2023年1月台灣正式大部分通過跨國同婚，即刻搵黎另外一對台港couple黎分享喜悅！ 嘉賓除咗會分享收到新聞時嘅感受， 仲會講吓作為跨國同婚嘅倡議者，對於政策&婚姻嘅想法。
Ref：
嘉賓嘅Podcast 《離教/會者》
伴侶盟 – 跨國同婚Q&A
【專訪自己人】台港可以跨國同婚！
M：馬天娜
米：阿米
M：歡迎返嚟《點止港同志》，我係主持馬天娜。第三季就終於返嚟啦！作為第三季嘅第一集呢，你而家聽呢個節目嘅背景呢，係好明顯有個回音嘅。好明顯，我就喺另外一個地方錄呢一個節目啦。今集呢，就係承第二季嘅其中一集，講跨國同婚啦。就將一個最新鮮滾熱辣嘅資訊呢，就分享畀大家。前幾排呢，就喺 PrideLab 嘅 Instagram，遇到有一位 Follower 就同我哋分享話，原來佢都係台港嘅 Couple 嚟嘅，噉就啱晒嘞！因為呢，我就因為仲未搞掂啲文件嘅部分，所以我未咁快可以同到我嘅台籍 Partner 結婚啦。噉所以就捉住呢一位朋友，啱啱喺正呢一個禮拜頭結完婚呢，就咁啱得咁蹺就遇到可以真人對話噉樣。噉嚟介紹下我對面嘅朋友先。
米：Hello，大家好呀，我叫阿米呀。
M：阿米，你好呀。噉今集呢，嗱我笠定個頭盔先啦，因為呢，我哋係特登 Book 咗個地方嘅，噉但係場地所限同埋呢個器材所限呢，聲音上面呢，係會有少少唔同嘅，噉各位有啲見諒啦。噉但係最主要嚟講呢，今集真係好開心地可以同到大家分享呢啲最新嘅資訊，因為呢，一開始我哋未開咪之前已經聽阿米講，就係好多人問一啲好接近嘅問題嘞，噉如果你又係台港嘅 Couple，而你又真係諗住要去結婚啦，噉千祈唔好 Miss 呢一集，正式開波。首先一開始問返啲互相認識嘅問題啦，噉其實呢，我自己就唔熟阿米嘅，阿米都係近排喺呢兩個禮拜裏面我哋 Message，跟住就即刻約出嚟錄呢個 Podcast 嘅啫。所以我同大家一樣都唔係好認識佢，所以就一開始問下啦，你同你嘅 Partner 係點樣認識嘅呢？
米：我同我 Partner 呢，其實都係網上認識，不過就唔係而家啲交友App，就係以前嗰啲論壇嘅聊天室噉樣囉。
M：我有印象啦，我 Partner 有講過嘅，有一啲女同志嘅聊天室係嗰啲呢，即係好舊好舊嗰種已經唔係好似高登連登嗰一類，係真係打一串字，然後撳 Enter，然後彈上去，然後就係類似 「A 跟 B 說乜乜乜乜乜……」，係咪嗰一種呢？
米：係冇錯，就係嗰一隻嘞，就係嗰一隻可以有一個世界 Mode 噉樣去講嘢啦，又或者係私底下同對方傾計嗰一隻囉。
M：好。噉你哋就傾落傾落，然後就由世界 Mode 變咗做私聊 Mode，跟住就約出嚟噉樣？
米：係啦，就係噉樣。我哋就基本上嗰段時間就一齊咗噉樣囉。
M：Ok，噉你之前同我講話你而家就住喺高雄啦，噉你嗰陣時我相信你人係喺香港定係喺台灣呀？
米：當初係喺香港先嘅，噉後尾呢，就為咗同佢一齊，噉我就飛咗過嚟。一開始我哋係住咗喺台南一年啦，跟住之後就搬咗去高雄噉樣囉。
M：Ok，噉所以而家你哋兩個就住喺高雄嘞。噉，跨國同婚之前，同你哋識咗之後呢一段時間，你哋係點樣 Stay……即係，你係點樣 Stay 喺台灣嘅呢？
