用兩大重點總結今集嘉賓嘅分享：
- 咪鬼用咁多標籤分類啦
- 樣品數多，人揀你，你揀人，fair play。
章節
| 開始時間 | 標題 |
|---|---|
| 00:03:30 | SM喺男同志圈有多一種相處模式 |
| 00:06:40 | 主奴關係得到同意Consent嘅盲點 |
| 00:10:30 | SM圈子有無分類？ |
| 00:13:30 | 男同志x SM有咩特點？ |
| 00:19:24 | 男同SM圈現實面 |
| 00:24:45 | 享樂同時，BDSM風險仍存在 |
| 00:31:55 | 對SM初心者嘅良心提醒 |
| 00:36:15 | 「成年人」唔係撇除責任嘅理由 |
【專訪自己人】男主真人語音圖書館（Feat. 阿樂）
M：馬天娜
L：阿樂
M：歡迎返嚟《點止港同志》，我係主持馬天娜。噉今集呢將會係講關於同志，同埋性嘅部分嚟嘅。之前有個朋友就得知一啲 SM 嘅部分啦，尤其係可能都唔少嘅聽眾喺 Twitter 裏面都見到好多唔少活色生香嘅 account。我自己近排都有喺個 Twitter 嘅 App 裏面就浮浮沉沉搵咗啲 account 去望吓、研究吓，其實都後尾搵到，喺香港有女同志同埋男同志嘅 SM 個體戶啦，或者係組織嘅。噉今日非常之開心可以邀請到一位有男同志身份，又涉足於 SM 嘅一位朋友嚟接受我哋嘅訪問，開展今次呢個主題嘅對話。你好呀！
L：Hello，你好！
M：可唔可以介紹吓你係點稱呼？
L：我叫阿樂。
M：好呀，你好呀阿樂。話明頭先就講起 SM 啦，噉你係同 SM 有關啦，可唔可以講解吓你由幾時開始、同埋點樣接觸到 SM 呢一樣嘢嘅呢？
L：諗返就幾年前啦，幾年前其實就因為我之前呢都有接觸出面一啲同志嘅組織啦，噉即係做吓義工呀，或者參加佢哋啲活動呀。後嚟就即係有參加 PrideLab 啦，即係都係一個同志友善嘅組織啦，噉佢哋就幫手搞一個 BDSM 嘅工作坊噉樣嘅。噉嗰陣就幫手做主持啦，同埋做一啲 lineup 嘅工作。噉嗰個活動呢，其實都有老師去講好多唔同嘅情趣嘅玩法。我就其實一直都覺得同志嘅玩法入面呢，除咗1/0（編按：進入方/被進入方）之外，都有其他嘅玩法，就喺入面就了解咗好多啦，噉都覺得好好奇，同埋都覺得都幾有趣噉，即係可以試吓唔同嘅玩法，噉就開始有多啲嘅認識嘞。噉之後就都係網上面呀，或者 APP 啦，會了解好多啦，同埋就試吓噉囉。就開始慢慢接觸一啲唔同嘅 BDSM 嘅玩法噉樣。
M：你所講嘅嗰個 PrideLab 嘅 SM 活動，係咪即係之前 Tommy 仔搞嗰場？
L：嗯嗯。
M：之前我哋都有訪問過 Tommy 仔，講佢以前發掘 BDSM 興趣嘅一集啦。我 hardsell 地都可以呼籲吓各位未聽嘅都可以返去聽吓啦。
我又好好奇喎，即係有好多人可能去 join 呢啲 SM 嘅介紹班呀，即係由呢啲 SM 界裏面嘅人物去講解吓呢一樣嘢係到底咩一回事，你中間有冇啲乜嘢係令到你好有興趣覺得：「咦，我真係可以試吓喎，我真係可以踏入 SM 圈裏面」嘅呢？因為好多人就覺得：「哦，噉我聽完我知道 SM 係咩嘞，噉好囉，返屋企，完！」噉樣㗎嘛？有冇啲咩觸發位令到你覺得「咦，其實我真係可以試吓嘅」？
