點解加入咗PrideLab？原來數數下都係2016年7月嘅事，起源係嗰期自己感情嘅空窗期，同其他小眾一樣，失戀康復後開始出返嚟想識人。點知就畀陳驚睇中咗我，搵我幫手拍片。
嗰陣感覺似被選中小孩咁，心諗：「唔係呀嘛？搵我？諗清楚喎！」哈，莫名奇妙嘅受寵若驚，當時仲畀埋自己Instagram，叫佢考慮清楚，擔心我個樣會影響收視無人睇。
聽到邀請嘅原意，再了解PrideLab係一個為小眾發聲嘅組織。好啦，呢世人都無乜機會為社會做咩貢獻，就去做好第一件事先啦。個陣算係我人生第一次上鏡嘛，心情又興奮又緊張，其實得我自己一個喺度緊張。
拍片之後，又唔係拍完就算，後期更被邀請一齊參加PrideLab定期會議。我喎？凡人都加入得？咁又因為好奇心同嗰刻感覺自己受尊重，又或者有種被需要嘅感覺，所以就開始咗參與實現員會議同活動。
呢六年隨咗PrideLab成長，我嘅感情、家庭同事業都轉變得好快，令到自己生活時間好唔穩定，覺得自己參與度好低，感到好抱歉陳驚同組織對自己嘅期望。
喺自己少咗參與嘅時間，一直有默默留意PrideLab動向，好多新加入實現員都好叻，有啲仲好似我當初入組織時咁有熱誠，亦見證住PrideLab幫好多小眾解決問題，亦無放棄過同大眾分享我哋係一班點樣嘅小眾。
一路走來，曾經懷疑自己仲應唔應該繼續留喺PrideLab，但正正係呢班人，我喺呢六年間嘅人生經歷同改變好大，高低起伏都有唔同實現員喺身邊支持，我哋除咗係戰友、伙伴，仲係大家嘅人生導航。
依家生活除咗忙之外，都好珍惜每次能為組織出一分力嘅時間。回顧返自己做過嘅：出樣拍片、出聲去錄音、幫手市集擺檔、做活動搞手、遊行旗手等等，我諗我都係幾享受拋頭露面嘅職位。
PrideLab繼續有嘢需要搵我，就會有【日日教練】嘅存在。
日日，現職跨性別健身教練；2016年受邀拍攝PrideLab影片，隨後加入PrideLab成為實現員至今。