲不斷地explore緊世界嘅朋友啦，係有啲特徵喺度嘅。深刻或者有趣嘅呢，係好多都好深刻有趣嘅故仔，因為嚟嘅人好唔同啦，嚟試好多唔同嘅身份呀，界別呀，或者係唔同嘅好多背景喺度啦。我自己覺得有趣嘅係經營Common6嘅過程當中，例如有試過我入咗啲外流嘅group，想同啲外流嘅group嘅人講，不如你哋上嚟同我傾下啦，大佬即係喺網路上面罵戰咗咁耐，不如上嚟傾下啦。咁但係呢發出咗個邀請係唔會出現嘅，係唔會有人出現嘅，我本身以為應該會有個，係冇嘅。跟住有啲咩嘅深刻嘅事實，如果由開幕開始講。我哋開咗業之後，冇耐，我哋有做到一個小更動嘅。我哋IG⋯⋯

M：小更動即係更新？

Fe：更新咗，我哋本身，啱啱講啦，我哋四個店主，其實都係順直女，係唔係，係順女，因為我哋，例如我自己嘅性向係pansexual。我哋有店主喺開咗Common6之後，再探索都意識到自己係一個pansexual。所以呢，其實我哋本身，我哋四個人，你話我哋對唔同嘅性別議題嘅意識係咪真係咁高呢，我會話冇咁高嘅，因為我嘅其他partner都可能因為我而認識性別呢一個議題啦，咁開幕之後呢，我哋有收到一個PM，就問我哋「你呢個係唔係性別友善空間？同志可唔可以上嚟㗎？」咁我就好困惑，就有一個好大疑問，點解呀，你同志你都係人啫，我哋大家都係人，點解要限制自己，因為我哋本身個title係寫歡迎任何人來。

M：係囉！

Fe：我哋寫咗呢句啦，咁我本身覺得其實都夠呀，所有人，你只要係人都可以嚟。咁我就問佢，咁點解呀，點解你會咁問，

M：係囉，點解你會咁問呀？

Fe：咁我哋就問佢，因為後面呢就親身上咗嚟，咁佢就又講，我係嗰個當初PM你哋嘅人，佢係一位memba，呢個故仔都係經過同意，我先會不斷地宣揚，因為我哋有post過喺IG講。佢有曾經去過一啲深水埗嘅cafe，嗰度嘅店主都宣稱自己歡迎所有人嚟談性，但係言談之間呢個店主就話，我真係好憎兩個男人喺街上面攬嚟攬去呀，咁佢就當時覺得好受傷。咁佢就話，所以佢覺得呢一種話就話歡迎但唔知係咪真嘅，咁呢一個嘅故仔呢係為我哋四個店主帶嚟咗好大嘅震撼教育，因為我哋的而且確我哋本身係一個順性別嘅人，我哋本身喺社會上面就有著我哋嘅特權，我哋本身就好難意識到會遇到嘅一啲歧視呀或者傷害，咁我有時就問嗰個小夥伴就話「咁如果我哋可能呢，係咪做多少少，例如加枝彩虹旗係咪令到你就會放心啲呀? 」佢就話係，咁所以我哋後面就做咗一個更動就係。當然，對我哋嚟講所有人就係人，我哋從來都冇改變。做多一步，原來就已經能夠讓人放心嘅時候，咁我哋何不做呢件事呢? 咁所以我哋之後個statement就係彩虹旗。然後就係歡迎任何人嚟探性，不論性別，性向，年齡，身份，宗教。