米：我基本上係同好多，即係我認識到嘅台港 Couples 係一樣，噉就用一個旅遊簽嘅方式入嚟。噉，香港方就用旅遊簽噉樣 Keep 住，可能就係半年一次噉樣就留喺呢個台灣啦。跟住之後就會再飛出去再飛返入嚟噉樣囉。
M：噉你飛一轉返嚟台灣，然後你可以 Stay 幾耐，然後就要飛走呢？
米：我會Stay大概半年囉，即係佢係三個月啦，噉就延簽三個月噉樣，跟住就要必須出境，跟住再飛返入嚟嘞。
M：所以，你就係即係好似彈出彈入式噉樣，你即係程序上面就要飛入嚟，然後半年，然後再飛出去再飛返入嚟，如此類推噉樣。噉你呢種跳嚟跳去嘅方式，你持續咗幾耐？
米：我應該係持續咗十幾年嘞，十一、二年有喎。
M：係一個非常之……係一種流動式嘅遠距離，我覺得係好 Challenging 嘅。我自己未經歷過啦，因為我識我而家嘅 Partner 係因為我讀完書，然後喺度做嘢，全程都喺台灣嘅情況之下認識佢嘅，所以，我就冇經歷過呢一種行政上面、程序上面需要彈出彈入嘅居留嘅過程。噉喺你十幾年呢一種即係旅遊簽，然後來回香港嘅過程之中，你有冇經歷過啲乜嘢，即係實質嘅困難或者內心上面嘅困惑噉樣呢？
米：其實，實體上面嘅困難一定有嘅，譬如你錢啦，你飛出去都要錢㗎嘛。噉另外其實係好冇保障，你會擔心啦，第一，你會擔心我返唔返得入嚟呢噉樣，因為噉樣飛呢，係好頻密㗎嘛。噉嗰陣時又未有伴侶註記啦，你更加冇辦法去證明你有另一半喺台灣啦。噉跟住就係你中途，譬如你出咗啲咩意外，你都會擔心嘅，因為嗰種感覺係好惡劣嘅，你好似冇保障呀，跟住如果佢突然之間同你講我分手啦噉樣，噉你就乜都冇㗎啦噉樣。
M：我可以想像到嗰種距離，即係雖然成日啲人就話「我 Weekend 都來回台灣㗎啦好簡單嘅啫」，噉但係當即係你一個好著緊嘅人留喺台灣，而你冇辦法喺個關係裏面可以好 Promising 噉話，我每一日都起身擘大對眼都係見到佢喺你附近，或者你知道佢…即係好似嗰種返工放工一齊、接放工嗰個狀態。你有機會會俾嗰個移民局或者入境處嘅人去問，點解你成日都係即係旅遊簽 Back and forth 台灣呢？冇證明文件之下，其實好多嘢都係好唔穩定嘅狀態，即係唔止係你自己本人心裏覺得唔踏實，你可能對於呢個關係裏面你能夠付出幾多？係咪即係錢可以衡量呢？如果對方佢真係一埋嚟，你遇到個唔好嘅佢就一埋嚟就話我唔要你啦，佢即刻 Block 你所有嘢，其實你真係企咗喺度喎噉樣。
噉即係希望都係呢度都畀到大家知道，其實呢一種遠距離式嘅關係，喺我哋通過呢個跨國同婚之前，其實好多對 Couple 都係面對緊呢個狀況。阿米嘅狀況就係用旅遊簽去做呢個居留嘅方法啦，噉之前嗰一集，我哋有訪問過阿雪，同埋訪問過暴力。阿雪就係其實以前佢有用旅遊簽嘅方法嘅，噉但係佢近排就用學生簽嘅方法啦。而暴力嘅方法呢，我未 Catch up 佢最新嘅狀況啦，但係佢之前同佢 partner…佢嘅台籍 partner 就係喺香港透過境外註冊噉樣嘅形式嘅。返返嚟台灣啦，講呢個跨國同婚嘅新聞啦，Recap 返畀大家知道一件事，就係喺今年嘅農曆新年前呢，蘇貞昌……
米：佢係行政院院長。
M：哦好，行政院院長，Sor 呀！行政院院長噉佢辭職啦，最後一個 Step 呢，就係通過呢個跨國同婚。噉跨國同婚嘅意思就係，喺而家嘅 Version 嚟講，就係除咗中國籍嘅人以外呢，香港、澳門以及其他唔承認同性婚姻嘅國籍嘅人呢，都係可以喺台灣同佢嘅台籍伴侶結婚嘅。呢個就係最新 Update。
