「點解你會想做義工嘅？」
「好坦白答你，我係因為單身，想識多啲人，聽人講做義工係容易啲識到好多唔同人」
以上係怪叔叔當初問朕點解加入PrideLab嘅對話，朕當時的確係因為想識人，又覺得反正佢哋都招打字幕之嘛，又唔重workload，就決定申請做義工。
曾經朕好執著做同志運動，係一定要企出嚟上街，或者同政府爭取啲嘢先叫做幫到手。嗰時一路覺得自己只係做字幕，唔算得上幫咩同運手。但係，怪叔叔同朕講：「做同志運動唔一定要係企好前，唔一定要出樣抗爭先叫做幫到同運。做幕後都係幫緊，幫手唔一定要見樣或者量多先叫做幫到手。就算只係打字幕同樣係出緊一分力，幫助推動同運。」
即使當時我都唔明白點樣打字幕呢啲咁小嘢都幫到同運，但我都繼續做，結果到今日朕就真係明白點解。打字幕本身係想關顧到一啲小眾，等佢哋可以透過字幕都明白我哋嘅片係講咩，曾經有小眾提出字幕上做得唔好嘅地方，喺嗰個moment，我就感受到真係小小嘢都可以影響到人，影響到佢哋接唔接收到同運嘅資訊。
其後，朕做做下字幕，就想試下其他嘢，例如做social media，做主持。social media一路默默做，得到唔少迴響，更加有其他同運前輩欣賞。當有自己人因為之前出席過嘅活動，而喺club到認得朕，對同運嘅事更有興趣，嗰種感覺的確更加肯定自己所做緊嘅事係正確。亦都印證咗怪叔叔講嘅嗰句說話，打字幕確實都可以係幫到好大忙，幫緊推動同運，以自己所做嘅事去影響其他人。
2018年，朕由打字幕，到social media，到活動或者網台客串主持。由喺櫃嘅深深處，到到企出嚟上街參加HKPride遊行，朕想同大家講你哋都可以幫到同運。大家如果好想爭取同性婚姻，好想平權，好想立法反歧視，可以由一小步做起。
皇上，2017年加入PrideLab成為字幕組實現員，2018年開始成為Social Media小編成員以及出席實體活動現場支援。
Like this:
Like Loading...
