今次訪問到支援memba CF嘅組織 – 關懷愛滋分享一下佢地主力協助嘅項目同埋最新推廣。
要減少污名同誤會，首先要認識族群文化開始。
章節
| 開始時間 | 標題 |
|---|---|
| 00:03:52 | Chem Fun同Chem Sex有咩分別？ |
| 00:06:43 | Chem Fun嘅娛樂性使用同埋毒品使用嘅定義 |
| 00:09:12 | Chem Fun會使用嘅藥物 |
| 00:16:55 | Chem Fun建構嘅「世界」：放低現實角色同枷鎖 |
| 00:18:51 | 如何熱愛，活在Chem Fun嘅圈子 |
| 00:20:20 | 對待Chem Fun嘅態度 |
| 00:24:35 | 服用過量（OD）嘅處理方法 |
| 00:28:54 | 關懷愛滋MY PLACE提供嘅服務 |
節目提及到嘅研究：Lau, H. [劉凱亮]. (2014). Experiencing risky pleasure: the exploration of ‘Chem-fun’ in the Hong Kong gay community. (Thesis). University of Hong Kong
閱讀更多：
MEN2MEN 男男性接觸者團隊 （Facebook / IG / Twitter）
最近嘅IG活動：《Reminiscence 回憶錄》
MY PLACE（Facebook / IG）
Signal/Whataspp: 52268394
香港男男性接觸者愛滋病風險及流行情況調查（PRiSM）
愛滋病預防項目指標調查（HARiS）
【讀/書畀你聽】 訪問關懷愛滋Chem Fun 係咩你又知唔知?
M：馬天娜
A： Amy
M：歡迎收聽《點止港同志》，我係主持馬天娜。12月其實就同 HIV 有關啦，咁今集呢同 HIV 冇乜關係嘅，但係又同一啲相關嘅行為有關，都係圍繞返男性性行為，同埋一啲喺我哋坊間嚟講覺得比較高風險嘅一啲行為嚟嘅。咁今集呢想講嘅題目叫 Chem Fun。咁點解我會講起 Chem Fun 呢？就係因為事前唔知邊一段時間，有一位老師就叫我去睇一篇畢業論文，咁就係講佢係親身去入去一個 Chem Fun 嘅圈子裏面，去研究香港男同志有呢個 Chem Fun 嘅文化嘅。咁前幾排睇完之後，覺得非常之讚嘆呀，因為我冇呢個能力，亦都冇呢個圈子接觸得到，為咗可以更加了解 Chem Fun 呢一件事，同埋了解到而家有咩人係會投身去協助，去幫手落力做呢個 Chem Fun 嘅議題呢。咁今集我就邀請咗 AIDS Concern 嘅同事們，我咁樣稱呼你啱唔啱㗎？
A：OK，Hello，我係關懷愛滋啦，AIDS Concern 嘅同事，我叫 Amy。
M：你好呀 Amy。咁就今次因為我哋把聲會好聽啲，好聽過上次嘅 Interview，多謝 Amy 嘅落力協助，可以令到今次呢個音色會好聽啲。Amy 可唔可以介紹下自己先？
A：咁我係關懷愛滋啦，MSM Team 嘅同事嚟嘅，咁 MSM Team 呢就係 stands for “Men Who Have Sex With Men”，即係男男性接觸者團隊嘅。咁所以我哋平時主力做嘅群眾呢，就會係男男性接觸者啦，咁可能會係男同志或者係雙性戀嘅男士都會有嘅。咁頭先呢，我聽到你講，就係你睇到一個 Research 係關於係入到去 Gay community Chem Fun 嗰度去做嗰個研究啦。其實我都有幾年前我都有 Expose 過，我都有 Interview 過 Dr. Sky Lau 啦。咁嗰個研究我都覺得好 Amazing 嘅，因為佢係直接做咗一個參與觀察研究，即係 Participant observation 嘅 Research 啦，就係喺嗰個親身 Expose 咗18個月去寫呢份 Research 出嚟嘅。我都覺得係好 Amazing 嘅。
