時下個個話#bodypositive要自愛，但到底要點先Positive？
身體變成點我唔理，我覺得自己靚就係Positive？
今次主持同嘉賓剖白，大談身材、肥、人工美，分享Positive前要改變嘅事
章節
| 開始時間 | 標題 |
|---|---|
| 00:00:43 | 從《造美人》看身體認知同自信 |
| 00:03:21 | 靚的框架？各花入各眼？ |
| 00:06:41 | 外表、身材成為武器 |
| 00:07:47 | 外表其實掛在口邊？ |
| 00:09:21 | 資深肥人談無處不在的肥 |
| 00:11:08 | 不同「肥」的定義 |
| 00:15:39 | 醫學專業判斷如何影響我們理解身體？ |
| 00:21:26 | 無止境的「做好啲」 |
| 00:23:44 | 人人Positive，係咪真係Positive到？ |
| 00:25:19 | Body Positive前不如試下… |
【專訪自己人】兩個肥人論Body Positive
M：馬天娜
陳：陳驚
M：歡迎收聽《點止港同志》，我係主持馬天娜。今集我哋就會講下 Body Positive，中文叫做「身體正面」嘅想法，身體正面最常被提及嘅話題就係肥胖。而今集我哋搵多咗一個人，同我越洋、同我傾嘅，就係 PrideLab 裏面最肥嘅陳驚。陳驚，你好。
陳：你好呀，我係陳驚呀。我係已經有肥胖超過二十幾年嘅經驗嘅朋友仔。
M：好啦，噉我哋今次就邀請咗呢位資深肥人去同我哋討論下，關於對於身體認知，以及係自信嘅一啲討論。前排 ViuTV 就有個節目叫做《造美人》喇，陳驚有冇睇過呢？
陳：睇過一兩集。但係我有好印象深刻係第一集。
M：點解呢？
陳：有個女仔就俾評判講兩句之後呢，佢去到後台係喊。我好記得佢喊嗰句，佢話做女人實在太辛苦啦。跟住我好似感受到，嘩，社會嘅壓力真係好似搞到佢好慘噉。
M：做女人好慘呢，我等陣都會提及到。因為我睇完之後，我都覺得節目裡面嘅人，係有唔同嘅，而嗰種唔同其實好明顯係建基於嗰個人成長裏面對身體嘅自信，同埋佢嘅自尊建立有關係嘅。
就住呢個節目，我睇晒成套節目啦，咁就由頭睇落尾攞獎咁樣。喺個節目裡面呢，有人，正如陳驚所講，就好容易喊喇，覺得做女人好慘喇，要符合好多嘅美學嘅標準，又要減肥，又要白、又要瘦、又要皮膚好，仲要冇斑點之類之類之類。
但係亦都呢，喺一個節目裡面，我睇得到啲評判，同埋旁白，佢都有講到話，其實有一啲人，佢個性格係好分明嘅，係睇得出佢好有自信喇、佢好有自己嘅表達嘅方式啦，噉所以其實喺一個節目裡面呢，係有提及過，有一啲人，佢嘅性格立體喇、亦都俗稱「襟睇」喇。所以即使佢嘅外表，可能唔係典型女性嘅嗰種，即係好陰柔、長頭髮嘅嗰種形象呢，佢仍然都係可以繼續喺呢個比賽裡面參賽，同其他嘅參賽者去鬥最後嘅冠軍噉樣。
