簡簡單單記錄下一個好多人想知嘅問題：香港要點先可以有性傾向歧視立法，
同埋記錄吓同志題材舞台劇

大家好，歡迎返到嚟《點止講同志》。 

今日要同大家講嘅係性傾向歧視條例懶人包。

知道我哋嘅聽眾背景都好唔同，或者一開始同大家補少少歷史先。其實香港回歸前，因為當時嘅立法局議員仍然有提出私人草案嘅權力，所以分別喺94年同96年，由時任立法局議員胡紅玉同劉千石提出私人草案，並就訂立性傾向歧視條例進行辯論同投票。可惜，兩次草案都差少少而不獲通過。97之後，政府都聲稱自己做咗好多研究，就話社會各界仍然有好多矛盾，所以擱置立法。

直到2012年，時任立法會議員何秀蘭提出動議，希望為性傾向歧視條例進行公眾諮詢，只係諮詢，都喺分組點票嘅時候被否決。反而喺13年。因為社會聲音越嚟越強烈，於是政制及內地事務局（即係CMAB）牽頭成立「消除歧視性小眾諮詢小組」，成員包括學者（例如成日都聽到性文化學會嘅關啟文教授、又或者「小曹」曹文傑博士）、商界人士、性小眾（包括香港女同盟會、香港彩虹、跨性別資源中心等代表）及當時嘅立法會議員（例如又係成日都聽到大名嘅梁美芬博士、慢必陳志全都喺度）。嗰陣時CMAB仲提到，呢個諮詢小組會「特別關注性小眾在香港受歧視的範疇及嚴重性，以及消除這些歧視的策略及措施，以期望在社會上建立多元、包容及互相尊重的文化」。喺2015年嘅時候，呢個工作小組就出咗一份報告，內容提到小組委員意見都好分歧，所以唔應該直接立法。反建議政府制訂自願性質嘅不歧視性小眾約章。

直到今日，法例上甚至只係公眾諮詢都好似冇點進步過，但平機會都不時有上立法會報告工作進度。例如啱啱過去喺2023年3月20日嘅會上，立法會議員葉劉淑儀主動提及上年有2名中學生疑因同性傾向遭歧視而輕生嘅事件，並促請平機會應向政府提交有關性小眾歧視嘅報告。同時，另一位老是常出現嘅名字，Podcast 第一集就開始提到佢嘅名，立法會議員何君堯就繼續守護一夫一妻嘅制度，仲引用埋內地《國家安全法》第23條，話要防範不良意識，「要保障自己社會價值觀」咁話喎。

而我地PrideLab作為一個性／別組織，除咗做公眾教育，其實都有努力向唔同部門爭取平權。今日就等我地分享下，有關性傾向及性別認同歧視條例嘅update啦。

大家可能都知道，現時香港係有四條反歧視條例，分別係「性別歧視條例」、「種族歧視條例」、「殘疾歧視條例」，同埋「家庭崗位歧視條例」。當中，平等機會委員會，即係我哋俗稱嘅「平機會」，就係負責執行以上四條法例嘅法定機構。佢係根據《性別歧視條例》，即《基本法》第 480 章第63條當中，賦予咗執行呢四條法例嘅權力。除咗調查並跟進疑似歧視個案之外，平機會亦有責任去透過教育、研究、倡議等形式去消除歧視，達至平等機會嘅社會。

嚟到呢度大家就會諗，到底國際間係基於乜嘢準則去訂立歧視條例呢？根據英國Equality and Human Rights Commission嘅定義，只要有任何人係因為其受保護特質 (Protected characteristics) 而被歧視的話，就係違法。佢定義咗九種受保護特質，包括我地都好熟悉嘅殘疾、原生性別、種族、家庭崗位包括婚姻及民事結合狀況，同埋懷孕及生育之外，性傾向 (sexual orientation) 同埋性別重置 (gender reassignment) (而唔係用性別肯定 gender affirmation) 都包括喺呢九種特質之內。換句話講，其實除咗LGB嘅性傾向需要受到法例保障之外，其實T嘅權益都應該囊括埋喺反歧視條例之中，而唔係再局限出於原生性別。

咁我地睇返現時香港就呢條性傾向歧視條例嘅進程，其實就係冇乜進程。我地PrideLab作為性／別團體，都不斷邀請平機會一齊開會，而有幸地近幾年得到主席親身見我哋嘅情況。若果你問，立法進程係冇完全零進展呢？我哋都好肯定可以答大家「唔係。」但如果你預期可以短時間見到從法律層面可以保障性／別小眾不受歧視呢？我哋都好坦白地將個結論放喺最前面：唔樂觀。原因我地後面慢慢再講。