M：非常想highlight呢一句說話。即係前幾集我哋呢一季有訪問細細老師，咁佢都有提及過，就係一個叫self announcement嘅一個概念。快速recap就係千祈唔好睇小自己講出嚟自己支持同志呢一段說話，就不論可能你擺咗喺你嘅facebook嘅嗰個banner上面，或者可能擺喺你Instagram嘅Bio嗰個自我介紹裡面。雖然可能有啲人會覺得，我冇對同志有啲咩敵對，我冇話唔鍾意同志，我咪又係咁。所以就覺得成件事係好順利成章地，唔需要特別講，亦都唔需要鋪章講，好似真係驚自己可能此地無銀，其實可能有啲人就係期待緊嗰句。期待緊嗰一句，喺你眼中以為係似你無人一句說話，喺佢哋嘅眼中其實係一句支持，係一句肯定自己下一步要做嘅嘢係安全嘅。因為就係頭先Fe嘅嗰個例子就係，其實真係爭枝旗就係爭枝旗，可能就係爭嗰幾句不分性向，不分你有性別氣質咁樣嘅一啲，望一陣好似有啲extra嘅字眼，但係對於一啲小眾嚟講佢就係要咁樣嘅confirmation。點解要咁樣嘅肯定，點解需要咁樣嘅說明，就係因為佢可能其他地方遭受嘅就係一啲明顯直線嘅傷害，直線嘅一啲批評，一啲好難聽嘅說話，驅使佢哋真係每一步要做下一步嘅社交活動，參與一啲新嘅組織嘅時候，佢哋步步為營，佢哋唔肯定我點樣先可以說服到自己去踏進下一步。但係Fe嘅例子，可能Commen6聽到嘅那個memba例子就係，我哋真係做到一步就可以做到ally想做嘅嗰個mode。你令到嗰個人安心去join你嘅party，唔需要諗咁多，即係可能你眼中咪又係人一個，咪又係行出街一個人。但係佢眼中唔係嘅，你眼中以為係人，其實係我眼中唔覺得自己係人，我可能覺得係一個好有condition，我先有資格行入去一個空間嘅人。咁所以一句說話足以證明你點樣支持，而對方性別小眾佢哋會感受到，係真係感受得到嗰個支持。所以唔好吝嗇呢一種嘅字眼，唔好吝嗇呢一種嘅舉動，對於一啲性別小眾嚟講係好重要。

Fe：同意呀，即係你講嗰個都係對我哋一個好大嘅學習，因為我哋都成日都咁諗，亦都係同大家講，既然你覺得所有人都係人，你覺得支持佢哋係OK，或者你唔會歧視佢哋，咁點解唔講出口呢? 

M：非常之同意，所以唔好咁內斂，可以講出嚟，向世界呼喚愛，你向世界講下你自己嘅statement係你支持同志，你支持性/別小眾。或者你唔肯定你自己支持係啱唔啱，你驚自己講錯，咁你咪話我支持嘅，但係有啲乜嘢嘅問題，有啲乜嘢嘅唔識嘅地方，你咪指教我，互相學習嘅啫。我相信好多嘅同志朋友都唔認識異性戀點解咁複雜嘅啦。

Fe：同意呀！

M：因為異性戀實在太複雜嘅。點解咁多啲咁嘅愛恨情仇呢? 呢啲嘢好似唔係喺我生活裡面發生緊㗎喎。無論如何，總之係互相交流啦。總有一啲嘢係我自己嘅生活圈子唔想發生，但係其他朋友裡面係一個文化嚟嘅，或者又可能係佢唔明白點解我會有咁嘅舉動，會有咁嘅默許，咁嘅暗示。但係呢個就係我自己嘅文化。所以係呢個唔同嘅交流當中，係支持與溝通當中我哋慢慢成長。好，嗰啲成長Common6就由實體，最後就2022年就休業啦，轉咗做Discord嘅平台。有咩驅使咗你哋要去轉型做Discord平台? 點解係Discord呢? 首先就係，最後係遇到啲乜嘢嘅timeline，你嘅timeline上面點解會係呢段時間轉做Discord? 

Fe：實際上我哋唔係休咗業先至轉型嘅，係應該話我啱啱一頭講啦，好堅持淨係想做實體空間啦。我本身係無plan過要做虛擬平台嘅，係去到我哋2021年4月開始經營啦，去到7月嘅時候我哋遇到一個黎約小夥伴同我講，喂，不如你哋做Discord啦，做個網上平台啦。黎嘅人都係而家實體黎嘅人係One-off，但係佢哋如果我哋離開咗之後想繼續傾呢？咁我諗，啊，都係喎，真係從來無諗過呢件事。本身無諗過要去做網上平台。咁又咁講啦，咁然後我又見到，咦，小夥伴係好想set up呢一個嘅平台喎。佢願意提供呢一個嘅IT嘅支援，佢想見到呢度有一啲嘅社群可以再對話。咁我哋就覺得，啊，好啊，我哋返去傾下。咁我哋就覺得，其實傾完都係嘅，都同意佢嘅觀察同埋角度。咁就覺得，啊，咁不如開啦。咁樣，咁就係九月份喺呢一個server admin支援體系下，我哋就開咗呢一個Discord啦。咁嗰陣時揀Discord呢，我哋前面都有諗過好多。即係我有陣時都有同好多我哋認識嘅朋友啊顧問啊會員啊，都係用whatsapp tg定係話係咩呢。咁我哋後尾冇揀WhatsApp，就因為電話啦，即係純披露過多嘅資訊啦。咁TG（Telegram）呢，就係成日都可以delete啲message，然後成個group可以冇咗嘅。