所以其實呢個節目裡面呢，有提及過一啲關於性格，同埋自信嘅重要性嘅，就係你如何從呢啲外面嘅援助呀，即係包括做 Gym 、減肥、醫學美容呀，呢啲嘅輔助之外呢，你係確立知道自己想要啲乜嘢，同埋你最後嘅目標想做啲乜嘢。
中間對身體、同你嘅外表嘅自信嘅建立呢，其實我喺呢個節目裡面，睇到係最重要嘅一個部分。所以中間改造嘅嗰個部分，其實我覺得唔係真係好大嘅重點，因為外面個世界就係有咁多呢啲醫學美容、咁多輔助嘅嘢去令到你表達有力，可以改造你個樣、改造你嘅身形。咁你點樣可以喺呢一個社會裏面，了解到自己嘅需求同定義到自己呢，呢個先係最重要嘅討論。陳驚，你會諗起啲乜嘢關於靚呀？關於外表美嘅一啲想法？
陳：我覺得大家討論過程裡面好多時候都落入咗，究竟係咪有一個「美」嘅框架？我自己可能因為都係做創作啦，咁我成日覺得呢，你喺電視、電影、海報裏面，見到靚嘅嗰啲人唔一定係佢天生靚嘅。其實唔一定係佢自己副偈（編按：「副偈」=身材外表）嘅問題，即係仲有涉及好多嘢。你睇到嘅可能入面有燈光、有造型、有化妝、有攝影嘅構圖、有時候有後製嘅情況喇。而嗰個外表好靚嘅人呢，如果佢唔識得好識用佢嘅身體、唔識得用佢嘅表情、或者佢唔係好記得佢嘅對白，或者佢唔識得投入佢嘅角色呢，其實佢再靚嘅殼（外表），都係好阻人收工。
我唔知係咪因為我有呢個工作嘅經驗喇，所以我係唔覺得一個人靚同埋唔靚，就取決我對佢嘅態度好唔好囉。即係我見過節目裏面有講，有啲女仔會話，佢就係因為太醜樣，所以成日俾人蝦咁樣喇。但我覺得佢蝦一個人嘅原因，唔一定係個殼㗎嘛。同埋我自己拍片呢，咁亦都會有唔同嘅角色嘅。噉你 Casting 呢，其實係好完全睇嗰個角色嘅需要。例子就係，大家會好介意老喇，係咪？但係當如果個角色係要長者、我要老呢，就係我有啲Comp card（編按：模特兒卡）啦，收咗啲 Agency 嘅 Comp card，噉俾個客睇呢，個客係會只係揀一啲白頭髮嘅。佢要老嘅話，佢真係要去到好老㗎，一望就睇到係老㗎。所以我覺得嗰個靚嘅標準係冇一定㗎囉。即係好視乎究竟嗰個 Moment 嘅嗰件事，需要一個乜嘢嘅人，各色各樣嘅人都係需要嘅。即係有紋身嘅係靚，冇紋身嘅都可以係靚，噉樣諸如此類。
M：但係我估你頭先所講嘅多元性，喺香港呢個地區嚟講，係唔容易做到嘅。原因係，我哋呢度唔鼓勵，或者由細到大，我哋唔會咁常受到周邊嘅媒體或者係屋企人，會鼓勵話「你可以做你想做嘅樣」，或者佢哋唔會強調嗰種「每一個人都唔同嘅」、「只要你做到你自己想做嘅模樣呢，就會有人欣賞你」、「堅持你想做嘅嘢，就會係一種美嘅一種思考」。
噉所以頭先你所講到欺凌嘅位呢，我覺得其實有好多人由細到大，都可能因為一啲小小嘅動作、或者一啲好細嘅特徵，就會俾人捉住嚟講，跟住就唔知點解黐咗啲咩線，就會成為咗佢哋被杯葛嘅原因。而呢一樣嘢我諗緊，其實調返轉頭嚟講，會唔會就係好多人，為咗避免會有機會俾人排擠，所以就要先用一種比較自我保護嘅心態，去融入嗰種主流嘅美學。你覺得呢？
