歡迎返到嚟《點止講同志》，我係主持馬天娜。 

呢一集會講啲關於我哋經常，或者時不時喺一啲社會評論呀，或者講性/別議裡面長出現，但係又未必會每一個人好清楚佢係乜嘢意思嘅關鍵字。因為呢啲字往往同爭議、同溫層，甚至係進步主義，當代社會我哋點睇「小眾」、「尊重小眾」嘅文化同埋想法有關。所以今集嘅定調就會同「跳出同溫層」作為引旨去講關鍵字。 

唔知大家聽到某某明星出軌嘅新聞會咩反應呢？係出軌，唔係出櫃。呢啲新聞通常  主角都係一個結咗婚嘅男士，瞞住老婆，甚至可能係瞞埋觀眾同支持者。舉個例 ，講遠古少少就有「安心事件」嗰兩位主角，當時許志安同黃心穎因為一條的士車cam片曝光而發現男方出軌。當時因為全香港都知道男主角已婚，所以攻擊目標就去咗事件嘅女主角黃小姐度。不但被大眾封殺，甚至佢公司TVB都即刻收返埋佢主演嘅電視劇。事件就算去到今時今日2023年，黃心穎喺YouTube出首新歌都仍然俾人攻擊緊。近返少少嘅例子就有好青年荼毒室嘅鹽叔。（好青年荼毒室以講哲學或者評論時事同哲學起家嘅組織）鹽叔就向所有人隱瞞佢自己已婚嘅狀態，同多位女性支持者出軌。最後喺輿論同網民嘅壓力下，鹽叔退出咗好青年荼毒室，聲稱要承擔返自己「做錯事嘅後果」。

雖然依家活喺資訊爆炸嘅年代，但係呢類同道德、兩性、性別嘅關係有  關嘅事件，好似好難喺大家心目中被遺忘，更加容易嘅係，會連帶埋當事人嘅作品一齊去批判。其實呢類事件喺學術上都有概念字眼，頭先我所講嘅「關鍵字」去形容。今日就由我帶住大家，複習呢啲性/別101嘅概念字眼啦。

以下我會介紹三個喺外國性別討論入面比較流行，但目前好似喺香港比較少用呢啲字眼去討論。大家可以去學習一下，時不時大家睇文章嘅時候都會見到。第一個字眼就叫「取消文化」，英文叫Cancel culture，Cancel即係「取消」嘅意思。第二就喺「覺醒文化」，初時左翼係翻譯為woke，W-O-K-E，後來被轉化成wokenism，或者wokeism，有啲人會將呢個字眼嚟嘲諷左翼政治正確，矯枉過正嘅狀態。而第三個字眼會比較多人聽過，就係叫TERF，TERF係四個英文字母：Trans-exclusionary radical feminist嘅簡寫，翻譯係「排斥跨性別的激進女性主義者」。 

講返 cancel culture 先。呢個topic前排喺歐洲、台灣都好流行，原因係有一套電影TAR上映，佢成個內容其實就係圍繞住cancel文化啦。咁簡單嚟講，cancel文化係一種社群抵制行為；喺依家網絡主導年代，當發現某人嘅言論或行為唔符合自己／現時喺道德高地嘅政治道德觀，每個個體都可以透過網上討論形成對該人現實生活嘅施壓，進而實際地直接或間接去抵制嗰個人連帶嘅作品或事物。例如直接地去抵制佢過往嘅作品、抵制佢有份出現嘅活動、或者間接地去抵制佢代言嘅商品，最終令到嗰個人連帶佢嘅作品都一齊被Cancel，輕則就要消失一段時間，重則就失去工作地位，然後宣告社會性死亡。

套返入開場講到嘅兩個例子，其實都係cancel文化嘅體現。黃心穎嘅話，下至大眾社群，上至佢公司，大家都唔理作品嘅質素同內容，直接將有女主角嘅作品cancel哂。你試諗下，有份攻擊佢出新歌嘅人，唔知有幾多係聽過首歌㗎呢？另外鹽叔嗰邊亦都一樣，未出事之前，唔少人都追捧好青年荼毒室嘅節目、書同作品。但出咗事之後，我地好似淨係見到佢嘅出軌同埋感情生活，連帶之前喺連登都有post問咗句：今時今日仲有冇人敢着好青年荼毒室嘅tee出街呢？呢啲例子都係cancel文化嘅一部分。因為某人嘅感情關係同現時道德高地嘅一對一關係不相符，所以就透過輿論同抵制去令某人社會性死亡。 

見到呢個現象，有性／別團體係樂見嘅。喺英文世界，有人會用比較中性嘅字眼「進步主義」（progressivism）去描述依家越來越多人，甚至係大企業品牌會表達關心社會公義嘅問題。另一個比較負面嘅描述，就係「覺醒主義」（wokeism）。呢個字源起係來自於1920年代美國非洲籍社運人士用 wake up 「醒來」提倡美國嘅非白人族裔民族可以關心多啲種族不平等嘅言論同日常情形。及後，仲引伸埋去推動環保、性／別、性小眾等嘅運動。可是，後來呢個字就俾右翼保守主義者改成wokeism，諷刺一班人喺未完全明白或者諗清楚事件發生乜事；只係社會有呢個趨勢，就盲目跟從嘅情況。就好似之前Johnny Depp同佢前妻Amber Heard一連串嘅官司，一開始焦點放咗喺Johnny Depp疑似對Amber家暴。Amber仲識利用自己女性主義者身分寫咗一連串文宣，以致當事件爆出嘅時候，自以為覺醒嘅群眾都一面倒支持女方。下至觀眾，上至電影公司，抽起哂所有Johnny Depp嘅電影拍攝，一心將Johnny Depp cancel。但官司打落去之後，大家先開始發現跟車太貼。於是個反噬同樣激烈，依家就將Amber完全cancel。

