今集主持馬天娜為大家揀咗一篇關於【香港金融服務業裡面女同志和雙性戀女性僱員共融程度】嘅調查讀畀你聽。
調查係由嶺南大學文化研究系助理教授鄧芝珊博士、鄧惟君、陳詩琳、林寶琪、袁琦婷聯同The Hong Kong LGBT Interbank Forum和Lesbians in Finance合作。喺2020年5月至8月於女同志社交App Butterfly 以及研究者身邊工作同私人社交網路發放匿名網上問卷調查，同埋兩次焦點小組訪談收集數據完成。
章節
| 開始時間 | 標題 |
|---|---|
| 00:12:00 | 《女同性戀同雙性戀女性在香港職場的共融程度 》調查背景資料 |
| 01:04:00 | 調查統計重點資料 – 受訪者出櫃情況及職場限制 |
| 05:29:00 | 報告指出跨國企業共融情況有3個問題 |
| 07:25:00 | 受訪者覺得「出櫃」有咩意義 |
| 09:55:00 | 報告給僱主的建議 |
【讀/書畀你聽】女同性戀同雙性戀女性在香港職場的共融程度
歡迎收聽《點止港同志》，我係馬天娜。今集我揀左一篇關於香港金融服務業裡面女同志和雙性戀女性僱員共融程度嘅調查讀畀你聽。呢個調查係由嶺南大學文化研究系助理教授鄧芝珊博士、鄧惟君、陳詩琳、林寶琪、袁琦婷聯同香港跨銀行同志論壇，即係 The Hong Kong LGBT Interbank Forum 和 Lesbians in Finance 合作，喺2020年5月至8月於女同志社交App Butterfly 以及研究者身邊工作同私人社交網路發放匿名網上問卷調查，同埋兩次焦點小組訪談。收到103份問卷之後，統計發現
只有三成七嘅受訪者曾經在職場出櫃，亦有23%向部分關係密切嘅同事出過櫃。調查亦都發現企業裡面LGBT+員工面對「隱形天花板」的晉升問題，超過六成同意或多少同意同志喺公司存在著這種限制。
而問到女同志和雙性戀女性係咪比男同志更難喺職場上出櫃，超過七成同意 Lesbian 同雙性戀女性相比男同志更難喺職場出櫃。受訪者指出喺佢地嘅在主流文化 中，男同志被接納的程度較女同志高。女同 志和雙性戀女性不但身為女性，更是非異性戀者，這令壟斷權力位置的年長白人經常感受到『威脅』。
問到「公司有沒有向所有僱員提供與LGBT共融相關培訓」嘅時候，有六成六表示無，只有9%係強制每個人都要參加，其他受訪者就話係根據需求或者僱員主動同人力資源部門要求就會有。
調查中嘅其他結果就顯示，女同志和雙性戀女性在企業環境中難被看見，或者因為異性戀本位嘅社會文化，導致女同志和雙性戀女性覺得自己係異類，搭唔到嘴。例如有一位高層受訪者話未出櫃嘅時候佢無辦法參加公司聯誼活動，因為通常都假設要攜眷出席。因為都無辦法參與同事之間嘅討論。佢話出過櫃之後覺得自己自在左，會更加願意分享自己的生活畀同事知道，意識到自己係有影響到其他人。
亦都有 Focus group 嘅受訪者表示因為佢打扮似順性別嘅直女，所以無人會懷疑或者想問佢嘢，但係其他同事問佢係因為佢地都假設受訪者係直，所以不時會聽到有人問「你先生或者男朋友做咩嘢」。
我睇左呢份報吿，先知原來金融及銀行業係好靠生涯導師黎帶動自己工作升遷。如果缺乏生涯導師 Mentor 同 Mentee 之間良好嘅關係，薦升機會就會大打折扣。例如有一個受訪者就話「佢會避免與自己 Mentor共事，因為 Mentor 經常向自己施壓。每次傾計都聽到 Mentor 帶有言外之意嘅說話。受訪者會盡量避免和自己的導師一齊做嘢，繼而影響到佢嘅工作評級。」
佢地因為身為女性同埋性小眾呢兩個身分而承受更大壓力和焦慮，且擔憂佢地女同志和雙性戀女性嘅身份會被人質疑佢地工作效率同埋對公司嘅忠誠度 。有受訪者就話她必須比非 LGB 的同事加倍努力完成相同的工作，佢要花更多心機先可以同部門嘅高層人員建立聯繫。
除左自己嘅努力，原來有無打算建立家庭都會成為升職的關卡。一位受訪者就話「如果你一直告訴別人你是單身女性，那麼你的上司/主管就不會考慮將你 Promote上去。所以為左有機會升職，你就要話畀其他人知你確實是有家室，可能話自己已經有伴侶，或者你正考慮建立家庭之類。