陳：我覺得呢，有個奇怪嘅位呢，就係當你唔鍾意嗰個人嘅時候呢，你會連佢嘅外表都會唔鍾意埋一份，咁你就會放大咗佢外表嘅唔好。我有時候嗰個人未必有咁差，就係因為你唔鍾意佢，然後繼而你由佢嘅裏面，討厭到佢嘅外表，到佢咩都係錯。
M：我諗攞住一個人嘅性格去鬧佢呢，係冇咁大力嘅、即係冇咁強嘅。我哋鬧人嘅時候，比較容易得到其他人共鳴嘅方法，就係攞人哋嘅外表呀嘛，因為人哋嘅外表係所有人都可以睇得到。但係如果你要攞住、你要執住人哋嘅內涵去鬧佢，「佢心地唔好呀」咁樣嘅時候，就反而冇咁大力喇。
如果你蝦人、要欺凌人嘅嗰個角度去講，呢個節目裏面有提及過一啲叫網友評論，或者係酸民評論嘅部分，當中就係攞一啲參賽者嘅相俾一啲路人甲乙丙丁去評論。「佢條腰點樣呀？」「佢個胸點樣呀？」「Patpat（屁股）係咪好大呀？」
而我哋都諗緊另外一樣嘢就係，好多人都會遇到一個情況：你好耐冇見一個朋友，個朋友第一眼望完你，同你 Say 完個 Hello 之後，下一句就會攞你嘅外表去做一個評論。即係例如：「Hello，好耐冇見，你肥咗喎」或者係「你瘦咗喎」、「殘咗喎」之類。
而呢啲嘅習慣，其實潛移默化累積落嚟呢，就會變咗當你面對身邊所有人嘅時候，你嘅外表會成為你哋溝通第一個話題。因為你唔會完全停止咗呢個對話㗎嘛，所以佢一講起咗你嘅身體發生咗啲乜嘢變化之後，你第一樣嘢諗到嘅就係體重，或者你外表上面嘅轉變。人哋覺得你肥，或者人哋覺得你殘嘅時候，佢單單嘅一句，令到你覺得你身體唔好睇嘅時候，佢背後嘅邏輯就係「你要變瘦喇」、「你要健康喇」、「你要身體結實喇」、「你要做多啲運動喇」。
但係佢哋冇顧及到嘅就係，你要做到呢啲嘢，係需要付出時間同埋金錢。每一個人究竟有幾多嘅時間同金錢，或者呢啲資源去令到自己嘅身形同外表都成為對方所謂滿意嘅定義，係好多人冇理到嘅。呢一個習慣係會令到好多人由細到大慢慢積累落嚟，就有呢一種咁樣嘅身體焦慮喇。
陳：作為一個肥人，我有個經驗我都同意嘅。基本上問候好多時候好容易會用身材去做一個開場白，即係「你肥咗好多喎」，係咪？好似有一個關心嘅態度去關心朋友。但係我覺得肥最大嘅特別之處，就係佢嗰種關心係超越你認識嘅人。我有唔止一次嘅經驗，可能係坐 Uber，或者坐的士，或者我只係落樓下搭一架𨋢，一個呀伯、呀婆，一個呀嬸，佢會忍唔住問我「你幾重」咁樣，或者「你要減肥喇啵」。我同佢係素未謀面、唔會再見喇，但係佢係會認為你肥到佢可以去關心你，或者勸喻你。
我喺條街見到有人食煙，我唔會無啦啦行埋去，講「喂你食咗幾多年」、「你要唔要戒煙？」。但係好似「肥」呢樣嘢，係好似衝破到一個陌生人嘅界限。你同我係咩關係呢？你批評我做乜嘢呢？但係好似你肥，所以我批評你係合理，而嗰個 Judgement 係你唔會覺得佢冒犯㗎囉，世界嘅大眾覺得，如果唔係你唔會咁容易…我唔係一兩個呀嘛，我係有好多次咁嘅經驗。好似社會上你覺得你三口唔識七都可以去叫人「你係時候減肥」，因為呢個係一個關心。呢樣嘢係同時間會導致嗰個人有好多嘅負面情緒。我都覺得好煩擾，我嘅煩擾係，我真係唔識你，我點解要同你交代？就算我有呢個需要，唔識嘅人都嚟問我嘢，我係覺得好奇妙。
