第二季開始，以「跨越情慾，性/愛非二元」打頭陣！
今次我哋邀請跨性別嘅一員黎分享下自己「搵關係」嘅經歷，從云云外協慾海中，碰碰撞撞，點樣尋找對象。
話明「非二元」，Liam都會講埋發現自己嘅情慾傾向轉變。
章節
| 開始時間 | 標題 |
|---|---|
| 00:03:00 | 作為跨仔，喺過渡期經歷嘅心理轉變 |
| 00:04:45 | “Transition” 係咩意思？有邊兩種？ |
| 00:06:00 | 性別認同 v.s. 性傾向 |
| 00:07:00 | 順性別係咩？ |
| 00:10:04 | 「順直」與異性戀優勢 |
| 00:12:41 | 點樣搵對象？唔係個個跨仔都同les有關係 |
| 00:15:14 | 面對For Fun市場，點搵長久關係對象？ |
| 00:16:05 | 親身經歷，Apps騙徒手法層出不窮 |
| 00:19:00 | 照騙到不同膚色都有？ |
| 00:22:00 | 點解成日都好奇性小眾「性」嘅部分？ |
| 00:22:46 | 每個人嘅Sex咪係「有咩咪用咩囉」 |
| 00:26:13 | 專題問題：你嘅性愛比例係點？ |
| 00:29:50 | 除左性同愛，關係仲有乜嘢？ |
| 00:33:10 | 跨性別一員交友時表露身分嘅矛盾 |
閱讀更多：
How Transitioning Affects Sex Drive and Porn Consumption
【專訪自己人】跨仔的情與慾（Feat. Liam）
M: Martina
L: Liam
M：歡迎大家返到嚟《點止講同志》，我係主持人馬天娜。今集我係想講吓關於跨性別議題。其實都算係一個大主題入面一個細分支。呢個大主題就係同唔同嘅情慾傾向，同埋非二元嘅性小眾有關。今次就邀請咗一位跨性別族群嘅其中一員。可唔可以介紹下你自己先？
L：Hello 大家好，我叫Liam，我係一個跨仔，我嘅pronouns係he/him。我自己本身嘅性傾向係pansexual，性別喺我自己情感上嘅傾向其實唔係佔一個好重要嘅考慮因素。
M： 講起pansexual，我近排都有個新term, 等陣再請教你，睇下你有乜嘢想法。我有一個point係想remind住大家，就係之前可能都有提及過，我對於英文同埋中文形容詞嘅關注，所以我喺敍述呢啲字眼嘅時候，我有陣時都會用廣東話中文去諗呢件事，點樣可以同朋友完全用廣東話去講呢個字眼。所以我等陣都會再問你關於呢啲字眼嘅開題。頭先你講到你係pansexual，可唔可以描述一下你呢個傾向？如果你要同一個朋友講「我係pansexual」，你即係一個點樣嘅意思呢？
L：通常我同朋友去講嘅時候，我有時未必會講「我係pansexual」，或者我會直接講「我唔係好care性別呢方面，我淨係鍾意嗰個人，性別係乜嘢我就唔在意」。有時候大家聽完，佢會覺得：「係，我係鍾意佢個人，唔係鍾意佢個性別」。而性別呢個部分我就唔會好care，性別係點樣、身體係點樣對我嚟講就唔係好重要。有陣時搞笑少少，我會話：「我淨係鍾意人」。跟住大家就會get到。
M：以一個「我鍾意人，唔會特別以佢嘅性別去區分」，作為你解釋俾朋友或者身邊嘅人嘅一個方法。我想問你pansexual呢個傾向有冇轉變過？即係例如有一啲人會由以為自己係直，跟住後尾覺得自己好似冇一個直嘅傾向，跟住後尾先發現自己係Lesbian。會唔會有咁樣嘅轉變？
