從喺Netflix睇完一套紀錄片，醒起我哋身在嘅香港
時至今日，仍然有人做咁樣嘅事…
某啲宗教同性小眾之間嘅矛盾
活於現今社會嘅我哋，又可以點樣理解呢？

章節

開始時間	標題
00:00:50	介紹Netflix紀錄片《反同運動的前世今生》
00:03:03	香港例子一：香港心性教育協會
00:06:28	香港例子二：後同盟
00:08:28	當事人同「治療人員」之間權利唔對等
00:10:10	唔叫「拗直治療」，變咗「與攣人同行」？？
00:13:50	慎選「服務」性小眾組織

【同志情報局】Netflix影評｜香港依家仲有拗直治療

歡迎大家返到今集《點止港同志》

我係主持馬天娜。

今集嘅主題係 【拗直治療】

可能大家以為，依家好多國家已經對同志有開放嘅態度，唔會再有呢種以醫療為名，夾硬將人拗直嘅行為。但事實上，不但喺美國仍然有組織去推動拗直治療，甚至喺我地依家身處嘅香港，亦不斷發生緊。雖然時至今日，佢地好少會再用一啲極端手法例如電擊、或者係逼你同異性發生性行為去將你拗直，但係就會用一啲醫學行為同心理輔導，令你覺得鍾意同性係錯嘅，係可以改變嘅。

早排喺Netflix一套好熱門嘅紀錄片《反同運動的前世今生》，正正就係講呢啲拗直治療點樣喺美國盛行。內容講述喺1980年代，同性戀仍然被視為精神病嘅一種，咁啱又出現愛滋病案例。因為當時社會大眾對於愛滋病嘅了解好少，淨係知道好多男同志都染上呢個怪病而離世。

基於呢個背景，一方面，保守宗教派人士就透過呢個病，塑造成係上帝對同志嘅懲罰；另一方面，一班同志都好擔心自己會染上怪病而去尋求協助。因此，一堆自稱宗教同志嘅互助組織就應運而生。佢地打住同志同行者嘅旗號，實質喺度推動拗直，或者叫做矯正治療。

其中發展得比較純熟嘅有走出埃及 （Exodus），同埋生命之光（Living Hope）。兩個組織都會搵幾個離開同性戀圈子嘅人，呢啲人被成為Overcomer，有克服過事情嘅人嘅意思。香港同台灣多數就叫「後同」，後面個後，同性戀個同，英文就叫post-gay。佢哋不停去宣傳，甚至會上電視節目去分享佢哋由攣變直嘅經驗，令到一班本身有宗教信仰，但冇乜傾訴對象嘅同志深信不疑。時至今日，美國仍然有後同嘅宗教人士，組織叫做freedom march，中文翻譯叫自由遊行嘅活動，提出自己可以走出以前LGBT嘅生活模式，喺上主嘅懷抱之中，獲得佢哋認為真正嘅自由。

我地推介大家睇呢套片嘅原因，係佢搵到一班呢啲組織以前會喺電視、佈道會不停話攣可以變直嘅中流砥柱，到今日竟然公開承認自己當年係做錯咗。有幾位到今日甚至已經搵到一個好幸福嘅同性伴侶。如果大家想知多啲呢啲組織做過啲乜，就記得上去Netflix睇片啦。

望翻香港嘅情況，其實一直以黎，都有類似走出埃及嘅組織運作緊。

喺2019年，由精神科醫生康貴華成立嘅新組織，香港心性教育協會就係其中一個表表者。呢位康醫生喺2004年已經捲入提供拗直治療爭議，公開咁講「性傾向改變是可能的，同性戀者可以有另一個選擇」，仲提及佢做過有個案涉及「邪靈附體」、禱告釋放「嘔吐」的現象等等，被當時嘅同運團體大力抨擊。佢另外一個身分，就係有明光社董事。明光社係咩黎架呢？就係曾經出過刊物話同性戀患愛滋病機會高　被平等機會委員會批評過嘅基督教團體。

講返呢個康醫生新成立嘅香港心性教育協會先，協會嘅宗旨話要為性小眾群體同家庭提供專業支援，仲要推動平等機會，尊重差異嘅社會價值。就咁睇啲字我仲以為係新同志組織添。佢哋仲有一條由政制及內地事務局資助制作嘅片，入面搵咗幾個「後同」分享自己由攣變直嘅心路歷程。