米：算係行政文件，一個內容啦噉樣。噉其實佢個內容，其實就大家好簡單，就係知道就係點解中國唔得呢，就因為佢有個兩岸人民關係條例，噉就不適用於涉外民事法，就係一個好複雜嘅狀況。噉總之你就知道佢前面本身有一個行政文件，要拒絕你嘅噉樣，佢全部撤銷晒嘞，噉佢而家用一個新嘅 Recover 咗佢噉樣囉。
M：Ok，我睇新聞嘅時候呢，就係總之佢通過咗啦，但係背後即係台灣同埋中國嘅呢一個兩岸嘅 Conflict 呢，喺呢條條例上面仍然出現嘅。Anyway，我哋今集係講台港嘅 Couple 啦。當你睇到消息嘅時候，你嘅反應係點樣呀？
米：知道、見到嘅時候，因為佢新聞未出之前，其實我哋自己一個爭取呢個跨國同婚嘅一個 Group 入面呢，噉就其實已經見到消息啦。噉我哋，其實我當時一見到就大嗌尖叫，跟住就爆喊。跟住我另一半見到以為我見到曱甴，因為我哋喺出面噉樣，跟住我就話「唔係呀快啲睇手機，快啲睇手機」噉樣啦。跟住一睇完，跟住佢就話「真定假㗎？真定假㗎？」我話「係呀係呀係呀，啱啱收到消息啦」噉樣啦。因為我哋就兩個真係勁開心，咁啱因為我搵個 Friend 攞嘢呢，我畀個 Friend 睇呢，我 Friend 即刻攬住我一齊喊噉樣囉。
M：我都分享下我當時嘅感受啦。我記得嗰陣時，我哋係……我係返緊工嘅，跟住我就碌 Facebook ，就發現我身邊一啲即係台灣嘅性別圈嘅朋友就出一啲好奇怪嘅 Status，佢就寫話跨國同婚乜乜乜，跟住就係話我而家等下其他嘅組織或者係議員有咩反應先。跟住我就一頭霧水，即係點解突然之間又講返起跨國同婚嘅呢？再慢慢 Update，即係係噉 Research 啲新聞啦，Search 跨國同婚通過噉樣啦。
然後終於碌到有一個 Version呢，我就見到有新聞報導嘞，就係話蘇貞昌即係離職之前就通過咗呢件事噉樣。跟住我當下我以為我睇錯，我以為我唔識中文，即係我以為我自己……「等陣先！我每一粒字望清楚先，吓，點解會噉快嘅？」噉樣，跟住我再畀我 Partner 睇，然後再 Share 畀其他人睇，我先知道有得噉樣結婚啦噉樣。我哋呢個條例通過咗呢，接住落嚟呢，台灣就放大假，放一個農曆新年假啦。噉中間呢個過程之中，有冇啲咩係特別去準備嘅呢？
米：其實，基本上因為原本我哋係冇諗過佢噉快通過嘅。噉其實係過咗個農曆年之後呢，我哋係會諗住…諗住係去再試下闖關嘅，因為我哋係有個組織啦，我同第一對喺台灣結婚嘅台澳嘅跨國伴侶係識嘅，阿古同埋信奇噉我識嘅，我就同佢哋就有傾過，就諗住不如二月頭再去試下啦噉樣。但係佢突然間通過咗，所以其實我哋準備嘅文件其實全部都喺手上㗎嘞。我哋當下知道其實我就同佢（編按：伴侶）講話：「噉點算呀？而家而家點呀？係咪即刻去登記呀？即係等過咗個長假之後係咪即刻去登記呀？」噉樣。跟住佢就話幫我同政府溝通下先，噉就後尾就約咗個時間，就我哋話，我哋 31 號朝頭早就過去登記先啦噉樣。
M：31號係咩意思呢？就係因為台灣嘅農曆新年假呢，連埋啲星期六日噉樣計埋呢，通常啲人返工嘅日子呢係 30 號。而 31 號呢，即係你可以可想而知係全世界都係放完個大假返嚟嘅狀態嚟嘅。噉所以我收到呢個消息嘅時候呢，我自己都自問啲人（意思指公職人員）識唔識處理㗎？啲人同我一樣都係過完個大假之後先收到呢個 Update 㗎喎，噉我自己又諗下不如我 31 號打電話去問下先啦噉樣。