1. 立法最終都係要爭取立法會支持。

大家唔好忘記，平機會只係一個法定構構，而立法係要交返俾立法機關。放落香港性傾向歧視條例立法，就算平機會願意去以修改《性別歧視條例》嘅方式，加入「性傾向」、「性別認同」及「性別特質」作為受保護特質，係咪就代表成功在望呢？我地依家係唔樂觀。正如我地再三提到，平機會都係能夠提出建議，最後審議嘅人仍然係一眾尊貴嘅立法會議員。尤其是現時立法會入面都有好多例如家長代表、宗教代表，佢地以前對性／別小眾嘅言論係大家有目共睹。所以你話，見到平機會記得性／別小眾權益我地係會開心，但現階段絕對未到要開香檳普世歡騰。與其散播更多假希望，或者唔係假，係未見到時間表嘅進步，我地相信腳踏實地一齊繼續努力爭取更加務實。

同埋，就算我地喺平行時空，立法會全數支持都好，都絕對唔係一日半日就可以成功修訂。實際例子係喺2015年嘅時候，當時有一項完全冇爭議嘅條例修訂，將餵哺母乳的騷擾加入《性別歧視條例》入面，最後都歷時咗5年先正式加入法例。當中政府草擬法例嘅程序好繁複，要由相關行政機關寫個委託書詳細列明呢條法例喺政策上要達到乜嘢目標，再要等立法次序編排委員會排期，到期先正式開始草擬新法工作，中間仲要有個法律草擬專員修改、俾意見等等，成個過程講緊以年計。所以今日我地見到平機會少少正面消息，都應該抱有合理期望同埋懷疑先。

2. 拉返個話題返黎，就係平機會角色限制問題。

雖然平機會喺歧視條例上有絕對嘅調查權力，但調轉嚟諗，佢嘅權力就只限於呢四條條例。根據2022年聯合國審議香港第四次定期報告嘅結論性意見，佢地提到「應加強（香港）平機會的能力和效力，使其能夠勝任處理任務」。當中聯合國睇得好重要嘅一環，就係佢能唔能夠就香港人權事務，提出修訂或新增法例嘅權力。而好明顯地，我地都再三提到，平機會權力只係限制喺現時四條反歧視法例，因此，佢地主要嘅執法、教育及推廣工作都淨係能圍繞呢四條法例進行。換句話講，因為性傾向係呢四條法例以外嘅受保護特質，平機會事實上係唔能夠就性傾向或性別認同方面去做任何立法倡議工作。同時，平機會亦都唔係上述提到嘅立法機關或委員會，所以佢地亦都好難就立新法去提出任何建議。

咁你會問：咁平機會到底可以做啲咩呢？我地又係要返去個嗰四條法例嘅框架入面。事實上，現行平機會權力來源嘅四條法例，佢地就有位去提出修訂或者建議。邏輯就好似平機會執行現有歧視法嘅時候，隨住時代推演，遇到好多新形式嘅歧視，例如啱啱講到有關餵哺母乳嘅性騷擾，咁佢地就可以建議政府將呢項特質包埋入性別歧視條例入面，等佢地處理投訴嘅時候可以有法可依。同樣道理，正如我地知道，亦都見有其他組織公開提到，平機會希望喺現行性別歧視條例入面增加有關性傾向及性別身份修訂，以保障性／別小眾免受歧視，我地都非常歡迎。但講到尾平機會都只係建議，實際問題都係會返去第一個論點度，就係立法需要立法會支持。

3. 咁講到底，係咪冇可能有一條獨立嘅性傾向及性別身份歧視條例呢？

綜合以上兩點，我地已經可以知道，作為平機會呢個法定機構，自己由零開始提出係唔可行。雖然呢個部分，喺一開始提過嘅立法會報告會議入面，葉劉都有批評到平機會對條例同權限要求嘅理解「非常狹窄」，佢覺得平機會可以就性小眾做更多事情。

但係，平機會以外，又唔代表香港唔能夠新增任何歧視條例！其實睇返依家四條歧視條例，佢地立法時間都不一，但一樣可以喺條文入面加返平機會作為佢地嘅法定機構。所以，唔係唔可以設立新法例，只係提出嘅人唔係平機會，而係政府行政機關咁啦。

例如喺2006年先新增嘅種族歧視條例，就係由當時政制及內地事務局（簡稱CMAB）轄下嘅委員會提交上立法會審批，最後完成立法。如果就性傾向歧視條例立法都有類似嘅委員會草擬法案，再遞上立法會審批的話，原則上係可以有第五條歧視條例嘅。而呢個亦都係從1994年已經開始爭取嘅目標，亦都係國際人權事務上嘅慣常做法。

所以講到尾，我地都好開心見到平機會努力地喺佢地職權範圍內，就性小眾免被歧視呢個題目展開工作，但呢度嘅進步唔代表我地已經成功爭取。就正如2013年嘅時候，我地都以為CMAB帶頭成立嘅工作小組最後會帶領我地進行性傾向歧視條例立法，最後都只係叫政府制訂自願性質嘅不歧視性小眾約章。我地作為性／別小眾組織，除咗希望成為社群嘅同行者，都希望背負返自己嘅社會責任。散發咗假希望俾社群的話，可能只會令大家希望越大，失望越大。