L：我又冇特別話要踏入呢個圈噉樣嘅，因為我覺得都係一個喜好啫，即係可能有啲人鍾意1/0，有啲人鍾意玩控射（控制射精）噉樣，其實 BDSM 都係其中一個 option，所以就冇話特別……話有冇咩信心之類去踏入呢個圈。但係就喺入面嗰個，即係好似頭先有講嘅一個工作坊入面啦，噉其實都有講好多，譬如係一啲繩綁，點樣綁人哋嘅身體啦，或者係一啲情趣嘅玩法，點樣同對方有互動啦噉樣。我自己覺得：咦，其實我都好鍾意唔同嘅玩法，同對方有互動，即係唔局限於1/0，因為我覺得唔係唔好，只不過如果你淨係1/0呢個玩法就有啲悶噉樣，我就比較鍾意唔同嘅方法同對方探索，就喺從中慢慢去搵一啲我自己有興趣嘅啦。當然我都唔會話全部嘢我都有興趣，譬如一啲可能係繩綁嗰啲啦，或者一啲主奴嗰啲啦，噉都會有啲興趣。就你話點樣分自己嘅角色？我諗主要我唔鍾意被控制嘅感覺，所以因為唔鍾意被控制，所以就調轉做一個控制型嘅角色。當然我都唔係一個好嚴主嗰一種嘅，但係比較朋友模式啦，噉就係會鍾意自己去經過溝通之後噉樣，同對方做一啲調教嘅動作。
M：OK，頭先講咗幾個術語，我可能都需要你解釋吓。「10」就可能好多人都接觸過啦，喺 gay 圈裏面就係講插入方同被插入方啦。跟住你話「控射」應該係講即係控制射精啦，類似係高潮控制嘅一種啦。頭先你講到話，你唔似某一種嘅乜嘢主話？
L：「嚴主」即係一啲好嚴，即係個性格或者嗰個氣場比較惡嗰一種嘅主人囉。
M：可唔可以想像為，即係如果我哋啲通俗理解，係一啲霸道總裁 style 嘅主人？
L：類似係啦，即係 BL 嗰啲就類似嗰啲啦。
M：但係你就係走即係 peers，即係友情啲嘅路線，所以你就唔會似係嗰啲直接落一個指令，你就一定要使命必達，你就希望你嘅奴要使命必達嗰一種。
L：會溝通落先嘅噉一定會，即係睇吓大家有啲咩可以玩或者唔玩得啦，同埋都要視乎返我同對方嗰個關係，係純粹玩嘅關係，定係會係朋友嘅關係，即係平時都會成為朋友。如果係純粹玩，就可能會可以惡啲噉樣。
M：頭先你講到一個好好嘅位，which 我相信真係唔少嘅人睇一啲關於 BDSM 嘅文章嘅時候都會理解到，就係你會問清楚對方接受到啲咩嘢，同埋唔接受到啲乜嘢啦。即係呢件事其實好簡單嚟講，就係consent，成日啲人都講話呢個知情同意，即係唔好噉講話 consent，即係我有你 consent 噉咩都做得，其實又唔係一樣嘅。即係前幾排我去咗一個繩綁嘅一個分享會，裡面聽咗令到我毛骨悚然嘅一啲故仔，佢就類似係講呢話有啲 Sub 呢，即係有啲奴呢，佢一路就諗住「我要做一個好稱職嘅 Sub，所以呢個主人呢對我做啲乜嘢呢，我都要默默承受，我先可以做一個真係符合資格、叫做一個 Sub 嘅一個角色」嘅。噉所以佢就盲目地就接受曬所有嘅嗰啲肢體上面嘅對待呀噉樣，噉但係佢個人係唔喜歡嘅、佢個人唔 enjoy，甚至有一啲狀況更加恐怖呢，係佢本身可能諗住係試吓俾人綁，結果綁綁吓呢就做埋一啲即係同…即係親密行為相關嘅嘢。成件事呢係冇經過 consent，但係有一啲人單方面就相信就係話，我 Dom（dominate）人呢，我個宗旨就係要凌駕咗佢，即係要剝奪佢啲乜嘢、剝奪佢嘅自由，所以我先做到我做 Dom、做一個主人嘅身份。但係成件事係錯㗎，即係好多時候啲人想像就話「我鍾意控制人，所以我就係一個 Dom」。