頭先阿米你有講到話你同之前嘅台灣澳門 Couple佢哋係相熟嘅，你大概都知道一對同志嘅伴侶要結婚要經歷啲乜嘢啦，噉可唔可以講多少少，你所謂嘅手上已經準備好嘅嘢係乜嘢呢？
米：其實就好簡單，就係一個你係香港申請咗嘅單身證明啦，跟住攞去台灣嘅駐香港辦事處做驗證，噉你就可以攞到嗰張單身證明，就喺台灣結婚嘞。噉你當然，你台灣結婚，你就要準備一個證書，叫結婚書約，噉都係類似就係你簽紙啦，總之係簽紙嗰張紙啦。噉其他嘅各方面嘅，譬如你另一半因為要換身份證啦噉樣，噉就準備相呀嗰啲啦。噉目前就係如果你人喺香港嘅話，噉可能就順便申請埋嗰個良民證噉樣囉，就係噉樣嘞。
M：Ok，申請良民證係申請香港嘅嗰個良民證，噉有冇啲咩原因要申請定㗎？
米：主要係如果你係諗住用依親居留嘅方式留喺台灣，噉你結完婚嘞，噉你順便去申請居留嘅時候用嘅啫。
M：Ok，噉聽到呢度嘅聽眾們就大概知道，即係其實同一個異性戀 Couple 嘅結婚嘅原理一樣啦，噉你結咗婚，你會希望你嘅外籍配偶係可以依親去…即係長期居留喺呢個本國人士嘅地方度啦，噉所以就會有一個叫依親嘅居留嘞，即係跟你嘅親屬嚟居留噉嘅意思，攞晒你嘅文件呀剩呀，已經即係準備十足噉樣去簽。噉你簽嘅過程，即係由你步入呢個戶政事務所—戶政事務所係乜嘢呢？即係你可以想像就係每一個區、每一個台灣嘅市裏面嘅區裏面嘅，可以做辦理登記手續嘅一個部門啦—幫你步入呢個戶政事務所。步出之後，你嘅心情係有冇啲咩唔同嘅呢？
米：其實當下好激動嘅，但係所有嘅激動其實俾一開始嘅一啲嬲呀、好煩躁嘅心情掩蓋咗一部分。因為我去嘅時候就好似馬天娜講啦，一開始呢 31 號，其實 30 號嘅時候佢哋應該要 Run 啲文件呀嗰啲啦，Run 嗰個條例啦、更新啦，噉但係我哋去嘅時候佢同我講話佢未收到，佢未收到上面交俾佢嗰份文件噉樣啦。噉所以我哋去到嘅時候呢，都係要喺戶政同佢都有啲…即係話唔係喎，明明我哋約咗㗎囉喎，講咗㗎囉喎，所以就有啲類似爭執啦噉樣。噉其實都拖咗成個零鐘之後，佢先 Confirm 話我哋有收到嘞，有收到嘞噉樣囉。
M：Ok，我嘅憂慮唔係杞人憂天㗎，真係喺台灣 Stay 咗差唔多五年嘅我，都深深感受到喺台灣裏面嘅呢啲公務嘅機關，佢哋嘅行政嗰個效率呢，係會慢少少呀，所以有噉樣嘅憂慮，我覺得都情有可原。
Ok，噉你同佢即係溝通過嘞，然後 Confirm 佢哋知道嗰個程序係點樣啦，噉你坐低就開始去簽呢一個登記啦。噉成個過程之中順唔順利呢？當佢哋知道點樣做之後。
米：其實知道點樣做其實就好順利，因為佢嘅做法同一般異性戀係一樣，噉基本上就係，總之你要搞結婚，佢幫你簽個結婚書約啦，跟住就幫你換身份證啦。噉其實最激動應該係見到我伴侶後面，即係佢身份證後面會出現配偶欄有我個名嘅時候，係最激動囉。
M：我都可以想像到，即係如果我 Partner 後面嗰個配偶嘅位真係有我本人嘅名，我會終於有一種如釋重負嘅感覺，因為我相信有好多人會覺得跨國同婚呢個 Term 呢係遙遙無期嘅，因為你首先要諗香港唔承認同性婚姻啦，而香港呢個喺國際上面嘅嗰個城市嘅地位又處於一種好迷嘅狀態啦，我哋係唔係好睇得到會有通過嘅一日嘅噉樣。