L：其實係有。我諗初初開始係同我自己跨性別嘅經歷嗰個gender dysphoria嗰度，開頭會令我覺得鍾意男人會令我less of a man嘅感覺，呢個係我transition非常初期嘅時候，我係會有強烈呢種感覺。我都唔知邊度嚟嘅呢一種感受。我諗去到後期，已經開始用咗藥一段時間，我自己對自己嘅身體都感到自在，對自己個外型上都感到自在嘅時候，我就開始去諗返究竟係咪真係咁樣呢？喺去explore自己情慾、同朋友去傾偈嘅時候，其實都唔會話表現出我有少少對於其他性別嘅一種情慾傾向嘅可能性。大概喺我19歲嗰陣時去explore呢一方面，我就覺得唔同性別我都OK，當時我記得係真係去同一個男人一齊，佢係一個cis嘅男人一齊，其實係喺大概上年嗰段時間。雖然唔係一個太好嘅experience, 但我都覺得可以，即係我個人覺得係可以試下。因為開頭我係完全覺得「我係一定會係直」，咁可能呢種思想係有少少被社會傳統嘅價值觀係會有少少影響，後來我可能接觸多啲diverse啲嘅朋友，同埋有唔同性觀念嘅人之後，我覺得我會open up咗自己，跟住去試或者去確認自己係pansexual。
M：中間有一啲字眼，我想你同更加多未必咁熟悉嘅人去講多啲。頭先你講咗幾個字眼，第一個字眼叫transition，即係由你transition嘅過程之中你覺得當時同一個男性交往、拍拖嘅時候，你會有一種好似唔係好夠男人。咁你嗰個transition係一個乜嘢嘅意思？
L：Transition其實就係我性別轉換個過程入面，佢唔一定係一個醫療嘅轉變，可以純粹係喺社會上用男性嘅身份去生活，即係可能希望人地用he/him嚟叫我，用男性稱呼、用男性身份嚟對待我。而喺呢個case入面，我主要focus喺醫療上嘅轉變。因為生理上嘅轉變，包括把聲、身型、同埋毛髮，唔同嘅嘢，係會令我心理上都會有更加自在，同埋嗰個性別不安會低咗。我發現當我自己接受到自己呢個狀態嘅時候，就會令自己當時覺得：「鍾意一個男人令到我冇咁男人」呢個思想係會冇咗。
M：另外我地頭先講咗好多「男人」呢個字。當中你都有提過一個term叫cis-man，咁cis-man我再拉埋去頭先你有講咗話「你曾經有一段時間作為跨仔，你係應該要係直嘅」，趁呢個機會都攝一個訊息：你嘅性別認同，同你嘅性傾向係唔一樣嘅，係兩個唔一樣嘅話題。換言之，你對自己嘅性別有乜嘢嘅想法，你覺得你係一個跨仔，依家用一個term去形容你嘅性別都好，同你喜歡啲乜嘢對象，係分開嘅。所以你頭先講到話，你覺得有一段時間係喜歡女仔，呢一個係直嘅行為，對於一啲可能第一次接觸跨性別嘅朋友嚟講，就會有啲混淆。即係「咦？你唔係一個出生性別係女仔，你喜歡女仔，咁你唔係les咩？」有啲亂，所以我依家同大家複習多一次，性別認同同性傾向係兩樣嘢。另外再返返去，頭先你話cis-man，咁cis-man係乜嘢嚟？可唔可以解釋下？
L：咁cis-man全稱即係cis-gender man，其實cis-gender係乜嘢呢？cis-gender就係順性別嘅意思。順性別其實就係指緊基本上大眾主流。順性別就係一個人佢出生時指定嘅性別，同佢認同嘅性別係符合嘅一個人：譬如佢出生時男仔，醫生都幫佢寫M喺佢個出世紙上面，而佢一直以嚟生活、同埋佢內心認同都係用佢男性呢個身份，咁佢就係一個順性別嘅男人。而可能大家覺得，有時候會有少少混淆咗性傾向同性別認同嘅時候，可能有啲人會認為：係咪gay and lesbian都唔係順性別呢？其實唔係。gay and lesbian如果佢都係呢個情況下，其實佢都係一個cis嘅人。