講到呢度，你係咪好好奇，到底點解會有後同呢？佢哋就咁講嘅。首先講吓同志喺屋企得唔到愛，親子關係唔好，或者覺得自己身為同性戀同自己宗教教義相違背，接落去就話同志嘅戀愛關係其實好痛苦，而且Member嘅私生活「一塌糊塗」，好多同志係自己同性伴侶同教會之間兩邊不是人，所以呢班「同志過來人」根本就唔開心。

呢兩點如果配合埋一啲研究嘅數據，例如同志家暴數目都幾高嘅實況，同埋身邊都聽唔少自己人苦戀嘅故仔，大家好容易就會有共鳴。所以就引大家睇到條片嘅最後，就提供一個方法俾大家，就係佢呢個機構可以幫手做中間人，幫你修補家庭關係。但聽真啲，呢幾個「後同」係同你講，當宗教成為接納同包容嘅來源，原來自己唔係要做真﹒同志。佢哋意識自己係受家庭影響，影響咗自己作為男人同女人嘅定義。而教會就可以俾到佢哋歸屬感，令佢哋認清翻一個男人要係點，一個女人要係點。咁以前嗰啲所謂嘅同性戀呀，其實都唔係真愛，只係求友情同埋認同咋。其實呢條片想話觀眾知，同志嘅出現係因為身邊冇人認同，逼於無奈先會去愛上一樣性別嘅人，當事人自己都唔想架！但係！只要有人去包容、接納你，你就唔洗變成LGBT+囉，就一天都光曬囉。

平心而論，睇到呢啲新組織，不禁要讚嘆佢哋都與時並進：由以前極端恐同，甚至連「同志」呢個Term都唔會用，去到今日叫自己做同行者、支援者。亦都有其他組織話佢哋唔係恐同，而係「友善關心同性戀，不推崇同性戀行為」。佢哋都開始意識到直接話同志有問題就會出事，所以依家強調佢哋理解嘅「同志有善」，話會聆聽、接納後同盟形容「不一樣的愛」嘅人。

2020年11月，另一個組織「後同盟」搞咗個線上跨虹節，跨性別個跨，彩虹個虹，英文叫raindow crosser。佢哋請咗心性教育協會上去講點樣同性小眾同行。個節目裡面提到形成同性戀有九大因素：包括被性侵犯、家庭排位、管教模式、感情經驗，甚至係社會文化等等。只要處理到同性戀者遇到嘅問題，就一天都光曬，班同志就唔會再做同志，就變成後同啦。

呢類「係咩導致同性戀」嘅講法，其實就同套Netflix紀錄片所描述嘅美國組織非常相似。呢啲組織都好清楚知道，同志一聽到「明光社」、「家長大聯盟」呢啲老字號就會起曬鋼。於是就不停開發新組織，起一啲新嘅名去加大個接觸群，仲搵啲後生新力軍出黎講下嘢，好緊貼時代脈搏架。呢個故事話畀我哋知，唔係見到彩虹，見到嘅同性戀個同字就以為係同志。聽埋佢哋呢啲「幫緊你幫緊你」嘅論述，麻煩保持警覺，聽清楚，望清楚，唔係見到有彩虹顏色，有個「同」字就以為係一樣。

接住落黎，就係關於拗直治療嘅討論，假如你直接或間接接觸過「拗直治療」，記住，你唔係孤單，你亦都無錯。即使你覺得自己有冤無路訴，都唔係你錯。因為係有人走灰色地帶，唔單止唔係治療，仲要用所謂醫學傷害活生生嘅人。

雖然唔少同志一聽到「拗直治療」呢四個字就話無用，係無稽，但除左呢啲形容詞，拗直治療仲有其他問題：

第一點，當事人同所謂嘅輔導員或者治療人員之間嘅權力係唔對等。試諗番你平時去睇醫生，佢都會同你講解佢診斷你咩病，佢開咩藥畀你，甚至會提供多幾種方法俾你去考慮。

《香港註冊醫生專業守則》都有講，醫生喺做任何治療之前須徵求病人作出「知情的決定」。例如第2.7段講到：「醫生需要向病人正確解釋建議治療的性質、成效及所涉風險，並向病人提供其他治療選擇，包括不接受任何治療；及病人正確理解建議治療的性質和影響。」2.10段都要求醫生應使用病人能夠明白的用語。

但係呢啲拗直治療，就算係有個有醫生執照嘅人同你做，都未必將過程嘅細節同你講：你會接觸乜嘢物質、會唔會有後遺症都未係好清楚。人哋有「同志過來人」，我哋都有「拗直過來人」，佢哋表示治療前要簽保密文件架！請問咁樣點保障病人權益呢？