噉當然我哋早排遇到阿雪嘅 Case，佢係成功地上訴得到，令到佢呢對 Couple 係可以喺台灣結到婚，我哋係開心。但係我本人係好想像唔到，咦，原來喺我有生之年，即係喺我隔咗幾年之後，原來係可以通過到呢個跨國同婚，我覺得係……我自問啦，我唔特別講係究竟係政府係點或者係啲機構係點樣，但係我自己經歷到，能夠睇見到呢件事係我嘅運氣嚟嘅。攞到張身份證嘞，即係正式地，你哋就係同性伴侶啦，同性嘅配偶啦。噉你本人作為香港人，你之後有啲咩要做呢？
米：其實之後冇乜嘢要做，就係總之 Keep 住自己嘅生活囉。即係對我嚟講就係終於結到婚啦，噉譬如可能即係有啲重大嘅，有啲可能保險呀，或者係即係可以規劃到自己嘅未來，終於可以…即係難聽啲噉講，即係你嗰十幾年，好似我噉樣攞住旅遊簽嘅，其實都唔止我一個。我聽到有啲廿幾、三十幾、四十幾年都係噉樣飛。噉佢哋其實係體驗到自己未來嗰種感覺係迷茫到係，另一半就不停噉要搵錢就係為咗噉樣可以出入啦，維持兩個人嘅生計。但係你結咗婚之後，你可以諗下，你終於有一個穩定 Stable 嘅狀況，噉你兩個人就真係可以同一般情侶一樣，你就係計劃自己嘅未來噉樣囉。
M：呀，我頭先都醒起有個畫面，即係阿米嘅 Case 就係佢一 Stay 喺台灣就 Stay 半年啦，噉但係即係，雖然我哋成日都覺得香港同台灣好近，即係佢以前喺 COVID 之前，佢嘅班次係全球（後按：國際線）最頻密啦，但係的確唔係每一個人份工都可以 Afford，即係可以支持得到一個人有半年唔喺嗰個公司裏面㗎嘛，即係 Work from home 都唔係……都係呢一兩年先有嘅一個概念。對於每一對 Couple 嚟講，你飛嚟飛去，你住喺邊，你份工幫唔幫到你，都係好重要，即係已經唔計話你背後有冇屋企人嘅意見呀，點解你成日都唔留喺度呀，之類之類嘅一啲嘅內心嘅掙扎噉樣啦。有冇好似真係好多人可能喺 Forum 呀，或者喺我哋嘅身邊裏面成日都講呀，結咗婚呀，要搞婚禮呀，跟住又要過大禮呀嗰啲，你有冇想像過呢啲畫面嘅呢？
米：我諗我唯一想像過就係我結咗婚之後，其實都 Plan 緊㗎嘞，噉我 Plan 緊個 Wedding party 嘅，噉但係就冇 Plan 其他嘢，即係譬如我同我啲 Friend 講就係，你嚟其實就人到就好嘞，你禮到唔到我唔 Care，因為其實真係中間爭取嘅時候，經歷咗太多太多嘢，即係對於我哋嚟講，係想一個慶祝開心，即係抒發下自己中間，即係努力咗嗰啲情緒，積壓完之後想一個真係放鬆自己心情嘅地方噉樣囉。
M：我自己都同阿米差唔多，嗱我未正式結得成婚啦，噉但係我都有公佈呢件事畀我個 Partner 嘅屋企人知，亦都有分享畀我哋相識嘅朋友啦。好搞笑嘅，我哋收到嘅嗰啲反應就係話：「我想食呢個 pān-toh（辦桌），我想食嗰個圍酒呀，我為咗想食嗰圍酒，我支持你去搞婚禮。」噉即係，我會覺得即係今次我同阿米嘅想法，其實應該同好多主流嘅嗰個婚姻嘅想像好唔同啦，即係我哋冇特別話我哋要將成件事變咗做一個好典型嗰種婚禮式嘅嗰個呈現，而我哋希望係可以聚集到班人去一齊分享喜悅噉樣。