報告有點出幾個問題
- 即使有跨國的公司近年積極參與支持同志的公開場合，例如香港同志遊行、Pink Dot 一點粉紅，喺金融行業中白人男同志擁有的話語權仍然係比較大，同埋佢地比較突出。
- 大多數受訪者都明確指出全球團隊與本地團隊之間嘅差距。跨國企業的共融政策同本地比較強調儒家思想的華人社會價值仍未完全接軌，個別受訪者對 本地主管的態度謹慎，讓他們在 LGBT 議題上傾向保守。基於這些顧慮，女同志和雙性戀員工在團隊建立的活動中，會避免倡議 LGBT 多元共融或分享個人故事。結果企業組織中的同志驕傲活動都係傾向吸引外籍員工而非香港本地員工參與。
- 概念的落差：我在一家台灣銀行工作。他們提到要尊重不同性傾向的人，但係都係掛在口邊。我們都知道同性婚姻在台灣是合法的，但這裡的人力資源部門從未談論過對同性伴侶的福利。
喺調查報告嘅後段，佢哋提咗一條問題就係對於從事商界嘅女同事或者雙性戀女性，「出櫃」意味住乜嘢呢？佢哋有人覺得呢一個係可以成為榜樣嘅表現，因為佢哋覺得喺企業嘅文化裏面身為女性已經好難，酷兒嘅女性榜樣就更加少。受訪者覺得，領導層缺乏出櫃同埋可以作為榜樣嘅 LGBT+ 女性，所以希望有唔同嘅身型、膚色同性別表達嘅 LGBT+ 女性可以企出嚟，令到更加多嘅人知道原來女同志唔係淨係得一個樣，唔係長頭髮就係直女，短頭髮就係TB。
頭先有講到有受訪者講咗自己出櫃前同後嘅心得，報告亦都有指出深櫃嘅 LGBT 人士每日都要耗費一定嘅精力嚟掩飾自己嘅身份。即使係單純嘅社交或者係同同事之間嘅消閑活動，佢哋都會好擔心自己嘅性小眾身份會受到差別甚至負面對待。而對於酷兒嘅女性嚟講，因為佢哋難以融入社群，亦都唔係經常受到歡迎，佢哋會覺得即使參加咗 LGBT 嘅僱員組織，對佢哋嚟講其實冇明顯嘅好處，甚至某一啲人覺得呢啲組織其實係為咗男同志或者外國同事而設，唔係真係可以吸引到香港本地嘅酷兒女性 ，造就左白人男同志獨大嘅局面。
而家嘅處境嚟講，因為現行嘅政策之中缺乏性小眾嘅代表，所以亦都好難提出要得到消除歧視政策裏面嘅明確保障。公司本身冇制定有關保障 LGBT 同事嘅條款嘅話，變相就係逼員工向管理層同人力資源部門發聲地出櫃。
而另一邊廂，對於直同志（Ally）嚟講，佢哋都會擔心如果佢哋主動支持 LGBT 族群嘅話，會畀人誤以為佢哋係同志。加上某啲公司管理層唔會主動宣揚同公開公司對同志員工嘅福利，所以員工其實唔係好清楚點樣可以正確使用啲條款去同公司申請福利。
最後報告畀咗幾個建議希望僱主可以改善。第一就係制定全面同多元嘅盟友培訓計劃。因為除咗同志社群之外，仲有好多來自不同種族、宗教背景嘅員工。喺制定解決方案同工作空間嘅時候，都要顧及唔同個體嘅需要。
第二就係確保公司裏面由上而下，由全球層面到本地團隊，一致清楚知道公司多元共融政策。因為如果公司嘅普世價值同在地文化有差異嘅話，即使上頭有共識要多元共融，呢啲價值都好難滲落去非管理層員工同埋所有團隊嘅職場文化裏面。所以要建立一個平台去清楚同員工講呢啲消除歧視嘅準則，而唔係就咁講幾句口號 。至少第一步就係畀所有嘅僱員接觸同埋理解同志嘅相關資訊，最最最基本至少知道乜嘢叫做 LGBT 先啦。
第三就係慎防職場裏面恐同、恐跨、種族歧視同埋性別主義。我估其實呢個都係常識黎嘅，我估。再加上面對出咗櫃嘅領導層同埋員工，都鼓勵公司盡量理解佢哋嘅個別感受，咁樣除咗可以幫助佢哋提升自信，亦都可以提升到公司嘅形象，影響到公司內部其他未準備出櫃嘅領導層同埋員工，可以對公司建立信任。
第四點，我都覺得幾重要嘅一點，就係審視下公司服裝守則一裏面有冇包括埋性別中立，（Gender netural）嘅表達。由上頭帶動啲政策落去本地嘅員工層嘅話，其實就唔使令到啲同事之間估估下見到一啲唔係典型女性打扮嘅員工嘅時候，又會加鹽加醋 。
睇完呢份報告，大家對於調查裏面嘅數字同埋建議有啲乜嘢想法呢？你工作嘅行業有冇一啲特定嘅同志關懷政策，或者遇到一啲「白貓黑貓最緊要就係做到嘢嘅貓」嘅開明老細呢？出櫃對於你嚟講又有無意義呢？歡迎你去我地 Instagram @Pridelabhk 同埋 Facebook 留言回覆我哋呀。
多謝你聽到最後，期待下一次同你《點止港同志》。