M：佢裏面有好詳細去講佢點樣權衡寫呢一個 Chem Fun 嘅圈子會唔會真係犯法呀，或者係會透露到人哋嘅事情導致人哋有法律風險呀之類之類。即係有好多仔細嘅考量之下，仍然做到呢一個研究，同埋可以權衡到本身研究上面嘅倫理問題，我覺得係好犀利。喺香港嚟講研究呢一個性別嘅議題係好厲害嘅。
A：係呀，真係咁多年嚟，可能都真係得呢一份嘅研究嘅報告，係有得可以咁 Detail 咁樣去睇返同志嘅圈子嘅呢一個 Chem Fun 嘅議題。
M： 講起 Chem Fun 呢，我想問下 Amy，你可唔可以同一啲我哋例如我一樣，即係完全冇乜知識嘅朋友，講解下乜嘢叫 Chem 同 Fun 呀？
A： 咁 Chem Fun 呢，Chem 嘅意思就係化學 “Chemical” 嘅意思，就係因為講 Drug 呀毒品呀，就比較可能令到人哋反感啦，咁所以佢哋就用咗 “Chem” 呢個字，咁 “Fun” 呢，代表一啲開心嘅行為啦。外國呢，係多啲用 “Chem sex” 嘅，即係性行為（Sex） 咁樣啦！但係喺香港，我哋呢個男同志嘅圈子呢，其實佢哋呢，就會覺得呢一個 Chem Fun 嘅行為呢，唔係淨係得性行為嘅，其實性只係其中一個元素啦，仲有其他可能係玩呀、傾計呀、純粹係陪伴呀咁樣，所以佢哋就係用咗 Chem Fun，instead of （取代） Chem sex 咁樣囉。
M：哦，所以對於佢哋嚟講，Fun 唔一定係至於性交，佢哋可能係純粹一個娛樂，一個享樂嘅過程咁樣。
A：係喇，冇錯。
M：我想順便抛個書包，講下自己有睇過一篇論文啦，我記得 Dr. Sky Lau 有講過呢，其實 “Chem Fun” 早前嘅名，唔係叫 “Chem Fun” 嘅，你有冇聽聞過呢一樣嘢？
A：你可以解釋一下。
M：佢之前有講話“Chem Fun”，即係呢個“Chem”呢個字，前身佢哋係香港嘅圈子叫做 “E-Fun”，因為佢哋 90 年代 Rave Party 年代，比較多人會用 Estasy，即係佢叫咩呀？迷魂、搖頭丸、E 仔，咁所以就會以 E-Fun 開始嘅，咁但係後尾因為冰就比較普及啦，再加上 E 仔嘅質素越嚟越差呢，咁所以就由 E-Fun 就改做 Chem Fun，咁就可以用籠統嘅 Chem，即係化學物嚟，概括佢哋用嘅唔同嘅化學劑。
A：其實呢一個趨勢，同普通毒品嘅趨勢都差唔多嘅，而家都係越嚟越少人用搖頭丸啦，因為冰平啲、容易製造啲，所以就會轉咗個趨勢去咗嗰邊咁樣囉。
M：OK，另外我想問呢，頭先你有講到話，你主要協助嘅族群會係，即係男同性戀者同埋男雙性戀者，所以喺香港嚟講，Chem Fun 主要都係同呢兩個族群有關，係咪？
A：其實普遍都係嘅，因為 Chem Fun 用嘅藥物啦，咁佢哋影響到嗰個身體嘅敏感度呀，要嗰個性嘅持久度呀，都會係主要係同男男性接觸者相關囉。
M： OK，as a Lesbian 我都想舉隻手問一問，香港有冇機構會協助一啲唔係呢兩個族群嘅人嘅 Chem Fun 㗎？
A： 咁其實就比較少嘅，因為呢 Chem Fun 呢一個 Culture，我哋會話係一個 Gay culture 啦。數據上嘅趨勢呀，跟住就會係斷定唔同嘅機構嘅 Funding 攞到嘅贊助會係個目標嘅人嘅群眾係啲咩咁樣。咁所以主要呢，都係會服務返男男性接觸者嘅群體囉。
M：明白，嗯，我都明白呢一個贊助嘅影響係好深遠嘅，對於一個機構佢服務嘅對象。咁我想問下，除咗你哋 AIDS Concern 關懷愛滋以外啦，有啲乜嘢嘅…例如政府呀，或者係醫管局呀，佢哋有冇話啲針對 Chem Fun 呢件事有啲咩嘅回應呀，或者係措施之類？
A：我哋機構呢主要攞嘅 Funding 呢，都係政府去資助嘅。咁所以其實呢，我哋資助啦，寫嘅 Proposal 嘅時候呢，其實都會係 Suggest 咗去做 Chem Fun 啦，所以就好多唔同嘅機構都會攞到紅絲帶中心呀，或者係禁毒署呀，唔同嘅 Funding 去做 Chem Fun 嘅議題嘅。咁當然啦，可能係禁毒署、政府就會係零容忍（Zero tolerance） 咁樣講話 Drug：其實就係唔好嘅、「冰」會溶咗你嘅腦咁樣啦。咁但係其實好多坊間嘅社福機構呢，都會係想做緩害多過零容忍去拒絕使用者於門外咁樣囉。