M：哦，係！

Fe：對於我哋嚟講就好似好難經營。咁然後最後再考慮到就係其實Discord真係一個好嘅選擇，就係佢一嚟資料可以流傳到，二嚟就係大家都可以喺上面傾。咁再來話就係佢都係一個，唔係完全隱身嘅，即係佢都係可以用佢自己方式去set up個account，然後可以參與當中。咁呢啲又可以保持一定嘅匿名性，但同一時間佢又好似有一啲需要現身嘅部分。咁所以喺平衡咁多之後，咁亦都因為我哋嘅server admin真係好好啦，佢喺IT嘅部分可以幫我哋set up到一個喺虛擬嘅世界入面，佢都需要揀手帶先入到呢個空間嘅setting。咁所以我哋就最終就決定咗係呢個空間啦。

M：nice⋯⋯其實Discord其實幾好用嘅，我哋自己即係PrideLab自己有一個手帶嘅嗰個概念。我諗我有一啲類似嘅，即係喺Discord，PrideLab嘅Discord入面都會放咗好多一啲嗰啲⋯⋯，即係性別氣質嘅一啲label。所以你就可以即係自己介紹咗自己之後，就可以將你嘅profile mark咗喺你嗰個account入面，咁啲人就可以撳落去就知道你係點樣嘅一個人。

Fe：係呀係呀，咁所以我覺得呢個，呢個平台去到我哋休咗業之後，都係持續活躍嘅。

M：ok。

Fe：即係PrideLab嘅朋友，成日都話，哇你哋嗰度好多嘢傾喎。跟住我就，佢哋都話喺Common6入面人哋好似成日都寫長文咁，好認真咁去討論呀，ok。跟住，嗱咁所以其實我哋有收過，突然間返去就係嗰個資格感嘅部分就係，有啲人會因為見到Common6入面嘅小夥伴回應得好認真，就係覺得我係咪唔可以喺度鳩噏㗎。

M：係呀，嘩真係非常同意嘅就係呢，其實好多時候點解我會有Podcast呢一件事呢，因為一個Discord啦。咁當時呢，即係你講資格論呢，就係點解我咁有感覺就係，當時候我有搞過一啲直播嘅聊天室，即係live嘅喺Discord，然後我發現呢，好多時候討論呢，就好似自己，我自己同自己講嘢或者可能我自己搵另外一個人講嘢，但係呢，下面係有一群人聽緊㗎喎，但係佢哋又唔出聲㗎喎。咁你就會有一種感覺就係，嗯如果我哋真係有一條題目我哋覺得係好值得討論亦都好值得留底嘅時候，咁我哋就唔應該停留喺Discord啦，我哋係應該將佢變成一種記錄，咁係俾更加多嘅人嘅聽。咁，即係呢個可能係一種階段上面嘅一個解決方案，因為真係我哋當時嘅反應係好多人都唔會主動去發言啦。咁，我覺得亦都係一個好嘅討論嚟嘅。就係，資格論嘅問題，嗯，可能Fe或者同我或者係頭先嗰位嘅IT小夥伴，佢哋有自己比較多嘅資源可以同你解釋得更加多，但係你自己嘅觀感，自己嘅idea其實係唔好吝嗇。可能你有一啲嘢論點，實際可能係你以為係發生緊你身邊入面非常之平常嘅事，喺我哋眼中係一個非同溫層發生緊嘅事。係呀，所以，唔好吝嗇你作為一個小網民、小夥伴嘅一個觀點，即管喺你嘅Discord裡面放出嚟啦，哈哈哈哈。