M：講起肥呢件事，我本身唔多人會直接話我肥嘅。我為咗呢個節目做咗啲功課，就睇完呢個《造美人》嘅節目嘅同時，我諗起咗一個好重要嘅嘢。唔係佢嘅畫面話畀我聽點樣點樣，而係成個比賽裡面冇人肥過 60kg 囉。噉作為一個已經超過 60kg 好耐好耐嘅人呢，我係覺得成個節目由頭到尾係唔關我事嘅。因為你減嚟減去，其實你本身已經瘦過我，咁面對佢哋嘅自信、面對 Body positive 或者係對身體有正面嘅睇法呢，我成日都喺度諗緊，就係最常俾人攞出嚟講，就係曾經所講嘅「肥」喇。
肥到連路人甲乙丙喺條街度都會同你講「你幾重」嘅時候，其實「肥」呢個 Keyword 真係身邊好多時候都會發生，會帶起嘅題目喇。對於好多人嚟講，可能擳啲肥肉出嚟、件衫 Show 到啲肥肉出嚟，就已經係肥。或者係陳驚遇到嘅狀況，就係路人同你講肥，以及係醫生判斷你、醫學判斷你嘅肥。喺咁多嘅定義嘅肥之中，我哋點樣去面對以及肥同 Body positive 之間，我哋可以點樣理解、點樣去解讀呢？呢個就係我想邀請資深肥人陳驚去分享多啲嘢畀我聽嘅。
陳驚因為肥呢件事係有睇過醫生喇。噉你可唔可以分享下肥對於你嚟講係點樣嘅一件事呢？
陳：其實呢，就係我小學發育就已經開始肥㗎喇。咁呢個肥呢，係好有一個醫學嘅定義。大家就係用體重嘅 BMI 喇，同埋呢個脂肪嘅百分比喇，噉所以我會磅過嗰啲嘢喇。所以我係由肥、癡肥一同埋癡肥二我都係經歷晒㗎喇，即係大家都知道，相信大家見過我嘅相片嘅話。
但係我又好老實講呢，我係冇對我嘅身體好大程度嘅反感嘅，關於肥胖。為咗呢個節目我都有反思，我覺得肥引致到我身體發育嘅時候有一個比較巨大嘅預防喇，而我當時係未用束胸嘅。我覺得係好影響我，我有好大焦慮，呢個焦慮我覺得係相當大嘅程度同性別不安有關。
即係講返畀大家聽喇，我係個跨性別嚟嘅，所以嗰個位我會覺得係同性別不安比較大關係。除咗肥會帶嚟大波，會令到我對肥呢件事反感呢。我對肥嘅反感，好多時候都唔係嚟自我身體㗎，因為我買到衫喇，我又做到我想去做嘅活動嘅。可能我本身就唔係太鍾意運動喇，所以嗰個限制，我冇覺得因為肥胖而令到我少咗好多生活。所以我覺得我對肥胖嘅反感好多時候係嚟自於啲三唔識七嘅批評，或者三唔識七嘅關心。我冇覺得肥胖令到我有好大嘅負面情緒嘅，但當然我冇覺得我肥所以我自信，我又冇去到呢啲正面嘅位。
同埋我由細到大都唔係一啲女性嗰個形象喇，所以我就算見到嗰啲肥嘅女 Model 登上咗封面，我都冇覺得我自己係有投射個形象喺嗰啲封面度。我唔會覺得，「嘩，原來肥人都可以著 Bikini 咁靚」咁樣。我冇呢啲諗法，所以我覺得我自己喺嗰個位呢，我係同 Body positive 好似好冇關係嘅。因為好多時候嗰套 Body positive 同女性嗰個形象都好有關係。