M：我諗用返我自己例子，我係一個cis-female, 順性別女性嘅lesbian。就係我出世性別被判定為女性，然後我又以女性身份自居，跟住喜歡係一個同性嘅傾向，就係咁啦。所以係無對沖、無衝突。
頭先你講到有好多pansexual喜歡嘅對象，你同啲乜嘢你嘅社交圈子會講起呢一個傾向呢？譬如會講起「我係pansexual」，你會唔會特定同啲咩圈子講呢？定係你所有人已經知呢？
L：本身又冇話特定同咩人講，自己會喺自己social media個profile度已經寫咗話「我係一個pansexual」。至於啲人知唔知呢，我就唔知都唔係好理。但如果你話面對面同大家交流嘅時候去咁樣講自己係pansexual，或者係highlight呢樣嘢出嚟？其實會係同返一個trans圈子，或者都係LGBT圈子入面嘅人講會多少少。我會傾向喺知道咗嗰個人係友善嘅情況下，我先會同佢講多少少。如果嗰個人本身冇呢個概念嘅時候，一嚟我要花多啲時間同佢解釋，二嚟係所謂「順直」嘅世界入面生存緊，但我冇乜點講我自己嘅情況。其他人可能就會覺得：「可能呢個男性身份生活嘅人，其實佢都有一個傾向，佢可能會鍾意男人」，跟住就會有一啲人，佢就會有一啲思想係會覺得，我都聽過佢就係會覺得唔係咁舒服嘅嘢就係「佢係gay嘅，佢可能會鍾意我啦」，我有少少怕呢啲嘢。我會覺得其實唔make sense，即係一個直人你都唔會全世界嘅女人都鍾意啦。我唔想花時間同呢啲人講太多。所以我本身知道佢個態度係會有少少呢啲misogynize，就唔會同佢去講喧多。講真，我個性傾向係乜嘢，都唔係好外顯一定要交代嘅一樣嘢。
M：頭先你講到一個字，我又要正字小特警同大家去複習下。你講「順直」，你係咪講緊「順性別直人」，即係異性戀嘅族群？即係AKA依家我地身處社會嘅大眾族群。順直嘅圈子。點解我會問起呢個問題，我都係順便解釋：喺我地生活當中，例如同你嘅同學、同事，或者你上網睇到，相處咗好耐嘅朋友們，佢地都會好順攤，好順理成章地講「我結婚啦」，「我同邊個人一齊住」。其實佢啲字眼係一啲順直嘅訊息喺度。調返轉嚟講，例如係喺公司嘅空間，喺同學嘅空間當中，會有你嘅朋友們會問：「你幾時結婚呀？」「幾時見到你男朋友呀？」「你老公嚟唔嚟呀？」，即係喺呢一啲場合當中，你就會有一種「咦？如果我答你我帶嘅唔係我男朋友，我帶嘅係一個我女朋友，咁你地又會點睇呢？」，我應唔應該好似我身邊嘅直人同事講：「我男朋友等陣嚟接我收工」，我調返轉講，將男朋友改成「我女朋友等陣嚟接我收工」，即係喺呢一啲細細表達嘅位置上係會有一啲轉變。心態上係會有一種忐忑：「我咁樣話咗俾你聽，等於你知道其實我唔係同緊男人一齊」。去返頭先我地呢個問題裏面，我都明白好多我地呢啲小眾喺呢啲時間，會採取相對被動嘅位置，會覺得實在有太多人第一下俾你嗰個意識同埋回應唔係好友善。當中潛在住好多不論係父權又好、直人思維又好，或者係佢單純無惡意，但係佢真係諗唔到咁多嘅一個狀態，絕對係可以理解。同埋我自己都慢慢咁樣load返出嚟，知道原來喺日常生活中已經內化嘅呢件事。我唔會話俾你聽「我男朋友」，我話俾你聽「我有女朋友」嘅時候，其實你係有個轉變喺度。
頭先你都講埋，當你講咗自己係pansexual，或者你唔係順直嘅時候，其他人有可能俾你嘅一啲反應。我想進入多少少intimate啲，講你嘅生活。頭先你講咗話你同過男仔相處，咁你識呢啲對象係用乜嘢方法呢？
