假扮TB案件差不多過咗一個月，今次無咁憤概，我哋將情緒化作力量，好好傾下gay同les網上交友，同埋多咗人講嘅Consent，到底仲有咩要注意？

章節

開始時間	標題
00:00:32	女同志與「扮TB」的案件重點快速回顧
00:02:17	交友要「謹慎」唔係新鮮事
00:04:55	點解（女）同志交友要「謹慎」
00:09:45	不同地方的yes mean yes 與 no means no
00:12:40	only yes means yes 有咩唔同？
00:15:25	「同意」以外仲有一樣好重要嘅嘢
00:17:02	我哋可以點支持經歷過性侵嘅人？

【同志情報局】同志網上交友，要「謹慎」以外1仲有啲乜？

【內容提醒】今次節目會以10月涉及女同志同扮TB嘅強姦案件出發，內容雖然唔係圍繞案件，但係內容性質關係，如果你覺得唔舒服嘅話，咁我哋下一集再見啦。

呢件傳媒形容為「扮TB」、「扮女同志」嘅性侵犯案件，喺2021年10月告一段落，] 7位由6男1女組成嘅陪審團以5:2嘅票數，判案中被告曾子豪強姦罪不成立。

判決引起女同志社群至不少公眾嘩然，大家由法律上罪行元素定義，包括「罔顧」、「真誠相信」，以至陪審團組成等話題都各抒己見。早前我亦都投過稿上立場新聞，講單案對於女同志文化同埋社群有咩衝擊啦。

今次podcast唔係想再做啲情感發言，而係我哋延伸話題，講下同志網上交友，除左叫「大家謹慎啲」，仲有啲咩可以討論呢？以及我哋理解性侵犯案件嘅時候成日講「同意」Consent，唔同地區嘅法律係點理解「同意」呢個字呢？「同意」之外仲有啲咩呢？

• 女同志網上交友圈子

事情發生咗之後，女同志圈內都有唔同嘅聲音關注呢件事。有人覺得事主係被害者，所以要支持佢，亦都有人好奇點解事後仲要send message問個男人問題，亦都有人問「點解要咁心急直接上房」，建議要見下面先、食個飯先、飲下杯咖啡先，先至開房。我都有見到聲明呼籲大家網上交友嘅時候要謹慎。但話時話，網上交友要謹慎，其實十幾二十年前都開始有人講啦。暴露年齡都有講下，如果有人知道我講「型英帥靚正」係咩意思，咁即係證明你同我係差唔多年代。由以前開始用ICQ、MSN話大家會用網名，所以唔好咁容易透露自己個人資料，唔好話畀人哋聽你住邊度、電話幾多號之類。 時至今日，我哋見到有網上詐騙、裸聊勒索，喺個電腦後面認識朋友，就點都會畀你面對面交友嚟得複雜嘅。即使你搵到個善男信女，都唔等於對方適合你。如果下下謹慎交友就可以搵到個善男信女，並且啱自己嘅話，個世界就唔會有咁多交友app啦，係咪先。

無論你係遇到壞人，定係遇到唔適合嘅人，網上交友本身就係存在著一定程度嘅風險。係睇大家點樣去衡量。就正如你會唔會因為自己人生安全而唔出門口、唔搭車、唔坐飛機咁。我哋認識每一個陌生人嘅時候，好多時候都係透過以前嘅經驗，慢慢累積經驗同應對方法，保護自己，量度自己同對方之間嘅距離。

有陣時，如果你真係唔夠信心相信對方，就要搬出一啲所謂嘅審核機制，要認證對方嘅身分。之但係其實嚴格嚟講，操作上都係有困難。以前我入過一啲群組，又要錄音，又要影相。如果你係相信網上有壞人嘅話，要造假嘅嘢，就一定整得出。所以講「謹慎」兩個字，就真係好無力。所以今次我哋不如講下點解要謹慎，同埋女同志交友點解要謹慎啦。