但係你做 Dom…即係喺我做呢個 sex toy 嘅店員，同埋後尾去讀書嘅時候都搵咗唔少嘅資料，就係話你做 Dom，你唔係一個暴力狂囉簡單啲嚟講，即係你唔係純粹就話：「哎呀，我鍾意凌駕所有人，所以我就係一個 dom 嘅性格」，而係你鍾意控制對方嘅同時，你都要搵到人俾你控制㗎，即係你要控制噉，你可以攞住個枕頭控制佢一舉一動，你唔需要搵個人㗎係咪先，即係你都需要一個 give and take 嘅狀態，你要搵一個人願意畀佢嘅自由同身段去俾你控制㗎嘛，所以即係冇可能有絕對支配同埋絕對嘅服從囉，我又會覺得。所以頭先你講得好好啊，呢樣嘢係一定要大力推崇嘅，呢個溝通。
L：都係嘅，即係好似你頭先有講呢，其實有啲奴係鍾意即係好惡嘅主，好似你頭先講有一種凌駕佢嘅感覺，即係好似自己好多嘢都控制唔到、由對方主宰，但係就算係呢個狀態嘅玩法，都要 base on 大家有一個溝通，同埋嗰個尺度之內先完成囉。即係唔可以話係因為我係控制人就為所欲為，即係因為都唔係一個單方面嘅 enjoy，噉大家都有自己想玩嘅地方，或者興奮嘅地方，噉都要溝通完之後，再點樣去搵一個大家適合嘅玩法。
M：呢個的確係即係正如拍拖噉，你都要搵一個啱你，或者嗰個人有自己獨特喜好、喜惡㗎啦。我又想問吓呢，你可唔可以透露吓你而家有幾多個 playmate 或者係奴？
L：其實我就冇特別數嘅，即係我冇固定嘅奴囉，應該噉講。噉但係就會有一啲人係可以同佢玩噉樣。
M：噉你搵到嗰啲玩伴啦，即係玩嘅對象嘅時候呢，你哋即係有冇啲咩術語去講佢哋係屬於邊一種嘅奴？即係例如，你有奴呢，有好多唔同方向㗎嘛？例如，你可能有啲人係唔鍾意打嘅，佢唔接受俾人打嘅，佢就係精神支配嘅啫。有啲人呢，就佢唔鍾意喺其他生活嘅時候被支配嘅，佢就係鍾意喺特定嘅時段俾人，即係剝奪佢嘅人生自由，去有呢啲肢體上面嘅相對暴力啲嘅行為啦。噉亦都有一啲人係，我唔係打嘅，我諗住畀錢你嘅，噉就好似叫金錢奴或者 ATM 奴啦。噉即係都有好多唔同㗎嘛，噉即係，你哋會點樣溝通去知道對方係玩邊一瓣嘅呢？
L：你話係咪真係要分呢？我就，如果真係玩就冇特定分……歸類啲乜嘢嘅，因為我覺得同志圈成日好鍾意歸類呢樣嘢，好鍾意分類啦。噉但係有嘅，好似有啲人係鍾意野外㗎啦，噉即係野外露出㗎啦，有啲鍾意；有啲係鍾意俾人控制啦，即係淨係面對面嘅時候；亦都有啲好似你頭先講，係會連生活嘅日常都會有規限啦，即係控制佢嘅衣著呀，控制可唔可以射呀之類嗰啲都有嘅。噉喺同對方溝通嘅時候，我都會問咗佢哋有咩玩得同唔玩得，同埋我自己就比較少去到玩日常生活嘅，即係譬如規限埋對方每日要做咩任務呀，或者點樣射嗰啲，因為我純粹覺得有啲麻煩，即係因為你每日都要諗好多任務畀對方呀，又要唔知佢係咪真係有一個信任度呀。
即係有啲人都有啲奴會問「你點樣證明我係有做呢啲嘢？」因為係一個隔空嘅對談嚟㗎嘛，係一個文字上。噉佢哋如果唔聽話，係可以自己偷偷地噉，即係自己偷偷，可能你玩一個禮拜唔射噉，對方可以自己射都唔話你知，即係可以噉樣做。但係對我嚟講，都係一個信任遊戲啦，佢想玩嘅，噉我哋一齊玩，睇吓對方可以去到咩程度。都有啲人係因為未試過玩奴，即係主奴呀想試吓，噉就同佢探索一吓。我通常都會視乎返對方嘅接受程度再睇吓點樣玩，噉我就冇特別嘅 preference 話每一次一定要有啲咩元素，噉當然我都有啲嘢係唔會玩嘅，都係睇吓大家想玩啲咩再調整。
M：你覺得呢，即係你慢慢搵唔同嘅奴嘅過程之中啦，即係頭先一開始介紹，你都係男同志嘅一員啦，你覺得男同志加 SM ，同你可能喺其他媒介接觸到嘅 SM，即係可能你透過 APP 或者有嗰啲 SM 愛好者嘅平台，你覺得多咗呢個同志嘅元素，有冇乜嘢分別呢？