M：OK，我哋而家聽到有好明顯有兩個唔同嘅態度啦，即係對於 Chem Fun。將 Chem Fun 譯返做中文嚟講，就係將佢將啲化學物品，以一個享樂嘅形式去使用佢啦。頭先都有講禁毒署，喺你嘅理解裏面 Chem Fun，即係娛樂性用藥啦，同即係毒品。使用毒品或者即係，我哋講得好難聽，有啲人會講道友呀，吸毒呀，有啲咩定義上面嘅分別呢？
A：雖然我哋話 Chem Fun 啦，同埋吸食毒品都會係有呢啲化學品嘅參與啦。咁，但係其實 Chem Fun，我哋會話呢一個係一個 Gay culture，同志文化嘅原因，係因為有一個 Fun 嘅元素喺入面。咁好多時候呢，佢哋就會覺得係一個同志嘅空間，係一個佢哋去離開呢一個現實世界嘅一個空間，或者搵到一個同伴嘅空間咁樣囉。有好多時候，嗰個重點就唔係喺吸嗰個毒品嗰度，相比起另外如果係吸食其他嘅毒品嘅話呢，就會係可能會有好多上癮嘅徵狀呀，係因為唔同嘅原因，譬如係貧困嘅影響啦，或者係一啲尋找個毒品嘅刺激嘅影響，去令到佢哋想繼續吸毒，或者係一啲心癮，或者身癮，令到佢哋會繼續吸毒咁樣囉。
M：我講起毒品或者係呢啲藥物啦，或者化學物質啦，可唔可以講多少少喺 Chem Fun culture 裏面呢？喺香港嚟講啦，通常佢哋會接觸到啲咩物質呀？
A：多數佢哋就會接觸幾種嘅藥物嘅。咁第一個最常見嘅呢，就會係 Poppers，就係一個芳香劑嚟嘅。咁第二個呢，就會係偉哥，即係 Viagra，即係…
M：藍色嗰粒。
A：係呀，藍色嗰粒，去令到人哋會勃起嗰粒咁樣啦。咁第三樣呢就會係冰毒，第四樣呢就係 GHB，「迷姦水」或者「G 水」咁樣囉。
M：我哋呢坊間嘅大眾們聽起呢個「迷姦水」，就諗起會斷片啦，跟住就畀人強姦啦。咁我想問下點解佢哋會用呢一種嘅物質嘅？
A：迷姦水呢，其實係一個鎮抑劑（Depressant）嚟嘅。咁所以其實佢哋主要嗰個用嘅原因，係可以令到佢哋放鬆心情啦，可以放鬆個肌肉呀，令到有少少醉醉啲嘅感覺呀，或者係提升性慾咁樣嘅。咁其實 G 水係要用得好小心嘅，因為 G 水呢，其實你可能係落超過 5ml，其實已經係可以令到一個人完全昏迷，已經係冇意識，甚至可能係會致命嘅。咁所以其實 G 水用得少呢，就會好似我頭先講咁樣，就會可以放鬆心情呀。咁但係如果用得多嘅話，就會有嗰個令到人斷片呀，會暈低咗呀，畀人執屍都唔知呀咁樣囉。
M：頭先你講到例如，偉哥呀，Poppers 呀，呢一啲相對嚟講就冇咁容易導致斷片或者昏迷。咁但係去到後尾，例如講起「冰」同埋 GHB 迷姦水嘅時候，就會開始有呢啲容易斷片呀，或者係失去意識嘅狀態咁樣。
A：容易失去意識咁，即係其實係 G 水嘅。如果係 Poppers 嗰啲，就會通常係會頭痛呀，頭暈呀咁樣囉。「冰」就用得多，長期呢就會可能有焦慮呀，幻覺呀，被害妄想呀，咁樣囉，會影響個 Mental health 會多啲咁樣囉。點解佢哋會用偉哥呢？係因為用冰毒一個比較長期嘅影響就係佢哋會難啲勃起呀，咁所以佢哋就會係同時間有機會係或者之後啦，會有機會就會使用偉哥咁樣囉。
M：咁咁咁，聽起上嚟好似有啲怪怪地喎，即係一方面你用緊某一樣嘢係會導致你難啲勃起，但係你成個過程可能會涉及需要勃起，咁所以你要搵啲嘢強化勃起咁嘅概念。
A：係呀，因為其實「冰」佢比較即時嘅反應，就係會令到你精神啲啦，啲人會覺得會提升個性能力，或者係會延長個勃起嘅時間啦，同埋因為「冰」呢，其實你食完之後呢，係會令到你嘅皮膚好敏感，成個人嘅敏感度會高咗好多嘅，咁所以就會令到性高潮，或者個性興奮係更加明顯。但係佢有一個唔好嘅影響，就係長期咁樣使用就會令到難啲勃起。咁就有啲人就需要同時使用偉哥咁樣囉。
M：咁嗰個難以勃起嘅狀況，我又好奇問下，佢係可逆轉定不可逆轉㗎？
A：如果你停咗一段時間，你有調理嘅話，就係可逆轉嘅。咁但係，有好多時候呢，就係有啲嘢係你一路有嘗試過啦，跟住有個癮喺度啦，你一路追嘅時候就會好難停噉樣囉。
