今集我哋回顧下驕傲遊行，同埋傾下年中有國外LGBT提出對於排除BDSM族群參加遊行嘅意見。到底行Parade係咪有潛dress code？咩先叫做「太Over」？？
以歡樂嘉年華形式舉辦同志活動有咩利弊？同志運動平時少左邊啲人？
國外同志言論來源：
Washington PostYes, kink belongs at Pride. And I want my kids to see it
INSIDER The debate over ‘kink at Pride’
章節
| 開始時間 | 標題 |
|---|---|
| 00:00:26 | 同志遊行會見到嘅元素 |
| 00:01:30 | LGBT族群應否包含Kink/BDSM？ |
| 00:03:04 | 外國LGBT反對BDSM人士參與同志遊行 |
| 00:04:42 | 同志抗拒Kinkster參與主流同志活動嘅邏輯 |
| 00:06:27 | 同支持家庭價值的組織有微妙而巧合嘅邏輯 |
| 00:09:25 | 回顧 「驕傲遊行」的意義 |
| 00:12:08 | 香港同志活動與陽光同志 |
| 00:15:15 | 運動「包裝」之必要 |
| 00:16:56 | 同志多重身份與爭取多元 |
| 00:19:03 | 下集特輯預告 |
【同志情報局】論同志遊行之BDSM同Kink被邊緣？
大家好，歡迎返到今集《點止港同志》。我係主持馬天娜。
今集嘅主題圍繞三個字：同志遊行，BDSM同Kink。
唔知大家有冇去過香港嘅同志遊行，又或者睇過同志遊行嘅相片。當中除咗大家都好熟悉嘅彩虹旗之外，不時都會影到有人着得非常少布咁行。例如男士會得一條泳褲，或者有女士會赤身露體淨係遮住三點咁遊行。甚至喺台灣、外國嘅遊行，呢類打扮、甚至係行為會更加大膽。唔知你見到嘅時候有乜嘢反應呢？
曾經喺2018年嘅香港同志遊行，一位男士除哂全身衫，並用紅繩綁陽具，左手拿着聖經、右手揸住火機作勢點火。最後被控「在公眾地方的猥褻行為罪」，定罪判罰900元。喺呢年香港同志遊行之前，亦都有家長團體去信特首，認為同志遊行有傷風化，最好就禁止哂咁話。
其實不論係家長團體，直人同盟，還是係LGBT+族群入面，都不停討論「應唔應該繼續俾呢班人喺同志遊行入面出現」。喺外國甚至已經有一個名詞 “KINK”, “K” “I” “N” “K”專係用嚟形容呢班喺同志遊行入面，穿著BDSM象徵嘅皮衫皮褲、繩結、頭套、狗帶，甚至係一啲比較露骨嘅喜好物品。加上大眾媒體嘅焦點，都鍾意放喺一啲比較標奇立異嘅人身上，所以就令到大家誤以為佢地係LGBT+入面嘅多數。
但事實上，佢地可能只係少數入面嘅再少數。外國網民都喺Twitter度批評，話明明成日都強調親密接觸係需要雙方同意先可以做，但Kinksters冇得到其他人嘅同意，就強逼其他參與同志遊行嘅人士去睇佢哋身體。一個外國嘅無性戀者更加提到，「雖然唔係話KINK嘅出現就污名化同志呢個身份，但同志遊行本身都有好多家長帶埋小朋友一齊參與㗎嘛，唔希望將啲太過over關於性嘅行為展現喺小朋友眼前」。
而返嚟亞洲，類似嘅討論都唔弱。例如台灣都會有網民喺討論區入面咁講，話自己雖然唔反同，但參與同志遊行嘅人太過裸露令佢地覺得好噁心。香港連登討論區亦都有唔少呢類言論，攻撃佢地着到鬼五馬六、不倫不類。
而LGBT+入面就住KINK呢個議題，亦都有唔同嘅觀點與想法，甚至有聲音唔希望佢地再喺同志遊行度出現。今集就為大家總結佢哋主要兩個論述：