L：好似之前講即係搞一個 BDSM workshop 噉樣，其實嗰陣時係有搞一個男同志版同女同志版，噉我聽返當時嘅 feedback，男生其實相對比較主動少少，即係話我有呢個嘅需要，就會好直接噉樣表達出嚟，譬如好想同對方玩，就好直接講。但女仔可能就算你內心比較想做呢件事，可能基於呢個外界對佢嘅一啲眼光，佢就比較怕醜，未必會即時表達出嚟，或者完咗個活動或者好後期先會慢慢將自己嘅感受表達出嚟。噉所以如果你話同志同 BDSM 嘅關係有冇乜嘢唔同，我覺得如果男同女嚟講，就係男仔比較直接，好主動講你想要嘅，同埋接受嘅尺度會比較大啲，同埋相對嚟講，如果調返轉女仔就未必話要玩到好唔同嘅玩法，即係好花樣噉樣，但係偏向玩之餘都一定要有嗰個愛嘅部分喺入面，即係佢哋個關係上嘅連結相對會比較大少少。
噉但係 BDSM 其實都唔係淨係得同志嘅，即係有啲譬如你 Twitter 見到都有啲係直人玩，或者係有啲男女夫妻呀，佢哋都會玩嘅。噉但係我就自己就冇接觸過啦，噉就聽過朋友有參加過啲即係直人、gay嘅，乜人都有嘅一啲聚會，噉佢哋都有講過，噉佢哋就係都會有類似一個討論噉，即係研討會，即係有試過有一個聚會，即係傾吓大家鍾意點樣玩，跟住就真係有練習噉，即係未必第一次就係去到話有啲肉體嘅搏鬥噉，即係傾吓先然後再玩。
M：頭先你講到嗰種活動呢，我諗起應該之前有接觸過有個 term 叫 Munch，M-U-N-C-H，munching。噉呢通常啲 munching 就啲人係著晒衫嘅，同埋佢哋就會好似嗰啲行業介紹會，互相介紹吓自己叫乜名噉樣啦，俾大家望吓對方係咩身形呀，咩角色呀噉樣，就唔會即刻就除晒衫呀，或者係著啲好特殊嘅衫呀噉樣。
頭先你講到話女性相對嚟講比較擔心目光呀，所以喺你眼中，男性同 BDSM 嘅關係，就會佢哋走得比較直接。可唔可以問吓呢，你喺呢一個 SM 嘅探索過程當中，有冇接觸過跨性別嘅人呢？
L：知道有呢一方面嘅人係有興趣嘅，但係玩就冇，又識過呢啲朋友噉。
M：佢哋有冇話即係對於跨性別人士嚟講，SM 又會係點樣嘅一回事呢？
L：呢個又冇喎，又唔係好清楚。
M：OK，唔緊要。頭先你講到男同志嘅 SM 圈子會比較直接啦，噉佢哋通常比較直接會做啲乜嘢嘅互動呢？
L：即係譬如佢兩個都想玩嘅時候，就會即刻會溝通，然後就會開始玩啦，即係唔會話要相處一段時間先再睇吓感覺，噉當然都有嘅。只不過我嘅意思，係大部分都係比較直接啲，想要就即刻噉樣，但都會有一啲係要搞咗好耐。我哋真係要好熟嘞，即係好 friend 嘞，噉先可以再吓一步，噉都有嘅。
M：你頭先講到話一啲互相認識、互相社交嘅一啲場合啦，喺講到你嘅身份同埋社交呢，你有冇喺公開嘅社交場合，或者圈子裏面表示過自己接觸過 SM 嘅身份呢？
L：SM （的身分）呢就冇專登去表達嘅，噉但係如果係溝通嘅過程，即係知道對方都有呢方面嘅認識，噉就會可以繼續延伸話題，但係就冇特別專登去講我鍾意玩呢啲。
M：所以就呢一件事唔會係你去對人哋自我介紹嘅時候提及過嘅話題嚟嘅。
L：唔係必須囉噉樣，咁啱都係一個興趣噉樣，咁啱對方有呢個興趣咪會講。
M：噉又係呀，如果喺你眼中 SM 係一個興趣，噉正如我哋平時鍾意打波、游水，我哋都唔會一開始就同陌生人講「我鍾意打波游水㗎」噉樣。
L：或者佢一早即係可能你喺啲交友平台寫到明嘞，噉鍾意咪直接講囉。
M：我想問吓呢，講起社交啦，即係返返去 SM 圈裏面啦，即係你經歷 SM 嘅唔同嘅玩伴啦，或者你嘅探索過程當中，你有冇見過喺你嘅圈子當中有一啲階級，或者係即係邊啲人吃香啲呀，邊一啲人係冇咁受歡迎呀，噉樣嘅一啲現象呢？