M： 我頭先起講你又講話，即係會精神啲。呢一件事呢，我引用返 Dr. Sky Lau 篇文呢，佢有講到點解喺 Gay 圈子裏面會用到「冰」呢一件事，就係因為對於佢哋嚟講，佢哋享受嘅過程係希望可以好長好長，即係可以係幾十個鐘唔停咁樣。咁你正常一個人，你冇可能幾十個鐘頭唔瞓覺，跟住唔食嘢，唔睡覺，跟住就係咁做同一件事㗎嘛。咁所以對於佢哋嚟講，用冰呢就好似一個輔助劑嘅概念，去令到佢哋可以好持久地，即係維持呢個享樂嘅狀態。呢個係咪你哋接觸嘅，即係佢哋反映點解要咁用嘅其中一個原因？
A：係呀，即係有一個提神嘅作用。我聽過一個個案，一個聚場，佢係一個 Chem Fun 嘅空間，係真係可以成個禮拜都係嗰度。係真係人接人咁樣，可能中間又坐低沖下涼傾下計咁。咁但係真係一路接住落咁樣。
M：OK，好，一個禮拜，我好難想像，咁佢哋唔使食嘢㗎咩？
A：有食嘢嘅，有休息嘅，其中一個緩害嘅方式都係記住飲水，記住食嘢。
M：OK，好，呢個係一個好基本，同埋好直接嘅一個緩害方式。我哋而家 Mark 低先，喺你嘅，即係喺 AIDS Concern 嘅工作經驗裏面，Chem Fun 嘅圈子，即係例如入去呢個圈子，本身係有啲乜嘢共識，或者佢哋本身呢個文化裏面，可唔可以講多少少佢哋，即係除咗會使用化學品之外，仲有啲乜嘢係佢哋文化裏面其中一樣嘢。
A：佢哋嘅文化就會係，你入咗呢一個Chem Fun嘅空間，呢個都係引用返 Dr. Sky Lau 嘅嗰篇文，咁其實就係你入咗呢個空間，你就係所有人都係平等嘅，會冇身份，冇地位嘅差異。你係咩人呢，喺嗰個空間係唔重要嘅，甚至有一啲人會講到話，平時你係出面係冇可能食到天菜（食到天菜=跟身材、體型比較受歡迎的人有性接觸）嘅，但係你喺呢個Chem Fun嘅空間，你可以食到天菜，嗰一種係一個令到佢哋入到去嘅吸引力，同埋就會係嗰個空間，你會係有信任啦，會有溝通啦，會有尊重啦，同埋記住，就係所有嘢都會係不記名不記姓。喺呢個空間就會係呢度，出咗去就唔會記得，唔會講㗎啦。
M：OK，好有一種，即係嗰啲叫做咩，「喺度講、喺度做、喺度散」嘅咁樣。OK，我突然間又諗起，你話可以食天菜呢，我記得佢嘅訪問裏面呢，係有 mark 返佢訪問嘅 30 個人裏面嘅 Profile，即係佢哋嘅學歷呀，做緊咩工呀咁樣，係另外一個好深刻嘅位就係。其實裏面唔少人係大學生，同埋甚至有明顯有一部分人係碩士畢業嘅。喺度我順便都係想，即係我表達我嘅睇法啦，就係即係唔好以為，覺得 Chem Fun 就一定係一啲冇讀過書呀，即係冇接觸過，唔知道呢啲即係化學品對身體有機會有害嘅情況之下嘅嗰啲人。即係讀得少書，冇乜社會經驗嘅人，先會即係進入呢個文化。有陣時，縱使你係可能喺呢個社會裏面你畀人嘅印象係可能係一個中產，或者係一個得高望重嘅一個角色，佢可能喺呢個圈子裏面正如你所講，每個人都平等嘅情況之下，其實係冇差別嘅。
我估可能我可能有 Get 到少少即係嗰種好…好突然之間你變咗另外一個人，然後你完全係另外一個角色，放低咗你平時喺外面嘅嗰啲繁俗嘅枷鎖，或者身份嘅問題，入嚟呢個圈嘅嗰個吸引之處。
A：即係任何一個人都有機會有使用過，或者係使用緊 Chem Fun 嘅人，會冇嗰個……甚至可能入面會有唔同嘅專業人士，或者係好熟悉藥劑嘅人士，所以會知道點樣用 Chem Fun 會安全啲呀咁樣。
M：我醒起呢，我自己都 Confess 下，其實呢我前幾排睇，即係準備呢個 Chem Fun 呢一集嘅時候，我喺 Twitter 呢見到有一個 Account 嘅，我唔特別要 Promote 嗰個人啦，我有感受到嗰個人呢，佢出嗰啲 Post 同埋片呢，係圖文並茂啦，中英並存啦，即係唔似係…唔似係一個即係求求其其就拍片嘅，佢係好精心去製作呢一啲「High冰」嘅影片。
跟住我就諗緊，如果你嘅角色，我純粹係自己估。如果你係一個識整呢啲化學劑嘅人，其實你係完全有資源、有能力係可以自製呢一啲物質畀自己食。
