6月同志驕傲月大家搞完活動，有無諗過，其實其他時候，同志嘅生活、身心係點樣？ 點解有人會話LGBT好玻璃心？又因乜解LGBT會「覺得被冒犯」？
就同其他人一樣，性/別小眾唔係淨係得驕傲、陽光同埋「靚」，比較陰暗、負面嘅一面，同社會嘅關聯又係點？快快哋聽下同志生活系列！

資料補充 （按內容順序）

• Marshal, M. P., Dermody, S. S., Cheong, J., Burton, C. M., Friedman, M. S., Aranda, F., & Hughes, T. L. (2013). Trajectories of depressive symptoms and suicidality among heterosexual and sexual minority youth. Journal of Youth and Adolescence, 42, 1243–1256.
• Resolve Foundation 2021年出版《結伴同行，始於日常 推動平等香港：行動指南》
• Wendy Bostwick & Amy Hequembourg (2014) ‘Just a little hint’: bisexualspecific microaggressions and their connection to epistemic injustices, Culture, Health & Sexuality, 16:5, 488-503, DOI: 10.1080/13691058.2014.889754
• Heather Love – Feeling backward: Loss and the politics of queer history

【又關性/別事】同志生活系列之你身心健康嗎

成日都會聽到有人講，「我地同性戀唔係精神病」。其實政治正確地講，呢個說法就唔係幾正確。雖然我地會明白背後係想講，作為「同志」其實同「正常人」一樣，只係喜歡嘅人性別唔同。但係咪就代表咗我地覺得精神病就係一件好「唔正常」嘅事呢？再講，直到今時今日，跨性別仍然都喺精神疾病診斷與統計手冊第五版 (DSM-5) 入面，亦都有好多研究專門睇一個人嘅性向同佢心理健康情況有冇關係。

所以今日《點止講同志》嘅「又關性別事？」就同你講下同志嘅心理健康。

大家可能會諗，心理健康同我係咪同志好似冇乜關係喎。即係我係同志，同我心理健唔健康，睇落應該係兩件獨立嘅事嚟。但其實睇返外國同埋香港嘅研究數據，都講到同志社群嘅心理健康比起直人差。美國匹兹堡大學嘅團隊喺2013年做過大型追蹤統計，研究唔同性傾向嘅青少年喺成長前後嘅心理健康。結果發現，同志嘅抑鬱同自殺傾向比率都比直人高，而且喺同志們成長之後，抑鬱呢類情況會持續落去。當中以雙性戀族群嘅心理健康最令人擔心。而香港香港中文大學心理學系團隊喺2017年嘅時候，都以類似形式探討香港同志社群嘅心理健康情況。結果發現，香港同志嘅困境同外國都類似，抑鬱同埋焦慮症狀都比直人普遍。換返數字嚟比較，整體香港人每10個就有1個會有出現中度或嚴重程度嘅抑鬱症狀；而LGBT社群係講緊每3個就有1個出現抑鬱症狀；每4個就有1個出現中度或嚴重程度嘅焦慮症狀。

到底點解會有呢個現象呢？其實都唔難理解心理健康會同社會、環境因素互相影響。最直接會諗到就係身邊嘅人接納你嘅程度。設身處地去諗，假設你生活喺一個唔接受同志嘅圈子，或者喺一個你唔能夠出櫃嘅屋企或者公司。當你嘅一啲關於感情世界嘅壓力、或者同伴侶有乜嘢唔開心都冇人可以傾訴嘅時候，心理健康自然就會負擔更大。呢個現象喺學術嚟講稱為 minority stress theory。簡單嚟講，社會上面被視為係非大眾嘅人例如性小眾，因為喺生活上遇到唔同程度嘅拒絕、偏見，甚至係歧視，就會不知不覺對小眾身份產生焦慮或者係質疑，例如會好警惕唔想做啲符合人地偏見嘅行為。或者更極端地拒絕自己嘅小眾身份。呢種長期自我質疑、警惕嘅過程就會轉化成壓力，影響心理健康。