作為一個肥到喺醫學上面會被稱之為有危險嘅人呢，我係被安排去要見醫生減肥嘅，其實減肥呢都得四個方法嘅啫：運動、節食、食藥同埋做手術，基本上就係喺逐個方法試，咁如果唔得嘅話，就要去到一啲冇辦法逆轉嘅醫療介入喇。
M：你去到講到醫療介入嘅時候，我係想問下你，睇醫生嘅時候，醫生嘅口吻係點樣判斷你作為一個肥人，你應該點樣，或者係佢有冇提及過有一啲嘢，其實會令到你覺得好氣餒或者有負面嘅情緒？
陳：噉又冇喎，我覺得醫生呢，係因為真係好出於我嘅健康需要去關心我。我覺得佢比我更加關心我嘅身體，佢會覺得如果我呢個年紀、如果去到40歲我都唔減落嚟，其實我好容易好大機會中風。所以佢係屢勸我去嘗試減重。我諗可能嗰個關係因為我 Keep 住有同一啲醫生覆診喇。佢又抽我嘅血喇、睇住我嘅指數喇，佢有嘗試過建議其他嘅方法係即時、短期可以處理到我唔舒服嘅狀態，但同時佢都要搵一個長遠可以幫我解決嘅方法。
噉所以我覺得呢啲態度會令我覺得冇咁大嘅批判，因為佢同我一齊共同去尋求緊一啲解決嘅方法，就唔係一個純粹「你減下喇」，然後就學你話齋，就係即刻就用佢自己減開肥嘅方法就好多 Suggest 你，而唔係去理解你嘅出發點諗。我嗰個分別最大就係喺呢度。
譬如我無論係要做醫療嘅減重喇，或者係我性別不安要做一啲醫療上嘅介入喇，其實都會有一個關口呢，要去同臨床心理科去溝通。佢都係要 Make sure 你去做呢啲醫療介入嘅時候，係一個好清楚，你係點解要咁做喇、你想做嘅醫療介入，同你嗰個期望達到嘅效果係咪合理嘅期望裡面嘅。即係唔好諗啲太天馬行空，你打支針就會靚曬㗎喇咁樣。即係我覺得嗰個過程其實都好重要嘅，而嗰個過程就係去做到你嗰個建構、你嗰個自信，同埋你嗰個目標。
M：頭先你講到醫生介入呢，我雖然係冇涉及到任何減重嘅程序喇。咁但係呢，你所講嘅嗰種有醫療介入之後，你會達到某一啲嘅標準或者某一啲嘅果，我係有共鳴嘅。我想體驗下，我個樣變咗啲嘢之後，我會有啲乜嘢心理上嘅改變呢？
我係有去做醫學美容，我係有去打針喇。咁，我做咗啲乜嘢呢？我係有打過淚溝喇，即係我有打填充物。我亦都有好似個《造美人》畫面裡睇到有啲好長嘅針篤落你塊面度，然後由你嘅蘋果肌，好似扇形咁樣打，打到落去個下顎個位，再打返落去個嘴角，再打落去個鼻角。即係好似一個圈咁樣，即係順時針咁樣打嘅。咁做呢啲過程之前，醫生係會話畀你聽，你做完之後會期待某一啲位會消失喇。即係例如你條溝會消失喇、你啲皺紋會消失喇、跟住你嘅法令紋就會消失喇。咁你需要等幾耐喇，然後你中間需要做啲乜嘢步驟，例如你要按摩、你要避免曬太陽、你要避免浸溫泉之類之類嘅嘢。所以你係會喺一個 Expected result 裡面去做你啲醫學行為嘅。
噉我自己呢，由細到大都係冇收過因為身材或者外表而對我有唔友善嘅對待喇。除咗曾經我真係因為唔知咩嘅原因呢，有人好直接同我講話，我嘅身形就搞到佢幫唔到我搵一條褲，即係我Pat pat太大，所以我就搞到佢好麻煩、搵唔到一條褲畀我著咁樣。除此之外，其實我都冇啲乜嘢好特別嘅唔好嘅經驗咁樣。