A：甚至我之前講起呢專業人士呀咁樣，咁其實之前呢，外國呢有一個 Grindr 嘅 Account 係一個 Health expert 啦，醫療嘅專業人士啦，咁佢係直情會係 Grindr 上面呢係會畀一啲 Chem Fun、Chem Sex 嘅專業嘅建議係：你用呢一種藥物嘅時候，你嘅劑量要係幾多呀？你其實個人嘅體重係幾多？你應該要點樣計你一個你要用幾多嘅劑量呀？咁樣，係甚至有一個咁樣嘅 Grindr 嘅 Account 係會有一個專業嘅 one to one （一對一）嘅 Service 咁樣去 Counseling 咁樣。
M：好，好 Fascinating，我覺得成件事係好似一個新嘅世界，即係你可以見到佢哋可以學以致用，將自己嘅專業嘅技巧應用喺自己享樂嘅範圍裏面。就係先唔講佢哋可能喺嗰個地區裏面有機會涉及法律風險呀，但係佢哋係好似真係好熱衷呀嗰個熱愛…愛去如何活喺呢一個 Chem Fun 嘅圈子同文化裏面，係一個好獨特嘅存在，我覺得。
A：因為其實佢哋個觀念呢，佢哋唔覺得，即係佢哋了解呢一樣嘢，其實可能係唔係一件合法嘅事情，咁但係其實佢哋都知道呢一樣嘢係有害嘅。佢哋會可能權衡嗰一個風險，同埋佢哋想要嗰個安全感，想要嗰個空間，想要嗰個性興奮嘅嗰個感覺，咁跟住之後呢，佢哋就都會係用嗰個緩害嘅方式，去計算好你嘅劑量。所有人都要有個 Safe word（安全語）嘅，所有人都要做好嗰個環境嘅安全，要點樣睇清楚曬嘅咁樣，所以其實佢哋自己嘅圈子嘅群體入面，都係想保護佢哋嘅人囉。
M：咁講起保護呢，即係頭先講個「緩害」呢個字啦，我又想 Move on 去問下預防呀，或者係一啲安全性嘅問題呀。
如果假如我有識到朋友可能佢拍片，或者佢即係字裡行間講起佢係有 Chem Fun 嘅，作為一個完全門外漢嘅人，可能係無論係 Gay 又好，或者係其他同志或者非同志都好，其實你哋嘅立場會建議呢啲門外漢，係可以有啲咩態度，或者係咩想法？
A：第一個最重要嘅就係：首先就唔好用有色嘅眼光去睇佢哋。因為佢都會了解呢一件唔係合法嘅事呀，中間會有風險，但係佢做嘅呢個選擇，係會有佢哋嘅原因囉，咁所以用一個有同理心，一個理解，一個尊重嘅態度去了解，或者一個好奇嘅感覺。如果你問過對方，對方肯講，肯同你傾嘅時候，你可以用一個關心嘅態度去問返「你覺得個感覺係點㗎？」「你會唔會有特別鍾意或者唔鍾意，或者你會覺得有危險嘅情況呢？」咁都可以傾下過咁樣，唔好有一個批判嘅心態去對呢一件事先囉。
M：轉咗另一個角色去問呢，例設我係一個 Gay 嘅人士啦，如果我認識嘅約會緊嘅對象想我同佢一齊 Join 一個 Chem Fun party，你哋嘅機構會其實建議，作為我呢個角色嘅人，我應該考慮啲咩嘢因素？雖然我係一個女性，但係問起上去好似怪怪地，但係我又好想真係趁住呢個機會，去畀一啲好年輕或者係啱啱入 Gay 嘅圈子，或者係 Bi（雙性戀）圈子嘅朋友知道，當你身邊有人想邀請你去入呢個圈子嘅時候，你可以其實權衡啲乜嘢嘅風險或者係因素。
A：好多 Memba （男同志） 呢，新入圈子嘅時候，都會 Expose to … 都會遇過呢啲咁樣嘅情況嘅，即係可能係喺 Dating app 上面會有人問要唔要 “cf”，要唔要去 Party 咁樣。真係唔係一個罕見嘅問題嚟嘅。所以，要諗下，其實都係一件好嘅問題嚟嘅。首先係自己思考 Chem Fun 呢件事情，係咪佢哋自己可以接受嘅一件事情：佢哋之前有冇使用過其他藥物或者毒品，咁佢哋嘅接受程度係邊一度。甚至就係，其實都可以同唔同嘅 Memba 嘅朋友傾下，或者同我哋嘅專業嘅同事傾下。Chem Fun 佢哋或者去到一啲 Chem Fun party 嗰個情況係點嘅呢？入到去，咁其實大家就會係好似朋友咁樣。你就會見到有啲人會除咗衫，有啲人會坐咗喺度傾偈，有啲人就已經係 Smoke 緊㗎啦。咁有啲人就會係走咗去廁所沖涼，咁其實會有啲噉嘅情況喇。喺遇到呢一個噉嘅情況嘅時候，你嘅接受程度係去到邊度呢？佢哋都要思考一下嘅。