引用返中大數據，發現超過6成嘅同志曾經因為性傾向而被身邊唔同嘅人拒絕，或者遭受不公平嘅對待。例如當中每3個同志受訪者，就有1個曾經因為性傾向而被屋企人、朋友、同事或者同學作出不公平對待；亦有差唔多2成嘅受訪者係受到完全唔認識嘅人例如醫療、社會服務、或者宗教成員去拒絕。呢種差別待遇亦都令佢地嘅孤獨感、抑鬱、焦慮症狀亦都比未試過不公平對待嘅人高。更加唔好講我地成日聽到新聞，例如學校唔識處理有關LGBT學生同家長之間嘅矛盾，或者係有醫生唔認可女仔之間嘅性愛係性愛等等。呢D大家都已經老生常談嘅場景，其實都間接影響緊同志社群嘅心理健康。所以成日都有人話，「其實香港已經能夠好接納到同志啦」，但睇返研究結果，或者可能各位自身嘅經驗都知道，就算只係素未謀面嘅服務提供者，或者去到你最親嘅屋企人、朋友，其實大部分仍然都好保守。仲未計有一班未有伴侶、仲未出櫃嘅LGBT+朋友呢。

去到呢度，唔知聽緊嘅同志們會唔會諗起一啲自身嘅經歷呢？有朋友可能話，「冇喎，我身邊嘅人都 support 同志喎」，或者聽緊嘅直人們都唔會咁樣歧視身邊嘅同志。等等先，唔好咁快落判斷住。以上講緊好多都係擺明車馬嘅歧視，但其實依家好多討論已經講到一樣叫做「微歧視」嘅概念。然後大家就會問，咁到底「微歧視」microaggression 又係乜嚟呢？同普通歧視又有乜嘢分別呢？

根據心理學教授Kevin Nadal嘅定義，「微歧視係指日常生活中一啲有意無意嘅說話或者行為，表現出對某類群體存在嘅偏見。比較起嚟，普通歧視係會擺明車馬睇低你，但微歧視嘅話可能連對方都意識唔到自己對你有偏見。」聽完個定義，我相信大家仍然係一頭霧水，但如果換個說法問大家：「有冇試過聽身邊嘅人提到你性傾向嘅時候，會覺得佢講嘅嘢好un耳呢？」例如本人作為les成日都聽：「你同女仔一齊真係嘥哂」。OH! 到底點樣為知嘥呢？點解同男人一齊就唔嘥，同女仔一齊就嘥呢？例如bi嘅朋友應該成日都聽：「揀返異性咪好囉，迷途知返啦」。明明當事人就從來冇蕩失路，知乜嘢返呢！仲有好多好多更加subtle嘅例子，例如講起有LGBT公開出櫃就一定係「勇敢做自己」之類，呢度就唔逐個講啦。但以上每一句un耳嘅說話其實都係微歧視，甚至係同志社群入面，有時可能都不知覺講咗呢啲說話，幫手強化咗呢個社會嘅偏見同二元對立，久而久之就變成同志們嘅心理壓力。

美國北伊利諾大學同水牛城大學兩位教授喺2014年就合作，研究到底有乜嘢因素影響到雙性戀女性嘅心理健康。結果發現，微歧視正正係主因。例如受訪者會提到，佢地身邊嘅成日都會唔明白，甚至係否定雙性戀嘅存在；不論係攣定直嘅朋友，都只係覺得佢地未探索到自己「真正」嘅性向。甚至有受訪者講到同同性拍拖嘅時候，會俾另一半要求佢come out做Les而唔係bi；調返轉同直人一齊嘅話，就唔會再提起Bi佢地對同性嘅情慾。而喺交友嘅時候，如果唔喺直人或者les揀一邊嘅話，就會feel到好似兩邊都俾人排斥或者質疑等等。呢啲例子聽落未至於係惡意歧視，但加埋加埋就會對佢地造成心理壓力，嚴重嘅可能令佢地都質疑返自己嘅性向。