L：都有嘅，因為大部分都其實係外貌協會啦，所以即係啲好傳統嘅，譬如係高大靚仔大隻呢一啲，或者吓面好大嘅噉樣，噉呢一啲外在因素一定會吃香啲嘅，譬如你話用外形同技術嚟分次序，噉一定係外形優先。就算你嘅技巧玩法好叻噉樣，但係啲人唔會第一吓就知，所以大部分都係會睇你嘅外形。所以相對嚟講，一啲可能係唔係傳統觀念嘅靚仔，噉佢哋就未必咁多機會去搵到人合玩，或者會比較多食檸檬嘅機會噉但係都會有嘅，視乎你認識嘅族群係咩族群，即係，譬如有啲係鍾意大，有啲人鍾意肥啲嘅，或者有啲人鍾意類似咩熊呀、猴呀之類嗰啲。噉有啲人鍾意大隻嘅，噉有啲人鍾意好瘦嘅，噉就睇吓你搵唔搵到嗰啲人。當然市場嚟講，一定係大隻會最多人鍾意。
M：噉你覺得一個大隻佬對 SM 嘅 play 有冇啲咩好處嘅呢？既然佢哋噉吃香嘞。
L：如果你話玩繩綁嚟講，我覺得大隻係好睇嘅真係，譬如將啲繩綁喺佢個身，噉可能胸肌呀，或者佢嘅身形嘅呈現，噉一定係再立體啲嘅。噉但係你話係咪大隻就一定好呢？我又覺得都係要睇返大家夾唔夾啦，或者佢係咪鍾意啦，即係純粹得個外形，但係原來佢又唔係特別喜好呢樣嘢，或者好多嘢都係唔鍾意嘅，噉其實我就未必會搵佢玩 BDSM，即係可能朋友相處或者玩其他都會。噉所以係咪佢哋一定係第一選擇，就唔一定嘅。
M：噉你有冇遇過一啲係冇兩邊好嘅狀況？即係佢樣就正嘅，但係技術就差嘅，或者係樣唔正嘅，但係技術就好好嘅？
L：噉都有嘅，噉呢個世界又好少一啲十全十美嘅人，噉但係對我嚟講就樣係其中一樣，即係你唔會玩所有…即係佢樣都係只係第一眼嘅感覺，噉都要睇吓大家係咪夾嘅。同埋因為我係比較做一個控人或者主嗰個方面比較多，噉所以就我會做一個決定多啲，即係我選擇嘅多啲，當然都會有俾人請食檸檬啦，唔係我每次 approach 都會成功。
但係我覺得又冇乜所謂嘅，即係呢個世界就係一定有好多人鍾意你，或者唔鍾意你，夾唔夾亦都係好睇緣分嘅。如果係夾嘅，噉咪可以繼續玩，即係就算可能你見到話好想同佢玩，話好正噉樣，但係原來真係傾唔到偈噉就冇辦法，噉咪吓一個囉。頭先話有樣冇技術，或者有技術冇樣，噉又真係夾到我覺得都唔係問題嘅。噉但係當然啦，你綜觀返呢個同志圈嘅話，噉就未必係……未必唔係一個問題囉，哈哈！噉就因為佢哋真係好……譬如你冇樣可能就已經冇咗好多機會，或者收完你張圖就直接 block 你都有可能，即係交換相之後就直接 block 你，噉都會嘅。睇你個心態係想要搵啲咩人。
M：我哋而家開始講吓講吓，越嚟越講嗰啲咩「寂寞芳心俱樂部」噉樣呢，講吓啲人點樣拍拖。即係其實講吓有少少似嘅，又好似真係人哋揀你，你又揀人噉樣。講講吓同阿樂傾偈就會聽到，其實搵 playmate 又真係有少少似你搵一個 partner 噉樣嘅。
L：都係嘅。
M：哈哈哈！即係其實冇特別啲乜嘢好唔同，都同你夾唔夾，你想食樣定係食技術一樣。但係我又好奇呢，頭先你講到話即係交換相，同埋拍拖，我哋講到話真係有少少似拍拖噉樣，噉你拍拖你中咗伏，噉你分手啫，噉但係你 SM 會有一啲風險㗎嘛？
即係你例如約咗出嚟，有人身上面嘅危險，即係輕則俾人偷嘢，即係重則整傷自己，話就話係好似搵 partner 拍拖啫，但係風險係存在嘅。喺你嘅經驗嚟講，即係我哋成日都網上面都唔同人有講過話，SM 你要有 safe word、你要有安全語嘞，噉喺你嘅經驗當中有冇啲其他嘅習慣去即刻剎停一啲 play 噉樣呢？