但係由細到大，我係對我嘅淚溝，即係我眼下面嘅嗰個位呢，係好著緊嘅。咁所以去到而家呢，我終於體驗咗呢個改變之後，我就會知道喺我心目中、喺醫生嘅眼中以及喺其他人嘅眼中，我係會有咩嘢轉變喇。我做完嗰啲醫學美容嘅過程之後，我聽到一句好得意嘅說話嘅。佢就係講話：「我覺得你個樣變後生咗，但我唔知道你做咗啲乜。」我諗呢句說話其實對於一啲唔想承認自己做過醫學美容嘅人嚟講，係一個成功嚟嘅。因為冇人知道你做過啲乜嘢，但你個樣靚咗。
而喺成個過程之中，我覺得最重要嘅位就係醫學嘅角度裡面，佢點樣令到你對身體、對外表嘅定義有所動搖，而呢個動搖係非常之講求你本身成長背景賦予你「自信」嘅定義係幾多嘅。即係點樣呢？
我喺個諮詢過程之中，個醫生係會同我講話：「你個樣係可以改善喇、你可以再做好啲，你個樣做啲乜嘢乜嘢乜嘢，你就會變咗一個心形面。」「心形面」嘅意思，即係你個額頭係突出嚟嘅、你個下巴係尖嘅。喺你拒絕佢話「我唔想搞我下巴」、「我唔想搞我額頭」嘅時候，其實你係拒絕咗一個醫學嘅判斷喇，當然你唔知道呢個醫學判斷背後嘅商業邏輯係點樣。但係成個過程之中，你係拒絕緊一個醫生嘅建議，而當中其實你係需要好多嘅自信心去知道自己想要啲乜嘢，以及係你點樣去抵抗嗰一種你無止境改善，但係你唔知道改到去邊嘅心理關口嘅。
個情況唔會好似陳驚咁樣嘅。就話去到某一個位，你就會減重，減完重呢，咁你就會達到一個目標。喺醫學美容嘅概念裡面呢，做完一個 Step 之後，你係有機會會反彈喇，即係你有機會會凹陷返喇、你嘅填充物會唔見咗喇，所以你係要一路重新再做過，或者係你要再做一啲新嘅療程去還原返你想要嘅模樣。變咗其實你做嘅療程呢，就會無止境地重複又重複、改變又改變。
我相信有好多人好擔心人工美嘅位就係，好多人會繼續整落去，而好多人整落去嘅原因就係因為「眼前嘅所謂紅蘿蔔」嘅呢個目標，一路放喺你眼前，但係你唔知道你可以改到幾多。
我作為一個冇醫療介入嘅肥人，以及係曾經呢一種有經歷過醫療介入嘅肥嘅情況之下呢，我哋都會面對緊一啲確實嘅生理嘅問題嘅。即係例如佢有知道中年危機，面對生理指標上面嘅危險指數；以及喺我眼中，我每一日出街，我著條裙，我大髀內側就會磨到好唔舒服、會磨到損晒嘅情況之下，我哋需唔需要醫療介入。定係正如好似有啲人所講，「我哋唔需要做醫療介入㗎，你多啲去做運動喇，你去斷食喇，你去做168喇」，或者係「你咪食清啲囉，你咪食啲水煮餐、食啲健身餐，就可以㗎喇」。呢一啲好單方面、冇特別判斷思考嘅評論之下，我哋點樣去接受，同埋面對緊我哋確實喺我哋離唔開嘅呢個軀殼，我覺得呢個先係我哋真正要去諗 Body positive 點樣真係可以 Positive 到嘅呢一個終極目標囉。因為你就咁叫人哋去 Positive，你只不過係叫人哋不斷同自己講「你好靚」，但係當外面嘅人都唔覺得你靚嘅時候，其實個反差感係會更加嚴重嘅。