首先，有一部分攣人覺得，佢地本來就唔屬於性小眾嘅一部分，所以唔應該再俾佢地參與同志遊行。我地用一句好多同志活動、彩虹商品都會用嘅標語：love is love，愛就是愛做例子。呢句標語就係講緊，「人與人之間唔同形式嘅愛都係同一般直人一樣，只係單純愛一個人」。背後其實畫咗一個框架，侷限攞同性之間嘅愛情模式同主流所謂「正常」嘅異性戀黎做比較。甚至另一句我地成日聽到嘅說話，「愛一個人唔係基於性別，只係咁啱愛嘅係一樣性別嘅人」都係一樣道理。用返「直人攣人其實都一樣」嘅邏輯黎諗，因為異性戀都唔會將BDSM掛喺口邊，大家同直人相處時都唔會focus落直人嘅性喜好，所以同性之間嘅愛都無需要強調BDSM呢類比較小眾嘅喜好或者生活方式。因此，呢啲會將自己性喜好展現人前嘅kinksters，就唔包喺一般同志love is love可以接受嘅範圍之內啦。
拎番依家大部分人都認識，作為同志標誌嘅六色彩虹嚟講，其實
第二個原因，係關乎場合嘅開題。有自己人覺得「佢地喺屋企咁做冇問題，不過唔應該喺一個公開嘅同志遊行入面去展露自己嘅身體」。佢地嘅觀點係覺得，平時大眾已經成日將男同志嘅愛情關係縮細到淨係得性愛（肛交）。呢班人着咁少布走出嚟，本身就係一班滿腦子得番性愛，唔識潔身自愛嘅人。更加會有人會用淫亂、鍾意約炮去形容呢班kinkster，指責佢地模糊咗本身同運嘅焦點。由本來要爭取同志平權嘅遊行，就被人惡意解讀成要求性解放，搞菊花，加強咗大眾對於同志淨係有性愛需求嘅想像。因此，根本唔應該俾佢地再出現喺同志遊行入面，混繞視聽。
順便update下大家，10月香港性文化學會嘅Facebook Post 度有一篇教父母點同孩子面對《賭命夫妻》、《大叔的愛》同《仔仔一堂》呢類提及婚外情、性暗示同性戀議題嘅電視節目，當中有以下嘅句子：
「當電視出現「脫衣、愛撫、擁吻、曖昧」等聲音及畫面時，你除了可以評論幾句「會唔會快咗D？只是認識了很短時間？」同埋若你發現子女尷尬，如用手蓋上眼睛，你可以肯定其感受及解釋他的感受」，而解釋嘅內容就係「尷尬好正常，因為這些親密行為係同一生伴侶獨一無二的行為，不是給其他人看或聽，所以好少在街上見到有人做這些行為，如果你唔想睇，可以轉另一台或合上眼睛」。
理由就講完啦，喺你開始諗「到底即係點」之前，想趁呢集同大家recap下，同志遊行係點樣嘅一回事。
事實上，同志遊行喺英語嘅世界一直係叫做Pride Parade，直譯應該係驕傲巡遊。呢個字拆開兩舊嚟睇其實相當有意思。後者佢唔係用我地平時用喺遊行，一啲帶有訴求、政治色彩嘅字眼例如係demonstration, march去命名，而係選用咗一個比較開心、正面、有慶祝意味嘅字眼Parade。以香港同志遊行為例，除咗會透過唔同組織，喺遊行前後一齊去爭取平權之外，亦會有其他輕鬆嘅活動去俾一班參與遊行嘅人士去玩。例如行到終點會有歌舞、DIVA表演、又可以去下kick off party 或者after party，唔係下下淨係得傷春悲秋式嘅控訴，而係將各種性別平權議題轉化成愛與和平嘅嘉年華。
而主體方面，佢冇直接用Gay/homosexaul，而係用Pride去表達當中嘅多元。例如往年台灣嘅同志遊行，除咗會喺遊行入面爭取同志婚權，爭取成功之後仍然會加入性別平等教育、性工作者權利、愛滋病去污名化、跨性別及雙性戀者現身等，可以話係將各種性別「人權」、「自由」、「平等」大包圍去展現喺公眾嘅眼前。隨住性別議題嘅進程，LGBT亦都慢慢演變成更加長嘅LGBTQIA+, 當中包括埋直人同志Gay Alliances嘅朋友可以一齊喺同志遊行呢一日現身，驕傲地去支持自己嘅信念。
我地再試下喺另一個角度去睇同志遊行呢件事。其實同志遊行，或者係其他同志嘅活動一直都俾人垢病，淨係服務陽光同志、甚至只係淪為中產嘅遊戲。例如香港一點粉紅活動，往往都係有一個舞台、Party，然後就有好多國際品牌、銀行、啤酒嘅贊助。如果你去過活動的話，你會見到除咗有好多唔同嘅香港同志組織會擺攤位之外，仲會唔知點解高大威猛、好陽剛嘅白人男士出席嘅比例特別高。