L：噉我覺得我比較好嘅地方係，因為我唔係一個被動方，因為好似你頭先講呢，其實作為 Sub 啦，或者奴嗰啲呢，真係有啲人係因為擔心對方唔喜歡，而唔將自己嘅一啲感覺呈現出嚟，噉就會有好多嘅不安，即係完咗嗰個玩樂之後，會帶住一啲唔好嘅情緒走。噉但係因為我係一個會講自己內心嘅人啦，同埋我係比較主動方嗰個，所以可控制嘅嘢比較多，即係譬如係喺邊度玩呀、玩啲乜嘢呀、同咩人玩呀，噉呢啲我都可以控制。
噉但係當然我都要同對方傾嘅，同埋譬如你頭先都有講啦，譬如係影相呀，可能係玩一啲自己唔鍾意嘅嘢，噉你都要夾咗先啦。即係，譬如我都鍾意影相留念嘅，噉如果對方真係唔鍾意影，或者有啲地方係一影就俾人認得嘅，你就要小心處理囉。我都有聽過頭先你講嘅，譬如有啲相嘅威脅，或者會玩嗰啲越軌嘅行為呀，或者係一啲可能食咗藥跟住迷暈你呀，即係呢一啲都有嘅。噉如果真係識到呢啲朋友，我都會希望可以作為一個少少嘅過來人噉樣，同佢哋講吓呢個世界唔一定係噉美好噉囉，哈哈哈！
因為有啲人仍然覺得，即係你個腦海嗰啲嘢就係真噉嘅，但其實呢個世界好人都有，但係都有壞人，如果你知道有啲乜嘢係有機會、有風險，你都要識得保護自己。
M：OK，呢個世界的確唔係美好。頭先你講到影相呢，我都突然間諗起，即係尤其係呢啲涉及到好親密，或者甚至唔一定想俾所有人知道嘅一啲行為，時不時我哋都會聽得到有啲講叫「影像性暴力」呀嘛，即係你要例如講分手，要威脅對方就又話我影咗相、我錄咗片，你唔聽話呢我就威脅你，我就將啲嘢擺晒上網。即係呢啲嘢喺我哋上網或者睇新聞都…喺一啲人哋拍拖嘅場面中都會見過。噉尤其係呢啲 SM 可能好多時候都會除晒衫，或者好赤身露體嘅狀況，正路嚟講，我哋係可以拒絕嘅，即係話我唔想影相或者係我唔想被記錄落嚟，呢啲好正路啦。但係，你有冇啲咩經驗或者聽過有冇人嘅經歷，係佢用啲咩方法可以 check 到一個陌生人，你哋一開始即係要玩 play 嘅時候，點樣防偷拍或者係唔安全噉樣呢？
L：如果你係擔心嘅話呢，我會建議係首先睇吓你同對方溝通嘅程度去到邊啦。純粹係話我好想玩，跟住就即刻約，定係都有傾吓大家有啲咩玩得唔玩得。另外，場地嘅話，如果你擔心，我都會建議你揀一個你認為安全嘅地方，可能係自己嘅屋企，或者係酒店嗰啲。如果你擔心對方唔知係唔係壞人，你驚佢會有啲偷拍 cam（相機） 喺屋企嘅話，噉就唔好去人哋屋企，因為人哋屋企就係人哋嘅地頭呀嘛。
M：噉但係佢去自己個屋企，噉人哋咪會知道自己住邊囉。
L：係呀，噉呢個都係另一個擔心嚟嘅。所以如果你話你又冇地方又想玩，噉最理想就酒店啦，即係大家都冇優勢噉樣。如果你話酒店有 cam 就另一回事啦，大陸嗰啲有聽過。另外玩嘅時候呢，你話影相，如果你擔心的話，就用自己部電話影啦，即係唔好用人哋嗰部，同埋唔好戴眼罩玩住，因為雖然戴眼罩都係一個玩法嚟嘅。即係你有一個自己腦補嘅畫面會好興奮，但係如果你仲未有一個信任度嘅話呢，就可以擘大眼睇住自己點樣俾人玩，或者玩成點。口球亦都係一個工具啦，你都係擔心嘅話，就唔好用口球住嘞，起碼你都仲講到嘢，佢都聽到，你真係要大叫隔離都聽到。口球雖然都會講到嘢，但係會變得好細聲或者變得一啲語音狀嘅表達噉樣，就比較難表達你想講嘅嘢。
但係所有嘢嘅前提都係講緊一個信任度嘅，如果你唔信佢，我會建議你直接唔好同佢玩，因為如果你帶住一個咁懷疑嘅心去玩，其實你都唔會好 enjoy 嘅。