有人同我講，如果上網搵陌生人約一夜情，就最好有另外一個電話號碼，或者係用一啲唔會公開到電話號碼嘅app。我估大家係著緊自己私隱嘅話，其實呢啲都唔難做到 。而點解同志交友要謹慎，其中一個原因就係，唔係每一個同志都能夠承受自己嘅身份畀陌生人惡意公開、網路欺凌，之前嘅男同志n號房事件，裡面有咁多人，但係唔多人挺身而出，當中可能嘅原因就係擔心自己企出嚟，唔單止要面對大眾知道佢同呢一單案有關嘅揣測，攤開自己嘅身份去面對，又未必好多人能夠理解，甚至可能有圈內人士笑佢傻、笑佢唔好彩。喺重重嘅壓力，同埋憂慮會有不可逆轉嘅後果之下，同志本身識朋友就已經有多一重嘅困難。

有同志會透過同志專屬嘅平台，同埋裏面嘅群組慢慢互相認識，至少咁樣就可以畀多啲信心自己知道：呢一班係來自自己人專屬嘅app 嘅新朋友，我唔需要由零開始慢慢認識，慢慢去揣摩到底對方會唔會對自己同志身份有惡意 。而喺女同志嘅交友群組當中其實彌漫著一股不明言嘅擔憂，就係擔心會有非女同志，認同自己係男性，想潛入嚟呢一個好多女人嘅地方。 不論佢喺無惡意，單純黎望下，定係存心想做有利於自己嘅事，女同志面對陌生嘅環境，都唔容易放低對男性嘅擔憂。

時不時有人會話「唉女同志好摺呀」、「好少les bar呀」、「女同志都唔出黎玩」，如果真係要仔細諗，會唔會同身為女性被社會視為要返屋企、唔夜蒲、唔公開講自己情慾嘅身分有關呢？

再返返黎今次事件衍生的討論，如果喺同我同年代嘅朋友，你應該會見過電視廣告「泡泡龍」教我哋遇到被性侵犯要大聲叫唔好。講到性暴力、性侵犯嘅罪行，往往同二元性別男女喺社會嘅地位有關。今時今日香港仍然用緊嘅法律背後，就係以前英國法律中，女性被視為男性嘅資產嘅邏輯。女性的自主權根本唔存在，而當時強姦罪之所以成為罪行，係因為有人強行奪取咗男性嘅資產，就好似有人搶你銀包，你要吿佢偷嘢咁。

咁一件資產本身係唔識say no，係擁有佢嘅人先反對。當你睇唔同地方嘅法例，包括香港，都會特別寫一個男人唔可以扮人哋老公去侵犯對方老婆，都係基於呢個出發點。今時今日聽就梗係覺得好痴線，女人喺呢啲條文下，完全無人權。

當個社會終於意識到女人其實係有say個陣，就發展出到底「同意」 Consent。咁係點畀對方知道自己同意嘅呢？呢個都係好多性暴力刑事案會討論嘅罪行元素。

同意係要講 “Yes 我願意”  定係 無講 ”No 唔同意” 都等同默許同意呢？

即係分別係「Yes mean Yes」 同埋「No means No」

有一個「No means No」嘅版本就係發生喺德國。在修例之前，根據德國刑法第177章對強姦的定義，如果一名女性無法攞出，例如身體上有瘀傷等證據來證明自己曾以肢體動作反抗過，咁被告就唔會構成性侵犯罪。但係喺2015年，科隆火車站和大教堂附近在狂歡期間爆發大規模性侵和搶劫事件，警方喺2016年1月共收到三百幾宗涉及性侵的報案。但隨後，許多報稱受性侵或性騷擾的女性發現自己因為證明唔到有肢體反抗過，或是當時自知無力反抗所以沒有反抗，而完全無法為自己討回公道，唔單止喺法律上無法證明性侵曾發生過，甚至可能因為提供虛假證詞而想男性被告賠償。後來因為群起提出要修改法例，半年之後德國下議院通過了一項修改強姦法的議案。受害人將不必要證明自己曾以肢體動作激烈反抗，而只要證明自己曾口頭反對即可。

而喺1970年代的美國，在第一波女性主義運動中，當時運動者爭取叫Empowerment Self-Defense的概念，透過自我防衛黎強化自己嘅社會權利。於是開始有人提出「No means No」概念，意思喺有人話唔好就等於唔好，對方要停止。佢原意係假如一名女性收到侵犯，當佢講唔好、唔要，而對方仍然繼續嘅話，對方就係有罪。後來呢個概念被批評，因為其實咁樣，當事人係背負住要主動叫唔好嘅義務。