但諗深一層，其實呢類攤位或者參加者，都有一個共通點：就係好多時去展現一啲中產嘅文化。法國社會學家Pierre Bourdieu認為，除咗實質經濟上有錢定冇錢去決定你係中產定係低下階層，社會亦會按住呢個文化基準去將人分層。例如香港同志遊行、一點粉紅等嘅同志運動，你唔容易見到露宿者同志或者工人嘅代表，亦都好少將傷健人士、性工作者、甚至係習慣用藥或者罪犯嘅同志代表現身；但就會有跨國企業嘅公司領袖、已出櫃名人、支持LGBT+嘅政治人物，甚至係各個大專組織嘅代表。呢類代表中產文化嘅人或者符號，其實同時會展現出陽光、健康、有學歷有知識嘅氣質。
雖然喺呢種分類上其實都好粗疏，但呢個就係文化資本最有趣嘅地方。因為Bourdieu所提到嘅文化資本分層，唔係代表嗰個人本身就屬於某個階級，而係社會大眾本來就對某樣嘅文化先入為主，從而去將獲得嗰項文化嘅人分層。因此，同志運動入面所展示嘅種種文化，咁啱就係符合公眾對於中產嘅陽光、健康嘅面向，所以就令同運喺外界睇起嚟，變成一班中產同志嘅活動。但係咪就代表社會就係得呢類型嘅同志呢？咁就當然唔係啦！
但我地都明白，其實作為一個爭取大眾支持嘅社會運動，包裝同文宣都係重要。美國社會學家Charles Tilly提出，每一個社會運動都會為之後嘅行動同埋宣傳道具訂立一個框架，稱之為劇目Repertoire。而對於任何一個爭取大眾支持嘅運動嚟講，其實劇目就係一個好重要嘅定位。所以好多小眾運動都會選擇用番社會現存所接受嘅表達方式，透過表達相同嘅特質，從而用最短時間，得到最多支持。用呢個角度睇的話，其實唔難理解點解同志運動都會採用一種宣傳陽光、健康嘅氣氛，因為陽光同所謂「成功」嘅形象就可以抵抗同辯駁到其他人對同志嘅污名。但用另一面睇，其實呢種表達非常單一，我相信亦未必係大部分同志嘅模樣。
最簡單，係咪男同志就一定係鍾意做GYM，一定個個練到好大隻呢？甚至每一個同志其實都有多重身份。可以係同志，同時係傷健人士。可以係同志，同時係基督徒、甚至係其他社會上被邊緣嘅身份。既然每個同志都係咁多元，我地點解對同志嘅要求會比對社會大眾更高呢？再講，喺呢個陽光、健康嘅形象背後，其實同志運動都經歷過好多傷痛、失去。我地會聽過有同志俾人虐待致死，亦有同志因為唔想再承受種種壓力同歧視而選擇離開呢個世界。呢類嘅傷痛雖然唔會喺同運入面展現出嚟，但確實地成為推動我地爭取平權嘅動力。假如依家反同嘅論述係話同志現身多咗就會開始計謀同志霸權嘅話，首先作為同志一分子嘅我哋，都要意識到同志形象係多元，先可以有更多嘅輿論力量去證明，同志運動目的唔係要建立霸權，而係提倡多元。
另一方面，我哋都好想同覺得自己格格不入嘅同志講，即使你地唔proud of 自己，就算你覺得自己唔合乎呢個陽光形象，甚至被人視為異類、視為「唔屬於」同志。因為本質上，同志都係人，有好多唔同面向，所以唔需要逼自己去做人地心目中嘅同志；調番轉，我地要展現俾其他人知道，每個人都有各自唔同嘅面向，正如社會上每一個人，不論直攣，都唔係一模一樣啦，係咪？
節目出街嘅時候，香港同台北都已經過咗今年嘅同志遊行。今集除咗報導國外同志社群對於驕傲遊行要排除BDSM愛好者嘅論述，亦都希望為收聽節目嘅你，帶黎更多關於香港以外嘅LGBT+資訊。下一家落個小預告，我終於做到另一個嘉賓訪問啦！希望之後都可以邀請到更多唔同領域嘅朋友一齊講同志，分享自己對於性小眾嘅見解。
《點止港同志》喺一個以香港同志角度出發嘅Podcast，希望可以將大家生活裡面嘅性/別同同志議題同廣東話聲音同文字方式保留同流傳。每一集嘅Podcast我哋都有製造文字檔，畀唔方便聽聲音嘅朋友都可以知道我哋嘅資訊。
多謝你收聽呢個節目，而且聽到最後。假如你對呢個主題有共鳴，想分享你嘅故事畀我哋知，歡迎你instagram dm我哋 @pridelabhk。想收到下一集嘅內容，就訂閱我哋啦。歡迎你喺Apple Podcast留言同埋畀星星回饋，你嘅支持同鼓勵會係我哋默默耕耘嘅動力。
今集講就到呢度先，期待下次同你《點止港同志》。