噉喺台灣嚟講呢，同性婚姻的確唔係一個……佢唔係一個好似與生俱來一般嘅一個權利，我哋係透過好多人嘅爭取，我哋有人上訴過，我哋有人即係夥拍團體、夥拍機構去同呢個政府去斡旋，先可以爭取到呢一個嘅權利，而呢一種嘅差異呢，係會令到我哋好透徹地去諗究竟結婚嘅意義係啲乜嘢。有人係因為，掉返轉頭去諗，異性戀呢，佢哋成個嘅社會制度，係容許佢哋好容易去想像得到結婚係咩。
你拍拖呀，噉拍拖幾年呀，拍拖十幾年呀，噉你終於走到一個人生嘅新階段呀，噉就結婚囉，我結婚完就生仔囉噉樣。但係對我哋講，首先生仔個 Issue 已經係已經係一個例外嘅狀況啦，我哋會進入領養啦，我哋會進入人工生殖啦。而因為我哋而家嘅社會裏面唔係將同性婚姻視為一種猶如天然一般嘅存在，係啲乜嘢嘅機制令到呢件事顯得唔係自然呢？其實係人定嘅，呢個我一定要 Emphasize 返先。所以喺我哋嘅相處模式裏面呢，結唔結婚唔係一個猶如自然一般，去到人生階段自然會發生嘅事嚟嘅，我哋係需要了解到我哋嘅國籍，我哋嘅國籍認唔認可同性婚姻，而我哋嘅配偶嗰邊認唔認可同性婚姻，種種嘅 Condition 配合起嚟，我哋先可以想像到嗰個畫面呀。我都想 Highlight 返一樣嘢，就係點解呢一集跨國同婚，我哋會去講兩集，就係因為我哋呢個 Podcast 講香港啦，噉所以同香港同志嚟講係息息相關，而亦都希望大家知道，其實呢啲嘅權利唔係突然之間爆出嚟嘅，係背後有好多人同機構同政府斡旋，背後調理咗好多嘅事情，先可以有呢一個結果噉樣囉。
阿米呢，喺我哋開始錄呢個節目之前呢，又講咗有一個狀況嘅。佢就話有好多人問一啲關於跨國同婚嘅問題，噉不如我趁呢刻就將呢一部分呢視為一個懶人包，我又畀阿米去 Share 下，有啲乜嘢係太多人問啦，噉一次過解答大家可唔可以呢？
米：可以。我先講吓，大家都知道其實香港，我唔知呢一集 Podcast 出去嘅時候自由行開咗未啦噉樣，但係目前係唔得嘅，香港如果要用旅遊方式入嚟呢，係唔得嘅。但係，陸委會出咗個機制，就係如果你提供到證據或者你喺第三地結婚呀，你記住，你係第三地結婚或者係有台灣嘅伴侶註記呢，你係可以用呢個申請過嚟台灣呢邊話你要結婚，或者係你提供證明，用一個人道理由話你要過嚟台灣呢邊同你伴侶結婚，噉你就可以過嚟結婚。麻煩大家過嚟之前準備好文件，如果唔係，你過到嚟都係浪費咗嗰個機會，噉你文件一定要，你嘅單身證明必須要去做咗驗證之後，即係去台灣嗰個駐香港辦事處做咗驗證之後，先可以喺台灣呢邊使用嘅噉樣。另外呢，如果你係有離婚證明，即係你離過婚，你需要用呢個離婚證明呢，噉你嗰個離婚書都係要用驗證嘅方式先可以過嚟使用嘅噉樣。如果你本人仲喺香港呢，如果你要申請居留呢，即係過到嚟台灣申請居留呢，噉你可以喺香港申請定你嗰個良民證，噉你再直接過嚟台灣會比較快啲，就唔使再等佢再通知你，你嗰個居留證申請嘅時候缺咗啲咩文件，你再去補交噉樣囉。
M：Ok，大家如果係考慮，即係積極考慮買機票過嚟同你嘅台灣 Partner 結婚嘅朋友呢，記緊記緊要做完晒啲文件驗證先好飛過嚟，如果唔係你張機票就…即係變咗做你，你又要出出入入噉樣啦。最後呢，有一個部分雖然有啲離題，但係呢，我都覺得即係可以互相 Share 一吓。就係喺阿米我哋傾談嘅時候，佢都有表達佢都有整 Podcast 嘅，噉我而家呢，就有少少嘅生硬，但係呢又想幫佢 Share 吓，可唔可以介紹吓你嘅 Podcast 呢？