L：我當時認識呢個對象，其實係喺呢個grindr都認識。老實講，我自己，可能有一啲trans，特別係跨仔，可能佢喺未transition，或者係呢個中間個過渡階段，佢有喺lesbian個圈子度叫做浸過。但我自己就唔係話好喺嗰個圈子度浸過。即係我喺lesbian個圈子度，我反而係會形容自己係一個cis-het嘅人喺度睇lesbian嘅圈子。喺我未知道有啲lesbian嘅朋友同我講，我反而會覺得「我都唔知入面嘅文化等等會喺度啦」
M：頭先你講到cis-het, 即係順直人？
L：係，順直。
M：繼續。
L：我自己反而會喺個gay圈子入面，我發現自己係pansexual之後，我發現gay圈子入面浸得比較多。我會覺得譬如grindr咁樣，雖則話我自己都有聽過好多跨仔朋友覺得grindr係一個比較sexual啲嘅地方，即係佢有好多樣嘢都係同性有關。但係當然佢係有一個好重嘅呢樣文化，所以我會形容grindr係一個令人又愛又恨嘅地方。所以呢個嘢都係我不斷會聽到好多人咁樣講嘅地方。當時我真係同嗰個人喺grindr度認識，我亦都有用過其他app，睇下嗰個人你係想要啲咩。當然嗰個地方係真係比較多人約炮，比較多人去look for fun，比較少人係look for LT，即係Long term relationship。好多時候嗰個對話、文化相處上面好快就會去到性呢方面。可能一個男人多啲嘅地方就會，唔係話stereotype，可能荷爾蒙問題，大家個sex drive會勁啲，所以嗰個地方會係sex-oriented多啲。所以「性」喺grindr上面嘅比重會係特別大。
M：因為呢個「性」嘅比重，同埋grindr呢個生態係好似性為本，呢個文化，會唔會導致你喺呢個app或者其他app有難處？你係想搵long-term relationship，但對方就畀個茄子emoji 俾你，問你今晚出唔出去，咁點算？
L：老實講，我開頭就覺得對於約炮呢樣嘢，或者對於大家好多性相關嘅嘢都幾抗拒。我會想去了解下呢樣嘢，或者我會去睇下，我係用開放性嘅心態去試。我自己本人都唔係話抗拒約fun呢樣嘢。初初開始老實講，我都係約fun呢個方式去test緊自己嘅性傾向，算唔算係咁講呢？可以算係test緊，去explore緊。我覺得係有少少幫助到我自己去explore自己。當然啱啱開始嘅時候，因為唔了解呢個身體，只能夠話有少少年少無知，去探索grindr呢個世界嘅時候，其實係好容易受騙。可以話係受騙。因為當中grindr我諗用過嘅member都好清楚，其實上面有好多假相，有好多人會用假identity，好多詐騙嘅嘢會喺上面。甚至有啲性健康上面，或者一啲好多有風險嘅嘢都會喺上面搵到。但係啱啱開始嗰陣又真係唔知有呢啲風險，所以其實都有少少中過伏。我到依家都興幸自己係一個健康、安全嘅狀態下係無事。當時我喺係grindr識呢個cis嘅男人，佢都年紀比我大一截，都係偏大。而佢呢，其實唔係一個gay man，佢係一個bisexual嘅人。佢以往其實就冇同過一個男人一齊，即係完全係男仔look，trans跨仔更加冇。佢以前淨係同過一個女仔一齊，全部都係好女人嘅女人嚟。最接近嘅一個，我記得佢係有同過一個tomboy一齊。當時其實我地都係抱住一個試下嘅心態，但其實唔係一嚟就係一啲好正常嘅sequence我只能夠話，後來就冇再繼續，而呢個經歷都令我喺搵partner嘅preference上有少少唔同咗。