原廠設定

由香港小童群益會賽馬會南葵涌青少年綜合服務中心主辦，愛自由計劃製作，無限光譜計劃2022-2023舞台劇《原廠設定》於3月11至12日，喺荃灣大會堂文娛廳表演。今年原來係佢地計劃嘅第15個年頭，加埋上幾年受疫情情影響，未能夠實體喺劇場入面同觀眾互動，所以今年對佢地嚟講都係意義重大嘅一年。

佢地今年就選擇咗拗直治療呢個題材，故事講述阿健同阿樂係一對男同志，因為社會壓力而選擇結束自己嘅生命，當中阿健幸運被救回，卻失去咗過去鍾意男仔嘅呢段記憶。雖然唔記得，但身體卻很誠實。即使身邊一直有位鍾意佢嘅女性Summer,，但阿健始終都未能夠踏出一步同佢開展親密關係。喺母親同Summer都極力隱瞞阿健男同志身份之際，佢自己都為咗身邊人嘅開心主動尋求拗直治療嘅幫助。接受「教主」嘅「治療」之後，阿健雖然好似接受到Summer嘅愛同佢有更多親密接觸，但見證住阿健內心不安嘅Summer最後卻選擇離開，寄語阿健好好面對自己。

以一個業餘劇團嚟講，今次嘅演出算係有相當高嘅質素。不論係幾位主角，還是「教主」、信徒等都做好出色。

內容上面都好值得我地反思。

第一，到底點解會有拗直治療。好記得教主喺最後一幕話：「其實點解我會存在，係因為你地嘅歧視同偏見先令我存在」。

第二，屋企人壓力。研究報告：性小眾自己出櫃要時間接受，唔可以要求屋企人就要即刻接受。當佢自己消化到、接受自己仔女性傾向之後，仲要面對社會目光嘅壓力。有人話呢個係一個無止境嘅出櫃。其實屋企人都一樣。

第三，因為呢個project係一個面向大眾嘅計劃，見到會有好多唔同階層、年齡、性別嘅人都會入嚟劇場睇。有叔叔可能睇得唔明，開始無幾耐就訓咗。但都見有啲街坊，可能一開始都對性小眾冇乜概念或者意識，但睇完個劇可能帶到少少嘢走。

當然都會有進步嘅空間。可能受時間所限，其實每個部分都只可以觸及少少。尤其係重點拗直治療嘅部分，「教主」會要信徒懺悔自己對同性嘅慾望，要信徒唸住一句冇人聽得明嘅信條，但現實嘅拗直治療比起呢度呈現嘅更唔人道。甚至，劇入面嘅教主你一眼就會睇得出佢唔係好人，但現實嘅拗直治療係更subtle。你以為佢係一個同性小眾同行嘅機構咩？原來佢內在用同行者嘅身份，以宗教同陪伴者角色包裝，等你更加難察覺佢地暗地其實係做緊拗直工作。係呀，可能已經唔再係治療，而更多係洗腦、心理同朋輩壓力、甚至係孤立你同社會其他群體嘅來往。

另外，去到中後段筆者都差少少以為男主角拗直成功，可以同Summer建立性同情感關係。甚至最後一幕當Summer離開之後，阿健起身直情好似失戀咁。但現實係，有更多接受過拗直治療嘅性小眾係面對之後更大嘅心理創傷。「唔少性小眾都係因為社會壓力/宗教論述走去做拗直，然後失敗之後自責之類，於是走咗入個loop度，好多都試拗直多過一次。直至佢地身邊有d信任嘅人提出另一套宗教論述 e.g.基督徒gay都得㗎，咁佢先開始會走到出loop」

最後，多謝無限光譜計劃願意堅持咁多年。要知道CMAB雖然有呢個資助，但其實數目好少，仲要同唔同牛鬼蛇神嘅機構競爭。多謝你地繼續創作，令呢啲正面、正確嘅訊息可以傳遞至社區更多嘅大眾之間。共勉之。

《點止港同志》喺一個以香港同志角度出發嘅Podcast，希望可以將大家生活裡面嘅性/別同同志議題同廣東話聲音同文字方式保留同流傳。每一集嘅Podcast我哋都可以製作文字檔，陸續會放上專屬網頁，敬請留意！

多謝你收聽呢個節目，而且聽到最後。想收到下一集嘅內容，就訂閱我哋啦。假如你對呢個主題有共鳴，想分享你嘅故事畀我哋知，歡迎你dm我哋@Pridelabhk。亦都歡迎你喺Apple Podcast留言同埋畀星星回饋，你嘅支持同鼓勵會係我哋默默耕耘嘅動力。

今集就講到呢度先，期待下次同你《點止港同志》。