第二個問題，就係「拗直治療」呢個舊名會被改成同治療無關嘅行為，例如「輔導」、「家庭共融」，甚至話自己去幫受同性戀傾向困擾嘅人。咁反映咗呢啲支持家庭價值嘅宗教團體都知道「拗直治療」喺醫學角度根本行唔通。除咗佢地之外，由2000年開始，美國精神醫學學會、香港精神科醫學院同埋香港心理學會都分別發表過聲明，直接指出「拗直治療」係不道德、未有科學根據，同埋無效，not effective呀。有好多研究報告都顯示，拗直治療會造成創傷後遺症、抑鬱，甚至會有自殺傾向。所以，佢地索性換過另一個名，將佢哋呢啲矯正人心嘅行為包裝成「同攣人同行」嘅輔導。

第三，亦都係最嚴重嘅問題，就係出咗事都無仇報。時不時我哋都會見到有新聞報導有人睇完醫生，接受完治療之後出事，要投訴醫療失當。公立醫院醫生有問題就搵醫管局，或者個別家庭醫生懷疑專業失德就去香港醫務委員會投訴，甚至護士、心理治療師、物理治療師等等都會有相對應嘅委員會去監察一班掛牌行醫嘅人嘅專業操守，嚴重嘅可以喺調查同埋紀律聆訊直接釘佢牌。呢啲制度就係形成一個安全網，俾一班接受醫學治療嘅人有一個渠道去發聲，同時亦都可以監管一班負責做治療嘅人嘅質素。

但依家同你講，有一班自稱係心理學家，甚至唔知佢咩背景嘅人話去幫你進行拗直治療，出咗事嘅話，又可以向邊個投訴呢？因為制度之間嘅空隙，間接將好多個案滅聲。即使你遇到一個自稱醫生嘅人同你去做治療。你事後翻倒屋企，覺得身體上同心理上都好唔舒服，想投訴，但係因為正常人出街唔會揹住個GoPro 隨時錄音錄影，自己無留底，又唔容易搵翻個醫療紀錄。結果就有人帶著陰影無路訴。時至今日，呢類治療手法就仍然生存喺灰色地帶，潛伏喺社會之中。

老字號組織明光社嘅官方網站主要係用「更正治療」去講，當中有一句係咁形容：「有關治療幫助個別人士克服同性性吸引及社會性別的混亂」，又話「愈來愈多國家否定更正治療，間接令一些自願想改變性傾向的人士求助無門」。明光社總幹事蔡志森仲喺2011年已經寫咗篇文，話「一啲協助想改變的同性戀者的機構，其實只係協助一些對自己性傾向有疑惑的人，為他們提供全人的關懷，係啲同運團體將佢扭曲成「拗直治療」呀。

我哋開頭講到嘅香港心性教育協會，後來我哋搵資料發現，原來後同盟同埋心性協會都係康醫生創立架。兩個機構分別得到政府資助，去做所謂嘅為性小眾群體同家庭提供專業支援，係點「支援」呢？我相信都會時移勢易，會有新啲嘅論述。我地亦都預期未來會有更多唔同招牌，但核心價值一樣嘅機構。所以，如果你仍然揀緊一啲同志組織希望互相扶持嘅，就要記得睇清楚佢講緊啲乜嘢論述。如果又係以同「心理輔導」，甚至類似嘅字眼去包裝，黎糾正你性別氣質、鞏固性別定型嘅訊息嘅話，就麻煩你三思三思，你嘅人生值唔值得被佢哋教化。

反而我地應該要提番自己：性向同性別至古以來都係多元，我哋依家聽到所謂嘅一男一女家庭價值根本唔係傳統。世界上仲有好多唔同嘅社會文化係同我哋唔同。無論你成長背景如何，喺一個強調多元嘅社會，喺應該嘗試同理唔同人嘅處境，互相保持尊重嘅距離，呢個先係真正自由嘅定義。

《點止港同志》喺一個以香港同志角度出發嘅Podcast，希望可以將大家生活裡面嘅性/別同同志議題同廣東話聲音同文字方式保留同流傳。每一集嘅Podcast我哋都有製造文字檔，畀唔方便聽聲音嘅朋友都可以知道我哋嘅資訊。

多謝你收聽呢個節目，而且聽到最後。假如你對呢個主題有共鳴，想分享你嘅故事畀我哋知，歡迎你dm我哋@Pridelabhk，一切資料，絕對保密。想收到下一集嘅內容，就訂閱我哋啦。歡迎你喺Apple Podcast留言同埋畀星星回饋，你嘅支持同鼓勵會係我哋默默耕耘嘅動力

今集就講到呢度先，期待下次同你《點止港同志》。