M：你頭先講到個app有好多假人，呢件事真係作為一個有碌過下啲女同志交友app嘅人，我不得不講呢件事唔係咩專屬男同志嘅問題，或者grindr問題。喺啲les嘅app都極多假人假相。即係你一望落去，好明顯唔係喺你身邊附近嗰啲街坊嚟。嗰啲樣、啲名全部都唔關事。甚至誇張到係碌廿個，得五個係街坊樣，其他十五個咩詩詩、欣欣，（笑），即係一啲完全唔關事嘅名。
L：我有試過睇過嗰啲lesbian嘅app，HER嗰啲，我有睇過。但係我唔係話真係不斷咁樣用，但我有睇過。我知道全部都係嗰啲，但lesbian唔會鍾意我哋嘛。所以我都係齋睇。但我覺得grindr圈佢更加多嘅，唔係一睇就知係假嘅嘢，而係好多人會用嘅假相可能係十幾年前嘅假相，又或者唔係佢嚟，但佢一直扮嗰個人。當然呢個位唔係去歧視啲少數族裔，即係可能會有一啲少數族裔、南亞裔嘅人佢會用鬼佬（編按：粵語中稱呼白人的俗語）嘅相，自己扮一個鬼佬去約人出嚟。可能你出到嚟，你見到會有一啲位令你覺得危險。我自己都試過有一次…
M：但呢個位有啲搞笑，我依家想像個畫面係，我假設我係一個啡色皮膚嘅人，我用咗個白色皮膚嘅body，我點搵到你呀？
L：所以其實你一出嚟，你就會知道有問題。我都好想分享下有一次一個咁驚險嘅經歷。有一次我記得就約咗嗰個人出嚟，喺一個幾僻嘅地方，我諗返起都覺得其實係危險。當時喺青衣一條邨嘅側邊，嗰時係日頭，佢話自己係一個香港嘅法國人，但一聽到啲口音已經覺得唔對路。跟住我離遠望到係嗰個，我嗰陣都大膽，我行埋過去，跟住知道真係佢。跟住佢開始打電話，我唔知咩事聽唔明，跟住我覺得好恐怖，就即刻跑走咗。我就話「我有啲嘢要覆呀」，我就一路喺嗰個偏僻嘅地方一路跑到去一個多人嘅地方，跟住逃走咗。覺得好恐怖。
M：所以你最後你冇同嗰個人真人對話過？
L：係，跟住我block咗佢。我嗰得我幾大膽，嗰陣同佢打咗個招呼，跟住就跑走咗，block哂佢。
M：OK~多謝你話俾我聽原來有呢一種嘅風險。再講返其實我地以前第一季嘅時候，都曾經講過chem-fun，喺嗰個節目入面都有講過，其實男同志圈入面fun嘅文化，除咗有性愛文化，亦都有物質、同藥物相關嘅一啲文化。雖然呢一集嘅主題唔係講呢個，但的確喺網友，網上交友圈子當中，認識陌生人唔多唔少，無論任何性傾向、任何性別識同嘅人都會有潛在風險。我呢度唔係要勸喻人地唔好網上交友，呢個係一個無意義嘅倡議，但大家要知道有呢個風險，同埋呢個潛在因素。
頭先你都講都話for fun，不如講下啲fun話題，Happy ending嘅話題。我想分享下點解我會諗起一個關於Happy ending嘅問題，就係好多時候同陌生人講起我同我女朋友嘅時候，喺一啲茶餘飯後之中，就會出現咗一個狀況，就係佢會問我：「點樣同你嘅女朋友咩咩㗎？」，或者係「你地喺床上面係點樣㗎？」。咁作為一個跨仔，作為一個認同係Pansexual嘅一位朋友，你同人地講起你嘅性傾向嘅時候，會唔會曾幾何時俾朋友講起、好奇你嘅性嘅部分呢？
L：都有。甚至我媽都有問過我。我媽成日都好好奇呢啲嘢，不過我同我媽其實係好close，所以其實咩都講。真係有唔少人會問。特別我呢個情況係pansexual，甚至有其他跨仔都會問。當然你去同唔同嘅性別嘅人有性接觸嘅時候，即係都好唔同，我會話會based on你有啲乜嘢而去活用佢。
M：所以你嘅回應係：你有咩就用咩啦！
L：係。即係要大家溝通下，你有咩咪用咩。其實even係一個異性戀嘅couple，順性別異性戀couple，其實都唔係話淨係得插入式性行為先至係性行為。本身性行為呢樣嘢都有唔同形式可以進行。呢啲咁private嘅嘢我覺得係都係私隱，其實大家係唔應該咁樣去問。除非真係好friend好friend好friend，friend到係呢啲都可以拎出嚟講、可以講，但係如果同呢個人又唔係好熟，我會覺得「關佢咩事」。