M：我想問下，頭先你講到即係呢件事，好明顯我係一個門外漢。你講到話「其實呢件事係好常見」，除咗講話，會唔會考慮要 Join party，要 cf 之外呢？通常會有啲咩字眼去 Implicate （暗示）你同呢一個對象約會嘅時候，係有機會接觸到 Chem Fun 嘅呢？即係例如有啲咩 Emoji、代號、數目字，我唔知呀…
A：係 Grindr，或者 Dating app 上面，咁佢哋嘅 Profile 呢，可能就會有一啲雪糕呀，雪花呀，寫住 “cf” 呀，或者佢哋 Profile 寫住 cf，甚至有啲人呢，會係寫明話 “no cf”，唔要玩 Chem Fun 嘅。就會令到啲人其實係想 Approach 主要係 Chem Fun 嗰啲人呢就唔好 Swipe right 佢哋啦。
M：因為我都諗住 make sure，即係聽到嘅朋友，無論咩年紀，都好知道自己係 Get involved with 呢一個圈子。最後一個問題，講關於呢個即係預防同安全嘅問題啦。頭先有講到話迷姦水…如果多過 5ml 係咪呀？
A：都要睇返個濃度嘅。總之就係一定唔可以食得多囉。
M：OK，係啦，咁食得多嘅問題啦就係，咁如果食得多呢，有啲乜嘢…即係點講呢？係有啲乜嘢問題發生，或者係會有啲乜嘢係嚴重嘅後果之類。
A：有好多時候，當我哋講到毒品嘅時候就會最驚就係會 Overdose，即係會過量服用噉樣，即係可能會擔心會昏迷呀，或者係有啲危急嘅情況發生。咁所以呢一啲基本嘅急救都要知道嘅噉樣。
咁第一個一定要做嘅嘢呢，就係唔好再食更加多嘅藥物啦，或者係有啲人可能邏輯，呢就係話咁，佢食咗興奮劑咁，我哋食返啲鎮抑劑去 Counteract （反作用）返啦咁，但係其實就唔得嘅，咁就唔好再畀更加多嘅藥物啦。
咁第二呢，就係確保佢哋係會安全，唔好再進行性行為啦，將佢哋遠離一啲可能有機會有危險嘅物品啦，可能係瞓低，保護咗佢哋嘅頭部先啦。
咁第三呢，就要去判斷一下佢哋究竟係咪清醒嘅。如果係清醒嘅話呢，咁就問下佢啲問題啦，啲好簡單嘅問題，譬如問下佢叫咩名呀，今日幾多號呀，今日星期幾呀咁樣啦，咁其實主要就係睇返佢係咪仲有意識，佢係咪仲可以畀 Consent，一個性同意去進行性行為呢。咁如果佢哋醉到已經回應唔到啦，或者佢哋使用嘅藥物去到其實佢需要休息啦，咁就將佢哋確保係一個安全嘅地方自己休息，飲啲水咁樣囉。
另一個情況，就係你嘗試叫佢嘅時候，你發覺佢暈低咗啦，佢不醒人事啦，冇反應啦，要即刻叫救護車啦，第一樣嘢。第二個呢就係將佢哋瞓低係復原卧式咁樣，基本嘅急救方式，令到佢個呼吸度係會暢通，因為如果係呢啲情況佢哋 Overdose 嘅話呢，有機會佢哋會嘔，嘔嘅時候佢哋嗰個呼吸唔暢通嘅話，有機會係會濁親啦，令到佢哋窒息嘅，咁所以就瞓返去復原卧式，確保個器官係暢通嘅噉樣啦。
M：我想，唔好意思打個岔先，咩叫「復原卧式」呀？
A：復原卧式呢，點形容呢？其實就係將佢哋打橫瞓喺度啦，跟住上面嗰隻腳就屈起佢，跟住之後呢個頭就打側啦，確保佢哋係呼吸暢順嘅。希望呢個形容 OK。
M：即係好似你打側瞓，跟住你向天嘅嗰隻腳就屈起，呢個叫復原卧式啦。即係假設平時啲人咪瞓低嘅時候，咁佢個頭咪頭向天，然後手腳向天咁樣，即係呢個就唔得嘅，呢個係會有風險嘅。
A： 呢個有機會會濁親咁樣。
M：好好好，請繼續，請繼續。
A：係啦，如果佢暈低咗嘅話，就要睇返佢呼吸正唔正常啦，如果冇呼吸呢，就要做心外壓，或者去搵下嗰個環境有冇 AED 機，即係自動體外心臟除震器，去恢復返佢哋嘅心跳同埋呼吸，等返救護車。可能係問返佢哋身邊嘅同伴有冇了解過，其實佢哋食咗邊隻毒品或者藥物，佢哋嘅劑量係點樣。如果急救員嚟到，就會話返畀佢哋聽咁樣。
M：我好想問埋一個應該係對於個圈子黎講好白痴嘅問題，但我真係好想知嘅：即係假設啦，我見到有人 OD （食用過量）啦，咁我幫佢，即係正如好乖咁聽你所講，做曬所有啲咁樣，即係有冇呼吸呀，跟住報警呀，然後抬上救護車，咁，我會唔會畀人拉㗎？