我就算同任何人玩，我都會……可能佢都未必對我有信任度嘅。有時候我會見到佢嚟就好緊張好尷尬，個氣氛都唔係可以進入嗰個狀態，我會寧願同佢傾吓偈先，等佢有個安全感，會覺得都開始舒服，先再慢慢去發掘或者同佢玩。如果佢真係唔開心，我會寧願唔玩，噉就算，如果唔係佢玩完唔開心，一來佢自己唔好啦，二來佢想公審你亦都可以公審你，唔好突然間喺 Twitter 講邊個邊個，噉都無謂啦。
所以我就覺得，如果你真係想玩嘅話，噉就……係囉，即係自己要保護自己，同埋一定要表達自己嘅一啲諗法，唔好真係以為人哋係主就咩都聽佢講。除非有另一個玩法啦，又係有啲好鍾意俾人操控嗰啲奴，係鍾意一啲好強悍嘅命令式嘅，但係如果你唔係玩嗰啲嘅，就好似頭先講，係可能用自己嘅電話影相啦，就唔戴眼罩啦，同埋有基本嘅信任了解先同佢玩。
M：頭先你講到好多啲貼士呀，即係減少一啲你睇唔到、聽唔到嘅一啲場合啦。喺云云嘅 Twitter，呢個活色生香嘅 Twitter 當中浮沉，你有冇見識過有一啲人可能係 SM 不特止，仲會有一啲更加危險嘅行為嘅？有冇啲乜嘢寄語，即係趁大家而家聽緊呢個節目，你可以提防吓一啲可能 SM 初哥，正如你好似一開始接觸上咗嗰堂 workshop 噉樣，又啱啱嚟接觸嘅，即係令到佢哋喺我哋準備收結之前有啲嘢準備吓先，提防吓先噉樣呢？
L：最主要就係唔好因為一時嘅慾念、性慾就去做一啲後悔嘅事情囉。因為譬如你頭先有講，網上世界都會有啲人玩得好過份，或者玩得好激動噉樣嘅，玩任何嘢，我覺得你一定要知道嗰樣嘢個尺度，同埋有冇後果囉。
因為你講，即係你老師訓話噉同對方講，人哋一定唔會聽嘅。因為佢覺得你都係想唔畀我玩啫。好多人都係試過，先會覺得原來真係你講中噉樣。但係如果要避免呢一個體驗過先後悔呢個狀態，就畀對方知道多少少，究竟佢真係要玩呢啲嘢，係點樣玩呢一個過程，或者係有冇啲後遺。
譬如好似有啲人玩後穴嘅，即係玩拳交嘅，拳交都係一個玩法，噉，但係如果你過份擴張，你嘅後面有機會令到你嗰個排泄，有機會即係會控制唔到，或者有一啲朋友係玩到後面，係影響到自己嘅生活，好似成日都想去廁所，但其實冇嘅，即係佢潛意識覺得想去，所以佢經常去廁所嘅頻率會令到影響佢嘅工作，未必噉容易搵到工作，噉就令到佢有啲情緒嘅變化。噉亦都有啲人玩 chem (chemsex)，可能都係會有一時嘅興奮，但完咗散咗嗰啲 chem (chemsex) 之後，亦都會有唔同嘅後遺啦。
所以呢，所有嘢都要同佢（對方）講吓：你想玩係 OK，我唔會直接同佢講你唔可以玩，因為好多人唔會聽呢啲說話。你話「唔可以，我鍾意玩喎」，但係我會同佢講吓，究竟所有嘢玩完之後會有啲咩過程或者結果。如果係真係想嘅，我表面上都會由得佢，暗地裏都會睇吓有冇啲咩可以回轉一吓佢，都會起碼去知道，如果佢真係要接受呢個後果，都係佢嘅責任，同埋佢嘅選擇。當然我都唔希望之後要有啲後續去 support 佢啲乜嘢，因為我唔想有啲咩令到佢唔開心。噉但係而家真係都會有啲人咁堅持噉都無計，噉就前提，你要知道所有嘢。
M：頭先你講到呢，我心裏面一路聽一路覺得，嘩，我今次可以搵咗一個極有良心嘅 Dom啊！
L：係呀，有啲冇良心，哈哈。
M：可以去聽嗰啲苦口婆心嘅勸言。我覺得今次同阿樂傾呢一個訪談，令到我唔單止學識咗，就係如果你要有一個新嘅 playmate，你至少可以點樣自保之外，你亦都可以知道，呢個文化無論係唔係同志都好，你去嘗試唔同嘅文化，尤其係一啲可能有涉及少少風險嘅文化當中，你一定會有一啲需要自己權衡後果同埋後遺，後遺症嘅一啲狀況。