Fe：同埋呢個位呢，我覺得好echo嘅係，喺Discord度呢，即係談性呢件事呢，都有好多嘅制肘同埋限制嘅。因為，可能有啲人淨係拋一兩句呢，你真係唔會明佢後面嘅context係啲咩嘅。我好印象深刻呢，喺Common6 Discord入面係有出現過一啲爭議性嘅討論，係會令人哋感到受傷或者擔憂嘅。咁跟住呢，萬幸喺喺Common6入面嘅唔同小夥伴，有啲係會比較ready去fight for一啲嘢或者係發言嘅。咁我哋就會同嗰啲通常都係一啲順直男喺入面發出咗啲奇怪嘅言論，咁我哋就好想回應佢啦。咁跟住呢，有一次都係出現咗咁耐嘅討論之後呢，咁我再係一個細group啲嘅，即係因為呢Common6 Discord係有分到底你係多次到訪定係你淨係嚟過一次，我哋通常都係比有嚟過實體鋪嘅人先可以add in到嘅。咁未來應該會再轉型啦，可能會再開放多啲人入嚟，但係仲就係有探索緊同埋拎緊意見。咁跟住呢，就係一個多次到訪嘅嗰個group入面，我就再問佢哋。其實大家有冇諗過都一齊發言呀，咁就突然好多人都話，我都有諗過發言㗎啦。不過我發現呢，可能係多年嚟嘅文化啦，可能係連登淨係CD-ROM嘅文化呢，佢變咗佢淨係睇，佢唔講，佢唔記得咗原來自己可以發言，可以去回應啦。咁所以呢度都係我話，即係我嗰陣時回應嘅就係，咁其實Common6 Discord就係一個好好嘅練習場地，俾我哋去講返自己想講嘅嘢啦，練習返拎返自己嘅聲音咁樣囉。

M：我覺得呢個就係貫徹咗虛同實嘅Common6就係，你畀一個空間，人哋行入嚟，講佢嘅性別嘅議題。咁嗰個門檻係真係唔高，即係大佬你用一個Discord，你真係download個app，再開個account，咁你就可以入去個channel度。可能即係你話，要要實體去過，你先可以入去。

Fe：而家可能之後又有轉變，有部分都係佢哋喺IG度見到，然後話我嚟唔到呀，但係我真係好想入個Discord度。咁我都會，即係傾完之後都會照樣同意嘅。
咁我覺得係，即係網絡上面傾談性呢件事，有個最大嘅限制就係，我要唔即係要提醒大家就係，你要講多啲關於你自己嘅context。你淨係拋一句出嚟呢，大家係理解唔到嘅，或者會有好多誤解出嚟。但係你花多少少力氣，打多少少字，講返後面發生緊啲咩事，嗰度個理解係會多好多。

M：非常同意呀，其實有啲可能係，點講呢，你遇到嘅一啲好易，即係好有情緒嘅說話，大家其實可能會想同你分擔，但係，真係要講多啲。如果唔係真係大家睇唔明，嗰個劇情發生緊啲咩事呢，會有種loss嘅感覺。

Fe：係呀，而呢個就係實體出現嘅時候，其實未必會有咁大嘅問題，因為你實體你見到嗰個人嘅情緒，見到佢起伏，見到佢發生緊啲咩事。但係文字，即係Discord上面就只有文字呢件事，就冇太多語氣可以補充。

M：明白啲，嗯，深有同感。好啦！咁我哋講咗真係，虛實嘅Discord，都講到Fe呀。目前嚟講，我知道呢就係，Fe會繼續喺Common6，而Common6呢，係會有一個小轉變嘅。咁可唔可以講多啲關於呢個轉變呢，嗯，有廣告時間。

Fe：哈哈哈哈，我哋經歷咗第一年嘅探索啦。我哋都發現呀其實，實體嘅空間，佢固然有佢存在嘅價值，但係呢個空間點樣利用呢，係由我哋決定嘅。因為我哋發現呀原來，如果我哋問大家，你有啲咩想做呀？對於香港嘅性教育或者性解放，有啲咩諗法有冇嘢想做呀？其實係未必有太多人回應到你嘅，

M：嗯嗯嗯⋯⋯

Fe：係講緊係我自己想做啲咩，可能係更為重要。咁所以呢我哋planning係，可能嚟緊嘅九月，我哋會開始有一個小小嘅轉型啦。到底仲叫唔叫Common6，我哋未知，但係一定會帶住呢啲經驗去做。咁我哋嘅想像可能會，繼續做我哋講到嘅性教育或者性解放嘅推廣啦，但係都可能有啲深度嘅小組，包括可能有啲唔同嘅支援，或者係裝備小組。咁呢個係我已經註解我自己想做嘅事情，想建立返大家對於自己嘅一啲深入嘅認識啦，對於自己嘅探索啦，點樣樣去裝備好自己，去同世界或者同權力對話。咁所以就，而家講好似好闊，好似乜都唔係好知，咁但係因為我哋而家喺而家呢一刻我哋仲係探索當中。但我哋只能夠講係，我哋想再出發。我近排同啲朋友傾，佢哋就話，我哋其實呢Common6好似係，第一年呢係讀大學嘅第一年，咩都唔知，咩都試，咩都探索。咁到第二年啦，開始諗到多少到自己嘅方向，開始揀自己想讀嘅科。呢個就係我哋慢慢嘅轉變。咁我哋希望嚟緊，可能繼續讀我哋嘅大學。咁我哋行，唔知係行一年，定係會行多三年，但係呢度係充滿住彈性同可能性。