米：我個 Podcast 呢就其實就係，主要族群呢，其實就係想講吓 Share 吓，即係，大家同志都應該多多少少如果有遇到一啲基督徒呢，噉你都會遇到一啲可能傷害呀噉樣啦。我個 Podcast 呢，其實係同我個 Friend，噉我哋兩個都係受過一啲基督徒或者喺教會裏面受過啲傷害啦噉樣。噉我哋就會用可能一啲新聞啦，或者係我哋遇過嘅事啦，噉就做一個可能好簡單嘅交談嘅方式去講吓我哋受過咩傷害，或者係 Share 吓身邊有啲咩人遇到啲好荒謬嘅基督徒，或者有啲教會好誇張嘅嘢噉樣嘅啫。
M：Ok，佢講得好清閒呀，即係講吓嘅啫噉樣啦，但係我相信即係既然我就噉去搵一個朋友，即係新認識嘅朋友，都已經遇到有一個因為自己嘅宗教信仰而同自己嘅身份有所衝突，而遇到一啲唔愉快經歷嘅人，噉即係因為近排 PrideLab 有出咗嗰本 Zine 去講拗直治療啦，或者係所謂嘅性傾向糾正嘅手法啦，噉即係希望大家繼續去關注呢一個議題，因為呢個議題的確係喺我哋身邊嘅人係隨時有嘅，只不過佢哋冇特別提起噉樣啦，
我會將阿米嘅 Podcast 嘅資料放喺 Description 嗰度啦，有興趣嘅朋友可以撳入去聽吓。亦都即係希望多啲人去關注呢個 Issue，即係同大家關注呢個香港同志一樣，呢啲嘢都係需要透過關注先可以得到轉機噉樣嘅。噉去到我收結之前，阿米仲有冇啲咩補充，或者係有啲咩感想係想畀各位聽眾嘅朋友知道？
米：我希望大家唔好因為好似呢一次突然之間好輕易噉樣可以結婚，就太過輕率去考慮呢件事，因為其實我哋喺倡議呢個過程裏面，其實係遇到好多事情，遇到好多困難，亦都遇到好多，無論係政府啦或者係網路上面啦，或者係一啲路人上面嘅攻擊嘅。
所以其實希望大家喺結婚呢件事嘅上面呢，可能大家就考慮清楚，唔好因為為咗係一紙居留或者係突然間好衝動就想結婚噉樣就去結，因為其實喺呢個過程當中，我哋好多人做咗好多嘢，我自己即使冇去做到訴訟呢一部分，但其實我喺爭取呢個跨國同婚嘅時候，我係用咗兩年幾嘅時間去面對政府，去做咗好多好多嘅嘢，然後當中嗰啲傷害其實係，而家我哋都仲喺度處理緊嘅。所以大家喺結婚呢件事上面，我真係認真地希望可以慎重地去處理，如果唔係側邊嗰啲反對嘅聲音就會喺度講話「係呀係呀，呢班人就只係為咗居留囉」噉樣。
M：可唔可以直接呢，即係俾我哋嘅聽眾知道，即係你講到話傷害仲係處理緊呀，你可唔可以列舉吓幾句關於嗰啲傷害嘅說話，係究竟點樣，有幾 Harsh 呀？
米：網路上面係有好大量嘅人係講緊話，我哋嘅跨國同婚都係一堆假結婚啦、共諜啦，或者係直情係話，你哋呢班人如果要爭取結婚嘅，點解唔返返去你哋自己國家，點解要嚟搵台灣政府嘅便宜？噉所以，其實網路上面呢啲嘅說話，我哋係持續咗……我朋友直情係，即係台澳嗰對伴侶，其實佢哋係直接有收過死亡威脅添嘅。係啦，噉所以喺呢啲噉嘅情況之吓，希望大家即係對於呢個跨國同婚嘅事件，可能大家未必睇到咁多，未必睇到咁全面，但係喺呢件事上面，我哋其實係遇到好多好多好多唔同嘅嘢，亦都包括當然政府裏面一啲行政人員啦，或者係一啲議員嘅嘴臉，我哋都睇過，噉但係當然我哋就唔會再想講出嚟，因為呢件事都過咗去嘞，噉大家開心心結婚，但係希望大家真係喺結婚上面真係考慮清楚，唔好將佢當咗一件淨係攞居留嘅工具噉樣囉。