喺呢度同大家介紹多一個外國好出名嘅例子。今次被cancel嘅對象就係哈利波特嘅作者JK羅琳啦。雖然喺佢筆下，有鄧不利多呢個出咗名係男同志嘅角色，而佢之前亦多次發表支持同志平權嘅言論，但喺2019年尾，佢為咗支持一名因為發表歧視跨性別社群嘅言論而被解僱嘅女士，喺twitter上發佈咗以生理性別為主調嘅言論，表示「跨女不係真正嘅女性」、「只有有月經嘅人可以參與女性運動」。呢種思潮就係今日要介紹嘅第三個概念TERF啦；泛指一啲排斥跨性別社群嘅女性主義者或者女同志；只認同原生性別係女性嘅人先可以為女性爭取權益。佢地嘅出發點可能係希望維護「女性」呢個喺父權社會下都依舊係弱勢嘅團體，但細心諗下，如果只有有月經的人可以參與女性運動，咁當某啲人因病而切咗子宮，或者一個已停經嘅原生性別女性，係咪已經唔再係真正女性，就唔可以參與女性運動呢？咁樣係咪同時排擠咗女性之中嘅小眾？

2019年一名研究人員反對英國政府修法《性別認同法》，反對跨性別憑自我認同更改證件上性別。羅琳支持佢嘅觀點，並強調生理性別（Sex is real）。2020年羅琳發tweet嘲諷「有月經的人」喺多餘無謂嘅稱呼，間接表達女性=有月經嘅論點。

當時網民提出咗嗰新hashtag：#ripjkrowling，表達羅琳因為自己嘅排跨言論已經斷送自己事業，連帶之後上映嘅《怪獸與牠們的產地》系列電影都被抵制；時至2023年，仍有社群因此呼籲杯葛新推出嘅《霍格華茲的傳承》遊戲。

。So I want trans women to be safe. At the same time, I do not want to make natal girls and women less safe. When you throw open the doors of bathrooms and changing rooms to any man who believes or feels he’s a woman – and, as I’ve said, gender confirmation certificates may now be granted without any need for surgery or hormones – then you open the door to any and all men who wish to come inside. That is the simple truth.

言論一出，當時喺twitter就出咗個新hashtag風潮：#RIPJKRowling。連帶嗰排準備上映嘅哈利波特另一系列怪獸與他們的產地都被抵制。有網民直接講：你支持哈利波特即係支持JK羅琳！去到依家2023年，哈利波特推出新遊戲嘅時候，網民又再次記返起JK羅琳同佢TERF嘅標記。於是，網絡上支持跨性別嘅社群又開始發起杯葛JK羅琳呢個遊戲嘅行動。可見，cancel文化強勁嘅地方，就係在於只要有一個人仲記得，抵制就可以不停延續，唔知幾時同點樣先可以完結件事。其實呢幾個例子入面，你都可以見到社會上係多咗人開始覺醒，知道性別認同係應該同生理性別分開嚟睇。但另一邊意見嘅人就覺得，不論係覺醒文化還是Cancel文化，背後其實係衍生緊一個更令人擔心嘅現象：我地係咪共同創造緊一個只有政治正確嘅世界呢？係咪唔再容許有「政治正確」以外嘅聲音呢？

今次想透過分享我哋對呢三個字眼嘅理解，將目前性/別社群同社會之間其中一個張力紀錄落嚟。尤其大家要知道，一啲恐同嘅人或組織，最鍾意就係話自己係Cancel文化嘅受害者，話自己因為「個人立場」無啦啦就被杯葛。甚至為咗轉移視線，為自己創作一堆新嘅定位，例如反同志就變咗撐後同，宗教團體就變咗同行者咁。呢個部分我地都應該要多啲去認清，先可以繼續推動同志平權運動。

但另一方面，我地有意識之後嘅行動，不論係力度去到邊，甚至係幾時停，都應該係有一個清晰嘅原則。唔好忘記，推動同志平權運動嘅終極目標都係平權。一方面，我地自己都要思考到底「左膠」同倡議之間點樣取得一個平衡；但另一方面，我地都係要容許一個原本冇性／別意識嘅人改變。就好似以前環保運動，當某啲人唔再亂咁發展土地，環保團體都係會欣然接受。同樣地，如果一個因為恐同而被cancel嘅對象有日覺醒嘅話，我地又能唔能夠大方接受佢嘅加入呢？希望透過今集內容，喺香港嘅性／別議題上有埋你地嘅聲音一齊討論。

《點止港同志》喺一個以香港同志角度出發嘅Podcast，希望可以將大家生活裡面嘅性/別同同志議題用廣東話聲音同文字方式保留同流傳。每一集嘅Podcast我哋都可以製作文字檔，陸續會放上專屬網頁，敬請留意！

多謝你收聽呢個節目，而且聽到最後。想收到下一集嘅內容，就訂閱我哋啦。假如你對呢個主題有共鳴，想分享你嘅故事畀我哋知，歡迎你dm我哋@Pridelabhk。亦都歡迎你喺Apple Podcast留言同埋畀星星回饋，你嘅支持同鼓勵會係我哋默默耕耘嘅動力。

今集就講到呢度先，期待下次同你《點止港同志》。