聽到呢度好似好無力咁，我都好老實同你講，作為同志係無力嘅。講到明係小眾，可能遇到10個人得1個係自己人，亦都作為長期被污名化嘅一個群體。雖然今時今日好多同志活動都好正能量大師咁；例如６月嗰個都係叫pride month，或者係好多嘉年華形式嘅同志活動，好似都強化緊做同志一定要好開心，日日搞party先得。但我地唔能夠否定嘅係，作為性小眾其實就係孤獨；以往歷史走過嚟就係充滿住傷害、絕望、自我否定等等負面情緒。美國Heather Love教授就提醒大家，如果我地選擇將呢啲過去嘅壓抑放埋一邊，其實我地同時會將救贖嘅希望放低埋。例如當你因為自己性小眾嘅身份而覺得難過、或者被冒犯嘅時候，你就會諗：「係咪自己做錯呢？係咪自己有問題呢？」。但如果你記返起，其實性小眾本身就係長期受壓迫嘅一個群體，歷史就係一直以嚟無緣無故會否定性小眾嘅存在，當你再次遇到有人去攻擊你嘅性／別或者性向嘅時候，你就會知道問題其實唔喺你個人身上，只係社會本來就係對性小眾唔友善。

當然進一步，我地當然希望社會能夠慢慢改變，成為一個同志友善嘅環境。香港Resolve團隊嘅Every Action Matters 計劃就提醒大家，要減低生活上嘅微歧視。最簡單就係大家說話之前，諗一諗「有冇一啲對小眾既有偏見呢」之後先講出口。但如果衝口而出咗都唔緊要，你記得要識得承認錯誤就可以啦。就算自己係無心或者只係講笑都好，如果結果係傷害到其他人的話，都記得要大方承認，有時一句真誠嘅道歉已經好足夠，最緊要係之後唔好再重蹈覆轍。如果你再有多啲空間同能力，都鼓勵你影響埋身邊嘅朋友同屋企人，教識佢地乜嘢係微歧視，並且喺生活上一齊減少呢類用語。

除此之外，原來參加多啲同志活動都係幫到手㗎！又講返中大個研究嗰度，佢地發現當你參加多啲同志社群嘅活動，例如我地Pridelab搞嘅線上線下交流會，你就能夠加強你同成個LGBT+社群嘅連繫，從而對同志呢個身份嘅自我污名就會越低。簡單嚟講，當你認識到更多自己人，你就會搵到班同聲同氣嘅人去講自己嘅感情世界、生活日常，從而因為性小眾身份而產生嘅壓力就會低啲，有抑鬱症狀機會亦會低咗。正如你每次㩒入嚟我地podcast，聽有關同志議題嘅唔同資訊都係一個自我加權empowerment嘅過程。有時可以知道多啲同志圈嘅資訊；有時會聽到唔同嘉賓分享，希望都可以同聽緊節目嘅你地共鳴到！

當然，如果你意識到自己嘅心理健康已經到達臨界點，或者意識唔到，但發現自己做好多嘢都提唔起勁的話，都請你尋求專業人士嘅意見。下次PrideLab嘅活動見啦！

《點止港同志》喺一個以香港同志角度出發嘅Podcast，希望可以將大家生活裡面嘅性/別同同志議題同廣東話聲音同文字方式保留同流傳。每一集嘅Podcast我哋都可以製作文字檔，畀唔方便聽聲音嘅朋友都可以知道我哋嘅資訊。

多謝你收聽呢個節目，而且聽到最後。想收到下一集嘅內容，就訂閱我哋啦。假如你對呢個主題有共鳴，想分享你嘅故事畀我哋知，歡迎你dm我哋@Pridelabhk。亦都歡迎你喺Apple Podcast留言同埋畀星星回饋，你嘅支持同鼓勵會係我哋默默耕耘嘅動力。

今集就講到呢度先，期待下次同你《點止港同志》。