M：Ok，我諗其實呢件事，即係我自己上網都有睇過呢啲噉嘅留言呀，噉我相信真係喺呢個組織裏面或者夥拍組織一齊去推呢個跨國同婚嘅朋友們，例如阿米噉樣，佢會見識嘅嘴臉同埋言語係更加多。我作為一個唔係喺呢個組織裏面做一個倡議嘅人，我係其中一對台港 Couple 嘅網民，我會覺得，挑，噉你話假結婚，直人都會假結婚㗎啦，噉即係然後一笑置之，或者可能就覺得嗰啲人都係自己喺度真係唔知酸啲乜嘢噉樣。但係與此同時，我都即係去到呢一 Part ，雖然阿米係一而再再而三噉講話要慎重去考慮結婚呢件事，噉我又會掉返轉頭去反問返大家，作為一個收結啦，就係結婚既然有好多人覺得要好盛大去舉行呀，既然直人佢哋都會覺得成件事好似又要擺酒，又要好多 Budget 呀剩，係反映咗啲咩呢？
係反映咗呢件事其實唔只作為一個人生嘅階段噉簡單，而係有啲人佢係覺得佢需要有啲權利，嗰個權利唔係純粹係我簽完，Yeah 噉我就可以居留嘞，我就可以留喺台灣咁簡單，而係一啲我哋生活上面，直人完全唔需要考慮點樣得返嚟嘅嘢，我哋係透過婚姻呢一個機制去得到嘅。例如啲咩呢？例如頭先阿米有講話，保險啦、遺囑啦，你嘅資產分配啦，以及你，簡單啲嚟講，就係你出現任何緊急嘅狀況，你搵邊個，個政府或者啲機構搵邊一個。
其實，我哋都係透過婚姻去作一個好清晰嘅判斷同埋定義，因為冇呢啲清晰嘅定義呢，去到嗰個臨危嘅關頭，係全世界都係一嚿雲嘅，係冇辦法可以肯定到下一步要點做，跨國同婚唔係一下子就爆出嚟嘅事。我哋見到呢一個結果，而呢個結果之前係有好多人一齊努力，就正如我哋香港嘅同志，其實背後有做咗好多嘅 Effort，同唔同嘅機構斡旋、溝通、關注、開會，我先可以慢慢去知道最新嘅狀況。我哋點樣去，即係香港同志係點樣面對而家嘅局面，其實背後有好多人嘅 Effort 囉。
好啦，噉雖然呢個尾係有啲 Hard 嘅，噉但係亦都希望今集可以就係，咁啱好好彩遇到阿米，佢俾我哋知道而家最新鮮嘅 Update 啦。我本人結婚嘅資訊呢，就應該唔會喺 PrideLab 度睇得到嘅，但係預期應該就係喺上半年我就會結婚噉樣囉。
《點止港同志》係一個以香港同志角度出發嘅 Podcast，希望可以將大家生活裏面嘅性別同同志議題用廣東話嘅聲同文字方式保留同流傳嘅。每一集嘅 Podcast 我哋都可以製造文字檔，而同大家講一聲呢，第三季我哋就會積極發展我哋第一、第二季嘅文字檔。噉如果我哋可以完成到呢個工作嘅話呢，我哋係會放上一個網站度畀大家 Access 得到嘅，畀唔方便聽聲嘅朋友都可以知道我哋嘅資訊。噉多謝你收聽呢個節目啦，而且聽到呢度最後。噉如果你想收到下一集嘅內容呢，就訂閱我哋啦。噉如果你對呢個主題，你都係台港嘅 Couple，或者你都係同呢個跨國同婚係有聯繫、有關係嘅人呢，歡迎你分享你嘅故事畀我哋知啦。噉你可以喺 Instagram DM 我哋 @pridelabhk ，或者歡迎你喺 Apple Podcast 留言同埋畀星星嘅回饋。你嘅支持同埋鼓勵呢，將會係我哋默默耕耘嘅動力嚟嘅。
噉今集呢，呢個我本身想希望清談啦，但結果又係我自己 Drive 到勁凝重噉樣嘅一集呢，就講到呢度，噉多謝阿米今次撥空同我傾談啦，期待下一次同你《點止港同志》。好，同大家講 Bye Bye 啦。
米：Bye Bye。
M：Bye Bye。