除左say no，針對性方面嘅互動仲有一個邏輯，就係Yes means yes啦。喺2014年美國性教育開始教導「正面同意」（affirmative consent），亦即在性行為前須獲得雙方同意，以yes means yes取代以往no means no，希望藉此提高學生對於自己同意的意識。

而丹麥同台灣現實都提倡only YES means YES，即係沒有同意，就是性侵，就是強調性主動的一方有責任確認對方在「完全清醒」的狀態下「同意」性行為，而不是用「沒有說不就等於願意」的模糊態度侵犯他人。佢哋提出，No means No代表任何人有權利拒絕不愉快的性要求、有說No的權利，然而許多的性侵害被害人可能連說不的能力都沒有就遭到侵害。同時，only YES means YES也是鼓勵「溝通透明化」，避免「性同意」成為性侵害事件能否成立的爭議點，也能降低對性行為雙方造成傷害的可能。

儘管有Yes means Yes，但係我哋點樣實踐呢？例如係咪一定要講Yes，先為之同意發生呢？但係往往私密的情慾互動，性行為之中，我哋成日講「情到濃時」，係咪都要等對方話Yes 先可以繼續？如果要約一夜情，係咪又要好似簽合約，寫明接受啲咩先可以開始呢？不論Yes定No，其實舉證一樣困難，因為要證明被害人同意與否，還是要依靠唔同方面嘅證據，例如肢體動作、肢體語言，有無開口講出聲之類。

依家好多人提起Consent，但同意背後，其實仲需要有知情成分。例如我哋簽合約嘅時候，都會以靠條文話畀我哋聽有啲乜嘢需要注意 。先可以基於資料充足嘅情況之下，同意或者唔同意。所以呢度亦都衍生另外一樣嘢 ，就係如果我哋將「同意」視為定義有冇性侵犯嘅因素，其實係假設每個人都有完全嘅權利講到自己同唔同意。

唔知大家有沒有經歷過一啲場合：其實內心唔係好想去做一件事，但係因為對方嘅嘴臉或者地位，所以你只能夠講同意呢？假如發生事情嘅場景本身就係存在權力不對等，人哋可能控制緊你人身自由同埋財政自由，係咪只能夠透過當事人有無講Yes同No去決定呢？

案情結束，除左有更多相關嘅思考，我哋作為旁觀者，其實可以講下empowerment充權嘅重要性。充權其實可以一步步做起，例如畀返當事人表達佢嘅想法，由佢自己決定自己想點。

性侵經歷者其實唔係永不翻身的受害者，如果只係一味保護，覺得佢哋好可憐，甚至覺得有缺陷，其實旁觀者都會成為打擊當事人嘅一群。

依家有機構開始唔用「受害者」，改用「幸存者」，幸福個「幸」，存在個「存」，就係想表達佢哋唔係永遠嘅「受害者」。

其實過往研究性侵犯的文章都有指出，部分發生性侵犯的動機係唔係為咗性歡愉，而係權力的剝削。

唔係當事人嘅我哋，其實可以鼓勵當事人講經歷過的傷痛，轉化成為佢嘅話語權黎伸張公義。

透過表達不同程度嘅傷痛/創傷，成為佢哋走出黎嘅動力。

2021年5月嘅時候，480.0藝術空間舉辦咗名為《#OneInSeven – 性侵幸存者的一物》  展覽

展覽中，幸存者講當佢同身邊嘅人講自己被性侵嘅時候，其實遇到好多「唔相信」同埋反問。

每一個「唔係掛」或者好奇嘅問題，都會令你間接成為加害者。

假如，假如有一日，你身邊有一個當事人，請你將精神同關心放喺佢嘅休息、飲食，好好照顧呢位當事人。

《點止港同志》喺一個以香港同志角度出發嘅Podcast，希望可以將大家生活裡面嘅性/別同同志議題同廣東話聲音同文字方式保留同流傳。每一集嘅Podcast我哋都有製造文字檔，畀唔方便聽聲音嘅朋友都可以知道我哋嘅資訊。

多謝你收聽呢個節目，而且聽到最後。假如你對呢個主題有共鳴，想分享你嘅故事畀我哋知，歡迎你instagram dm我哋 @pridelabhk。想收到下一集嘅內容，就訂閱我哋啦。歡迎你喺Apple Podcast留言同埋畀星星回饋，你嘅支持同鼓勵會係我哋默默耕耘嘅動力。

今集講就到呢度先，期待下次同你《點止港同志》。