A：我知道好多人都會有呢一個擔心，因為畢竟有啲藥物係犯法㗎啦。但係其實呢，我哋社工啦，或者係一啲醫護嘅人員啦，咁其實佢哋係會根據佢哋嘅道德指引呢，係唔會報警，或者係唔會特登話畀警察聽，呢個人身上面有毒品、佢食咗毒品咁樣嘅，都係嗰個佢哋嘅人身安全擺喺個首位嗰度，都係叫咗救護車先，但係如果真係有啲人好擔心喇喎，咁樣其實我哋機構呢，有一個社企叫 MY PLACE 啦。咁我哋 MY PLACE 呢，係會有普通科嘅服務嘅，咁都會有醫生同護士喺嗰個診所嗰度啦。如果真係有人用藥過量咗（Overdose）或者其實佢哋 Chem Fun 完之後，唔舒服想睇醫生嘅話，又想有一啲 LGBT-friendly 或者了解 Chem Fun 知識嘅醫護人員嘅話呢，可以聯絡我哋呢嗰一個社企嘅。
M：感謝你話畀我聽有呢一個社企嘅服務。我順便問下呢，佢係咪一個實體嘅鋪頭嚟㗎？
A：係呀，我哋係有一個實體診所嘅，就喺佐敦嘅。
M：需要嘅朋友就可以上嚟，可以…頭先你話可以做檢查啦，跟住仲有啲乜嘢可以做？
A：上嚟之前呢，可以 WhatsApp 或者 Signal 我哋嘅 MY PLACE 嘅電話嘅，我可以講埋嘅，係呢度做個廣告咁樣啦，係 52268394，係啦，可以 WhatsApp 或者 Signal 去睇一下醫生或者護士係唔係度咁樣啦。另外呢，我哋除咗可能有呢啲普通科嘅服務之外，主要我哋 MY PLACE 呢，最重要會做嘅呢就有 PrEP 或者 PEP 去檢測啦，同埋去做買賣藥嘅。PrEP 同 PEP 係啲乜嘢呢？馬天娜你知唔知？
M：我就知道有 PrEP 囉，但我唔知 PEP 係咩。
A：PrEP呢，就係「暴露前預防性投藥」啦，咁就係一隻 HIV 嘅預防藥嚟嘅。使用 PrEP 之前係需要做身體檢查啦，檢查返 HIV 嘅狀況啦，肝、腎功能，喺 MY PLACE 都會有做呢啲嘅檢查嘅。另外 PEP 呢，就係「暴露後預防性投藥」。當有啲人呢可能係做咗高風險嘅性行為啦，即係冇用安全套呀、穿套、甩套、爛套嗰啲呢，咁佢哋有擔心感染 HIV 嘅風險，佢哋可以食 PEP 嘅，越早食呢，就會個保護能力就越高。
M：我有一個小小傻仔問題呀，係咪越早食呢，跟住就會冇事㗎？
A：你如果做咗一個高風險嘅性行為啦，其實你嗰一刻就已經可能有 100% 嘅風險咁樣啦。咁你如果食咗嗰個藥，越早食呢，就會越快降低嗰個風險。我哋會話過咗 72 個鐘先食 PEP 呢，咁就完全冇用㗎啦。咁你就已經都係好高風險㗎啦咁樣囉。
M：明白明白，咁大家真係知道呀，呢個唔係萬能嘅，亦都唔係一食就等於冇事嘅，你都係要睇返個時間限制。同埋你如果你係有機會經歷斷片嘅問題，請你知道你發生呢個非安全嘅性行為，同你醒咗嘅時候，中間經歷咗幾耐嘅時間啦，咁都係最要考慮嘅因素。
除咗你講話 MY PLACE 之外呢，另外一個好主要，我搵到你哋嘅原因，就係因為你哋喺 Instagram 出咗一個故事嘅特輯呀，可唔可以係咪叫故事特輯呀？可唔可以形容下？
A：我哋有一個 Instagram 叫做 ac_m2m，咁我哋最新呢喺一兩個月之前，就有一個新嘅 Photo campaign，用一啲唔同嘅圖片啦，一啲相片啦。今次我哋行嘅嗰個風格呢就係即影即有相機嘅嗰一個風格嘅相片啦，呢一個嘅 Campaign 呢叫做 Reminiscence 回憶錄。咁我哋有同事呢就好好啦，用一啲真人真事呢寫咗一個故事出嚟，咁嗰有四個故事，嗰四個故事分別就會係 Chem Fun 嘅故事、發生 Chem Fun 之前嘅前傳啦，有一啲性別嘅欺凌，同埋會有一啲同志嘅空間，譬如 桑拿、九龍公園。咁就有呢四個嘅 Storyline 喺今次嘅 Campaign 嗰度嘅。
M：好好呀。感謝你哋有呢個令到我哋可以 Keep 住追，因為我 Keep 住望咗幾幅相，跟住又隔下隔下，然後慢慢等，其實過程都幾期待，我期待之後可以有繼續呢個追咗嘅 Story。
A：多謝你嘅追捧。