M：因為好多時候，好多人單純以一種好奇嘅方式去問，佢可能本身個立心唔係有乜嘢想冒犯，但呢一種經常性，即係我俾你問一次就一次，但我俾十組人問我就答咗十次啦嘛。所以對於性/別小眾嚟講，問到呢一啲同私生活相關嘅問題，某程度上係有少少獵奇成分。係知係好奇，係知係有啲唔同，你可以想像都想似到，但係呢種問題幾時要問呢？我諗我自己私心有一個想像畫面，就係如果你地大家有睇過sex and the city《色慾都市》裏面，可以暢所欲言講自己用過震動器，同過幾多個男伴一齊過嘅時候，嗰一位角色佢身邊係乜嘢人呢？係佢啲姊妹、閏蜜。我講呢一個位就係可以解釋得到，依家大部分嘅人嚟講私生活，通常係去到呢個level。當然有啲人係好冇問題，你鍾意就同身邊嘅人講你有好多個性伴侶，或者係你有嘅情節係有幾濤濤江水浪濤盡咁樣，都得嘅，只不過係依家我地身邊大部分圈子嘅人都覺得呢種係一種私生活，亦都希望聽到呢個節目嘅朋友們可以喺好奇之中，都要睇下你嘅問題會唔會令其他人有一種「咦？你平時唔會咁樣問㗎喎」嘅一個狀態。
L：同埋我覺得亞洲社會，或者香港特別係。喺「性」呢一方面，一個人佢可能性生活比較多，就實俾人shame，即係實會有好多批評、judgement喺度。呢個都係一個會令大家比較少去講關於性、閞於自己性生活嘅一樣嘢。因為其實大家都會驚俾人judge，當你去講得真係好open嘅時候，聽嗰個人又可能比較保守啲，跟住佢可能會去Judge你呢個生活係點樣點樣嘅時候，我就會覺得其實揀同邊啲人去講，其實都係一個好重要嘅一點。因為如果我講完出嚟之後，跟住又有一大班人judge你，你唔應該點樣點樣，其實又係kick。
M：頭先你一開始好似有講到話，你嘅性同愛嘅比例。對於你嚟講，本身想搵Long-term relationship，雖然中間有用fun嘗試梳理自己嘅傾向係點。你會唔會想喺呢度講多少少性同愛嘅比例，作為一個跨性別，Pansexual嘅人，你個人嘅性/愛比例係點樣呢？有冇得比呢？
L：講到呢一個位有一個經歷想分享。就係因為trans真係選擇做HRT，荷爾蒙嗰個替代治療嘅時候，我地跨仔會打荷爾蒙，我會覺得呢個經歷好特別嘅就係，喺未打荷爾蒙之前，我係一個都算係冇乜慾望、冇乜需求嘅一個人，咁嶺因為以前個dysphoria係好嚴重，甚至會好討厭性呢樣嘢。我細個連裸體都驚。但係依家一打咗針，加上自己更加open minded咗，知道咗更加多嘢，同埋explore咗更多可能性嘅時候，我就覺得其實係呢一方面，性嗰個比例係會佔重咗好多。我諗一部分都係同荷爾蒙有好大關係。因為打咗雄性荷爾蒙落去之後，其實大大地提升嗰個性需求。呢個亦都解釋咗少少，啲人會話「男人會用下體諗嘢」，我諗呢啲雖則係有stereotype嘅成份，但係其實係有少少根據，係同荷爾蒙有少少關係。我會覺得以前性嘅佔重係會低好多，去到依家呢個階段，我會覺得性嘅比重會大咗少少。我諗去到中間有個階段，我會覺得性嘅比例會高於愛添。但去到依家我會覺得，我自己係比較balance。
M：你覺得你有呢個轉變，由你頭先話開始你嘅荷爾蒙過渡、轉變、療程，去到你曾經有一度性嘅需求係高於愛嘅需求，到依家好似有啲平衡。你中間係點樣轉變？因為你仍然繼續緊你嘅HRT嗎？