香港有一啲肥 Model 企出嚟話：「我知我自己肥，但係我覺得我自己好靚。」呢一件事佢本身係可以帶動到其他嘅 Follower 知道自己係可以有靚嘅一面，但前提係佢哋有嘅資源以及係佢哋身邊嘅人對於佢嘅判斷。呢一種嘅反差係就咁宣揚 Body positive 呢一個倡議之下冇辦法解決㗎，因為每一個人佢嘅心路歷程都唔同，佢哋對身體嘅自卑同埋自豪建立嘅根基都唔同。所以面對現實嘅社會之下，Body positive 會有機會造就一個盲點，一邊話你外表好靚嘅情況之下，背後潛在住喺醫學上面判斷你好危險同唔健康嘅呢一啲現實。咁當呢兩件事放埋喺一齊，覺得「你靚」同埋覺得「你唔健康」，呢兩個形容詞之下，我哋點樣確實去認清呢兩件事係可以並存嘅呢？以及係呢兩件事，點樣消化、點樣調適？你先可以真正達到你對自己身體滿意、你唔會因為你身體嘅狀況而焦慮嘅局面囉。
所以我係提出：與其你 Positive，你不如嘗試對你身體有一個中性嘅態度，就係 Neutrality 喇。你知道你身體有啲咩唔好、你知道你身體有啲咩嘢好，你先可以好確實咁樣承認到你身體、你嘅軀殼係生成咁，而你有確實嘅自信去回應外面嘅負面情緒囉。
陳：我都覺得好啱，人就係一定係有唔同嘅面，一定有啲嘢係你覺得係好，有啲嘢覺得你唔好，最緊要係認識清楚自己，同埋有一個自己想去嘅目標。
M：面對 Body positive 呢一個文化，我覺得最首先係要抵抗咗你周遭潛移默化緊嘅嗰啲開口埋口就話「你肥咗瘦咗靚咗醜咗殘咗」嘅台詞喇，以及其他文化裡面俾你嘅一啲身體嘅負面嘅能量喇。
你要減少咗對呢一啲有毒嘅、好 Toxic 嘅思維，你先可以慢慢去舒緩到呢個社會，或者呢啲自拍呀、濾鏡呀 Filter 呀，造就咗嘅一啲身體焦慮嘅問題，你先可以慢慢去步入到你認清咗身體有嘅嘢：好定唔好，你點去權衡，你先可以好大聲咁同人哋講「我就係生到咁樣㗎啦，我係每個人都唔同嘅」我唔會怕你咁樣去挑剔我，我唔會怕你咁樣去笑我，因為呢一個確實係我而家活在嘅呢一副軀殼，你嘅自信先可以咁樣慢慢累積起嚟囉。
陳：你令我諗起呢，其實我覺得我哋每個人都可以稱讚多啲對方。我地有時候呢，喺 IG 上面見到一啲人真係好鍾意要用 Filter 先至 Post 相喇，咁但係其實事實上，佢哋唔用 Filter 嘅時候，我都唔覺得佢哋係有咁差嘅。點解一定要用 Filter 先至敢 Post 呢咁樣？可能你講返一句，你覺得對方係好靚呢，可能對方可能係真係好少聽到，唔好吝嗇一啲稱讚。
M：我可唔可以而家好粗暴嘅去收結呢一個節目就係話，所以呢，大家呢，就聽日開始就開始讚下我哋啦、讚下你身邊嘅人啦。咁如果你係想收到下一集嘅節目，就係 Subscribe 我哋嘅節目，同埋喺我哋嘅評分裏面打啲星星、Comment 我哋嘅節目喇。如果你有其他嘅話題想分享畀我哋或者想同我哋討論嘅話呢，可以喺我哋嘅 PrideLab Facebook或者係 @Pridelabhk Instagram message 俾我哋嘅。咁今次嘅節目呢就去到咁多喇，下一期同你《點止港同志》。
陳：Bye Bye！
M：Bye！