M：我覺得係…點講呢，即係相比起可能一啲好字典式，或者係好直接嘅嗰種「究竟 Chem Fun 係乜」，跟住 12345 咁樣列舉出嚟，可能有陣時用一個畫面，或者一個場景方式，去描述中間嘅心態，同埋心情都係一個好嘅策略嚟嘅。我覺得對於 Promotion 嚟講，都可以有唔同嘅方面咁樣啦。
A：係呀，因為我哋都會想畀圈子嘅人睇，其實有好多嘅真人真事，或者好多內心嘅思路、感受呀喺入面咁，所以就寫咗呢個故事，亦都會添加一啲緩害嘅資訊呀咁樣囉。嗰一個 Instagram 呢，如果大家有任何疑問呢，或者有啲乜嘢嘅資料會想知，其實都可以 Inbox 我哋嘅，我哋都會由同事去專門回應嘅。
M：好呀！多謝你，我亦都會喺返個 Description （資訊欄）入面放返今次 AIDS Concern MSM Team 嘅 Instagram account 畀大家望返嘅，MY PLACE 嘅資料都會喺返個 Description 入面啦。畀埋最後一啲 Air time 畀你哋，你有冇啲咩嘢想 Promote 或者想畀聽緊嘅人知道？
A：我哋 AIDS Concern 呢，就會除咗我頭先講嘅社企之外呢，我哋本身嘅社福機構呢，我哋係會有一個健康中心嘅。我哋嘅健康中心呢，其實就一至日都會開嘅，就係 for 唔同嘅社群啦，MSM 嘅社群、異性戀男士啦、女士啦都可以上嚟做性病檢測，男男性接觸者嘅性病檢測呢，係全部免費，20 分鐘會可以測愛滋病病毒、梅毒同埋丙型肝炎咁樣。但係都會建議性行為活躍嘅人士呢，其實每 6 個月到一年呢，都會做一次檢測啦，去了解返自己嘅性病或者 HIV 嘅狀況啦，咁另外就提返，所有人要用安全套啦，如果常有無套嘅性行為嘅話呢，都可以考慮下使用 PrEP 嘅。
M：講起呢個，我順便都分享下，其實我早幾排呢，就喺網上面申請咗喺便利商店可以攞到政府畀嘅嗰啲，喺屋企自己檢測嘅套裝咁樣。我亦都想從一個唔係男人嘅角度去睇下，即係係有過性經驗，或者係仍然會有性經驗嘅人，對於即係自我檢測嘅態度，同埋成個過程係點嘅。我嘅態度會係覺得，乜嘢性別都好，乜嘢性傾向都好，你只要有呢個性經驗，其實你都係有需要做呢個檢測嘅。呢件事唔係淨係純粹係畀你嘅現任，或者你將來約會嘅對象知都好，其實對於你嚟講，都係多一個了解你身體狀況嘅一個方法嚟嘅。
A：係呀，你係一個性意識非常之高嘅人士，冇錯，其實任何一個人只要有過性行為，其實你都會有風險感染到唔同嘅性病咁樣囉。因為你都唔會知道你嘅性伴侶嘅所有性嘅經驗呀，History （歷史）呀咁樣。所以其實點都係會有一個風險嘅存在，除咗戴安全套之外，就最重要就係要經常做檢測囉。
M：冇錯。如果你真係好怕，如果你係嗰種悲觀派嘅，咁自慰都可能係一個方法嚟嘅，咁就最安全啦，零風險，哈哈哈哈。
感謝今次 Amy 撥出你哋嘅時間嚟接受今次嘅訪問啦。響應返今次呢個 12 月嘅時間，12 月應該正確啲嚟講係愛滋病關懷月。
A： 係 12 月 1 號呢就係愛滋病日。
M：係啦係啦。咁我就籠統地將佢姐係擺喺 12 月呢一個 Range 嗰度啦，咁就希望今次係《點止港同志》裏面可以多一啲了解唔同同志嘅文化，同埋佢哋一啲獨特性。咁喺我哋理解一啲可能喺社會裏面受到污名，受到譴責嘅一啲文化或者行為嘅時候，我哋有多一重嘅思考咁樣啦。
《點止港同志》係一個以香港同志角度出發嘅 Podcast，希望可以將大家生活裏面嘅性別同埋同志議題，用廣東話嘅聲音同埋文字方式保留同埋流傳。每一集嘅 Podcast 我哋都會製造文字檔，畀唔方便聽聲嘅朋友都可以知道我哋嘅資訊。多謝你收聽呢個節目，而且聽到嚟最後，如果你想收到下一集嘅內容就訂閱我哋啦。你可以喺 Spotify 或者喺 Apple Podcast 裏面追蹤我哋呢一個嘅 Podcast。假如你對於呢個主題有共鳴，或者你想分享你嘅故事嘅話，歡迎你 DM 我哋，@pridelabhk 嘅 Instagram。亦都歡迎你喺 Apple Podcast 裏面留言同埋畀五星嘅回饋。你嘅支持同埋鼓勵將會係我哋默默耕耘嘅動力。今集就講到呢度啦，期待下一次同你《點止港同志》。