M：非常之期待呢個Common6嚟緊呢段時間嘅新轉變，即係不論佢會成，佢同呢個大學嘅一年班比喻做呢個fresh grad都好，呢段時間大家都有一個唔同嘅碰撞，從呢個吸收新知識，從呢個唔同嘅嘗試失敗當中，慢慢去再轉型。一開頭Fe有講過一啲關於私隱嘅部分，其實今集未必會完全cover得曬，但係亦都期待住隨住Common6嘅轉型，亦都可以邀請到，或者係Fe會再更加多關於呢啲嘅議題，特別係呢段時間，2023年嘅6月，香港同台灣都講呢啲。關於MeToo嘅一啲事情，我相信其實MeToo嘅事情係一路都發生緊，只不過可能係有人帶起咗一個頭，帶起咗個火頭，咁就衍生到更加多人發現咗呢個時間可能係一個契機，令到佢哋將自己嘅故事講出嚟。唔係特別要講MeToo，只不過係講緊話，談性而係講自己嘅一個空間係需要存在嘅。而一個好似Common6咁樣嘅，一個尊重安全嘅一個空間係重要，有佢嘅存在價值嘅。非常感謝Fe，以Fe自己嘅身份，同埋Common6嘅創辦成員身份去參與我今次嘅訪問。咁有更加多嘅資訊，請你follow Common6。咁我亦都會放佢哋嘅social media嘅一啲嘅平台，有link放喺我哋嘅description入面。

Fe：好，多謝馬天娜，亦都覺得係好開心，因為同每一個人分享嘅時候，都係回顧返自己做過嘅事情，嚟緊可以做啲咩。我自己喺呢一段嘅時間入面覺得我又認識咗，更加多關於性別呢個議題。不論係跨性別，或者係其他嘅唔同嘅性小眾。喺Common6嘅，每一個月嘅唔同主題入面，我哋遇到好多唔同嘅人，包括可能係，我哋有同半無性戀嘅朋友傾過計。喺嗰場嘅對話入面，發現我同另外一個店主，先至係嗰場嘅性小眾，因為我哋係有性戀，而其他人係半無性戀。咁亦都有同個細細老師傾，亦都有同好多唔同嘅parties去傾過。每一個人嘅分享都好緊要。我哋突然之間想起，我哋其實嚟緊，有一個我哋已經firm咗嘅轉變，就係我哋希望邀請更加多嘅人成為真人圖書，可以喺一個安全嘅空間入面，分享自己嘅故仔。咁嚟緊有機會嘅大家都可以，睇到Comment6嘅IG。我哋都會陸續發佈呢啲嘅資訊，因為我哋喺休業之前，曾經做過呢件事。嗰陣時五本嘅真人圖書，都為佢哋自己同埋嚟嘅人，帶嚟咗好多嘅新嘅角度。咁所以我哋好希望，每一個人嘅經驗，如果你已經準備好，你ready去被看見，咁就邀請你嚟到呢個空間度，讓大家一齊閱讀你呢本嘅圖書。好呀，非常之期待有呢個圖書。聽到呢個節目嘅你，如果你覺得ready嘅話，就去呢個Comment6嘅圖書觀賞我哋圖書嘅一員。

M：好。咁我每一集我都會有一個例牌自己嘅一個收結嘅。咁我呢度就係，一如既往地都係真人錄俾你聽嘅一個收結嚟嘅。點知港同志係一個香港同志角度出發嘅podcast，希望可以將大家生活裏面嘅性別，同埋同志議題，用廣東話嘅聲音同文字嘅方式保留同流傳嘅。每一集podcast我哋會製造文字檔，咁就專屬網頁應該會有㗎喇，我哋要放上去㗎喇。咁就大家可以繼續留意翻嘅。咁多謝收聽呢個節目，而且聽到呢度最後，想收到下一集嘅內容，就訂閱我哋。如果你對於Comment6呢個討論，賣相啦，Patreon啦， Onlyfans有共鳴嘅話，都可以DM我哋@Pridelabhk，亦都歡迎你去聯絡Comment6。歡迎你喺Apple Podcast或者其他podcast平台上面留言，同埋畀回饋嘅。你嘅支持同埋鼓勵係我哋默默加盟嘅動力。今次感謝Fe嚟到呢度，今集亦都講到呢度。期待下次同你點知港同志。Fe同我哋同我哋聽眾講拜拜。
Fe：拜拜。