2017年，就喺我離開香港之前嗰幾個月，我同另外一位喺香港提倡性慾性自主嘅朋友一齊同PrideLab 拍咗一條介紹性玩具同探討蕩婦羞辱嘅影片。無耐我就去台灣讀書，直到而家喺台灣生活。諗番起，我應該算係第一個海外實現員。話唔定其實好多實現員都冇見過我真人。哈哈。
因為讀書嘅關係，會經常接觸香港同台灣嘅性別動態。平時我會用個人身份，用呢個筆名去寫一啲同性/別相關嘅小文章。我唔會認自己係意見領袖，但係我會認自己係一個想提出意見嘅人。
加入PrideLab成為實現員，與其係話由上而下收組織指令幫忙，我反而覺得其實係一齊合作嘅夥伴。透過PrideLab嘅社交平台，我拓展到另外一個小小文字專欄，亦嘗試策劃網上聊天室，同其他身在海外關心性/別嘅參加者傾偈，交集唔同意見同經驗。
我提出將以英文主導嘅學術篇章翻譯做廣東話，用虛擬讀書會嘅形式讀畀其他人聽。希望令到更多嘅性/別小眾知道，縱使現今網上有好多途徑畀你表達自己嘅想法，我哋仍然需要主動參與、組織同紀錄，先可以令到小眾人士嘅生活同歷史得以關注同埋保存。
PrideLab呢個平台畀到空間我試下拉近社會同學術之間嘅鴻溝，將聽起上嚟好複雜，好高深嘅學術論文，用更多人聽得明嘅語言分享。我深信，未來性/別運動需要更多彈性同能動性。加入組織同PrideLab跨地域合作，讓我印證一件事：只要你有意見，同埋你想改變，地域同時區唔會係你嘅障礙。
馬天娜，非學術女性情慾研究者。曾任職香港情趣用品店店長，現居台灣。IG : @mtna.sc