L：我覺得我自己係一個比較分得開嘅人，開頭唔係啦。但我用咗荷爾蒙之後，我自己係分得開咗。當然唔係話因為咁，我就會有Partner情況下仲繼續點樣約fun，我就唔會咁做。我會覺得用咗荷爾蒙之後，更加大部分係生理上會唔同咗，比較容易會引起咗嗰個sex drive。我記得有個調查係做過，係一個外國嘅調查，講一個跨仔佢用藥之前同用藥之後嘅一啲性嘅方面嘅調查。佢係用自慰頻率去量度，話（用藥）前係會低啲，用藥之後嗰個需求都有幾大幅嘅增長。舉個例，可能之前個禮拜一兩次，後尾就變咗做一個禮拜四、五次，即係會有呢啲唔同。
M：頭先你講到心理上面嘅需求，你都有講你自從依家transition呢個轉變，你對於性同愛嘅需求可以相對嚟講分開一啲。你覺得你個人嚟講，你覺得呢一段拍拖、交往嘅關係，除咗性同愛之外，仲有冇咩係需要呢？即係如果你當佢係一個recipe，一個食譜嘅時候，你覺得裏面有啲乜對於你嚟講可以再加落去呢？
L：一段關係入面其實好重要嘅元素，其實都幾多。我自己本身都成日去諗呢樣嘢，成日去探討呢樣嘢，甚至每一次嘅經歷入面我都稍稍去諗、去調整下自己喺愛方面嘅價值觀。我會覺得溝通係一個好大嘅部分，因為兩個人…唔好話淨係兩個人，總之要一齊係一段長啲嘅關係嘅時候，要搵到一個大家都舒服嘅溝通方式係好緊要。我自己以往就試過某一方係好願意去溝通，但某一方就唔係好願意去交出自己嗰個、唔願意去講咁多。咁變咗其實冇一個好嘅溝通嘅時候，會好容易產生爭拗同埋唔理解大家嘅情況。所以我就覺得溝通好緊要。
另外就係大家嘅相處方式、相處模式要比較貼近。譬如我追求嘅係一種比較痴身啲嘅，另外一個就覺得要自由奔放啲。咁佢就唔需要咁多接觸，一個就希望需要多啲接觸，其實呢一樣嘢兩個人就會變咗唔夾，遲早會有啲問題出現。
另外就係大家嗰個需求。大家係look for啲乜嘢，另外嗰個又look for啲乜嘢。如果兩個人根本唔係look for緊同一樣嘢，譬如一個人係look for short term，一個就look for long term嘅，咁蓂實一開始已經唔夾啦。而有啲時候我會成日見到，有啲情侶佢係會有呢啲問題，係因為一齊之前佢地根本冇溝通過呢樣嘢。
仲有就係我覺得責任都係，大家去進入一段關係嘅時候，某啲程度上你好多樣嘢都有一個責任喺度。譬如你去進行某一啲親蜜接觸嘅時候，你要諗清楚呢樣嘢帶嚟嘅後果，或者你要點樣去做。點樣去保障雙方。所以其實係有好多唔同嘅成分喺裏面。想像中嘅關係係會有好多唔同元素，而呢幾樣嘢都係佔得比較大嘅元素。
M：頭先你講到溝通，然後你嘅需求，然後責任，係咪呀？
L：嗯，都有講責任。
M：其實一開始問到呢一個個，聽起上嚟好似啲老生常談，「你覺得呢個關係要有啲乜嘢」嘅時候，我係希望借住呢個機會，喺唔同嘅訪談之中，可以俾收聽嘅人可以意識得到，一段關係裏面唔係純粹係俗稱「扑嘢」嘅性，同埋情情塔塔嘅愛。一段關係之中其實仲有好多唔同嘅元素，唔多機會會講得出嚟，唔多機會會直接點明出嚟，但呢啲都係溝成一個關係非常重要，無論你係short term, long term都好，都係好重要嘅元素。
另外有個比較specific嘅問題想問下你，作為一個跨仔嘅受訪者，我唔清楚呢個會係你個人，或者你係會聽過朋友有講過，跨性別喺交友，或者喺搵拍拖對象嘅時候，會唔會出現咗個狀況就係，你會唔知道幾時話俾對方聽你係一個跨性別嘅人？