噉有好多人呢，即係我之前頭先講到，我近排上咗個 workshop，佢（工作坊主持人）呢講咗一句說話，我又想呼應返：嗰個主持人有講，佢就話，佢知道有一個人，佢本身諗住試吓俾人綁，後尾呢就被綁佢嗰個人性侵。
性侵完之後呢，在場有另外一個人喺度嘅，噉啲人就會調返轉頭問呢個在場第三者「點解你當時唔同佢（被害者）講聲，即係呢個人（施暴者）其實有噉嘅企圖呀？」或者係「點解你（被害者）嗰陣時唔報警呀？唔阻止佢呀？」嘅時候，嗰個第三方佢就會話，因為被綁嗰個人佢係成年人，即係佢自己決定啦。即係你係成年人嚟㗎嘛，你話得事㗎嘛，你有思想㗎嘛，噉佢就完完全全將個責任卸晒畀受害者嗰一方。即係喺呢度我順便都講啦，即係冇錯，即係通常做得呢啲行為嘅人呢，都會假設係需要成年啦，噉無論聽緊嘅你係成年或者非成年都好啦，喺了解或者想進行一件事之前呢，係一定要搵清楚究竟佢嘅好處同埋壞處嘅。
每一樣嘢都一定會有好處壞處嘅，正如我哋而家用電話，佢都唔一定永遠有好處，佢都有壞處嘅，如果唔係就唔會有噉多都市病啦係咪先。所以即係我哋搵嘅嘢係冇錯，chem fun 可能好開心，例如 BDSM 都會有好 enjoy 嘅過程，噉但係佢都會有潛在嘅風險，呢一樣嘢係必須要知咗先，就唔可能係話，我年紀輕所以冇所謂，我年紀輕可以慢慢 recover，會好返，噉唔係一個長遠玩得住嘅一個心態囉。
所以好感謝今次阿樂話畀我哋聽，即係你嘅一啲心路歷程，一啲經驗之談啦。我哋呢一班嘅聽眾，包括我自己都學咗一啲嘢噉樣。最後喺我哋收尾之前，你有冇啲乜嘢想講吓推介吓，畀聽眾們拎走嘅嘢呢？
L：如果你即係，我覺得呢個情趣嘅玩法啦噉樣，其實都好多嘅，即係好似頭先講 BDSM 或者其他噉樣，即係我覺得你，大家都可以去探索吓有啲乜嘢自己鍾意或者唔鍾意。噉喺好多時候都會俾一啲價值觀去局限，即係譬如男仔為例，有啲人會覺得1/0就係，即係我就一定只可以玩1/0：1就要做插入，其他嘢就唔關我事。
可能你接觸唔同嘅玩法，其實都可以令到你一啲可能情人之間，或者可能真係純粹玩伴之間都會有一個情趣上嘅加乘，可以令到個玩法會有多啲變化。即係特別而家網絡都好發達，即係你睇個Twitter 都可以見到好多有趣嘅玩法，噉你可以畀自己慢慢探索吓，搵吓自己鍾意啲乜嘢。
M：好啊，感謝阿樂有呢個好好嘅收結。呢一樣嘢我相信畀同志，或者非同志們都一樣受用嘅。無論而家疫情又好，之後疫情過去都好啦，我哋情趣呢件事就唔限時間同地域嘅，尤其係而家有噉多虛擬上面嘅一啲互動，係咪先。
聽完今集嘅大家們，如果你有啲咩想法或者建議，都可以 message 我哋去再睇吓有啲咩 feedback 嘅。《點止港同志》係一個以香港同志角度出發嘅 Podcast，希望可以將大家生活裏面嘅性別同同志議題，用廣東話嘅聲音同文字方式保留同流傳嘅。每一集嘅 Podcast 我哋都可以製造文字檔，畀唔方便聽聲嘅朋友都知道我哋嘅資訊。
多謝你今次收聽我哋呢個節目，而且嚟聽到最後啦。如果你想聽到吓一集嘅內容就訂閱我哋啦。假如你對呢個主題有共鳴，你想分享你嘅故事畀我哋知道嘅話，歡迎你喺 Instagram DM 我哋 pridelabhk。亦都歡迎你喺 Apple Podcast 吓面留言，同埋畀星星嘅回饋。你嘅支持同埋鼓勵將會係我哋默默耕耘嘅動力。今集就去到呢度先，期待吓次同你《點止港同志》。Bye Bye！
L：Bye Bye！