L：我自己其實就冇。因為我會覺得我劈頭第一下就會講。同埋其實我都冇咩可以收埋，可能佢search一search我個名已經知道我係trans，所以我收埋唔到。我會覺得我第一句已經講咗，咁佢唔OK咪走，廢事嘥時間啦大家。如果大家係有意往某方面發展，其實「係就係」，「唔係就唔係」，唔係嘅話就唔好嘥太多時間，唔好喺中間嗰一段曖昧，嗰啲位度棘住太耐。當然嗰個階段係有需要嘅，唔係話完全唔要呢個階段，但我覺我唔應該棘太耐。即係如果一段關係，成日要大家估下估下咁樣，我自己本身其實唔係太鍾意咁樣估下合下。我自己就會覺得大家最好就係攤開嚟講。
呢一樣嘢我都有少少想講返頭先，譬如一段關係除咗頭先幾樣嘢之外，仲有係尊重同埋畫boundary。大家你尊重對方，有唔想講嘅部分，亦都會理解同明白，同接受大家嗰個唔同嘅經歷。譬如當佢講咗出嚟嘅時候，佢唔講嘅嘢你唔好逼佢，佢願意講嘅時候你都慢慢去接受。同埋要信大家，你要尊重大家有自己空間，唔係下下用「我覺得要對你好」，跟住就俾好多嘢佢，但其實佢唔係要嘅。
M：我自己嘅社交圈子裏面時不時就會出現一啲「買嘢送去你公司」，「買嘢送去你屋企」，但又失驚無神走去你屋企就以後好鬼死sweet。無論你同唔同居，定係你分開住，你本身係一個有自己生活、有自己社交嘅一個人。如果係單純係因為一段關係而將你所有嘅生活都傾斜喺對方身上，其實係我眼中唔會係一個sweet嘅事。因為調返轉頭，如果嗰個人分開或者，無論係有事要分開，關係要分開都好，你係咪冇咗自己呢？你會唔會變咗做你有啲嘢消失咗，或者係利益上面唔見咗呢？呢一啲位我都希望藉住唔同嘅人嘅現身說法，無論你係乜嘢傾向都好，你都有你自己獨特嘅見解同埋自己嘅親身感受。
最後最後一個問題，去返一開始我地講到pansexual嘅開題。你都留意到我係特登冇譯pansexual係乜嘢。我首先以一個英文翻譯嘅方法去譯，pansexual個pan P-A-N，通常譯做泛。三點水嗰個泛、泛泛之交嗰個泛。直譯就叫做泛性戀。因為依家日新月異，我都見到唔同嘅字眼，單純想raise呢一件事，問下你或者集思廣益、拋磚引玉，pansexual、omnisexual，omnisexual就O-M-N-I，直譯中文呢個前置詞就係叫做「全」。即係例如omnipresence就係「全」在，「全」係全部個「全」。對於你嚟講omnisexual、pansexual，會唔會突然間諗起有啲咩想法，或者有咩分別呢？
L：有時有啲term佢會有少少重疊嘅部分。我自己有時候都會覺得，有時候都會有混淆老實講。因為真係好多好多唔同嘅性傾向同性別認同嘅字。我自己咁樣睇「全性別」，真係要係可能有少少分開哂每一個性別點樣，跟住我全部都OK；然後泛性戀變咗冇咁highlight咩性別，我自己咁樣聽我會有咁樣嘅感覺。
M：呢一個係純粹個人意見，我自己都冇…
L：係，個人意見
M：我都係冇特定答案。因為坊間係網上面、喺唔同forum上面都係對於「全」、「泛」係有唔同嘅見解。有人話某一個係特別highlight gender，某一個就唔highlight gender。咁我就唔知啦，我就唔係呢個圈子嘅人嚟，哈哈。
就係咁樣，無論點都好，你係用咩字眼去形容自己嘅時候，好重要嘅一樣嘢就係你好清楚意識得到你喜歡嘅對象係乜嘢人，而係無論你身在嘅處境、環境係容許你好自己去講出你嘅交往對象係點樣都好，認清自己你嘅需求、你嘅傾向係一個你認清自己一個好重要嘅階段。
今天感謝Liam過嚟同我一齊講下你嘅情同慾，下一次我地會講下一啲非二元嘅性傾向嘅朋友們，佢地係點樣理解性同埋愛，情同埋慾。下一次可以留意下，今集就嚟到呢度先，下一次再同你「點止港同志」。